Keti Nge Kezolaka Bangibusa ya Yehowa Mingi?

“Mono ke landaka bansiku [“bangibusa,” NW] na nge, mono ke zolaka yo mingi.”​—NKUNGA 119:167.

1. Na nki mukanda kibeni bo ketubilaka mingi bangibusa ya Yehowa?

 YEHOWA kezolaka nde bantu na yandi kuvanda na kyese. Kansi, sambu na kuvanda na kyese ya kyeleka, beto fwete landa bansiku ya Nzambi mpi kulemfuka na bantuma na yandi. Sambu na kusala yo, yandi kepesaka beto bangibusa na yandi. Bo ketubilaka mingi bangibusa yango na Masonuku, mingimingi na Nkunga 119, ziku mwana ya Ntotila ya Yuda Ezekiasi muntu kusonikaka yo. Nkunga yai ya kitoko keyantika mutindu yai: “Kiese na bantu yina ke na bifu ya mbote na luzingu na bo, bayina ke landaka bansiku ya Mfumu Nzambi. Kiese na bayina ke landaka mambu [“bangibusa,” NW] na yandi ti kusosa yandi na ntima na bo yonso.”​—Nkunga 119:1, 2.

2. Inki mutindu bangibusa ya Nzambi kepesaka kyese?

² Beto ‘kelandaka bansiku ya Yehowa’ ntangu beto kebakaka nzayilu ya kyeleka ya Ndinga na yandi mpi ntangu beto kesadilaka yo na luzingu. Kansi, sambu beto kele bantu ya kukonda kukuka, beto kele na mfunu ya bangibusa. Ngogo ya Kiebreo ya bo mebalula nde “bangibusa” kemonisa nde Nzambi keyibusaka beto bansiku, bantuma, mpi malongi na yandi. (Matayo 10:18-20) Beto tavanda na kyese kaka kana beto kezitisa bangibusa yai, sambu yo kesadisaka beto na kubuya kubwa na mitambu ya kimpeve, yina kenataka mpasi na ntima mpi mawa.

Simba ngolo bangibusa ya Yehowa

3. Na nsadisa ya Nkunga 119:60, 61, na nani beto ketulaka ntima?

³ Muyimbi-bankunga vandaka kuzola bansiku ya Nzambi mingi, yo yina yandi yimbaka nde: “Nswalu mono ke landa bansiku na nge, mono ke vingila ve. Bantu ya mbi me ziunga mono na mitambu na bo, kansi mono ke vila bansiku na nge ata fioti ve.” (Nkunga 119:60, 61) Bangibusa ya Yehowa kesadisaka beto na kukanga ntima na ntangu bantu kemonisaka beto mpasi sambu beto ketulaka ntima na Tata na beto yina kele na zulu nde yandi tazenga bansinga yina bambeni na beto kekangisaka na nzyunga na beto. Na ntangu  yina mefwana, yandi kekatulaka beto na bampasi ya mutindu yina na mpila nde beto landa kusala kisalu ya kulonga mambu yina metala Kimfumu.​—Marko 13:10.

4. Inki beto fwete sala kana bo meyibusa beto bangibusa ya Nzambi?

⁴ Ntangu yankaka, bangibusa ya Yehowa kepesaka beto disipline. Beto fwete vanda na kyese sambu na disipline ya mutindu yina, mutindu muyimbi-bankunga kusalaka. Yandi sambaka Nzambi nde: “[Bangibusa, NW] na nge ke pesaka mono kiese. . . . Mono ke zolaka malongi na nge.” (Nkunga 119:24, 119) Beto zaba bangibusa mingi ya Nzambi kuluta muyimbi-bankunga. Mambu mingi ya kele na Masonuku ya Kiebreo yina bo mevutukilaka na Masonuku ya Kigreki keyibusaka beto ve kaka malongi ya Yehowa yina yandi vandaka kupesa na bantu na yandi yina vandaka kuzinga na nsi ya Nsiku, kansi yo keyibusaka beto mpi balukanu na yandi sambu na yina metala dibundu ya Bukristu. Kana Nzambi memona nde yo kele mbote na kuyibusa beto mambu yina ketadila bansiku na yandi, beto kepesaka mersi sambu na lutwadisu na yandi ya mutindu yina. Mpi kana beto ‘kangama na bangibusa na yandi,’ beto tabuya luzingu ya masumu yina kepesaka ve Ngangi na beto kyese mpi yina kekatulaka beto kyese.​—Nkunga 119:31.

5. Inki mutindu beto lenda yantika kuzola bangibusa ya Yehowa mingi?

⁵ Na nki kiteso beto fwete zola bangibusa ya Yehowa? Muyimbi-bankunga kuyimbaka nde: “Mono ke landaka [bangibusa, NW] na nge, mono ke zolaka yo mingi.” (Beto bantu metengimisa bisono; Nkunga 119:167.) Beto tayantika kuzola mingi bangibusa ya Yehowa kana beto kemona yo mpi kendima yo nde yo kele bandongisila yina kekatuka na Tata yina kezolaka beto. (1 Piere 5:6, 7) Beto kele na mfunu ya bangibusa na yandi, mpi beto takuma kuzola yo mingi kana beto kemona mambote yina yo kepesa beto.

Sambu na nki beto kele na mfunu ya bangibusa ya Nzambi

6. Pesa kikuma mosi ya kepusaka beto na kuvanda na mfunu ya bangibusa ya Yehowa, mpi nki tasadisa beto na kuyibuka yo?

⁶ Kikuma ya ntete ya kesalaka nde beto vanda na mfunu ya bangibusa ya Yehowa kele nde beto kevilanaka mbala mingi. Mukanda mosi (The World Book Encyclopedia) ketuba nde: “Na kutuba ya mbote, bantu kevilanaka mingi mambu yina melutaka mutindu ntangu ke na kuluta. . . . Ziku yo mekuminaka nge dezia na kukonda kuyibuka zina ya muntu mosi to mambu yankaka ya nge vandaka kuzaba mbote. . . . Kukonda kukuka na kuyibuka mambu mutindu yina sambu na mwa ntangu fyoti kekuminaka bantu mbala mingi. Bantu ya siansi kefwanisaka yo na kumeka kusosa kuzwa kima mosi ya muntu kutulaka na kisika na yo ve na kati ya nzo yina bima mingi kele na ndonga ve. . . . Mutindu ya mbote ya kusala sambu nge yibuka mambu kukonda mpasi kele kulonguka yo ntangu mingi na nima ya kuyindula nde nge kezaba yo mbote.” Kulonguka mbotembote mpi kuvutukila mambu yina beto melonguka tasadisa beto na kuyibuka bansiku ya Nzambi mpi kuzitisa yo sambu na mambote na beto mosi.

7. Sambu na nki beto kele na mfunu ya bangibusa ya Nzambi bubu kuluta na bilumbu meluta?

 ⁷ Beto kele na mfunu mingi ya bangibusa ya Yehowa bubu kuluta bilumbu meluta sambu mambi mekuma kusalama na kiteso mosi ya kuluta mpenza banda bantu kezingaka. Kana beto tula dikebi na bangibusa ya Nzambi, beto tabaka mayele yina beto kele na yo mfunu sambu na kubuya nde banzila ya mbi ya inza kubenda beto. Muyimbi-bankunga kutubaka nde: “Mono me luta balongi na mono na mayele sambu mono ke yindulaka [bangibusa, NW] na nge. Mono me luta bambuta na mayele sambu mono ke lemfukaka na bansiku na nge. Mono me bikisaka banzila yonso ya mbi sambu na kulanda mambu na nge.” (Nkunga 119:99-101) Kana beto kelemfuka na bangibusa ya Nzambi, beto talanda ve “banzila ya mbi” mpi beto tabuya kukuma bonso bantu ya inza, yina “me temukaka ve. Bo ke zabaka ve luzingu yina ya Nzambi ke pesaka.”​—Efezo 4:17-19.

8. Inki kima lenda sadisa beto na kununga mimekamu yina lukwikilu na beto kekutanaka na yo?

⁸ Beto kele dyaka na mfunu ya bangibusa ya Nzambi sambu yo kepesaka beto kikesa ya kukanga ntima na ntwala ya mimekamu na “ntangu ya nsuka” yai. (Daniele 12:4) Kana bangibusa ya mutindu yina kele ve beto lenda kuma ‘bantu yina kewaka mambu sambu na kuvila yo.’ (Yakobo 1:25) Kansi kulonguka beto mosi Masonuku mbotembote mpi na kati ya dibundu na nsadisa ya mikanda yina kekatukaka na “mpika ya kwikama mpi ya mayele” tasadisa beto na kusadisa bantu yankaka mpi na kununga mimekamu yina lukwikilu na bo kekutanaka na yo. (Matayo 24:45-47, NW) Mambu ya kimpeve ya mutindu yai kesadisaka beto na kuzaba nki beto fwete sala sambu na kupesa Yehowa kyese kana beto mekutana ti mambu yina memeka beto.

Mfunu ya balukutakanu na beto

9. Banani kele ‘makabu ya bantu,’ mpi nki mutindu bo kesadisaka bampangi na bo Bakristu?

⁹ Beto kelungisaka mpusa na beto ya bangibusa ya Nzambi na balukutakanu ya Bukristu, kisika bampangi yina bo meponaka kelongaka. Ntumwa Polo kusonikaka nde ntangu Yezu “tombukaka na kati ya zulu, yandi nataka bantu mingi ya bo kangaka na bitumba; yandi pesaka makabu [ya] bantu.” Polo kuyikaka nde: “[Kristu] tulaka bantu na bisalu ya mutindu na mutindu: Yandi tulaka bantu ya nkaka bantumwa, bantu ya nkaka baprofete, bantu ya nkaka baevanzeliste, bantu ya nkaka [bankengi], bantu ya nkaka mpi balongi.” (Efezo 4:8, 11, 12) Beto kepesa mersi mingi kibeni mpila ‘makabu ya bantu’ yai, disongidila bankuluntu yina bo meponaka, kebendaka dikebi na beto na bangibusa ya Yehowa kana beto mevukana kumosi sambu na kusamba!

10. Inki kima bo ketubila mingi na Baebreo 10:24, 25?

¹⁰ Ntonda sambu na mambu yonso yina Nzambi kesala sambu na beto tapusa beto na kuvanda na balukutakanu yonso tanu yina dibundu kesalaka konso mposo. Polo kutubilaka mingi mfunu ya kuvukana mbala na mbala. Yandi sonikaka nde: “Beto banzila bantu ya nkaka na kati na beto na kupesa bo kikesa ya kuzola bampangi ya nkaka kuluta diaka mbote ti kusadila bo mambu ya mbote. Konso ntangu beto fweti kutana kaka na [balukutakanu, NW]; beto vanda ve bonso bantu ya nkaka ke kwendaka diaka ve na [balukutakanu, NW]. Kansi, beto fweti pesa kikesa na bampangi ya nkaka na kati na beto, sambu beno ke mona nde kilumbu yina ya Kristo ta sambisa bantu yo yai mpi kele na nzila.”​—Baebreo 10:24, 25.

11. Inki mutindu konso lukutakanu na kati ya balukutakanu yina beto kesalaka konso mposo kesadisaka beto?

 ¹¹ Keti nge kesepilaka sambu na mambote yina balukutakanu na beto kenatilaka beto? Kulonguka ya Nzozulu ya Nkengi ya beto kesalaka konso mposo kekumisaka lukwikilu na beto ngolo, yo kesadisaka beto na kuzitisa bangibusa ya Yehowa, mpi yo kepesaka beto kikesa ya kunwana ti “mpeve ya inza.” (1 Korinto 2:12, NW; Bisalu 15:31) Na Diskure ya Bantu Yonso, mitubi kepesaka malongi yina mekatuka na Ndinga ya Nzambi, bo keyibusaka beto mpi bansiku na yandi ti ‘mambu ya Yezu ke tubaka ya kepesaka moyo ya mvula na mvula.’ (Yoane 6:68; 7:46; Matayo 5:1–7:29) Mayele na beto ya kulonga kekumaka dyaka mingi na Nzo-Nkanda ya Kisalu ya Teokrasi. Lukutakanu ya Kisalu kele mfunu mingi sambu yo kesadisaka beto na kutomisa mutindu na beto ya kulonga nsangu ya mbote nzo na nzo, na bamvutukilu ya mpa, na kulonguka ti bantu, ti na mitindu yankaka ya kisalu na beto ya kulonga. Kakibuka ya fyoti ya bampangi kekutanaka na Kulonguka ya Mukanda ya Dibundu yina kepesaka beto okazio ya mbote ya kutubila ntangu yonso mambu yina metala bangibusa ya Nzambi.

12, 13. Inki mutindu bantu ya Nzambi ya insi mosi ya Azia kumonisaka nde balukutakanu ya Bukristu kele mfunu mingi?

¹² Kuvanda mbala na mbala na balukutakanu ya dibundu kesadisaka na mpila yo keyibusaka beto bansiku ya Nzambi mpi yo kesadisaka beto na kuvanda ngolo na kimpeve na ntangu ya bitumba, ya mpasi ya mbongo, ti mambu yankaka yina kemekaka lukwikilu na beto. Kiteso ya Bakristu 70 yina kubikaka banzo na bo na insi mosi ya Azia sambu na kukwenda kuzinga na kati ya mfinda sambu na bitumba kumonaka mpenza mfunu ya balukutakanu yai. Kansi sambu bo vandaka ti lukanu ya kulanda kuvukana kumosi mbala na mbala, bo vutukaka na bwala na bo yina kubebaka ngolo na bitumba, bo tumunaka mwa bima yina kubikalaka na Nzo ya Kimfumu na bo, mpi bo kwendaka kutunga yo dyaka na kati ya mfinda.

¹³ Na nima ya kukanga ntima bamvula mingi na kati ya bitumba na ndambu yankaka ya insi yina mosi, bantu ya Yehowa kelanda kusala kisalu na bo na kikesa yonso. Bantu kuyulaka nkuluntu mosi na ndambu yina nde: “Inki kusadisaka beno na kuvanda ti bampangi yonso kisika mosi?” Yandi vutulaka nde: “Bamvula 19 yonso yai meluta, beto mekondaka ntete ve ata na lukutakanu mosi. Bantangu yankaka sambu na babombi to bampasi yankaka, bampangi yankaka vandaka ve na mpila ya kukwisa na balukutakanu, kansi bo bikaka kulutisa ve ata lukutakanu mosi.” Ntembe kele ve nde bampangi ya babakala ti ya bankento yai ya luzolo, kubakisaka mfunu ya ‘kwenda na balukutakanu.’

14. Inki dilongi beto lenda baka na kikalulu yina Ana ya kukumaka mununu kuvandaka na yo?

¹⁴ Ana, mufwidi mosi ya mununu ya nkento ya  bamvula 84 “vandaka konso ntangu na [tempelo].” Yo salaka nde yandi vandaka pana ntangu bo nataka Yezu na tempelo ntangu fyoti na nima ya lubutuku na yandi. (Luka 2:36-38) Keti nge mpi kele na lukanu ya kukwendaka na balukutakanu konso mbala? Keti nge kesalaka ngolo na kuvanda na bitini yonso ya balukutakanu na beto ya fyoti ti ya nene? Malongi ya mfunu ya beto kebaka na balukutakanu yai kemonisaka beto pwelele nde Tata na beto yina kele na zulu kekebaka bantu na yandi. (Yezaya 40:11) Balukutakanu yai keyikaka mpi kyese na beto, ebuna kukwenda na bisika yai kemonisaka nde beto kesepilaka na bangibusa ya Yehowa.​—Nehemia 8:5-8, 12.

Bangibusa ya Yehowa kekumisaka beto bantu ya kuswaswana

15, 16. Inki mutindu kuzitisa bangibusa ya Yehowa kesadisaka beto na luzingu na beto?

¹⁵ Kuzitisa bangibusa ya Nzambi kesadisaka beto na kukonda kukota na mambu ya inza yai ya mbi. Mu mbandu, kulemfuka na bangibusa ya Nzambi kesadisaka beto na kukonda kusala mansoni. (Kulonga 5:18; Bingana 6:29-35; Baebreo 13:4) Kana beto kezitisa bangibusa ya Nzambi beto tanunga mpukumuna sambu na kukusa, kukonda kuta masonga, to kuyiba. (Kubasika 20:15, 16; Levi 19:11; Bingana 30:7-9; Efezo 4:25, 28; Baebreo 13:18) Kulemfuka na bangibusa ya Yehowa kesadisaka beto dyaka na kukonda kuvutula mbi na mbi, kubumba kimbeni, to kutonga bantu yankaka.​—Levi 19:16, 18; Nkunga 15:1, 3.

¹⁶ Kana beto kelemfuka na bangibusa ya Nzambi, beto tavanda kaka bantu ya santu, to ya kuswaswana sambu na kusala kisalu na yandi. Yo kele mfunu mpenza nde beto kota ve na mambu ya inza yai! Na kisambu yina yandi salaka na Yehowa na mpimpa ya nsuka ya luzingu na yandi na ntoto, Yezu lombaka sambu na balongoki na yandi nde: “Mono me pesaka bo malongi na nge, ebuna bantu ya nsi-ntoto yai mengaka bo, sambu bo kele bantu ya nsi-ntoto yai ve, mutindu mono mpi kele muntu ya nsi-ntoto yai ve. Mono ke bondila nge ve na kukatula bo na nsi-ntoto yai, kansi na kukeba bo sambu Muntu ya Mbi kwisa kukota na bo ve. Bo kele bantu ya nsi-ntoto yai ve, mutindu mono mpi kele muntu ya nsi-ntoto yai ve. Na nzila ya kieleka, kitula bo kimakulu bantu na nge; mambu yina ya nge ke tubaka kele mambu ya kieleka.” (Yoane 17:14-17) Bika beto landa na kuzola Ndinga ya Nzambi, yina kekumisaka beto bantu ya kuswaswana sambu na kisalu na yandi ya santu.

17. Inki tabwa kana beto vila bangibusa ya Nzambi, ebuna nki beto fwete sala?

¹⁷ Beto bansadi ya Yehowa, beto fwete vandaka kaka na bikalulu ya mbote sambu beto landa na kusala kisalu na yandi. Kansi, kana beto vila bangibusa ya Nzambi, mpeve ya inza yai, yina kemonanaka na kutuba, na mikanda, na bansaka ya kulutisa ntangu, mpi na bikalulu ya bantu, tanunga beto. Ntembe kele ve nde beto kezola ve kukuma bantu yina kezolaka mbongo mingi, bantu ya kekuditulaka, bantu ya lulendo, ya kuvwenza Nzambi, ya ntu-ngolo, ya kuzaba kupesa mersi ve, ya kezitisaka ve mambu ya Nzambi, ya nku, ya kezolaka kyese ya nsi-ntoto, kansi Nzambi ve. Beto metanga kaka mwa mambu fyoti ya kemonanaka na bantu yina kezingaka ntama ti Nzambi. (2 Timoteo 3:1-5) Sambu bilumbu ya nsuka  ya inza yai ya mbi mepusana mpenza, beto landa na kusamba sambu Nzambi kusadisa beto na mpila nde beto landa na kuzitisa bangibusa ya Yehowa mpi beto landa na ‘kulemfuka na bangibusa na yandi.’​—Nkunga 119:9.

18. Kuzitisa bangibusa ya Nzambi tapusa beto na kusala nki mambu ya mbote?

¹⁸ Bangibusa ya Yehowa kesukaka kaka ve na kukebisa beto na mambu yina beto fwete sala ve. Kuzitisa bangibusa na yandi tapusa beto na kusala mambu yina kele ya mbote, yo tapusa beto na kutula ntima yonso na Yehowa mpi na kuzola yandi na ntima na beto ya mvimba, na mabanza, ti na ngolo na beto yonso. (Kulonga 6:5; Nkunga 4:5; Bingana 3:5, 6; Matayo 22:37; Marko 12:30) Bangibusa ya Nzambi kepusaka beto dyaka na kuzola bampangi na beto. (Levi 19:18; Matayo 22:39) Beto kemonisaka mpenza nde beto kezolaka Nzambi mpi bampangi na beto na ntangu beto kesalaka luzolo ya Nzambi mpi kesadisaka bantu yankaka na “kuvanda ti nzayilu ya Nzambi” yina kepesaka luzingu.​—Bingana 2:1-5, NW.

Kuzitisa bangibusa ya Yehowa ketendula luzingu!

19. Inki mutindu beto lenda monisa bantu yankaka nde kulemfuka na bangibusa ya Yehowa kele mfunu mpi yo kepesaka mambote?

¹⁹ Kana beto kezitisa bangibusa ya Yehowa mpi beto kesadisa bantu yankaka na kusala mutindu mosi, beto mosi taguluka, bantu yina kewa beto mpi taguluka. (1 Timoteo 4:16) Inki mutindu beto lenda songa bantu yankaka nde kulemfuka na bangibusa ya Yehowa kele mpenza mfunu mpi yo kepesaka mambote? Kana beto mosi kesadila minsiku ya Biblia na luzingu na beto. Ebuna, bantu yina kele ya ‘kuyilama sambu na moyo ya mvula na mvula’ tamona mpenza nde nzila yina Ndinga ya Nzambi kezolaka nde beto landa kele nzila ya kuluta mbote na kulanda. (Bisalu 13:48) Bo tamona mpi nde ‘Nzambi kele na kati na beto’ mpi yo tapusa bo na kuvukana na beto sambu na kusamba Yehowa Nkwa-Kimfumu.​—1 Korinto 14:24, 25.

20, 21. Bangibusa ya Nzambi ti mpeve na yandi tasadisa beto na kusala nki kima?

²⁰ Kana beto landa na kulonguka Masonuku, kusadila mambu yina beto kelonguka, mpi kusadila bima yonso ya kimpeve yina Yehowa kepesaka beto, beto takuma kuzola bangibusa na yandi mingi. Kana beto lemfuka na yo, bangibusa yai tasadisa beto na kulwata ‘bikalulu ya mpa yina me fwanana na Nzambi yina salaka yo, yo ke monikaka na luzingu yina kele ya mbote, ya santu ti ya kieleka.’ (Efezo 4:20-24) Bangibusa ya Yehowa ti mpeve santu na yandi tasadisa beto na kumonisa bikalulu yai: zola, kiese, ngemba, kukanga ntima, ntima ya mbote, mambote, lukwikilu, mawete, ti kudiyala. Inza yina kele na kiyeka ya Satana kevandaka ve ti bikalulu yai ata fyoti! (Galatia 5:22, 23; 1 Yoane 5:19) Yo yina, beto fwete monisa ntonda na beto kana bo meyibusa beto mambu yina Yehowa kelombaka beto na kusala ntangu beto kelonguka Biblia beto mosi, na bankuluntu yina bo meponaka, mpi na balukutakanu na beto ya dibundu, na balukutakanu ya fyoti, ti ya nene.

²¹ Sambu beto kezitisaka bangibusa ya Yehowa, beto lenda vanda na kyese ata ntangu beto kemona mpasi sambu beto kesala mambu ya mbote. (Luka 6:22, 23) Beto ketulaka ntima nde Nzambi tagulusa beto na kati ya bampasi ya kuluta mbi yina lenda bwila beto. Yo kele mpenza mfunu ntangu yai ya makanda yonso ke na kuvukana sambu na “kunwana bitumba ya kilumbu ya nene ya [Nzambi Nkwa-Ngolo yonso]” na Armagedoni.​—Kusonga 16:14-16.

22. Inki fwete vanda lukanu na beto sambu na yina metala bangibusa ya Yehowa?

²² Kana beto kezola kubaka dikabu ya luzingu ya kukonda nsuka ya beto mefwana ve na kubaka, beto fwete zola bangibusa ya Yehowa mingi mpi kuzitisa yo na ntima ya mvimba. Bika beto vanda na mabanza yina muyimbi-bankunga kuvandaka na yo ntangu yandi yimbaka nde: “[Bangibusa, NW] na nge kele kaka mbote tii kuna; pesa mono mayele, mpidina mono ta zinga.” (Nkunga 119:144) Bika beto monisa nde beto mpi kele na lukanu yina kele na bangogo ya muyimbi-bankunga yai: “Mono ke didila nge [Yehowa]; gulusa mono, ebuna mono ta landa bansiku [“bangibusa,” NW] na nge.” (Nkunga 119:146) Ee, bika beto monisa na kutuba ti na bisalu na beto nde ya kyeleka beto kezolaka bangibusa ya Yehowa mingi.

Inki Mutindu Nge Tavutula?

• Inki mutindu muyimbi-bankunga vandaka kumona bangibusa ya Yehowa?

• Sambu na nki beto kele na mfunu ya bangibusa ya Nzambi?

• Inki mutindu balukutakanu na beto kedisaka beto na yina metala kuzitisa bangibusa ya Nzambi?

• Inki mutindu bangibusa ya Yehowa kekumisaka beto bantu ya kuswaswana ti inza yai?

[Bangiufula ya disolo ya kulonguka]

[Kifwanisu ya kele na lutiti 25]

Muyimbi-bankunga vandaka kuzola bangibusa ya Yehowa mingi

[Bifwanisu ya kele na lutiti 26, 27]

Bonso Ana, keti nge mpi mebakaka lukanu ya kukonda ve na balukutakanu?

[Kifwanisu ya kele na lutiti 28]

Kulemfuka na bangibusa ya Yehowa kekumisaka beto bantu ya kukonda mvindu mpi ya melunga kusala kisalu na yandi