Beto Mefwana na Kuvanda Balongi ya Ndinga ya Nzambi

“Nzambi . . . me pesaka beto ngolo na kusala kisalu ya [kuvanda baministre, NW].”​—2 KORINTO 3:5, 6.

1, 2. Inki bikesa bantu kesalaka mbala mingi sambu na kulonga nsangu ya mbote, kansi sambu na nki bo kenungaka ve ntangu yonso?

 INKI mutindu nge takudiwa kana bo mepesa nge kisalu mosi ya nge mezaba ve na kusala? Yindula fyoti: Bo mepesa nge bisadilu yonso ya nge fwete vanda na yo mfunu, mpi bima ya nge fwete sadila kele pana. Kansi, nge kezaba ve nki mutindu nge lenda yantika kusala kisalu yina. Kuluta dyaka, kisalu yango fwete salama nswalu mpenza. Bantu yonso ketula ntima kaka na nge. Yo tapesa nge mpenza mpasi mingi na ntima!

² Dyambu ya mpasi ya mutindu yai kesalamaka mbala mingi. Baka mbandu yai. Mbala mingi, mosi na kati ya mabundu ya Kikristu memekaka na kuyidika mpi kusala kisalu ya nzo na nzo. Mbala mingi bikesa ya mutindu yina kenungaka ve, yo kesukaka na nima ya bamposo to bangonda. Sambu na inki? Sambu Kikristu mesadisaka ve bantu na yo na kuzaba kusala kisalu yai. Ata bamfumu ya mabundu kekukaka ve na kusala kisalu yai ya kulonga, ata bo kelongukaka bamvula mingi na banzo-nkanda ya nene ti baseminere. Sambu na nki beto ketuba mutindu yina?

3. Inki bangogo bo mesadila mbala tatu na 2 Korinto 3:5, 6, mpi nki yo ketendula?

³ Ndinga ya Nzambi ketendula mambu yina kesalaka nde muntu kufwana na kuvanda nsamuni ya kyeleka ya nsangu ya mbote ya Bukristu. Ntumwa Polo kusonikaka na ngolo ya mpeve santu nde: “Beto lenda tuba ve nde beto lunga [“kele na ngolo ya,” NW] kusala kisalu yai na ngolo na beto mosi. Kansi ngolo yina ya beto ke sa[di]laka kisalu yai yo ke katukaka na Nzambi. Sambu yandi muntu me pesaka beto ngolo na kusala kisalu.” (2 Korinto 3:5, 6) Na kisika yai, bo mesadila bangogo ‘ngolo ya kusala kisalu’ mbala tatu. Inki yo kezola kutuba? Mukanda mosi (Vine’s Expository Dictionary of Biblical Words) ketuba nde: “Kana bo mesadila yo sambu na kutubila bima, [ngogo ya ntete ya Kigreki ya bo mebalula nde ‘ngolo ya kusala kisalu’] ketendula ‘kulunga’. . . ; kana bo mesadila yo sambu na bantu, yo ketendulaka ‘kufwana,’ ‘kukuka.’” Yo yina, muntu yina kele “na ngolo ya kusala kisalu” mefwana mpi yandi mekuka na kusala kisalu mosi. Ya kyeleka, bansadi ya kyeleka ya nsangu ya mbote kele na ngolo ya kusala kisalu yai. Bo mefwana, bo mezaba, to bo mekuka na kusala kisalu ya kulonga nsangu ya mbote.

4. (a) Inki mutindu mbandu ya Polo kemonisa nde bantu fyoti ya mayele mpamba ve bantu fwete vanda na ngolo ya kusala kisalu ya Bukristu? (b) Inki bamwaye tatu Yehowa kesadilaka sambu na kupesa beto ngolo ya kusala kisalu bonso baministre?

⁴ Kansi, ngolo yango ya kusadila kisalu kekatukaka wapi? Keti na mayele ya muntu yandi mosi? Na ngangu ya banzo-nkanda ya nene? Na malongi ya sikisiki yina muntu mebaka na banzo-nkanda ya lukumu ya mezabanaka mingi? Ntembe kele ve nde ntumwa Polo kuvandaka na mambu yina yonso. (Bisalu 22:3; Filipi 3:4, 5) Kansi, na kudikulumusa yonso, yandi ndimaka nde ngolo yonso yina yandi vandaka na yo ya kusala kisalu kukatukaka ve na banzo-nkanda ya nene, kansi na Yehowa Nzambi. Keti kibuka ya bantu fyoti ya mayele mpamba bantu fwete vanda na ngolo ya kusala kisalu? Polo kusonikilaka dibundu ya Korinto sambu na yina metala “ngolo yina ya beto ke sa[di]laka kisalu.” Ntembe kele ve nde mambu yai kemonisa nde bansadi na yandi yonso  ya kwikama kele na ngolo ya kusala kisalu, disongidila bo mekuka na kusala kisalu ya yandi mepesaka bo na kusala. Inki mutindu Yehowa kepesaka Bakristu ya kyeleka ngolo ya kusala kisalu bubu yai? Bika beto tadila bamwaye tatu ya yandi kesadilaka: (1) Ndinga na yandi, (2) mpeve na yandi ya santu, mpi (3) organizasio na yandi ya kele na ntoto.

Ndinga ya Yehowa Kepesaka Beto Ngolo

5, 6. Inki Masonuku ya Santu kesalaka na luzingu ya Bakristu ya kyeleka?

⁵ Ntetentete, inki mutindu Ndinga ya Nzambi kepesaka beto ngolo ya kusala kisalu bonso baministre? Polo kusonikaka nde: “Bo sonikaka Mukanda ya Nzambi yonso na ngolo na yandi; mambu yonso kele na kati yo kele mfunu sambu na kulonga bantu mambu ya kieleka, sambu na kusungika bifu yina kele na mambu ya bantu ke longuka, sambu na kubongisa bantu, ti sambu na kulonga bantu na kuzinga luzingu mosi ya kinzambi. Mpidina muntu ya Nzambi ta vandaka me yilama mbote-mbote, yandi ta vanda na mpila ya mbote ya kusala konso kisalu ya mbote.” (2 Timoteo 3:16, 17) Yo yina Masonuku ya Santu kesadisaka beto na ‘kuyilama mbote-mbote mpi kuvanda na ngolo’ ya ‘kusala kisalu’ ya kulonga bantu Ndinga ya Nzambi. Ebuna, inki beto lenda tuba sambu na bantu yina kesambilaka na mabundu ya Kikristu? Sambu bo mpi kesadilaka Biblia. Inki mutindu mukanda mosi lenda sadisa bantu ndambu na kukuka kusala kisalu bonso baministre kansi bankaka ve? Mvutu na ngyufula yai ya kemonana bonso mpasi na kuvutula kekatuka na mutindu beto mosi ketadilaka Biblia.

⁶ Yo kele mawa mingi na kumona nde, bantu mingi ya kekwendaka na mabundu kendimaka ve nsangu yina kele na Biblia nde “ya kieleka, yo kele nsangu ya Nzambi.” (1 Tesalonika 2:13) Kikristu mesalaka mambu ya nsoni kibeni na dyambu yai. Na nima ya kulutisa bamvula mingi na kulonguka na banzo-nkanda ya teolozi, keti bamfumu ya mabundu meyilamaka mbotembote sambu na kuvanda balongi ya Ndinga ya Nzambi? Ata fyoti ve. Nkutu, bana yankaka keyantikaka banzo-nkanda na bo bonso bantu ya kekwikilaka na Biblia kansi ntangu bo kemanisaka banzo-nkanda na bo, bo kendimaka dyaka ve mambu yina Biblia ketubaka! Yo yina, na kisika ya kulonga Ndinga ya Nzambi, yina mingi na kati na bo kekwikilaka dyaka ve, bo keyantikaka kulonga mambu yankaka, kudikotisa na mambu ya politiki, kulonga nde evanzile fwete sadisa bantu na kumanisa bampasi na bo, to kutubila mingi mambu ya filozofi ya bantu na malongi na bo. (2 Timoteo 4:3) Kansi, Bakristu ya kyeleka kelandaka mbandu ya Yezu Kristu.

7, 8. Inki mutindu bangindu yina Yezu kuvandaka na yo sambu na Ndinga ya Nzambi meswaswana ti ya bamfumu ya mabundu ya ntangu na yandi?

⁷ Yezu kundimaka ve nde bamfumu ya mabundu ya ntangu na yandi kubalula bangindu na yandi. Yo vanda na ntangu yandi vandaka kulonga kamwa kibuka ya fyoti, mu mbandu bantumwa na yandi, to kibuka ya bantu mingi, Yezu kusadilaka mbote masonuku ya santu. (Matayo 13:10-17; 15:1-11) Kusala  mutindu yai kumonisaka luswaswanu yina vandaka na kati na yandi ti bamfumu ya mabundu ya ntangu yina. Bo vandaka kulembisa mpenza bantu nitu na kukonda kusosa kuzaba mambu ya nene ya Nzambi. Ya kyeleka, yo vandaka kusalama mbala mingi na bilumbu yina nde longi kuyindula nde mikapu yankaka ya Biblia ya ketubilaka mambu ya nene yandi fwete tubila yo ve na bana ya nzo-nkanda yonso kansi ti mwana ya nzo-nkanda yina yandi vandaka kuzola mingi. Ata mpidina, yandi vandaka kutuba na ndinga ya nsi-nsi mpi ntu ya kufika lele. Bamfumu ya mabundu yina vandaka kubuya na kutubila mikapu yankaka ya Biblia kaka mutindu bo vandaka kubuya na kutanga zina ya Nzambi!

⁸ Kristu vandaka kusala ve mpidina. Yandi vandaka kundima ve nde kaka bantu fyoti mpamba ya mayele fwete zaba “mambu yina yonso ya Nzambi ke tubaka,” kansi bantu yonso fwete zaba yo. Yezu kuyindulaka ve na kupesa kibuka ya fyoti ya bantu ya mayele dibaku ya kubakisa Masonuku. Yandi songaka balongoki na yandi nde: “Mambu yina ya mono ke tubila beno na mpimpa, beno fweti tuba yo na mwini; mambu yina ya beno ke wa na kinsweki, beno fweti zabisa yo na meso ya bantu.” (Matayo 4:4; 10:27) Yezu kuvandaka mpenza na mpusa ya kuzabisa bantu mingi nzayilu ya Nzambi.

9. Na nki ntangu Bakristu ya kyeleka kesadilaka Biblia?

⁹ Ndinga ya Nzambi fwete baka kisika ya ntete mpenza na malongi na beto. Mu mbandu, kana beto kesala diskure na Nzo ya Kimfumu ya Bambangi ya Yehowa, beto fwete suka ve kaka na kutanga mwa baverse ya beto mepona na Biblia. Yo lenda lomba nde beto tendula, kupesa mbandu, mpi kumonisa mutindu beto lenda sadila verse yango. Lukanu na beto kele ya kukatula nsangu ya Biblia na mukanda sambu na kukotisa yo na ntima ya bawi na beto. (Nehemia 8:8, 12) Beto fwete sadila mpi Biblia na ntangu yo kelomba kupesa ndongisila to na kupesa ndola. Ata bantu ya Yehowa ketubaka bandinga ya kuswaswana mpi mekatukaka na bisika mingi ya kuswaswana, bo yonso kezitisaka Biblia, Mukanda ya meluta mikanda yonso.

10. Inki nsangu ya Biblia ya bo mesonikaka na ngolo ya mpeve lenda sala na luzingu na beto?

¹⁰ Kana bo mesadila yo ti luzitu ya mutindu yai, nsangu ya Biblia kevandaka na ngolo mingi. (Baebreo 4:12) Yo kepusaka bantu na kubalula luzingu na bo, mu mbandu kubuya na kusala mambu yina kewakana ve na Masonuku bonso bizumba, pite, kusambila biteki, kulauka malafu, mpi muyibi. Yo mesadisaka bantu mingi na kulosa kimuntu ya ntama mpi kulwata kimuntu ya mpa. (Efezo 4:20-24) Kana beto kezitisa yo ntetentete na ntwala ya bangindu ya bantu to ya nsiku ya bambuta mpi kesadila yo na kwikama yonso, Biblia lenda sadisa beto na kuyilama mbotembote mpi kumona mpila ya kusala bonso balongi ya Ndinga ya Nzambi.

JMpeve ya Yehowa Kepesaka Beto Ngolo

11. Sambu na nki yo mefwana mpenza na kubinga mpeve santu ya Yehowa nde “nsadisi”?

¹¹ Ya zole, bika beto tubila kisalu yina mpeve santu ya Yehowa, to ngolo na yandi, kesadisaka beto na kuyilama mbotembote. Beto fwete vila ve nde mpeve ya Yehowa kele ngolo ya meluta bangolo yonso. Yehowa kupesaka ngolo na Mwana na yandi ya yandi kezolaka mingi na mpila nde yandi sadila yo sambu na mambote ya Bakristu ya kyeleka. Yo yina, Yezu kubingaka mpeve santu nde “nsadisi.” (Yoane 16:7, NW) Yandi longisilaka balongoki na yandi na kulomba Yehowa mpeve yango, mpi yandi ndimisaka bo nde Yehowa tapesa bo yo kukonda mpasi.​—Luka 11:10-13; Yakobo 1:17.

12, 13. (a) Sambu na nki yo kele mfunu nde beto samba sambu na kulomba mpeve santu na kusadisa beto na kisalu na beto ya kulonga? (b) Inki mutindu Bafarize kumonisaka nde mpeve santu vandaka kusala ve na ntima na bo?

¹² Beto fwete sambaka sambu na kulomba mpeve santu konso kilumbu, mingimingi sambu yo sadisa beto na kisalu na beto ya kusamuna. Inki bupusi ngolo yai lenda vanda na yo na zulu na beto? Yo lenda vanda na bupusi na mabanza ti na ntima na beto, kusadisa beto na kubalula luzingu na beto, na kuyela na kimpeve, mpi na kuyingisa kimuntu ya ntama na kimuntu ya mpa. (Kolosai 3:9, 10) Yo lenda sadisa beto na kuyedisa bikalulu ya mbote, bonso yina Kristu kuvandaka na yo. Mingi na kati na beto lenda tanga Galatia 5:22, 23 na ntu. Baverse yai ketangaka bambuma ya mpeve ya Nzambi. Mbuma ya ntete kele zola. Kikalulu yai kele mfunu mingi sambu na kisalu na beto. Sambu na inki?

¹³ Zola kevandaka na ngolo ya kupusa beto na kusala mambu. Zola yina Bakristu ya kyeleka kevandaka na yo na Yehowa ti bampangi na bo kepusaka bo na kuzabisa nsangu ya mbote. (Marko 12:28-31) Kana beto kele ve na zola ya mutindu yai, ntembe kele ve nde beto takuka mpenza ve kukuma balongi ya Ndinga ya Nzambi. Tala luswaswanu yina kuvandaka na kati ya Yezu ti Bafarize. Matayo 9:36 ketubila mutindu Yezu kusalaka: “Ntangu yandi monaka bantu mingi-mingi, yandi wilaka bo mawa, sambu bo vandaka me lemba, kikesa ve, bonso mameme  me konda ngungudi ya kutala bo.” Inki Bafarize vandaka kuyindula sambu na bantu? Bo vandaka kutuba nde: ‘Bantu yina kuzaba ve Bansiku ya Moize Nzambi me singaka bo.’ (Yoane 7:49) Bafarize yina vandaka kuzola ve bantu mpi bo vandaka kuvweza bo mingi. Yo ke pwelele nde mpeve ya Yehowa vandaka kusala ve na ntima na bo.

14. Inki mutindu mbandu ya Yezu ya kusonga zola na kisalu na yandi fwete vanda na bupusi na zulu na beto?

¹⁴ Yezu vandaka kuwila bantu mawa. Yandi vandaka kuzaba bampasi na bo. Yandi zabaka nde bo vandaka kuvweza bo, bo vandaka ya kukonda mingi, mpi ata muntu mosi ve vandaka kutala bo bonso mameme yina mekonda ngungudi. Yoane 2:25 kezabisa beto nde Yezu “zabaka mbote-mbote mambu yina kele na kati ya ntima ya bantu.” Sambu yandi vandaka Kapita ya Kisalu ya Yehowa na ntangu yandi vandaka kusala bima yonso, Yezu kuzabaka mbote mutindu bantu mesalamaka. (Bingana 8:30, 31) Kuzaba mambu yina kukumisaka zola na yandi ngolo. Bika nde zola ya mutindu yina kuvanda ntangu yonso kima ya kepesaka beto kikesa sambu na kusala kisalu na beto! Kana beto mona nde beto kekuka ve na kutomisa mambu ya metala kisalu yai, bika beto lomba mpeve santu na Yehowa mpi na nima beto sala mambu ya kewakana ti bisambu na beto. Yehowa tawila beto. Yandi tatindila beto ngolo yai ya meluta bangolo yonso na kusadisa beto na kuvanda bonso Kristu, yina kuvandaka mpenza ya kuyilama mbotembote sambu na kulonga nsangu ya mbote.

15. Inki mutindu mambu yina kele na Yezaya 61:1-3 kelungana na Yezu mpi yo kemonisa mbi ya baskribe ti Bafarize?

¹⁵ Ngolo ya kusala kisalu yina Yezu kuvandaka na yo kukatukaka wapi? Yandi tubaka nde: “Mpeve ya Mfumu Nzambi kele na mono.” (Luka 4:17-21) Ya kyeleka, Yehowa yandi mosi kuponaka Yezu na nsadisa ya mpeve santu na yandi. Yezu kuvandaka dyaka ve na mfunu ya kima yankaka sambu na kundimisa yandi dyambu yai. Keti mpeve santu muntu kuponaka bamfumu ya mabundu ya ntangu na yandi? Ve. Bo yilamaka mpi ve mbotembote sambu na kulungisa mambu yina Yezaya 61:1-3 ketuba, yina Yezu kutangaka na ndinga ya ngolo mpi kumonisaka nde yo kelungana na yandi mosi. Beto kelomba nge na kutanga baverse yina, mpi kudimonina nge mosi nde baskribe ti Bafarize ya luvunu kuyilamaka mpenza ve sambu na kusala kisalu yina. Bo vandaka ve na nsangu ya mbote ya kuzabisa na bansukami. Inki mutindu bo zolaka kulonga kimpwanza na bampika mpi kubeluka ya meso ya bifwa-meso? Na mutindu mosi ya kimpeve, bo mosi mpi kuvandaka bifwa-meso mpi bampika ya bansiku ya bambuta! Beto kele kiteso mosi ve ti bo sambu beto mefwana na kulonga bantu.

16. Kutula ntima ya nki mutindu bantu ya Yehowa kevandaka na yo sambu na yina metala ngolo na bo na kusala kisalu bonso baministre?

¹⁶ Ya kyeleka, beto melongukaka ve na banzo-nkanda ya nene ya Kikristu. Beto mebakaka mpi ve badiplome ya kukuma balongi na baseminere ya bo kelongaka teolozi. Keti yo ketendula nde beto mefwana ve na kusala kisalu? Ata fyoti ve! Yehowa muntu keponaka beto bonso Bambangi na yandi. (Yezaya 43:10-12) Kana beto kelomba mpeve na yandi mpi kesala na kuwakana ti bisambu na beto, beto tabaka mpenza ngolo ya kuluta bangolo yonso. Ya kyeleka, beto kele bantu ya kukonda kukuka mpi beto kekukaka ve na kulanda mpenza mbandu yina Longi ya Nene, Yezu kubikaka. Kansi, keti beto kepesa ve Yehowa mersi sambu yandi kesadilaka mpeve na yandi sambu na kupesa beto ngolo ya kusala kisalu mpi sambu beto yilama na kuvanda balongi ya Ndinga na yandi?

Organizasio ya Yehowa Kepesaka Beto Ngolo

17-19. Inki mutindu balukutakanu tanu yina organizasio ya Yehowa kesalaka konso mposo kesadisaka beto na kukuma bantu ya mefwana na kuvanda baministre?

¹⁷ Bika ntangu yai beto tubila mwaye ya tatu ya Yehowa kesadilaka sambu na kupesa beto ngolo ya kuvanda balongi ya Ndinga na yandi, kima yango kele dibundu na yandi ya kele na zulu ya ntoto, to organizasio na yandi, ya kelongaka beto na kukuma baministre. Inki mutindu? Yindula ntete programe ya kulonguka ya beto kele na yo! Na mposo mosi, beto kevandaka na balukutakanu ya Bukristu tanu. (Baebreo 10:24, 25) Beto kevukanaka na tubimvuka ya fyoti na Kulonguka ya Mukanda ya Dibundu sambu na kulonguka Biblia na mudindu na nsadisa ya mukanda mosi yina organizasio ya Yehowa mebasisaka. Na ntangu beto kewidikilaka na dikebi yonso mpi kepesaka bamvutu, beto mosi kelongukaka mambu mingi mpi beto kepesaka bankaka kikesa. Nkengi ya kulonguka ya mukanda kelongaka mpi ketudilaka konso muntu ya kimvuka dikebi. Na Lukutakanu ya Bantu Yonso mpi na Kulonguka ya Nzozulu ya Nkengi, beto kedyaka bima mingi ya mbote ya kimpeve.

¹⁸ Nzo-Nkanda ya Kisalu ya Teokrasi na beto mesalamaka sambu na kusonga beto mutindu ya kulonga. Ntangu beto kebongisaka masolo ya bana ya  nzo-nkanda, beto kelongukaka mutindu ya kusadila Ndinga ya Nzambi sambu na kulonga na kusadilaka masolo mingi ya kuswaswana. (1 Piere 3:15) Keti bo mepesaka nge dezia disolo mosi ya nge vandaka kumona nde nge mezaba yo mbote kibeni, kansi na nima nge longukaka mambu mingi ya mpa na disolo yango? Dyambu yina kekuminaka beto yonso. Ke na kima yankaka ve kesadisaka beto na kubakisa mbote disolo mosi kuluta ntangu beto kelongaka bantu yankaka. Ata bo mepesa beto ve disolo ya kusala na meso ya bantu, beto lenda longuka kaka na kuvanda balongi ya mbote. Beto kemonaka bikalulu ya mbote na konso mwana ya nzo-nkanda, ebuna beto lenda yindula mutindu beto mpi lenda monisa bikalulu yango.

¹⁹ Bo mesalaka mpi Lukutakanu ya Kisalu sambu na kusadisa beto na kukuma balongi ya mbote ya Ndinga ya Nzambi. Konso mposo, beto kelandaka badiskure ya kitoko, masolo, ti bansonga yina ketubilaka mambu ya metala kisalu na beto ya kulonga. Inki bangogo ya kukotila na masolo beto tasadila na kusolula ti bantu? Inki mutindu beto lenda nunga ntembe yina beto kekutana na yo na kisalu na beto? Inki mitindu ya kisalu ya kusamuna kele na ntwala na beto ya beto lenda sosa kusala dyaka mingi? Inki tasadisa beto na kukuma balongi ya mbote na ntangu beto kevutukila bantu mpi kelonguka Biblia ti bo? (1 Korinto 9:19-22) Beto ketubilaka mpi kebakaka bamvutu na bangyufula ya mutindu yai na Lukutakanu ya Kisalu. Badevware mingi ya lukutakanu yai beto kebakaka yo na Kisalu na Beto ya Kimfumu, kisadilu yankaka yina organizasio ya Yehowa mepesaka beto sambu na kusala kisalu yai ya mfunu.

20. Inki mutindu beto lenda baka mambote na balukutakanu ya dibundu ti balukutakanu ya nene?

²⁰ Na ntangu beto kekudibongisaka mpi kekwendaka na balukutakanu mpi mutindu beto kesadilaka mambu ya beto kelongukaka na kisalu na beto ya kulonga, beto keyikaka dyaka mayele mingi. Kansi beto kevandaka dyaka na baokazio yankaka ya kulonguka. Beto kele mpi na balukutakanu ya nene: balukutakanu ya kilumbu mosi, ya nzyunga ti ya distrike ya bo mesalaka sambu na kusadisa beto na kukuma mpenza balongi ya mefwana na kulonga Ndinga ya Nzambi. Ebuna beto keyilamaka mpenza na kulanda na dikebi yonso mpi na kusadila bandongisila yina yonso!​—Luka 8:18.

21. Inki kima kemonisa mpenza nde kulonguka na beto mebutaka mbuma, mpi nani muntu kebaka lukumu sambu na mambu yai?

²¹ Keti malongi yina Yehowa kepesaka mebutaka mbuma? Bika mambu yina kesalama yo mosi kupesa mvutu. Konso mvula, bantu mingi kibeni kebakaka lusadisu yina kepesaka bo nzila ya kuzaba malongi ya luyantiku ya Biblia mpi bo kewakanisa luzingu na bo ti mambu yina Nzambi kelombaka bo. Ntalu na beto ke na kukuma kaka mingi, kansi ata muntu mosi ve lenda bula ntulu nde yo kesalama buna na ngolo na yandi. Beto fwete tadila mambu na masonga yonso mutindu Yezu kusalaka. Yandi tubaka nde: “Ata muntu mosi ve lenda kwisa na mono kana Tata yina tindaka mono me benda yandi ve.” Mutindu bantumwa kuvandaka, mingi na kati na beto melongukaka ve mpi bo kele ve bantu ya lukumu. (Yoane 6:44; Bisalu 4:13) Kununga na beto kekatukaka na Yehowa, yina kebendaka bantu ya ntima ya masonga na kyeleka. Ntumwa Polo kutubaka yo pwelele nde: “Mono muntu kunaka mbuma, Apolo muntu losilaka yo masa, kansi Nzambi muntu yedisaka kimenina.”​—1 Korinto 3:6.

22. Sambu na nki beto fwete lemba nitu ve sambu na yina metala kusala mbotembote kisalu ya Bukristu?

²² Ya kyeleka, Yehowa Nzambi muntu kesalaka dikabu ya nene na kisalu na beto ya kulonga Ndinga na yandi. Beto kekudiwaka ve ntangu yonso nde beto mefwana na kuvanda balongi. Kansi, beto vila ve nde, Yehowa muntu kebendaka bantu na yandi mosi ti Mwana na yandi. Yehowa muntu kepesaka beto ngolo sambu na kulonga bantu yonso ya mpa na nsadisa ya Ndinga na yandi, ya mpeve santu na yandi, mpi ya organizasio na yandi yina kele na ntoto. Bika beto yonso kundima malongi yina Yehowa kepesa beto mpi beto sadila mambu yina yandi kelonga beto ntangu yai sambu beto kuma balongi ya mefwana mpenza na kulonga Ndinga ya Nzambi!

Inki Mutindu Nge Tavutula?

• Inki mutindu Biblia kepesaka beto ngolo ya kusala kisalu ya kulonga?

• Inki kisalu mpeve santu kesalaka sambu na kupesa beto ngolo ya kuvanda baministre?

• Na nki mitindu organizasio ya Yehowa mesadisaka nge na kukuma nsamuni ya nsangu ya mbote ya mefwana?

• Sambu na nki beto fwete vanda na mabanza ya mbote na ntangu beto mekwenda na kisalu ya kulonga?

[Bangyufula ya disolo ya kulonguka]

[Kifwanisu ya kele na lutiti 19]

Sambu yandi vandaka longi ya Ndinga ya Nzambi, Yezu vandaka kuzola bantu