Sadisa Bantu Yankaka na Kuzinga Mutindu Yehowa Kezolaka

“Beto ke bika ve na kusamba Nzambi sambu na beno. Beto ke lombaka yandi nde [beno] . . . kuzinga mutindu [Yehowa] ke zolaka ti kupesa yandi kiese na mambu yonso. Beno ta salaka mambu ya mbote ya mutindu na mutindu.”​—KOLOSAI 1:9, 10.

1, 2. Inki lenda vanda mpenza nto ya kyese?

 “BETO kezingaka na ferme na nzo mosi yina kele na zulu ya wagon ya beto lenda tambula na yo. Sambu beto kesosaka ve kuvanda ti bima mingi na luzingu, yo kesadisaka beto na kuzwa ntangu ya mingi ya kukwenda kutala bantu mpi kunatila bo nsangu ya mbote. Beto mebakaka balusakumunu mingi na kisalu ya kusadisa bantu mingi na kupesa luzingu na bo na Yehowa.”​—Bakala ti nkento mosi yina kele na kisalu ya ntangu yonso na Afrika ya Sudi bantu kutubaka mambu yai.

² Keti nge kendima ve nde kusadisa bantu yankaka kepesaka kyese? Bantu mingi kemekaka mbala na mbala na kusadisa bambefo, bansukami, to bantu yina kezingaka bo mosi. Bo kevandaka na kyese na kusala yo. Bakristu ya kyeleka kekwikilaka nde kisalu na bo ya kupesa bantu yankaka nzayilu ya Yehowa Nzambi ti ya Yezu Kristu kele lusadisu ya kuluta nene ya bo lenda pesa. Kisalu yai mpamba lenda sadisa bantu yankaka na kundima nkudulu ya Yezu, na kusala kinduku ya mbote ti Nzambi, mpi na nima kuyilama sambu na kubaka luzingu ya kukonda nsuka.​—Bisalu 3:19-21; 13:48.

3. Lusadisu ya nki mutindu kelomba nde beto tudila yo dikebi?

³ Kansi, inki beto lenda tuba sambu na yina metala kusadisa bantu yina kesadilaka dezia Nzambi, bayina kelandaka dezia “Nzila”? (Bisalu 19:9, NW) Ntembe kele ve nde dikebi yina nge ketudilaka bo kele kaka ngolo, kansi yo lenda vanda nde nge kemona ve nki mutindu nge lenda sadila bo dyaka mambu mingi to kulanda na kusadisa bo. To yo lenda vanda nde luzingu na nge kepesa nge ve ntangu mingi ya kusadisa bo, na mpila nde yo kefyotunaka mpi kyese yina nge zolaka kubaka. (Bisalu 20:35) Sambu na mambu yai yonso zole, beto lenda longuka mambu mingi na mukanda ya Kolosai.

4. (a) Polo kuvandaka na wapi ntangu yandi sonikilaka bantu ya Kolosai? (b) Inki kutindaka yandi na kutubila mambu ya metala Epafrasi?

⁴ Ntangu ntumwa Polo kusonikilaka Bakristu ya Kolosai, yandi vandaka na boloko na Roma, kansi yandi vandaka na nswa ya kuyamba bantu yina vandaka kwenda kutala yandi. Mutindu nge lenda yindula yo, Polo kusadilaka kamwa kimpwanza yina sambu na kulonga bantu mambu yina metala Kimfumu ya Nzambi. (Bisalu 28:16-31) Bampangi Bakristu yankaka vandaka kwenda kutala Polo, ntangu yankaka bo kangaka nkutu bankaka kumosi ti yandi. (Kolosai 1:7, 8; 4:10) Mosi na kati na bo vandaka Epafrasi, muntu ya kikesa na kulonga nsangu ya mbote, muntu ya bwala Kolosai na Frizia, na miwanda yina kele na esti ya Efezo na kisanga yina kele na westi ya Azia (kisika insi ya Turquie kele bubu yai). Epafrasi kusalaka ngolo na kukangula dibundu ya Kolosai, mpi yandi salaka mingi sambu na mabundu yina kuvandaka penepene na Laodisea ti Yerapolisi. (Kolosai 4:12, 13) Sambu na nki Epafrasi kwendaka kutala Polo na Roma, mpi nki dilongi beto lenda baka na mvutu yina Polo kupesaka?

Lusadisu ya kyeleka sambu na bantu ya Kolosai

5. Sambu na nki Polo kusonikaka mambu yina yandi sonikilaka bantu ya Kolosai?

⁵ Sambu na kusolula ti Polo mambu yina vandaka kuluta na dibundu ya Kolosai, Epafrasi kusalaka nzyetolo mosi ya mpasi tii na Roma. Yandi zabisaka yandi lukwikilu, zola, ti kikesa yina Bakristu ya Kolosai vandaka na yo na kisalu ya kulonga nsangu ya mbote. (Kolosai 1:4-8) Ntembe kele ve nde, yandi zabisaka mpi Polo basusi yina yandi vandaka na yo sambu na mambu ya mbi yina vandaka kunikisa kimpeve ya bantu ya Kolosai. Polo kupesaka mvutu na mukanda mosi yina yandi sonikaka na ngolo ya mpeve santu sambu na kubwisa malongi yina balongi ya luvunu vandaka kumwanga. Yandi bendaka dikebi na bo mingimingi na kisalu ya nene yina Yezu Kristu fwete sala. a Keti lusadisu na yandi kusukaka kaka  na kutubila mingi bakyeleka ya Biblia? Inki mutindu dyaka yandi zolaka kusadisa bantu ya Kolosai, mpi nki malongi beto lenda baka sambu na kusadisa bantu yankaka?

6. Inki mambu Polo kutubilaka mingi na mukanda na yandi na bantu ya Kolosai?

⁶ Na luyantiku ya mukanda na yandi, Polo kutubilaka mingi mutindu mosi ya lusadisu ya beto lenda mona mpamba. Yo vandaka mutindu ya mbote ya kusadisa bantu yina kele ntama. Polo ti Epafrasi vandaka ntama ti Kolosai. Polo kutubaka nde: “Beto ke sambaka Nzambi, Tata ya Mfumu na beto Yesu Kristo, beto ke pesaka yandi mersi sambu na beno.” Ya kyeleka, yo vandaka bisambu ya ngolo yina yandi vandaka kusala sambu na Bakristu ya Kolosai. Polo keyika nde: “Yo yina, katuka kilumbu yina ya beto waka nsangu na beno, beto ke bika ve na kusamba Nzambi sambu na beno. Beto ke lombaka yandi nde yandi kusonga beno luzolo na yandi mbote-mbote, beno kuvanda na mayele yonso, beno kuzaba mpi mbote-mbote mambu yina ya Mpeve-Santu ke zabisaka beno.”​—Kolosai 1:3, 9.

7, 8. Inki beto ketubilaka mbala mingi na bisambu na beto mosi ti yina beto kewaka na dibundu?

⁷ Beto mezaba nde Yehowa “ke ndimaka bisambu ya bantu,” yo yina beto lenda tula ntima nde yandi kevandaka ya kuyilama na kuwa bisambu na beto yina kewakana ti luzolo na yandi. (Nkunga 65:3; 86:6; Bingana 15:8, 29; 1 Yoane 5:14) Kansi, kana beto kesamba sambu na bantu yankaka, bisambu na beto fwete vanda nki mutindu?

⁸ Beto lenda yindula mpi kusamba mbala na mbala sambu na ‘bampangi na beto yina kele na bansi yonso.’ (1 Piere 5:9) Beto lenda samba Yehowa sambu na Bakristu ti bantu yankaka yina kele na bisika yina bisumbula to mambu ya mawa mebwa. Ntangu balongoki ya mvu-nkama ya ntete kuwaka nde nzala mekota na Yudea, yo fwete vanda nde bo sambaka mingi sambu na bampangi na bo na ntwala nkutu nde bo tinda mbongo sambu na kusadisa bo. (Bisalu 11:27-30) Bubu yai mpi, beto kewaka mbala mingi na balukutakanu na beto ya Bukristu bisambu yina bo kesalaka sambu na bampangi na beto ya inza ya mvimba to sambu na kimvuka ya nene ya bampangi na beto. Yo yina, yo kele mfunu nde bantu yonso kubakisa yo mbote sambu bo tuba na nsuka nde “Amen.”​—1 Korinto 14:16.

Tubila mambu ya sikisiki ntangu nge kesamba

9, 10. (a) Inki bambandu kemonisa nde kutanga bazina ya bantu yina nge mezaba na bisambu kele mbote? (b) Sambu na nki bantu vandaka kusamba sambu na Polo?

⁹ Biblia kepesa beto bambandu ya bisambu yina bantu kusalaka sambu na bantu yankaka mpi yina vandaka kutubila mambu na bo ya sikisiki. Yindula mambu yina Yezu kutubaka na Luka 22:31, 32. Yandi vandaka kisika mosi ti bantumwa na yandi 11 ya kwikama. Bo yonso vandaka na mfunu ya lusadisu ya Nzambi na bampasi yina vandaka kukinga bo na ntwala, ebuna Yezu kusambaka sambu na bo. (Yoane 17:9-14) Kansi, Yezu kutangaka mpenza Piere na zina, mpi yandi bondilaka Nzambi sambu na longoki na yandi yai. Beto tala bambandu yankaka: Elisa kusambaka sambu Nzambi kusadisa muntu mosi, nsadi na yandi. (2 Bantotila 6:15-17) Ntumwa Yoane kusambaka sambu Gayusi kuvanda ngolo na nitu ti na kimpeve. (3 Yoane 1, 2) Bisambu yankaka kutubilaka bimvuka ya bantu ya mezabana mbote.​—Yobi 42:7, 8; Luka 6:28; Bisalu 7:60; 1 Timoteo 2:1, 2.

¹⁰ Mikanda ya Polo ketubilaka mingi bisambu ya sikisiki. Yandi lombaka nde bo samba sambu na yandi to sambu na yandi ti banduku na yandi. Beto ketanga mutindu yai na Kolosai 4:2, 3: “Beno fweti lemba ve na kusamba Nzambi; beno kangula meso, beno pesa yandi mersi ntangu beno ke samba yandi. Beno sambila beto mpi, sambu Nzambi kupesa beto ntangu ya mbote ya kulonga nsangu na yandi, ya kuzabisa mambu ya kinsweki yina kele na Kristo. Mambu yo yina ya mono me kotilaka boloko.” Tala dyaka bambandu yai yankaka: Roma 15:30; 1 Tesalonika 5:25; 2 Tesalonika 3:1; Baebreo 13:18.

11. Ntangu yandi vandaka na Roma, Epafrasi vandaka kusamba sambu na banani?

¹¹ Mambu yai kusalamaka mpi na banduku ya Polo yina vandaka na Roma. “Epafrasi yina kele mpi muntu na beno, yandi me tindila beno mbote. . . . Yandi ke sambaka mpi Nzambi ngolo ntangu yonso sambu na beno.” (Kolosai 4:12) Ngogo ya bo mebalula awa nde ‘kesambaka ngolo’ lenda pesa ngindu ya “kunwana ngolo,” bonso muntu yina kesalaka bangalasisi na bansaka yina bo vandaka kusala na ntangu ya ntama. Keti Epafrasi vandaka kusamba na kikesa yonso kaka sambu na kimvuka ya bampangi yonso ya ntoto ya mvimba to sambu na Bakristu ya kyeleka na kisanga yina kele na westi ya Azia ya mvimba? Polo  kutubaka nde Epafrasi vandaka kusamba mpenza sambu na Bakristu ya Kolosai. Epafrasi kuzabaka mambu yina kubwilaka bo. Beto kezaba bo ve bo yonso na bazina, beto kezaba mpi ve mambu yina bo vandaka kunwana na yo, kansi beto yindula ntete mambu yina bo kutanaka na yo. Ziku Lini vandaka kunwana ti bangindu ya filozofi yina kumwanganaka na ntangu yina, ebuna Rufusi vandaka ti mfunu ya ngolo sambu na kunwana ti bupusi ya kuvutukila mambu yina yandi vandaka kusala na dibundu ya Bayuda. Sambu bakala na yandi vandaka mumpani, Perside vandaka na mfunu ya kukanga ntima mpi mayele sambu na kusansa bana na yandi na malongi ya Mfumu, mpi na kumanisa, keti Asinkrite yina vandaka kubela maladi mosi ya ngolo vandaka na mfunu ya ngolo ya kuluta? Ee, Epafrasi kuzabaka bantu yina kuvandaka na dibundu ya bwala na bo, mpi yandi sambaka na masonga yonso sambu bo zole, yandi ti Polo, kuzolaka nde bantu ya kudipesa ya mutindu yina kutambula mutindu Yehowa kezolaka.

12. Inki mutindu beto lenda tubila mambu ya sikisiki na bisambu na beto mosi?

¹² Keti nge mebakisa mbote mbandu ya bo mepesa beto sambu na yina metala mutindu ya kusadisa bankaka? Mutindu beto mezaba yo, bisambu yina bo kesalaka na balukutakanu ya Bukristu ketubilaka mambu mingi, sambu bantu kevandaka ya mitindu mingi. Kansi bisambu na beto mosi to ya dibuta na beto lenda vanda mpenza ya sikisiki. Ata bantangu yankaka beto lenda lomba Nzambi na kusakumuna bankengi-ntambudi to bangungudi ya kimpeve, keti yo kelomba ve nde beto tubila mpenza mambu ya sikisiki? Mu mbandu, keti yo tavanda ve mbote na kutanga zina ya nkengi ya nzyunga yina mekwisa kutala dibundu na beno to ntwadisi ya Kulonguka ya Mukanda ya Dibundu na beno? Filipi 2:25-28 ti 1 Timoteo 5:23 kemonisa susi yina Polo vandaka na yo sambu na Timoteo ti Epafrasi. Keti beto mpi lenda sala mutindu mosi sambu na bampangi na beto yina kebela, ya beto mezaba na zina?

13. Inki mambu mefwana nde beto tubila yo na bisambu na beto mosi?

¹³ Ya kyeleka, beto fwete kota ve na makambu ya bantu, kansi yo kele mbi ve kana bisambu na beto kemonisa susi ya kyeleka yina beto kele na yo sambu na bantu yina beto mezaba mpi yina kesala beto mpasi na ntima. (1 Timoteo 5:13; 1 Piere 4:15) Mpangi mosi lenda vidisa kisalu na yandi, mpi beto kele ve na mpila ya kupesa yandi kisalu yankaka. Ata mpidina, beto lenda tanga zina na yandi mpi kutubila mpasi yina yandi kemona na bisambu na beto. (Nkunga 37:25; Bingana 10:3) Keti beto mezaba mpangi mosi ya nkento ya kezingaka yandi mosi mpi ya mekuma mbuta kukonda bakala to bana sambu yandi kekingaka kukwela “kaka na Mfumu”? (1 Korinto 7:39, NW) Na bisambu na nge mosi, sambu na nki ve kulomba Yehowa na kusakumuna yandi mpi kusadisa yandi na kulanda kusala kisalu na yandi na kwikama yonso? Beto baka mbandu yankaka, yo levanda nde bankuluntu zole kulongisilaka mpangi mosi yina kusalaka disumu. Keti yo tavanda ve mbote nde konso nkuluntu kutanga zina ya mpangi yina na bisambu na bo mbala na mbala?

14. Inki mutindu bisambu yina ketubila mambu ya sikisiki kele mutindu ya kusadisa bantu yankaka?

¹⁴ Nge kele na ba okazio mingi ya kutanga na bisambu na nge bazina ya bantu yina kele na mfunu ya lusadisu, kikesa, mayele, ti mpeve santu ya Yehowa, to bambuma yina yo kebutaka. Sambu nge kezingaka na kisika ya ntama to sambu na mambu yankaka ya luzingu, mpila ya kusadisa bo ti bima ya kinsuni to ti bima yankaka ya nge kezola kupesa bo lenda monana ve. Kansi, kuvila ve na kusamba sambu na bampangi na nge ya babakala ti ya bankento. Nge zaba nde bo kezolaka kutambula mutindu Yehowa kezolaka, kansi bo lenda vanda mpenza na mfunu ya lusadisu sambu na kusala yo ntangu yonso. Kima ya lenda sadisa bo kele bisambu na nge.​—Nkunga 18:2; 20:1, 2; 34:15; 46:1; 121:1-3.

Sala sambu na kupesa bankaka ngolo

15. Sambu na nki beto fwete tula dikebi na kitini ya nsuka ya mukanda ya Kolosai?

¹⁵ Ya kyeleka, bisambu ya kikesa, ya sikisiki kele ve mutindu mosi kaka ya kusadisa bankaka, mingimingi bayina kezingaka penepene ti nge mpi ya nge  kezolaka. Mukanda ya Kolosai kemonisa yo pwelele. Bantu mingi ya mayele ketubaka nde, na nima ya kupesa bandongisila yina metala malongi ti mutindu dibundu fwete tambula, Polo kutindaka bo mbote. (Kolosai 4:7-18) Kansi, beto monaka nde kitini ya nsuka ya mukanda na yandi kele na bandongisila mingi ya mfunu, mpi beto kele na malongi mingi ya kulonguka na kitini yai.

16, 17. Inki beto lenda tuba sambu na bampangi yina bo metanga bazina na Kolosai 4:10, 11?

¹⁶ Polo kusonikaka nde: “Aristarke yina kele awa na boloko ti mono, yandi me tindila beno mbote. Marko mpi, mpangi ya Barnabasi, me tindila beno mbote. (Bantu ya nkaka me songa beno ntama mambu ya beno fweti sala sambu na Marko: kana yandi kwisa kuna na beno, beno fweti yamba yandi mbote.) Yesu yina ya bo ke bingaka mpi Yustusi me tindila beno mbote. Na kati ya bakristo yina kele mpi Bayuda, bantu yai tatu mpamba ke salaka ti mono sambu na Kimfumu ya Nzambi; bo ke pesaka mono kikesa [“lusadisu,” NW] mingi.”​—Kolosai 4:10, 11.

¹⁷ Polo kutangaka bazina ya bampangi yankaka yina kufwanaka nde bo sikisa bo mpenza. Yandi tubaka nde bo vandaka na kati ya bantu yina bo meyotisaka, yina kuvandaka Bayuda. Bayuda kuvandaka mingi na Roma, mpi ntangu yai bankaka kukumaka Bakristu. Kansi, bayina Polo kutangaka na bazina kusadisaka yandi. Ziku bo vandaka ve na badute na kuvukana ti Bakristu yina kukatukaka na Makanda, mpi yo fwete vanda nde bo vandaka na kyese na kulonga nsangu ya mbote na bantu ya Makanda kumosi ti Polo.​—Roma 11:13; Galatia 1:16; 2:11-14.

18. Inki mutindu Polo kutubaka mambu ya mbote sambu na bantu yina vandaka ti yandi?

¹⁸ Wa mutindu Polo kutubaka: ‘Bakristo yai ke pesaka mono lusadisu mingi.’ Awa Polo kusadilaka ngogo mosi ya Kigreki ya kemonana kaka kisika yai mpamba na Biblia. Babaludi mingi kebalulaka yo nde “kikesa.” Kansi, kele ti ngogo yankaka ya Kigreki (pa·ra·ka·le’o) ya bantu kelutaka kubalula nde “kikesa.” Polo kusadilaka ngogo yai kisika yankaka kaka na mukanda yai, kansi na Kolosai 4:11 ve.​—Matayo 5:4; Bisalu 4:36; 9:31; 2 Korinto 1:4; Kolosai 2:2; 4:8.

19, 20. (a) Inki ntendula ngogo yina Polo kusadilaka sambu na bampangi yina kusadisaka yandi na Roma kele na yo? (b) Yo fwete vanda nde bampangi yina kusadisaka Polo na nki mambu?

 ¹⁹ Yo fwete vanda nde bayina ya Polo kutangaka na bazina kusukaka ve kaka na kupesa yandi kyese ya munoko mpamba. Ngogo ya Kigreki ya bo mebalula nde ‘lusadisu mingi’ na Kolosai 4:11, bo vandaka kusadila yo mbala mingi na mikanda ya inza bonso nkisi sambu na kubelula muntu yina kebela na mabanza. Beto ketanga mutindu yai na Biblia mosi (New Life Version): “Bo sadisaka mono mingi mpenza!” Biblia yankaka (Today’s English Version) kesadila bangogo yai: “Bo vandaka lusadisu mosi ya nene sambu na mono.” Inki kima kibeni bampangi Bakristu yina vandaka kuzinga penepene na Polo kusalaka sambu na kusadisa yandi?

²⁰ Bantu mingi vandaka kwenda kutala Polo, kansi kuvandaka na mambu mingi ya yandi vandaka kuka ve na kusala, bonso kusumba bima ya mfunu ya kuzingila, mu mbandu madya ti bilele sambu na nsungi ya madidi. Inki mutindu yandi zolaka kuzwa barulo sambu na kulonguka na yandi mpi kusumba bima ya kusonikila? (2 Timoteo 4:13, NW) Keti nge keyindula ve nde bampangi yina kusadisaka Polo na kulungisa bampusa na yandi, kusadilaka yandi mambu ya mfunu, mu mbandu, kusumbila yandi bima to kukwenda kusosila yandi yo bisika yankaka? Ziku yandi vandaka na nzala ya kukwenda kutala mpi kupesa kikesa na dibundu mosi. Kansi, sambu yandi vandaka na boloko, mpila ya kusala yo kuvandaka ve, ziku bampangi yina ya babakala kwendaka kutala mabundu na kisika ya Polo, kunatilaka bo bansangu, mpi kuvutukaka ti balapolo. Yai vandaka lusadisu ya nene mpenza!

21, 22. (a) Sambu na nki mambu yina kele na Kolosai 4:11 fwete benda dikebi na beto? (b) Na nki mitindu beto lenda sadila mbandu ya bantu yina kuvandaka ti Polo?

²¹ Mambu yina Polo kusonikaka sambu na yina metala kupesa ‘lusadisu mingi’ kepesa beto mayele ya kemonisa mutindu beto lenda sadisa bantu yankaka. Ata bo ketambulaka mutindu Yehowa kezolaka na mpila bo kezitisaka bansiku na yandi, bo kekwendaka na balukutakanu ya Bukristu, mpi bo kesalaka kisalu ya kulonga nsangu ya mbote. Beto kepesa bo matondo mingi sambu na mambu yina bo kesalaka. Kansi, keti beto lenda sala dyaka mambu yankaka sambu na kupesa bo ‘lusadisu mingi’ mutindu bantu yina kusalaka sambu na Polo?

²² Kana nge mezaba mpangi mosi ya nkento yina kukangamaka na mayele yonso na mambu ya bo ketuba na 1 Korinto 7:37 kansi ya kele ve ti dibuta ntangu yai, keti nge lenda binga yandi ve sambu na  kusala mambu yankaka ti beno na kati ya dibuta na beno, mbala yankaka kubinga yandi na kudya ti beto to kukwenda na mwa feti ti banduku to bampangi na beno? Inki nge keyindula na kubinga yandi sambu beno sala nzyetolo kumosi ti dibuta na nge sambu na kukwenda na lukutakanu ya nene to na kulenga? To beno binga yandi na kufidisa beno ntangu beno kekwenda kusumba madya. Beto lenda sala mambu mingi ya mutindu yai sambu na mifwidi ya bankento ti ya babakala, to bantu yina kekuka dyaka ve na kutambusa kaminio. Kuwa baeksperiansi na bo tapesa beno kyese to mayele mingi na mambu bonso kupona bambuma ya kitoko ya kusumba, to kupona bilele ya bana. (Levi 19:32; Bingana 16:31) Yo lenda kumisa dyaka kinduku na beno ngolo. Ebuna bo lenda wa ve nsoni na kulomba beno lusadisu kana bo kele na mfunu ya nkisi na farmasi, to bima yankaka ya mutindu yina. Bampangi yina kuvandaka ti Polo na Roma kupesaka yandi bima yina kusadisaka mpi kupesaka yandi kikesa mingi, nge mpi lenda sala mutindu mosi. Mutindu yo salaka na ntangu ya ntama mpi bubu yai, lusakumunu yankaka kele nde bansinga ya zola kekumaka ngolo, mpi beto mebakaka lukanu ya ngolo ya kulanda kusadila Yehowa kumosi na kwikama yonso.

23. Yo tavanda mbote nde konso muntu na kati na beto kubaka ntangu na kusala nki?

²³ Konso muntu na kati na beto lenda baka ntangu ya kuyindula mambu ya beto metubila na disolo yai. Yo kele kaka bambandu ya bo mepesa beto, kansi yo lenda sadisa beto na kuzaba na nki mambu beto lenda pesa ‘lusadisu mingi’ na bampangi na beto ya babakala ti ya bankento. Dibanza ya beto kezola kutubila awa kele ve ya kusala mutindu bantu ya ntima ya mbote ya inza kesalaka sambu na kusadisa bankaka kana mpasi ya nene mebwila bo. Bampangi yina bo ketubila na Kolosai 4:10, 11 kuvandaka ve kaka bantu ya ntima ya mbote. Bo vandaka ‘bantu yina kusalaka kumosi sambu na Kimfumu ya Nzambi.’ Lusadisu yina bo vandaka kupesa vandaka kukatuka na mawi yina ya kimpangi. Bika yo vanda mpi mutindu mosi sambu na beto.

24. Inki kikuma ntetentete kepusaka beto na kusamba mpi na kusosa kusadisa bantu yankaka?

²⁴ Beto ketangaka bazina ya bantu yankaka na bisambu na beto mosi mpi kusala ngolo na kusadisa bo sambu na kikuma yai: Beto kekwikilaka nde bampangi na beto ya babakala ti ya bankento kele na nzala ya “kuzinga mutindu [Yehowa] ke zolaka ti kupesa yandi kiese na mambu yonso.” (Kolosai 1:10) Dyambu yai mesimbama na kima yankaka yina Polo kutubilaka ntangu yandi sonikaka mambu yina metala bisambu ya Epafrasi sambu na bantu ya Kolosai, nde bo vanda ‘na lukwikilu ya ngolo, bo vanda bambuta, bo kuyilama mpenza na kusala konso mambu yina ya Nzambi kezolaka.’ (Kolosai 4:12) Inki mutindu konso muntu na kati na beto lenda lungisa mambu yai? Beto tabakisa yo na disolo yina melanda.

[Noti na nsi ya lutiti]

Keti Nge Simbaka?

• Inki mutindu beto lenda sadisa mingi bantu yankaka na bisambu na beto mosi?

• Na nki mutindu Bakristu yankaka vandaka kupesa Polo ‘lusadisu mingi’?

• Na mambu ya nki mutindu beto lenda pesa bankaka ‘lusadisu mingi’?

• Sambu na nki beto kesambaka mpi kesosaka kusadisa bampangi na beto ya babakala ti ya bankento?

[Bangiufula ya disolo ya kulonguka]

[Kifwanisu ya kele na lutiti 11]

Keti beno lenda binga Mukristu yankaka na kubasika ti dibuta na beno kumosi?

[Bangogo ya kemonisa kisina ya foto]

Courtesy of Green Chimney’s Farm