Beno Yambula Ve na Kusala Kisalu ya Kukatula Bambuma!

“Bantu yina ke dilaka ntangu bo ke kunaka bima na bilanga, bo ta vandaka na kiese ntangu bo ta katulaka yo.”​—NKUNGA 126:5.

1. Sambu na nki beto fwete “bondila munkwa-bilanga na kutinda bantu ya nkaka ya kisalu” bubu yai?

 NA NIMA ya nzyetolo na yandi ya tatu ya kulonga nsangu ya mbote na Galilea, Yezu Kristu kusongaka balongoki na yandi nde: “Bambuma mingi kele na bilanga, kansi bantu ya kisalu kele mingi ve sambu na kukatula yo.” (Matayo 9:37) Yo vandaka mutindu mosi na Yudea. (Luka 10:2) Mambu yai kusalamaka kiteso ya bamvula 2 000 meluta, kansi nki beto lenda tuba bubu yai? Na mvula ya kisalu ya meluta, Bambangi ya Yehowa kuluta bamilio sambanu (6 000 000) kuyambulaka ve na kusala kisalu ya kukatula bambuma ya kifwani na kati ya bantu bamiliare sambanu (6 000 000 000) ya kezingaka na zulu ya ntoto ya mvimba. Mingi na kati na bo kele “bonso mameme me konda ngungudi ya kutala bo.” Yo yina, ndongisila ya Yezu ya ‘kubondila munkwa-bilanga na kutinda bantu ya nkaka ya kisalu sambu na kukatula bambuma na yandi’ kele kaka mfunu tii bubu yai mutindu yo vandaka bamvu-nkama mingi meluta.​—Matayo 9:36, 38.

2. Inki kesalaka nde bantu kutula dikebi na bo na beto?

² Yehowa Nzambi, Munkwa-bilanga, mendimaka na kutinda bantu mingi ya kisalu. Ebuna, yo ke kyese mingi na kusala kisalu ya kukatula bambuma ya Nzambi ke na kutwadisa! Ata beto kele mingi ve kana beto fwanisa ntalu na beto ti ya bantu ya makanda, kikesa ya beto kevandaka na yo na kulonga nsangu ya Kimfumu mpi na kukumisa bantu balongoki kebendaka dikebi ya bantu ya ntoto ya mvimba. Na bansi mingi bo ketubilaka beto mbala na mbala na bazulunalu, na radio to na televizio. Na ntangu bantu kesalaka nsaka na televizio, kana ngunga ya kyelo mebula, yo kelutaka kupusa bo na kuyindula nde Bambangi ya Yehowa mekwisa kutala bo. Ya kyeleka, kisalu na  beto ya Bukristu ya kele bonso kisalu ya kukatula bambuma ya kifwani mezabanaka mbote na mvu-nkama yai ya 21.

3. (a) Inki mutindu beto mezaba nde kisalu ya kulonga Kimfumu yina kusalamaka na mvu-nkama ya ntete kubendaka dikebi ya bantu? (b) Sambu na nki beto lenda tuba nde bawanzio ke na kusadisa beto na kisalu na beto?

³ Bantu kumonaka mpi bisalu ya kulonga nsangu ya Kimfumu yina vandaka kusalama na mvu-nkama ya ntete mpi bo monisaka bansamuni ya nsangu ya mbote mpasi. Yo yina, ntumwa Polo kusonikaka nde: “Sambu mono banza nde, beto bantumwa, Nzambi me pesaka beto kisalu mosi ya nsuka na bisalu yonso. Beto [bantumwa] kele bonso bantu yina ya bo me kangaka na kufwa bo na meso ya bantu yonso: bawanzio yonso ti bantu yonso ke tala ntangu bo ke fwa beto.” (1 Korinto 4:9) Mutindu mosi, sambu beto kele bansamuni ya Kimfumu ya kelembaka ve ata bantu kemonisa beto mpasi, kisalu na beto kebendaka mpi dikebi ya bantu mpi yo kele mfunu mingi sambu na bawanzio. Kusonga 14:6 ketuba nde: “Mono [ntumwa Yoane] monaka wanzio ya nkaka ke kwenda kuluta na kati-kati ya zulu; yandi vandaka na Nsangu ya Mbote ya mvula na mvula sambu na kuzabisa na bantu ya nsi-ntoto, na bantu ya makanda yonso ti ya bandinga yonso ti ya bansi yonso.” Ya kyeleka, bawanzio ke na kusadisa beto mpenza na kisalu na beto ya kukatula bambuma!​—Baebreo 1:13, 14.

“Bantu Yonso Ta Menga Beno”

4, 5. (a) Inki mutindu Yezu kukebisaka balongoki na yandi? (b) Sambu na nki ‘bantu kemengaka’ bansadi ya Nzambi ya bubu yai?

⁴ Ntangu Yezu kutindaka bantumwa na yandi na kusala kisalu ya kukatula bambuma, bo landaka malongi yina yandi pesaka bo na ‘kuvanda mayele bonso bambuluku kansi na ntima ya pima [mpembe] bonso bapizio.’ Yezu kuyikaka nde: “Beno keba mbote, sambu ke na bantu ya nkaka ta kanga beno, bo ta nata beno na bazuzi, ebuna bo ta bula beno fimbu na banzo na bo ya bisambu. Beno ta kwenda kusamba na meso ya baguvernere ti na meso ya bantotila sambu na mono. Mpidina beno ta zaba kupesa kitemwe na beno na meso na bo ti na meso ya bantu yina kele Bayuda ve. . . . Bantu yonso ta menga beno sambu na mono. Kansi muntu yina ta kanga ntima tii na nsuka, yandi ta guluka.”​—Matayo 10:16-22.

⁵ ‘Bantu yonso ke mengaka beto’ bubu yai sambu “nsi-ntoto kele na maboko ya Muntu ya Mbi,” Satana Dyabulu, mbeni ya ntete ya Nzambi mpi ya bantu na Yandi. (1 Yoane 5:19) Bambeni na beto kemonaka kimvwama na beto ya kimpeve kansi bo kebuyaka na kundima nde Yehowa muntu kepesaka beto yo. Bo kemonaka kyese ya beto kevandaka na yo na ntangu beto kesalaka kisalu ya kukatula bambuma. Bo keyitukaka mingi mpenza na kumona bumosi yina kele na kati na beto! Na kuta masonga, bo lenda ndima yo kukonda mpasi kana bo mekwenda na insi yankaka, ebuna bo mona mutindu Bambangi ya Yehowa ya insi yina kesala mambu kiteso mosi ti Bambangi ya insi na bo. Ya kyeleka, beto kezaba nde na ntangu yina mefwana bambeni na beto tazaba Yehowa, nsadisi na beto mpi muntu ya kevukisaka beto.​—Ezekiele 38:10-12, 23.

6. Inki kima beto kendimaka mpenza na ntangu beto kesalaka kisalu ya kukatula bambuma, kansi nki ngyufula yo kebasisa?

⁶ Munkwa-bilanga mepesaka Mwana na yandi, Yezu Kristu, “kiyeka yonso na zulu ti awa na nsi-ntoto.” (Matayo 28:18) Yo yina, Yehowa kesadilaka Yezu sambu na kutwadisa kisalu ya kubuka bambuma na nsadisa ya bawanzio yina kele na zulu ti “mpika ya kwikama mpi ya mayele” ya kupakulama awa na zulu ya ntoto. (Matayo 24:45-47, NW; Kusonga 14:6, 7) Kansi, inki mutindu beto lenda nunga kimbeni ya bambeni na beto mpi kuvanda kaka na kyese na ntangu beto kelanda na kusala kisalu ya kukatula bambuma?

7. Inki dibanza beto fwete sala ngolo na kuvanda na yo kana bambeni kemonisa beto mpasi?

⁷ Ntangu beto mekutana ti kimbeni to nkutu bantu kemonisa beto mpasi na nku yonso, beto fwete sosa lusadisu na Nzambi na mpila nde beto kuka kuvanda ti dibanza bonso yina Polo kuvandaka na yo. Yandi sonikaka nde: “Ntangu bantu ke fingaka beto, beto ke sakumunaka bo. Ntangu bo ke monisaka beto mpasi, beto ke kangaka kaka ntima. Ntangu bo ke vwenzaka beto, beto ke pesaka bo bamvutu ya kiese.” (1 Korinto 4:12, 13) Mbala mingi, dibanza yai, ti kisalu ya beto kesalaka na mayele yonso, kepusaka bambeni na beto na kubalula bangindu na bo.

8. Inki mambu ya kundimisa Yezu kutubilaka beto na Matayo 10:28?

⁸ Ata ntitisa ya lufwa kekatulaka ve kikesa na beto ya kusala kisalu ya kukatula bambuma. Beto kezabisaka pwelele kibeni nsangu ya Kimfumu na meso ya bantu yonso kukonda boma. Ebuna beto kebakaka kikesa na mambu ya kundimisa yai ya Yezu kutubaka: “Beno kuwa boma ve sambu na bantu yina ke fwaka nitu kansi bo lenda fwa moyo ve; kansi beno tina Nzambi boma; yandi muntu lenda fwa moyo ti nitu na [Gehenna, NW].” (Matayo 10:28) Beto kezaba nde Tata na beto ya zulu kele Mupesi ya luzingu.  Yandi kepesaka matabisi na bantu yina kebikalaka ya kwikama na yandi mpi ya keyambulaka ve na kusala kisalu ya kukatula bambuma.

Nsangu ya Luguluku

9. Inki bantu yankaka kusalaka ntangu bo waka mambu yina Ezekiele kutubaka, mpi inki mutindu dyambu ya mutindu mosi ke na kusalama bubu yai?

⁹ Ntangu profete Ezekiele kuzabisaka bansangu ya Yehowa na kikesa yonso na ‘bantu ya mubulu,’ bimfumu ya Izraele ti Yuda, bantu yankaka kusepilaka na kuwa mambu yina yandi tubaka. (Ezekiele 2:3) Yehowa kutubaka nde: “Na meso na bo, bo ke mona nge bonso muntu yina zaba kuyimba ti kubula gitare mbote. Bo ke waka mambu na nge yonso kansi bo ke landaka yo ve.” (Ezekiele 33:32) Ata bo ndimaka mambu yina Ezekiele kutubaka, bo landaka yo ve. Inki mambu ke na kusalama bubu yai? Na ntangu bapakulami ti bampangi na bo ke na kuzabisa bansangu ya Yehowa na kikesa yonso, bantu yankaka kezolaka kuwa mambu ya mbote yina Kimfumu tasala, kansi bo kendimaka yo ve na ntonda yonso, bo kezolaka ve kukuma balongoki, mpi kusala kisalu ya kukatula bambuma.

10, 11. Na kitini ya ntete ya mvu-nkama ya 20, inki bametode bampangi kusadilaka sambu na kuzabisa nsangu ya luguluku, mpi nki yo butaka?

¹⁰ Kansi, bantu mingi mendimaka na kusala kisalu ya kukatula bambuma mpi kekwendaka kuzabisa bansangu ya Nzambi. Mu mbandu, na balukutakanu ya nene ya Bukristu yina kusalamaka banda na mvu 1922 tii 1928, bo zabisaka pwelele bandola yina luyalu ya mbi ya Satana tabaka. Baradio mingi kutubilaka mambu yina yonso bo longaka na balukutakanu yina. Ntangu fyoti na nima, bantu ya Nzambi kukabisaka bakopi mingi ya bansangu yina.

¹¹ Na nsuka ya bamvu 1930, bo yantikaka kusadila metode yankaka ya kuta kimbangi: bo kumaka kutambula na babalabala sambu na kuzabisa bantu nsangu. Na luyantiku, bantu ya Yehowa kulwataka bapancarte yina vandaka kuzabisa badiskure ya bantu yonso yina tasalama. Na nima, bo kumaka kutambula ti bapancarte yina vandaka ti bangogo bonso “Dibundu kele mutambu mpi yo kekusa bantu na mayele ya mbi” mpi “Beno Sadila Nzambi ti Kristu, Ntotila.” Ntangu bo vandaka kuluta na babalabala, bo vandaka kubenda dikebi ya bantu yina vandaka kutambula. Mpangi mosi yina vandaka kusala kisalu yai mbala na mbala na bisika ya mumbongo ya Londres, na Angleterre kutubaka nde ‘Kusala mutindu yai kunataka bantu na kutula dikebi mingi na Bambangi ya Yehowa ebuna yo pesaka bo kikesa.’

12. Katula bansangu ya kusambisa ya Nzambi, beto kebendaka dikebi ya bantu na nki na kisalu na beto, mpi banani kesala ntangu yai kumosi kisalu ya kuzabisa nsangu ya mbote?

¹² Na ntangu beto kezabisaka bansangu ya kusambisa ya Nzambi, beto kebendaka dyaka dikebi ya bantu na mambu ya mbote yina nsangu ya Kimfumu kesilaka. Kimbangi ya beto ketaka na kikesa yonso na ntoto ya mvimba, kesadisaka beto na kusosa bantu yina mezola kuyamba beto. (Matayo 10:11) Mingi na kati ya bantu ya nsuka ya kimvuka ya bapakulami kundimaka na kusala kisalu ya kukatula bambuma na bamvu 1920 ti bamvu 1930. Na nima, na lukutakanu ya distrike ya mvu 1935, bo zabisaka nsangu ya kyese ya metala luzingu ya mbote yina “kibuka ya nene” ya “mameme ya nkaka” tavanda na yo na bilumbu kekwisa na paladisu ya ntoto. (Kusonga 7:9, NW; Yoane 10:16) Bo mewaka bansangu ya kusambisa ya Nzambi mpi bo kesalaka kumosi ti bapakulami na kuzabisa nsangu ya mbote ya luguluku.

13, 14. (a) Inki kikesa beto kebaka na mambu yina kele na Nkunga 126:5, 6? (b) Kana beto landa na kukuna mpi kulosa masa, inki kima tasalama?

¹³ Mambu yina ke na Nkunga 126:5, 6 kepesa kikesa mingi na bantu yina kesala kisalu ya Nzambi ya kukatula bambuma, mpi mingimingi bayina bo kemonisaka mpasi: “Bantu yina ke dilaka ntangu bo ke kunaka bima na bilanga, bo ta vandaka na kiese ntangu bo ta katulaka yo. Ntangu bo ke kwenda kukuna bima na bilanga, bo ke kuna ti mansanga na meso; ntangu bo ke kwenda kukatula bima na bilanga, bo ke kwisa kuvutuka ti bankunga ya kiese.” Kukuna ti kukatula bima ya bilanga yina muyimbi-bankunga ketubila kele dikebi mpi lusakumunu yina Yehowa kupesaka na bantu yina kubikalaka, disongidila, bayina kukatukaka na kimpika na Babilone ya ntama. Bo vandaka na kyese mingi ntangu bo katukaka na kimpika, kansi yo lenda vanda nde bo vandaka kudila ntangu bo vandaka kukuna nkeni na ntoto yina bo yambulaka mpi ya bo sadilaka ve bamvula 70 yonso yina bo salaka na insi ya banzenza. Kansi, bayina kulandaka na kusala bisalu na bo ya kukuna mpi kutunga kusepilaka ti bambuma mpi kyese ya kisalu na bo.

¹⁴ Beto lenda dila na ntangu bo kemonisa beto mpasi to ntangu beto to bampangi na beto kenyokwama sambu bo kesala mambu ya lunungu. (1 Piere 3:14) Na ntangu beto kesala kisalu na beto ya kukatula bambuma, beto lenda mona mpasi na luyantiku sambu yo kemonanaka bonso nde beto kele ve na kima ya kesonga nde bikesa ya beto kesala na kisalu na beto ke na kubuta bambuma. Kansi, kana  beto landa na kukuna mpi kulosa masa, Nzambi tayedisa bima, mbala mingi yandi kesalaka yo kuluta kiteso ya beto keyindula. (1 Korinto 3:6) Dyambu yai kemonana pwelele na kiteso ya ba Biblia ti mikanda ya ketendulaka Masonuku ya beto kekabulaka.

15. Pesa mbandu mosi ya kesonga mfunu ya mikanda ya Bukristu na kisalu ya kukatula bambuma.

¹⁵ Beto baka mbandu ya muntu mosi. Zina na yandi Jim. Ntangu mama na yandi kufwaka, yandi sengumunaka mukanda La vie: comment est-elle apparue? Évolution ou Création? a na kati ya bima yina mama na yandi kubikisaka. Yandi tangaka yo ti dikebi mpenza. Ntangu yandi solulaka ti Mbangi mosi na balabala, Jim kundimaka nde Mbangi yina kuvutukila yandi dyaka, ebuna bo yantikaka na kulonguka Biblia. Jim kuyelaka nswalu na kimpeve, yandi kudipesaka na Yehowa, mpi yandi bakaka mbotika. Yandi zabisaka bantu yankaka ya dibuta na yandi mambu yina yandi longukaka. Yo salaka nde, mbuta na yandi ya nkento ti ya bakala kukuma Bambangi ya Yehowa. Na nima, Jim kukumaka kusala kisalu ya luzolo ya mbote ya ntangu yonso na Betele ya Londres.

Bo Monisaka Bo Mpasi Kansi Bo Vandaka na Kyese

16. (a) Sambu na nki kisalu ya kukatula bambuma kesalamaka mbote? (b) Inki lukebisu Yezu kupesaka na yina metala mambu yina nsangu ya mbote kenataka, kansi ti inki dibanza beto kekwendaka kusolula ti bantu?

¹⁶ Sambu na nki kisalu ya kukatula bambuma kesalama mbote mutindu yai? Sambu Bakristu ya kupakulama ti bampangi na bo kelemfukaka na mambu yina Yezu kutubaka: “Mambu yina ya mono ke tubila beno na mpimpa, beno fweti tuba yo na mwini; mambu yina ya beno ke wa na kinsweki, beno fweti zabisa yo na meso ya bantu.” (Matayo 10:27) Kansi, beto fwete zaba nde beto tamona mpasi, sambu Yezu kukebisaka beto mutindu yai: “Bantu ta pesa bampangi na bo mosi na maboko ya bambeni sambu na kufwa bo, batata mpi ta sala mutindu mosi na bana na bo. Bana ta kuma bambeni ya batata ti ya bamama na bo, bo mpi ta fwa bo.” Yezu kuyikaka dyaka nde: “Beno banza ve nde mono kwisaka sambu na kunata ngemba awa na nsi-ntoto; mono kwisaka kunata ngemba ve, kansi mono kwisaka kunata mbele ya bitumba.” (Matayo 10:21, 34) Yo kezola kutuba ve nde Yezu kuzolaka nde mabuta kukabwana. Kansi mbala mingi nsangu ya mbote vandaka kusala nde mambu yina kusalama mpidina. Yo kele mpi kiteso mosi sambu na bansadi ya Nzambi bubu yai. Ntangu beto kekwendaka kutala mabuta mingi, beto kevandaka ve ti ngindu ya kunatila bo mavwanga yina lenda kabisa bo. Mpusa na beto kevandaka nde bantu yonso kuyamba nsangu ya mbote. Yo yina, beto kesalaka kikesa sambu na  kusolula ti bantu yonso ya mabuta na mutindu mosi ya mbote mpi bonso banduku, na mpila nde nsangu na beto kusimba bayina ‘mefwana na kuvanda na moyo ya mvula na mvula.’​—Bisalu 13:48.

17. Inki mutindu bayina kekotilaka kimfumu ya Nzambi kele ya kugambula, mpi nki mbandu kemonisa yo?

¹⁷ Nsangu ya Kimfumu megambulaka bantu yina kekotilaka kimfumu ya Nzambi. Mu mbandu, tala mutindu bampangi na beto kumonisaka nde bo vandaka ya kuswaswana sambu bo pesaka ‘bima ya Kaisala na Kaisala, bima ya Nzambi na Nzambi’ na ntangu régime nazi vandaka kuyala na Allemagne. (Luka 20:25) Kansi sambu na kumonisa nde bo vandaka ya kuswaswana ti bamfumu ya mabundu mpi Bakristu ya zina yina kele na mabundu ya Kikristu, bansadi ya Yehowa kukangamaka kaka ngolo na lukwikilu na bo, bo buyaka na kufwa minsiku ya Biblia. (Yezaya 2:4; Matayo 4:10; Yoane 17:16) Profesere Christine King, ya kusonikaka mukanda mosi (The Nazi State and the New Religions), kutubaka nde: “Luyalu [ya Nazi] kunungaka ve na ntwala ya Bambangi ya Yehowa mpamba, sambu ata bo fwaka bo mingi, kisalu vandaka kusalama kaka, ebuna, na Mayi 1945, muvuma ya Bambangi ya Yehowa vandaka kuzinga dyaka, kansi parti national-socialisme kuvandaka dyaka ve.”

18. Inki mabanza bantu ya Yehowa kevandaka na yo ata bo kemonisa bo mpasi?

¹⁸ Ya kyeleka, mabanza yina bansadi ya Yehowa kevandaka na yo na ntangu bo kemonisaka bo mpasi kele na ntendula ya nene mpenza. Ata bamfumu ya ntoto yai lenda yituka na kumona lukwikilu na beto, bo keyitukaka na kumona nde beto kevandaka ve ti bangindu ya mbi sambu na bo to kukangila bo kimbeni na ntima. Mu mbandu, Bambangi yina kugulukaka ntangu luyalu ya Nazi vandaka kufwa bo (lufwa yina mezabanaka na zina ya Holocauste), kemonisaka mbala na mbala kyese na bo na ntangu bo keyindulaka mambu yina bo kutanaka na yo na luzingu na bo. Bo kezabaka nde Yehowa kupesaka bo “ngolo ya nene.” (2 Korinto 4:7) Bakristu ya kupakulama yina kele na kati na beto ketulaka ntima nde ‘bazina na bo kele ya kusonika na zulu.’ (Luka 10:20) Kukanga ntima na bo kepesaka kivuvu yina kelembisaka ve nitu, mpi bantu ya kwikama yina kesalaka kisalu ya kukatula bambuma mpi ya kele ti kivuvu ya kuzinga na ntoto kevandaka mpi ti kivuvu ya mutindu mosi.​—Roma 5:4, 5.

Beto Landa na Kusala Kisalu ya Kukatula Bambuma

19. Inki bametode ya mbote beto kesadilaka na kisalu ya Bukristu?

¹⁹ Beto kezaba ve ntangu ikwa Yehowa tapesa beto nzila ya kulanda na kusala kisalu ya kukatula bambuma ya kifwani. Awa ya yandi mebikila beto ntangu, beto fwete vila ve nde bantu yina kesalaka kisalu ya kukatula bambuma kesadilaka bametode ya mezabana mbotembote sambu na kusala kisalu na bo. Mutindu mosi, beto lenda tula ntima nde kwikama na beto na kusadila bametode yina bo memekaka mpi ya memonanaka ya mbote na kisalu ya kulonga tasadisa beto mingi. Polo kuzabisaka  bampangi na yandi Bakristu nde: “Mono ke bondila beno na kulanda mbandu na mono.” (1 Korinto 4:16) Ntangu Polo kukutanaka ti bankuluntu ya Efezo na Mileti, yandi yibusaka bo nde yandi lembaka ve na ‘kulonga bo nsangu ya mbote na meso ya bantu yonso ti na banzo na bo.’ (Bisalu 20:20, 21) Timoteo, nduku ya Polo kuzabaka bametode yina ntumwa vandaka kusadila ebuna yo sadisaka yandi na kuzaba mutindu ya kusolula ti bantu ya Korinto. (1 Korinto 4:17) Nzambi kusakumunaka bametode yina Polo vandaka kusadila na kulonga. Yandi tasakumuna beto mpi kana beto landa kaka na kulonga bantu yonso nsangu ya mbote nzo na nzo, na kuvutukila bo, na kulonguka Biblia ti bo, mpi na kwendaka kusosa bantu na bisika yonso yina beto lenda kutana ti bo.​—Bisalu 17:17.

20. Inki mutindu Yezu kumonisaka nde kisalu mosi ya nene ya kukatula bambuma ya kimpeve tasalama na nima ya ntangu fyoti, mpi nki mutindu dyambu yai melunganaka na bamvula ya mekatuka kuluta?

²⁰ Na nima ya kuta kimbangi na nkento mosi ya Samaria penepene ti Sikare na mvu 30 ya T.B., Yezu kutubilaka kisalu ya kukatula bambuma ya kimpeve. Yandi zabisaka balongoki na yandi nde: “Beno tala mbote bilanga: bambuma me yela, ntangu me kuma penepene na kukatula yo. Muntu yina ke kwendaka kukatula bambuma, na ntangu yo yina yandi ke bakaka mpi salere na yandi; yandi ke katulaka bambuma sambu na moyo ya mvula na mvula. Mpidina muntu yina ke kunaka ti muntu yina ke katulaka bambuma, bo yonso zole lenda vanda kiese na kimvuka.” (Yoane 4:34-36) Ziku Yezu kubakisaka dezia mambu yina tasalama na nima ya kukutana na yandi ti nkento yina ya Samaria, sambu bantu mingi kukwikilaka na yandi na nima ya kuwa mambu ya nkento yina kuzabisaka bo. (Yoane 4:39) Na bamvula meluta, bansi mingi kukatulaka nsiku yina vandaka kubuyisa Bambangi ya Yehowa na kusala kisalu na bo to kupesaka bo nswa ya kuzabana na nsiku ya leta, ebuna mambu yai mekangulaka bilanga ya mpa sambu na kisalu ya kukatula bambuma. Yo yina, kisalu mingi ya kukatula bambuma ya kimpeve ke na kukwenda na ntwala. Ya kyeleka, na ntoto ya mvimba, beto ke na kubaka balusakumunu mingi na kisalu ya kukatula bambuma ya kimpeve ya beto kesala na kyese yonso.

21. Sambu na nki beto kele na kikuma ya mbote ya kuyambula ve na kusala kisalu ya kyese ya kukatula bambuma?

²¹ Kana bimenina metela mpi mefwana na kukatula, bantu yina kekatula yo fwete sala kisalu yango nswalunswalu. Bo fwete sukinina ve na kusala yo. Bubu yai, beto fwete sala na kikesa yonso mpi nswalunswalu sambu beto kezinga na “ntangu ya nsuka.” (Daniele 12:4) Ya kyeleka, beto kekutanaka ti mambu mingi ya mpasi, ata mpidina kisalu ya kuvukisa bantu yina kesambilaka Yehowa kesalama na kiteso mosi ya mesalamaka ntete ve. Yo yina, yo kele kilumbu ya kyese. (Yezaya 9:3) Ebuna, sambu beto kele bantu ya kesalaka na kyese yonso, beto yambula ve na kusala kisalu ya kukatula bambuma!

[Noti na nsi ya lutiti]

Inki Mutindu Nge Tavutula?

• Inki mutindu Munkwa-bilanga kundimaka na kutinda bantu ya kisalu mingi?

• Ata bantu “kemengaka beto,” inki kikalulu beto kevandaka na yo kaka?

• Sambu na nki beto kevandaka na kyese ata bo kemonisa beto mpasi?

• Sambu na nki beto fwete lemba ve na kusala kisalu ya kukatula bambuma nswalunswalu?

[Bangiufula ya disolo ya kulonguka]

[Kifwanisu ya kele na lutiti 15]

Kutambula ti bapancarte kubendaka dikebi ya bantu na nsangu ya Kimfumu

[Kifwanisu ya kele na lutiti 15]

Beto kekunaka nkeni mpi kelosaka masa, kansi Nzambi keyedisaka yo

[Kifwanisu ya kele na lutiti 17]

Bawanzio kesadisaka bantu yina kesalaka kisalu ya kukatula bambuma ya kimpeve