Mvu 2000​—Keti yo kele ya kutudila dikebi?

KETI kele ti kima ya kuswaswana ya kekumisa mvu 2000 mvula mosi ya kutudila dikebi? Bantu ya kezingaka na bansi ya Mputu kemonaka yo bonso mvu ya ntete ya mvu funda ya tatu. Bantu ke na kuyilama mpenza sambu na kuta nkinsi ya nene kilumbu yina. Bo mesalasala bamontre ya nene ya kuran sambu yo tangaka basegonde tii na ntangu mvu funda ya mpa tayantika. Bantu ke na kuyilama sambu na kusala Feti ya kafukafu na Nkokila ya Kilumbu ya Bonane yina. Bo ke na kuteka bapolo yina kele ti bisono ya ketuba nde beto mekuma na nsuka ya mvu funda na bamagazini ya bambanza ya fyoti ti na bazandu ya bambanza ya nene.

Mabundu mingi ya nene ti ya fyoti tavukana kilumbu yina sambu na kuta nkinsi ya kuluta nda ya mvula yai. Na luyantiku ya mvula kekwisa, Papa Jean Paul II takwenda na Izraele sambu na kutwadisa nkinsi mosi ya nene ya bantu ya dibundu ya Katolika ya Roma. Nkinsi yango bo kebinga yo nde “Nkinsi ya nene ya mvu funda ya Dibundu ya Katolika ya Roma.” Ziku bantu ya kesambilaka ti bayina kesepelaka kaka na kutala mambu kiteso ya bamiliyo zole ti ndambu, mpi bantu yina kesalaka banzyetolo na bansi yankaka kiteso ya bamiliyo sambanu ke na kuyilama sambu na kukwenda na Izraele na mvula kekwisa.

Sambu na nki bantu mingi buna keyilama sambu na kukwenda na Izraele? Ntangu yandi vandaka kutuba na kisika ya Papa, muntu mosi ya kesalaka na Vatican, Roger Cardinal Etchegaray, kutubaka nde: “Mvu 2000 kele mvu ya nkinsi ya Kristu mpi ya luzingu na yandi na insi yai. Yo kele kima ya kuyituka ve nde Papa kukwenda na insi yina.” Sambu nki bo kekangisa mvu 2000 ti Kristu? Sambu bo kemona nde mvu 2000 kele mvu ya kelungisa bamvula 2000 banda lubutuku ya Yezu. Kansi, keti yo kele mutindu yina? Beto tatala.

Bantu ya mabundu mingi yankaka mpi kemona nde mvu 2000 kele mvu mosi ya kele ti ntendula ya nene. Bo kendima nde na mvu ya kekwisa, Yezu takwisa kuvutuka na Ngumba ya Baolive mpi bitumba ya Armagedoni, yina bo ketubila na mukanda ya Kusonga, tasalama na muwanda ya Meggido. (Kusonga 16:​14-16) Sambu na kuyilama na mambu yina tabwa, bantu mingi yina kezingaka na insi ya Amerika ke na kutekaka banzo na bo ti bima na bo yonso sambu na kukwenda na Izraele. Sambu na bantu yina takuka ve kubika banzo na bo sambu na kukwenda na Izraele, pastere mosi ya mezabanaka mingi na Amerika silaka nde bo tasonga kuvutuka ya Yesu na televisio yina kesongaka bifwanisu ya kulere!

Na bansi ya Mputu, bo kekudibongisa mpenza sambu na kuyantika mvu funda ya tatu. Kansi na bisika yankaka, bantu kelanda kusala bisalu na bo mutindu bo kesalaka yo konso kilumbu. Bantu yai, disongidila bantu mingi ya inza, kendimaka ve nde Yezu ya Nazareti vandaka Mesia. Bo kendimaka mpi ve mutindu ya kusonika badati ti bidimbu yai N.K.-A.D. a Mu mbandu, bamizuluma mingi kesadilaka manaka na bo mosi. Na manaka na bo, mvula ya kekwisa tavanda mvu 1420, kansi 2000 ve. Bamizuluma ketangaka bamvula yantika na mvula yina profete Muhamede kutinaka mbanza Meka sambu na kukwenda na mbanza Medina. Na kimvuka, na inza ya mvimba bantu kesadilaka bamanaka 40 ya kuswaswana.

Keti mvu 2000 fwete vanda ti ntendula sambu na Bakristu? Keti Yanuari 1, 2000 kele mpenza dati mosi ya kele ti ntendula ya nene? Bamvutu na bangyufula yai kele na disolo ya melanda.

[Noti na nsi ya lutiti]