Kivuvu kepesaka beto kikesa, ebuna zola kepusaka beto
Kivuvu kepesaka beto kikesa, ebuna zola kepusaka beto
“Ntangu yai me bika mambu yai tatu: lukwikilu, kutula ntima, ti kuzola; kansi na mambu yai yonso tatu, kuzola me luta mfunu.” —1 KORINTO 13:13.
1. Inki mutindu ntumwa Polo kekebisa beto?
NTUMWA Polo kekebisa beto nde, lukwikilu na beto lenda dinda bonso maswa. Yandi ketuba mutindu yai: “Vanda na lukwikilu kaka, vanda mpi na mabanza ya mbote na ntima. Bantu ya nkaka me katulaka mabanza ya mbote na ntima na bo; yo yina, bo me vidisaka lukwikilu na bo.” (1 Timoteo 1:19) Na mvu-nkama ya ntete T.B., bo vandaka kusala bima ya kutambudila na nzadi na nsadisa ya mabaya. Sambu yo kuka kutambula mbote na zulu ya masa, yo vandaka kulomba kusadila mabaya ya banti ya mbote mpenza mpi kuvanda ti mayele ya kutungila maswa.
2. Sambu na nki yo kelomba kutunga mbote maswa ya lukwikilu na beto, mpi yo kelomba nde beto sala inki?
2 Kima ya beto lenda binga maswa ya lukwikilu na beto fwete dinda ve ata na kati ya kitembo ya ngolo ya masa, disongidila kimvuka ya bantu. (Yezaya 57:20; Kusonga 17:15) Yo yina, yo kelomba kutunga yo mbote, ye beto mosi fwete tula ngolo na kisalu na beto. Ntangu “masa” ya inza ya Bayuda ti ya bantu ya Roma vandaka kunikana ngolo kibeni sambu na Bakristu ya ntete, Yude kusonikaka nde: “Bampangi na mono, beno tula ngolo kaka na kuvanda diaka na lukwikilu mingi ya [santu]. Beno samba Nzambi na ngolo ya Mpeve-Santu; beno zinga kaka na kuzola yina ya Nzambi ke zolaka beno ntangu beno ke vingila nde Mfumu na beto Yesu Kristo, sambu na mawa na yandi, yandi kupesa beno moyo ya mvula na mvula.” (Yude 20, 21) Mutindu Yude mpi kutubilaka kunwana sambu na ‘malongi [to, “lukwikilu”] yina ya Nzambi pesaka na bantu na yandi,’ bangogo ‘lukwikilu mingi ya santu’ lenda tubila malongi ya Bukristu yonso, ti nsangu ya mbote ya luguluku. (Yude 3) Kristu kele fondasio ya lukwikilu yina. Beto kele na mfunu ya lukwikilu ya ngolo kana beto kezola kuvanda ti lukwikilu ya kyeleka ya Bukristu.
Beto nwana ti kitembo ya “tumabundu ya luvunu ya kepesa boma”
3. Inki mutindu bantu mingi kesadila ‘boma yina tumabundu ya luvunu’ kepesa?
3 Na bamvula yai, tumabundu ya luvunu kepusaka bantu mingi na kudifwa na kimvuka, bo kefwaka bantu yankaka, to bo kebasikilaka bo ti minduki na maboko. Yo yina, bantu mingi, ti bamfumu ya politiki ya masonga, kesala ngolo na kutanina bantu yina kezabaka kwa bo ve ata kima mosi na mambu yina keluta, mingimingi batoko, na tumabundu ya luvunu mpi ya kigonsa ya mutindu yai. Ntembe kele ve nde, “nzambi ya ntangu yai” ya kepusaka bantu na kusala nku ya mutindu yai, yandi muntu mebasisaka kima ya bantu mingi kebinga tumabundu ya luvunu ya boma, mpi yandi kesadila yo sambu na kumonisa bantu ya Yehowa mpasi. (2 Korinto 4:4; Kusonga 12:12) Bantu mingi kesadilaka mambu yai sambu na kubenda kimbeni na kisalu na beto. Na bansi mingi, bo mesalaka bakampanye ya ngolo sambu na kutanina bantu na “tumabundu ya kigonsa” kansi bo ketangaka Bambangi ya Yehowa kukonda kikuma ya kyeleka na kati ya tumabundu yina, ebuna bo kefunda beto nde beto kebendumunaka bantu. Dyambu yai mekumisa kisalu ya kuta kimbangi nzo na nzo mpasi kibeni na bansi ya Mputu mpi yo mesala nde bantu mingi yina vandaka kulonguka Biblia meyambula kulonguka. Yo melembisa mpi bampangi na beto yankaka.
4. Sambu na nki ata bantu kezola ve kyeleka yo fwete lembisa beto ve nitu?
4 Kansi, olie yo kulembisa beto nitu, kana bantu kemenga beto, yo fwete pesa beto kikesa nde beto kele na dibundu ya kyeleka ya Bukristu. (Matayo 5:11, 12) Bantu fundaka Bakristu ya ntete nde bo vandaka kadibundu mosi ya kubendumuna bantu, mpi nde bisika yonso bo vandaka ‘kuzola ve kimvuka yina.’ (Bisalu 24:5; 28:22) Kansi ntumwa Piere pesaka bampangi na yandi bankwikidi kikesa ntangu yandi sonikaka nde: “Bampangi na mono ya mono ke zolaka, beno yituka ve kana beno ke mona mpasi mingi, bonso nde kima mosi ya nene me kwisila beno. Kansi beno vanda na kiese kana beno ke mona mpasi yina ya Kristo monaka, sambu kana beno ke mona mpasi yina, ebuna beno ta vanda na kiese mpenza ntangu lukumu na yandi ta monika.” (1 Piere 4:12, 13) Mutindu mosi mpi, muntu mosi ya nto-kimvuka ya mvu-nkama ya ntete kusonikaka nde: “Bampangi na mono, kana bampasi ya mutindu na mutindu ke bwila beno, beno fweti baka yo bonso mambu mosi ya kiese; sambu beno zaba nde, kana lukwikilu na beno kele kaka [ngolo] ata na ntangu ya mpasi, mpidina ke songa nde beno zaba kukanga ntima. Beno kanga ntima tii kuna, ebuna beno ta vanda bantu ya mbote mpenza, ata mambu mosi mpi ta konda beno ve.” (Yakobo 1:2-4) Kaka mutindu mupepe ya ngolo kemekaka maswa kana yo mefwana na kutambula na zulu ya masa, mutindu mosi mpi mupepe ya kimbeni tamonisa kana maswa ya lukwikilu na beto kele ti bisika yina ke ngolo ve.
Mpasi kebutaka kikalulu ya kukanga ntima
5. Inki mutindu beto lenda zaba kana lukwikilu na beto kele ngolo na ntangu ya mpasi?
5 Bakristu lenda tuba nde bo kele ti kikalulu ya kukanga ntima mpi nde lukwikilu na bo kele ngolo kaka na nima ya kunwana ti bitembo ya bampasi. Kukanga ntima na beto ‘takumisa beto bantu ya mbote mpenza’ na kitembo ya masa kaka kana ‘beto kekonda ata mambu mosi ve,’ mpi kana beto kele ti lukwikilu ya ngolo. Polo sonikaka nde: “Kansi beto ke songaka na mambu yonso nde beto ke sadilaka Nzambi: beto ke kangaka ntima ngolo na bampasi ya mutindu na mutindu.”—2 Korinto 6:4.
6. Sambu na nki beto fwete “mona kiese ata beto ke mona mpasi,” mpi nki mutindu dyambu yai kekumisaka kivuvu na beto ngolo?
6 Mupepe ya ngolo ya mpasi ya beto lenda mona bantangu yankaka, beto fwete baka yo bonso ntangu ya kumonisa nde maswa ya lukwikilu na beto kele mbote mpenza mpi ngolo. Polo sonikilaka Bakristu ya Roma nde: “Beto ke mona kiese ata beto ke mona mpasi, sambu beto zaba nde, kana muntu kumona mpasi yandi ta longuka na kukanga ntima. Kana muntu kukanga ntima, yandi ta longuka mpi na kuvanda na kikesa ata yandi ke mona mpasi. Ebuna, kana muntu kuvanda na kikesa ata yandi ke mona mpasi, yandi ta longuka mpi na kutula ntima. Kana beto tula ntima, beto ke kudikusa ve, sambu Nzambi tulaka kuzola na yandi na ntima na beto na lusadisu ya Mpeve na yandi yina ya yandi pesaka beto.” (Roma 5:3-5) Kubikala ngolo na ntangu ya mpasi kesalaka nde Yehowa kundima beto. Ebuna, bonso beto mezaba dyambu yai, kivuvu na beto kekuma ngolo.
Bikuma ya kedindisaka bantu yankaka
7. (a) Mutindu bangogo ya Polo kemonisa yo, nki mutindu bantu mingi mevidisaka lukwikilu na bo? (b) Inki mutindu bantu mingi meyambulaka kyeleka bubu yai?
7 Ntangu Polo kebisaka bantu na ‘kuvidisa’ ve lukwikilu na bo, yandi vandaka kuyindula bantu yina “me katulaka” mabanza ya mbote ya kansansa na bo mpi bo mevidisaka lukwikilu na bo. (1 Timoteo 1:19) Imeneo ti Alesandre vandaka na kati ya bantu yina kubwaka na malongi ya luvunu. Bo bikisaka kyeleka mpi bo yantikaka kutuba mambu ya mbi. (1 Timoteo 1:20; 2 Timoteo 2:17, 18) Bubu yai, ba aposta, yina mebikisaka kyeleka, kenwanaka ti “mpika ya kwikama mpi ya mayele” na munoko. Na kutuba ya mbote, bo ketatikaka diboko yina vandaka kudisa bo madya ya kimpeve. Bankaka kele bonso ‘mpika yina ya mbi’ ya kutubaka kukonda nsoni nde: “Mfumu na mono me sukinina na kwisa kuvutuka.” (Matayo 24:44-49, NW; 2 Timoteo 4:14, 15) Bo kendimaka ve nde nsuka ya mambu ya inza yai ya mbi mekuma penepene, mpi bo ketubaka mambu ya mbi na kimvuka ya mpika yai ya kebikalaka meso ya kukangula na kimpeve sambu yandi kelembaka ve na kuzabisa bantu ya Yehowa nde kilumbu ya Yehowa ke na kukwisa nswalu. (Yezaya 1:3) Ba aposta ya mutindu yai kenunga na ‘kuvidisa lukwikilu ya bantu mingi.’ Mpidina, bo kebwisa bo na kimpeve.—2 Timoteo 2:18.
8. Inki kima mesalaka nde bantu mingi medindisaka to mefwaka maswa ya lukwikilu na bo?
8 Bakristu yankaka ya mekudipesaka mefwaka maswa ya lukwikilu na bo na kukonda kuwila kansansa na bo mpi na kudipesa mingi na kusosa byese ya inza yai ti mansoni na yo. (2 Piere 2:20-22) Kansi bankaka mevidisaka maswa ya lukwikilu na bo sambu bo kemona nde kisika ya kupema yango ya inza ya mpa kekwisa ve nswalu. Sambu bo kekukaka ve na kuzaba kiteso ya ntangu ya mebikala sambu bambikudulu yankaka kulungana, bo ketulaka “kilumbu ya Yehowa” ntama na mabanza na bo, yo yina bo keyambula lusambu ya kyeleka. (2 Piere 3:10-13; 1 Piere 1:9) Kansi bo kesukininaka ve na kumona nde bo mekudikotisa kibeni na katikati ya masa ya inza yai ya kenikana ngolo. (Yezaya 17:12, 13; 57:20) Bantu mingi ya meyambulaka kukwenda na dibundu ya Bukristu kendimaka kaka nde yo kele dibundu ya kyeleka. Kansi, yo ke pwelele nde bo kekondaka kukanga ntima ti kikesa yina kele mfunu sambu na kukinga inza ya mpa yina Yehowa Nzambi mesilaka. Bo kemonaka nde luzingu na kati ya Paladisu kesukinina na kukwisa.
9. Inki Bakristu mingi ya mekudipesaka kele na kusala, ebuna mambu yai kepusa beto na kutadila nki?
9 Na bisika mingi na inza, Bakristu mingi ya mekudipesaka mekuma kulembisa maboko na bo na yina metala kunata maswa ya lukwikilu na bo. Maswa na bo kele ntete na zulu ya masa, kansi olie ya kukwenda na ntwala na lukwikilu yonso, bo meyantika kukwenda na vitesi mosi ya malembe kibeni. Bantu yankaka ya kuyambaka kyeleka ti ngindu nde “ntama mingi ve Paladisu kekwisa,” bo kudipesaka kibeni sambu na kukota kana yo mekwisa, yo yina bo vandaka kusala kisalu ya kusamuna ti kikesa yonso mpi bo vandaka kukwenda mbala na mbala na balukutakanu yonso, ya fyoti, ti ya nene. Kansi ntangu yai mutindu bo memona nde bivuvu na bo kele ata ti nsudi ya kulungana ve, bo kesala dyaka ve ti kikesa mutindu bo vandaka kusala ntete. Yo kemonana na mpila bo kesamunaka dyaka mingi ve, bo kekwisaka dyaka ve mbala na mbala na balukutakanu, mpi bo kevandaka ve na bitini yankaka ya balukutakanu ya fyoti to ya nene. Bankaka kelutisa ntangu mingi na kusakana ti na kusosa bima ya kinsuni. Mambu yai kepusa beto na kutadila mambu ya fwete pusa beto na kudipesa na Yehowa na luzingu na beto. Keti kikesa na beto na kisalu ya Nzambi fwete katuka na kivuvu ya kuyindula nde “ntama mingi ve Paladisu kekwisa”?
Kivuvu kele bonso ndobo ya maswa
10, 11. Polo fwanisaka kivuvu na beto na nki, mpi sambu na nki kufwanisa yai kele ya mbote kibeni?
10 Polo kutubaka nde Yehowa silaka nde balusakumunu takwisa na nzila ya Abrahami. Na nima, ntumwa yai tendulaka nde: “Nzambi . . . zengaka na zina na yandi mosi ntangu yandi silaka mambu yina. Mambu yina zole: lusilu ti kuzenga, yo lenda soba ve, Nzambi lenda tuba luvunu ve sambu na yo. Yo yina, beto bantu yina me mona kisika ya kwenda kubumbana na yandi, beto ke na kikesa mingi na kusimba mbote-mbote mambu yina ya beto me tulaka ntima, mambu yina ya Nzambi ke zola kupesa beto. Mambu yina ya beto me tulaka ntima yo kele bonso kibende [to “ndobo,”] yina ke kangaka maswa. Yo ke pesaka kikesa ti ngolo na ntima na beto.” (Baebreo 6:17-19; Kuyantika 22:16-18) Kivuvu ya Bakristu ya kupakulama kele luzingu yina kefwaka ve na zulu. Bubu yai, Bambangi ya Yehowa kele ti kivuvu ya kitoko ya kuzinga kimakulu na paladisu na ntoto. (Luka 23:43) Ata muntu mosi ve lenda vanda ti lukwikilu kana yandi kele ve ti kivuvu ya mutindu yina.
11 Ndobo ya maswa kele kima mosi ya nene ya lutaninu. Yo kele mfunu mingi kibeni sambu na kukanga maswa kisika mosi mpi sambu yo kulumuka ve. Kapitene ya maswa lenda kwenda ve kana ndobo yina kele ve. Polo kubalukaka na maswa mbala mingi, yo yina yandi zabaka nde luzingu ya bantu yina ketambula na maswa mesimbama kibeni na bandobo ya maswa na bo. (Bisalu 27:29, 39, 40; 2 Korinto 11:25) Na mvu-nkama ya ntete, bamaswa kuvandaka ve ti motere yina lendaka kusadisa kapitene na kubaluka mutindu yandi mezola. Katula kaka bamaswa yina bo vandaka kusadila na bitumba, yo vandaka kutambula na nsadisa ya bilele yina vandaka kufuluka na mupepe. Sambu na kubaluka na yo, kima vandaka mfunu vandaka mupepe. Kana maswa kele na kigonsa ya kukwenda na bisika ya matadi, kapitene vandaka kaka ti kima mosi ya kusala, kulosa ndobo yina mpi kunwana ti mupepe ya ngolo, sambu yandi vandaka kutula ntima nde ndobo yina takonda ve kukangama na kima mosi na nsi ya masa. Yo yina, Polo fwanisaka kivuvu ya Mukristu na ‘kibende yina ke kangaka maswa, yina ke pesaka kikesa ti ngolo na ntima.’ (Baebreo 6:19) Kana mupepe ya ngolo ya bambeni to mimekamu yankaka kenikisa beto, kivuvu na beto kele bonso ndobo yina kesadisa beto na kuvanda na luzingu, na mpila nde maswa ya lukwikilu na beto kukangama ve na zelo ya badute to kututana ve na matadi ya mbi ya ba aposta.—Baebreo 2:1; Yude 8-13.
12. Inki mutindu beto lenda sala sambu na kubuya ve Yehowa?
12 Polo kebisaka Bakristu ya Ebreo nde: ‘Bampangi na mono, beno keba, na kati na beno muntu lenda [kuma] na ntima ya mbi . . . ya kukonda lukwikilu, kana . . . yandi buya Nzambi ya moyo.’ (Baebreo 3:12) Na Kigreki, ‘kubuya’ ya bo mesadila ketendula “kutelama ntama,” disongidila, kulonga malongi ya luvunu. Beto lenda buya kufwa ya mutindu yai. Lukwikilu ti kivuvu tasadisa beto na kukangama na Yehowa ata na ntangu mupepe ya ngolo kemeka beto. (Kulonga 4:4; 30:19, 20) Lukwikilu na beto tavanda ve bonso maswa yina kenikana na bandambu yonso sambu na mupepe ya malongi ya luvunu. (Efezo 4:13, 14) Kana kivuvu na beto kele bonso ndobo yina kekangaka maswa, beto takuka kunwana ti mupepe ya ngolo ya beto kekutana na yo na luzingu bonso bansadi ya Yehowa.
Zola ti mpeve santu kepesaka beto kikesa
13, 14. (a) Sambu na nki ndobo ya kivuvu na beto mefwana ve yo mosi? (b) Inki fwete pusa beto na kusala kisalu ya santu, mpi sambu na nki?
13 Mukristu takota ve na inza ya mpa kana kikuma ya yandi kesadilaka Yehowa kele kaka kivuvu ya kuzinga mvula na mvula na paladisu na ntoto. Na ntangu muntu kelunda ngolo ndobo na yandi ya kivuvu bonso kima ya kesadisa yandi na kuvanda ngolo na luzingu na yandi, yandi fwete yika na zulu na yo ti na zulu ya lukwikilu na yandi ngolo ya zola yina kepusaka muntu na kisalu. Polo monisaka dyambu yai ntangu yandi sonikaka nde: “Ntangu yai me bika mambu yai tatu: lukwikilu, kutula ntima, ti kuzola; kansi na mambu yai yonso tatu, kuzola me luta mfunu.”—1 Korinto 13:13.
14 Kima ya fwete pusa beto na kusala kisalu ya santu fwete vanda zola yina kekatuka kibeni na ntima sambu na Yehowa. Kana beto sala mutindu yina, beto mendima zola na yandi ya nene yina yandi monisaka na beto. Ntumwa Yoane sonikaka nde: “Muntu yina ke zolaka bantu ya nkaka ve, yandi zaba Nzambi ve, sambu Nzambi ke zolaka bantu. Yai kele mutindu Nzambi songaka beto nde yandi ke zolaka beto: yandi tindaka awa na nsi-ntoto Mwana na yandi mosi ya yandi vandaka na yandi, sambu beto vanda na moyo na ngolo na yandi. Beto ke zolanaka sambu Nzambi muntu zolaka beto ntete.” (1 Yoane 4:8, 9, 19) Sambu na kumonisa ntonda na beto na Yehowa, kima ya ntete ya fwete pusa beto, fwete vanda ve luguluku na beto mosi, kansi kusantisa zina na yandi ya santu mpi kunwanina kimfumu na yandi ya lunungu.
15. Inki mutindu zola na beto na Yehowa mesimbama na dyambu ya metala kimfumu na yandi?
15 Yehowa kezolaka nde beto sadila yandi sambu beto kezolaka yandi, kansi sambu na kukota na Paladisu kaka ve. Mukanda yai ya ketendula Biblia, Étude perspicace des Écritures, a ketuba nde: “Yehowa kesepelaka sambu bigangwa na yandi kenwaninaka kimfumu na yandi ntetentete sambu na zola. Yandi kesepelaka kaka ti bayina kezolaka kimfumu na yandi sambu na bikalulu na yandi mpi sambu kimfumu yango kele lunungu. Yandi kesepelaka ti bo dyaka sambu bo kezolaka kimfumu na yandi kuluta bima yonso. (1 Ko 2:9) Bo meponaka kusadila yandi na nsi ya kimfumu na yandi, kansi bo kemekaka ve kumonisa kikalulu ya kimpwanza. Bo kesalaka buna sambu bo mezaba yandi mpi sambu bo kemonaka mpi nde zola, lunungu, ti mayele na yandi meluta mpenza yina bo kele na yo. (Nk 84:10, 11)”—Buku 1, lutiti 108.
16. Inki mutindu zola na beto na Kristu kepusaka beto na luzingu?
16 Beto Bakristu, beto kemonisaka dyaka zola na beto na Yezu sambu na zola yina yandi monisaka na beto. Polo tubaka nde: “Sambu kuzola yina ya Kristo ke zolaka beto yo ke yalaka [kepusaka] beto, sambu beto zaba nde muntu mosi yai, Kristo, me fwaka sambu na bantu yonso. Mpidina ke songa nde bantu yonso me fwaka ti yandi. Kristo me fwaka sambu na bantu yonso, sambu bantu yina ke na moyo, bo zinga sambu na bo mosi diaka ve, kansi sambu na Kristo yina me fwaka, yina ya Nzambi me tedimisaka na lufwa sambu na bo.” (2 Korinto 5:14, 15) Beto ketungaka luzingu na beto ya kimpeve, lukwikilu na beto, ti kivuvu na beto na zulu ya fondasio ya kyeleka ya kele Kristu. Zola na beto na Kristu Yezu kepesaka kikesa na kivuvu na beto mpi kekumisaka lukwikilu na beto ngolo na ntangu mupepe ya ngolo kemekaka beto.—1 Korinto 3:11; Kolosai 1:23; 2:6, 7.
17. Inki ngolo Yehowa kepesaka beto, mpi nki mutindu Bisalu 1:8 ti Efezo 3:16 kemonisa mfunu na yo?
17 Ata zola na beto na Nzambi ti na Mwana na yandi kele kima ya ntete ya kepesaka beto kikesa na luzingu na beto Bakristu, Yehowa kepesaka beto kima yankaka ya kepesaka beto kikesa, ya keyikaka beto ngolo ya kukwenda na ntwala na kisalu na yandi. Kima yango kele ngolo na yandi yina yandi kesadilaka kisalu, to mpeve santu. Bangogo ya Kiebreo ti ya Kigreki ya bo mebalulaka nde “mpeve” ketendula ntetentete ngolo ya mupepe yina ketambulaka, bonso mupepe yo mosi. Bamaswa bonso yina Polo vandaka kutambula na yo vandaka kutambula sambu na ngolo ya kukonda kumonana ya mupepe sambu na kukuma na kisika ya bo vandaka kukwenda. Mutindu mosi mpi, beto kele na mfunu ya zola ti kisalu yina ngolo ya Nzambi ya kemonanaka ve kesalaka kana beto kezola nde maswa na beto kusadisa beto na kulanda kisalu ya Yehowa.—Bisalu 1:8; Efezo 3:16.
Beto sala kisalu tii na nsuka!
18. Inki kima tasadisa beto na kukanga ntima na ntwala ya mimekamu yonso ya lukwikilu yina lenda kwisila beto na ntwala?
18 Lukwikilu ti zola na beto lenda mekama ngolo na ntwala beto kuma na inza ya mpa. Kansi, Yehowa mepesaka beto ndobo mosi yina kele “kikesa ti ngolo,” ndobo yango kele kivuvu ya kitoko yina beto kele na yo. (Baebreo 6:19; Roma 15:4, 13) Kana bambeni to mimekamu yankaka kenwanisa beto, beto lenda kanga ntima kana beto kangama na kivuvu na beto na mpila nde yo tanina beto. Kana mupepe ya ngolo ya ntete meluta, na ntwala yankaka kuyantika, bika beto baka lukanu ya kukumisa kivuvu ti lukwikilu na beto ngolo.
19. Inki mutindu beto lenda lunda maswa ya lukwikilu na beto yo tambulaka kaka tii kuna beto takuma na kisika ya kupema na inza ya mpa ya Nzambi?
19 Na ntwala ya kutubila “kibende yina ke kangaka maswa,” Polo tubaka nde: “Beto [ke] zola nde konso muntu na kati na beno kutula ngolo tii na nsuka, sambu mambu yina ya beno ke tulaka ntima yo lunga. Beto zola ve nde beno kuma bantu ya bumolo, kansi beto zola nde beno landa mbandu ya bantu yina ke na lukwikilu, yina ke kangaka ntima, ebuna bo ke bakaka mambu yina ya Nzambi silaka.” (Baebreo 6:11, 12) Mutindu zola sambu na Yehowa ti na Yezu kepusa mpi kepesa beto kikesa, bika beto lunda maswa ya lukwikilu na beto yo tambulaka tii kuna beto takuma na kisika ya kupema yina Nzambi mesilaka beto na inza ya mpa.
[Noti na nsi ya lutiti]
a Yina Watchtower Bible and Tract Society of New York, Inc. mebasisaka.
Beto vutukila
◻ Sambu na yina metala lukwikilu na beto, nki mutindu Polo kekebisa beto?
◻ Inki mutindu bantu yankaka mefwaka na kimpeve, mpi nki mutindu bankaka mekumaka kutambula malembe?
◻ Inki kikalulu ya bunzambi beto fwete yika na zulu ya lukwikilu na beto?
◻ Inki kima tasadisa beto na kukuma na kisika ya kupema na inza ya mpa ya Nzambi?
[Bangiufula ya disolo ya kulonguka]
[Kifwanisu ya kele na lutiti 16]
Beto fwete tunga mbote maswa ya lukwikilu na beto sambu yo bikala ngolo na mupepe ya ngolo ya luzingu
[Kifwanisu ya kele na lutiti 17]
Lukwikilu na beto lenda dinda
[Kifwanisu ya kele na lutiti 18]
Sambu na beto Bakristu, kivuvu kele bonso kibende yina kekangaka maswa