Keti nge kelungisaka kisalu na nge yonso na ntwala ya Nzambi?

“Konso kima ya beto ke sala, Nzambi ke sambisa beto, ata mambu ya mbote to ya mbi, ata mambu ya beto ke salaka na kinsweki.”​—⁠LONGI 12:⁠14.

1. Inki bima Yehowa mepesaka bantu na yandi?

 YEHOWA kepesaka lusadisu na yandi na bantu yina keyibukaka yandi nde yandi kele Ngangi na bo ya Nene. Ndinga na yandi ya kupemama kepesaka bo nzayilu yina bo kele na yo mfunu sambu na kusepidisa yandi mpenza. Mpeve santu ya Nzambi kesadisaka bo na kusala luzolo ya Nzambi mpi na ‘kusala mambu ya mbote ya mutindu na mutindu.’ (Kolosai 1:​9, 10) Dyaka, Yehowa kepesaka madya ya kimpeve mpi lutwadisu na yandi na nsadisa ya “mpika ya kwikama mpi ya mayele.” (Matayo 24:​45-47, NW) Mpidina, bantu ya Nzambi kebakaka balusakumunu yina kekatukaka na zulu na mitindu mingi ntangu bo kesadilaka Yehowa, mpi ntangu bo kesalaka kisalu ya kulonga nsangu ya mbote ya Kimfumu.​—⁠Marko 13:10.

2. Sambu na yina metala kisalu ya Yehowa, nki bangyufula lenda kwisila beto na mabanza?

² Bakristu ya kyeleka kele na kyese ya kusala kisalu ya santu ya Yehowa. Kansi, bankaka lenda lemba nitu mpi kuyindula nde bikesa ya bo kesala kele mfunu ve ata fyoti. Mu mbandu, Bakristu yina mekudipesaka lenda kudiyula ntangu yankaka kana bikesa ya bo kesalaka na ntima mosi kele kibeni mfunu. Ntangu mfumu ya dibuta mosi keyindula mutindu bo kesalaka kulonguka ya dibuta ti bisalu na bo yankaka, bangyufula bonso yai lenda kwisila yandi na mabanza: ‘Keti Yehowa keyangalalaka mpenza ti kisalu ya beto kesalaka? Keti beto kesalaka mpenza kisalu ya beto fwete sala na ntwala ya Nzambi?’ Bangogo ya mayele ya longi lenda sadisa beto na kuzwa mvutu na bangyufula ya mutindu yai.

Keti mambu yonso kele mpamba?

3. Kana beto landa mutindu Longi 12:8 ketuba, nki kima kele mpamba kibeni?

³ Bantu mingi lenda yindula nde bangogo ya muntu ya mayele kutubaka kepesaka ve mpenza kikesa ata na muntu mosi, na baleke to minunu. Longi tubaka nde: “Yo kele mpamba mpenza, yonso kele mpamba.” (Longi 12:⁠8) Na kuta masonga, kima ya kuluta mpamba kele kubuya kuyibuka Ngangi ya Nene na buleke, ebuna nge nuna kukonda kusadila yandi, mpi na nima nge vanda kaka na kyese ya kutuba nde mono mezinga bamvula mingi. Yonso kele mpamba mpenza, to nkatu kibeni, sambu na muntu ya mutindu yina, ata yandi kufwa ti kimvwama mpi ti lukumu na inza yai ya kezinga na kiyeka ya muntu ya mbi, Satana Dyabulu.​—⁠1 Yoane 5:⁠19.

4. Sambu na nki beto lenda tuba ve nde mambu yonso kele mpamba?

⁴ Mambu yonso ve kele mpamba sambu na bansadi ya kwikama ya Yehowa yina kebumbaka kimvwama na bo na zulu. (Matayo 6:​19, 20) Bo kele ti mambu mingi ya kusala na kisalu ya Mfumu yina kepesaka balusakumunu mingi, mpi bisalu yango kele ya mpamba ve ata fyoti. (1 Korinto 15:58) Kansi, kana beto kele Bakristu yina mekudipesaka, keti beto kelanda na kusala kisalu yina Nzambi mepesaka beto na bilumbu yai ya nsuka? (2 Timoteo 3:⁠1) To keti beto mekumaka ti luzingu ya keswaswana kaka fyoti na luzingu ya bantu yina kevandaka penepene ti beto? Mbala yankaka bo kesambaka na mabundu ya kuswaswana mpi bo mekudipesaka kibeni na lusambu na bo; bo kekwendaka mbala na mbala na banzo-nzambi na bo mpi kelungisaka mambu ya dibundu na bo kelombaka bo. Kansi, ata mpidina, bo kele ve bansamuni ya nsangu ya Kimfumu. Bo kele ve na nzayilu ya sikisiki yina lenda sadisa bo na kubakisa nde yai kele “ntangu ya nsuka” mpi nde bilumbu yai ya beto kezinga kele ve ya kulembisa nitu sambu mambu mekuma ya nswalunswalu.​—⁠Daniele 12:⁠4.

5. Inki beto fwete sala kana kuvanda ti luzingu bonso yina bantu yonso kele na yo mekuma susi na beto ya ntetentete?

⁵ Sambu na yina metala ntangu ya mbi ya beto kezinga, Yezu Kristu tubaka nde: “Mambu yina bwaka na ntangu ya Noa, yo ta bwa mpi mutindu mosi ntangu Mwana-muntu ta kwisa. Na bilumbu yina, ntangu masa vandaka me fuluka mingi ntete ve na ntoto, bantu vandaka kudia, kunwa, kukwelana tii na kilumbu yina ya Noa kotaka na maswa. Bo vandaka kuzaba kima ve tii kuna masa fulukaka mingi na ntoto yonso; masa yina nataka bo yonso na lufwa. Ntangu Mwana-muntu ta kwisa, yo ta vanda mutindu mosi.” (Matayo 24:​37-39) Kudya mpi kunwa na kiteso ya kufwana kele mbi ve, mpi makwela kele kima mosi ya mekatukaka na Nzambi yandi mosi. (Kuyantika 2:​20-24) Kansi, kana beto mona nde ngindu ya kusosa kuvanda ti luzingu bonso yina bantu yonso kele na yo mekuma susi na beto ya ntetentete, sambu na nki ve kutubila mambu yai na kisambu? Yehowa lenda sadisa beto na kutula mambote ya Kimfumu na yandi na kisika ya ntete, na kusala mambu yina kele ya mbote, mpi na kulungisa kisalu ya beto fwete sala sambu na yandi.​—⁠Matayo 6:33; Roma 12:12; 2 Korinto 13:⁠7.

Kudipesa mpi kisalu na beto na Nzambi

6. Inki mutindu bantu mingi ya mebakaka mbotika kekuka ve kulungisa kisalu na bo na ntwala ya Nzambi?

⁶ Bakristu mingi yina mebakaka mbotika fwete samba mingi mpi bo fwete sala yo na masonga yonso, sambu bo kesalaka dyaka ve kisalu ya bo ndimaka na kusala ntangu bo kudipesaka na Nzambi. Konso mvula, kiteso ya bantu kuluta 300000 kebakaka mbotika bamvula mingi melunga ntangu yai. Kansi, ntalu ya Bambangi ya Yehowa yina kesalaka kisalu mbala na mbala kemata ve kiteso mosi ti ntalu ya bantu ya mpa. Bantu mingi ya kukumaka bansamuni ya Kimfumu meyambulaka na kulonga nsangu ya mbote. Kansi, na ntwala nde bantu kubaka mbotika, yo kelombaka nde bo sala ntete na kiteso ya kufwana kisalu ya Bukristu. Mutindu yina, bo kebakisaka mbote kisalu yina Yezu pesaka balandi na yandi yonso: “Beno kwenda kukumisa bantu yonso balonguki na mono: Beno botika bo na zina ya Tata ti ya Mwana ti ya Mpeve-Santu, beno longa bo mpi na kulanda mambu yonso ya mono vandaka kusonga beno na kusala.” (Matayo 28:​19, 20) Katula bayina kele na bampasi ya kuluta nene bonso bimbefo ya ngolo to bampasi yankaka yina kepesa bo ve nswa ya kusala kisalu yango, bantu yina mebakaka mbotika kansi ya kesalaka dyaka ve bonso Bambangi ya kikesa ya Nzambi mpi ya Kristu, kelungisaka dyaka ve kisalu na bo yonso na ntwala ya Ngangi na beto ya Nene.​—⁠Yezaya 43:​10-12.

7. Sambu na nki beto fwete kutanaka mbala na mbala sambu na lusambu?

⁷ Dikanda ya Izraele ya ntama vandaka dikanda mosi ya kudipesaka na Nzambi, mpi na nsi ya kuwakana ya Nsiku, bantu ya dikanda yango vandaka ti mambu mingi ya bo fwete sala sambu na Yehowa. Mu mbandu, yo vandaka kulomba nde babakala yonso kukutana sambu na bankinsi tatu konso mvula, ebuna bo vandaka ‘kukatula’ konso muntu yina vandaka kuzitisa ve na luzolo yonso Nkinsi ya Paki. (Kutanga 9:13; Levi 23:​1-43; Kulonga 16:16) Sambu na kulungisa kisalu na bo na Nzambi bonso bantu yina mekudipesaka na yandi, yo lombaka nde bantu ya Izraele kukutana mbala na mbala sambu na kusamba. (Kulonga 31:​10-13) Nsiku kutubaka ve ata kisika mosi nde, ‘Sala yo kaka kana mpila kele ya kusala yo na luzingu na nge.’ Sambu na bantu yina mekudipesaka ntangu yai na Yehowa, ntuma yai keyika kilo na mambu yina Polo tubaka: “Beto banzila bantu ya nkaka na kati na beto na kupesa bo kikesa ya kuzola bampangi ya nkaka kuluta diaka mbote ti kusadila bo mambu ya mbote. Konso ntangu beto fweti kutana kaka na [balukutakanu, NW]; beto vanda ve bonso bantu ya nkaka ke kwendaka diaka ve na [balukutakanu, NW]. Kansi beto fweti pesa kikesa na bampangi ya nkaka na kati na beto, sambu beno ke mona nde kilumbu yina ya Kristo ta sambisa bantu yo yai mpi kele na nzila.” (Baebreo 10:​24, 25) Ee, kuvukana mbala na mbala ti bampangi bankwikidi kele mpi na kati ya kisalu yina Mukristu yina mekudipesaka fwete sala sambu na Nzambi.

Longukaka balukanu na nge mbotembote na ntwala ya kubaka yo!

8. Sambu na nki leke yina mekudipesaka fwete kudipesa na ntima ya mvimba na kisalu na yandi ya santu?

⁸ Mbala yankaka nge kele leke ya mekudipesaka na Yehowa. Kana nge tula mambote ya Kimfumu na kisika ya ntete na luzingu na nge, nge tabaka balusakumunu ya nene. (Bingana 10:22) Kisambu ti manaka ya mbote lenda sadisa nge na kulutisa bamvula na nge ya buleke na mutindu mosi ya kisalu ya ntangu yonso. Yai kele mutindu mosi ya mbote ya kumonisa nde nge keyibukaka Ngangi na nge ya Nene. Kana ve, mambu ya kinsuni lenda yantika kubaka ntangu ti dikebi na nge mingi. Mutindu bantu mingi kesalaka, nge lenda kwela nswalu na luzingu mpi kuyantika kubaka bamfuka sambu na kusosa kuzwa bima ya kinsuni. Kisalu ya kinsuni lenda baka ntangu ti ngolo na nge yonso. Kana nge kuma ti bana, nge fwete baka mikumba ya dibuta na nge bamvula mingi. (1 Timoteo 5:⁠8) Ziku nge tavila ve Ngangi na nge ya Nene, kansi yo kele mayele na kuzaba nde, kupona na ntwala mambu ya nge tasala to kukonda ata lukanu mosi na mambu ya nge tasala ntangu nge takuma mbuta lenda songa mutindu luzingu na nge tavanda na kimbuta. Ntangu nge takuma mbuta, kana nge tala na nima mutindu nge melutisa luzingu na nge, yo lenda pusa nge na kutuba nde yo zolaka kuvanda mbote kana nge lutisaka bamvula na nge ya butoko na kisalu ya santu sambu na Ngangi na beto ya Nene. Sambu na nki ve kudipesa na ntima ya mvimba banda ntangu yai, na mambu ya nge kekana kusala na bilumbu kekwisa, na mpila nde nge mona kyese na kisalu na nge ya santu na Yehowa na bamvula na nge ya buleke?

9. Inki muntu yina mekuma mbuta mpi ya kuvandaka ti mikumba ya nene na dibundu lenda sala?

⁹ Tala mbandu ya mambu yankaka ya kutadila, mambu yina muntu mosi ya kuvandaka ngungudi ya “mameme ya Nzambi” salaka. (1 Piere 5:​2, 3, NW) Sambu na bikuma ya yandi vandaka na yo, yandi bikisaka na luzolo yonso bisalu yina. Ya kyeleka, yandi mekuma mbuta ntangu yai, mpi yo lenda vanda mpasi sambu na yandi na kulanda kusala kisalu ya Nzambi. Kansi, nki beto lenda tuba kana yo vandaka nde yandi kele dyaka na ngolo ya kubaka mikumba ya teokrasi? Muntu ya mutindu yai zolaka kunatila bantu yankaka balusakumunu mingi kana yandi kele dyaka ti ngolo ya kubaka mikumba na dibundu! Yo yina, sambu ata muntu mosi ve kezingaka kaka sambu na yandi mosi, banduku ti bantu yina kezolaka yandi tavanda na kyese kana yandi lenda sala mwa mingi dyaka, sambu na lukumu ya Nzambi. (Roma 14:​7, 8) Kima ya kuluta mfunu dyaka kele nde, Yehowa tavila ve mambu yonso yina konso muntu kesalaka na kisalu na yandi. (Baebreo 6:​10-12) Ebuna, nki lenda sadisa beto na kuyindula Ngangi na beto ya Nene?

Mambu yina tasadisa beto na kuyibuka Ngangi na beto ya Nene

10. Sambu na nki longi fwanaka mpenza na kupesa beto bandongisila na yina metala kuyibuka Ngangi na beto ya Nene?

¹⁰ Longi vandaka ya kufwana mpenza sambu na kupesa beto bandongisila yina tasadisa na kuyibuka Ngangi na beto ya Nene. Yehowa pesaka mvutu na bisambu na yandi ya masonga, sambu yandi pesaka Salomo mayele ya kuluta kibeni. (1 Bantotila 3:​6-12) Salomo salaka yonso sambu na kuzaba mbotembote mambu yonso ya luzingu ya bantu. Dyaka, yandi bakaka lusadisu ya mpeve ya Nzambi, yina kusadisaka yandi na kusonika mambu yonso yina yandi sengumunaka sambu na mambote ya bantu yankaka. Yandi sonikaka nde: “Longi vandaka mayele, yandi vandaka kulonga kaka bantu mambu yina ya yandi zabaka. Yandi longukaka bingana, yandi talaka mbote-mbote mambu ya kieleka ya yo vandaka kutuba. Longi mekaka kuzwa mambu yina lenda pesa bantu kiese, mambu ya yandi sonikaka yo vandaka ya kieleka.”​—⁠Longi 12:​9, 10.

11. Sambu na nki beto fwete ndima bandongisila ya mayele ya Salomo?

¹¹ Biblia ya Septante ya Kigreki kebalula bangogo yango mutindu yai: “Kima ya kuluta dyaka kele nde, sambu longi vandaka mayele, yandi vandaka kulonga bantu mambu ya mayele, na mpila nde dikutu kuwa mambu ya kitoko ya kele na bingana, longi sosaka ti kikesa yonso na kuzwa bangogo ya kitoko mpi kusonika yo na masonga yonso: bangogo ya kyeleka.” (The Septuagint Bible, ya Charles Thomson kubalulaka) Salomo sosaka mpenza kusimba ntima ya batangi na yandi ti bangogo mosi ya kyese mpi ti masolo ya mfunu yina kesepedisaka. Beto lenda ndima mambu yina yandi sengumunaka ti bandongisila na yandi ya mayele na ntima mosi sambu beto kezaba nde mambu yina yandi tubaka na Masonuku katukaka na mpeve santu.​—⁠2 Timoteo 3:​16, 17.

12. Na bangogo na nge mosi, nki mutindu nge tatendula mambu yina Salomo tubaka mpila bo mesonika yo na Longi 12:​11, 12?

¹² Ata bamashini ya kunyemina mikanda bonso yina beto kesadila ntangu yai kuvandaka ve, na ntangu ya Salomo, mikanda vandaka mingi. Inki mutindu bo vandaka kutadila mikanda yango na ntangu yina? Yandi tubaka nde: “Mambu ya bantu ya mayele kele bonso banti ya nsongi ya ngungudi ke sadilaka na kutambusa mameme na yandi, bingana kele bonso bansonso ya bo me bula mbote; . . . mwana na mono, ke na kima ya nkaka ya nge fweti tala. Kusonika mikanda ke na nsuka ve, kulonguka mingi ta lembisa nge.”​—⁠Longi 12:​11, 12.

13. Inki mutindu bangogo ya bantu yina kele ti mayele ya Nzambi lenda monana bonso banti ya nsongi ya kutambusila mameme, mpi banani kele bonso “bansonso ya bo me bula mbote”?

¹³ Bangogo ya bantu yina kele ti mayele ya Nzambi kevandaka bonso banti ya nsongi ya kutambusila mameme. Inki mutindu? Yo kepusaka batangi to bawi na kuyedisa mayele na bo na nsadisa ya mambu ya mayele yina bo metanga to yina bo mewa. Dyaka, bantu yina kesalaka kisalu ya “kukutika bansa,” (NW) to bingana yina kele mpenza ya mayele mpi ya mefwana, bo kele bonso “bansonso ya bo me bula mbote,” to ya mekota mpenza ngolo. Yo lenda vanda mutindu yina sambu bangogo ya mbote ya bantu ya mutindu yina kemonisaka mayele ya Yehowa, mpi yo lenda sadisa sambu na kupesa ngolo mpi kusadisa batangi to bawi. Kana nge kele kibuti mosi ya ketinaka Nzambi boma, keti nge tasala ve kikesa sambu na kukotisa mayele ya mutindu yai na mabanza ti na ntima ya mwana na nge?​—⁠Kulonga 6:​4-9.

14. (a) Inki mikanda kele mfunu ve na “kulonguka mingi”? (b) Inki mikanda beto fwete tula na kisika ya ntete, mpi sambu na nki?

¹⁴ Kansi, sambu na nki Salomo tubaka mambu yina yandi tubaka sambu na mikanda? Kana beto fwanisa yo ti Ndinga ya Yehowa, mikanda mingi ya mefuluka na inza yai kevandaka kaka ti bangindu ya bantu. Mingi na kati ya bangindu yango kemonisaka mabanza ya Satana Dyabulu. (2 Korinto 4:⁠4) Yo yina, “kulonguka mingi” mambu ya inza ya mutindu yina kepesaka mambu fyoti ya mfunu yina tazinga tii kuna. Na kutuba mbote, mingi na kati ya mambu yina lenda vanda kigonsa ya nene sambu na kimpeve. Mutindu Salomo salaka, bika beto yindulula mambu yina Ndinga ya Nzambi ketuba sambu na luzingu. Yo tapesa kikesa na lukwikilu na beto mpi yo tanata beto penepene ya Yehowa. Kutula dikebi ya kuluta mingi na mikanda yankaka to na banto ya malongi lenda lembisa beto. Mingimingi kana mikanda yango mekatuka na mayele ya inza yina kewakanaka ve ti mayele ya Nzambi, yo kele ya mbi mpi yo lenda fwa lukwikilu yina muntu kele na yo na Nzambi ti na balukanu na yandi. Yo yina, beto vila ve nde mikanda ya kuluta mfumu ya ntangu ya Salomo ti ya ntangu na beto kele yina kemonisaka mayele ya “ngungudi” mosi, Yehowa Nzambi. Yandi mepesaka beto mikanda 66 ya Masonuku ya Santu, ebuna, beto fwete tula dikebi ya mingi kibeni na mikanda yai. Biblia ti mikanda ya mfunu ya “mpika ya kwikama” kesadisaka beto na kubaka “nzayilu ya mbote ya Nzambi.”​—⁠Bingana 2:​1-6, NW.

Kisalu ya beto fwete sala na ntwala ya Nzambi

15. (a) Inki mutindu nge lenda tendula bangogo ya Salomo na yina metala “kisalu yonso ya muntu fwete sala”? (b) Inki kima beto fwete sala kana beto kezola kulungisa kisalu na beto yonso na ntwala ya Nzambi?

¹⁵ Sambu na kutuba na bunkufi mambu yonso ya yandi sosaka, longi Salomo ketuba nde: “Na mambu yai yonso, ke na kima mosi mpamba ya kutuba: Zitisa Nzambi, lemfuka na bansiku na yandi, sambu yai kele [kisalu yonso ya muntu fwete sala, NW]. Konso kima ya beto ke sala, Nzambi ke sambisa beto, ata mambu ya mbote to ya mbi, ata mambu ya beto ke salaka na kinsweki.” (Longi 12:​13, 14) Kana beto kemonisa boma to luzitu ya mingi na Ngangi na beto ya Nene, yo tatanina beto, ye yo tavanda kyese mingi sambu yo tatanina mpi mabuta na beto yonso, na kukonda kulanda luzingu ya mpambampamba yina lenda natila beto mavwanga ti basusi mingi, na beto mosi ti na bantu yina kezolaka beto. Kumonisa boma mingi na Nzambi kele dyambu mosi ya bunkete mpi yo kele mpenza luyantiku ya mayele ti ya nzayilu. (Nkunga 19:9; Bingana 1:⁠7) Kana beto kele ti mayele yina mekatuka na Ndinga ya kupemama ya Nzambi, mpi kana beto kesadila bandongisila yina yo kepesa beto na mambu yonso, beto talungisa ‘kisalu na beto yonso’ na Nzambi. Yo ketendula ve nde beto fwete sala lisiti ya bima ya beto fwete sala. Kansi, beto fwete sosa lutwadisu na Masonuku na ntangu beto kesosa kuyidika mambu ya luzingu mpi mutindu yina, beto tasalaka ntangu yonso mambu mutindu Nzambi kezolaka.

16. Inki Yehowa tasala sambu na yina metala kusambisa?

¹⁶ Beto fwete zaba nde ata kima mosi ve kesalamaka ya Ngangi na beto ya Nene kekondaka kumona. (Bingana 15:⁠3) Yandi ‘tasambisa konso kima ya beto kesala.’ Ee, Muntu ya Kuluta Zulu tasambisa mambu yonso, ata yina kemonanaka ve na meso ya bantu. Kuzaba mambu yai lenda pusa beto na kuzitisa bansiku ya Nzambi. Kansi, kima ya kuluta nene ya fwete pusa beto kele zola na beto na Tata na beto ya kele na zulu, sambu ntumwa Yoane kusonikaka nde: “Kana beto ke zolaka Nzambi, yo ke songa nde beto ke landaka bansiku na yandi. Ebuna bansiku na yandi kele mpasi ve beto na kulanda yo.” (1 Yoane 5:⁠3) Ebuna, sambu Nzambi mepesaka bansiku na yandi sambu yo sadisa beto na kuvanda na luzingu ya nda, ntembe kele ve nde yo mefwana nde beto landa yo, mpi yo kele mpenza mayele nde beto zitisa yo. Yo kele kilo ve ata fyoti sambu na bantu yina kezolaka Ngangi ya Nene. Bo kezolaka kulungisa kisalu na bo yonso na ntwala na yandi.

Lungisa kisalu na nge yonso

17. Inki kima beto tasala kana beto kezola mpenza kulungisa kisalu na beto yonso na ntwala ya Nzambi?

¹⁷ Kana beto kele mayele mpi kana beto kezola mpenza kulungisa kisalu na beto yonso na ntwala ya Nzambi, beto fwete suka ve kaka na kuzitisa bansiku na yandi, kansi beto fwete vanda mpi ti boma ya ngolo ya kupesa yandi mawa. Ya kyeleka, “kana nge zola kuma mayele, tina Mfumu Nzambi boma,” mpi bayina kezitisaka bansiku na yandi kele ti “mayele.” (Nkunga 111:10; Bingana 1:⁠7) Na yo, bika beto sala mambu yina kele mayele mpi kulemfuka na Yehowa na mambu yonso. Yo kele kibeni mfunu na kusala mambu yango ntangu yai, sambu Ntotila Yezu Kristu kele dezia ti beto, mpi kilumbu ya yandi tasambisa bantu bonso Zuzi ya Nzambi meponaka mekuma penepene.​—⁠Matayo 24:3; 25:​31, 32.

18. Inki beto tabaka na nsuka kana beto kelungisa kisalu na beto yonso na ntwala ya Yehowa Nzambi?

¹⁸ Nzambi muntu ketaninaka konso muntu na kati na beto ntangu yai. Keti beto kele na nzala ya mambu ya kimpeve, to beto kepesa nzila na bupusi ya inza nde yo lembisa kinduku na beto ti Nzambi? (1 Korinto 2:​10-16; 1 Yoane 2:​15-17) Beto vanda baleke to bambuta, bika beto sala ngolo sambu na kusepidisa Ngangi na beto ya Nene. Kana beto kelemfukila Yehowa mpi kana beto kezitisa bansiku na yandi, beto talosa mambu ya mpambampamba ya inza yai ya ntama ya ke na kuluta. Ebuna, beto tavanda ti kivuvu ya luzingu ya kukonda nsuka na inza ya mpa yina Nzambi mesilaka. (2 Piere 3:13) Yo kele bivuvu ya nene mpenza sambu na bantu yina kelungisa kisalu na bo yonso na ntwala ya Nzambi!

Inki mvutu nge tapesa?

◻ Sambu na nki nge lenda tuba nde mambu yonso ve kele mpamba?

◻ Sambu na nki leke yina kele Mukristu fwete kudipesa na ntima ya mvimba na kisalu na yandi ya santu?

◻ Yo tavanda mbote ve na “kulonguka mingi” mikanda ya nki mutindu?

◻ “Kisalu yonso ya muntu” kele nki?

[Bangiufula ya disolo ya kulonguka]

 [Kifwanisu ya kele na lutiti 16]

Mambu yonso ve kele mpamba sambu na bayina kesadilaka Yehowa

 [Kifwanisu ya kele na lutiti 18]

Ndinga ya Nzambi kepesaka kikesa mpi mambote kuluta mikanda mingi ya inza