Bangyufula ya Batangi

Na nki kiteso Bakristu ya bubu yai fwete zitisa bansiku yina ketubila makwela na kati ya bantu ya fami mosi yina kele na Nsiku ya Moize?

Nsiku yina Yehowa pesaka na dikanda ya Izraele vandaka kutubila ve mingi bafeti ya makwela to mutindu ya kusala yo. Kansi, yo kebuyisaka bamakwela yankaka. Mu mbandu, na Levi 18:6-20, beto kemona lisiti ya bansiku yina kebuyisa mitindu ya kuvukisa nitu ti muntu yina beno kele na yandi “fami” mosi. Baverse yai ketendula na bunda inki bantu ya fami mosi lenda vukisa nitu ve. Ya kyeleka, Bakristu kele ve na nsi ya Nsiku ya Moize to mpi yo kelomba ve nde bo zitisa yo kaka. (Efezo 2:15; Kolosai 2:14) Ata mpidina, yo ketendula ve nde Bakristu lenda tadila ve dyambu yai na ntangu bo kepona muntu ya kukwela. Beto kele na bikuma mingi ya fwete pusa beto na kusala yo.

Ntetentete, beto tubila bansiku ya leta yina kebuyisaka makwela na kati ya bantu yina kele fami mosi, mpi beto mezaba nde Bakristu fwete zitisa bansiku ya insi na bo. (Matayo 22:21; Roma 13:1) Kansi, bansiku yango kevandaka ve mutindu mosi na bisika yonso. Bansiku ya makwela mingi ya bo ketulaka bubu yai kelandaka mingimingi kimpangi ya menga mosi yina bantu kevandaka na yo. Yo kele ya kyeleka nde kana bantu yina kele fami mosi mekwelana, kigonsa ya ngolo kevandaka nde bana kubutuka ti bifu na nitu to bamaladi yina kezyetaka na bafami. Sambu na kikuma yai mpi sambu na ‘kulemfuka na bamfumu ya leta,’ Bakristu yina kesosaka kukwela kelemfukaka na bansiku ya leta ya metala makwela na bisika yina bo kezingaka.

Na nima, beto tubila mpi mambu yina bantu kendimaka ti yina ya bo kebuyaka na konso kisika yina nge kezingaka. Bansiku ya kebuyisaka makwela na kati ya bantu yina kele menga mosi kevandaka na bisika yonso ya bantu kezingaka, mbala mingi bo kemonaka makwela ya mutindu yina bonso disumu mpi bo kebuyisaka yo. Ata bansiku yina metala makwela na kati ya bantu ya fami mosi kevandaka ve kiteso mosi na bisika mingi, mukanda mosi (The Encyclopædia Britannica) ketuba mutindu yai: “Na kutuba ya mbote, kana bantu zole kele mpenza bampangi ya menga mosi, nsiku yina kebuyisaka to kepesaka ve nswa na kuvukisa nitu na kati ya bampangi kevandaka mpi ngolo mingi sambu na bo.” Yo yina, ata yandi kukwela ve mpangi na yandi, Mukristu kezolaka ve kusala mambu yina kemonisa nde yandi kezitisa ve bansiku ya bambuta to mawi ya bantu ya bisika yina yandi kezinga, sambu na kukonda kufingisa dibundu ya Bukristu to zina ya Nzambi.​—2 Korinto 6:3.

Beto vila mpi ve na kutula dikebi na kansansa yina Nzambi mepesaka beto. Bantu yonso kebutukaka ti mayele ya kuzaba kuswasukisa mambu ya mbote ti ya mbi. (Roma 2:15) Kansansa na bo kesongaka bo mambu yina kele ya mbote ti yina kele ya mbi, mambu yina muntu lenda sala ti yina kele ya kuluta mbi, katula kaka na bantu yina kansansa na bo mebebaka dezia sambu na mambu ya mbi. Yehowa kutubilaka dyambu yai ntangu yandi pesaka bantu ya Izraele nsiku na yandi yina kubuyisaka makwela na kati ya bantu ya fami mosi. Beto ketanga mutindu yai: “Beno landa ve mambu yina ke salaka bantu ya nsi ya Ezipte, kisika ya beno vandaka; beno landa mpi ve mambu yina ke salaka bantu ya nsi ya Kanana yai ya mono ke nata beno. Beno landa ve bikalulu na bo.” (Levi 18:3) Bakristu kezitisaka kansansa na bo yina melongamaka na Biblia mpi bo kepesaka ve nzila nde bangindu ya mbi ya makanda yina keswasukisaka dyaka ve mambu ya mbote ti ya mbi kubebisa yo.​—Efezo 4:17-19.

Sesepi yai, inki beto lenda tuba sambu na kusukisa? Ata Bakristu kelandaka ve Nsiku ya Moize, kansansa na bo kesongaka bo pwelele nde makwela na kati ya bampangi ya fami mosi, mu mbandu tata ti mwana na yandi ya nkento, mama ti mwana na yandi ya bakala, mwana ya bakala ti mpangi na yandi ya nkento, lenda salama ve na dibundu ya Bukristu. a Kansi, sambu na yina metala bampangi ya fami ya ntama-ntama, Bakristu kezabaka nde kele ti bansiku ya ketambwisaka makwela yina leta kendimaka mpi minsiku yina bantu kendimaka na bisika ya bo kezingaka. Beto fwete tadilaka yo na dikebi yonso sambu na kulemfuka na munsiku yai ya Masonuku: “Bantu yonso kuzitisa makwela.”​—Baebreo 13:4.

[Noti na nsi ya lutiti]