Bantu Yina Kenwanisaka Nzambi Tanunga Ve!

“Bo ta nwanisa nge kansi bo ta kuka ve kubedisa nge.”​—YEREMIA 1:19.

1. Inki kisalu Yeremia kubakaka, mpi yandi landaka kusala kisalu na yandi ntangu ikwa?

 YEHOWA pesaka Yeremia kisalu ya kuvanda profete sambu na bantu yonso na ntangu yandi vandaka dyaka mwana. (Yeremia 1:5) Dyambu yai kusalamaka na ntangu ya luyalu ya Ntotila ya mbote ya Yuda, Yoziasi. Yeremia landaka kusala kisalu ya kiprofete na ntangu yina ya mbi na ntwala nde Babilone kubotula Yeruzalemi tii na ntwala nde bo nata bantu ya Nzambi na kimpika.​—Yeremia 1:1-3.

2. Inki mutindu Yehowa pesaka Yeremia kikesa, mpi kunwanisa profete yina vandaka kutendula nki?

² Bansangu ya kusambisa yina Yeremia zolaka kuzabisa na bantu, zolaka kubenda kimbeni. Yo yina, Nzambi kupesaka yandi kikesa sambu yandi landa kisalu na yandi. (Yeremia 1:8-10) Mu mbandu, bangogo yai pesaka kikesa na mabanza ya profete: “Bo ta nwanisa nge kansi bo ta kuka ve kubedisa nge, sambu mono muntu ta vandaka na nge na kusadisa nge. Mono Mfumu Nzambi muntu me tuba.” (Yeremia 1:19) Kunwanisa Yeremia zolaka kutendula kunwanisa Nzambi. Bubu yai, Yehowa kele ti kibuka ya bansadi na yandi yina kele bonso baprofete yina kesala bonso Yeremia vandaka kusala. Bonso Yeremia, bo kelongaka na kikesa yonso ndinga ya baprofete ya Nzambi. Ebuna, nsangu ya bo kelongaka kekumina bantu ti makanda yonso sambu na mambote to sambu na mambi, yonso ketadila kaka mutindu bo kendima to kebuya nsangu yango. Mutindu yo vandaka na ntangu ya Yeremia, kele ti bantu yankaka ya kenwanisaka Nzambi na mpila bo kemengaka bansadi na yandi ti kisalu ya yandi mepesaka bo.

 Bo kenwanisa bansadi ya Yehowa

3. Sambu na nki bo kenwanisaka bansadi ya Yehowa?

³ Bo kenwanisaka bantu ya Yehowa banda na luyantiku ya mvu-nkama ya 20. Na bansi mingi, babakala ya ntima ya mbi mesosaka na kusukisa, disongidila kufwa kibeni, kisalu ya kusamuna nsangu ya mbote ya Kimfumu ya Nzambi. Muntu kepusaka bo kele Mbeni na beto ya ntete, Dyabulu, yina “ke kwendaka kuzieta bonso ntambu yina ke dila; yina ke sosa muntu ya kudia.” (1 Piere 5:8) Na nima ya “ntangu ya makanda” yina kukumaka na nsuka na yo na mvu 1914, Nzambi tulaka Mwana na yandi Ntotila ya mpa na ntoto, mpi yandi zabisaka yandi nde: “Yala bambeni na nge.” (Luka 21:24, NW; Nkunga 110:2) Kristu kusadilaka kiyeka na yandi sambu na kukula Satana na zulu mpi yandi losaka yandi penepene na ntoto. Mutindu yandi mezaba nde ntangu na yandi mebikala dyaka mingi ve, Dyabulu kesonga makasi na yandi na Bakristu ya kupakulama ti na bampangi na bo. (Kusonga 12:9, 17) Inki kima kimbeni yai ya bantu ya kenwanisaka Nzambi mbala na mbala mebutaka?

4. Inki bampasi bantu ya Yehowa kumonaka na ntangu Mvita ya Ntete ya Inza vandaka kusalama, kansi nki mambu kusalamaka na mvu 1919 ti na mvu 1922?

⁴ Lukwikilu ya bansadi ya Yehowa ya kupakulama kumekamaka mingi na Mvita ya Ntete ya Inza. Bo vandaka kuseka ti kufinga bo, bibuka ya bantu vandaka kulanda bo, mpi kubula bo. Kaka mutindu Yezu kutubaka dezia, bo ‘mengaka bo na bantu ya bansi yonso.’ (Matayo 24:9) Na ntangu mvita yango kukumaka ngolo, bambeni ya Kimfumu ya Nzambi kusadilaka mayele ya mbi mutindu bo sadilaka yo sambu na kufwa Yezu Kristu. Bo vandaka kumonisa nde bantu ya Yehowa kele bantu ya luvunu, mpi bo simbaka nkutu nto ya organizasio ya Nzambi ya kemonana. Na Mayi ya mvu 1918, bo pesaka nswa na kukanga prezida ya la Société Watch Tower, Mpangi Rutherford, ti banduku na yandi ya kisalu nsambwadi. Bo zengilaka bantu yai nana boloko sambu na bilumbu mingi mpi bo tindaka bo na boloko na Atlanta, na Géorgie, na États-Unis. Na nima ya bangonda uvwa, bo bikaka bo. Na Mayi ya mvu 1919, cour d’appel ya nzyunga yina tubaka nde bo sambisaka mbote ve bantu yina ya boloko, ebuna desizio yina bo zengilaka bo ntete kuvandaka dyaka na ngolo ve. Yo lombaka nde bo sambisa dyaka dikambu yango, kansi luyalu kubuyaka nde bo sambisa yo dyaka ve, yo yina bo yambulaka Mpangi Rutherford ti banduku na yandi kimakulu. Bo vutukilaka kisalu na bo, ebuna balukutakanu ya nene yina bo salaka na Cedar Point, na Ohio, na mvu 1919 ti na mvu 1922, kupesaka ngolo ya mpa na kisalu ya kusamuna Kimfumu.

5. Inki mambu Bambangi ya Yehowa kumonaka na insi ya Allemagne yina vandaka na nsi ya luyalu ya Nazi?

⁵ Na mvu 1930, Kidiktatire kukumaka ngolo, ebuna Allemagne, Italie, ti Japon kuvukanaka sambu na kusala kimvuka mosi ya ngolo ya bo vandaka kubinga Les puissances de l’Axe. Na luyantiku ya mvu-kumi yina, kimbeni mosi ya ngolo kubwilaka bantu ya Nzambi, mingimingi na Allemagne na ntangu ya luyalu ya Nazi. Bo kangisaka kisalu na beto. Bo kumaka kusosa banzo ya bampangi na beto, mpi bo kangaka bantu yonso yina vandaka muna. Bamingi bo nataka bo na bakan ya konsatrasio sambu bo buyaka kuvweza lukwikilu na bo. Bitumba yina ya kunwanisa Nzambi ti bantu na yandi vandaka ti lukanu ya kumanisa Bambangi ya Yehowa na insi yina yonso. Ntangu Bambangi vandaka kukwenda na batribinale sambu na kunwanina banswa na bo, Ministère ya Justice ya Reich (Allemagne) kusonikaka mukanda mosi ya nda sambu na kumonisa nde Bambangi lenda nunga ve na kubaka kimpwanza. Mukanda yango tubaka nde: “Batribinale fwete bela ve to kuvidisa banswa na bo sambu na kulanda mambu yina nsiku ketuba ya kemonika kaka na meso nde yo kele ya mbote; kansi ata yo kele mpasi, batribinale fwete sosa mpi kuzwa bamwaye ya kulungisa mikumba na bo ya nene.” Na bunkufi, yo zolaka kutuba nde lunungu fwete vanda ve. Luyalu ya Nazi kangamaka kaka na kutuba nde bisalu ya Bambangi ya Yehowa kele ya kupusa bantu na kukonda kulemfuka, to ya ntu ngolo, mpi nde bo ‘vandaka kutula mavwanga na pula ya kutunga insi na bo.’

6. Inki bikesa bantu kusalaka sambu na kukangisa kisalu na beto ntangu Mvita ya Zole ya Inza kukumaka ngolo mpi na nima na yo?

⁶ Na ntangu Mvita ya Zole ya Inza kukumaka ngolo, bo kangisaka mpi bo buyisaka kisalu ya bansadi ya Nzambi na Australie, na Canada, ti na bansi yankaka yina vandaka na kiyeka ya Grande-Brétagne: yo vanda na Afrika, na Azia, ti na bisanga ya Antilles ti ya Pacifique. Na États-Unis, bambeni yina vandaka na kiyeka ya nene ti bantu yina vandaka kuzaba beto mbote ve kumaka kukusila Bambangi makambu na zina ya ‘nsiku.’ (Nkunga 94:20, NW) Kansi, bampangi kwendaka kunwanina  mambu ya metala kupesa lusaku na drapo ti bansiku yina vandaka kubuyisa kisalu ya nzo na nzo na tribinale, ebuna tribinale kubakaka badesizio ya mbote. Na États-Unis bo ndimaka nsiku yina ketuba nde muntu na muntu kele na kimpwanza ya kusambila Nzambi yina yandi mezola. Na nsadisa ya Yehowa, bikesa ya bambeni kunungaka ve. Ntangu mvita kumanaka na Eropa, bo katulaka nsiku yina vandaka kukangisa kisalu na beto. Bo basisaka Bambangi mingi ya vandaka na bakan ya konsatrasio, kansi bitumba kumanaka ve. Kaka na nima ya Mvita ya Zole ya Inza, guerre froide kuyantikaka. Bansi ya Eropa ya Esti kumonisaka dyaka bantu ya Yehowa mpasi. Baluyalu mingi kusalaka ngolo sambu na kuyangisa mpi kukangisa bisalu ya Bambangi ti kubasika ya mikanda yina ketendulaka Biblia, kubuyisa nde balukutakanu na beto ya nene kusalama ve. Bo kangaka Bambangi mingi na boloko to bo tindaka bo na bakan ya bo vandaka kusadisa bantu bisalu ya ngolo.

Kisalu ya kusamuna kelanda na kusalama!

7. Inki Bambangi ya Yehowa kumonaka na Pologne, na Russie, ti na bansi yankaka na bamvula yai meluta?

⁷ Na nima ya bamvula mingi, kisalu ya kusamuna Kimfumu yantikaka dyaka kusalama. Ata insi ya Pologne vandaka kaka na nsi ya luyalu ya Kominizme, bo pesaka Bambangi nswa na kusala balukutakanu ya kilumbu mosi na mvu 1982. Na mvu 1985, balukutakanu ya bansi mingi kusalamaka na insi yina. Balukutakanu ya kuluta nene ya bansi mingi kusalamaka na mvu 1989, ebuna bantu mingi yina kuvandaka na lukutakanu yina katukaka na Russie ti na Ukraine. Na mvula  yango yina, insi ya Hongrie ti Pologne ndimaka nde Bambangi ya Yehowa kuyantika kusala kisalu na bo. Na Automne ya mvu 1989, bo bwisaka Kibaka ya Berlin. Na nima ya mwa bangonda, Leta ndimaka kisalu na beto na Allemagne ya Esti, mpi ntangu fyoti na nima, Bambangi salaka lukutakanu ya bansi mingi na Berlin. Mpi na luyantiku ya bamvula kumi ya nsuka ya mvu-nkama ya 20, Bambangi salaka kikesa mingi sambu na kukutana ti bampangi ya Russie. Bo kwendaka kumona bamfumu yankaka ya luyalu ya Moscou, mpi nsukansuka na mvu 1991, Leta kundimaka Bambangi ya Yehowa. Banda na ntangu yina tii bubu yai, kisalu kekwenda na ntwala na mutindu mosi ya kuyitukisa kibeni na insi ya Russie ti na bansi yina vandaka na kimvuka ya Union soviétique ya ntama.

8. Inki kubwilaka Bambangi ya Yehowa na nsungi ya bamvula 45 yina lutaka na nima ya Mvita ya Zole ya Inza?

⁸ Ntangu mbangika yantikaka kumana na bisika mingi, yo kumaka ngolo na bisika yankaka. Na nsungi ya bamvula 45 yina meluta na nima ya mvita ya zole ya inza, leta ya bansi mingi buyaka na kundima kisalu ya Bambangi ya Yehowa. Dyaka, bansi 23 ya Afrika, 9 ya Azia, 8 ya Eropa, 3 ya Amérique latine, ti 4 na bisanga yankaka tulaka nsiku nde kisalu na beto kusalama ve na bisika yina yonso.

9. Inki bansadi ya Yehowa kumonaka na Malawi?

⁹ Banda na mvu 1967, Bambangi ya Yehowa kunyokwamaka ngolo kibeni na Malawi. Sambu bo kele Bakristu ya kyeleka mpi bo kekotaka ve na politiki, bampangi na beto ya insi yai buyaka na kusumba bakarti ya parti politiki. (Yoane 17:16) Na nima ya mitingi mosi ya Parti ya Congrès ya Malawi na mvu 1972, bo kumaka kunyokula dyaka ngolo bampangi na beto. Bo kumaka kukula bampangi na banzo na bo mpi kukatula bo na kisalu. Bamingi tinaka insi yango kana ve bo zolaka kufwa bo. Keti bantu yai ya vandaka kunwanisa Nzambi ti bampangi na beto kunungaka? Ata fyoti ve. Na nima mambu kubalukaka kibeni na mpila nde na mvu 1999, insi ya Malawi pesaka lapolo nde bansamuni ya Kimfumu kukumaka 43 767, mpi nde bantu kuluta 120 000 kuvandaka na balukutakanu ya distrike yina kusalamaka kuna. Bo mekatuka kutunga biro ya mpa ya filiale na ntu-mbanza ya insi yango.

Bo kesosa kikuma ya luvunu

10. Mutindu bo salaka Daniele, nki kima bantu yina kenwanisaka bantu ya Nzambi na ntangu yai mesalaka?

¹⁰ Ba aposta, bamfumu ya mabundu, ti bantu yankaka kezolaka ve kuwa nsangu na beto yina kekatukaka na Ndinga ya Nzambi. Bantu yina mabundu ya Kikristu kepusaka na kunwanisa beto, kebasikilaka na zina ya nsiku ya Leta sambu na kutendula kikuma ya bo kenwanisilaka beto. Inki mutindu bo kesalaka yo bantangu yankaka? Inki kima bantu ya ntima ya mbi salaka sambu na kunwanisa Daniele? Na Daniele 6:5, 6, beto ketanga nde: “Ntangu yai bantu yina ya nkaka zole ti baguvernere sosaka mpila ya kukanga Daniele na mambu ya mbi na kisalu na yandi, kansi bo kukaka ve sambu Daniele vandaka muntu ya mbote mpenza, yandi vandaka kusala ata mambu mosi ya mbi ve na kisalu na yandi. Bo tubanaka bo na bo nde: ‘Kana beto kanga yandi ve na mambu yina me tadila Nzambi na yandi, beto ta mona ve ata kima mosi ya mbi ya kufundila yandi.’” Yo kele kiteso mosi mpi bubu yai, bambeni kesosaka kikuma ya luvunu ya kufundila beto. Bo ketulaka makelele nde Bambangi ya Yehowa kele na kati ya “mabundu ya kigonsa.” Bo kesadilaka luvunu sambu na kunwanisa lusambu na beto mpi sambu beto kezitisaka minsiku ya Nzambi.

11. Inki mambu ya luvunu bambeni ya Bambangi ya Yehowa vandaka kutuba?

¹¹ Na bansi yankaka, bamfumu ya mabundu ti ya politiki kezolaka ve kundima nde beto kele na “lusambu ya bunkete mpi ya kukonda mvindu na meso ya Nzambi.” (Yakobo 1:27, NW) Ata kisalu na beto ya Bukristu kesalamaka na bansi 234, bambeni na beto ketubaka nde beto kele “dibundu ya mezabanaka ve.” Ntangu fyoti na ntwala lukutakanu mosi ya bansi mingi kusalama na mvu 1998, zulunalu mosi ya Athène kusonikaka mambu yina mfumu ya dibundu ya Orthodoxe Grecque tubaka nde “[Bambangi ya Yehowa] kele ‘dibundu mosi ya mezabanaka ve,’” ata nsiku ya Cour européenne des droits de l’homme kendimaka ve mambu yina. Bilumbu fyoti na nima, zulunalu yankaka ya mbanza yina kuvutukilaka mambu yina kinati-ndinga ya dibundu mosi tubaka: “Dibundu ya [Bambangi ya Yehowa] lenda vanda ve ‘dibundu ya Bukristu,’ sambu bo kekwikilaka ve na Yezu Kristu.” Yai kele dyambu ya kuyituka, sambu katula Bambangi ya Yehowa, kele ve ti dibundu yankaka ya ketubilaka mingi mfunu ya kulanda mbandu ya Yezu!

12. Na ntangu beto kenwana bitumba ya kimpeve, nki beto fwete sala?

 ¹² Beto kesosaka kunwanina mpi kukotisa nsangu ya mbote na kusadilaka mambu yina nsiku ya Leta ketubaka. (Filipi 1:7) Kansi, beto lenda buya kyeleka ve to kulemba nitu sambu na yina metala kuzitisa bansiku ya lunungu ya Nzambi. (Tito 2:10, 12, NW) Mutindu Yeremia salaka, beto ‘kele na kikesa ya kukwenda kusonga bantu mambu yonso ya Nzambi ke songa beto.’ Beto fwete pesa ve bantu yina kenwanisa Nzambi nzila na kupesa beto boma. (Yeremia 1:17, 18) Ndinga ya Santu ya Yehowa memonisaka pwelele nzila ya mbote ya beto fwete landa. Beto kezola ve ata fyoti nde “basoda ya bantu” ya kukonda ngolo kunwanina beto to beto kwenda “na Ezipte nde bo sadisa beto,” disongidila, beto tameka ve kusosa lusadisu ya inza yai. (2 Bansangu 32:8; Yezaya 30:3; 31:1-3) Na ntangu beto kenwana mvita ya kimpeve, beto fwete landa na kutula ntima na beto yonso na Yehowa, beto fwete bika yandi kutwadisa beto, mpi beto fwete tula ve ntima na mayele na beto mosi. (Bingana 3:5-7) Kana Yehowa mesadisa beto ve, mpi kana yandi mosi metanina beto ve, mambu yonso ya beto kesala tavanda “ya mpamba.”​—Nkunga 127:1.

Ata bo kepesa bo mpasi, bo kebikala kaka ngolo

13. Sambu na nki beto lenda tuba nde mvita yina Satana kunwanisaka Yezu kunungaka ve?

¹³ Mbandu ya kuluta nene ya kubikala ya kukangama ngolo na Yehowa kele Yezu. Bo kusilaka yandi makambu nde yandi vandaka kubenda bantu na kukolama na luyalu mpi na kukonda kulemfuka na bamfumu. Ntangu Pilate sambisaka Yezu imene, yandi zolaka kuyambula yandi. Kansi, kibuka ya bantu yina vandaka pana, yina bamfumu ya mabundu vandaka kupusa, vandaka kutuba na ndinga ya ngolo nde bo fwa Yezu na zulu ya nti, ata yandi salaka ve kima mosi ya mbi. Na kifulu ya kusosa nde bo yambula yandi, bo lombaka nde bo yambula Barabasi, muntu mosi ya bo kangaka sambu yandi vandaka kubendumuna bantu mpi kufwa bantu! Pilate mekaka dyaka na kulongisila bambeni yina ya kuzolaka ve kuwa yandi ata fyoti na kubalula mabanza, kansi nsukansuka yandi wilaka bantu yina vandaka kutula makelele mingi. (Luka 23:2, 5, 14, 18-25) Ata Yezu kufwaka na zulu ya nti, mvita yai ya nku ya Satana yina bo nwanisaka Mwana ya Nzambi, ya kusalaka ve ata kima mosi ya mbi, kunungaka ve, sambu Yehowa kufutumunaka Yezu mpi Yandi tombulaka yandi na kisika ya nkembo, na diboko na Yandi ya kibakala. Ebuna, na kilumbu ya Pantekoti ya mvu 33 ya T.B., na nsadisa ya Yezu ya mebakaka lukumu mingi, Nzambi tyamunaka mpeve santu na yandi. Mpidina, yandi tulaka fondasio ya dibundu ya Bukristu, yina kele ‘kigangwa ya mpa.’​—2 Korinto 5:17; Bisalu 2:1-4.

14. Inki mambu kusalamaka ntangu bantu ya dibundu ya Bayuda kumonisaka balongoki ya Yezu mpasi?

¹⁴ Ntangu fyoti na nima, bamfumu ya mabundu yantikaka kumonisa bantumwa mpasi. Kansi, balongoki ya Kristu kuyambulaka ve na kutuba mambu yina ya bo monaka mpi ya bo waka. Balongoki ya Yezu sambaka nde: “Ebuna ntangu yai, Mfumu, tala mutindu bo ke bangika beto, ebuna pesa beto bantu yina ke sadilaka nge kikesa yonso ya kuzabisa bantu nsangu na nge.” (Bisalu 4:29) Yehowa ndimaka bisambu na bo na mpila yandi pesaka bo mpeve santu ti ngolo ya kulanda kulonga kukonda boma. Ntangu fyoti na nima, bo lombaka dyaka bantumwa nde bo longa dyaka ve, kansi Piere ti bantumwa yankaka vutulaka nde: “Beto fweti lemfuka ntete na Nzambi, kansi na bantu ve.” (Bisalu 5:29) Kunwanisa, kukanga, ti kubula lendaka ve kukanga bo nzila ya kusala kisalu na bo ya kusamuna Kimfumu.

15. Gamaliele vandaka nani, mpi nki ndongisila yandi pesaka na bambeni yina vandaka kunwanisa balongoki ya Yezu?

¹⁵ Inki bamfumu ya mabundu salaka ntangu bo monaka mpidina? “Bo waka makasi mingi. Bo zengaka nde bantumwa fweti fwa.” Kansi, longi mosi ya Nsiku ya Mufarize vandaka pana, zina na yandi Gamaliele. Bantu yonso vandaka kuzitisa yandi. Yandi basisaka fyoti bantumwa yonso na nzo ya kinzonzi ya Bayuda (Sanedreni), ebuna, yandi pesaka bambeni yina ndongisila yai: “Beno bantu ya Izraele,  beno keba mbote sambu na mambu ya beno ke zola kusala bantu yai. Ntangu yai mono ke tubila beno nde beno landa bantu yina ve. Beno bikisa bo bo kwenda. Sambu kana mambu ya bo ke kana to ya bo ke sala me katuka na bantu, yo ta mana. Kansi kana ya kieleka mambu yina me katuka na Nzambi, beno lenda fwa yo ve. Beno keba, kana ve mpidina ta monika nde beno ke zola kunwanisa Nzambi.”​—Bisalu 5:33-39.

Batolotolo ya bo tasala na kufwa beto tasala kima ve

16. Na bangogo na nge mosi, nki mutindu nge tatendula mambu yina Yehowa ketuba sambu na kundimisa bantu na yandi?

¹⁶ Ndongisila ya Gamaliele vandaka ya kyeleka, mpi beto kemonaka yo ntangu bantu yankaka kekotilaka beto. Beto kele mpi na kyese sambu kimpwanza ya kupona muntu na muntu dibundu yina yandi mezola kukatukaka na badesizio yina bo bakaka na tribinale na bazuzi yina vandaka kuzenga makambu na nzila ya mbote. Mutindu beto kezitisaka Ndinga ya Nzambi, yo kepesaka kyese ve na bamfumu ya Kikristu ti na bantwadisi yankaka ya Babilone ya Nene, kimvuka ya mabundu ya luvunu ya inza. (Kusonga 18:1-3) Ata bo ti bantu yina bo kepusaka kenwanisa beto, beto kele na bangogo yai ya kendimisa beto nde: “Batolotolo ya bo ta sala sambu na kufwa nge, yo ta sala nge kima ve; kiteso mosi, konso muntu yina ta zola kufunda nge, nge ta bedisa yandi. ‘Mutindu yo yai mono Mfumu Nzambi ke talaka bantu na mono, mutindu yo yai mpi mono ke nungisaka bo.’ Mfumu Nzambi muntu me tuba.”​—Yezaya 54:17.

17. Ata bambeni kenwanisa beto, sambu na nki beto kele na kikesa?

¹⁷ Bambeni na beto kenwanisaka beto kukonda kikuma, kansi beto kelemba nitu ve. (Nkunga 109:1-3) Ata nki mutindu, beto tapesa ve nzila nde bantu yina kemengaka kyeleka ti nsangu na beto ya kekatuka na Biblia, kupesa beto boma sambu beto vidisa lukwikilu na beto. Ata beto kezaba nde mvita na beto ya kimpeve takuma dyaka ngolo, beto kezaba mpila yo tasuka. Bonso Yeremia, beto tamona mutindu bangogo ya mbikudulu talungana: “Bo tanwanisa nge kansi bo ta kuka ve kubedisa nge, sambu mono muntu ta vandaka na nge na kusadisa nge. Mono Mfumu Nzambi muntu me tuba.” (Yeremia 1:19) Ee, beto kezaba nde bantu yina kenwanisaka Nzambi tanunga ve!

Inki Mutindu Nge Tapesa Mvutu?

• Sambu na nki bo kenwanisaka bansadi ya Yehowa?

• Inki mitindu bambeni kesadilaka sambu na kunwanisa bantu ya Yehowa?

• Sambu na nki beto lenda ndima nde bantu yina kenwanisaka Nzambi tanunga ve?

[Bangiufula ya disolo ya kulonguka]

[Kifwanisu ya kele na lutiti 24]

Yehowa kundimisaka Yeremia nde yandi tavanda ti yandi

[Kifwanisu ya kele na lutiti 26]

Bantu yina kugulukaka na kan ya konsatrasio

[Kifwanisu ya kele na lutiti 26]

Kibuka ya bantu kenwanisa Bambangi ya Yehowa

[Kifwanisu ya kele na lutiti 26]

J. F. Rutherford ti banduku na yandi ya kisalu

[Kifwanisu ya kele na lutiti 29]

Ata bo monisaka Yezu mpasi, bantu yina vandaka kunwanisa Nzambi kunungaka ve