Keti Yehowa kelombaka beto mambu ya kuluta mpasi?
Keti Yehowa kelombaka beto mambu ya kuluta mpasi?
“Mambu ya [Yehowa] ke zola nde beto sala yo yai: Sala mambu yina kele ya masonga, songa mambote na bantu ya nkaka, lemfuka na yandi Nzambi na beto na ntima ya mbote.”—MISHE 6:8.
1. Inki lenda vanda kikuma ya kesalaka nde bantu mingi kusadila ve Yehowa?
YEHOWA kelombaka kima mosi na bantu na yandi. Kansi na nima ya kutanga bangogo yai ya mekatuka na mbikudulu ya Mishe yai kele awa na zulu, nge lenda tuba nde mambu yina Nzambi kelombaka beto mefwana. Kansi, bantu mingi kesadilaka ve Ngangi na beto ya Nene. Ebuna, bankaka yina vandaka kusadila yandi ntete, kesadilaka yandi dyaka ve. Sambu na nki? Sambu bo kemona nde mambu ya Nzambi kelombaka beto meluta mpasi. Keti yo kele masonga? To keti dikambu lenda vanda na mutindu muntu yandi mosi kemonina mambu yina Yehowa kelomba beto? Disolo mosi ya ntama tasadisa beto na kubakisa mambu yai mbote.
2. Namani kuvandaka nani, mpi nki profete ya Yehowa lombaka yandi na kusala?
2 Namani, Mfumu ya basoda ya Siria, vandaka kubela lepre. Kansi, bo longisilaka yandi nde profete mosi ya Yehowa yina lendaka kubelula yandi vandaka na Izraele. Yo yina, Namani ti bantu na yandi kwendaka na Izraele. Nsukansuka, bo kumaka na nzo ya profete ya Nzambi, Elisa. Olie Elisa kubasika na nzo na yandi sambu na kwenda kupesa mbote na banzenza na yandi ya lukumu, yandi tindaka nsadi na yandi na kuzabisa Namani nde: “Kwenda na nzadi ya Yordani, yobila mbala nsambwadi, ebuna maladi na nge yonso ta mana, nitu na nge ta vanda bonso yo vandaka ntete.”—2 Bantotila 5:10.
3. Sambu na nki Namani kubuyaka ntete na kusala mambu yina Yehowa kulombaka yandi?
3 Kana Namani kusalaka mambu yina profete ya Nzambi lombaka yandi, yandi zolaka kubeluka na maladi na yandi yina ya mbi. Ebuna pana, keti beto lenda tuba nde Yehowa kulombaka yandi na kusala kima mosi ya kuluta mpasi? Ata fyoti ve. Kansi, Namani zolaka ve kusala mambu yina Yehowa kulombaka yandi. Yandi vutulaka na makasi yonso nde: “Keti banzadi yai Abana ti Parepare na bwala Damasi me luta ve banzadi yonso ya Israele? Keti mono lenda yobila kuna ve ti kubeluka?” Na nima ya kutuba buna, yandi kwendaka na makasi yonso.—2 Bantotila 5:12.
4, 5. (a) Inki mambote Namani bakaka sambu na bulemfu na yandi, mpi nki yandi tubaka na nima ya kubaka yo? (b) Inki beto tatadila ntangu yai?
4 Inki kima kibeni Namani vandaka kumona mpasi na kusala? Yo kele ve nde mambu yina bo lombaka yandi na kusala kulutaka mpasi. Bansadi ya Namani zabisaka yandi na luzitu yonso nde: “Pardo mfumu, kana profete songaka nge mambu ya mpasi na kusala, nge zolaka kusala yo kaka. Sambu na nki nge zola yobila ve mutindu yandi me songa nge, sambu nge beluka?” (2 Bantotila 5:13) Kima kuvandaka mpasi kele mutindu Namani vandaka kumonina mambu. Yandi monaka nde bo bakaka yandi ve ti lukumu yina yandi fwete baka, mpi nde bo lombaka yandi na kusala kima mosi ya yandi monaka kima ya mpamba mpi ya nsoni. Nsukansuka, Namani ndimaka ndongisila ya luzitu yina bansadi na yandi kupesaka yandi, ebuna yandi kudilosaka na Nzadi Yordani mbala nsambwadi. Yindula ntangu yai kyese yina yandi vandaka na yo ntangu “nitu na yandi kumaka diaka mbote ti kitoko bonso ya mwana ya fioti”! Yandi vutulaka matondo mingi. Yo yina, Namani tubaka nde banda ntangu yina tii kuna, yandi tasambila dyaka nzambi yankaka ve kaka Yehowa.—2 Bantotila 5:14-17.
5 Na luzingu yonso ya bantu, Yehowa kelombaka bantu yonso na kulemfuka na bansiku na yandi ya mutindu na mutindu. Beto kelomba nge na kutadila ndambu ya mambu yango. Na ntangu nge kesala yo, kudiyula nki mutindu nge zolaka kusala kana Yehowa kulombaka nge na kusala mambu ya mutindu yina. Na nima, beto tatadila mambu yina Yehowa kelomba beto bubu yai.
Mambu yina Yehowa kulombaka na ntangu ya ntama
6. Inki Nzambi lombaka bantu zole ya ntete na kusala, mpi kana yo vandaka nge, nki mutindu nge zolaka kusala na ntwala ya bantuma ya mutindu yina?
6 Yehowa lombaka na bantu zole ya ntete, Adami ti Eva, na kubuta bana, na kuyala ntoto, mpi na kuyala bambisi. Yandi sambulaka mpi bakala yina ti nkento na yandi na mutindu yandi pesaka bo kisika mosi ya nene ya kuvandaka bonso parki sambu bo vanda pana. (Kuyantika 1:27, 28; 2:9-15) Kansi, yandi pesaka bo nsiku mosi. Yandi buyisaka bo na kudya ve bambuma ya nti mosi. Nti yango vandaka na kati ya banti mingi yina vandaka kubuta bambuma na masamba ya Edeni. (Kuyantika 2:16, 17) Yandi lombaka bo ve kima mosi ya kuluta mpasi, mpidina ve? Kana kuvanda nge, keti nge zolaka kuvanda ve na kyese ya kulungisa mukumba ya mutindu yina, ya kuvandaka ti kivuvu ya kuzinga kimakulu, na mavimpi ya mbote? Ata kana mpukumuni mosi kwisaka kumonika na masamba, keti nge zolaka ve kubuya bangindu na yandi? Dyaka, keti nge zolaka kundima ve nde Yehowa vandaka ti nswa ya kupesa nsiku yina ya fyoti?—Kuyantika 3:1-5.
7. (a) Inki kisalu Nzambi pesaka Noa, mpi nki kimbeni ya bantu yandi kutanaka na yo? (b) Inki mutindu nge kemona mambu yina Yehowa lombaka Noa?
7 Na nima, Yehowa lombaka Noa na kutunga maswa sambu bo fwa ve na mvula ya ngolo yina zolaka kunoka na inza ya mvimba. Kana beto tala bunene ya maswa yango, beto kebakisa nde kisalu yango vandaka pete ve, mpi ntembe kele ve nde, yandi salaka yo na kati ya bantu yina vandaka kuseka yandi mpi ya vandaka kumenga yandi. Kansi, yo vandaka dibaku mosi ya nene sambu Noa kugulusaka dibuta na yandi, ti bambisi mingi kibeni! (Kuyantika 6:1-8, 14-16; Baebreo 11:7; 2 Piere 2:5) Kana nge muntu bo pesaka kisalu ya mutindu yina, keti nge zolaka kusala yo na ngolo na nge yonso? To keti nge zolaka kutuba nde Yehowa melomba nge kima mosi ya kuluta mpasi?
8. Inki Nzambi lombaka Abrahami na kusala, mpi kulemfuka na yandi vandaka kifwani ya nki?
8 Nzambi lombaka Abrahami na kusala kima mosi ya mpasi kibeni. Yandi zabisaka yandi nde: “Baka mwana na nge yai Izaki, mwana yai mosi kaka ya nge ke na yandi, ya nge ke zolaka mingi, kwenda na yandi na ntoto ya Moria. Ebuna kuna na zulu ya ngumba ya mono ta songa nge, nge fweti pesa mono yandi makabu ya kuyoka ya mvimba.” (Kuyantika 22:2) Mutindu Yehowa kuyitaka kusila nde, Izaki yango ya kuvandaka ve ntete ata ti mwana tabuta bana. Pana yo monanaka nde lukwikilu yina Abrahami vandaka kutula na kiyeka ya Nzambi kele na yo ya kupesa dyaka Izaki luzingu kumekamaka. Ntangu Abrahami mekaka na kutambika Izaki, Yehowa kutaninaka mwana-bakala yina. Dyambu yai vandaka kifwani ya kusongaka nde Nzambi zolaka kupesa Mwana na yandi mosi sambu na bantu yonso, mpi nde na nima, yandi zolaka kufutumuna yandi.—Kuyantika 17:19; 22:9-18; Yoane 3:16; Bisalu 2:23, 24, 29-32; Baebreo 11:17-19.
9. Sambu na nki beto lenda tuba nde Yehowa kulombaka ve Abrahami kima ya kuluta mpasi?
9 Bantu mingi lenda yindula nde Yehowa Nzambi kulombaka Abrahami mambu ya kuluta mpasi. Keti yo kele mpidina? Keti yo kesonga mpenza nde Ngangi na beto, yina tafutumuna bafwa, kele na zola ve kana yandi kelomba beto na kulemfukila yandi, ata yo lenda suka nde beto kufwa sambu na ntangu fyoti? Yezu Kristu ti balandi na yandi ya ntete kuyindulaka mutindu yina ve. Bo ndimaka na kunyokwama na kinsuni, nkutu ti na lufwa kibeni, sambu na kusala luzolo ya Nzambi. (Yoane 10:11, 17, 18; Bisalu 5:40-42; 21:13) Kana nde mambu mekuma ngolo mutindu yina, keti nge tasala mpi mutindu mosi? Beto tadila mwa mambu yina Yehowa kulombaka na bantu yina kundimaka kuvanda bantu na yandi.
Nsiku ya Yehowa na bantu ya Izraele
10. Banani silaka na kusala mambu yonso yina Yehowa lombaka, mpi nki yandi pesaka bo?
10 Dikanda ya Abrahami yina kubutukaka na Izaki ti mutekulu na yandi Yakobi, to Izraele, kumaka dikanda ya Izraele. Yehowa katulaka bantu ya Izraele na kimpika. (Kuyantika 32:28; 46:1-3; 2 Samuele 7:23, 24) Ebuna na nima, bo silaka na kusala mambu yonso yina Yehowa lombaka bo na kusala. Bo tubaka nde: “Beto ta sala mambu yonso mutindu Mfumu Nzambi me tuba.” (Kubasika 19:8) Sambu na kulunda mpusa yina bantu ya Izraele kumonisaka nde Yehowa kutwadisa bo, yandi pesaka na dikanda yina bansiku kuluta 600, na kati na yo kuvandaka dyaka ti Bansiku Kumi. Na nima, bansiku yai ya Nzambi, ya yandi pesaka na Moize, bo kumaka kubinga yo kaka nde Nsiku.—Esdrasi 7:6; Luka 10:25-27; Yoane 1:17.
11. Inki kuvandaka lukanu mosi ya Nsiku, mpi nki mwa bansiku kusadisaka na kulungisa yo?
11 Lukanu mosi ya Nsiku vandaka sambu na kutanina bantu ya Izraele, sambu yo vandaka kupesa malongi na yina metala kuvukisa nitu, mumbongo, ti mutindu ya kusansa bana. (Kubasika 20:14; Levi 18:6-18, 22-24; 19:35, 36; Kulonga 6:6-9) Yandi pesaka bo mpi bansiku ya ketadila mutindu ya kuzinga ti bampangi na bo mpi ti bambisi na bo. (Levi 19:18; Kulonga 22:4, 10) Mambu yina vandaka kutubila bankinsi yina bo vandaka kusala na konso mvu ti kukutana sambu na kusamba, vandaka sadisa bantu yango na kuvanda na kimpeve ya mbote.—Levi 23:1-43; Kulonga 31:10-13.
12. Inki kuvandaka lukanu ya nene ya Nsiku?
12 Ntumwa Polo monisaka lukanu ya nene ya Nsiku ntangu yandi sonikaka nde: “Yandi pesaka yo sambu masumu ya bantu kumonana pwelele, tii kuna ya muntu [“nkuna,” NW] ya dikanda ya Abrahami [Kristu] ta kwisa, muntu yina bakaka mambu yina ya Nzambi silaka.” (Galatia 3:19) Nsiku vandaka kuyibusa bantu ya Izraele nde bo kele bantu ya kukonda kukuka. Yo yina, na kutuba ya mbote, bo vandaka na mfunu ya kimenga mosi ya kukuka yina lendaka kukatula masumu na bo kimakulu. (Baebreo 10:1-4) Na yau, Nzambi pesaka Nsiku sambu na kuyidika bantu na kundima Yezu, yina vandaka Mesia, to Kristu. Polo sonikaka nde: “Bansiku vandaka bonso ndesi sambu na kukeba beto tii kuna ya Kristo kumaka, na mpila nde Nzambi kundima beto sambu na lukwikilu na beto.”—Galatia 3:24.
Keti nsiku ya Yehowa vandaka kilo?
13. (a) Inki mutindu bantu ya kukonda kukuka vandaka kumona Nsiku, mpi sambu na nki? (b) Keti ya kyeleka Nsiku vandaka kilo?
13 Ata Nsiku vandaka ‘na bifu ve, yo vandaka mpi ya mbote,’ bantu mingi vandaka kumona yo kilo. (Roma 7:12) Sambu Nsiku vandaka ya kukuka, bantu ya Izraele lendaka ve kulungisa yo kukonda kubwa. (Nkunga 19:7) Yo yina ntumwa Piere kubingaka yo “kilo yina ya bankaka na beto ti beto mosi monaka mpila ve ya kunata.” (Bisalu 15:10) Na kuta masonga, Nsiku yo mosi vandaka kilo ve, mpi bantu yina vandaka kulemfuka na yo bakilaka yo mambote.
14. Pesa mwa bambandu yina kemonisa nde Nsiku vandaka ti lukanu yina vandaka kunatila bantu ya Izraele mambote mingi?
14 Mu mbandu, na nsi ya Nsiku, bo vandaka kutula ve muyibi na boloko, kansi yo vandaka kulomba nde yandi kusala sambu na kufuta bima yina yandi yibaka mbala zole to kuluta. Mpidina, munkwa bima vandaka kuvidisa ve ata kima mosi, bo vandaka kutula mpi ve kilo na zulu ya bantu yina vandaka kusala ngolo na kukwenda kumona mpasi na boloko. (Kubasika 22:1, 3, 4, 7) Yo vandaka nsiku na kudya madya ya kubeba. Kana ngulu mepya mbote ve, yo lenda kupesa bantu maladi yina kekumisaka misuni yonso ya nitu mpasimpasi, fievre to kupema na mpasi. Kana lapin mepya ve mbote yo lenda kupesa fievre to kutula ndikila na menga. (Levi 11:4-12) Nsiku vandaka kutanina dyaka bantu na mpila yo vandaka kubuyisa bo na kusimbasimba bamvumbi. Kana muntu mesimba mvumbi, nsiku vandaka kulomba nde yandi yobila mpi yandi yobisa bilele na yandi. (Levi 11:31-36; Kutanga 19:11-22) Sambu na kutanina bantu na banyoka mingi, yina bantu ya siansi sengumunaka kaka na bamvu-nkama ya meluta, yo vandaka kulomba kuzika tufi.—Kulonga 23:13.
15. Inki kima kumonanaka nde yo vandaka kilo sambu na bantu ya Izraele?
15 Nsiku vandaka kulomba ve mambu ya kuluta mpasi na bantu. Kansi beto lenda tuba ve mutindu mosi sambu na bantu yina vandaka kutendula Nsiku. Sambu na yina metala bansiku yina bo vandaka kulomba bantu na kulanda, mukanda mosi (A Dictionary of the Bible), yina James Hastings kubasisaka, ketuba nde: “Konso nsiku ya Biblia vandaka ti tubansiku yankaka yina vandaka kutendula yo. . . . Ebuna, bantu mekaka kukotisa konso kadikambu ya bo lenda kutana na yo na luzingu na kati ya Nsiku sambu na kutwadisa luzingu ya bantu ti bansiku ya ngolo mpi kukonda mawa. . . . Bo fwaka ndinga ya kansansa; bo nyataka ngolo ya Ndinga ya Nzambi mpi bo fwaka yo sambu na kuyingisa yo na bansiku mingi ya nganda.”
16. Inki Yezu tubaka sambu na yina metala bansiku ya kilo ti bansiku ya bambuta yina bamfumu ya mabundu tulaka?
16 Yezu Kristu kubumbaka ve mambu ya mbi ya bamfumu ya mabundu yina, ya vandaka kutula bansiku mingi na zulu ya bantu, ntangu yandi tubaka nde: “Bo ke kangisaka kilo mingi, ebuna bo ke tulaka yo na zulu ya ntu ya bantu ya nkaka, kansi bo mosi ke zolaka kusadisa bo ve na kunata yo ata na musapi mosi.” (Matayo 23:2, 4) Yandi monisaka nde bansiku ya kilo ya bantu kusalaka bo mosi ti bansiku ya bambuta na bo, yika mpi bansiku na bo yina vandaka kutendula mutindu ya kuyobisa maboko, yo “fwaka mambu yina ya Nzambi ke tubaka.” (Marko 7:1-13; Matayo 23:13, 24-26) Ata na ntwala Yezu kukwisa na ntoto, balongi ya mabundu na Izraele vandaka kulonga ve kyeleka ya mambu yina Yehowa kelombaka.
Kima kibeni ya Yehowa kelomba
17. Sambu na nki Yehowa kuyangalalaka ve ti makabu yina bantu ya Izraele ya kukonda lukwikilu vandaka kuyokila yandi?
17 Na nsadisa ya profete Yezaya, Yehowa kutubaka nde: “Makabu ya beno ke pesa mono yo kele mingi-mingi, kansi yo ke yika mono nki? Mono me lemba na mameme ya beno ke yokilaka mono ti na mafuta ya bana-bangombe na beno; menga ya bangombe ti ya mameme ti ya bankombo mono ke zola yo diaka ve.” (Yezaya 1:10, 11) Sambu na nki Yehowa vandaka kuyangalala ve ti makabu yina yandi mosi kulombaka na Nsiku? (Levi 1:1–4:35) Sambu bantu ya Izraele kukondaka luzitu na yandi. Yo yina, yandi longisilaka bo nde: “Beno yobila, beno sukula ntima na beno; beno katula mbi ya beno ke sala na meso na mono. Beno bikisa kusala mbi, beno longuka na kusala mambote. Beno sosa masonga—beno sadisa bantu ya bo ke monisa mpasi, beno zenga mbote makambu ya bana-nsona, beno nwanina bamifwidi ya bankento.” (Yezaya 1:16, 17) Keti mambu yai kesadisa beto ve na kuyangalala na mambu yina Yehowa kezola nde bansadi na yandi kusala?
18. Inki kibeni Yehowa vandaka kulomba na bantu ya Izraele?
18 Yezu songaka kibeni mambu yina Nzambi kezolaka. Yandi salaka yo ntangu bo yulaka yandi ngyufula yai, “Na kati ya Bansiku yonso, nki nsiku me luta mfunu?” Yezu vutulaka nde: “ ‘Nge fweti zola Mfumu Nzambi na nge, na ntima na nge yonso, na luzolo na nge yonso ti na mabanza na nge yonso.’ Yina kele nsiku me luta mfunu, yo kele mpi nsiku ya ntete. Nsiku ya zole kele mpi mfunu kiteso mosi na yina ya ntete, yo yai: ‘Nge fweti zola mpangi na nge bonso nge mosi.’ Bansiku yonso . . . ti malongi yonso ya baprofete yo ke katukaka na bansiku yina zole.” (Matayo 22:36-40; Levi 19:18; Kulonga 6:4-6) Profete Moize kutubaka mpi mutindu mosi ntangu yandi tubaka nde: “Beno wa mambu yina ya Mfumu Nzambi, Nzambi na beno, ke zola. Beno tina yandi boma, beno sala mambu yonso ya yandi ke songa beno. Beno zola yandi, beno sadila yandi na ntima na beno yonso mpenza, beno landa bansiku na yandi yonso ya mono ke pesa beno bubu yai sambu na mambote na beno.”—Kulonga 10:12, 13; 15:7, 8.
19. Inki mutindu bantu ya Izraele zolaka kumonika bantu ya santu, kansi nki Yehowa zabisaka bo?
19 Ata bo vandaka kusala mambi, bantu ya Izraele zolaka kumonika bantu ya santu. Ata Nsiku vandaka kulomba bantu ya Izraele nde na mvula ya mvimba bo fwete sala kibansa ya kukonda kudya kaka na Kilumbu ya Ndolula ya masumu, bo kumaka kusala yo mbala na mbala. (Levi 16:30, 31) Kansi, Yehowa kunganinaka bo nde: “Kubuya kudia yina ya mono ke zolaka, yo yai: kuzenga-zenga miniololo ya nku, kukangula bansinga ya kimpika ti kubikisa bampika bo kwenda na ngemba, kukatula bakilo yonso yina ke pesa bantu mpasi, kukabisa madia na nge ti muntu yina ke na nzala, kukotisa na nzo na nge nsukami yina ke na kifulu ve ya kulala, kulwatisa muntu yina kele kinkonga, kubuya ve na kusadisa mpangi na nge.”—Yezaya 58:3-7.
20. Sambu na nki Yezu kunganinaka bamfumu ya mabundu ya luvunu?
20 Bantu ya Izraele yina vandaka kusosa kudimonisa bantu ya mbote, vandaka ti dikambu mosi ya mefwanana ti yina ya bamfumu ya mabundu ya luvunu yina Yezu songaka nde: “Matiti yina ke pesaka ntomo na madia (bonso mente, fenuwi ti kumini), beno ke kabisaka yo na ndambu kumi ebuna ndambu mosi beno ke pesaka Nzambi makabu, kansi beno ke landaka ve Bansiku ya kuluta mfunu: beno ke zolaka kusala bantu mambu ya mbote ve, beno ke wilaka bantu ya nkaka mawa ve, beno kele bantu ya kieleka ve. Mambu ya beno zolaka kusala ntete yo yina, na nima mambu yina ya nkaka mpi.” (Matayo 23:23; Levi 27:30) Keti bangogo ya Yezu kesadisa beto ve na kubakisa mambu yina Yehowa kezola kibeni nde beto sala?
21. Inki mutindu profete Mishe monisaka na bunkufi mambu yina Yehowa kelomba ti yina yandi kelomba beto ve na kusala?
21 Sambu na kumonisa pwelele mambu yina Yehowa kelomba ti yina ya yandi kelomba beto ve, profete ya Nzambi Mishe, kuyulaka mutindu yai: “Nki beto ta nata na Mfumu Nzambi, [Yehowa], ntangu beto ke kwisa kusamba yandi? Keti beto fweti nata bana-bangombe ya kuluta kitoko na kupesa yandi makabu ya kuyoka ya mvimba? Keti Mfumu Nzambi ta mona kiese kana beto natila yandi mameme mingi-mingi ya babakala to mafuta ya olive mingi-mingi? Keti beto fweti pesa yandi bana na beto ya ntete makabu sambu na masumu ya beto me sala? Kele ve, Mfumu Nzambi me songa beto mambu yina kele mbote na meso na yandi. Mambu ya yandi ke zola nde beto sala yo yai: Sala mambu yina kele ya masonga, songa mambote na bantu ya nkaka, lemfuka na yandi Nzambi na beto na ntima ya mbote.”—Mishe 6:6-8.
22. Inki kima kibeni Yehowa kuzolaka nde bantu yina kuvandaka na nsi ya Nsiku kusala?
22 Na yau, nki kibeni Yehowa lombaka na bantu yina vandaka kuzinga na nsi ya Nsiku? Ntembe kele ve nde yo lombaka nde bo zola Yehowa Nzambi. Ntumwa Polo tubaka dyaka nde: “Sambu Bansiku yonso ke basikaka na nsiku yai mosi: ‘Zola mpangi na nge bonso nge mosi.’ ” (Galatia 5:14) Mutindu mosi mpi, Polo zabisaka Bakristu ya Roma nde: “Konso muntu yina ke zolaka mpangi na yandi, yandi ke landaka mpenza Bansiku. . . . Kana nge ke zolaka mpangi na nge, tuba nde nge ke landaka Bansiku yonso.”—Roma 13:8-10.
Yo meluta ve mpasi
23, 24. (a) Sambu na nki yo fwete vanda ve mpasi kuluta na kusala mambu yina Yehowa kelomba beto? (b) Inki beto tatubila na mbala ya nima?
23 Keti yo keyitukisa beto ve na kumona nde Yehowa kele Nzambi mosi ya zola, ya kebanzilaka bantu, mpi ya kewilaka bo mawa? Mwana na yandi mosi kaka ya kubutukaka, Yezu Kristu, kwisaka na ntoto sambu na kumonisa zola ya Nzambi; sambu na kusonga bantu nde bo kele na mfunu mingi na meso ya Yehowa. Na ntangu Yezu taka kingana mosi sambu na kumonisa zola ya Nzambi kele na yo, yandi tubaka mutindu yai sambu na bandeke ya fyoti: “Ata ndeke mosi lenda bwa ve na ntoto kana Tata na beno me ndima ntete ve.” Yo yina, na kusukisa yandi tubaka nde: “Beno kuwa boma ve; ata bandeke kele mingi, kansi beno me luta bo na mfunu!” (Matayo 10:29-31) Na masonga yonso, yo lenda vanda ve mpasi ata fyoti sambu na beto na kusala konso kima yina ya Nzambi ya zola ya mutindu yai kelomba beto na kusala!
24 Ebuna, nki Yehowa kelomba beto na kusala bubu yai? Mpi sambu na nki bantu mingi kemonaka bonso nde Nzambi kelombaka beto mambu ya kuluta mpasi? Kana beto tadila bangyufula yai, beto tabakisa sambu na nki yo kele dibaku ya mbote na kusala mambu yonso ya Yehowa kelombaka beto na kusala.
Keti nge lenda pesa mvutu?
◻ Sambu na nki bantu mingi kebuyaka na kusadila Yehowa?
◻ Inki mutindu mambu yina Yehowa lombaka sobaka na nima ya bamvula?
◻ Inki balukanu Nsiku vandaka kulungisa?
◻ Sambu na nki mambu yina Yehowa kelombaka beto na kusala meluta mpasi ve?
[Bangiufula ya disolo ya kulonguka]
[Kifwanisu ya kele na lutiti 8]
Bansiku yina bantu salaka bo mosi, mu mbandu, yina ketala mutindu ya kuyobisa maboko kumisaka lusambu kilo