Zola na Nge Kele Nene Nki Kiteso?

“Nge fweti zola mpangi na nge bonso nge mosi.”​—MATAYO 22:39.

1. Kana beto kezolaka Yehowa, sambu na nki beto fwete zola mpi bampangi na beto?

 NTANGU bo yulaka Yezu nki nsiku meluta bansiku yankaka yonso, yandi vutulaka nde: “Nge fweti zola Mfumu Nzambi na nge, na ntima na nge yonso, na luzolo na nge yonso ti na mabanza na nge yonso.” Na nima, yandi pesaka nsiku ya zole ya mefwanana ti yina ya ntete: “Nge fweti zola mpangi na nge bonso nge mosi.” (Matayo 22:37, 39) Ee, zola ya mpangi kele kidimbu ya kuzabila Mukristu. Ya kyeleka, kana beto kezolaka Yehowa, beto fwete zola mpi bampangi na beto. Sambu na nki? Sambu beto kesongaka zola na beto na Nzambi kana beto kelemfuka na Ndinga na yandi, mpi Ndinga na yandi kelombaka beto na kuzola bampangi na beto. Yo yina, kana beto kezola ve bampangi na beto ya babakala ti ya bankento, zola na beto na Nzambi lenda vandaka ve ya kyeleka.​—Roma 13:8; 1 Yoane 2:5; 4:20, 21.

2. Zola ya nki mutindu beto fwete vanda na yo na bampangi na beto?

² Ntangu Yezu kutubaka nde beto fwete zola bampangi na beto, yandi zolaka kutuba mambu mingi kuluta kinduku ya mpamba. Mpi yandi vandaka kutubila zola yina kele ya kuswaswana ti zola yina bantu ya dibuta mosi kevandaka na yo na mabuta to zola ya bakala ti nkento. Yandi vandaka kutubila zola yina Yehowa kele na yo na bansadi na yandi ya mekudipesaka mpi ya bo kele na yo na yandi. (Yoane 17:26; 1 Yoane 4:11, 19) Longi mosi ya Bansiku ya Muyuda, yina, mutindu Yezu kubakisaka, vandaka kutuba na mayele, kundimaka mambu yina Yezu kutubaka nde yandi fwete zola Nzambi “na ntima na yandi yonso, na mabanza na yandi yonso ti na ngolo na yandi yonso.” (Marko 12:28-34) Yandi tubaka masonga. Zola yina Mukristu kekunaka sambu na Nzambi ti na mpangi kelombaka mawi na beto ti ngangu na beto. Beto kewaka yo na ntima mpi mabanza ketwadisaka yo.

3. (a) Inki mutindu Yezu kulongaka “Longi mosi ya Bansiku” na kubakisa mbote nani kele mpangi na yandi? (b) Inki mutindu kingana ya Yezu kelunganaka na Bakristu bubu yai?

 ³ Mutindu Luka kutubaka, ntangu Yezu kutubaka nde beto fwete zola bampangi na beto, “Longi mosi ya Bansiku” kuyulaka yandi nde: “Nani mpangi na mono?” Yezu vutulaka na kingana mosi. Miyibi kubulaka muntu mosi, bo yibaka bima na yandi, mpi bo bikaka yandi penepene na kufwa na lweka ya nzila. Ntete nganga-Nzambi mpi na nima muntu mosi ya dikanda ya Levi kulutaka na ndambu yina kansi bo salaka bonso nde bo memona yandi ve. Na nsuka, muntu mosi ya Samaria kumaka na kisika yina. Yandi monaka muntu yina bo lwadisaka bamputa, ebuna yandi sadisaka yandi. Na kati ya bantu yina tatu nani vandaka mpangi ya muntu yina bo lwadisaka bamputa? Mvutu vandaka pwelele. (Luka 10:25-37) Ziku longi ya Bansiku kuwaka ntima mpasi na kuwa Yezu ketuba nde muntu ya Samaria lendaka kuvanda mpangi ya mbote kuluta nganga-Nzambi ti muntu ya dikanda ya Levi. Yo ke pwelele nde, Yezu vandaka kusadisa muntu yina na kuzola mpangi na yandi na kiteso mosi ya kuluta. Bakristu mpi kezolaka mutindu mosi. Tala bayina yonso ya kubakaka mambote ya zola na bo.

Zola na kati ya dibuta

4. Wapi, ntetentete, Mukristu kesongaka zola na yandi?

⁴ Bakristu kezolaka bantu ya dibuta na bo, bankento kezolaka babakala na bo, babakala kezolaka bankento na bo, bibuti kezolaka bana na bo. (Longi 9:9; Efezo 5:33; Tito 2:4) Ya kyeleka, bantu ya mabuta mingi kevandaka na zola ya bo mebutukaka na yo na kati na bo. Kansi, balapolo ya kufwa makwela, kunyokula bankwelani, mpi bana yina bo kesansa ve mbote to ya bo kebebisa kemonisa nde mabuta kele ve na ngemba bubu yai, mpi nde zola ya bantu ya dibuta mosi kevandaka na yo mefwana ve sambu na kuvukisa bantu na yo ntangu yonso kumosi. (2 Timoteo 3:1-3) Sambu na kununga na luzingu na bo ya dibuta, Bakristu fwete vanda na zola bonso yina Yehowa ti Yezu kele na yo.​—Efezo 5:21-27.

5. Na nani bibuti kesosaka lusadisu sambu na kusansa bana na bo, mpi nki mambote bamingi mebakaka?

⁵ Bibuti yina kele Bakristu kemonaka bana na bo bonso kimvwama yina Yehowa mepesaka, mpi bo kelombaka nde yandi sadisa bo na kusansa bo. (Nkunga 127:3-5; Bingana 22:6) Ntangu bo kesalaka mpidina, bo keyedisaka zola ya Bukristu, yina kesadisaka bo na kutanina bana na bo na bupusi ya mbi yina kebwisaka baleke. Yo kesalaka nde, bibuti mingi yina kele Bakristu kuvanda na kyese bonso yina mama mosi na insi ya Hollande kuvandaka na yo. Na nima ya kutala mbotika ya mwana na yandi ya bakala, yina vandaka na kati ya bantu 575 yina kubakaka mbotika na Hollande na mvula meluta, yandi sonikaka nde: “Ntangu yai, mono mebaka matabisi ya kikesa ya mono salaka na bamvula 20 meluta. Ntangu yai mono mevila nkutu ntangu, mpasi, kikesa, ti mawa yonso ya mono vandaka kuwa.” Yandi kele na kyese mingi na kumona nde mwana na yandi kuponaka, na luzolo na yandi mosi, na kusadila Yehowa. Na mvula meluta, ntalu ya kuluta nene ya bansamuni na Hollande vandaka 31 089, yika mpi bantu mingi yina kulongukaka na kuzola Yehowa ti bibuti na bo.

6. Inki mutindu zola ya Bukristu lenda kumisa makwela ngolo?

⁶ Polo kubingaka zola nde kima yina “ta vukisa beno na kimvuka mosi ya kieleka mpenza,” mpi yo lenda tanina makwela ata na ntangu mavanga mebasika. (Kolosai 3:14, 18, 19; 1 Piere 3:1-7) Ntangu bakala mosi na Rurutu, na kisanga mosi ya fyoti ya kele na kitamina ya bakilometre 700 na insi ya Tahiti, yantikaka kulonguka Biblia ti Bambangi ya Yehowa, nkento na yandi kusepilaka ve ata fyoti. Nsukansuka, nkento yina bakaka bana, yandi bikaka bakala, mpi yandi kwendaka kuzinga na Tahiti. Kansi, bakala kumonisaka zola na yandi na mpila yandi vandaka kutindila bo mbongo mbala na mbala mpi kubinga bo na telefone sambu na kuyula nki kima yandi ti bana vandaka na yo mfunu. Ebuna, yandi vandaka kusala ngolo na kulungisa mikumba na yandi ya Bukristu. (1 Timoteo 5:8) Yandi vandaka kusamba mbala na mbala sambu dibuta na yandi kuvukana dyaka, nsukansuka nkento na yandi kuvutukaka. Ntangu nkento kuvutukaka, bakala vandaka kuzinga ti yandi na ‘zola, na kukanga ntima, mpi na pima yonso.’ (1 Timoteo 6:11) Na mvu 1998, yandi bakaka mbotika mpi na nima, yandi vandaka na kyese mingi ntangu nkento na yandi ndimaka na kulonguka Biblia. Nkento yina vandaka na kati ya bantu 1 351 yina kulongukaka Biblia na mvula meluta na teritware yonso yina biro ya filiale ya Tahiti ketalaka.

7. Mutindu bakala mosi na Allemagne kutubaka, inki kukumisaka makwela na yandi ngolo?

⁷ Na Allemagne, bakala mosi kubuyaka nde nkento na yandi kulonguka kyeleka ya Biblia, mpi yandi vandaka kuyindula nde Bambangi ya Ye howa vandaka sosa kunata nkento na yandi na nzila ya mbi. Kansi, na nima, yandi sonikilaka Mbangi yina kusolulaka na mbala ya ntete ti nkento na yandi nde: “Matondo mingi mpila nge sadisaka nkento na mono na kuzaba Bambangi ya Yehowa. Ntete, mono vandaka kumona mpasi na ntima sambu mono mewaka mambu mingi ya mbi ya bo ketubaka sambu na bo. Kansi ntangu yai, na nima ya kukwenda na balukutakanu ti nkento na mono, mono mebakisa nde mono vandaka kusala mbi mpenza. Mono mezaba nde mono ke na kuwa kyeleka, mpi yo mekumisa makwela na beto ngolo mingi.” Na kati ya Bambangi ya Yehowa 162 932 yina kele na Allemagne, mpi 1 773 yina kele na bisanga yina biro ya filiale ya Tahiti ketalaka, mabuta yina kezingaka na bumosi mpi ya kezolaka Nzambi kele mingi.

Beto zola bampangi na beto Bakristu

8, 9. (a) Nani kelongaka beto na kuzola bampangi na beto, mpi zola kepusaka beto na kusala nki? (b) Pesa mbandu ya kemonisa mutindu zola lenda sadisa bampangi na kusadisana.

⁸ Polo kutubaka na Bakristu ya Tesalonika nde: “Nzambi me zabisaka beno mosi nki mutindu beno fweti zolana beno na beno.” (1 Tesalonika 4:9) Ya kyeleka, bantu yina ‘Mfumu Nzambi kelongaka’ kezolanaka. (Yezaya 54:13) Zola na bo kemonanaka na bisalu, mutindu Polo kumonisaka yo ntangu yandi tubaka nde: “Beno sadisana na ntima ya kuzolana.” (Galatia 5:13; 1 Yoane 3:18) Mu mbandu, bo kesalaka yo, ntangu bo kekwendaka kutala bampangi na bo ya babakala ti ya bankento yina kebela, kupesa kikesa na bantu yina ke na kunyokwama na mabanza, mpi kusadisa bantu yina ke na lukwikilu ya ngolo ve. (1 Tesalonika 5:14) Zola ya kyeleka ya Bukristu ya beto kele na yo kesadisaka na kuyedisa paladisu na beto ya kimpeve.

⁹ Na Dibundu ya Ancón, mosi na kati ya mabundu 544 yina kele na insi ya Équateur, bampangi kusongaka zola na bo na bisalu. Mpasi ya mbongo kusalaka nde bampangi kuvandaka dyaka ve ti kisalu to mbongo. Yo yina, sambu na kuzwa mwa mbongo, bansamuni kubakaka desizio ya kuyantika kuteka madya na mpimpa na bantu yina vandaka kwenda kuloba bambisi na ntangu bo mevutuka. Bo yonso vandaka kusala kisalu yina, ti bana na bo. Bo vandaka kuyantika na 1:00 ya suka na mpila nde na 4:00 ya suka, ntangu balobi-mbisi vandaka kuvutuka, bo kuta madya ya kulamba dezia. Bampangi vandaka kukabula mbongo ya bo vandaka kubaka na kulandaka bampusa ya konso muntu. Kusadisana mutindu yai vandaka kusonga zola ya Bukristu ya kyeleka.

10, 11. Inki mutindu beto lenda songa zola na bampangi yina beto mezaba ve?

¹⁰ Kansi, zola na beto kesukaka ve kaka na Bakristu yina beto mezaba. Ntumwa Piere kutubaka nde:  “Beno zola kimvuka yonso ya bampangi.” (1 Piere 2:17, NW) Beto kezolaka bampangi na beto yonso ya babakala ti ya bankento sambu beto kesambilaka Yehowa Nzambi kumosi ti bo. Ntangu ya mpasi lenda vanda okazio ya mbote ya kusonga zola ya mutindu yai. Mu mbandu, na mvula ya kisalu 2000, masa kufulukaka mingi na insi ya Mozambique, mpi bitumba yina kemanaka ve na Angola kukumisaka bampangi mingi bansukami. Ntalu ya nene ya bampangi 31 725 ya Mozambique mpi 41 222 ya Angola kenyokwamaka sambu na mambu yai. Yo yina, Bambangi ya insi ya Afrika ya Sudi ya kele penepene kutindaka bima mingi sambu na kufyotuna mpasi ya bampangi na bo na bansi yina. Luzolo na bo ya kupesa “bima yina meluta na zulu” (NW) na bampangi na bo yina vandaka na mpasi kumonisaka zola na bo.​—2 Korinto 8:8, 13-15, 24.

¹¹ Zola kemonanaka dyaka, ntangu bampangi na bansi mingi kepesaka maboko na kisalu ya kutunga Banzo ya Kimfumu ti Banzo ya Balukutakanu ya Nene na bansi yina kele na mbongo mingi ve. Bisanga Salomon kele mbandu mosi. Ata mavanga kevandaka mingi, kuyela kuvandaka ya 6 na kati ya nkama na mvula. Ntalu ya kuluta nene ya bansamuni kuvandaka 1 697. Bo vandaka na mfunu ya Nzo ya Balukutakanu ya Nene. Ata bantu mingi ya bisanga yina vandaka kutina insi na bo sambu na mavanga, bansadi ya luzolo ya mbote kukatukaka na Australie sambu na kusadisa bo na kisalu yina ya kutunga. Na nsuka, yo lombaka nde bansadi yina ya luzolo ya mbote kuvutuka, kansi na ntwala ya kukwenda bo longaka ntete bampangi yina kezingaka na insi yai mutindu ya kubika kumanisa fondasio. Bo vandaka kusadila bima ya kusala dezia yina vandaka kukatuka na Australie, mpi kana nzo yai ya kitoko ya kusambila kumana, na ntangu bantu yankaka ke na kukanga bisalu na bisika ya bo ketungaka banzo, yo tavanda kimbangi ya mbote na zina ya Yehowa mpi na zola ya bampangi na beto.

Bonso Nzambi, beto kezolaka bantu yonso

12. Inki mutindu beto kesalaka bonso Yehowa na ntwala ya bantu yina beto kele na bo ve lukwikilu mosi?

¹² Keti zola na beto kesukaka kaka na bantu ya mabuta na beto ti na bampangi na beto ya kimpeve? Mvutu kele nde ve, kana beto ke ‘salaka bonso Nzambi.’ Yezu tubaka nde: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” (Beto bantu metengimisa bisono; Efezo 5:1; Yoane 3:16) Bonso Yehowa Nzambi, beto kesalaka mambu na zola yonso na bantu yonso, ti bantu yina beto kele na bo ve lukwikilu mosi. (Luka 6:35, 36; Galatia 6:10) Yo yina, beto kelongaka nsangu ya mbote ya Kimfumu mpi kezabisaka bantu yankaka kima ya kuluta nene ya zola yina Nzambi kusalaka.  Yo lenda sala nde konso muntu yina tawa mambu yai yandi guluka.​—Marko 13:10; 1 Timoteo 4:16.

13, 14. Pesa mwa baeksperiansi ya bampangi yina kumonisaka zola na bantu yina kele ve Bambangi, ata yo vandaka mpasi na kusala yo.

¹³ Baka mbandu ya bapasudi-nzila ya nene iya na insi ya Népal. Bo tindaka bo na mbanza mosi na ndambu ya sudi-westi ya insi yina, na bamvula tanu ya meluta. Bo monisaka zola na bo na mpila bo kangaka ntima mpi kulonga na mbanza yina ti na babwala yina kele na nzyunga yina. Sambu na kusala na teritware na bo yonso, bo ketambulaka bangunga mingi na velo na nsi ya mwini ya ngolo tii na badegre Celsius 40. Zola na bo mpi kikalulu na bo ya “kulanda kaka na kusala [kisalu] ya mbote,” butaka bambuma ya mbote yina kumonanaka ntangu bo kangulaka kimvuka ya kulonguka mukanda na bwala mosi. (Roma 2:7) Na Marsi 2000, bantu 32 kwisaka kuwa diskure ya bantu yonso yina nkengi ya nzyunga yina kwisaka kutala bo kusalaka. Ntalu ya kuluta nene ya bansamuni na Népal vandaka 430 na mvula meluta. Ntalu yai kesonga kuyela ya 9 na kati ya nkama. Yo ke pwelele nde Yehowa ke na kusakumuna kikesa ti zola yina bampangi ya insi yina kemonisa.

¹⁴ Na Colombie, bapasudi-nzila ya nene ya ntangu fyoti kwendaka kulonga bantu ya Inde yina bo kebingaka nde ba Wayuu. Sambu na kusala yo, yo lombaka nde bo longuka ndinga mosi ya mpa, kansi zola yina bo monisaka kupesaka bambuma ya mbote ntangu, ata mvula ya ngolo kunokaka, bantu 27 kukwendaka na diskure ya bantu yonso. Kikesa mpi zola yina bapasudi-nzila yai kusongaka kuyikaka mwa kima na kuyela ya 5 na kati ya nkama yina kusalamaka na Colombie mpi ntalu ya kuluta nene ya bansamuni kukumaka 107 613. Na Danemark, mpangi mosi ya nkento ya mekuma mununu zolaka kubasika na kisalu ya bilanga, kansi yandi vandaka kuka kutambula ve sambu na kimbefo. Yandi lembaka ve, yandi yantikaka kusolula ti bantu na kusonikilaka bo mikanda. Ntangu yai, yandi kesolulaka ti bantu 42 na mikanda mpi yandi kelongukaka Biblia ti bantu 11. Yandi kele na kati ya ntalu ya kuluta nene ya bansamuni 14 885 yina kupesaka lapolo na mvula meluta na Danemark.

Zola bambeni na Nge

15, 16. (a) Yezu tubaka nde beto fwete zola banani dyaka? (b) Inki mutindu bampangi yina kele na biyeka kusalaka na zola yonso na kusadisa muntu yina kutubaka luvunu sambu na Bambangi ya Yehowa?

¹⁵ Yezu kusongaka longi ya Bansiku nde yandi fwete baka mpi muntu ya Samaria bonso mpangi na yandi. Na Disolo na yandi na zulu ya Ngumba, Yezu kwendaka nkutu ntama ntangu yandi tubaka nde: “Beno me waka nde Nzambi tubilaka beno nde: ‘Zola mpangi na nge, kansi menga mbeni na nge.’ Kansi mono ke tubila beno nde: Beno zola bambeni na beno, samba Nzambi sambu na bantu yina ke monisaka beno mpasi. Mpidina beno ta vanda mpenza bana ya Tata na beno yina kele na zulu.” (Matayo 5:43-45) Ata muntu mosi kezola beto ve, beto kemekaka ‘kusala mambu ya mbote sambu na kubedisa mambu ya mbi.’ (Roma 12:19-21) Kana mpila kele, beto kezabisaka yandi kima ya kuluta mfunu ya beto kele na yo, kima yango kele kyeleka.

¹⁶ Na insi ya Ukraine, disolo mosi yina kubasikaka na zulunalu mosi (Kremenchuk Herald) kutubaka nde Bambangi ya Yehowa kele kadibundu mosi ya kigonsa. Yo vandaka dikambu mosi ya nene sambu na Eropa, bantu yankaka ketubilaka Bambangi ya Yehowa mutindu yina sambu na kunata bantu na kubuya bisalu ya Bambangi to kukangisa yo. Ebuna, bampangi yina kele ti biyeka kwendaka kusolula ti muntu yina kubasisaka disolo yina mpi bo lombaka yandi na kubasisa disolo yankaka ya ketuba masonga. Yandi ndimaka, kansi na disolo yai, yandi yikaka nsa mosi sambu na kumonisa nde disolo yina yandi basisaka ntete vandaka kutuba mambu ya kyeleka. Bampangi kwendaka dyaka kusolula ti yandi ebuna bo pesaka yandi bansangu mingi. Na nsuka, muntu yango kubakisaka nde disolo ya ntete vandaka kutuba luvunu, ebuna yandi basisaka disolo yankaka yina kubwisaka masolo yina ya ntete. Kusolula ti yandi na masonga mpi na malembe yonso vandaka mutindu ya mbote ya kuyidika dikambu yai, mpi yo butaka bambuma ya mbote.

Inki mutindu beto lenda yedisa zola?

17. Inki kemonisa nde yo kevandaka ve pete ntangu yonso na kusadila bantu yankaka mambu na zola?

¹⁷ Kana mwana mebutuka, bibuti na yandi kesukininaka ve na kuzola yandi. Kusala mambu na zola yonso na bambuta kesalamaka ve ntangu yonso na mbala mosi. Ziku yo yina Biblia kelombaka beto mbala na mbala na kuzolana. Yo kele kima ya beto fwete sala ngolo na kuyedisa. (1 Piere 1:22; 4:8; 1 Yoane 3:11) Yezu kuzabaka nde zola na beto tamekama ntangu yandi tubaka nde beto fwete lolula mpangi na beto “mbala makumi nsambwadi  na nsambwadi.” (Matayo 18:21, 22, NW) Polo mpi kulongisilaka beto na “kukanga ntima.” (Kolosai 3:12, 13) Mpila ya kuyituka kele ve kana yandi kesonga beto nde: “Beno fweti vanda na kuzola na ntima.” (1 Korinto 14:1) Inki mutindu beto lenda sala yo?

18. Inki tasadisa beto na kuyedisa zola na bantu yankaka?

¹⁸ Ntetentete, beto fwete vila ve zola yina beto kele na yo na Yehowa Nzambi. Zola yai kele kima ya ngolo ya kepusaka beto na kuzola bampangi na beto. Sambu na nki? Sambu kana beto kesala mutindu yina, yo kemonisaka mbote kikalulu yina Tata na beto ya zulu kele na yo mpi yo kepesaka yandi lukumu mpi nkembo. (Yoane 15:8-10; Filipi 1:9-11) Ya zole, beto lenda meka na kumona mambu mutindu Yehowa kemonaka yo. Konso ntangu ya beto kesalaka masumu, beto kesumukaka na Yehowa; kansi, yandi kelembaka ve na kulolula beto mpi yandi kelandaka na kuzola beto. (Nkunga 86:5; 103:2, 3; 1 Yoane 1:9; 4:18) Kana beto yedisa kikalulu ya kumona mambu mutindu Yehowa kemonaka yo, yo tasadisa beto na kuzola bantu yankaka mpi kulolula bo na mambi yina bo kesala beto. (Matayo 6:12) Ya tatu, beto fwete zingaka ti bantu yankaka mutindu beto kezola nde bo zinga ti beto. (Matayo 7:12) Sambu beto kele bantu ya kukonda kukuka, beto kevandaka ntangu yonso na mfunu ya ndolula. Mu mbandu, kana beto metuba mambu yina kepesa bankaka mpasi na ntima, beto ketulaka kivuvu nde bo tayibuka nde konso muntu kesalaka mbala na mbala masumu ti ludimi na yandi. (Yakobo 3:2) Kana beto kezola nde bantu yankaka kuzinga ti beto na zola yonso, beto mpi fwete zinga ti bo na zola yonso.

19. Inki mutindu beto lenda sosa lusadisu ya mpeve santu sambu na kuyedisa zola?

¹⁹ Ya iya, beto lenda sosa lusadisu ya mpeve santu sambu zola kele mosi na kati ya bambuma ya mpeve. (Galatia 5:22, 23) Mbala mingi, kinduku, zola yina bantu ya dibuta mosi kevandaka na yo, mpi zola ya nkento ti bakala kekwisaka na mbala mosi. Kansi beto kele na mfunu ya lusadisu ya mpeve ya Yehowa sambu na kuyedisa zola yina Yehowa kele na yo, zola yina kekangisaka beto na kimvuka mosi. Beto lenda sosa lusadisu ya mpeve santu na kutangaka Biblia. Mu mbandu, kana beto longuka mambu ya ketubila luzingu ya Yezu, beto tamona nki mutindu yandi vandaka kuzinga ti bantu, mpi beto talonguka nki mutindu kulanda mbandu na yandi. (Yoane 13:34, 35; 15:12) Dyaka, beto lenda lomba Yehowa mpeve santu na yandi, mingimingi na mambu yina beto kekukaka ve kusala na zola yonso. (Luka 11:13) Sambu na kumanisa, beto lenda landa na kusonga zola na ntangu beto kekangama na dibundu ya Bukristu. Kuvanda na bampangi ya babakala ti ya bankento yina kele na zola kesadisaka beto mpi na kuyedisa zola.​—Bingana 13:20.

20, 21. Inki mutindu ya kuluta nene ya kesonga zola Bambangi ya Yehowa kusadilaka na mvula ya kisalu 2000?

²⁰ Na mvula meluta, ntalu ya kuluta nene ya bansamuni ya nsangu ya mbote vandaka 6 035 564 na inza ya mvimba. Bambangi ya Yehowa kulutisaka na kimvuka bangunga 1 171 270 425 na kusosabantu sambu na kuzabisa bo nsangu ya mbote. Kele zola kusadisaka bo na kukanga ntima mpi kulanda kisalu yai na kati ya mwini, mvula, mpi madidi. Kele zola kupusaka bo na kutubila banduku na bo ya nzo-nkanda ti ya kisalu mpi kusolula ti bantu ya bo mezabana na bo ve na babalabala mpi na bisika yankaka. Bantu mingi yina Bambangi kwendaka kutala vandaka kusepela ve, mwa ndambu kubuyaka. Kansi, bankaka kusepilaka, na mpila nde Bambangi kusalaka bamvutukilu ya mpa 433 454 049 mpi bo longukaka Biblia ti bantu 4 766 631. a

²¹ Kisalu yai yonso vandaka mutindu ya kuluta mbote ya kemonisa zola yina Bambangi ya Yehowa kele na yo na Nzambi na bo mpi na bampangi na bo! Zola yina tamana ve ata fyoti. Beto ketula ntima nde na mvula ya kisalu 2001, beto tata dyaka kimbangi mingi kuluta na bantu. Bika lusakumunu ya Yehowa kulanda na kukumina bantu na yandi ya kwikama mpi ya kikesa yina kesambilaka yandi na ntangu bo ‘kesala kisalu na bo yonso ti kuzola na ntima’!​—1 Korinto 16:14.

[Noti na nsi ya lutiti]

Keti Nge Lenda Tendula?

• Mbandu ya nani beto kelandaka kana beto kezola mpangi na beto?

• Na banani dyaka beto fwete songa zola na beto?

• Pesa mwa baeksperiansi ya kemonisa zola ya Bukristu.

• Inki mutindu beto lenda yedisa zola ya Bukristu?

[Bangiufula ya disolo ya kulonguka]

 [Tablo ya kele na lutiti 28-31]

LAPOLO YA BAMBANGI YA YEHOWA YA INZA YA MVIMBA YA MVULA YA KISALU 2000

 (Tala Nzozulu ya Nkengi ya papie)

[Bifwanisu ya kele na lutiti 25]

Zola ya Bukristu lenda sadisa dibuta na kuvanda na bumosi

[Bifwanisu ya kele na lutiti 26]

Zola kepusaka beto na kuzabisa bankaka kivuvu ya beto kele na yo