Bangyufula ya Batangi

Inki “kupema” bo ketubila na Baebreo 4:9-11, mpi nki mutindu muntu lenda “kota na kisika ya kupema yango”?

Ntumwa Polo kusonikaka mutindu yai na Bakristu ya Baebreo ya mvu-nkama ya ntete: “Mpidina ke songa nde bantu ya Nzambi ta pema; kupema yina ya bo ta pema yo ta vanda bonso kupema yina Nzambi pemaka na kilumbu ya nsambwadi. Sambu konso muntu yina ke pema kisika mosi ti Nzambi yandi ke bikisaka na kusala kisalu na yandi, mutindu Nzambi bikisaka na kusala kisalu na yandi sambu na kupema. Beto sala ngolo mpenza sambu beto kwenda kupema kisika mosi ti Nzambi.”​—Baebreo 4:9-11.

Ntangu Polo kutubilaka kupema yina Nzambi pemaka na kisalu na Yandi, yo ke pwelele nde yandi vandaka kutubila mambu yina kele na Kuyantika 2:2, kisika beto ketanga nde: “Na kilumbu ya nsambwadi Nzambi salaka diaka ve, yandi pemaka.” Sambu na nki Yehowa ‘kupemaka na kilumbu ya nsambwadi’? Na kutuba ya mbote, yo vandaka ve sambu yandi vandaka na mfunu ya kubaka dyaka ngolo “sambu na bisalu yonso ya yandi salaka.” (NW) Verse ya kelanda kepesa mvutu nde: “Yandi [Nzambi] sakumunaka kilumbu yai ya nsambwadi, yandi kumisaka yo kilumbu na yandi, sambu kilumbu yo yina yandi manisaka kusala kisalu na yandi yonso, yandi pemaka.”​—Kuyantika 2:3; Yezaya 40:26, 28.

“Kilumbu ya nsambwadi” kuvandaka kilumbu mosi ya kuswaswana ti bilumbu sambanu yina kulutaka sambu yo vandaka kilumbu ya Nzambi kusakumunaka mpi ya yandi kumisaka kilumbu mosi ya santu, disongidila, kilumbu ya yandi tulaka na kingenga, to ya yandi bumbaka, sambu na lukanu mosi ya sipesiali. Inki vandaka lukanu yango? Ntetentete, Nzambi kuzabisaka lukanu na yandi sambu na bantu mpi sambu na ntoto. Na bakala ya ntete mpi na nkento na yandi, Nzambi kutubaka nde: “Beno buta bana mingi, mpidina bana na beno ta zingaka na bisika yonso ya nsi-ntoto ti kuyala yo. Beno yala bambisi ya masa, bandeke ti bambisi yonso ya nsi-ntoto.” (Kuyantika 1:28) Ata bantu ti ntoto kuvandaka ya kukuka ntangu Nzambi kugangaka yo na luyantiku, yo zolaka kubaka ntangu mwa mingi sambu na kuyala ntoto ya mvimba mpi kukumisa yo paladisu ya kufuluka ti bantu ya kukuka, mutindu Nzambi kukanaka yo. Yo yina, na “kilumbu ya nsambwadi,” Nzambi kupemaka, to kubikaka kusala, bima yankaka na ntoto sambu na kupesa nzila na bima yina yandi salaka dezia yo yela sambu na kulungisa luzolo na yandi. Na nsuka ya “kilumbu” yango, mambu yonso ya Nzambi kukanaka takuma mambu ya kyeleka. Kupema yango tasala bilumbu ikwa?

Kana beto vutukila bangogo ya Polo na Baebreo, beto kemona nde yandi tubaka nde ‘bantu ya Nzambi tapema na kilumbu ya nsambwadi’ mpi yandi pesaka bampangi na yandi Bakristu kikesa na kusala ngolo mpenza ‘sambu na kwenda kupema’ na kisika yango. Dyambu yai kemonisa nde ntangu Polo kusonikaka bangogo yai, “kilumbu ya nsambwadi” ya Nzambi kupemaka, yina kuyantikaka kiteso ya bamvula 4000 na ntwala, vandaka kulanda kaka. Yo tamana ve tii kuna lukanu ya Nzambi ya ketadila bantu mpi ntoto kulungana kimakulu na nsuka ya Luyalu ya Bamvula Funda Mosi ya Yezu Kristu, yina kele “Mfumu ya Kilumbu ya Kupema.”​—Matayo 12:8; Kusonga 20:1-6; 21:1-4.

Sambu yandi vandaka kuyindula kivuvu yina, Polo kutendulaka nki mutindu muntu lenda kota na kilumbu ya kupema ya Nzambi. Yandi sonikaka nde: “Konso muntu yina ke pema kisika mosi ti Nzambi yandi ke bikisaka na kusala kisalu na yandi.” Dyambu yai kesonga beto nde ata bo vandaka ya kukuka na luyantiku, bantu yonso kukotaka ve na kupema kisika mosi ti Nzambi. Sambu Adami ti Eva kuzitisaka ve kupema ya Nzambi na “kilumbu ya nsambwadi” na mutindu bo buyaka kundima mambu yina yandi yidikilaka bo. Na kifulu ya kusala yo, bo kolamaka mpi bo zolaka kuvanda na kimpwanza na ntwala ya Nzambi. Nkutu, bo landaka mambu yina Satana kusongaka bo na kisika ya kundima lutwadisu ya Nzambi ya zola. (Kuyantika 2:15-17) Yo yina, bo vidisaka lukanu ya kuzinga mvula na mvula na paladisu ya ntoto. Banda na ntangu yina tii bubu, bantu yonso mekumaka bampika ya masumu mpi ya lufwa.​—Roma 5:12, 14.

Kukolama ya bantu kubalulaka ve lukanu ya Nzambi. Kilumbu na yandi ya kupema kelanda kaka. Kansi, Yehowa kuyikaka kima mosi ya kemonisa mpenza zola na yandi. Kima yango kele nkudulu, yina Mwana na yandi, Yezu Kristu zolaka kupesa na mpila nde konso muntu yina tandima yo na lukwikilu na yandi, lenda tula ntima nde bo takatuka na kimpika mpi kupema na kilo ya masumu mpi ya lufwa. (Roma 6:23) Yo yina Polo kukebisaka bampangi na yandi Bakristu na ‘kubikisa na kusala kisalu na bo.’ Bo fwete ndima kima ya Nzambi meyidikaka sambu bo guluka mpi bo sala ve mambu mutindu bo mosi mezola sambu na luzingu na bo ya bilumbu kekwisa bonso Adami  ti Eva kusalaka. Yo lombaka dyaka nde bo buya na kulanda kusala bisalu na bo mosi sambu na kudisonga nde bo kele bantu ya mbote.

Kubuya kulanda banzila ya bwimi mpi ya inza sambu na kusala luzolo ya Nzambi kepesaka mpenza kikesa mpi kepemisaka muntu. Yezu kupesaka imvitasio yai nde: “Beno kwisa na mono, beno yonso bantu yina me lemba, sambu beno ke nata kilo ya nene, ebuna mono ta pesa beno ntangu ya kupema. Beno baka kilo na mono, beno nata yo; beno vanda balonguki na mono, sambu mono kele muntu ya pima, mono kele muntu ya ntima ya mbote; ebuna beno ta zaba kupema. Kilo yina ya mono ta pesa beno yo kele mpasi ve na kunata yo, sambu yo kele kilo mingi ve.”​—Matayo 11:28-30.

Disolo ya Polo yina ketadila kupema ya Nzambi mpi mutindu muntu lenda kota na kupema yango kupesaka mpenza kikesa na Bakristu ya Baebreo ya kuvandaka na Yeruzalemi, yina kumonaka mpasi mpi ya bo vandaka kuseka sambu na lukwikilu na bo. (Bisalu 8:1; 12:1-5) Kiteso mosi, bangogo ya Polo lenda pesa Bakristu kikesa bubu yai. Sambu beto kebakisa nde lusilu ya Nzambi ya kutula paladisu na ntoto na kiyeka ya Kimfumu na yandi ya lunungu mekuma penepene, beto mpi fwete pema na bisalu na beto mpi kusala ngolo mpenza sambu na kukota na kupema yango.​—Matayo 6:10, 33; 2 Piere 3:13.

[Bifwanisu ya kele na lutiti 31]

Lusilu ya Nzambi ya kutula paladisu na ntoto tasalama na nsuka ya kilumbu na yandi ya kupema