Inki mutindu Yezu lenda balula luzingu na nge?

YEZU KRISTU vandaka Longi mosi ya Nene ya kuzingaka na Palestine kiteso ya bamvula 2000 meluta. Bantu kuzaba mambu fyoti yina metala bumwana na yandi. Kansi, yo kele pwelele nde ntangu yandi vandaka ti bamvula 30, yandi yantikaka kisalu ya “kutuba kitemwe na mambu yina kele ya kieleka.” (Yoane 18:37; Luka 3:​21-23) Balongoki iya yina kusonikaka mambu yina metala luzingu na yandi, ketubila mambu yina kulutaka na bamvula tatu ti ndambu yina kulandaka.

Na ntangu yandi vandaka kusala kisalu na yandi, Yezu pesaka na balongoki na yandi ntuma yina lendaka kuvanda nkisi sambu na makambu mingi ya inza. Inki ntuma yango? Yezu tubaka nde: “Nsiku mosi ya mpa ya mono ke pesa beno yo yai: Beno zolana beno na beno. Mutindu mono me zolaka beno, beno mpi beno zolana beno na beno.” (Yoane 13:34) Ee, zola kesadisaka na kumanisa makambu mingi yina bantu kekutanaka ti yo. Kele ti mbala yankaka bantumwa kuyulaka Yezu nsiku ya kuluta nene, Yezu vutulaka nde: “ ‘Nge fweti zola Mfumu Nzambi na nge na ntima na nge yonso, na luzolo na nge yonso ti na mabanza na nge yonso.’ Yina kele nsiku me luta mfunu, yo kele mpi nsiku ya ntete. Nsiku ya zole kele mpi mfunu kiteso mosi na yina ya ntete, yo yai: ‘Nge fweti zola mpangi na nge bonso nge mosi.’ ”​—⁠Matayo 22:​37-40.

Yezu monisaka beto na bangogo ti na bisalu mutindu ya kuzola Nzambi ti bampangi na beto bantu. Bika beto tadila ndambu ya bambandu mpi beto tala nki yo lenda longa beto.

Malongi na yandi

Na disolo mosi ya mezabana mingi na nkenda, kele ti mambu ya Yezu Kristu zabisaka balandi na yandi nde: “Ata muntu mosi ve lenda sadila bamfumu zole. Yandi ta zola mfumu mosi kansi yina ya nkaka ve, yandi ta lemfuka na mfumu mosi kansi yandi ta vwenza yina ya nkaka. Beno mpi, beno lenda sadila bamfumu yai zole ve, Nzambi ti kimvwama.” (Matayo 6:24) Keti bubu yai beto fwete sadila mpi dilongi ya Yezu yina ketuba nde beto tula Nzambi na kisika ya ntete na luzingu na beto, kana bantu mingi kekwikila nde mbongo kemanisaka mpasi yonso? Ya kyeleka, beto kele na mfunu ya mbongo sambu na kuzinga. (Longi 7:12) Kansi, kana beto bika nde “Kimvwama” kukuma mfumu na beto, ‘zola ya mbongo’ takuma kutwadisa beto, mpi yo tayala luzingu na beto ya mvimba. (1 Timoteo 6:​9, 10) Bantu mingi ya mebwaka na mutambu yai mesukaka na kuvidisa mabuta na bo, mavimpi na bo, ata nkutu luzingu na bo.

Kima yankaka kele nde kubaka Nzambi bonso Mfumu na beto kepesaka ntendula na luzingu na beto. Bonso Ngangi, yandi kele Nto ya luzingu, ebuna, yandi mpamba muntu mefwana na kubaka lusambu na beto. (Nkunga 36:9; Kusonga 4:11) Bayina kelongukaka bikalulu na yandi mpi kesukaka na kuzola yandi, bo kezitisaka bansiku na yandi. (Longi 12:13; 1 Yoane 5:⁠3) Kana beto kesala mpidina, beto takudibakila mambote beto mosi.​—⁠Yezaya 48:⁠17.

Na Disolo na yandi na zulu ya Ngumba, Yezu longaka mpi balongoki na yandi mutindu ya kumonisa zola na bampangi na bo bantu. Yandi tubaka nde: “Beno sala bantu ya nkaka mambu yonso yina ya beno zola nde bo sala beno.” (Matayo 7:12) Ngogo “bantu” yina Yezu sadilaka na kisika yai, kezola tuba nkutu nde ti bambeni na beto. Kaka na disolo yina, yandi tubaka nde: “Beno zola bambeni na beno, samba Nzambi sambu na bantu yina ke monisaka beno mpasi.” (Matayo 5:​43, 44) Keti zola ya mutindu yai lenda ve kumanisa makambu ya beto kekutana na yo bubu yai? Mfumu ya bantu ya Inde, Mohandas Gandhi yindulaka nde yo kele mpidina. Yandi tubaka nde: “Kana [beto] yonso kuvukana na malongi yina Yezu pesaka na Disolo yai na zulu ya Ngumba, beto tamanisa bampasi ya inza ya mvimba.” Kana bantu kusadila malongi ya Yezu yina ketubila zola, yo lenda manisa bampasi mingi ya bantu.

Bisalu na yandi

Yezu kulongaka kaka ve malongi ya nene ya kemonisa mutindu ya kumonisa zola, kansi yandi vandaka kusadila mpi mambu yina yandi vandaka kulonga. Mu mbandu, yandi tulaka mambote ya bantu yankaka na ntwala ya mambote na yandi mosi. Kilumbu mosi, Yezu ti balongoki na yandi vandaka ti kisalu mingi ya kusadisa bantu na mpila nde bo zwaka ata ntangu ve ya kudya. Yezu monaka nde balongoki na yandi vandaka na mfunu ya kupema fyoti, ebuna yandi nataka bo na kisika mosi ya kingenga sambu bo pema. Kansi ntangu bo kumaka na kisika yina, bo monaka kibuka mosi ya bantu kekinga bo. Inki nge zolaka kusala na kumona kibuka ya bantu kekinga nde nge sala kima sambu na bo na ntangu yina nge fwete pema fyoti? Na kuyituka yonso, Yezu “wilaka bo mawa” ebuna, yandi “yantikaka kulonga bo mambu mingi.” (Marko 6:34) Kuwa susi sambu na bantu yankaka vandaka kupusa Yezu na kusadisa bantu ntangu yonso.

Yezu salaka mambu mingi sambu na bantu, yandi vandaka kulonga bo mpamba ve. Yandi vandaka kupesa bo mpi lusadisu. Mu mbandu, kilumbu mosi, yandi pesaka madya na bantu kuluta 5000 yina vandaka kuwidikila yandi tii na mpimpa kilumbu yina. Ntangu fyoti na nima ya kusala mpidina, yandi disaka kibuka mosi dyaka ya nene ya bantu, ntangu yai bo vandaka bantu kuluta 4000 yina vandaka kuwidikila yandi bilumbu tatu ya mvimba ye mpi bo vandaka ve ata ti kima ya kudya. Na mbala ya ntete, yandi sadilaka mampa tanu ti bambisi zole, ebuna na mbala ya nima, yandi sadilaka mampa nsambwadi ti tubambisi fyoti. (Matayo 14:​14-22; 15:​32-38) Bimpa? Ee, yandi vandaka muntu mosi ya vandaka kusala bimpa.

Yezu belulaka mpi bantu mingi yina vandaka bambefo. Yandi belulaka kifwa-meso mosi. Muntu mosi ya vandaka kutambula kifu, bantu ya vandaka kubela lepre, ti bifwa-makutu. Kima ya kuyituka dyaka kele nde yandi tedimisaka bafwa! (Luka 7:22; Yoane 11:​30-45) Kilumbu mosi, muntu mosi yina vandaka kubela maladi ya lepre bondilaka Yezu nde: “Kana nge zola, nge lenda belula mono.” Inki Yezu kusalaka? “Yesu wilaka bakala yango mawa. Yandi tandula diboko na yandi, yandi simba yandi, ebuna yandi tuba nde: ‘Mono me zola; beluka ka nge.’ ” (Marko 1:​40, 41) Na nsadisa ya bimpa yina Yezu monisaka zola na yandi na bantu yina vandaka kumona mpasi.

Keti yo ke mpasi na kukwikila na bimpa ya Yezu? Bantu mingi kekwikilaka ve. Kansi, zaba nde Yezu vandaka kusala bimpa na yandi na meso ya bantu yonso. Ata bambeni na yandi yina vandaka kusosa kuzwa yandi na kifu konso ntangu, kukaka ve kubuya nde yandi vandaka muntu mosi yina vandaka kusala bimpa. (Yoane 9:​1-34) Zaba dyaka nde, bimpa na yandi vandaka ti lukanu. Yo sadisaka bantu na kuzaba nde yandi kele Muntu yina ya Nzambi kutindaka.​—⁠Yoane 6:⁠14.

Ntangu yandi vandaka kusala bimpa, Yezu vandaka kuzola ve kubenda dikebi ya bantu na yandi mosi. Kansi, yandi vandaka kukumisa Nzambi, Nto ya ngolo yina yandi vandaka na yo. Na Kapernaumi, kilumbu mosi yandi vandaka na nzo mosi ya kufuluka ti bantu. Muntu mosi ya kufwa makulu vandaka kusosa nde Yezu kubelula yandi, kansi mpila ya kukota kuvandaka ve. Banduku na yandi kotisaka yandi na ludi ya nzo na zulu ya mbeto. Ntangu yandi monaka lukwikilu na bo, Yezu belulaka muntu yina. Na nsuka, bantu “vandaka kupesa Nzambi lukumu” yempi bo vandaka kutuba nde: “Beto me monaka ntete ve mambu ya mutindu yai.” (Marko 2:​1-4, 11, 12) Bimpa ya Yezu pesaka nkembo na Yehowa, Nzambi na yandi, mpi yo sadisaka bantu yina vandaka na mfunu na yo.

Kansi, kubelula bantu na kimpa kuvandaka ve lukanu ya ntete na kisalu ya Yezu. Muntu mosi ya kusonikaka disolo ya luzingu ya Yezu, tendulaka nde: “Bo sonikaka mambu yai sambu beno kundima nde Yesu kele Mesia, Mwana-Nzambi, sambu kana beno kutula ntima na yandi, beno kuvanda na moyo sambu na yandi.” (Yoane 20:31) Ee, Yezu kwisaka na ntoto sambu bantu yina kele ti lukwikilu kuzwa dibaku ya kubaka luzingu.

Kimenga na yandi

Nge lenda yula nde, ‘Keti Yezu kwisaka na ntoto?’ ‘Yandi katukaka wapi?’ Yezu yandi mosi tubaka nde: “Mono katukaka na zulu sambu na kwisa kusala luzolo na mono mosi ve, kansi sambu na kwisa kusala luzolo ya muntu yina tindaka mono.” (Yoane 6:38) Yandi zingaka ntete na ntwala ya kukuma muntu bonso Mwana mosi kaka ya Nzambi ya kubutukaka. Luzolo ya muntu yina kutindaka yandi na ntoto kuvandaka nki? Yoane, yina kele na kati ya bantu yina kusonikaka evanzile ketuba nde: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” (Yoane 3:16) Inki mutindu dyambu yai zolaka kusalama?

Biblia ketendula mutindu lufwa kumaka kima mosi ya bantu lendaka kutina ve. Nzambi pesaka na bankwelani ya ntete luzingu ti kivuvu ya kuzinga kimakulu. Kansi, bo kolamaka na Ngangi na bo. (Kuyantika 3:​1-19) Kima yai ya mbi, disongidila, disumu ya bantu ya ntete, salaka nde bana ya Adami ti Eva mebakaka kima yai ya mawa, lufwa. (Roma 5:12) Sambu na kupesa bantu luzingu ya kyeleka, yo kelomba kukatula kimakulu disumu ti lufwa.

Ata muntu ya siansi mosi ve lenda katula lufwa na nsadisa ya bima yina bantu ya mayele kesalaka. Kansi, Ngangi ya bantu kele ti kima yina lenda kumisa bantu ya bulemfu bantu ya kukuka, na mpila nde bo zinga kimakulu. Na Biblia, kima yango bo kebingaka yo nkudulu. Bankwelani ya ntete kuditekaka bo ti bana na bo na kimpika ya masumu ti ya lufwa. Bo tekaka luzingu na bo bonso bantu ya kukuka ya bulemfu na Nzambi, sambu na luzingu ya kimpwanza ti Nzambi, sambu bo zengaka bo mosi nki kele mambu ya mbote ti mambu ya mbi. Sambu na kusumba dyaka luzingu ya kukuka sambu na bantu, yo lombaka kufuta kima mosi ya fwete kukana ti luzingu ya kukuka yina bibuti na beto ya ntete kuvidisaka. Mutindu bo kebutukaka ya kukonda kukuka, ata muntu mosi ve kukaka kufuta kima yango.​—⁠Nkunga 49:⁠7.

Na yau, Yehowa Nzambi yandi mosi nataka lusadisu. Yandi tulaka luzingu ya kukuka ya Mwana na yandi mosi yina kubutukaka na divumu ya mwense mosi, yina kubutaka Yezu. Bamvula meluta, nge lendaka kutula ntembe nde mwense lenda buta ve. Kansi, bubu yai, bantu ya siansi kekukaka kusala nde bo kotisa ba gènes ya mbisi mosi na mbisi yankaka. Ebuna, nani mpenza lenda tula ntembe na mayele ya Nzambi ya kusala nde muntu kubuta na kimpa?

Sambu na luzingu ya muntu ya kukuka yai, ntalu ya kufuta sambu na kukatula bantu na masumu mpi na lufwa kumonanaka. Kansi, yo lombaka nde mwana ya fyoti yai ya kubutukaka na zina ya Yezu kuyela sambu na kukuma “munganga” ya mefwana sambu na kupesa “nkisi” yina tamanisa bampasi ya bantu. Yandi salaka dyambu yai sambu yandi vandaka ti luzingu ya kukuka, mpi ya kukonda masumu. Yezu monaka ve kaka mpasi ya bantu kemonaka na nsi ya masumu, kansi yandi monaka mpi kisika ngolo ya nitu ya bantu kesukaka. Dyambu yai kukumisaka yandi nkutu munganga mosi ya mawa. (Baebreo 4:15) Bimpa yina yandi salaka na kubelula bantu ntangu yandi vandaka na ntoto, monisaka nde yandi kele ti luzolo mpi ti ngolo ya kubelula bantu ya maladi.​—⁠Matayo 4:⁠23.

Na nima ya kusala kisalu bamvula tatu ti ndambu awa na ntoto, bo fwaka Yezu na bambeni na yandi. Yandi monisaka nde muntu ya kukuka lenda lemfuka na Ngangi ata na kati ya mimekamu ya kuluta nene. (1 Piere 2:22) Luzingu na yandi ya kukuka yina yandi tambikaka kukumaka nkudulu, yina fwanaka na kukatula bantu na masumu ti na lufwa. Yezu Kristu tubaka nde: “Kuzola ya kuluta nene ya muntu lenda vanda na yo na ntima yo yai: kana yandi pesa moyo na yandi sambu na banduku na yandi.” (Yoane 15:13) Na kilumbu ya tatu na nima ya lufwa na yandi, Nzambi futumunaka Yezu sambu na luzingu ya kimpeve, mpi na nima ya bamposo, yandi mataka na zulu sambu na kufuta nkudulu na Yehowa Nzambi. (1 Korinto 15:​3, 4; Baebreo 9:​11-14) Sambu yandi salaka mutindu yina, Yezu kukaka kusadila ntalu ya kimenga ya nkudulu na yandi na bantu yina kelandaka yandi.

Keti nge kezola kubaka mambote ya mutindu yandi kebelula bantu na maladi ya kimpeve, ya mawi, mpi ya kinsuni? Sambu na kubaka mambote yango, yo kelomba nge tula lukwikilu na Yezu Kristu. Keti yo kelomba ve nde nge kwenda na Munganga nge mosi? Nge lenda sala yo kana nge longuka mambu yina metala Yezu Kristu ti kisalu ya yandi kesala sambu na kugulusa bantu ya kwikama. Bambangi ya Yehowa tavanda na kyese ya kusadisa nge.

 [Kifwanisu ya kele na lutiti 5]

Yezu kele ti luzolo ti ngolo ya kubelula bantu ya maladi yonso

 [Kifwanisu ya kele na lutiti 7]

Lufwa ya Yezu kepusaka nge na kusala nki?