Bangyufula ya batangi

Inki kele dibansa ya Bambangi ya Yehowa sambu na vote?

Biblia kele ti minsiku mingi ya pwelele yina kesadisaka bansadi ya Nzambi na kubakisa mbotembote dyambu yai. Kansi, yo kele pwelele nde ata munsiku mosi ve kemonisa mbi ya vote yo mosi. Mu mbandu, yo kele mbi ve nde kimvuka ya bantu yina ketwadisaka kompani mosi kusala vote sambu na kubaka badesizio yina ketadila kompani na bo. Mbala mingi mabundu ya Bambangi ya Yehowa kelutaka kusala vote ya kutombula maboko sambu na kubaka badesizio yina ketala ntangu ya kuyantika balukutakanu ti mutindu ya kusadila mbongo ya dibundu.

Kansi, nki beto lenda tuba sambu na yina metala eleksio na mambu ya politiki? Ya kyeleka, na mwa bansi yina kele na demokrasi, kiteso ya bantu 50 na kati ya nkama kekwendaka kuvote ve na kilumbu ya eleksio. Sambu na yina metala Bambangi ya Yehowa, bo kebuyisaka ve ata muntu mosi na kuvote. Bo kesalaka mpi ve ata kampanye mosi sambu na kubuyisa bantu nde bo vote ve. Bo kezitisaka mpi bo kevandaka ti kuwakana ya mbote ti bamfumu yina bo kevotaka na nzila ya mbote na ba eleksio ya mutindu yina. (Roma 13:​1-7) Kansi, sambu na yina metala kuvote sambu na kandida mosi, konso Mbangi ya Yehowa kebakaka desizio mutindu kansansa na yandi ya kulongama na Biblia kesongaka yandi na kusala, mpi mutindu ya yandi kebakisaka mukumba ya yandi kele na yo na ntwala ya Nzambi mpi na ntwala ya Leta. (Matayo 22:21; 1 Piere 3:16) Na ntwala ya kubaka desizio yina, Bambangi ketadilaka mwa mambu mingi.

Dyambu ya ntete, Yezu Kristu tubaka sambu na balandi na yandi nde: “Bo kele bantu ya nsi-ntoto yai ve, mutindu mono mpi kele muntu ya nsi-ntoto yai ve.” (Yoane 17:14) Bambangi ya Yehowa kebakaka munsiku yai na kilo yonso. Bo kekotaka ve na mambu ya politiki ya inza sambu bo “kele [bantu] ya nsi-ntoto yai ve.”​—⁠Yoane 18:⁠36.

Dyambu ya zole, Ntumwa Polo kudibingaka yandi mosi bonso “ntumwa” yina ketuba na zina ya Kristu na ntwala ya bantu na kilumbu na yandi. (Efezo 6:20; 2 Korinto 5:20) Bambangi ya Yehowa kekwikilaka nde Yezu Kristu kele ntangu yai na kiyeka bonso Ntotila ya Kimfumu ya zulu ya Nzambi, ebuna bo mpi, bonso “bantumwa,” fwete zabisa nsangu yai na makanda. (Matayo 24:14; Kusonga 11:15) Bantumwa fwete bikala na bukatikati, bo fwete kota ve na mambu yina keluta na kati ya bansi yina bo metinda bo na kusala kisalu. Sambu bo kele bantu ya ketubaka na zina ya Kimfumu ya Nzambi ya zulu, Bambangi ya Yehowa kemonaka nde bo mpi kele na ntuma ya mutindu mosi yina kepesa bo ve nzila ya kukota na mambu ya politiki ya bansi yina bo kezingaka.

Dyambu ya tatu ya beto fwete tadila kele nde bayina kevote muntu mosi na pozisio mosi ya kisalu, bo fwete zaba mpi nde mambu ya muntu yina tasala lenda vanda na ntu na bo. (Fwanisa ti 1 Timoteo 5:22.) Bakristu fwete tadila mambu mbotembote kana bo kezola ve nde makambu kubwa na zulu ya ntu na bo.

Dyambu ya iya kele nde Bambangi ya Yehowa ketulaka bumosi na bo ya Bukristu na kisika ya ntete kibeni. (Kolosai 3:14) Kana mabundu meyantika kukota na mambu ya politiki, nsukansuka yo kebutaka kukabwana na kati ya bantu yina kesambilaka na kati ya mabundu yango. Mutindu Yezu Kristu kusalaka, Bambangi ya Yehowa mpi kezolaka ve kukota na politiki, ebuna yo kesadisaka bo na kulunda bumosi na bo ya Bukristu.​—⁠Matayo 12:25; Yoane 6:15; 18:​36, 37.

Dyambu ya tanu mpi ya nsuka, kele nde kukonda kukota na mambu ya politiki kesadisaka Bambangi ya Yehowa na kuvanda ti kimpwanza ya kuzabisa bantu ya bimvuka ya politiki yonso nsangu ya mfunu ya Kimfumu.​—⁠Baebreo 10:⁠35.

Kana beto landa minsiku ya Biblia yina beto metubila awa na zulu, na bansi mingi, Bambangi ya Yehowa kebakaka desizio na bo bo mosi sambu na kuvote ve na mambu ya politiki. Mpi kimpwanza na bo ya kubaka desizio yina ya kuvote ve kewakanaka ti nsiku ya insi yina bo kezingaka. Kansi, nki beto lenda sala kana nsiku ya insi kelomba nde bantu yonso fwete vote? Pana, konso Mbangi kebakaka mikumba na yandi ya kubaka desizio yina yandi mosi mezola mutindu kansansa na yandi ya kulongama na Biblia kesonga yandi na kusala na mambu ya mutindu yai. Kana muntu mebaka desizio ya kukwenda kuvote, desizio yina metala yandi mosi. Mambu yina yandi tasala na kisika yina ya kingenga ya bo keyidikaka sambu na kuvote metala yandi mosi ti Ngangi na yandi.

Disolo mosi ya Nzozulu ya Nkengi ya Novembri 15, 1950 (ya Kingelesi), na balutiti 445 ti 446, kutubaka nde: “Kana Kaisala mepesa ntuma nde bantu kukwenda kuvote . . . [Bambangi] lenda kwenda mpi kukota na bisika ya kingenga yina bo kesalaka sambu na vote. Yai kele kisika ya bo fwete monisa to kusonika pozisio na bo. Bantu yina kevote kesalaka mambu yina bo mezola na kisika yina. Na yau, awa na meso ya Nzambi kele kisika ya Bambangi na yandi fwete monisa nde bo kesalaka mambu yina kewakana ti bantuma na Yandi mpi ya kendimama ti lukwikilu na bo. Yo kele nswa na beto ve na kuzabisa konso muntu nki yandi tasala ntangu yandi mekota na kisika yina ya kingenga.”

Ebuna, kana nkento mosi ya Mukristu kele ti bakala yina kekwikilaka ve, nki yandi lenda sala kana bakala na yandi mezabisa yandi nde yandi fwete kwenda kuvote yandi mosi? Yandi fwete lemfuka na bakala na yandi, kaka mutindu Bakristu kelemfukaka na bamfumu ya nene. (Efezo 5:22; 1 Piere 2:​13-17) Kana yandi lemfuka na bakala na yandi, mpi kana yandi kwenda na kisika ya kingenga sambu na kuvote, yo kele desizio na yandi mosi. Muntu mosi ve fwete tubila yandi mambu ya mbi.​—⁠Fwanisa ti Roma 14:⁠4.

Inki beto lenda sala kana nsiku ya insi kelombaka ve nde bantu yonso kuvote, kansi bantu kemonisa kimbeni ya ngolo sambu na bayina kekwendaka ve kuvote, mbala yankaka mpi bo ketula luzingu na bo na kigonsa? To nki beto lenda sala kana ata nsiku mosi ve ketumaka bantu na kukwenda kuvote, kansi bo kepesa beto mpasi mingi kana beto kwenda kuvote ve? Kana mambu kele mutindu yai to kana mambu ya mefwanana ti mambu yai kusalama, konso Mukristu fwete baka desizio na yandi yandi mosi. “Sambu konso muntu fweti baka kilo na yandi mosi.”​—⁠Galatia 6:⁠5.

Yo lenda vanda ti bantu yina kebwaka na kumona nde na ntangu ya eleksio ya insi na bo, Bambangi ya Yehowa yankaka kekwendaka kuvote, kansi bankaka kekwendaka ve. Bo lenda tuba nde Bambangi ya Yehowa ‘kewakanaka ve na kati na bo.’ Kansi, bantu fwete bakisa nde na mambu yina metala kansansa, konso Mukristu fwete baka desizio na yandi yandi mosi na ntwala ya Yehowa Nzambi.​—⁠Roma 14:⁠12.

Konso nki desizio yina ya Bambangi ya Yehowa kekudibakilaka, konso muntu na mambu ya kuswaswana yina lenda kumina bo, bo kesungiminaka na kulunda bukatikati na bo ya Bukristu mpi kimpwanza na bo ya kutuba. Na mambu yonso yina lenda bwa, bo ketulaka ntima na Yehowa Nzambi sambu yandi pesa bo ngolo, yandi pesa bo mayele, mpi yandi sadisa bo sambu bo vweza ve lukwikilu na bo ata nki mutindu yina. Mpidina bo kemonisaka nde bo ketulaka ntima na bangogo ya muyimbi-bankunga yai: “Nge kele kisika ya ngolo ya mono ke tininaka, nge muntu ke nwaninaka mono; tala mono, nata mono mbote mutindu nge tubaka.”​—⁠Nkunga 31:⁠4.