Beno Vanda Bambuta ti Lukwikilu ya Ngolo

“Yandi ke sambaka mpi Nzambi ngolo ntangu yonso sambu na beno, na mpila nde beno vanda na lukwikilu ya ngolo, beno vanda bambuta, beno kuyilama mpenza na kusala konso mambu yina ya Nzambi ke zolaka.”​—KOLOSAI 4:12.

1, 2. (a) Inki dyambu mimpani kumonaka na Bakristu ya ntete? (b) Inki mutindu mukanda ya Kolosai kemonisa dikebi yango ya zola?

 BALONGOKI ya Yezu vandaka kutula dikebi mingi na bampangi yina bo vandaka kusambila na bo. Tertullien (nsoniki ya mvu-nkama ya zole ti ya tatu ya T.B.) kutubilaka ntima ya mbote yina bo vandaka kusonga bana ya nsiona, bansukami, ti minunu. Mambu ya bo vandaka kusala yina vandaka kusonga zola kusimbaka mpenza ntima ya mimpani na mpila nde bankaka vandaka kutubila Bakristu nde: ‘Tala mutindu bo kezolanaka bo na bo.’

² Mukanda ya Kolosai kesonga dikebi ya zola yina ntumwa Polo ti Epafrasi, muntu yina vandaka kusala ti yandi, vandaka na yo sambu na bampangi ya babakala ti ya bankento na Kolosai. Polo kusonikilaka bo nde: Epafrasi “ke sambaka mpi Nzambi ngolo ntangu yonso sambu na beno, na mpila nde beno vanda na lukwikilu ya ngolo, beno vanda bambuta, beno kuyilama mpenza na kusala konso mambu yina ya Nzambi ke zolaka.” Na mvu 2001, mukapu ya mvu  yina Bambangi ya Yehowa tasadila kele mambu yai kele na Kolosai 4:12: “Beno vanda na lukwikilu ya ngolo, beno vanda bambuta, beno kuyilama mpenza na kusala konso mambu yina ya Nzambi ke zolaka.”

3. Tanga mambu zole yina Epafrasi kulombaka na kisambu na yandi.

³ Bisambu yina Epafrasi vandaka kusala sambu na bampangi na yandi ya zola vandaka kutubila mambu zole: (1) bo “vanda bambuta” mpi (2) bo vanda ‘na lukwikilu ya ngolo mpi bo yilama mpenza na kusala konso mambu yina ya Nzambi ke zolaka.’ Bo sonikaka mambu yai na Masonuku sambu na mambote na beto. Yo yina, kudiyula mutindu yai: ‘Inki kibeni mono kele na yo mfunu sambu na kuvanda na lukwikilu ya ngolo, na kuvanda mbuta mpi na kuyilama mpenza na kusala konso mambu yina ya Nzambi ke zolaka? Mpi kana mono kusala mpidina, inki mbuma yo tabuta?’ Bika beto tala.

Beno sala ngolo na ‘kuvanda bambuta’

4. Bantu ya Kolosai vandaka na mfunu ya kuvanda “bambuta” na nki mutindu?

⁴ Epafrasi vandaka kuzola mpenza nde bampangi na yandi ya kimpeve ya babakala ti ya bankento yina vandaka na Kolosai ‘kuvanda bambuta.’ Ngogo ya Polo kusadilaka, ya bo mebalula awa nde ‘mbuta,’ lenda tendula kukuka, kuyela, to kutela. (Matayo 19:21; Baebreo 5:14; Yakobo 1:4, 25) Ziku nge mezaba nde kana muntu mebaka mbotika sambu na kukuma Mbangi ya Yehowa yo kezola kutuba ve nde yandi mekuma mbala mosi Mukristu ya kuyela. Polo kusonikilaka bantu ya Efezo yina vandaka kuzinga na ndambu ya westi ya Kolosai nde bangungudi ti balongi kesalaka ngolo sambu na kusadisa bo na ‘kuzaba kuvanda na kimvuka mosi sambu na lukwikilu na beto, sambu beto zaba Mwana-Nzambi; beto ta vanda bambuta, kimbuta na beto ta fwanana mpenza na kimbuta ya Kristo.’ Na bisika yankaka Polo kusyamisaka Bakristu na kuvanda “bambuta na mabanza.”​—Efezo 4:8-13; 1 Korinto 14:20.

5. Inki mutindu kukuma mbuta lenda kuma lukanu na beto ya ntete?

⁵ Kana bantu yankaka na Kolosai vandaka mekuma ntete ve bambuta na kimpeve, to ya kuyela, dyambu yai zolaka kukuma lukanu na bo. Keti yo fwete vanda mutindu mosi ve sambu na beto bubu yai? Ata beto mebakaka mbotika bamvula mingi meluta to ntama mingi ve, keti yo tavanda ve mbote nde beto tala na masonga yonso kana beto meyela na mutindu na beto ya kuyindula ti ya kumonina mambu? Keti beto ketadilaka ntete minsiku ya Biblia na ntwala ya kubaka badesizio? Keti mambu yina ketadila Nzambi mpi dibundu kebakaka kisika ya nene na luzingu na beto, olie ya kusala yo kaka na kintulumukina? Mpila ya kupesa bambandu yonso ya kemonisa mitindu ya beto lenda monisa kuyela ya kesonga kimbuta kele ve, kansi beto tadila kaka bambandu zole.

6. Na nki mambu muntu lenda sala ngolo na kuyela sambu na kukuma ya kukuka, mutindu Yehowa kele?

⁶ Mbandu ya ntete: Yindula nde nge yelaka na kisika yina bantu kele ti kikalulu ya kubakila bankaka bangindu ya mbi to kezolaka ve bantu ya mpusu ya nitu yankaka, ya insi yankaka, to ya bisika yankaka. Ntangu yai beto mezaba nde Nzambi kekabulaka ve bantu, beto mpi fwete kabula bo ve. (Bisalu 10:14, 15, 34, 35) Na dibundu na beto to na nzyunga na beto, bantu ya mutindu yina kele, disongidila beto kezingaka ti bo. Keti beto kevandaka kaka ti bangindu ya mbi na ntu to kubakila bo bangindu ya mbi? Keti beto ‘kesukininaka ve na kubakila bo bangindu  ya mbi kana mosi na kati na bo mesala kima mosi ya mbi to kima yina mepesa beto fyoti mpasi na ntima? Kudiyula nde: ‘Keti mono kele na mfunu ya kuyela dyaka sambu na kukuma na kikalulu yina Nzambi kele na yo ya kukonda kukabula bantu?’

7. Kukuma Mukristu yina kele mbuta lenda tendula nki sambu na yina metala mpila ya kumona bantu yankaka?

⁷ Mbandu ya zole: Kana beto landa mambu yina kele na Filipi 2:3, beto fwete sala ve mambu ‘sambu na lukumu na beto mosi, na mabanza ya mpamba-mpamba ya kudisonga [to sambu na bwimi, NW]; kansi beto fwete kudikulumusa na meso ya bantu ya nkaka, konso muntu kubaka bantu ya nkaka nde bo me luta yandi na mbote.’ Keti beto keyela na mambu yai? Konso muntu kevandaka ti mambu yina yandi kele ngolo ve ti yina yandi kele ngolo. Kana beto vandaka ntete ngolo na kumona bifu ya bantu yankaka, keti beto meyela, na mpila nde beto kekinga dyaka ve na kumona bo bonso “bantu ya kukuka”? (Yakobo 3:2) Ntangu yai, kuluta mpila beto vandaka kusala ntete, keti beto kemonaka, to nkutu kusosa mambu yina lenda sadisa beto na kumona bankaka nde bo meluta beto? ‘Mono fwete ndima nde mpangi yai ya nkento meluta mono na kukanga ntima.’ ‘Muntu yina kele ti lukwikilu ya ngolo.’ ‘Na kuta masonga, yandi kelongaka mbote kuluta mono.’ ‘Yandi meluta mono na kudiyala.’ Ziku bantu ya Kolosai vandaka na mfunu ya kuyela na mambu yai. Keti beto mpi fwete yela mutindu mosi?

8, 9. (a) Na nki mutindu Epafrasi kusambaka sambu bantu ya Kolosai ‘kuvanda’ bambuta? (b) ‘Kuvanda bambuta’ kelomba inki na yina metala mambu yina kekwisa?

⁸ Epafrasi kusambaka sambu bantu ya Kolosai ‘kuvanda bambuta.’ Na kutuba ya mbote, Epafrasi vandaka kusamba Nzambi nde kana bantu ya Kolosai kuvandaka Bakristu yina mekuma bambuta, ya kuyela, bo zolaka ‘kuvanda,’ disongidila kubikala kaka bambuta.

⁹ Beto lenda tuba ve nde konso muntu yina mekuma Mukristu, ata nkutu muntu ya kuyela, imene yandi tabikala kaka mutindu yina. Yezu kutubaka nde wanzio mosi yina kuvandaka mwana ya Nzambi ‘kuzingaka na mambu ya kieleka ve.’ (Yoane 8:44) Ebuna Polo kuyibusaka bantu ya Korinto na yina metala bantu ya ntama yina kusadilaka Yehowa bamvula mingi kansi bo bwaka na nima. Yandi kebisaka bampangi bapakulami nde: “Konso muntu yina ke banzaka nde yandi kele ya kutelama, yandi keba; mbaimbai yandi ta bwa.” (1 Korinto 10:12) Mambu yai kemonisa mfunu ya kisambu yina yandi salaka nde bantu ya Kolosai ‘kuvanda bambuta.’ Kana bo mekuma bambuta, ya kuyela mpenza, bo vandaka na mfunu ya kubikala kaka bambuta, kansi ya kuvutuka na nima ve, kuyantika kulemba, to kubwa. (Baebreo 2:1; 3:12; 6:6; 10:39; 12:25) Mpidina, bo zolaka kuvanda “bambuta” na kilumbu ya kusambisa bo mpi ya nkanu ya nsuka.​—2 Korinto 5:10; 1 Piere 2:12.

10, 11. (a) Inki mbandu Epafrasi kupesaka beto sambu na yina metala kusamba? (b) Kana nge tala mambu yina Epafrasi kusalaka, inki lukanu nge tazola kubaka?

¹⁰ Beto tubilaka dezia mfunu ya kutanga bazina ya bantu yankaka na bisambu na beto, mpi kulomba Yehowa mambu ya sikisiki yina yandi lenda sala sambu na kusadisa bo, kupesa bo kikesa, kusakumuna bo, mpi kupesa bo mpeve santu na yandi. Bisambu ya Epafrasi sambu na bantu ya Kolosai vandaka ya mutindu yina. Ebuna beto lenda, to nkutu na kutuba ya mbote, beto fwete mona bangindu ya mbote ya bo mepesa beto na bisambu yango sambu yo sadisa beto na kuzaba nki mambu beto talomba Yehowa sambu na beto mosi. Ntembe kele ve nde, beto fwete lomba Yehowa yandi sadisa beto mosi na ‘kuvanda bambuta.’ Keti nge kesalaka yo?

¹¹ Sambu na nki ve kutubila yandi mambu na nge na kisambu? Zabisa Nzambi kiteso ya ngolo ya nge mesala sambu na kukuma ‘mbuta,’ muntu ya kuyela. Bondila yandi na kusadisa nge na kuzaba bisika yina kelomba nde nge yela na kimpeve. (Nkunga 17:3; 139:23, 24) Ntembe kele ve nde, nge kele ti mambu ya kutomisa. Ebuna, na kisika ya kulemba nitu sambu na mambu yina, bondila Nzambi na masonga yonso, lomba yandi na kusadisa nge na kuyela. Salaka yo mbala na mbala. Sambu na nki ve kubaka desizio nde na mposo yina kekwisa nge tasamba mingi sambu na kulomba nde nge kuma ‘mbuta.’ Yidika manaka sambu na kusala yo dyaka mingi na ntangu ya nge ketadila mukapu ya mvu. Na bisambu na nge, tubila bangindu yina nge kevandaka na yo yina lenda sala nde nge vutuka nima, nge lemba na kimpeve, to nge yambula kusala kisalu ya Nzambi mpi nki mutindu nge lenda buya na kusala mambu yina.​—Efezo 6:11, 13, 14, 18.

Samba sambu na kuvanda na lukwikilu ya ngolo

12. Sambu na nki bantu ya Kolosai vandaka mpenza na mfunu ya “lukwikilu ya ngolo”?

¹² Epafrasi kusambaka dyaka sambu na kima mosi yina bantu ya Kolosai vandaka na yo mfunu sambu nsukansuka Nzambi kundima bo. Yo kele mpi mfunu kiteso mosi sambu na beto. Inki kima yango? Yandi sambaka sambu bo vanda na ‘lukwikilu ya ngolo mpi bo yilama mpenza na kusala konso mambu yina ya Nzambi ke zolaka.’ Bo vandaka kuzinga ti bantu yina vandaka kulonga malongi ya luvunu mpi  bangindu ya mbi, bangindu yango yankaka vandaka kumonana bonso nde yo mekatuka na lusambu ya kyeleka. Mu mbandu, bo pusaka bo na kuzitisa bilumbu yankaka bonso bilumbu ya nene ya bantu vandaka kubuya kudya to bo vandaka kusala bafeti, mutindu yo vandaka kusalama na lusambu ya Bayuda. Balongi ya luvunu vandaka kutula dikebi mingi na bawanzio, bampeve ya ngolo yina Nzambi kusadilaka sambu na kupesa Nsiku na Moize. Yindula ntete nde nge vandaka na nsi ya bupusi ya mutindu yai! Malongi ya luvunu vandaka mingi mpenza.​—Galatia 3:19; Kolosai 2:8, 16-18.

13. Kundima nki kima zolaka kusadisa bantu ya Kolosai, mpi nki mutindu yo lenda sadisa beto?

¹³ Polo kubwisaka malongi yina na mutindu yandi vandaka kutubila mingi kisalu yina Yezu Kristu ke na kusala. “Beno me ndimaka Yesu Kristo bonso Mfumu na beno, yo yina beno fweti zinga na kimvuka ti yandi. Kristo fweti simba beno mutindu misisa ke simbaka nti, mutindu fondasio ke simbaka nzo. Beno vanda na lukwikilu mosi ya ngolo mutindu bo longaka beno.” Ya kyeleka, yo vandaka mfunu nde (bantu ya Kolosai ti beto mpi) kundima mpenza kisalu yina Kristu ke na kusala na kati ya lukanu ya Nzambi mpi na luzingu na beto. Polo kutendulaka nde: “Sambu Nzambi ke monikaka mpenza na kimuntu ya Kristo. Sambu na kimvuka yina ya beno kele ti Kristo, beno me bakaka mambote yonso. Yandi kele Mfumu ya bawanzio yina ke na kiyeka ya mutindu na mutindu.”​—Kolosai 2:6-10.

14. Sambu na nki kivuvu vandaka kima ya kyeleka sambu na bantu yina kuvandaka na Kolosai?

¹⁴ Bantu ya Kolosai kuvandaka Bakristu ya kupakulama na kimpeve. Bo vandaka na kivuvu ya nene, ya kuzinga na zulu, ebuna bo vandaka na bikuma ya mbote ya kusimba ngolo kivuvu yina. (Kolosai 1:5) ‘Nzambi vandaka kuzola’ nde bo vanda na lukwikilu ya ngolo mpi nde kivuvu na bo kuvanda mpenza ya kyeleka. Keti kele na muntu na kati na bo kutulaka ntembe na kivuvu yina? Ve! Keti mambu fwete swaswana bubu yai sambu na bayina yonso kele na kivuvu yina Nzambi mepesaka ya kuzinga na ntoto yina takuma paladisu? Ata fyoti ve! Yo kele pwelele nde kivuvu yai ya nene kele na kati ya “mambu yina Nzambi ke zolaka.” Tala bangyufula yai ntangu yai: Kana nge kesala ngolo sambu na kuvanda na kati ya “kibuka ya nene” yina talanda na kuzinga na nima ya “mpasi ya nene,” keti kivuvu na nge kele mpenza ya kyeleka? (Kusonga 7:9, 14, NW) Keti nge kele na ‘lukwikilu ya ngolo nde yo kele na kati ya mambu yina ya Nzambi ke zolaka’?

15. Inki mambu Polo kutangaka na ntwala ya kutubila kutula ntima?

¹⁵ Ntangu beto ketubila “kutula ntima,” beto ketubila ve ngindu ya mpamba, to ndosi. Beto lenda mona yo na mambu yina Polo kuzabisaka ntete na bantu ya Roma. Na kati ya mambu yango, konso kima yina yandi metubila mesimbama to kenata na kima yankaka yina melanda. Tala kisika Polo metula “kutula ntima” na kutuba na yandi: “Beto ke mona kiese ata beto ke mona mpasi, sambu beto zaba nde, kana muntu kumona mpasi yandi ta longuka na kukanga ntima. Kana muntu kukanga ntima, yandi ta longuka mpi na kuvanda na kikesa ata yandi ke mona mpasi. Ebuna, kana muntu kuvanda na kikesa ata yandi ke mona mpasi, yandi ta longuka mpi na kutula ntima. Kana beto tula ntima, beto ke kudikusa ve, sambu Nzambi tulaka kuzola na yandi na ntima na beto na lusadisu ya mpeve na yandi.”​—Roma 5:3-5.

16. Na nima ya kulonguka kyeleka yina kele na Biblia, inki kivuvu nge kumaka na yo?

¹⁶ Ntangu Bambangi ya Yehowa kuzabisaka nge mbala ya ntete nsangu yina kele na Biblia, kele ti kyeleka yina kusimbaka ntima na nge, mu mbandu mambu yina kekuminaka bafwa to lufutumuku. Sambu na bantu mingi, kima ya kuluta nene ya kusimbaka ntima na bo vandaka mambu yina Biblia ketuba nde luzingu tavanda na ntoto yina takuma paladisu. Yibuka ntangu nge waka dilongi yai mbala ya ntete. Yo kele kivuvu mosi ya kitoko mpenza sambu maladi, kimununu, tavanda dyaka ve, nge lenda zinga mpi kumona kyese ya bambuma ya kisalu na nge, mpi ngemba tavanda sambu na bambisi! (Longi 9:5, 10; Yezaya 65:17-25; Yoane 5:28, 29; Kusonga 21:3, 4) Nge kumaka ti kivuvu mosi ya kitoko mpenza!

17, 18. (a) Inki mutindu mambu yina Polo kutubilaka bantu ya Roma kenata tii na kivuvu? (b) Kivuvu ya nki mutindu bo ketubila na Roma 5:4, 5, mpi keti nge kele na kivuvu ya mutindu yina?

¹⁷ Na nima, nge kutanaka ti kimbeni ya bantu yina vandaka kuzola ve nde nge landa na kulonguka. (Matayo 10:34-39; 24:9) Ata na ntangu na beto, na bansi mingi bantu kubotulaka bima ya Bambangi mingi to kupusa bo na kutina bansi na bo. Bankaka bo kebulaka bo, kubotula mikanda na bo, to kukusila bo makambu na bamwangi nsangu. Ata nge mekutanaka ti kimbeni ya nki mpila, mutindu Roma 5:3 ketuba, nge vandaka kuwa kyese na kati ya mpasi, mpi yo butaka mbuma ya mbote. Nkutu mutindu Polo kusonikaka, mpasi kupesaka nge ngolo ya kukanga ntima. Ebuna, kukanga ntima kusadisaka nge na kuvanda ti kikesa ata nge vandaka kumona mpasi. Nge zabaka nde nge vandaka kusala mambu yina kele ya mbote, nge vandaka kusala luzolo ya Nzambi, yo yina nge vandaka kuwa mpenza nde yandi kendima nge. Mutindu Polo kutubaka, nge bakisaka ntendula ya “kuvanda na kikesa ata [nge] kemona mpasi.” Na nima, Polo kusonikaka dyaka nde “kana muntu kuvanda na  kikesa ata yandi kemona mpasi, yandi ta longuka mpi na kutula ntima.” Yo lenda vanda mpasi na kundima dyambu yai. Sambu na nki Polo kutubilaka “kutula ntima” na nsuka ya mambu yina yandi vandaka kutanga? Keti nge meyantikaka ve kutula ntima tuka ntama, ntangu ya nge waka nsangu ya mbote mbala ya ntete?

¹⁸ Yo kele pwelele nde, awa Polo ketubila ve kivuvu yina beto vandaka na yo ntete ya kuvanda na luzingu ya kukuka. Mambu yandi ketubila meluta, yo kele mpenza ya nene, yo kepesa kikesa mingi. Kana beto kekanga ntima na kwikama yonso mpi beto kebakisa nde Nzambi kendima beto, kivuvu na beto ya ntete kekumaka mingi mpi ngolo. Kivuvu yina beto vandaka na yo mekumaka ntangu yai kyeleka mpenza, ngolo mingi, mpi yo mekumaka ya beto mosi mpenza. Kivuvu yai ya ngolo ke na kumwanga nsemo mingi. Yo kemonanaka na kimuntu na beto, na ma mbu yonso ya beto kesalaka na luzingu. “Kana beto tula ntima, beto ke kudikusa ve sambu Nzambi tulaka kuzola na yandi na ntima na beto na lusadisu ya Mpeve na yandi.”

19. Inki mutindu nge fwete tubilaka kivuvu na nge na bisambu na nge konso mbala?

¹⁹ Kisambu ya masonga ya Epafrasi sambu na bampangi na yandi ya babakala ti ya bankento yina vandaka na Kolosai, vandaka nde mambu yina vandaka kukwisa na ntwala na bo, kusimba ntima na bo mpi bo ndima yo mpenza, na ‘lukwikilu ya ngolo mpi bo yilama mpenza na kusala konso mambu yina ya Nzambi ke zolaka.’ Mutindu mosi mpi bika konso muntu na kati na beto kupusanaka penepene ti Nzambi mbala na mbala sambu na kuzabisa yandi mambu yina metala kivuvu na beto. Na bisambu ya nge kesala nge mosi, tubilaka mpi kivuvu na nge ya metala inza ya mpa. Monisaka Yehowa nde nge kekinga yo mpenza ti lukwikilu ya ngolo nde yo takwisa. Bondilaka yandi sambu yandi sadisa nge na kukumisa lukwikilu na nge ngolo mpi mingi. Mutindu Epafrasi kusambaka sambu bantu ya Kolosai kuvanda na ‘lukwikilu ya ngolo mpi kuyilama mpenza na kusala konso mambu yina ya Nzambi ke zolaka,’ nge mpi salaka mutindu yina. Salaka yo mbala na mbala.

20. Kana bantu yankaka meyambula kulanda nzila ya Bukristu, sambu na nki yo lenda vanda ve kikuma yina lenda lembisa beto nitu?

²⁰ Nge fwete kudiyangisa ve to kulemba nitu sambu bantu yonso ve ke na kukuma bambuta mpi kuvanda ti lukwikilu ya ngolo. Bantu yankaka lenda bwa, kuvila nzila, to kuyambula kyeleka. Mambu yai kusalamaka mpi na kati ya bantu yina kuvandaka penepene ti Yezu, bantumwa na yandi. Kansi ntangu Yudasi kukumaka na ntima ya mbi, keti bantumwa yankaka kuyambulaka to kutinaka Yezu? Ata fyoti ve! Piere kusadilaka mambu yina bo metuba na Nkunga 109:8 sambu na kumonisa nde muntu yankaka zolaka kubaka kisika ya Yudasi. Bo ponaka muntu yankaka sambu na kuyinga yandi, ebuna bantu ya kwikama ya Nzambi landaka kusala kisalu na bo ya kulonga nsangu ya mbote na kikesa yonso. (Bisalu 1:15-26) Bo vandaka na lukanu ya kuvanda kaka bambuta mpi na lukwikilu ya ngolo.

21, 22. Inki mutindu bantu yankaka tamona nde nge kele mbuta mpi ti lukwikilu ya ngolo?

²¹ Zaba nde bantu yankaka mpi tamona nde nge mekuma mbuta mpi ti lukwikilu ya ngolo na kusala mambu yina Nzambi kezolaka. Bo tamonaka yo mpi tawaka kyese. Banani bo yina?

²² Bampangi ya babakala ti ya bankento yina kuzaba mpi kezolaka nge tamona yo. Ata mingi na kati na bo ketuba yo ve, bo tasala mambu yina mefwanana na yina beto ketanga na 1 Tesalonika 1:2-6: “Ntangu yonso beto ke pesaka mersi na Nzambi sambu na beno yonso, beto ke vilaka beno ve na bisambu na beto. Sambu beto ke yibukaka na meso ya Nzambi, Tata na beto, nki mutindu beno songaka lukwikilu na beno, nki mutindu kuzola na beno pusaka beno na kusala ngolo, ti nki mutindu beno ke tulaka kaka ntima na Mfumu na beto Yesu Kristo. . . . Sambu beto zabisaka beno Nsangu ya Mbote na munoko kaka ve kansi na ngolo ya Mpeve ya Nzambi mpi; beto vandaka kutula ntima nde Nsangu yai kele ya kieleka mpenza. . . . Beno landaka mbandu na beto ti yina ya Mfumu Yesu.” Bakristu ya kwikama yina kezinga penepene na nge tawa mpi mutindu mosi ntangu bo kemona nde nge ke na kukuma ‘mbuta na lukwikilu ya ngolo mpi ya kuyilama mpenza na kusala konso mambu yina ya Nzambi ke zolaka.’​—Kolosai 1:23.

23. Lukanu na nge fwete vanda nki na mvula yai?

²³ Kaka mutindu mosi, Tata na nge ya kele na zulu tamona yo, mpi yandi tavanda na kyese. Ndima mambu yai. Sambu na nki? Sambu nge mekuma mbuta na lukwikilu ya ngolo mpi sambu nge keyilama mpenza na kusala ‘konso mambu yina ya Nzambi ke zolaka.’ Polo kusonikilaka bantu ya Kolosai mukanda na kupesa bo kikesa sambu bo vandaka kutambula “mutindu [Yehowa] ke zolaka ti kupesa yandi kiese na mambu yonso.” (Kolosai 1:10) Ee, bantu ya kukonda kukuka lenda pesa mpenza Nzambi kyese. Bampangi na nge ya babakala ti ya bankento ya Kolosai kusalaka yo. Bakristu yina kezingaka penepene na nge ntangu yai ke na kusala yo mpi. Nge mpi lenda sala yo! Yo yina, na mvula yai, bika bisambu na nge ya konso kilumbu mpi mambu yonso ya nge tasalaka mbala na mbala kumonisa nde nge mebaka lukanu ya ‘kuvanda na lukwikilu ya ngolo, ya kuvanda mbuta, mpi ya kuyilama mpenza na kusala konso mambu yina ya Nzambi ke zolaka.’

Keti Nge Lenda Yibuka?

• Inki yo kelombaka sambu nge ‘vanda mbuta’?

• Inki mambu ya metala nge mosi nge fwete tubilaka na bisambu na nge?

• Mutindu Roma 5:4, 5 ketuba, kivuvu ya nki mutindu nge kezola kuvanda na yo?

• Disolo na beto yai mepusa nge na kubaka nki lukanu na mvula yai?

[Bangiufula ya disolo ya kulonguka]

[Kifwanisu ya kele na lutiti 13]

Epafrasi kusambaka nde bampangi na yandi kukuma bambuta, ti lukwikilu ya ngolo na Kristu mpi na kivuvu na bo

[Kifwanisu ya kele na lutiti 16]

Bantu yankaka mingi mpi kele ti kivuvu ya kyeleka mpi lukwikilu ya ngolo bonso ya nge