Bikalulu ya Mbote Ke na Kuvila

MFUMU mosi ya ntama ya insi ya Allemagne, Helmut Schmidt kutubaka nde: “Mambu ya mutindu yina vandaka kusalama ve.” Yandi monisaka ntima mpasi ya yandi waka ntangu yandi monaka zulunalu mosi yina kuvandaka ti ntu-dyambu ya kutubilaka bisalu ya kukonda masonga ya kuluta mbi yina bamfumu ya leta mekatuka kusala bilumbu yai. Yandi tubaka nde: “Bikalulu ya mbote mevilaka sambu na bwimi.”

Bantu mingi tandima nde mambu yina yandi metuba kele kyeleka. Bikalulu ya mbote yina kele na Ndinga ya Nzambi, Biblia, yina bantu yonso kendimaka banda ntama nde yo kele ntwadisi ya kesongaka bo mambu yina kele mbote ti yina kele ya mbi, kele dyaka na ngala ve. Mambu yai kesalama ata na bansi yina bo kebingaka nde bansi ya Bukristu.

Keti bikalulu ya mbote yina Biblia kelongaka kele mfunu?

Na kati ya bikalulu ya mbote yina Biblia kelongaka, beto lenda tanga masonga ti kwikama. Kansi, kuyiba, kufuta avoka, kusadila mayele ya mbi sambu na kuyiba kesalama bisika yonso. Zulunalu mosi (The Times) ya Londres ketuba nde bapolisi mingi “kebakaka mbongo kiteso ya badolare 149 800 na mbala mosi na nima ya kupesa babandi dyamba yina bo botulaka na bantu sambu bo teka yo, na mpila nde bo kekukaka dyaka ve kufunda bantu yina mezabanaka mbote nde bo ketekaka bima ya mbi.” Bo ketubaka nde na insi ya Autriche, muyibi kesalamaka mingi na makambu ya ba tax ya asiranse. Ebuna na insi ya Allemagne kimvuka ya bantu ya siansi kuyitukaka ntangu bantu ya mayele yina kesosa-sosaka mambu mekatuka kusengumuna ntama mingi ve nde “muntu mosi ya siansi na Allemagne vandaka kukusa bantu mingi.” Bo fundaka profesere mosi, “ya mezabana mingi na bantu ya Allemagne yina kelongukaka mambu ya nitu ya bantu,” sambu na luvunu to sambu yandi basisaka mambu mingi ya luvunu.

 Kwikama na kati ya makwela kele na kati ya bikalulu ya mbote yina Biblia kelongaka, ebuna makwela kele kinduku ya fwete bikala sambu na ntangu yonso. Kansi makwela mingi kesukaka na tribinale sambu na kufwa yo. Zulunalu mosi ya Katolika (Christ in der Gegenwart: Mukristu ya Ntangu Yai) ketuba nde: “Ata na insi ya Suisse kisika bo ‘ketaninaka bikalulu ya ntama,’ makwela mingi ke na kufwa.” Na Hollande, kiteso ya ba makwela 33 na kati ya nkama kefwaka. Mwana-nkento mosi yina kumonaka mutindu mambu ke na kubaluka na luzingu bamvula yai na Allemagne kusonikaka nde: “Bantu mekuma kumona makwela bonso kima mosi ya memanaka ngala mpi ya ke dyaka mfunu ve. Bantu kekwelanaka dyaka ve sambu bo zinga tii na nsuka ya luzingu na bo.”

Ata mpidina, kele ti bantu mingi yina kemonaka nde bikalulu ya mbote yina Biblia kelongaka kele mfunu mingi mpi nde yo ke mfunu na luzingu ya inza na beto ya bubu. Bankwelani zole yina vandaka kuzinga na ndilu ya Suisse ti Allemagne kumonaka nde kuzitisa bansiku ya Biblia kukumisaka luzingu ya dibuta na bo kyese mingi. Sambu na bo, “ntwadisi kele kaka mosi na mambu yonso ya metala luzingu. Ntwadisi yango kele Biblia.”

Inki nge keyindula? Keti Biblia lenda vanda ntwadisi ya mbote? Keti bikalulu ya Biblia kelongaka kele mfunu bubu yai?