Beto Kele na Mfunu ya Organizasio ya Yehowa

KETI nge mewaka ntete muntu ketuba nde, “Mono kekwikilaka na Nzambi kansi mono kekwikilaka ve na dibundu yina kele ti organizasio”? Bantu ya kelutaka kutuba mambu ya mutindu yai kele bayina vandaka ntete ti kikesa ya kukwenda na banzo-nzambi kansi bo melembaka nitu sambu dibundu na bo melungisaka ve bampusa na bo ya kimpeve. Ata mabundu yonso na kimvuka melungisaka ve bampusa na bo, bantu mingi kekangamaka kaka nde bo kezola kusambila Nzambi. Kansi, bo kemonaka nde yo meluta mbote bo sambila yandi na mutindu na bo mosi olie ya kukwendaka kuvukana ti bantu ya nzo-nzambi mosi to ya organizasio yankaka.

Inki Biblia ketuba? Keti Nzambi kezolaka nde Bakristu kuvukana na organizasio mosi?

Bakristu ya ntete kubakaka mambote ya kuvanda ti Organizasio

Na Pantekoti ya mvu 33 ya N.T.B., Yehowa kutyamunaka ve mpeve santu na yandi na zulu ya bankwikidi ya kuvandaka konso muntu na kisika na yandi mosi na kingenga, kansi na zulu ya kibuka mosi ya babakala ti bankento yina kuvukanaka “kisika mosi,” disongidila, na suku mosi ya nzo ya etaze na Yeruzalemi. (Bisalu 2:1) Na ntangu yina, dibundu ya Bukristu, yina kukumaka organizasio ya ntoto ya mvimba, kusalamaka. Dyambu yai kumonisaka kibeni nde Yehowa kusambulaka balongoki na yandi ya ntete. Sambu na nki? Kima ya ntete kele nde, bo pesaka bo kisalu mosi ya mfunu, ya kusamuna nsangu ya mbote ya Kimfumu ya Nzambi tii yo panzana na “nsi-ntoto ya mvimba.” (Matayo 24:14) Yo lombaka nde bankwikidi yina vandaka kuzaba dezia mambu mingi kulonga bantu ya mpa yina vandaka kubalula ntima na mpila nde bo mpi kuzaba mutindu ya kusala kisalu ya kusamuna sambu yo kwenda na ntwala.

Ntama mingi ve, nsangu ya Kimfumu kukumaka na babwala yina vandaka ntama ti Yeruzalemi. Banda na mvu 62 tii na mvu 64 ya T.B., ntumwa Piere kusonikaka mukanda na yandi ya ntete na Bakristu yina vandaka ‘me bikisaka babwala na bo, me kwendaka kuzinga na baprovense ya Ponti, ya Galatia, ya Kapadosia, ya Azia ti ya Bitinia.’ Babwala yai yonso vandaka kisika yina insi ya Turquie kele bubu yai. (1 Piere 1:1) Bankwikidi yankaka kuvandaka na Palestine, na Liban, na Siria, Shipre, na Grese, na Kreta, ti na Italia. Mutindu Polo kusonikilaka bantu ya Kolosai na mvu 60 ti 61 ya T.B., bo longaka nsangu ya mbote na “lugangu yonso yina kele na nsi ya zulu.”​—Kolosai 1:23, NW.

Mambote ya zole ya Bakristu kuvandaka na yo na kuvanda na kati ya organizasio mosi vandaka kikesa yina bo vandaka kupesana. Na kuvukanaka dibundu ya mvimba, Bakristu lendaka kulanda badiskure yina bo vandaka kupesa na nsadisa ya mpeve santu, kulonguka Masonuku ya Santu kumosi, kuta baeksperiansi ya kepesa kikesa na lukwikilu yina bo mekutanaka na yo, mpi kusamba kisika mosi ti bampangi bankwikidi yankaka. (1 Korinto, kapu 14) Dyaka, babakala ya kuyela na kimpeve vandaka na dibaku ya “kugungula mameme ya Nzambi.”​—1 Piere 5:2, NW.

Bantu ya mesala dibundu, disongidila Bakristu, fwete zabana bo na bo mpi kuzolana bo na bo. Bakristu ya ntete vandaka kumona ve nde kuvukana ti dibundu kele ndola, kansi bo vandaka kumona yo nde yo vandaka kutunga bo mpi kupesa bo kikesa.​—Bisalu 2:42; 14:27; 1 Korinto 14:26; Kolosai 4:15, 16.

Kikuma yankaka ya vandaka kumonisa mfunu ya dibundu to organizasio mosi ya kele na bumosi ya inza ya mvimba, vandaka sambu na kukumisa bumosi ngolo. Bakristu longukaka na ‘kuwakana  na mambu yina ya bo ke tubaka.’ (1 Korinto 1:10) Dyambu yai kuvandaka mfunu mingi. Bantu yina kuvandaka na dibundu kukotaka banzo-nkanda ya mitindu mingi mpi bo katukaka na babwala mingi. Bo vandaka kutuba bandinga ya kuswaswana, yo kele mpi pwelele nde bo vandaka ti kimuntu ya kuswaswana. (Bisalu 2:1-11) Bantangu yankaka, yo vandaka kumonana pwelele nde bo vandaka kuwakana ve na mambu mingi. Ata mpidina, Bakristu vandaka kubaka lusadisu sambu na kuyidika mavanga ya mutindu yina na kati ya dibundu.​—Bisalu 15:1, 2; Filipi 4:2, 3.

Mambu ya nene yina bankuluntu ya mabundu vandaka kukuka ve na kuyidika, bo vandaka kupesa yo na maboko ya bankengi-ntambudi, bonso Polo. Mambu ya nene yina vandaka kutadila malongi ya mfunu bo vandaka kupesa yo na nto-kimvuka yina vandaka na Yeruzalemi. Na luyantiku, bantu yina vandaka na nto-kimvuka kuvandaka bantumwa ya Yezu Kristu mpamba, kansi na nima bo pesaka mpi mikumba na bantu yankaka, yo yina bo kotisaka bambuta-bantu yina vandaka na dibundu ya Yeruzalemi. Konso dibundu vandaka kundima kiyeka yina Nzambi pesaka na nto-kimvuka ti bantu yina bo ponaka sambu na kuvanda na kibuka yango sambu na kutambusa kisalu mbote, na kupona babakala yina bo fwete pesa kiyeka ya kisalu, ti ya kubaka badesizio yina vandaka kutadila malongi ya mfunu. Kana nto-kimvuka yonso meyidika dikambu ebuna bo mebaka desizio, mabundu vandaka kundima desizio yina mpi bo vandaka ‘kumona kiese mingi sambu na kikesa’ yina bo vandaka kubaka.​—Bisalu 15:1, 2, 28, 30, 31.

Ya kyeleka, Yehowa kusadilaka organizasio na mvu-nkama ya ntete. Kansi, nki beto tatuba sambu na bubu yai?

Beto kele na mfunu ya Organizasio bubu yai

Bonso bampangi na bo ya mvu-nkama ya ntete, Bambangi ya Yehowa bubu yai kelungisaka na ntima mosi ntuma ya kusamuna nsangu ya mbote ya Kimfumu. Mosi na kati ya mitindu ya bo kesadilaka sambu na kulungisa kisalu yai kele kukabula ba Biblia ti mikanda yina ketendulaka Biblia. Sambu na kusala kisalu ya mutindu yai, yo kelombaka nde organizasio kuvanda.

Yo kelombaka kusonika mikanda mbotembote, kutangulula yo sambu na kukatula bifu, kunyema yo, na nima kutinda yo na mabundu. Ebuna, konso Mukristu fwete ndima na kumonisa luzolo ya mbote ya kukwenda kupesa mikanda yango na bantu yina kezolaka kutanga yo. Nsangu ya Kimfumu mekuminaka bantu mingi kibeni na mutindu yai. Bansamuni ya nsangu ya mbote kesalaka ngolo na kulanda kulungisa kisalu na bo ya kusamuna na ndonga. Bo kesalaka yonso na kukonda kutula dikebi yonso kaka na teritware mosi ebuna bo yambula bitini yankaka ya teritware. Mambu yai yonso kelombaka organizasio.

Sambu “Nzambi ke zolaka bantu yonso,” yo kelombaka kubalula ba Biblia ti mikanda yina ketendulaka Biblia. (Bisalu 10:34) Bubu yai ya beto ketuba, zulunalu yai kebasika na bandinga 132, ebuna mpangi na yo Réveillez-vous! kebasika na bandinga 83. Bisalu yai yonso kelombaka kuvanda ti ba ekipi ya babaludi yina kele ti organizasio mosi ya mbote sambu na kulungisa kisalu yai na ntoto ya mvimba.

Bantu ya kele na kati ya dibundu kebakaka kikesa na ntangu bo kekwendaka na balukutakanu ya Bukristu ya fyoti ti ya nene. Na dibundu, bo kewaka badiskure ya ketubilaka mambu ya Biblia yina kepesaka bo kikesa, bo kelongukaka Masonuku kumosi, bo ketelaka bankaka baeksperiansi yina ketungaka, bo kesambaka mpi kumosi ti bampangi na bo bankwikidi. Mutindu bampangi na bo ya mvu-nkama ya ntete vandaka kusala, bo mpi kevandaka na kyese na kuyamba bankengi-ntambudi ya zola yina kekwisaka kupesa kikesa na lukwikilu na bo. Yo yina, bubu yai Bakristu kele “kisika mosi kaka,” bo kele mpi na “ngungudi mosi kaka.”​—Yoane 10:16.

Ntembe kele ve nde, Bambangi ya Yehowa kele bantu ya kukonda kukuka bonso bampangi na bo yina kuzingaka na mvu-nkama ya ntete. Kansi, bo kesalaka na bumosi. Yo yina, bo kelungisa kisalu ya kusamuna Kimfumu na ntoto ya mvimba.​—Bisalu 15:36-40; Efezo 4:13.

[Kifwanisu ya kele na lutiti 31]

Bubu yai Bakristu kele “kisika mosi kaka,” bo kele mpi na “ngungudi mosi kaka.”