Landa na Kusala Mambu ya Mbote
Landa na Kusala Mambu ya Mbote
“Kana bantu [“kebutaka mbuma ya nsemo,” NW] bo ke salaka mambu ya mbote ya mutindu na mutindu, bo ke tubaka mpi mambu ya kieleka mpenza.”—EFEZO 5:9.
1. Inki mutindu bamilio ya bantu kemonisa bubu yai nde bo kendimaka mambu yina kele na Nkunga 31:19?
MAMBOTE ya kuluta nene yina muntu lenda sala kele kupesa lukumu na Yehowa. Bubu yai bantu mingi kesalaka mutindu yina ntangu bo kekumisaka Nzambi sambu na mambu ya mbote ya yandi kesalaka. Mutindu beto kele Bambangi ya kwikama ya Yehowa, beto kendima na ntima mosi mambu yai muyimbi-bankunga kutubaka: “Mambote ya nge ke bumbaka sambu na bantu yina ke lemfukaka na nge, yo kele ya kuyituka.”—Nkunga 31:19.
2, 3. Inki lenda salama kana kisalu na beto ya kukumisa bantu balongoki kekwenda ve nzila mosi ti bikalulu na beto ya mbote?
2 Boma ya beto kevandaka na yo sambu na kuzitisa Yehowa kepusaka beto na kukumisa yandi sambu na mambu ya mbote yina yandi kesalaka. Yo kepusaka beto mpi na ‘kukumisa Mfumu Nzambi, kupesa yandi mersi, mpi kusonga lukumu ya kimfumu na yandi.’ (Nkunga 145:10-13) Yo yina beto kesalaka ti kikesa yonso kisalu ya kulonga Kimfumu mpi ya kusala balongoki. (Matayo 24:14; 28:19, 20) Ya kyeleka, kisalu na beto ya kusamuna fwete tambula kumosi ti bikalulu ya mbote. Kana ve, beto lenda fingisa zina ya santu ya Yehowa.
3 Bantu mingi ketubaka nde bo kesambilaka Nzambi, kansi bikalulu na bo kewakanaka ve ti minsiku yina Nzambi metulaka na Ndinga na yandi ya kupemama. Na yina metala bantu yankaka yina vandaka kusala ve mambu ya mbote yina bo vandaka kutuba, ntumwa Polo kusonikaka nde: “Ebuna! Nge muntu ke longaka bantu ya nkaka, sambu na nki nge ke kudilongaka ve nge mosi? Nge muntu ke longaka nde muntu lenda kuyiba ve, sambu na nki nge ke yibaka? Nge muntu ke tubaka nde muntu kusala pite ve, sambu na nki nge ke salaka yo? . . . Sambu Mukanda ya Nzambi ke tuba nde: ‘Bantu yina kele Bayuda ve ke vwenzaka zina ya Nzambi sambu na beno Bayuda.’”—Roma 2:21, 22, 24.
4. Bikalulu na beto ya mbote kebutaka nki mbuma?
4 Na kisika ya kufingisa zina ya Yehowa, beto kesalaka ngolo na kukumisa yo na nzila ya bikalulu na beto ya mbote. Dyambu yai kebutaka mbuma ya mbote na bantu yina kele na nganda ya dibundu ya Bukristu. Mpi yo kesadisaka beto na kukangisa bambeni na beto munoko. (1 Piere 2:15) Kima ya kuluta dyaka mfunu kele nde bikalulu na beto ya mbote kebendaka bantu na organizasio ya Yehowa, mpi yo kekangudilaka bo nzila ya kupesa yandi lukumu mpi ya kubaka luzingu ya mvula na mvula.—Bisalu 13:48.
5. Inki bangyufula beto fwete tadila sesepi yai?
5 Sambu beto kele bantu ya kukonda kukuka, inki mutindu beto lenda tina bikalulu yina lenda pesa zina ya Yehowa nsoni mpi kulembisa bantu yina kesosa kyeleka? Inki mutindu beto lenda nunga na kusala mambote?
Mbuma ya Nsemo
6. Inki kele mwa ‘mambu ya mpamba-mpamba yina bantu kesalaka sambu bo me temukaka ve,’ kansi nki mbuma fwete monika pwelele na kati ya Bakristu?
6 Mutindu beto kele Bakristu ya mekudipesaka, beto kele na kima mosi yina kesadisaka beto na kutina ‘mambu ya mpamba-mpamba yina bantu kesalaka sambu bo me temukaka ve.’ Na kati ya mambu yango yina kepesaka Nzambi nsoni beto lenda tanga kukusa, kuyiba, kufinga, masolo ya mbi ya ketadila kuvukisa nitu, bikalulu ya nsoni, bansaka ya nsoni, mpi kulauka malafu. (Efezo 4:25, 28, 31; 5:3, 4, 11, 12, 18) Na kisika nde beto kudikotisa na bisalu ya mutindu yai, beto “fweti zinga kaka ya kutemuka.” Ntumwa Polo ketuba nde ‘kana bantu kebuta mbuma ya nsemo bo kesalaka mambu ya mbote ya mutindu na mutindu, bo ketubaka mpi mambu ya kieleka mpenza.’ (Efezo 5:8, 9) Yo kele kyeleka nde kana beto ketambula na nsemo beto takuka na kulanda kusala kaka mambu ya mbote. Kansi, yo kele nsemo ya nki mutindu?
7. Inki beto fwete sala sambu na kulanda kusala mambu ya mbote?
7 Katula kukonda kukuka na beto, beto lenda sala mambu ya mbote kana beto ketambula na nsemo ya kimpeve. Muyimbi-bankunga kuyimbaka nde: “[Ndinga] na nge kele mwinda ke pelaka na nzila na mono, yo ke tambusaka makulu na mono.” (Nkunga 119:105) Kana beto kezola kulanda ‘na kutemuka’ na nzila ya “mambu ya mbote ya mutindu na mutindu,” beto fwete baka ntangu yonso mambote na nsemo ya kimpeve yina kele na Ndinga ya Nzambi, ya bo ketendulaka mbotembote na mikanda ya Bukristu, mpi yina beto kelongukaka mbala na mbala na balukutakanu ya beto kesalaka sambu na kusambila Yehowa. (Luka 12:42; Roma 15:4; Baebreo 10:24, 25) Beto kele mpi na mfunu ya kutula dikebi ya mingi na mbandu mpi na malongi ya Yezu Kristu, yina kele “mwinda sambu na bantu yonso” mpi yina ‘kemonisaka lukumu ya Yehowa.’—Yoane 8:12; Baebreo 1:1-3.
Mbuma ya Mpeve
8. Sambu na nki beto lenda sala mambu ya mbote?
8 Ntembe kele ve nde nsemo ya kimpeve kesadisaka beto na kusala mambu ya mbote. Dyaka, beto kekukaka kumonisa kikalulu yai sambu mpeve santu ya Nzambi, to ngolo na yandi ya kisalu, ketwadisaka beto. Kusala mambu ya mbote [to, “bumbote”] kele mosi na kati ya “mbuma ya mpeve.” (Galatia 5:22, 23, NW) Kana beto kelemfuka na lutwadisu ya mpeve santu ya Yehowa, yo tabuta na kati na beto mbuma na yo ya kitoko, disongidila kusala mambu ya mbote.
9. Inki mutindu beto lenda sala na kuwakana ti bangogo ya Yezu yina kele na Luka 11:9-13?
9 Mpusa na beto ya ngolo ya kupesa Yehowa kyese na nzila ya mambu ya mbote yina beto kesala fwete pusa beto na kusala mambu yina kewakana ti bangogo yai ya Yezu: “Beno landa kaka na kulomba mambu yina ya beno ke na yo mfunu, ebuna Nzambi ta pesa beno yo; beno landa kaka na kusosa mambu yina ya beno ke na yo mfunu, ebuna beno ta mona yo; beno landa kaka na kubula na kielo, ebuna Nzambi ta kangudila beno yo. Sambu konso muntu yina ke lombaka mambu yina ya yandi ke na yo mfunu, yandi ta baka yo; konso muntu yina ke sosaka mambu yina ya yandi ke na yo mfunu, yandi ta mona yo; konso muntu yina ke bulaka na kielo, Nzambi ta kangudila yandi yo. Na kati na beno, kana nge kele tata, ebuna mwana na nge kulomba nge mbisi ya masa, keti nge ta pesa yandi musobi? to kana yandi kulomba nge diaki keti nge ta pesa yandi nkutu? Ebuna beno bantu ya mbi, kana beno zaba kupesa makabu ya mbote na bana na beno, zaba nde Tata yina kele na zulu ta pesa mpenza Mpeve na yandi na bantu yina ke lombaka yandi Mpeve!” (Luka 11:9-13) Bika beto landa ndongisila ya Yezu mpi beto samba sambu Yehowa kupesa beto mpeve na yandi na mpila nde beto lenda landa na kusala mambu ya mbote; yo kele mosi na kati ya mbuma ya mpeve santu.
‘Landa na Kusala Mambu ya Mbote’
10. Inki bambandu ya mambu ya mbote ya Yehowa beto ketanga na Kubasika 34:6, 7?
10 Beto lenda ‘landa na kusala mambu ya mbote’ na lusadisu ya nsemo ya kimpeve yina kekatuka na Ndinga ya Nzambi mpi ti lusadisu ya mpeve santu ya Nzambi. (Roma 13:3) Kana beto kelonguka Biblia mbala na mbala, beto tazaba mambu mingi yina metala mutindu ya kulanda mbandu ya Yehowa ya kusala mambu ya mbote. Disolo yina meluta kutubilaka bambandu ya mambu ya mbote ya Nzambi yina kele na mambu yina Nzambi songaka Moize, yina kele ya kusonika na Kubasika 34:6, 7, kisika ya beto ketanga mutindu yai: “Mono kele Mfumu Nzambi. Mono kele Nzambi mosi ke zolaka bantu ti kuwila bo mawa; mono ke waka makasi nswalu ve kansi mono ke songaka kaka mambote na mono. Mono ke salaka mambu yonso ya mono ke tubaka, mono ke salaka yo na bantu yonso tii kuna. Mono ke kangaka ntima na mambu yonso ya mbi ya bantu ke salaka, mono ke wilaka bantu mawa sambu na masumu na bo; kansi mono ke nungisaka ve bantu yina ke salaka mbi.” Kutadila mbotembote mitindu yai ya Yehowa kesalaka mambote tasadisa beto na ‘kulanda kusala mambu ya mbote.’
11. Kuzaba nde Yehowa kezolaka bantu mpi kewilaka bo mawa fwete pusa beto na kusala inki?
11 Mambu yai ya Nzambi ketuba kemonisa beto mfunu ya kulanda mbandu ya Yehowa na kuzola bantu ti kuwila bo mawa. Yezu kutubaka nde: “Kiese na bantu yina ke wilaka bantu ya nkaka mawa, sambu Nzambi ta wila bo mpi mawa!” (Matayo 5:7; Luka 6:36) Mutindu beto mezaba nde Yehowa kezolaka bantu, yo kepusa beto na kuvanda na zola mpi bikalulu ya mbote na mutindu na beto ya kuvanda na bantu yankaka, yika mpi bayina beto kelongaka. Mambu yai kewakana ti ndongisila ya Polo yai: “Ntangu yonso beno fweti tuba mambu ya mbote ti ya mfunu; beno fweti zaba kupesa bamvutu ya mbote na konso muntu.”—Kolosai 4:6.
12. (a) Mutindu Nzambi kewaka makasi nswalu ve, inki bikalulu beto fwete monisa na bantu yankaka? (b) Mambote ya Yehowa kemonisaka kepusaka beto na kusala nki?
12 Mutindu Nzambi kewaka makasi nswalu ve, mpusa na beto ya ‘kulanda na kusala mambu ya mbote’ kepusaka beto na kukanga-ntima na ntwala ya tubifu ya fyotifyoti ya bampangi na beto Bakristu mpi kutula dikebi kaka na bikalulu na bo ya mbote. (Matayo 7:5; Yakobo 1:19) Mambote ya Yehowa kepusaka beto na kuzola ti kwikama yonso , ata na ntangu beto ke na kunyokwama mingi. Ya kyeleka, yai kele dyambu ya kuluta mbote.—Bingana 19:22.
13. Inki mutindu beto fwete kuditambwisa sambu na kumonisa nde Yehowa ‘ketubaka kyeleka’?
13 Mutindu Tata na beto ya zulu ‘ketubaka kyeleka,’ beto ‘songa na mambu yonso ya beto kesalaka nde beto kele bansadi na yandi na kutubaka mambu ya kyeleka.’ (2 Korinto 6:3-7) Na kati ya bima nsambwadi yina Yehowa kebuyaka beto lenda tanga “Munoko ya luvunu” ti “temwe yina ke tubaka luvunu na luvunu.” (Bingana 6:16-19) Luzolo na beto ya kupesa Nzambi kyese kupusaka beto na ‘kubika luvunu mpi kutuba mambu ya kieleka.’ (Efezo 4:25) Bika nde beto lemba ve na kusala mambu ya mbote na mutindu yai ya mbote.
14. Sambu nanki beto fwete lolula bantu yankaka?
14 Mambu yina Nzambi songaka Moize fwete pusa beto mpi na kulolula bankaka, sambu Yehowa kelolulaka bantu. (Matayo 6:14, 15) Ya kyeleka, Yehowa tapesa ndola na bansumuki yina kebalulaka ve ntima. Beto fwete zitisa bansiku na yandi yina ketubilaka mambu ya mbote ntangu yo kelombaka kusala na mpila nde dibundu kuvanda bunkete na kimpeve.—Levi 5:1; 1 Korinto 5:11, 12; 1 Timoteo 5:22.
‘Beno Keba Mbote’
15, 16. Inki mutindu ndongisila ya Polo yina kele na Efezo 5:15-19 kesadisa beto na kulanda kusala mambu ya mbote?
15 Sambu na kulanda na kusala mambu ya mbote na kati ya mambi yai mezyunga beto, beto kele na mfunu ya kufuluka na mpeve ya Nzambi, mpi kukeba na mutindu beto ketambula. Sambu na yo, Polo kusyamisaka Bakristu ya Efezo mutindu yai: “Beno keba mbote na luzingu yina ya beno ke zingaka. Beno zinga ve bonso bantu ya buzoba, kansi beno zinga bonso bantu ya mayele. Awa ya beno ke na ntangu ya mbote, beno sadila yo, sambu bilumbu yai ya beto kele yo kele ya mbi. Yo yina, beno vanda bazoba ve, kansi beno meka na kuzaba mambu yina ya Mfumu Yesu ke zolaka nde beno sala. Beno kulauka malafu ve, mbaimbai beno ta kuma bantu ya pite. Kansi beno vanda ya kufuluka na Mpeve ya Nzambi. Beno bula miziki, beno yimba bankunga ya Nzambi na kati na beno sambu na kupesa Mfumu Yesu lukumu na ntima na beno.” (Efezo 5:15-19) Ndongisila yai kele mfunu kibeni sambu na beto na bilumbu yai ya nsuka yina mpasi kele mingi.—2 Timoteo 3:1.
16 Kana beto kezola kulanda na kusala mambu ya mbote, beto fwete keba na mpila nde beto tambula bonso bantu yina kele na mayele ya kekatukaka na Nzambi. (Yakobo 3:17) Beto fwete tina masumu ya nene mpi beto fwete fuluka na mpeve santu, mpi kubikila yo nzila ya kutwadisa beto. (Galatia 5:19-25) Kana beto kesadila malongi ya kimpeve yina beto kewaka na balukutakanu ya Bukristu, na balukutakanu ya nene, mpi na balukutakanu ya distrike, beto lenda landa na kusala mambu ya mbote. Mambu yina Polo songaka bantu ya Efezo lenda yibusa beto mpi nde na balukutakanu mingi ya beto kesalaka sambu na lusambu, beto kebakaka mambote na ‘bankunga ya kimpeve’ ya beto keyimbaka na masonga yonso. Mingi na kati na yo ketubilaka bikalulu ya kimpeve, bonso kusala mambu ya mbote.
17. Kana luzingu na bo kepesa bo ve nzila ya kukwenda na balukutakanu, na nki mambu Bakristu yina kebelaka ngolo lenda tula kivuvu?
17 Kansi, nki beto lenda tuba sambu na bampangi na beto ya Bakristu yina kele ve na mpila ya kukwenda na balukutakanu ya Bukristu mbala na mbala sambu na maladi ya ngolo ya kemanaka ve? Bo lenda kudiwa mawa na ntima sambu bo ke na mpila ve ya kusambila Yehowa na kimvuka ti bampangi na bo ya kimpeve ya babakala ti ya bankento. Kansi, bo lenda tula kivuvu nde Yehowa kebakisa mpasi na bo, yandi tatanina bo na nzila ya kyeleka, yandi tapesa bo mpeve santu na yandi, mpi yandi tasadisa bo na kulanda kusala mambu ya mbote.—Yezaya 57:15.
18. Inki tasadisa beto na kulanda kusala mambu ya mbote?
18 Kulanda na kusala mambu ya mbote kelombaka nde beto tadila mbotembote banduku na beto mpi kutina bayina ‘kezolaka ve mambu ya mbote.’ (2 Timoteo 3:2-5; 1 Korinto 15:33) Kusadila bandongisila ya mutindu yai kesadisaka beto na kukonda ‘kupesa Mpeve-Santu ya Nzambi mawa’ na kusalaka mambu ya kewakana ve ti lutwadisu na yo. (Efezo 4:30) Dyaka, beto kebakaka lusadisu sambu na kusala mambu ya mbote kana beto kevukana ti bantu yina luzingu na bo kemonisaka nde bo kezolaka kusala mambu ya mbote mpi mpeve ya Yehowa ketwadisaka bo.—Amosi 5:15; Roma 8:14; Galatia 5:18.
Kusala Mambu ya Mbote Kebutaka Bambuma ya Mbote
19-21. Ta baeksperiansi yina kemonisa mbuma yina kusala bantu mambote kebutaka.
19 Kutambula na nsemo ya kimpeve, kulanda lutwadisu ya mpeve ya Nzambi, mpi kukeba na mutindu beto ketambula tasadisa beto na kutina mambu ya mbi mpi ‘kulanda na kusala mambu ya mbote.’ Na nima mambu yai lenda buta bambuma ya mbote. Beto tadila eksperiansi ya Zongezile, Mbangi ya Yehowa mosi ya Afrika ya Sudi. Kilumbu mosi na suka, yandi vandaka kukwenda na nzo-nkanda, ebuna na nzila yandi kwendaka na banki sambu na kutala ntalu ikwa kubikalaka na mbongo yina yandi vandaka kubumba. Mashini ya muntu yina kesalaka na kesi ya mbongo kutulaka kifu mpi yo lutisaka mbongo 42 000 rands (6 000 Dolar) na zulu ya mbongo yina yandi vandaka na yo. Muntu mosi ya kesalaka na sekirite ya banki ti bantu yankaka kusyamisaka yandi na kukatula mbongo yango pana mpi yandi kwenda kutula na banki yankaka. Kaka bankwelani zole ya Bambangi yina yandi vandaka kuzinga na bo kuzabisaka yandi na kukonda kukatula mbongo yina.
20 Na kilumbu yankaka ya mposo yina, Zongezile kuzabisaka bantu ya banki kifu yina kusalamaka. Bo bakisaka nde yandi vandaka ti nimero ya konti ya kiteso mosi ti mvwama mosi yina kesalaka mumbongo, yina kutulaka mbongo na konti ya muntu yankaka na kidiba. Na nima ya kuyituka na kumona nde Zongezile kusadilaka ve ata ndambu ya mbongo yina, muntu ya mumbongo yina kuyulaka yandi nde: “Nge kesambilaka na nki dibundu?” Zongezile kuvutulaka nde yandi vandaka Mbangi ya Yehowa. Bamfumu ya banki kusikisaka yandi mingi, mpi bo tubaka nde: “Yo tazolaka kuvanda mbote kana bantu yonso kuvandaka masonga bonso Bambangi ya Yehowa.” Ya kyeleka, bisalu ya masonga ti mambu ya mbote lenda pusa bantu yankaka na kukumisa Yehowa.—Hebreo 13:18.
21 Yo kelomba ve nde mambu ya mbote ya beto kesala kuvanda nene mingi sambu yo buta bambuma ya mbote. Mu mbandu: Mbangi mosi ya leke yina kesalaka kisalu ya ntangu yonso na bisanga ya Samoa kukwendaka na lupitalu. Bantu mingi vandaka kukinga doktere, mpi Mbangi kumonaka nde nkento mosi ya mununu yina vandaka penepene ti yandi vandaka kubela ngolo kibeni. Yandi songaka nkento yina na kukota na ture na yandi na mpila nde bo sansa yandi nswalu. Kilumbu mosi, Mbangi kukutanaka ti nkento yango ya mununu na zandu. Nkento yango kuzabaka Mbangi yina mpi dyambu ya mbote yina yandi sadilaka yandi na lupitalu. Nkento yango kutubaka nde: “Ntangu yai mono mebakisa nde Bambangi ya Yehowa kezolaka kibeni bamfinangani na bo.” Nkento yai vandaka ntete kuzola ve na kuwa nsangu ya Kimfumu, kansi dyambu ya mbote yina Mbangi kusadilaka yandi butaka mbuma ya mbote. Yandi ndimaka kulonguka ya Biblia na nzo mpi yandi yantikaka kubaka nzayilu ya Ndinga ya Nzambi.
22. Inki kele mutindu mosi ya kuluta mbote ya ‘kulanda na kusala mambu ya mbote’?
22 Ziku, nge lenda mpi mezaba baeksperiansi yina kemonisa valere ya kusala mambote na bantu yankaka. Mutindu mosi ya kuluta mbote ya ‘kulanda na kusala mambu ya mbote’ kele yai: kusala mbala na mbala kisalu ya kusamuna nsangu ya mbote ya Kimfumu ya Nzambi. (Matayo 24:14) Bika beto kudipesa na kikesa yonso na kisalu yai ya kitoko, mpi beto zaba nde yo kele mutindu mosi ya kusala mambu ya mbote, mingimingi na bantu yina kendima na kuwa yo. Kima ya kuluta dyaka mfunu kele kisalu na beto ya kusamuna mpi bikalulu na beto ya mbote ya kepesaka lukumu na Yehowa yina kele nto ya mambu ya mbote.—Matayo 19:16, 17.
Beno Landa na ‘Kusala Bantu Yonso Mbote’
23. Sambu na nki kisalu ya kusamuna ya Bakristu kesalaka kele kisalu mosi ya mbote?
23 Na ntembe ve, kisalu na beto ya kusamuna kele kisalu mosi ya mbote. Yo lenda gulusa beto ti bantu yina kewa nsangu ya Biblia mpi kukotisa beto na nzila yina kenataka na luzingu ya mvula na mvula. (Matayo 7:13, 14; 1 Timoteo 4:16) Yo yina, ntangu beto kezola kubaka badesizio, mpusa ya kusala mambu ya mbote lenda pusa beto na kudiyula nde: ‘Inki mambu desizio yai tanatila kisalu na mono ya kusamuna Kimfumu? Keti nzila ya mono kezola kulanda kele ya mbote? Keti yo tasadisa mono na kusadisa bantu yankaka na kundima “Nsangu ya Mbote ya mvula na mvula” mpi kunata bo na kinduku ya ngolo ti Yehowa Nzambi?’ (Kusonga 14:6) Beto tabaka mambote mingi kana beto baka desizio yina kepesa beto nzila ya kusala mambu mingi sambu na Kimfumu.—Matayo 6:33; Bisalu 20:35.
24, 25. Beno tanga mwa mitindu yankaka ya kusala mambu ya mbote na dibundu, mpi beto lenda tula ntima nde beto tabaka nki kana beto kelanda na kusala mambu ya mbote?
24 Bika nde beto mona ve mpamba bambuma yina mambu ya mbote kebutaka. Beto lenda landa na kumonisa kikalulu yai kana beto kepesa maboko na dibundu ya Bukristu mpi kesala yonso yina beto lenda sambu na kusosa mambote na yo. Ya kyeleka, beto kesalaka mambu ya mbote ntangu beto kekwendaka mbala na mbala mpi kepesaka bamvutu na balukutakanu ya Bukristu. Bampangi na beto kebakaka mpenza kikesa ntangu bo kemonaka beto na balukutakanu, mpi bakomantere na beto ya kubongisa mbote ketungaka bo na kimpeve. Beto kesalaka mpi mambu ya mbote ntangu beto kesadilaka bamwaye na beto sambu na kuyidika Nzo ya Kimfumu mpi ntangu beto kepesaka lusadisu sambu na kubongisa yo. (2 Bantotila 22:3-7; 2 Korinto 9:6, 7) Ya kyeleka, “ntangu yonso ya beto ke mona mpila, beto sala bantu yonso mbote, nkutu bampangi na beto bakristo.”—Galatia 6:10.
25 Beto lenda zaba ve na ntwala mambu yonso yina kelomba nde beto sala mambu ya mbote. Yo yina, bika beto sosa ntangu yonso nsemo ya Masonuku, beto lomba mpeve santu ya Yehowa na kisambu, mpi beto sala ngolo sambu na kusala lukanu na yandi ya mbote mpi ya kukuka ntangu ya beto kekutana ti mpasi. (Roma 2:9, 10; 12:2) Beto lenda tula ntima nde Yehowa tasakumuna beto mingi kibeni mutindu beto kelanda na kusala mambu ya mbote.
Inki Mutindu Nge Lenda Vutula?
• Inki mutindu beto lenda sala mambu ya kuluta mbote?
• Sambu na nki Biblia kebingaka kusala mambu ya mbote nde “mbuma ya nsemo”?
• Sambu na nki Biblia kebingaka bumbote nde “mbuma ya mpeve”?
• Bikalulu na beto ya mbote kebutaka nki mbuma?
[Bangyufula ya disolo ya kulonguka]
[Kifwanisu ya kele na lutiti 15]
Ndinga ya Nzambi ti mpeve santu na yandi kesadisaka beto na kusala mambu ya mbote
[Bifwanisu ya kele na lutiti 16]
Kusala mambu ya mbote kebutaka bambuma ya mbote