Mambote yina kuzola Ndinga ya Nzambi kepesaka
Mambote yina kuzola Ndinga ya Nzambi kepesaka
“Zola [mayele] ebuna yo ta keba nge mbote-mbote. . . . Simba yo, ebuna yo tapesa nge lukumu.”—BINGANA 4:6, 8.
1. Kuzola Ndinga ya Nzambi kelombaka kibeni kusala nki?
KUTANGA Biblia kele mfunu mingi sambu na Mukristu. Kansi, kutanga ya mpamba kemonisaka ve zola na Ndinga ya Nzambi. Inki beto lenda tuba kana muntu ketanga Biblia kansi na nima yandi kesala mambu yina Biblia kebuya? Yo kele pwelele nde, yandi kezolaka ve Ndinga ya Nzambi mutindu muntu yina kusonikaka Nkunga 119 kuzolaka yo. Kuzola Ndinga ya Nzambi nataka yandi na kuzinga na kuwakana ti mambu yina yo kelombaka.—Nkunga 119:97, 101, 105.
2. Inki mambote mayele yina kekatukaka na Ndinga ya Nzambi kepesaka?
2 Kuzinga na kuwakana ti Ndinga ya Nzambi kelombaka ntangu yonso nde muntu kusoba bangindu na yandi ti mutindu na yandi ya kuzinga. Luzingu ya mutindu yina kemonisaka mayele yina kekatukaka na Nzambi, yina ketendula kusadila nzayilu mpi mayele yina muntu mebaka na kulonguka Biblia. “Zola [mayele] ebuna yo ta keba nge mbote-mbote. Zola mayele, ebuna yo ta kumisa nge muntu ya nene. Simba yo, ebuna yo ta pesa nge lukumu. Yo ta vanda mpu na nge ya lukumu.” (Bingana 4:6, 8, 9) Yai kele nsyamisa mosi ya mbote mpenza ya kesadisa beto na kuyedisa zola ya Ndinga ya Nzambi mpi na kubika yo nde yo twadisa beto! Nani kezolaka ve nde bo tanina yandi, bo sikisa yandi, mpi bo pesa yandi lukumu?
Yo ketaninaka beto na mpasi yina kezingaka ntangu mingi
3. Sambu na nki Bakristu kele na mfunu ya lutaninu ya kuluta mingi bubu yai, mpi yo kelomba kutanina bo sambu na nani?
3 Inki mutindu mayele yina kekatukaka na kulonguka mpi na kusadila Ndinga ya Nzambi ketaninaka muntu? Ntete, yo ketaninaka yandi na Satana Dyabulu. Yezu longaka balandi na yandi na kusamba sambu na kukatuka na maboko ya muntu ya mbi, Satana. (Matayo 6:13) Bubu yai, yo kele mfunu mingi kibeni na kulomba dyambu yai na bisambu na beto. Satana ti bademo na yandi bo kulaka bo na zulu na nima ya 1914, yo yina Satana “me dasuka, sambu yandi me zaba nde ntangu mingi ve me bika na yandi.” (Kusonga 12:9, 10, 12) Bubu yai, makasi na yandi fwete vanda yo kepela kibeni sambu yandi kenunga ve bitumba ya yandi kenwana ti bayina “yonso ke landaka bansiku ya Nzambi ti ke ndimaka mambu ya kieleka yina ya Yesu songaka.”—Kusonga 12:17.
4. Inki mutindu Bakristu kebakaka lusadisu yina ketaninaka bo na bupusi ti mitambu ya Satana?
4 Sambu na nganzi na yandi Satana kelanda na kubasisila baministre Bakristu yai mavwanga mpi yandi kesosa nde bo nyokula bo na nku yonso, to yandi kebasisa mambu yankaka mingi sambu na kukangisa kisalu na bo. Yandi kezola mpi kunata bansamuni ya Kimfumu na kutula dikebi na bo na bima bonso lukumu ya kekatuka na inza, kuzola luzingu ya byese, kuzwa bima mingi ya kinsuni, mpi kulanda byese, olie ya kutula dikebi ya mutindu yina na kisalu ya kulonga Kimfumu. Inki ketaninaka bansadi ya kwikama ya Nzambi na kunwana ti bupusi yina ya Satana to sambu bo kubwa ve na mitambu na yandi? Ntembe kele ve nde kisambu, kinduku ya mbote ti Yehowa, mpi kukwikila nde ya kyeleka balusilu na yandi talungana kele mfunu mingi. Kansi sambu na kuvanda na mambu yai yonso, yo kelomba nde muntu kuvanda na nzayilu ya Ndinga ya Nzambi mpi lukanu ya kulanda bangibusa na yo. Beto kezabaka bangibusa yai na kutanga Biblia mpi mikanda yina kesadisaka na kulonguka Biblia, na kukwenda na balukutakanu, na kundima ndongisila ya Masonuku ya mpangi yina beto kesambilaka na yandi mepesa, to kaka na kuyindululaka na masonga yonso minsiku ya Biblia yina mpeve ya Nzambi keyibusa beto.—Yezaya 30:21; Yoane 14:26; 1 Yoane 2:15-17.
5. Na nki mitindu mayele yina kekatukaka na Ndinga ya Nzambi ketaninaka beto?
5 Bayina kezolaka Ndinga ya Nzambi, yo ketaninaka bo na mitindu yankaka dyaka. Mu mbandu, bo kebelaka ve maladi ya mawi to ya mabanza ti maladi ya nitu yina kekatukaka na bima bonso kunwa dyamba ti bima yina kelausaka, makaya, mpi mansoni. (1 Korinto 5:11; 2 Korinto 7:1) Bo kebebisaka ve binduku na bo na bitubatuba to na kutuba mosi ya mbi. (Efezo 4:31) Bo kebwaka mpi ve na mutambu ya badute na kusosaka kubakisa bafilozofi ya luvunu ya mayele ya inza. (1 Korinto 3:19) Sambu bo kezolaka Ndinga ya Nzambi, yo ketaninaka bo na mambu yina lendaka kubebisa kinduku na bo ti Nzambi mpi kukatula kivuvu na bo ya luzingu ya kukonda nsuka. Bo kesalaka ntangu yonso kisalu ya kusadisa bampangi na bo na kutula lukwikilu na balusilu ya kitoko yina kele na Biblia, sambu bo kezaba nde kana bo kesala mutindu yina bo ‘tagulusa moyo na bo mosi ti moyo ya bantu yina kewaka malongi na bo.’—1 Timoteo 4:16.
6. Inki mutindu mayele yina kekatukaka na Ndinga ya Nzambi ketaninaka beto ata na ntangu ya mpasi?
6 Ya kyeleka, “ntangu ti mambu ya kukonda kukana” kekuminaka bantu yonso, ata bayina kezolaka Ndinga ya Nzambi. (Longi 9:11, NW) Mpila ya kuyituka kele ve kana nde bantu mingi na kati na beto kekutana na bampasi yina kebasikaka yo mosi na ntoto, maladi ya ngolo, bisumbula, to lufwa ya kukonda kukana. Ata mpidina, beto zaba kaka nde Nzambi ketaninaka beto. Kele ve ti dyambu mosi ya mawa ya lenda natila muntu yina kezolaka Ndinga ya Nzambi na masonga yonso mpasi yina tamana ve. Na yau, beto fwete lutisaka ve ndilu na kudibanzabanza sambu na mambu yina tabwa na bilumbu kekwisa. Kana beto mesala yina yonso ya beto lenda sala sambu na kuditanina imene, yo kele mbote na kuyambula mambu yonso na maboko ya Yehowa mpi kupesa ve nzila nde kukonda ya ngemba ya kemonana bubu yai kukatula ngemba na beto. (Matayo 6:33, 34; Filipi 4:6, 7) Kuvila ve nde kivuvu ya lufutumuku mpi luzingu ya mbote kele mambu ya kyeleka yina tasalama kukonda ntembe ntangu Nzambi ‘tasala bima yonso ya mpa.’—Kusonga 21:5; Yoane 11:25.
Monisa nde nge kele “ntoto ya mbote”
7. Inki kingana Yezu telaka bantu mingi yina kwisaka kuwa yandi?
7 Na kingana mosi, Yezu monisaka mfunu ya kuvanda ti ngindu ya mbote sambu na Ndinga ya Nzambi. Ntangu yandi vandaka kulonga nsangu ya mbote na Palestine, bantu mingi kwisaka kuwa yandi. (Luka 8:1, 4) Kansi, bo yonso ve vandaka kuzola Ndinga ya Nzambi. Ntembe kele ve nde, mingi na kati na bo kwisaka kuwa yandi sambu bo vandaka ti mfunu ya kumona bimpa, to sambu bo vandaka kusepila na mutindu na yandi ya mbote ya kulonga. Ebuna, Yezu telaka bantu yina yonso kingana yai: “Muntu mosi katukaka na nzo na yandi, yandi kwendaka kukuna bambuma na yandi. Ntangu yandi vandaka kukuna yo na bilanga, bambuma ya nkaka kwenda kubwa na kati ya nzila. Bantu kwisa kuniata yo, bandeke mpi kwisa kudia yo. Bambuma ya nkaka kwenda kubwa na ntoto ya matadi. Ntangu bambuma menaka, yo yumaka, sambu ntoto vandaka na masa ve. Bambuma ya nkaka kwenda kubwa na kati ya bamwa-nti ya nsende. Bamwa-nti yina menaka nzila mosi ti yo, ebuna yo kangisaka yo. Bambuma ya nkaka kwenda kubwa na ntoto ya mbote. Yo menaka, ebuna konso kimenina butaka bambuma nkama.”—Luka 8:5-8.
8. Bambuma yina Yezu ketubila na kingana na yandi kele nki?
8 Kingana ya Yezu monisaka nde bantu yina tawa nsangu ya mbote tandima yo mutindu mosi ve, yonso tasalama kaka mutindu ntima na bo tamonina. Mbuma yina bo kekuna kele “nsangu [to, “ndinga”] ya Nzambi.” (Luka 8:11) To, mutindu yankaka ya kuta kingana yango ketuba nde, mbuma kele “Nsangu ya Kimfumu.” (Matayo 13:19) Yezu lendaka kusadila konso bangogo yina, sambu ntu-dyambu ya Ndinga ya Nzambi kele Kimfumu ya zulu na kiyeka ya Ntotila Yezu Kristu. Yehowa tasadila Kimfumu yango sambu na kumonisa nde yandi kele mfumu ya nene mpi sambu na kusantisa zina na yandi. (Matayo 6:9, 10) Ebuna, na kuta masonga mbuma kele nsangu ya mbote yina kele na kati ya Ndinga ya Nzambi, Biblia. Bambangi ya Yehowa ketubilaka mingi nsangu ya Kimfumu yai ntangu bo kekwendaka kukuna bambuma bonso Mukuni ya ntete, Yezu Kristu. Inki mutindu bantu keyambaka nsangu yango?
9. Inki kele kifwani ya bambuma yina mebwa (a) na nzila? (b) na zulu ya matadi? (c) na kati ya bansende?
9 Yezu tubaka nde bambuma yankaka kubwaka na nzila ebuna bo dyataka yo. Bambuma yai kele bantu yina kevandaka ti kisalu mingi na mpila nde bo kevandaka ve na ntangu ya kubika nde mbuma ya Kimfumu kutula misisa na ntima na bo. Na ntwala nde bo yedisa zola na Ndinga ya Nzambi, “Satana ke kwisaka kukatula nsangu yina na ntima na bo sambu bo kukwikila ve, bo kuguluka mpi ve.” (Luka 8:12) Bambuma yankaka kubwaka na zulu ya matadi. Yo kele bantu yina kendimaka nsangu ya Biblia kansi bo kebikaka ve nde yo simba ntima na bo. Ntangu kimbeni kebasikaka to kana bo memona nde yo ke mpasi na kusadila ndongisila ya Biblia, “bo kebwaka” sambu bo kele ve ti bansimbulu. (Luka 8:13, NW) Kele mpi ti bantu yankaka ya kewaka ndinga kansi “mambu yina ke pesaka bo mpasi na ntima, kimvwama ti kiese ya luzingu yai” ketungisaka bo mingi. Nsukansuka, mutindu bansende kekotaka na banti, “yo ke kwisaka kukangisa bo nzila.”—Luka 8:14.
10, 11. (a) Ntoto ya mbote kele kifwani ya banani? (b) Inki beto fwete sala sambu na ‘kusimba’ Ndinga ya Nzambi na ntima na beto?
10 Nsukansuka, kele ti bambuma yankaka ya kubwaka na ntoto ya mbote. Yo kele kifwani ya bantu yina keyambaka nsangu ti “ntima ya mbote mpenza.” Ya kyeleka, konso muntu na kati na beto tazola kuvanda na kati ya bantu yai. Kansi, nsukansuka, kima kele mfunu kele mutindu Nzambi kemoninaka mambu. (Bingana 17:3; 1 Korinto 4:4, 5) Ndinga na yandi ketuba nde kana beto kele ti “ntima ya mbote mpenza,” beto fwete monisa yo na bisalu na beto banda bubu tii na lufwa to tii kuna ya Nzambi tasukisa inza ya bima yai ya mbi. Kana beto ndimaka nsangu ya Kimfumu na mbala ya ntete, yo kele mbote. Kansi, bantu yina kele ti ntima ya mbote mpenza kendimaka Ndinga ya Nzambi mpi bo “ke landaka [“kesimbaka,” NW] yo tii kuna bo fweti buta bambuma [na kukanga ntima, NW].”—Luka 8:15.
11 Mutindu ya mbote mosi kaka ya kusimba Ndinga ya Nzambi na ntima na beto kele kutanga mpi kulonguka yo beto mosi mpi na kimvuka ti bampangi na beto bankwikidi. Yo kezola kutuba nde beto salaka ngolo sambu na kubaka mambote ya madya ya kimpeve yina Nzambi kepesaka beto na nzila yina yandi metulaka sambu na kusungimina mambote ya kimpeve ya balandi ya kyeleka ya Yezu. (Matayo 24:45-47) Kana bo kesadila bima yai, zola kepusaka bayina kesimbaka Ndinga ya Nzambi na ntima na bo na ‘kulanda tii kuna ya bo fweti buta bambuma na kukanga ntima.’
12. Inki mbuma beto fwete buta na kukangaka ntima?
12 Ntoto ya mbote kebutaka nki bambuma? Kana bo mekuna yo, bambuma keyelaka tii yo takuma banti yina kebutaka bambuma ya mutindu mosi ti bambuma yina bo kunaka, ya bo lenda mwanga dyaka sambu yo buta bambuma yankaka na nima. Mutindu mosi mpi, sambu na bantu yina kele ti ntima ya mbote mpenza, mbuma ya ndinga keyelaka na ntima na bo, ebuna yo kesalaka nde bo yela na kimpeve tii kuna ya bo mpi lenda kuna mbuma yina na ntima ya bantu yankaka. (Matayo 28:19, 20) Bo kemonisaka kikalulu ya kukanga ntima na kisalu na bo ya kukuna bambuma. Yezu monisaka mfunu ya kukanga ntima ntangu yandi tubaka nde: “Muntu yina ta kanga ntima tii na nsuka, yandi ta guluka. Bo ta longaka Nsangu yai ya Mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.”—Matayo 24:13, 14.
‘Kubuta mbuma na konso kisalu ya mbote’
13. Inki kisambu Polo salaka yina monisaka kuwakana yina kele na kati ya kisalu ya kubuta mbuma ti nzayilu ya Ndinga ya Nzambi?
13 Ntumwa Polo mpi kutubilaka mfunu ya kubuta mbuma, mpi yandi monisaka kuwakana yina kele na kisalu ya kubuta mbuma ti Ndinga ya Nzambi. Yandi sambaka sambu na bampangi na yandi bankwikidi nde: “Beno kuzaba mpi mbote-mbote mambu yina ya Mpeve-Santu ke zabisaka beno. Mpidina, beno ta mona mpila ya kuzinga mutindu [Yehowa] ke zolaka ti kupesa yandi kiese na mambu yonso. Beno ta salaka mambu ya mbote ya mutindu na mutindu [“Beno tabutaka mbuma na konso kisalu ya mbote,” NW], ebuna beno ta zabaka Nzambi diaka mingi.”—Kolosai 1:9, 10; Filipi 1:9-11.
14-16. Na kuwakana ti kisambu ya Polo, nki mbuma bantu yina kezolaka Ndinga ya Nzambi ke na kubuta?
14 Yo yina Polo kemonisa nde kubaka nzayilu kele ve kima ya nsuka ya beto fwete sosa. Kansi, zola sambu na Ndinga ya Nzambi fwete pusa beto na “kuzinga mutindu Yehowa ke zolaka” na kulanda ‘kubuta mbuma na konso kisalu ya mbote.’ Inki kisalu ya mbote? Kulonga nsangu ya mbote ya Kimfumu kele kisalu mosi ya kuluta mfumu sambu na Bakristu na bilumbu yai ya nsuka. (Marko 13:10) Dyaka, bayina kezolaka Ndinga ya Nzambi kesalaka ngolo na kupesa mbongo mbala na mbala sambu na kusimba kisalu yai. Bo kevandaka na kyese ya kusala yo, sambu bo kezabaka nde “Nzambi ke zolaka nde bantu kupesa makabu ti kiese.” (2 Korinto 9:7) Makabu na bo kesadisaka na kusala badepanse ya bisalu yonso yina kesalamaka na ba Betele kuluta nkama mosi, kisika ya bo ketwadisaka kisalu ya kulonga Kimfumu mpi bo kesalaka ba Biblia ti mikanda yina ketendulaka Biblia. Makabu na bo kesadisaka mpi na kubasisa mbongo yina bo kevandaka na yo mfunu sambu na kuyidika balukutakanu ya nene ya Bakristu mpi sambu na kutinda bankengi-ntambudi, bamisionere, ti bansadi yankaka yina kesalaka kisalu ya ntangu yonso na kukwenda kusala bisalu na bisika yankaka.
15 Bisalu yankaka ya mbote kele kutunga banzo ti kusungimina bisika yina bo kesalaka bisalu yonso ya ketala lusambu ya kyeleka. Zola ya Ndinga ya Nzambi kepusaka bantu yina kesambilaka yandi na kukeba nde Bisika ya Balukutakanu ya Nene ti Banzo ya Kimfumu na bo kuvanda ve mvindu. (Fwanisa ti Nehemia 10:39.) Sambu bo kesonikaka zina ya Nzambi na kibaka ya ntwala ya banzo ya mutindu yai, yo kele mfunu nde yo vanda bunkete mpi kitoko na kati ti na nganda, mpi nde bantu yina kesambilaka na kati ya banzo ya mutindu yina kuvanda ve ti bikalulu ya mbi. (2 Korinto 6:3) Bakristu yankaka kevandaka na mpila ya kusala mambu mingi. Zola ya Ndinga ya Nzambi kepusaka bo na kukwenda bitamina ya nda sambu na kutunga banzo ya mpa ya kusambila na bisika yina mfunu kele sambu bampangi kele bansukami to bo zaba ve mutindu ya kutunga.—2 Korinto 8:14.
16 ‘Kubuta mbuma na konso kisalu ya mbote,’ kezola kutuba mpi kulungisa mikumba na beto ya dibuta mpi kumonisa nde beto kekudibanzaka sambu na bampangi na beto Bakristu. Zola ya Ndinga ya Nzambi kepusaka beto na kuyindula mpi bampusa ya “bampangi na beto bakristo” mpi ‘kulonguka na kusadisa fami na beto.’ (Galatia 6:10; 1 Timoteo 5:4, 8) Sambu na yina metala mambu yai, kukwenda kutala bantu yina kebela mpi kupesa kikesa na bantu yina bampangi na bo mefwa kele kisalu mosi ya mbote. Bankuluntu ti bantu yina kesalaka na ba Komite ya Kuwakana ti Balupitalu kesalaka kisalu ya mbote mpenza ntangu bo kesadisaka bantu yina kele na mambu ya metala mavimpi na bo! (Bisalu 15:29) Mambu ya mpasi ya kebwaka na ntoto kebwa kaka mingi, yankaka kekudibwilaka yo mosi kansi yankaka bantu bo mosi kesosaka yo sambu na kukonda mayele na bo. Na nsadisa ya mpeve ya Nzambi, Bambangi ya Yehowa ke na kusala ngolo na bisika mingi na ntoto sambu na kupesa lusadisu ya nswalunswalu na bampangi na bo ti bantu yankaka yina kekutana ti bampasi mpi bisumbula ya mambu ya mutindu yina. Yai yonso kele bambuma ya kitoko yina bantu ya kezolaka Ndinga ya Nzambi kemonisaka.
Mambu ya kyese ya bilumbu kekwisa
17, 18. (a) Inki kima ke na kusalama na kisalu ya kukuna bambuma? (b) Inki mambu ya kuluta mfunu bantu yina kezolaka Ndinga ya Nzambi tamona na meso na bo?
17 Kisalu ya kukuna bambuma ya Kimfumu kelanda na kupesa mambote mingi na bantu. Na bamvula yai meluta, konso mvula kiteso ya bantu kuluta 300 000 kundimaka nde nsangu ya Biblia kutula misisa na ntima na bo. Ebuna yo tindaka bo na kupesa luzingu na bo na Yehowa mpi na kumonisa kidimbu ya kudipesa na bo na mbotika ya masa. Mambu ya kyese kibeni ke na kukinga bo na bilumbu kekwisa!
18 Ntama mingi ve, bantu yina kezolaka Ndinga ya Nzambi kezaba nde Yehowa Nzambi tatelama sambu na kumonisa bunene ya zina na yandi. “Babilone ya nene,” kintinu ya inza ya mabundu ya luvunu, tafwa. (Kusonga 18:2, 8, NW) Ebuna, bayina kebuyaka na kuzitisa Ndinga ya Nzambi, Ntotila Yezu Kristu tafwa bo. (Nkunga 2:9-11; Daniele 2:44) Mfunu ya kupesa dyaka bantu kikesa sambu na mpasi, maladi, ti lufwa tavanda ve.—Kusonga 21:3, 4.
19, 20. Inki luzingu ya kyese Nzambi mebumbila bayina kezolaka mpenza Ndinga na yandi sambu na bilumbu kekwisa?
19 Bantu yina kezolaka Ndinga ya Nzambi talungisa bisalu ya lukumu kibeni! Bantu yina taguluka na Armagedoni tayantika ntete na kisalu ya kyese ya kukumisa ntoto yai paladisu. Bo tavanda ti dibaku ya kitoko ya kuyilama sambu na kulungisa bampusa ya bafwa yina ke na kupema na maziamu ntangu yai mpi ya Nzambi kevila ve na mabanza na yandi. Bo tasala yo ti kivuvu ya kusala kumosi ti Nzambi na lufutumuku ya bafwa. (Yoane 5:28, 29) Na ntangu yina lutwadisu ya kukuka ya ntoto tasalama na Mfumu ya kuluta nene, Yehowa, na nzila ya Mwana na yandi ya mebaka nkembo, Yezu Kristu. Bo ‘takangula mikanda’ yina tapesa bantuma sambu na bantu yina tazinga na inza ya mpa.—Kusonga 20:12.
20 Na ntangu yina Yehowa yandi mosi mezola, kimvuka yonso ya Bakristu ya kupakulama ya kwikama tavanda bo mekwenda dezia kubaka dikabu na bo na zulu sambu bo ‘tabaka makabu na bo yina na kimvuka ti Kristo.’ (Roma 8:17) Na Luyalu ya Bamvula Funda ya Kristu, bantu yonso yina kezolaka Ndinga ya Nzambi takuma bantu ya kukuka na mabanza ti na nitu. Na nima ya kumonisa kwikama na bo na kumekama ya nsuka, bo tabaka dikabu na bo ya luzingu ya kukonda nsuka mpi bo tayantika kuzinga na “dipanda ya lukumu yina ya bana ya Nzambi.” (Roma 8:21; Kusonga 20:1-3, 7-10) Yo tavanda ntangu mosi ya kyese mpenza! Ya kyeleka, ata Yehowa mepesaka beto kivuvu ya luzingu na zulu to na ntoto, zola ya ngolo ya Ndinga na yandi mpi lukanu ya kuzinga mutindu mayele ya Nzambi ketuba tatanina beto. Ebuna na bilumbu kekwisa, yo ‘tapesa beto lukumu sambu beto mesimba yo.’—Bingana 4:6, 8.
Keti nge lenda tendula?
◻ Inki mutindu zola ya Ndinga ya Nzambi tatanina beto?
◻ Mbuma yina bo ketubila na kingana ya Yezu kele nki, mpi nki mutindu beto kekunaka yo?
◻ Inki mutindu beto lenda monisa nde beto kele “ntoto ya mbote”?
◻ Inki mambote bantu yina kezolaka Ndinga ya Nzambi kebaka banda ntangu yai?
[Bangiufula ya disolo ya kulonguka]
[Kifwanisu ya kele na lutiti 26]
Mbuma ya kingana ya Yezu kele nsangu ya mbote yina kele na Ndinga ya Nzambi
[Bangogo ya kemonisa kisina ya foto]
Garo Nalbandian
[Kifwanisu ya kele na lutiti 27]
Bambangi ya Yehowa kesalaka mutindu Mukuni ya Nene kusalaka
[Bifwanisu ya kele na lutiti 30]
Bantu yina taguluka na Armagedoni tasepila na bambuma ya ntoto