Dyambu Mosi ya Sipesiali, Keti Nge mpi Tavanda Pana?

BAMVULA 3 500 meluta dezia, na kilumbu mosi ya bo vandaka kuvila ve, Yehowa Nzambi kulombaka konso nzo ya bantu ya Izraele yina vandaka na kimpika na Ezipte na kufwa mwana-dimeme mosi to nkombo ebuna bo pakula menga na yo na bakadrema ya bakyelo ya banzo na bo. Na mpimpa ya kilumbu yina, wanzio ya Nzambi lutaka na zulu ya banzo yina vandaka ti kidimbu yai, kansi yandi fwaka bana ya ntete na banzo yonso ya bantu ya Ezipte. Na nima bana ya Izraele kubasikaka na kimpika. Na dati ya mambu yai kusalamaka, Bayuda kumaka kusala nkinsi ya Paki.

Ntangu Yezu Kristu manisaka na kuta nkinsi na yandi ya nsuka ya Paki ti bantumwa na yandi, kaka na ntangu yina, yandi tulaka madya yina tayibusaka bantu lufwa na yandi ya mpasi. Yandi pesaka bantumwa na yandi mampa ya kukonda levire ebuna yandi tubaka nde: “Beno baka mampa yai, beno dia yo; yo kele nitu na mono.” Na nima yandi pesaka bo dikopa ya vinu mpi yandi tubaka nde: “Beno nwa yo, beno yonso, sambu yai kele menga na mono yina ke songa kuwakana ya Nzambi me wakana ti bantu. Menga yai ke losana sambu na bantu mingi ya masumu, sambu Nzambi kulolula bo.” Yezu tubaka dyaka nde: “Beno [landa na kusala] mpidyai sambu na kuyindula mono.” (Matayo 26:26-28; Luka 22:19, 20) Yai ntuma ya Yezu pesaka na balongoki na yandi nde bo landa na kusala yo sambu na kuyindula lufwa na yandi.

Na mvula yai, nkinsi ya lufwa ya Yezu kebwa na Kitatu, Aprili 19, kana ntangu medinda. Bambangi ya Yehowa na ntoto ya mvimba tavukana na nkokila yai ya sipesiali sambu na kusala nkinsi yai ya Lusungiminu na mutindu yina Yezu kulombaka nde yo fwete salama. Beto kebinga nge na kyese yonso na kukwisa sambu beto ta kumosi nkinsi yai. Beto kelomba nge na kusolula ti Bambangi ya Yehowa ya kisika yina nge kezingaka sambu bo zabisa nge ntangu ti kisika lukutakanu yango tasalama.