Banani Kele Baministre ya Nzambi Bubu Yai?

“Ngolo yina ya beto ke salaka kisalu yai yo ke katukaka na Nzambi. Sambu yandi muntu me pesaka beto ngolo na kusala kisalu ya kuwakana ya mpa.”​—2 KORINTO 3:5, 6.

1, 2. Inki kisalu Bakristu yonso ya mvu-nkama ya ntete vandaka kusala, mpi nki mutindu mambu kubalukaka?

 NA MVU-NKAMA ya ntete ya Ntangu na Beto, Bakristu yonso vandaka kusala kisalu mosi ya mfumu: kulonga nsangu ya mbote. Bo yonso vandaka bapakulami mpi bo vandaka baministre ya kuwakana ya mpa. Bamingi vandaka ti mikumba yankaka, bonso kulonga na kati ya dibundu. (1 Korinto 12:27-29; Efezo 4:11) Bibuti vandaka ti mikumba ya nene na kati ya dibuta. (Kolosai 3:18-21) Ata mpidina, kisalu ya ntetentete mpi ya kuluta mfunu yina bo yonso vandaka kusala vandaka kisalu ya kulonga. Na Kigreki ya ntama yina bo sadilaka na kusonika Masonuku ya Bukristu, mukumba yai vandaka di·a·ko·niʹa, disongidila kisalu mosi.​—Kolosai 4:17.

² Na nima, mambu kubalukaka. Kimvuka mosi ya bantu, ya bo vandaka kubinga nde bamfumu ya mabundu kubasikaka. Bo mpamba bantu kuvandaka ti kiyeka ya kulonga. (Bisalu 20:30) Bamfumu ya mabundu yango vandaka kibuka mosi ya fyoti na kati ya bantu yina vandaka kudibinga nde Bakristu. Bantu yina yonso kubikalaka bo vandaka kubinga bo nde mimpani. Ata bo longaka mimpani yina nde bo kele ti mambu ya bo fwete lungisaka, mu mbandu kupesa makabu sambu na kusadisa bamfumu ya mabundu, mingi na kati na bo vandaka kuzola ve kuwa mambu ya bo vandaka kulonga.

3, 4. (a) Inki mutindu bantu kekumaka baministre na Kikristu? (b) Nani bo kebingaka ministre na Kikristu, mpi sambu na nki mambu kele mutindu mosi ve na Bambangi ya Yehowa?

³ Bamfumu ya mabundu ketubaka nde bo kele baministre (ngogo yai mekatuka na ngogo ministre,  mutindu bo kebalulaka ngogo di·aʹko·nos, “to nsadi” na Latin). * Sambu na kukuma ministre, bo kesalaka banzo-nkanda ya nene to baseminere mpi na nima bo ketumbikaka bo. Mukanda mosi (The International Standard Bible Encyclopedia) ketuba nde: “Mbala mingi, bo kesadilaka bangogo ‘kutumbika’ ti ‘ntumbama’ sambu na kutubila kisika ya nene ya bo kepesaka baministre to mimpe na nsadisa ya misa ya nene, ya ketubilaka mingi kiyeka ya kulonga Ndinga to ya kupesa bisakramento, to kusala mambu yai yonso zole.” Nani muntu ketumbikaka baministre? Mukanda mosi (The New Encyclopædia Britannica) ketuba nde: “Na mabundu yina kevandaka ti ba dioseze tii bubu, eveke muntu ketumbikaka bo. Na mabundu ya ba Presbyterien, baministre yina kevandaka na kuvan bantu kepesaka ntumbama.”

⁴ Yo yina, na mabundu ya Kikristu, bantu fyoti mpenza kele na nswa ya kukuma baministre. Kansi, yo kele mutindu yina ve na Bambangi ya Yehowa. Sambu na nki? Sambu mambu vandaka kusalama ve mutindu yina na dibundu ya Bukristu ya mvu-nkama ya ntete.

Banani kibeni kele Baministre ya Nzambi?

5. Kana beto landa mutindu Biblia ketuba, banani kele na kati ya bantu yina kesalaka bonso baministre?

⁵ Biblia ketuba nde bantu yonso yina kesambilaka Yehowa, na zulu ti na ntoto, kele baministre. Bawanzyo kusadilaka Yezu. (Matayo 4:11; 26:53; Luka 22:43) Bawanzyo mpi ‘kesadisaka bantu yina taguluka.’ (Baebreo 1:14; Matayo 18:10) Yezu vandaka ministre. Yandi tubaka nde: “[Mwana-muntu] kwisaka ve sambu bantu kusadila yandi, kansi yandi kwisaka sambu na kusadila bantu.” (Matayo 20:28; Roma 15:8) Yo yina, sambu balongoki ya Yezu fwete ‘landa mbandu na yandi,’ yo kele kima ya kuyituka ve nde bo mpi fwete vanda baministre.​—1 Piere 2:21.

6. Inki mutindu Yezu kumonisaka nde balongoki na yandi fwete vanda baministre?

⁶ Ntangu fyoti na nima ya kutombuka na yandi na zulu, Yezu kutubaka na balongoki na yandi nde: “Beno kwenda kukumisa bantu yonso balonguki na mono: Beno botika bo na zina ya Tata ti ya Mwana ti ya Mpeve-Santu, beno longa bo mpi na kulanda mambu yonso ya mono vandaka kusonga beno na kusala.” (Matayo 28:19, 20) Balongoki ya Yezu fwete vanda bantu ya kekumisa bankaka balongoki, disongidila baministre. Bantu ya mpa yina bo kekumisa balongoki fwete longuka na kuzitisa mambu yonso yina Yezu vandaka kusonga bo na kusala. Kukwenda kukumisa bantu balongoki kele na kati ya mambu yango. Yo vanda nde nge kele bakala to nkento, mbuta to mwana, longoki ya kyeleka ya Yezu Kristu fwete vanda ministre.​—Yoele 2:28, 29.

7, 8. (a) Inki baverse kemonisa nde Bakristu yonso ya kyeleka fwete vanda baministre? (b) Inki bangyufula beto lenda yula sambu na yina metala ntumbama?

⁷ Sambu na kulungisa mambu yai, na kilumbu ya Pantekoti ya mvu 33 ya T.B., balongoki yonso ya Yezu yina kuvandaka pana, babakala, bankento, yantikaka kutuba mambu yina metala “bisalu ya nene ya Nzambi.” (Bisalu 2:1-11) Na nima, ntumwa Polo kusonikaka nde: “Muntu ketulaka lukwikilu na ntima sambu na lunungu, kansi yandi ketubaka ti munoko na meso ya bantu sambu na luguluku.” (Roma 10:10, NW) Polo kutubaka ve bangogo yai na kimvuka ya fyoti ya bamfumu ya mabundu, kansi na ‘bantu yonso ya Roma yina Nzambi ke zolaka.’ (Roma 1:1, 7) Mutindu mosi mpi, ‘basantu yonso yina kezingaka na bwala Efezo, bayina metulaka ntima na Yesu Kristo’ vandaka na mukumba ya ‘kulwata nsangu ya mbote ya ngemba mutindu bo ke lwataka basapatu na makulu na bo.’ (Efezo 1:1; 6:15) Ebuna bantu yonso ya kuwaka mambu yina kuvandaka na mukanda ya bo sonikilaka Baebreo vandaka na mukumba ya ‘kusimba ngolo mambu yina ya bo ke tulaka ntima na malongi na bo [kukonda kutula ntembe, NW].’​—Baebreo 10:23.

⁸ Kansi, inki ntangu muntu kekumaka ministre? To nki ntangu bo ketumbikaka yandi? Mpi nani ketumbikaka yandi?

Inki ntangu muntu ketumbamaka bonso Ministre?

9. Inki ntangu Yezu kutumbamaka, nani kutumbikaka yandi?

⁹ Sambu na kuzaba ntangu muntu ketumbamaka mpi muntu yina fwete tumbika yandi, beto baka mbandu ya Yezu Kristu. Yandi vandaka ve ti dipolomi ya ntumbama to dipolomi ya seminere sambu na kusonga nde yandi vandaka ministre, mpi ata muntu mosi ve kutumbikaka yandi. Ebuna sambu na nki beto lenda tuba nde yandi vandaka ministre? Sambu mambu ya kupemama yina Yezaya kusonikaka kulunganaka na yandi: “Mpeve ya Mfumu Nzambi kele na mono. Yandi solaka mono sambu na kuzabisa Nsangu ya Mbote.” (Luka 4:17-19; Yezaya 61:1) Bangogo yai kemonisa mbote nde bo pesaka Yezu kisalu ya kuzabisa nsangu ya mbote. Na nani? Sambu mpeve ya Yehowa kupakulaka yandi sambu na kusala  kisalu yina, yo kele pwelele nde muntu kutumbikaka Yezu kele Yehowa Nzambi. Inki ntangu mambu yai kusalamaka? Ntembe kele ve nde mpeve ya Yehowa kukulumukaka na zulu ya Yezu ntangu yandi bakaka mbotika. (Luka 3:21, 22) Yo kele pwelele nde yandi tumbamaka na ntangu yandi bakaka mbotika.

10. Nani muntu kepesaka ministre yina kele Mukristu “ngolo ya kusala kisalu”?

¹⁰ Inki beto lenda tuba sambu na balongoki ya Yezu ya mvu-nkama ya ntete? Kisalu na bo ya kuvanda baministre kukatukaka mpi na Yehowa. Polo kutubaka nde: “Ngolo yina ya beto ke salaka kisalu yai yo ke katukaka na Nzambi. Sambu yandi muntu me pesaka beto ngolo na kusala kisalu ya kuwakana ya mpa.” (2 Korinto 3:5, 6) Inki mutindu Yehowa kepesaka bantu yina kesambilaka yandi ngolo ya kuvanda baministre? Beto baka mbandu ya Timoteo, muntu ya Polo kubingaka nde “[ministre, NW] yina ke sadilaka Nzambi . . . na kuzabisa Nsangu ya Mbote sambu na Kristo.”​—1 Tesalonika 3:2.

11, 12. Inki kima kusadisaka Timoteo na kuyela tii kuna yandi kumaka ministre?

¹¹ Bangogo yai melanda ya bo sonikilaka Timoteo kesadisa beto na kubakisa nki mutindu yandi kumaka ministre: “Kansi nge, nge landa kaka mambu yina ya nge longukaka, [mpi yina bo sadisaka nge na kukwikila, NW]. Sambu nge mosi zaba banani balongi longaka nge. Katuka kileki na nge, nge zaba Mukanda ya Nzambi; yo lenda pesa nge mayele yina ta gulusa nge kana nge tula ntima na Yesu Kristo.” (2 Timoteo 3:14, 15) Fondasio ya lukwikilu ya Timoteo, yina kusalaka nde yandi yantika kulonga na ntwala ya bantu, vandaka nzayilu ya Masonuku. Keti yandi vandaka kaka na mfunu ya kutanga yina yandi vandaka kusala yandi mosi? Ve. Timoteo vandaka na mfunu ya kubaka nzayilu ya sikisiki mpi mayele ya kubakisa mambu ya kimpeve yina yandi vandaka kutanga. (Kolosai 1:9) Yo yina mambu ya kundimisaka Timoteo na ‘kutula ntima.’ Sambu yandi zabaka Masonuku “katuka kileki,” yo fwete vanda nde balongi na yandi ya ntete vandaka mama na yandi ti nkaka na yandi ya nkento, sambu yo kemonana pwelele nde tata na yandi kuvandaka ve Mukristu.​—2 Timoteo 1:5.

¹² Kansi, yo lombaka mambu mingi sambu Timoteo kukuma ministre. Ntetentete, lukwikilu na yandi kukumaka ngolo sambu yandi vandaka kuvukana ti Bakristu ya mabundu yina kuvandaka penepene ti bo. Inki mutindu beto mezaba yo? Sambu ntangu Polo kutanaka mbala ya ntete ti Timoteo, “bampangi ya Dibundu [yina] vandaka na bwala Listre ti na bwala Ikoniumi, bo vandaka kutuba mambu ya mbote” na zina ya mwana-bakala yai. (Bisalu 16:2) Dyaka, na bilumbu yina, bampangi mingi kusonikaka mikanda na mabundu mingi sambu na kupesa bo kikesa. Ebuna bankengi vandaka kwenda kutala bo sambu na kupesa bo kikesa. Mambu yai yonso kusadisaka Bakristu bonso Timoteo na kuyela na kimpeve.​—Bisalu 15:22-32; 1 Piere 1:1.

13. Inki ntangu Timoteo kutumbamaka bonso ministre, mpi sambu na nki nge tatuba nde kuyela na yandi ya kimpeve kusukaka pana ve?

¹³ Kana beto tala ntuma ya Yezu yina kele na Matayo 28:19, 20, beto lenda ndima nde lukwikilu ya Timoteo kupusaka yandi na kulanda mbandu ya Yezu mpi na kubaka mbotika. (Matayo 3:15-17; Baebreo 10:5-9) Yai vandaka kidimbu ya kudipesa ya Timoteo na ntima ya mvimba na Nzambi. Na ntangu yandi bakaka mbotika Timoteo kukumaka ministre. Banda na ntangu yina, luzingu na yandi, ngolo na yandi, mpi bima yonso ya yandi vandaka na yo kumaka ya Nzambi. Ntangu yandi salaka mutindu yai, “kisalu ya santu” kumaka kitini ya mfunu ya lusambu  na yandi. Kansi na nima, Timoteo kukangaka ve maboko. Yandi landaka na kuyela na kimpeve, tii kuna yandi kumaka ministre Mukristu ya kuyela. Mambu yai kusalamaka sambu Timoteo vandaka kutambula mingi ti Bakristu ya kuyela bonso Polo, yika mpi kulonguka ya yandi mosi, ti kisalu na yandi ya kulonga ya kikesa.​—1 Timoteo 4:14; 2 Timoteo 2:2; Baebreo 6:1.

14. Bubu yai, inki mutindu muntu yina ‘meyilama sambu na kuvanda na moyo ya mvula na mvula’ keyelaka sambu na kukuma ministre?

¹⁴ Bubu yai, kutumbama sambu na kisalu ya Bukristu kesalama mutindu mosi. Beto kesadisaka konso muntu yina “[meyilama, NW] sambu na kuvanda na moyo ya mvula na mvula” na kulonguka mambu yina metala Nzambi ti balukanu na yandi na nsadisa ya kulonguka ya Biblia. (Bisalu 13:48) Muntu yango kelongukaka na kusadila minsiku ya Biblia na luzingu na yandi mpi kusamba Nzambi na bangindu ya mbote. (Nkunga 1:1-3; Bingana 2:1-9; 1 Tesalonika 5:17, 18) Yandi kevukanaka ti Bakristu yankaka mpi yandi kebakaka mambote ya bima yonso ti mambu yonso yina “mpika ya kwikama mpi ya mayele” keyidikaka. (Matayo 24:45-47, NW; Bingana 13:20; Baebreo 10:23-25) Yo yina yandi keyelaka na kimpeve na nsadisa ya programe mosi ya kulonguka ya bo meyidikaka mbote.

15. Inki kima kesalamaka ntangu muntu kebakaka mbotika? (Tala mpi bangogo na nsi ya lutiti.)

¹⁵ Nsukansuka, longoki ya Biblia, na nima ya kuyedisa zola na Yehowa mpi lukwikilu ya ngolo na kimenga ya nkudulu, kevandaka na nzala ya kudipesa mvimba na Tata na yandi ya zulu. (Yoane 14:1) Yandi kekudipesaka na nzila ya kisambu yina yandi mosi kesalaka mpi na nima yandi kebakaka mbotika yina kele kidimbu ya dyambu yina yandi salaka na kinsweki. Mbotika na yandi kele ntumbama na yandi sambu yina kele ntangu ya bo kendimaka yandi nde yandi mekuma nsadi ya mekudipesa mpenza, disongidila di·aʹko·nos, ya Nzambi. Yandi fwete bikala ya kukabwana ti nsi-ntoto. (Yoane 17:16; Yakobo 4:4) Yandi mekudipesa yandi ya mvimba na Nzambi bonso “makabu ya menga, makabu ya kufwa ve kansi ya moyo, sambu na kusadila yandi ti kupesa yandi kiese.” (Roma 12:1) * Ebuna, yandi mekuma ministre ya Nzambi, yina kelanda mbandu ya Kristu.

Kisalu ya Bakristu kele inki?

16. Inki bisalu Timoteo vandaka kusala bonso ministre?

¹⁶ Inki kisalu Timoteo vandaka kusala? Yandi vandaka ti bisalu ya nene sambu yandi vandaka kutambula ti Polo. Ebuna ntangu yandi kumaka nkuluntu, Timoteo kusalaka mingi na kulonga mpi na kupesa kikesa na bampangi na yandi Bakristu. Kansi kisalu na yandi ya kuluta mfunu, yina kuvandaka mpi mfunu kiteso mosi sambu na Yezu ti Polo, vandaka kulonga nsangu ya mbote mpi kukumisa bantu balongoki. (Matayo 4:23; 1 Korinto 3:5) Polo kusongaka Timoteo nde: “Kansi nge, na mambu yonso nge fweti kudiyala; kanga ntima sambu na bampasi; sala kisalu na nge ya kulonga Nsangu ya Mbote; lungisa kisalu na nge yonso ya nge fweti sala sambu na kusadila Nzambi.”​—Beto bantu metengimisa bisono; 2 Timoteo 4:5.

17, 18. (a) Inki kisalu baministre yina kele Bakristu kesalaka? (b) Kisalu ya kulonga nsangu ya mbote kebakaka nki kisika na meso ya ministre yina kele Mukristu?

¹⁷ Yo kele mutindu mosi bubu yai sambu na baministre yina kele Bakristu. Bo kesala kisalu na meso ya bantu yonso, kisalu ya kulonga, sambu na kusadisa bantu yankaka na kuguluka na nsadisa ya kimenga ya Yezu mpi na kulonga bantu yina kekudikulumusaka na kusamba na zina ya Yehowa. (Bisalu 2:21; 4:10-12; Roma 10:13) Bo kemonisaka na nsadisa ya Biblia nde bo ketulaka kivuvu na bo yonso na Kimfumu yina takatula bampasi ya bantu kemonaka mpi bo kemonisaka dyaka nde ata bubu yai mambu lenda kuma na bikalulu ya mbote kuluta kana bo kezitisa minsiku ya Nzambi. (Nkunga 15:1-5; Marko 13: 10) Kansi, Mukristu yina kele ministre kelongaka ve evanzile yina ketubaka nde kana bantu kundima yo, bampasi ya bo kemona bubu yai tamana. Kansi, yandi kelongaka nde ‘kukangama na Nzambi kele ti lusilu ya moyo ya bubu ti ya moyo ke kwisa na ntwala.’​—1 Timoteo 4:8.

¹⁸ Ya kyeleka, Bakristu mingi kevandaka ti mitindu mingi ya kusala yina kevandaka ve kiteso mosi na konso Mukristu. Bakristu mingi kele ti mikumba ya kulungisa na kati ya mabuta. (Efezo 5:21–6:4) Bankuluntu ti bansadi ya kisalu kevandaka ti mikumba mingi na kati ya dibundu. (1 Timoteo 3:1, 12, 13; Tito 1:5; Baebreo 13:7) Bakristu mingi kesadisaka na kisalu ya kutunga Banzo ya Kimfumu. Mingi na kati na bo kele na dibaku ya kitoko ya kusala kisalu ya luzolo ya mbote na ba Betele ya Société Watch Tower. Ata mpidina, baministre yonso yina kele Bakristu kesalaka kisalu ya kulonga nsangu ya mbote. Bo mekatulaka ve ata muntu mosi na kusala kisalu yai. Kisalu yai kele kima ya ntete ya kemonisaka na ntwala ya bantu yonso nde Mukristu yango kele ministre ya kyeleka.

Kikalulu ya Ministre yina kele Mukristu

19, 20. Inki kikalulu baministre yina kele Bakristu fwete yedisa?

¹⁹ Baministre yonso ya Kikristu kekingaka nde bantu kupesa bo luzitu ya kuluta mingi, mpi bo kebakaka batitre bonso “révérend” mpi “père.” Kansi, ministre yina kele Mukristu kuzaba nde Yehowa mpamba muntu bo fwete zitisa na kiteso ya kuluta mingi. (1 Timoteo 2:9, 10) Ata ministre mosi ve yina kele Mukristu kekingaka kubaka luzitu ya mutindu yina to ketulaka ntima na kubaka batitre ya nene. (Matayo 23:8-12) Yandi zaba nde ntendula ya ntetentete ya ngogo di·a·ko·niʹa kele “kisalu.” Kisongi-dyambu ya kekwendaka nzila mosi ti ngogo yai, Biblia kesadilaka yo mbala mingi sambu na kutubila bisalu bonso kisalu ya kutudila bantu bima na mesa. (Luka 4:39; 17:8; Yoane 2:5) Ata mutindu bo kesadila yo na kisalu ya Bukristu kepesaka yo valere mingi, di·aʹko·nos kele kaka nsadi.

²⁰ Yo yina, ata Mukristu mosi ve kele na kikuma ya kuyindula nde yandi kele mfunu mingi kuluta bankaka. Baministre yina kele Bakristu ya kyeleka, ata bayina kele ti mikumba ya nene na kati ya dibundu, kele bantu ya kudikulumusa. Yezu kutubaka nde: “Kana muntu mosi na kati na beno zola vanda mbuta, yandi fweti sadila bantu ya nkaka. Ebuna kana muntu mosi na kati na beno zola vanda mfumu, yandi fweti vanda mpika ya bantu ya nkaka.” (Matayo 20:26, 27) Ntangu yandi songaka balongoki na yandi bikalulu ya mbote ya bo fwete yedisa, Yezu kuyobisaka makulu na bo, yandi salaka kisalu yina mpika ya nsuka ya kukonda valere vandaka kusala. (Yoane 13:1-15) Kisalu yai kelombaka kudikulumusa kibeni! Yo yina, Baministre yina kele Bakristu kesadilaka Yehowa Nzambi ti Yezu Kristu na kudikulumusa yonso. (2 Korinto 6:4; 11:23) Bo kemonisaka kikalulu ya kudikulumusa na mabanza na mpila bo kesadilaka bantu yankaka. Ebuna ntangu bo  kelongaka nsangu ya mbote, bo kesadisaka bantu ya kekwikilaka ve yina kezingaka penepene ti bo kukonda kuyindula kaka mambote na bo mosi.​—Roma 1:14, 15; Efezo 3:1-7.

Landa kisalu ti kukanga ntima

21. Inki mambote Polo kubakaka sambu yandi kangaka ntima na kisalu ya kulonga?

²¹ Sambu na kuvanda ministre, yo lombaka nde Polo kukanga ntima. Yandi zabisaka bantu ya Kolose nde yandi monaka mpasi sambu na kulonga bo nsangu ya mbote. (Kolosai 1:24, 25) Kansi, sambu yandi kangaka ntima, bantu mingi kundimaka nsangu ya mbote mpi kukumaka baministre. Bo butaka bo dyaka bonso bana ya Nzambi mpi bampangi ya Yezu Kristu, ti kivuvu ya kukuma bigangwa ya kimpeve kisika mosi ti yandi na zulu. Yai matabisi ya nene mpenza sambu na kukanga ntima!

22, 23. (a) Sambu na nki baministre yina kele Bakristu kele na mfunu ya kukanga ntima bubu yai? (b) Inki bambuma ya kitoko kukanga ntima ya Bakristu kebutaka?

²² Bantu yina kele mpenza baministre ya Nzambi kele na mfunu ya kukanga ntima bubu yai. Bamingi kenwanaka konso kilumbu ti maladi to ti bampasi yina kebwilaka minunu. Bibuti kesalaka ngolo, bamingi na kati na bo kevandaka bo mosi, na kusansa bana na bo. Na kikesa yonso, bana kenwanaka ti bupusi ya mbi ya bantu yina bo kekutanaka na bo na nzo-nkanda. Bakristu mingi kenwanaka ngolo ti mambu ya metala mbongo. Mpi bamingi kekutanaka ti kimbeni to kenyokwamaka ngolo sambu na “mpasi mingi” ya bilumbu yai! (2 Timoteo 3:1) Ee, baministre ya Yehowa kiteso ya bamilio sambanu lenda tuba bubu yai mambu yina ntumwa Polo kutubaka: “Beto ke songaka na mambu yonso nde beto ke sadilaka Nzambi: beto ke kangaka ntima ngolo na bampasi ya mutindu na mutindu.” (2 Korinto 6:4) Baministre yina kele Bakristu keyambulaka ve. Beto fwete sikisa bo kibeni sambu na kukanga ntima na bo.

²³ Dyaka, mutindu yo salaka Polo, kukanga ntima kebutaka bambuma ya kitoko mpenza. Kana beto kekanga ntima, beto ketanina kinduku na beto ya ngolo ti Yehowa mpi beto kepesa yandi kyese na ntima. (Bingana 27:11) Beto kekumisaka lukwikilu na beto mosi ngolo mpi beto kekumisaka bantu balongoki, ebuna kimpangi ya Bukristu kekumaka ngolo. (1 Timoteo 4:16) Yehowa kepesaka kikesa na bantu na yandi mpi yandi kesakumunaka kisalu na bo na bilumbu yai ya nsuka. Yo mesalaka nde, bantu ya nsuka na kati ya bantu 144 000 yina mebikalaka kuvukana, mpi bamilio mingi ya bantu kele na kivuvu ya ngolo ya kuzinga mvula na mvula na paladisu na ntoto. (Luka 23:43; Kusonga 14:1) Ya kyeleka, kisalu ya kusamuna yina Bakristu kesalaka kesongaka mawa ya Yehowa. (2 Korinto 4:1) Bika beto sepila ti kisalu yai mpi beto monisa ntonda sambu bambuma na yo tabikala kimakulu.​—1 Yoane 2:17.

[Banoti na nsi ya lutiti]

Keti Nge Lenda Tendula?

• Inki kisalu Bakristu ya mvu-nkama ya ntete vandaka kusala?

• Inki ntangu mpi nani muntu ketumbikaka ministre yina kele Mukristu?

• Inki kikalulu ministre yina kele Mukristu fwete yedisa?

• Sambu na nki ministre yina kele Mukristu fwete kanga ntima na ntwala ya bampasi?

[Bangiufula ya disolo ya kulonguka]

[Kifwanisu ya kele na lutiti 15]

Mbotika kele kidimbu ya kesongaka nde muntu mekudipesa na Nzambi mpi yo kele ntangu ya muntu ketumbamaka na kukuma ministre

[Bifwanisu ya kele na lutiti 16, 17]

Bo longaka Timoteo Ndinga ya Nzambi banda kileki. Yandi kumaka ministre yina metumbamaka ntangu yandi bakaka mbotika

[Kifwanisu ya kele na lutiti 18]

Baministre yina kele Bakristu kevandaka na nzala ya kusadila bantu yankaka