Inki Mutindu Nge Lenda Sadisa Mwana Yina ‘Mevila’?

“Beto sepela, sambu . . . yandi vilaka, kansi yandi me monika diaka.”​—LUKA 15:32.

1, 2. (a) Inki mutindu bana yankaka mesalaka na ntwala ya kyeleka ya Bukristu? (b) Inki mutindu bibuti ti bana yina mebwila mambu ya mutindu yina lenda kudiwa na ntima?

 “MU KEBASIKA na dibundu!” Yo kevandaka mpasi kibeni sambu na bibuti ya kebangaka Nzambi yina kusalaka kikesa na kusansa mwana na bo na nzila ya kyeleka na kuwa yandi kezabisa bo mambu ya mutindu yai! Bana yankaka ‘kevilaka nzila’ kukonda kutuba bangindu na bo pwelele. (Baebreo 2:1) Bana mingi ya mutindu yai mefwanana na mwana ya kuvilaka ya kingana ya Yezu, yina kubikisaka nzo ya tata na yandi mpi kwendaka kubebisa kimvwama na yandi yonso na insi mosi ya ntama.​—Luka 15:11-16.

² Ata dyambu yai kekuminaka ve Bambangi ya Yehowa yonso, sambu na bayina kekutanaka na yo, yo kevandaka mpasi kibeni na kukatula bo mawa yina bo kevandaka na yo na ntima. Beto vila mpi ve mpasi yina mwana ya mutindu yai lenda mona sambu na nzila ya mbi yina yandi mepona. Na kati ya ntima na yandi, kansansa lenda yangisa yandi. Kingana ya Yezu kemonisa nde nsukansuka, mwana yina kuvilaka “yantikaka kuyindula luzingu na yandi,” ebuna yo pesaka tata na yandi kyese. Inki mutindu bibuti ti bantu yankaka na kati ya dibundu lenda sadisa bana yina ‘keyantikaka kuyindula luzingu na bo’?​—Luka 15:17.

Sambu na Nki Bana Yankaka Kebasikaka na Dibundu?

3. Tanga mwa bikuma yina lenda sala nde mwana kubaka desizio ya kubasika na dibundu ya Bukristu.

³ Bana mingi kibeni kesadilaka Yehowa na kyese  na dibundu ya Bukristu. Kansi, sambu na nki bankaka kebasikaka? Bo lenda yindula nde bo kekonda kima mosi ya mbote yina inza kepesaka. (2 Timoteo 4:10) To bo lenda mona nde bansiku melutana mingi na lupangu yina Yehowa metulaka sambu na kutanina mameme na yandi. Mambu bonso kansansa ya menata makambu, mpusa ya ngolo ya kuvanda ti makangu, to mpusa ya kusosa nde banduku kuzola yandi, lenda sala nde leke mosi kubasika na kibuka ya Yehowa. Mwana lenda yambula na kusadila Nzambi kana yandi kemona bonso nde bibuti na yandi to Bakristu yankaka ketambula dikulu mosi na nganda yankaka na kati.

4. Inki kikuma ya kuluta nene ya kesalaka mbala mingi nde bana kuvila nzila?

⁴ Mbala mingi ntu-ngolo mpi kikalulu ya kukolama kele bidimbu ya kemonisaka nde mwana kebela na kimpeve, yo kemonisaka mambu yina kele na ntima na yandi. (Bingana 15:13; Matayo 12:34) Ata kikuma ya menata mwana na kuvila nzila kuvanda nki yo, kisina ya makambu kevandaka mbala mingi sambu yandi kele ve na “nzayilu ya sikisiki ya kyeleka.” (2 Timoteo 3:7, NW) Na kisika ya kulanda kusambila Yehowa na zuluzulu kaka sambu na kusepedisa bantu, yo kele mfunu mingi nde baleke kuyedisa bo mosi kinduku ya ngolo ti Nzambi. Inki kima tasadisa bo na kusala kinduku yango?

Kwenda Penepene na Nzambi

5. Inki kima kele mfunu sambu na mwana yina kezola kusala kinduku ya ngolo ti Nzambi?

⁵ Longoki Yakobi kusonikaka nde: “Beno kwenda penepene na Nzambi, ebuna yandi ta kwisa penepene na beno.” (Yakobo 4:8) Sambu na kusala yo, yo kelombaka kusadisa mwana na kuzola Ndinga ya Nzambi. (Nkunga 34:8) Na luyantiku, yandi tavanda na mfunu ya “mabele,” disongidila, malongi ya petepete ya Biblia. Kansi na ntangu yandi meyantika kusepela na Ndinga ya Nzambi mpi meyantika kuzola “madia ya ngolo” fyotifyoti, yandi tasukinina ve na kubakisa mambu ya mudindu ya kimpeve mpi na kuyela na kimpeve. (Baebreo 5:11-14; Nkunga 1:2) Mwana mosi ya kundimaka nde yandi kudikotisaka mingi mpenza na luzingu ya inza, yantikaka na kubakisa valere ya mambu ya kimpeve. Inki kusadisaka yandi na kuvutuka na nzila? Ntangu yandi ndimaka na kusadila ndongisila ya kutanga Biblia ya mvimba yina bo pesaka yandi, yandi salaka ngolo na kuzitisa programe na yandi ya kutanga Biblia mbala na mbala. Ya kyeleka, kutanga Ndinga ya Nzambi mbala na mbala kele mfunu mingi sambu na kusala kinduku ya ngolo ti Yehowa.

6, 7. Inki mutindu Bibuti lenda sadisa bana na bo na kuwa kyese ya kulonguka Ndinga ya Nzambi?

⁶ Yo kele mfunu kibeni nde bibuti kusadisa bana  na bo na kuzola Ndinga ya Nzambi! Ata bo vandaka kulonguka mbala na mbala na dibuta, leke mosi ya nkento vandaka ti banduku ya mbi. Sambu na yina metala kulonguka na yandi ya dibuta, yandi keyibuka nde: “Ntangu Tata vandaka kuyula bangyufula, mu vandaka kutanga bamvutu, kansi mu vandaa tala yandi ve na luse.” Na kisika ya kusosa kumanisa baparagrafe yonso ntinu-ntinu na ntangu bo kelonguka na dibuta, bibuti ya mayele kesalaka ngolo na kuyedisa mayele ya kulonga. (2 Timoteo 4:2) Sambu mwana kuwa kyese ya kulonguka, yandi fwete kudiwa nde kulonguka yango ketadila mpenza mambu yina kepesaka yandi mpasi mpi luzingu na yandi kibeni. Sambu na nki ve kuyula yandi bangyufula yina kepusa yandi na kubasisa bangindu na yandi mpi kubikila yandi ntangu ya kutuba mambu yina yandi kele na yo? Syamisa mwana na kumonisa mutindu yandi lenda sadila malongi yina beno mekatuka kulonguka. a

⁷ Dyaka, salaka na mpila nde disolo ya Biblia kuvanda kitoko. Kana mpila kele, lomba bana na kusala badrame sambu na kutendula masolo ya beno ketanga na Biblia. Sadisa bo na kumona kisika mambu ya beno kelonguka kusalamaka mpi mambu yina metala kisika yango. Sadila karte ti batablo sambu na kusadisa bo. Ya kyeleka, kana beno kesala ngolo na kuyindula mambu yankaka ya beno lenda sadila, kulonguka ya dibuta lenda kuma kitoko mpi lenda sadisa beno na kusala mambu mingi. Yo tavanda mbote nde bibuti kutadila mbotembote kinduku yina bo mosi kele na yo ti Yehowa. Kana bo mosi kepusana penepene na Yehowa, bo lenda sadisa bana na bo na kusala mutindu mosi.​—Kulonga 6:5-7.

8. Inki mutindu kisambu kesadisaka muntu na kukwenda penepene na Nzambi?

⁸ Kisambu mpi kesadisaka muntu na kupusana penepene na Nzambi. Leke mosi ya nkento yina yantikaka butoko na yandi kuvandaka na susi mingi ntangu yandi monaka nde yo kumaka mpasi sambu na yandi na kupona kulanda nzila ya Bukristu to banduku na yandi yina kuvandaka ve lukwikilu mosi ti yandi. (Yakobo 4:4) Inki yandi salaka? Yandi tubaka nde: “Na luyantiku, mu sambaka mpenza sambu na kuzabisa Yehowa mambu yina kuvandaka na ntima na munu.” Yandi bakisaka nde Nzambi kuwaka bisambu na yandi ntangu nsukansuka yandi zwaka nduku mosi ya nkento na kati ya dibundu ya Bukristu yina yandi kumaka kusonga mambu yina vandaka kuyangisa yandi. Ntangu yandi monaka nde Yehowa vandaka kutwadisa yandi, yandi yantikaka kusala kinduku ya ngolo ti Nzambi. Bibuti lenda sadisa bana na bo kana bo mosi bibuti ketomisa mutindu na bo ya kusamba. Ntangu beno kesamba na kati ya dibuta, bibuti lenda tuba mambu yonso yina kele na ntima na bo na mpila nde bana na bo kubakisa kinduku yina bibuti na bo kele na yo ti Yehowa.

Zaba Kukanga Ntima Kansi Vanda Ngolo

9, 10. Inki mbandu Yehowa mepesaka na mpila yandi vandaka kukanga ntima sambu na bantu ya Izraele yina kuvilaka nzila?

⁹ Kana mwana meyantika na kuvila nzila, yandi lenda yantika kusosa kudivandila yandi mosi mpi kubuya na kuwa konso disolo ya kimpeve yina bibuti kezola kusolula ti yandi. Inki bibuti lenda sala kana bo mekutana ti dyambu ya mpasi ya mutindu yai? Tala mambu ya Yehowa kusalaka na ntangu ya ntama sambu na bantu ya Izraele. Yandi kangaka ntima sambu na bantu ya Izraele ya “ntu-ngolo” bamvula 900 na ntwala ya kuyambula bo sambu bo landa nzila yina bo mosi kuponaka. (Kubasika 34:9; 2 Bansangu 36:17-21; Roma 10:21) Ata ‘bo vandaka kumeka yandi’ mbala mingi, Yehowa “wilaka bantu na yandi mawa. . . . Mbala mingi yandi vandaka kukanga ntima, yandi vandaka kuwa makasi ve.” (Nkunga 78:38-42) Nzambi kusalaka bo ve ata mbi mosi. Bibuti yina kezolaka bana na bo kelandaka mbandu ya Yehowa mpi bo kekangaka ntima na ntangu mwana kesadila ve nswalu mambu yina bo kesadisa yandi na kubakisa.

 ¹⁰ Kuvanda muntu ya kukanga ntima ketendulaka ve kumona mpasi ntangu yonso. Yo ketendula kubuya kuvidisa kivuvu nde mambu tatoma kaka na kati ya bantu yina kuwakana kele dyaka ve. Yehowa mepesaka mbandu mosi ya mbote yina kemonisaka mutindu ya kukanga ntima. Yandi bakaka ngindu ya kutindila bo “mbala na mbala” bantu yina vandaka kuzabisa bo bansangu. Yehowa “vandaka kuzola bo mingi” ata bo “talaka ve bantu ya yandi tindaka, bo sekaka baprofete na yandi, bo waka ve mambu ya bo tubaka.” (2 Bansangu 36:15, 16) Yandi bondilaka bantu ya Izraele nde: ‘Beno bika nzila ya mbi ya beno ke landa.’ (Yeremia 25:4, 5) Ata mpidina, Yehowa kukululaka ve minsiku na yandi ya lunungu. Yandi songaka bantu ya Izraele na “kubika nzila ya mbi” sambu bo landa yandi ti bansiku na yandi.

11. Inki mutindu bibuti lenda monisa kukanga ntima kansi bo vanda mpi ngolo na ntangu bo kelongisila mwana na bo yina mevila nzila?

¹¹ Bibuti lenda landa mbandu ya Yehowa na yina metala kukangaka ntima. Bo fwete katula ve kivuvu nswalunswalu nde mwana yina mevila nzila tavutuka dyaka ve. Kukonda kukatula kivuvu na bo, bo lenda monisa na mwana nde bo kele kaka na nzala ya kusolula na yandi to kusala na mpila nde bo vutula masolo na bo. Na ntangu bo kesala kikesa na kulanda bansiku ya lunungu, bo lenda lombaka “mbala na mbala” mwana na bo na kuvutuka na nzila ya kyeleka.

Kana Bo Mebasisa Mwana ya Leke na Dibundu

12. Inki mukumba bibuti kele na yo na ntwala ya mwana na bo ya leke yina bo mebasisa na dibundu?

¹² Inki beto lenda tuba kana mwana ya leke ya kezingaka ti bibuti na yandi mesala disumu mosi ya ngolo mpi bo mebasisa yandi na dibundu sambu yandi mebalula ve ntima? Sambu mwana yango kezingaka ti bibuti na yandi, mukumba ya kulonga yandi mpi ya kusungika yandi mutindu Ndinga ya Nzambi kelomba kele kaka na ntu na bo. Inki mutindu bo lenda sala yo?​—Bingana 6:20-22; 29:17.

13. Inki mutindu bibuti lenda meka na kusimba ntima ya mwana na bo yina mesala mambu ya mbi?

¹³ Kana mpila kele, yo tavanda mpenza mbote na kulonga mwana mpi kusungika yandi na ntangu beno kelonguka Biblia ti yandi na kingenga. Kibuti fwete tala ve kaka ntu-ngolo yina mwana na yandi kele na yo. Yandi fwete sosa kuzaba mambu yina kele na ntima ya mwana na yandi. Maladi na yandi ya kimpeve kekatuka kibeni wapi? (Bingana 20:5) Keti mpila ya kusimba kibeni ntima na yandi kele? Inki baverse lenda simba ntima na yandi? Ntumwa Polo kendimisa beto nde: “Nsangu ya Nzambi kele ya moyo, yo ke salaka konso ntangu. Makasi na yo me luta makasi ya mbele ya makasi zole. Makasi yina ke kotaka tii na kisika ya moyo ti mpeve kele, tii na kisika madikulu ti nluka kele. Nsangu yina yo ke sambisaka nzala ya ntima na beto ti mabanza ya  ntima na beto.” (Baebreo 4:12) Ya kyeleka, bibuti lenda sala mambu mingi, bo fwete suka kaka ve na kuzabisa mwana na bo nde yandi yambula kusala mambu ya mbi. Bo lenda meka na kulonga yandi mpi na kusadisa yandi na kubeluka na kimpeve.

14. Inki dyambu ya ntete mwana yina mesala disumu fwete sala sambu na kuvutula kinduku na yandi ti Yehowa, mpi nki mutindu bibuti lenda sadisa yandi na kusala yo?

¹⁴ Mwana yina mesala mbi kele na mfunu ya kuvutula kinduku na yandi ti Yehowa. Dyambu ya ntete ya yandi fwete sala kele ‘kubalula ntima . . . kuvutuka na Mfumu Nzambi.’ (Bisalu 3:19; Yezaya 55:6, 7) Na ntangu bibuti kesadisa mwana na bo na nzo na kubalula ntima, bo fwete ‘vanda bantu ya ke kangaka ntima, ya ke sungikaka na malembe.’ (2 Timoteo 2:24-26) Bo fwete “nganina” yandi na mutindu Biblia ketubila yo. Ngogo ya Kigreki ya bo mebalula nde “kunganina,” bo lenda balula yo mpi nde “kusonga mambu yina ya kendimisa muntu.” (Kusonga 3:19, NW; Yoane 16:8) Pana beto tatuba nde, kunganina ketendula kumonisa mwana mambu mingi yina fwete ndimisa yandi nde dyambu yina yandi mesala kele disumu. Ya kyeleka, yo kele pete ve na kusala mutindu yai. Kana mpila kele, bibuti lenda simba ntima na yandi, na kusadilaka bangindu ya mayele yonso yina kewakana ti Masonuku sambu na kundimisa yandi. Bo fwete meka na kusadisa yandi na kubakisa mfunu ya ‘kubuya mambu ya mbi, mpi ya kuzola mambu ya mbote.’ (Amosi 5:15) ‘Mabanza ya mbote lenda vutuka dyaka na ntima na yandi, ebuna yandi takatuka na dibulu ya Satana.’

15. Inki kisika kisambu kevandaka na yo na ntangu muntu kesosa kuvutula kinduku ti Yehowa?

¹⁵ Kisambu kele mfunu kibeni sambu na muntu yina kezola kuvutula kinduku na yandi ti Yehowa. Ya kyeleka, ata muntu mosi ve “fweti samba” sambu na muntu mosi ya kuvandaka ntete na dibundu ya Bukristu, kansi ya kekangama kaka na kusala masumu kukonda kubalula ntima. (1 Yoane 5:16, 17; Yeremia 7:16-20; Baebreo 10:26, 27) Kansi, bibuti lenda lomba Yehowa na kupesa bo mayele yina lenda sadisa bo na kuyidika dikambu yango. (Yakobo 1:5) Kana leke yina bo mebasisaka na dibundu kesala mambu ya kemonisa nde yandi mebalula ntima kansi yandi kekonda “kikesa na meso ya Nzambi,” bibuti lenda samba sambu na kulomba Nzambi nde kana yandi kemona kikuma ya lenda pusa yandi na kulolula mbi yina mwana kusalaka, Yandi sala yo kana yandi mezola. (1 Yoane 3:21) Na ntangu mwana kewa bisambu yai yo lenda sadisa yandi na kubakisa nde Yehowa kele Nzambi mosi ya kelolulaka. b​—Kubasika 34:6, 7; Yakobo 5:16.

16. Inki mutindu beto lenda sadisa bantu ya dibuta yina kele na bana ya bo mebasisaka na dibundu?

¹⁶ Kana bo mebasisa mwana mosi na dibundu, bampangi na kati ya dibundu lenda “vukana ve” ti yandi. (1 Korinto 5:11; 2 Yoane 10, 11) Kikalulu yai lenda sadisa yandi nsukansuka na “kuyindula luzingu na yandi” mpi na kuvutuka na kibuka yina kele na nsi ya lutaninu ya Nzambi. (Luka 15:17) Kansi, ata yandi mevutuka to ve, bampangi ya dibundu lenda pesa kikesa na dibuta ya mwana yina bo mebasisaka na dibundu. Beto yonso lenda sosa mpila ya kumonisa ‘zola’ mpi ya kuvanda “bantu ya mbote” na ntwala ya dibuta ya mutindu yai.​—1 Piere 3:8, 9.

 Mutindu Bantu Yankaka Lenda Sadisa

17. Inki dyambu bampangi ya dibundu fwete simba na ntangu bo kesosa kusadisa mwana yina kele dyaka ve na kimpeve ya mbote?

¹⁷ Inki beto lenda tuba sambu na mwana yina bo mebasisa ve na dibundu ya Bukristu kansi ya mekuma kulemba na kimpeve? Polo kusonikaka nde: “Kana ndambu mosi ya nitu ke mona mpasi, bandambu yonso mpi fweti mona mpasi [ti yo].” (1 Korinto 12:26) Bantu yankaka lenda monisa dikebi mingi na mwana ya mutindu yai. Ya kyeleka, yo kelomba kusala yo na mwa mayele, sambu leke yina kebela dezia na kimpeve lenda nata baleke yankaka na banzila ya mbi. (Galatia 5:7-9) Na dibundu mosi, ndambu ya bambuta yina kuvandaka na bangindu ya mbote ya kusadisa baleke yina yantikaka kulemba na kimpeve, kubingisaka bo na bafeti sambu na kulanda miziki ya inza kumosi. Ata baleke yai kundimaka na mbala mosi dibanza yai mpi bo waka kyese na kuvanda mbala mingi na bisika ya mutindu yai, nsukansuka kukutana yina kunataka bo na kubasika na dibundu. (1 Korinto 15:33; Yude 22, 23) Kima lenda sadisa mwana yina mesala mbi kele, bafeti ya musuni ve ya kukonda lutwadisu ya kimpeve, kansi kinduku ti bantu yina lenda sadisa yandi na kuyedisa mpusa ya mambu ya kimpeve. c

18. Inki mutindu beto lenda landa mbandu ya tata ya kingana ya Yezu yina kuvidisaka mwana na yandi?

¹⁸ Kana leke yina kuyambulaka na kukwisa na balukutakanu mekwisa na Nzo ya Kimfumu to na balukutakanu ya nene, yindula kyese yina yandi lenda wa. Keti yo fwete pusa beto ve na kuyamba yandi mutindu tata yina ya kingana ya Yezu kuyambaka mwana na yandi ya kuvilaka? (Luka 15:18-20, 25-32) Leke mosi ya kubasikaka na dibundu ya Bukristu kukwendaka na lukutakanu ya distrike, na nima yandi tubaka nde: “Mu yindulaka nde ata muntu mosi ve tatala muntu bonso munu. Kansi bampangi ya bankento ti ya babakala kwisaka kupesa munu mbote mpi kuyamba munu. Dyambu yai kusimbaka mpenza ntima na munu.” Yandi yantikaka dyaka na kulonguka Biblia ebuna nsukansuka yandi bakaka mbotika.

Beno Lemba Ve

19, 20. Sambu na nki beto fwete vanda kaka na kivuvu nde mwana yina mevilaka lenda vutuka dyaka?

¹⁹ Kusadisa mwana ya ‘mevila’ na ‘kuyindula luzingu na yandi’ kelombaka kukanga ntima mpi lenda vanda kisalu mingi kibeni sambu na bibuti ti bantu yankaka. Kansi beno lemba ve. “Bantu ya nkaka ke yindulaka nde Nzambi me sukinina na kusala mambu yina ya yandi silaka, kansi mpidina ve. Nzambi ke kangaka ntima sambu na beno, sambu yandi ke zolaka ve nde ata muntu mosi kuvila; kansi yandi ke zolaka nde bantu yonso kubalula ntima.” (2 Piere 3:9) Masonuku kendimisa beto nde Yehowa kezolaka nde bantu kubalula ntima mpi bo zinga. Nkutu, yandi meyidikaka mambu na mpila nde bantu kuwakana dyaka ti yandi. (2 Korinto 5:18, 19) Kukanga ntima na yandi mesalaka nde mabanza ya mbote kuvutukila bantu mingi.​—Yezaya 2:2, 3.

²⁰ Ebuna, keti bibuti fwete sadila ve banzila yonso yina Masonuku kepesa sambu na kusadisa mwana na bo ya mevilaka nzila na mpila nde mabanza ya mbote kuvutukila yandi? Beno landa mbandu ya Yehowa, beno kangaka ntima na ntangu beno kesala mambu yonso ya mbote sambu na kusadisa mwana na beno na kuvutuka na Yehowa. Beno kangama ngolo na minsiku ya Biblia, mpi beno monisa bikalulu yina Yehowa kele na yo, mu mbandu, zola, lunungu, ti mayele na ntangu beno kesamba sambu na kulomba lusadisu na yandi. Mutindu bana mingi ya ntu-ngolo mendimaka imvitasio ya zola yina Yehowa kepesaka bo na kuvutukila yandi, mutindu mosi mpi, mwana na beno ya bakala to ya nkento yina mevilaka nzila lenda vutuka na kati ya kibuka yina Nzambi ke na kutanina.​—Luka 15:6, 7.

[Banoti na nsi ya lutiti]

Keti Nge Keyibuka?

• Inki lenda vanda kikuma ya kuluta nene yina kesalaka nde bana kubasika na dibundu?

• Inki mutindu beto lenda sadisa baleke sambu bo sala kinduku ti Yehowa?

• Sambu na nki bibuti fwete kangaka ntima kansi kuvanda ngolo na ntangu bo kesadisa mwana yina mevila nzila?

• Inki mutindu bampangi ya dibundu lenda sadisa mwana yina mevilaka na kuvutuka na dibundu?

[Bangiufula ya disolo ya kulonguka]

[Kifwanisu ya kele na lutiti 25]

Kutanga Ndinga ya Nzambi kele mfunu sambu na kusala kinduku ya ngolo ti Yehowa

[Kifwanisu ya kele na lutiti 25]

Bisambu ya masonga ya bibuti lenda sadisa mwana na bo na kubakisa kinduku yina bibuti bo mosi kele na yo ti Yehowa

[Kifwanisu ya kele na lutiti 27]

Beno yamba mwana ya mevilaka nzila kana yandi ‘meyindula luzingu na yandi’

[Kifwanisu ya kele na lutiti 28]

Sala mambu ya mbote yina tasadisa mwana na nge na kuvutuka na Yehowa