Inki Yehowa kelomba beto bubu yai?
Inki Yehowa kelomba beto bubu yai?
“Ndinga basikaka na dituti yina [tubaka] nde: ‘Yai kele Mwana na mono ya mono ke zolaka mingi; mono ke na kiese mingi sambu na yandi. Beno wila yandi!’ ”—MATAYO 17:5.
1. Inki ntangu Nsiku kulungisaka lukanu na yo?
YEHOWA pesaka na dikanda ya Izraele Nsiku, ti tubansiku yankaka mingi. Sambu na yina metala bansiku yango, ntumwa Polo sonikaka nde: “Yo kele kaka bansiku sambu na nitu; kana Nzambi kuyidika mambu yonso imene, yo ta vanda diaka mfunu ve.” (Baebreo 9:10) Ntangu Nsiku nataka bantu ya Izraele ya kubikalaka na kundima Yezu bonso Mesia, to Kristu, yo lungisaka lukanu na yo. Yo yina, Polo tubaka nde: “Kristo me sukisaka Bansiku.”—Roma 10:4; Galatia 3:19-25; 4:4, 5.
2. Banani kuvandaka na nsi ya Nsiku, mpi nki ntangu bo katukaka na kimpika na yo?
2 Keti yo kezo tuba nde Nsiku kele na mfunu ve ata fyoti sambu na beto bubu yai? Na kutuba ya mbote, bantu yonso kuvandaka ve na nsi ya Nsiku, mutindu muyimbi-bankunga tendulaka yo: “[Yehowa] ke songaka mambu na yandi na Yakobi, yandi ke pesaka malongi ti bansiku na yandi na Izraele. Kansi na bantu ya bansi ya nkaka, bayina kuzaba ve bansiku na yandi, yandi me salaka mpidina ata fyoti ve.” (Nkunga 147:19, 20) Ntangu Nzambi salaka kuwakana ya mpa na nsadisa ya kimenga ya Yezu, ata dikanda ya Izraele kuvandaka dyaka ve na ntuma ya kulemfuka na Nsiku. (Galatia 3:13; Efezo 2:15; Kolosai 2:13, 14, 16) Ebuna, kana nde beto kele dyaka ve na nsi ya Nsiku, nki Yehowa kelomba na bantu yina kezola kusadila yandi bubu yai?
Mambu yina Yehowa kelomba
3, 4. (a) Na kutuba ya mbote, nki kibeni Yehowa kelomba beto bubu yai? (b) Sambu na nki beto fwete landa bitambi ya Yezu na dikebi yonso?
3 Na mvula ya nsuka ya kisalu ya Yezu, bantumwa na yandi Piere, Yakobo, ti Yoane kwendaka ti yandi na ngumba mosi ya nda, ziku na kisika mosi buna na Ngumba ya Hermoni. Ntangu bo vandaka kuna, bo monaka mbona-meso ya mbikudulu mosi yina ketala Yezu na lukumu ya kiyeka, mpi bo waka ndinga ya Nzambi yandi mosi ketuba nde: “Yai kele Mwana na mono ya mono ke zolaka mingi; mono ke na kiese mingi sambu na yandi. Beno wila yandi!” (Matayo 17:1-5) Yo kele pwelele nde, yo yai kima ya Yehowa kelomba na beto: kuwidikila Mwana na yandi mpi kulanda mbandu ti malongi na yandi. (Matayo 16:24) Na yau, ntumwa Piere sonikaka nde: “Kristo yandi mosi monaka mpasi sambu na beno, ebuna yandi bikilaka beno mbandu sambu beno landa yo.”—1 Piere 2:21.
4 Sambu na nki beto fwete landa bitambi ya Yezu na dikebi yonso? Sambu kana beto kesala mutindu yandi vandaka kusala, beto kesala bonso Yehowa Nzambi. Yezu zabaka Tata mbotembote, sambu yandi salaka bamvula mingi kibeni ti yandi na zulu na ntwala ya kukwisa na ntoto. (Bingana 8:22-31; Yoane 8:23; 17:5; Kolosai 1:15-17) Ntangu yandi vandaka na ntoto, Yezu vandaka kutuba na zina ya Tata na yandi na kwikama yonso. Yandi tendulaka nde: “Mono ke tubaka kaka mambu yina ya Tata longaka mono.” Ya kyeleka, Yezu vandaka kusala mutindu Yehowa kesalaka kibeni, yo yina yandi tubaka nde: “Muntu yina me mona mono, yandi me mona mpi Tata.”—Yoane 8:28; 14:9.
5. Bakristu kele na nsi ya nki nsiku, mpi nki ntangu nsiku yina yantikaka kusala?
5 Inki yo kezo tuba kuwidikila Yezu ti kusala mambu bonso yandi? Keti yo kezo tuba kuvanda na nsi ya nsiku? Polo kusonikaka nde: “Mono kele na nsi ya kiyeka ya Bansiku ya Moize ve.” Awa, yandi ketubila “Kuwakana ya Ntama,” Nsiku ya kuwakana yina Nzambi salaka ti Izraele. Polo ndimaka nde yandi vandaka na “nsi ya kiyeka ya [nsiku] ya Kristo.” (1 Korinto 9:20, 21; 2 Korinto 3:14) Ntangu Nsiku ya kuwakana ya ntama kusukaka, “kuwakana ya mpa” mosi yantikaka na kusala. Yo kele ti “nsiku ya Kristo” yina bansadi yonso ya Yehowa ya bubu yai fwete zitisa.—Luka 22:20; Galatia 6:2; Baebreo 8:7- 13.
6. Inki mutindu nge lenda tendula “nsiku ya Kristo,” mpi nki mutindu beto kezitisaka yo?
6 Yehowa kusonikisaka ve “nsiku ya Kristo” bonso mukanda ya bansiku, ya kukabisa na bandambu mingi, mutindu bo salaka ti Nsiku ya kuwakana. Nsiku yai ya mpa ya balandi ya Kristu kele ve lisiti ya bansiku mingimingi ya ketanga mambu ya bo fwete sala ti yina ya bo fwete sala ve. Kansi, na Ndinga na yandi, Yehowa taninaka masolo iya ya mfunu ya ketubila luzingu ti malongi ya Mwana na yandi. Dyaka, na nsadisa ya mpema na yandi, Nzambi sadisaka ndambu ya balandi ya ntete ya Yezu sambu bo sonika bantuma yina ketubila luzingu ya muntu, mambu ya metala dibundu, mutindu ya kuzinga na kati ya dibuta, ti mambu yankaka. (1 Korinto 6:18; 14:26-35; Efezo 5:21-33; Baebreo 10:24, 25) Na luzingu na beto, kana beto kelanda mbandu ti malongi ya Yezu Kristu mpi kana beto kesadila ndongisila ya bantu yina kusonikaka Biblia na mvu-nkama ya ntete, tuba nde beto kelemfuka na “nsiku ya Kristo.” Yai mambu ya Yehowa kelomba na bansadi na yandi bubu yai.
Mfunu ya zola
7. Inki mutindu Yezu monisaka dyambu ya mfunu ya nsiku na yandi na nkinsi ya Paki ya nsuka yina yandi taka ti bantumwa na yandi?
7 Ya kyeleka, zola vandaka mfunu na nsi ya Nsiku. Yo kele ntima, to kima ya kuluta mfunu, ya nsiku ya Kristu. Yezu monisaka mfunu ya dyambu yai ntangu yandi kutanaka ti bantumwa na yandi sambu na kuta nkinsi ya Paki ya mvu 33 ya T.B. Kana beto landa mutindu Yoane keta na bunkufi mambu yina lutaka na mpimpa yango, bangogo ya Yezu yina katukaka na ntima, tubilaka zola mbala 28. Yo monisaka na bantumwa na yandi mfunu, to ntendula, ya nsiku na yandi. Yo yina, Yoane yantikaka kuta disolo na yandi ya mambu yina kusalamaka na nkokila yina ya mfunu na bangogo yai: “Kilumbu mosi bikaka na kuyantika Nkinsi ya Paki, ebuna Yesu zabaka nde ntangu na yandi me lunga na kubikisa nsi-ntoto sambu na kuvutuka na Tata na yandi. Ntangu yonso yandi vandaka kuzola bantu na yandi yina vandaka na nsi-ntoto. Yandi vandaka kuzola bo tii na kilumbu ya nsuka.”—Yoane 13:1.
8. (a) Inki kidimbu kumonisaka nde ntembe ya bantumwa vandaka kumana ve? (b) Inki mutindu Yezu longaka bantumwa na yandi dilongi ya kudikulumusa?
8 Yezu vandaka kuzola bantumwa na yandi. Yandi sadisaka bo na kukatula mpusa na bo ya ngolo ya kuvanda na kimfumu ti kiyeka, kansi yandi nungaka ve. Bangonda mingi na ntwala bo kwisa na Yeruzalemi, ‘bo vandaka kwenda kutula ntembe na kati na bo kana nani me luta nene.’ Ebuna, na ntwala nde bo kuma na bwala yina bo zolaka kuta nkinsi ya Paki, ntembe yango ya metala kiyeka kuyantikaka dyaka. (Marko 9:33-37; 10:35-45) Mambu yina bantumwa na yandi kusalaka ntangu fyoti na nima ya kukota na suku ya zulu ya nzo sambu na kuta nkinsi ya Paki na bo ya nsuka kumosi, kemonisa nde dikambu yina vandaka kulanda kaka. Na ntangu yina ata muntu mosi ve kusadilaka okazio yina sambu na kuyobisa bankaka makulu mutindu bantu yonso vandaka kusala sambu na kuyamba banzenza. Sambu na kulonga bo dilongi ya kudikulumusa, Yezu yandi mosi yobisaka makulu na bo.—Yoane 13:2-15; 1 Timoteo 5:9, 10.
9. Inki Yezu salaka sambu na kumanisa dikambu yina kubwaka na nima ya nkinsi ya nsuka ya Paki?
9 Ata yandi pesaka bo dilongi yina, na nima ya kuta nkinsi ya Paki ti kutula Lusungiminu yina balongoki na yandi tasalaka sambu na kuyibuka lufwa na yandi yina vandaka kukuma penepene, wa mambu ya kubwaka dyaka. Disolo ya Evanzile ya Luka ketuba nde: “Balonguki yantikaka kutula ntembe na kuzaba nani muntu na kati na bo ya bo fweti baka bonso muntu ya kuluta nene.” Olie yandi wila bantumwa na yandi makasi mpi yandi nganina bo, Yezu longisilaka bo na malembe yonso na yina metala mfunu ya kuvanda ya kuswaswana ti bamfumu ya inza yina kele na mpusa ya ngolo ya kiyeka. (Luka 22:24-27) Na nima, yandi pesaka kima ya beto lenda binga nde fondasio ya nsiku ya Kristu, na bangogo yai: “Nsiku mosi ya mpa ya mono ke pesa beno yo yai: Beno zolana beno na beno. Mutindu mono me zolaka beno, beno mpi beno zolana beno na beno.”—Yoane 13:34.
10. Inki nsiku Yezu pesaka balongoki na yandi, mpi nki yo ketendula?
10 Na mpimpa yina, Yezu monisaka nki kiteso zola ya kufwanana ti yina ya yandi mosi Kristu vandaka na yo fwete monana. Yandi tubaka nde: “Nsiku na mono yo yai: Beno zolana beno na beno, mutindu mono ke zolaka beno. Kuzola ya kuluta nene ya muntu lenda vanda na yo na ntima yo yai; kana yandi pesa moyo na yandi sambu na banduku na yandi.” (Yoane 15:12, 13) Keti Yezu vandaka kutuba nde balandi na yandi fwete ndima na kufwa sambu na bampangi yina bo kele na bo lukwikilu mosi kana yo kelomba mutindu yina? Yoane kubakisaka mutindu yai. Yandi temwe ya kumonaka mambu yai na meso. Sambu na nima yandi sonikaka nde: “Mambu yai ke songaka beto kana kuzola mpangi kele nki: Kristo pesaka moyo na yandi sambu na beto. Beto mpi fweti pesa moyo na beto sambu na bampangi na beto.”—1 Yoane 3:16.
11. (a) Inki mutindu beto kelungisaka nsiku ya Kristu? (b) Inki mbandu Yezu pesaka?
11 Na yau, beto kelungisaka ve nsiku ya Kristu kaka kana beto kelonga bankaka mambu ya metala yandi. Beto fwete zinga mpi kusala mambu mutindu Yezu salaka. Ya kyeleka, Yezu vandaka kusadila bangogo ya kitoko, ya kupona kibeni na masolo na yandi. Kansi, yandi vandaka kulonga mpi na mbandu. Ata Yezu vandaka kigangwa ya ngolo ya kimpeve na zulu, yandi sadilaka dibaku ya yandi vandaka na yo sambu na kusadila mambote ya Tata na yandi awa na ntoto mpi na kumonisa beto mutindu ya beto fwete kuzinga. Yandi vandaka muntu ya kudikulumusa, ya mbote, mpi ya kuzaba kutula dikebi na yandi na bantu yankaka. Yandi vandaka kusadisa bantu yina vandaka ya kulemba ti bayina vandaka kunyokwama. (Matayo 11:28-30; 20:28; Filipi 2:5-8; 1 Yoane 3:8) Yezu zabisaka mpi balongoki na yandi na kuzolana bo na bo, kaka mutindu yandi zolaka bo.
12. Sambu na nki beto lenda tuba nde nsiku ya Kristu kekulumusaka ve mfunu ya kuzola Yehowa?
12 Zola ya Yehowa, yina kele nsiku ya kuluta nene na kati ya Nsiku, kele na nki kisika na nsiku ya Kristu? (Matayo 22:37, 38; Galatia 6:2) Na kisika ya zole? Ve, ata fyoti ve! Zola sambu na Yehowa ti zola sambu na bampangi na beto Bakristu kele ya kukangama ngolo. Muntu lenda zola ve Yehowa na masonga yonso kana yandi kezolaka ve mpangi na yandi. Yo yina, ntumwa Yoane tubaka nde: “Kana muntu ke tuba nde: ‘Mono ke zolaka Nzambi,’ kansi yandi ke mengaka mpangi na yandi, yandi kele muntu ya luvunu. Sambu muntu yina ke zolaka ve mpangi na yandi yina ya yandi ke monaka, nki mutindu yandi lenda zola Nzambi yina ya yandi me monaka ntete ve?”—1 Yoane 4:20; fwanisa ti 1 Yoane 3:17, 18.
13. Bulemfu ya balongoki na nsiku ya mpa ya Yezu kubasisaka nki?
13 Ntangu Yezu pesaka balongoki na yandi nsiku ya mpa ya kuzolana bo na bo kaka mutindu yandi zolaka bo, yandi tendulaka mambu yina zola ya mutindu yina zolaka kubuta. Yandi tubaka nde: “Kana beno ke zolana beno na beno, bantu yonso ta zaba nde beno kele balonguki na mono.” (Yoane 13:35) Tertullien, muntu ya kuzingaka bamvula kuluta nkama mosi na nima ya lufwa ya Yezu, tubaka nde zola ya kimpangi yina Bakristu ya ntete vandaka na yo monisaka mpenza mambu yina. Tertullien vutukilaka mambu yai ya bantu yina vandaka Bakristu ve vandaka kutuba sambu na balandi ya Kristu: ‘Tala mutindu bo kezolanaka mpi mutindu bo kele nkutu ya kuyilama na kufwa sambu na bankaka.’ Beto fwete kudiyula mutindu yai: ‘Keti mono kemonisaka zola ya mutindu yina na bampangi na mono Bakristu sambu yo monisa nde mono kele longoki ya Yezu?’
Mutindu beto kemonisaka zola na beto
14, 15. Inki kima lenda kumisa bulemfu na nsiku ya Kristu mpasi, kansi nki lenda sadisa beto na kusala mutindu yina?
14 Yo kele mfunu nde bansadi ya Yehowa kumonisa zola bonso yina Kristu vandaka na yo. Kansi keti nge kemonaka mpasi na kuzola bampangi Bakristu yina kemonisaka kikalulu ya bwimi? Mutindu beto monaka yo, bantumwa mpi tulaka ntembe mpi nwaninaka mambote na bo mosi. (Matayo 20:20-24) Bantu ya Galatia mpi swanaka bo na bo. Na nima ya kumonisa bo nde zola ya nkweno kelungisaka Nsiku, Polo kebisaka bo mutindu yai: “Kansi, kana beno ke salana mbi, kana beno ke nwana beno na beno bonso bambisi ya mfinda, beno keba, kana ve, beno ta fwa kimvuka na beno.” Na nima ya kumonisa kukonda kuwakana yina kele na kati ya bisalu ya kinsuni ti bambuma ya mpeve ya Nzambi, Polo yikaka ndongisila yai: “Beto lenda vanda na lulendo ve, beto lenda sosa ve mambu ya makasi na kati na beto, beto lenda tula meso na bima ya ngani ve.” Na nsuka ntumwa pesaka nsyamisa yai: “Beno bakana bakilo beno na beno, mpidina beno ta landa nsiku ya Kristo.”—Galatia 5:14–6:2.
15 Ntangu Yehowa kelomba beto na kulanda nsiku ya Kristu, keti Yandi kelomba beto mambu ya kuluta mpasi? Ata yo kele mpasi na kumonisa ntima ya mbote na bantu yina kunganinaka beto mpi kulwadisaka beto na mawi, beto fwete ‘meka na kusala bonso yandi [Nzambi]. Beto fwete zolana na luzingu na beto yonso.’ (Efezo 5:1, 2) Beto fwete landa na kutala mbandu ya Nzambi, ya kezabisa beto nde “Nzambi songaka beto mutindu yandi ke zolaka beto: Kristo fwaka sambu na beto ntangu beto vandaka kaka bantu ya masumu.” (Roma 5:8) Kana beto yantika ntete na kusadisa bantu yankaka, ti bayina kusalaka beto mbi, beto lenda vanda na kyese ya kuzaba nde beto kesala bonso Nzambi mpi beto kelemfuka na nsiku ya Kristu.
16. Inki mutindu beto kemonisaka zola na beto na Nzambi ti na Kristu?
16 Beto fwete vila ve nde beto kemonisaka zola na beto na mambu yina beto kesalaka, kansi na mambu yina beto ketubaka kaka ve. Kilumbu mosi Yezu mpi kumonaka mpasi na kundima dyambu mosi ya luzolo ya Nzambi sambu na mambu yina zolaka kubwila yandi. Yo yina, yandi sambaka mutindu yai: “Tata, kana nge zola, katula mono na mpasi yai.” Kansi kukonda kusukinina, yandi yikaka nde: “Kansi kulanda luzolo na mono ve, kansi luzolo na nge.” (Luka 22:42) Ata Yezu monaka mpasi nki mutindu, yandi salaka luzolo ya Nzambi. (Baebreo 5:7, 8) Bulemfu kemonisaka zola na beto mpi yo kemonisaka nde beto kendima nde nzila ya Nzambi kele ya kuluta mbote. Biblia ketuba nde: “Kana beto ke zolaka Nzambi, yo ke songa nde beto ke landaka bansiku na yandi.” (1 Yoane 5:3) Ebuna, Yezu zabisaka bantumwa na yandi nde: “Kana beno ke zolaka mono, beno ta landaka bansiku na mono.”—Yoane 14:15.
17. Inki nsiku ya mfunu Yezu pesaka balandi na yandi, mpi nki mutindu beto kezaba nde yo ketadila beto mpi bubu yai?
17 Na nima ya kuzabisa balandi na yandi na kuzolana bo na bo, nki nsiku yankaka ya mfunu Kristu pesaka bo? Yandi zabisaka bo na kusala kisalu ya kusamuna yina yandi longaka bo. Piere tubaka nde: “Yandi tindaka beto na kwenda kulonga [bantu ti kuta kimbangi na mudindu mpenza, NW].” (Bisalu 10:42) Yezu zabisaka bo pwelele nde: “Beno kwenda kukumisa bantu yonso balonguki na mono: Beno botika bo na zina ya Tata ti ya Mwana ti ya Mpeve-Santu, beno longa bo mpi na kulanda mambu yonso ya mono vandaka kusonga beno na kusala.” (Matayo 28:19, 20; Bisalu 1:8) Yezu songaka nde balandi na yandi ya ntangu yai disongidila, bansadi na yandi ya “ntangu ya nsuka,” mpi zolaka kusadila bantuma yina, sambu yandi tubaka nde: “Bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.” (Daniele 12:4; Matayo 24:14) Ee, luzolo ya Nzambi kele nde beto samuna. Kansi, bantu mingi lenda mona nde kisalu yai ya Nzambi kelomba beto na kusala meluta mpasi na kusala. Kansi, keti yo kele mpenza mutindu yina?
Sambu na nki yo lenda monana mpasi?
18. Inki kima beto fwete vila ve na ntangu beto kemona mpasi sambu beto kesala mambu yina Yehowa kelomba beto?
18 Mutindu beto memona yo, Yehowa kelombaka bantu na kulemfuka na mambu mingi tuka bantangu ya ntama. Mambu yina yandi vandaka kulomba bo vandaka kuswaswana, mutindu mosi mpi mimekamu ya bo vandaka kumona vandaka mpi ya kuswaswana. Mwana ya Nzambi kezolaka mingi kumonaka mpasi ya kuluta ngolo, mpi nsukansuka bo fwaka yandi na mutindu mosi ya nku kibeni sambu yandi vandaka kusala mambu yina Nzambi vandaka kulomba. Kansi kana beto kemona mpasi sambu beto kesala mambu yina Yehowa kelomba na beto, beto fwete vila ve nde yandi ve muntu kenatilaka beto mimekamu ya beto kemonaka. (Yoane 15:18-20; Yakobo 1:13-15) Kubendumuka ya Satana kukotisaka disumu, mpasi, ti lufwa, mpi yandi muntu mesalaka nde bansadi ya Yehowa kukuma kumona mpasi kibeni na kusala mambu yina Yandi kelomba bo.—Yobi 1:6-19; 2:1-8.
19. Sambu na nki yo kele dibaku ya nene na kusala mambu yina Nzambi kelomba beto na nsadisa ya Mwana na yandi?
19 Na nsadisa ya Mwana na yandi, Yehowa yidikaka mambu na mpila nde na ntangu yai ya nsuka, bansadi na Yandi kusamuna na ntoto ya mvimba nde kima tamanisa bampasi yonso ya bantu kele Kimfumu na yandi. Luyalu yai ya Nzambi takatula bampasi yonso na ntoto: bitumba, nku, bunsukami, kununa, maladi, lufwa. Kimfumu yango tatula mpi paladisu ya lukumu na ntoto. Na kati ya paladisu yina bafwa mpi tafutumuka. (Matayo 6:9, 10; Luka 23:43; Bisalu 24:15; Kusonga 21:3, 4) Kusamuna nsangu ya mbote ya mambu ya mutindu yai kele dibaku mosi ya kitoko kibeni! Yo yina, yo ke pwelele nde kusala mambu yina Yehowa kelomba beto na kusala kele mpasi ve. Kana beto kekutanaka ti kimbeni, kansi Satana Dyabulu ti inza na yandi bantu kenatilaka beto yo.
20. Inki mutindu beto lenda nunga konso mpasi yina Dyabulu lenda natila beto?
20 Inki mutindu beto lenda nunga bampasi yonso yina Satana lenda natila beto? Kana beto kevila ve bangogo yai na ntu: “Mwana na mono, vanda mayele, ebuna mono ta mona kiese; mpidina konso muntu yina ta tonga mono, mono ta zaba kupesa yandi mvutu.” (Bingana 27:11) Yezu pesaka Yehowa mvutu ya kuvutudila Satana sambu na luvunu na yandi na ntangu yandi yambulaka luzingu ya kukonda kigonsa na zulu sambu na kukwisa kusala luzolo ya Tata na yandi na ntoto. (Yezaya 53:12; Baebreo 10:7) Na luzingu na yandi ya kimuntu, Yezu kangaka ntima na mimekamu yonso yina kukuminaka yandi, yandi ndimaka nkutu kufwa na zulu ya nti ya mpasi. Kana beto landa yandi bonso Mbandu na beto, beto mpi takanga ntima na ntwala ya bampasi yina lenda bwila beto mpi beto lenda sala mambu yina Yehowa kelomba beto.—Baebreo 12:1-3.
21. Inki mutindu nge kewa sambu na zola yina Yehowa ti Mwana na yandi kumonisaka?
21 Nzambi ti Mwana na yandi memonisa beto zola ya nene mpenza! Sambu na kimenga ya Yezu, bantu ya bulemfu kele ti kivuvu ya kuzinga kimakulu na Paladisu. Na yau, bika nde ata kima mosi ve kukatula kivuvu na beto. Kansi, bika nde konso muntu na kati na beto kuvila ve mambu yina tasalama sambu na mambu ya mbote yina Yezu salaka. Polo mpi kuvilaka yo ve, yo yina, yandi tubaka nde: “Mwana-Nzambi . . . me zolaka mono, [yandi] me fwaka sambu na mono.” (Galatia 2:20; beto bantu metengimisa bisono.) Yo yina, bika beto monisa ntonda ya kekatuka kibeni na ntima sambu na Nzambi na beto Yehowa, yina kezolaka beto mingi, yina kelombaka beto ve mambu ya kuluta mpasi.
Inki mutindu nge tavutula?
◻ Inki kima Yehowa kelomba na beto bubu yai?
◻ Na nkokila ya nsuka ya yandi lutisaka ti bantumwa na yandi, nki mutindu Kristu kumonisaka dyaka mingi mfunu ya zola?
◻ Inki mutindu beto lenda monisa nde beto kezolaka Nzambi?
◻ Sambu na nki yo kele dibaku mosi ya nene na kusala mambu yina Yehowa kelomba na beto?
[Bangiufula ya disolo ya kulonguka]
[Kifwanisu ya kele na lutiti 13]
Inki dilongi Yezu longaka ntangu yandi yobisaka makulu ya bantumwa na yandi?
[Kifwanisu ya kele na lutiti 15]
Ata beto kutana na kimbeni, kulonga nsangu ya mbote kele dibaku mosi ya nene ya kepesaka kyese