Mutindu ya Kununga na Kuzinga ti “Nsende na Nitu”

“[Mambote na mono ya nge mefwana ve na kubaka, NW] kele mambu yonso ya nge ke na yo mfunu.”​—2 KORINTO 12:9.

1, 2. (a) Sambu na nki beto fwete vidisa ve kivuvu kana beto kukutana ti mimekamu mpi mambu ya mpasi? b) Sambu na nki beto lenda tula kaka ntima ata beto kenwana ti mambu ya mpasi?

 “BANTU yonso yina ke zolaka kulemfuka na Nzambi na kimvuka ti Yesu Kristo, bo ta monisaka bo mpasi.” (2 Timoteo 3:12) Sambu na inki? Satana ketubaka nde bantu kesadilaka Nzambi kaka sambu na mambote na bo mosi, ebuna yandi kesalaka ngolo sambu na kumonisa nde bangindu na yandi kele ya kyeleka. Kilumbu mosi Yezu kukebisaka bantumwa na yandi ya kwikama nde: “Satana me baka nswa ya kumeka beno.” (Luka 22:31) Yezu kuzabaka mbote nde Nzambi kepesaka nzila nde Satana kumeka beto na nzila ya mambu mingi ya mpasi. Ya kyeleka, yo kezola kutuba ve nde konso mpasi yina mebwila beto na luzingu kekatukaka mbala mosi na Satana to na bademo na yandi. (Longi 9:11) Kansi Satana ke ya kuyilama sambu na kusadila bamwaye yonso yina yandi kele na yo sambu na kubwisa kukangama na beto.

² Biblia kesonga beto nde beto fwete vidisa ve kivuvu na ntwala ya mimekamu yina mekumina beto. Beto fwete zaba nde konso nki mambu yina mebwila beto, yo kele ve ya mpa to ya kukonda kuzaba. (1 Piere 4:12) Na kuta masonga, “bampangi na beno yina me mwanganaka na bansi yonso bo ke monaka mpasi mpi ya kiteso mosi.” (1 Piere 5:9) Bubu yai, Satana ke na kumeka mpenza bansadi yonso ya Nzambi. Dyabulu kewaka kyese na kumona beto kenyokwama na mambu mingi ya mpasi ya kele bonso bansende. Sambu yandi nunga, yandi kesadilaka ngidika na yandi ya bima na mpila nde yo yika to yo kumisa ‘bansende mingi na nitu na beto.’ (2 Korinto 12:7) Kansi, kunwanisa yina Satana kenwanisaka beto fwete fwa ve kukangama na beto na Nzambi. Kaka mutindu Yehowa ‘ta pesa beto ngolo’ ya kunwana ti mpukumuna, yandi tasala mpi mutindu mosi kana beto mekutana ti bampasi yina kele bonso bansende na kati ya nitu na beto.​—1 Korinto 10:13.

Mutindu ya Kuzinga ti Nsende

3. Inki mvutu Yehowa kupesaka Polo ntangu yandi kulombaka nde Yehowa kukatula yandi nsende yina yandi vandaka na yo na nitu?

³ Ntumwa Polo kulombaka Nzambi na kukatula nsende yina yandi vandaka na yo na nitu. “Mono sambaka Mfumu . . . mbala tatu sambu yandi katula mono [nsende yina, NW].” Inki mvutu Yehowa kupesaka na Polo sambu na kulomba na yandi ya kikesa? “[Mambote na mono ya nge mefwana ve na kubaka, NW] kele mambu yonso ya nge ke na yo mfunu, sambu ngolo na mono ke lutaka kumonika na ntangu yina ya nge ke na kikesa ve.” (2 Korinto 12:8, 9) Bika beto tadila mvutu yai mpi beto tala nki mutindu yo lenda sadisa beto na kuzaba kuzinga ti mambu ya mpasi yina kele bonso bansende ya kepesaka beto mpasi.

4. Balusakumunu ya nki mutindu Polo kubakaka sambu na mambote ya Yehowa ya yandi fwanaka ve na kubaka?

 ⁴ Simba nde Nzambi kusyamisaka Polo na kumonisa ntonda sambu na mambote ya yandi fwanaka ve na kubaka yina Nzambi kumonisaka yandi dezia na nsadisa ya Kristu. Ya kyeleka, Polo kubakaka balusakumunu mingi mpi na mitindu mingi. Na zola yonso Yehowa kupesaka yandi dibaku ya nene ya kukuma longoki, ata yandi vandaka mbeni ya ngolo ya balongoki ya Yezu. (Bisalu 7:58; 8:3; 9:1-4) Na nima, Yehowa kumonisaka ntima na yandi ya mbote yonso na mpila yandi pesaka Polo mikumba mingi ya kitoko. Dilongi ya beto kebaka na mambu yai kele pwelele. Ata luzingu mekuma mpasi nki mutindu, beto kele kaka ti balusakumunu mingi ya beto fwete pesila mersi. Bika bampasi yina beto kemona kunata beto ve na kuvila mambote mingi yina Yehowa mesadilaka beto.​—Nkunga 31:19.

5, 6. (a) Inki mutindu Yehowa kulongaka Polo nde ngolo ya Nzambi ‘kemonikaka ntangu yandi ke na kikesa ve’? Inki mutindu mbandu ya Polo kumonisaka nde Satana kele muntu ya ketubaka luvunu?

⁵ Mambote ya Yehowa ya beto mefwana ve na kubaka kesadisaka beto na mutindu yankaka dyaka. Ngolo ya Nzambi kefwana mpenza sambu na kusadisa beto na ntangu beto kenwana ti mambu ya mpasi. (Efezo 3:20) Yehowa kulongaka Polo nde ngolo ya Nzambi ‘kemonikaka ntangu muntu ke na kikesa ve.’ Inki mutindu? Na zola yonso, Nzambi pesaka Polo ngolo ya yandi vandaka na yo mfunu sambu yandi kuka kuzinga ti mpasi yina kubwilaka yandi. Ebuna kukanga ntima ya Polo ti ntima ya yandi vandaka kutula na Yehowa kumonisaka na Bakristu yonso nde ngolo ya Nzambi kunungaka na mambu yina kubwilaka muntu yai ya kukonda ngolo mpi ya masumu. Yindula ntangu yai nki yo salaka na ntima ya Dyabulu, ya ketubaka nde bantu kesadilaka Nzambi kaka kana luzingu na bo kele mbote mpi kukonda mambu ya mpasi. Kukangama ya Polo kuvandaka bonso mbata na luse ya muntu yina ya luvunu!

⁶ Tala mutindu ya muntu yina Polo kuvandaka. Yandi vandaka ntete nsadi ya Satana ya kenwanisaka Nzambi, mbeni ya ngolo ya vandaka kumonisa Bakristu mpasi, Mufarize mosi ya kikesa yina, ntembe kele ve, kuvandaka ti bima mingi na luzingu sambu yandi butukaka na dibuta mosi yina kuvandaka ti kimvwama mpi lukumu mingi. Ntangu yai Polo vandaka kusadila Yehowa mpi Kristu bonso nde ‘bantumwa yonso meluta yandi.’ (1 Korinto 15:9) Yo yina, yandi vandaka kulemfuka na kiyeka ya nto-kimvuka ya Bakristu ya mvu-nkama ya ntete. Ebuna yandi vandaka kukanga kaka ntima na kwikama yonso ata yandi vandaka ti nsende na nitu. Ata Satana kuwaka makasi mingi, bampasi ya luzingu kulembisaka ve ngolo ya Polo. Yandi vilaka mpi ve kivuvu yina yandi vandaka na yo ya kuvanda na Kimfumu ya zulu ya Kristu. (2 Timoteo 2:12; 4:18) Kansi, ata nsende mosi ve kukukaka na kufyotuna ngolo na yandi. Bika kikesa na beto mpi kuvanda ngolo bonso ya Polo! Na mpila yandi kepesaka beto ngolo na ntangu beto kemona mpasi, Yehowa kepesaka beto lukumu ntangu yandi kepesaka beto okazio ya kumonisa nde Satana kele muntu ya ketubaka luvunu.​—Bingana 27:11.

Mambu Yina Yehowa Meyidikaka Kele Mfunu Mingi

7, 8. (a) Inki bima Yehowa kesadilaka sambu na kupesa bansadi na yandi ngolo bubu yai? (b) Sambu na nki kutanga mpi kulonguka Biblia mbala na mbala kele mfunu mingi sambu na kuzaba kuzinga ti nsende yina beto kele na yo na nitu?

⁷ Bubu yai, Yehowa kepesaka Bakristu ya kwikama ngolo na nsadisa ya mpeve santu na yandi, ya Ndinga na yandi, mpi ya bampangi na beto Bakristu. Bonso ntumwa Polo, beto lenda pesa kilo na beto na Yehowa na kisambu. (Nkunga 55:22) Ata Nzambi lenda katula ve mimekamu yina kekuminaka beto, yandi lenda pesa beto mayele ya kuzaba mutindu ya kuzinga na yo, ata nkutu ti yina kele mpenza mpasi na kuzinga na yo. Yehowa lenda pesa beto dyaka ngolo na mpila yandi kepesaka beto “ngolo ya nene” sambu yo sadisa beto na kukanga ntima.​—2 Korinto 4:7.

⁸ Inki mutindu beto kebakaka lusadisu ya mutindu yina? Beto fwete longukaka Ndinga ya Nzambi na kikesa yonso, sambu na kati na yo beto tabaka kikesa yina yandi kepesaka. (Nkunga 94:19) Na Biblia, beto ketangaka bangogo ya kusimbaka mpenza ntima ya bansadi ya Nzambi na ntangu bo vandaka kulomba yandi lusadisu. Bamvutu ya Yehowa, yina kevandaka mbala mingi na bangogo ya kupesa kikesa, kele madya sambu na kuyindulula na beto. Kulonguka Ndinga ya Nzambi tapesa beto ngolo na mpila nde beto ‘songa na bantu nde Nzambi muntu ke na ngolo ya nene kansi beto ve.’ Kaka mutindu beto kevandaka na mfunu ya kudya madya ya kinsuni konso kilumbu sambu na kutunga nitu mpi kuvanda ngolo, mutindu mosi mpi beto fwete dyaka mambu yina Nzambi metubaka mbala na mbala. Keti beto kesalaka yo? Kana beto kesalaka yo, beto tamona nde “ngolo ya nene” ya beto kebakaka kesadisaka beto na kukanga ntima ata na ntwala ya konso mambu  yina kele bonso bansende ya kepesa beto mpasi ntangu yai.

9. Inki mutindu bankuluntu lenda sadisa bantu yina kenwana ti mambu ya mpasi?

⁹ Bakristu yina kele bankuluntu ya ketinaka Nzambi boma lenda ‘vanda bonso kisika ya kutinina mupepe ya ngolo,’ ‘kisika ya kutinina mvula,’ disongidila mambu ya mpasi. Bankuluntu yina kezolaka kulungisa mambu yai ya bo tubaka na ngolo ya mpeve ya Nzambi, kelombaka Yehowa na kudikulumusa mpi na masonga yonso na ‘kulonga bo’ na mpila nde bo lenda zaba nki mutindu kupesa mvutu na bantu yina kemona mpasi ti bangogo mosi ya mbote. Bangogo ya bankuluntu lenda vanda bonso kamwa mvula ya fyoti yina kelembika mpi kepesa mabanza na beto kikesa na ntangu beto mekutana ti mambu ya mpasi na luzingu. Kana bo kesadila bangogo ya ‘kepesa kikesa na bantu yina ke na basusi na ntima,’ bankuluntu kesadisaka mpenza bampangi na bo ya babakala ti ya bankento ya kimpeve yina lenda vanda na mawa to yina melemba nitu sambu na bansende yina kele na nitu na bo.​—Yezaya 32:2; 50:4; 1 Tesalonika 5:14.

10, 11. Inki mutindu bansadi ya Nzambi lenda pesa kikesa na bampangi na bo yankaka ya kenwana ti mimekamu ya ngolo mpenza?

¹⁰ Bansadi ya Yehowa yonso kele na kati ya dibuta na yandi ya Bukristu yina kele na bumosi. Ya kyeleka, beto “yonso mpi me vukanaka nitu mosi bonso bandambu ya nitu ya muntu,” mpi beto “fweti zolana beto na beto.” (Roma 12:5; 1 Yoane 4:11) Inki mutindu beto kelungisaka dyambu yai ya bo kelomba beto? Mutindu 1 Piere 3:8 ketuba, beto kesalaka yo na ntangu beto ‘kezolanaka beto na beto’ ti bantu yonso yina beto kele na bo lukwikilu mosi. Sambu na bantu yina kenwana ti nsende mosi ya mpasi mingi na nitu na bo, bo vanda baleke to bambuta, beto yonso lenda tudila bo dikebi mingi. Inki mutindu?

¹¹ Beto fwete sala ngolo na mpila nde bampasi na bo kusimba ntima na beto. Kana beto kewila bo ve mawa, kana ntima na beto kele bonso ditadi, to beto ketala ve ata kutala mpasi na bo, beto lenda kumisa bampasi na bo mingi dyaka kukonda kuzaba. Mutindu beto mezaba nde bo kemona mpasi, yo fwete pusa beto na kukeba na mambu ya beto ketuba, inki mutindu beto ketuba yo, mpi nki beto kesala. Kana beto kele na bangindu ya mbote mpi ketuba bangogo ya kepesa kikesa, yo lenda sadisa bo na kufyotuna bampasi ya ngolo ya bansende yina kenyokula bo. Kana beto kesala mpidina, beto tamonisa mpenza nde beto kele lusadisu ya ngolo sambu na bo.​—Kolosai 4:11.

Mutindu Bantu Yankaka Kunungaka

12-14. (a) Inki mutindu Mukristu mosi kusalaka sambu na kunwana ti bampasi ya maladi ya kansere? (b) Inki mutindu bampangi ya babakala ti bankento ya kimpeve ya nkento yai vandaka kusadisa mpi kupesa yandi kikesa?

¹² Mutindu beto mekuma penepene na nsuka ya bilumbu yai ya nsuka, mpasi ya mefwanana na “misongo” ke na kukuma mingi konso kilumbu. (Matayo 24:8) Yo yina, bampasi tabwilaka bantu yonso na zulu ya ntoto, mingimingi bansadi ya kwikama ya Yehowa, yina kesosaka kusala luzolo na yandi. Beto baka mbandu ya Mukristu mosi yina vandaka kusala kisalu ya ntangu yonso. Ba ekzame ya munganga kusongisaka nde yandi kebela kansere mpi nde yo lombaka nde bo pasula yandi na mungungu sambu na kukatula yandi bima yina kebutaka mate (glande salivaire ti lymphatique). Ntangu yandi ti bakala na yandi kuzabaka nde yandi kebela maladi yai, mbala mosi bo sambaka Yehowa ntangu ya nda kibeni  sambu na kubondila yandi. Na nima yandi tubaka nde ngemba kufulukaka na ntima na bo. Kansi, yandi monaka mpasi mpenza. Ntangu yankaka yandi vandaka kudiwa mbote, kansi ntangu yankaka mbi kibeni, mingimingi ntangu yandi vandaka kunwana ti mpasi yina bankisi ya ngolongolo ya yandi vandaka kunwa vandaka kupesa yandi.

¹³ Sambu na kuzaba nki mutindu kuzinga ti maladi na yandi, mpangi yai ya nkento kumekaka na kuzaba mbotembote maladi ya kansere. Yandi kwendaka kusolula ti badoktere na yandi. Yandi tangaka masolo yina ketubilaka luzingu ya bampangi na Nzozulu ya Nkengi, Réveillez-vous!, ti na mikanda yankaka ya Bukristu. Masolo yango kumonisaka nki mutindu bampangi yina kunwanaka na mawi na bo ti maladi yai. Yandi tangaka mpi baverse ya Biblia yina kemonisaka ngolo yina Yehowa kele na yo ya kupesa kikesa na bantu na yandi na ntangu bo kemona mpasi. Yandi bakaka mpi bansangu yankaka ya mfunu.

¹⁴ Disolo mosi yina kutubilaka mutindu ya kunwana ti mabanza ya kukonda kivuvu kuvutukilaka bangogo yai ya mayele: “Muntu yina kekudivandila yandi mosi na kingenga tasosa mambote na yandi mosi na bwimi yonso.” (Bingana 18:1, NW) Yo yina, disolo yango kupesaka ndongisila yai: “Kuzola ve kudivandila nge mosi na kingenga.” a Mpangi yina ya nkento keta nde: “Bantu mingi vandaka kusonga mono nde bo vandaka kusamba sambu na mono; bankaka vandaka kubinga mono na telefone. Bankuluntu zole vandaka kubinga mono mbala na mbala sambu na kuzaba bansangu ya mavimpi na mono. Mono vandaka kuzwa bintuntu mingi ya bo vandaka kutindila mono ti ba carte postale mingi kibeni. Nkutu bankaka vandaka kutindila mono madya. Bankaka dyaka vandaka kusonga luzolo ya mbote ya kwenda kufidisa mono bisika ya mono vandaka kubaka bankisi.”

15-17. (a) Inki mutindu Mukristu mosi kunwanaka ti bampasi yina kukuminaka yandi sambu na ba aksida ya yandi salaka? (b) Inki lusadisu bampangi ya dibundu kunatilaka yandi?

¹⁵ Nsadi mosi ya Yehowa ya mesala bamvula mingi na kisalu ya Nzambi na New Mexico, na États-Unis, kusalaka ba aksida ya kaminio mbala zole. Yandi lwalaka na nkingu ti na mapeka, ebuna yo kumisaka dyaka ngolo maladi ya mikwa yina yandi vandaka kunwana na yo dezia kuluta bamvula 25. Nkento yango ketuba nde: “Mono vandaka kukuka ve na kutedimisa ntu na mono ntangu ya nda mpi kunata kima ya meluta bakilo zole. Kansi bisambu ya kikesa na Yehowa kusadisaka mono mingi. Yika mpi masolo ya beto longukaka na Nzozulu ya Nkengi. Mpangi mosi yina kupesaka komantere na verse ya Mishe 6:8, kumonisaka nde kuvanda muntu ya kudikulumusa na ntangu beto ketambula ti Nzambi ketendula kuzaba mambu yina nge lenda sala ti yina nge lenda sala ve. Komantere yai kusadisaka mono mingi na kuzaba nde ata mono kele mbefo, mono fwete lemba nitu ve, ata nkutu ntangu ya mono melutisa na kisalu ya kusamuna kele na nsi ya kiteso ya mono kanaka na kusala. Kima meluta mfunu ntetentete na meso na yandi kele kusadila yandi ti bikuma ya mbote.”

¹⁶ Yandi ketuba dyaka nde: “Bankuluntu vandaka kusikisa mono sambu na bikesa ya mono vandaka kusala sambu na kukwenda na balukutakanu mpi kubasika na kisalu ya bilanga. Bampangi yina kele baleke vandaka kupesa mono mbote ya kikesa kibeni. Baministre yai ya kuvandaka bapasudi-nzila vandaka kukanga mpenza ntima sambu na mono mpi mbala mingi bo vandaka kusoba bamanaka na bo sambu na kukwisa kusadisa mono na bilumbu ya mono vandaka kubela mingi. Kana ntangu kele mbote ve kilumbu mosi, bo vandaka kunata mono na kyese yonso na kuvutukila bantu yina bo solulaka ti bo to kubinga mono sambu mono kwisa kuvanda kisika bo kelonguka Biblia ti bantu. Sambu mono vandaka kukuka ve na kunata sakosi ya mikanda, bansamuni yankaka vandaka kutula mikanda na mono na basakosi na bo ntangu beto vandaka kukwenda na kisalu ya kulonga.”

¹⁷ Tala mutindu bankuluntu ya dibundu ti bampangi yankaka kusadisaka bampangi ya bankento yai zole na kunwana ti bifu ya bo vandaka na yo na nitu yina kuvandaka bonso bansende. Bo natilaka bampangi yai lusadisu ya kyeleka mpi ya mefwana na kyese yonso sambu na kulungisa bampusa na bo ya kimpeve, ya nitu, mpi ya mawi. Keti mbandu yai mepesa nge ve kikesa ya kupesa lusadisu na nge na bampangi ya babakala ti ya bankento yina ke na kumona mpasi? Beno baleke, beno mpi lenda pesa lusadisu na bantu yina kele na dibundu na beno yina ke na kumona mpasi ti bansende na nitu na bo.​—Bingana 20:29.

18. Inki kikesa beto lenda baka na masolo ya ketubilaka luzingu ya bampangi yina kebasikaka na Nzozulu ya Nkengi ti na Réveillez-vous!?

¹⁸ Nzozulu ya Nkengi ti Réveillez-vous! mebasisaka masolo mingi ya ketubilaka luzingu ti baeksperiansi  ya Bambangi yina kunwanaka, mpi ti yina kenwana kaka ti bampasi na luzingu. Kana nge ketanga masolo ya mutindu yai mbala na mbala, nge tabakisa nde bampangi na nge ya kimpeve ya babakala ti ya bankento na ntoto ya mvimba ke na kunwana ti bampasi ya mbongo, basusi ya kuvidisa bampangi ya bo kezolaka na bisumbula, mpi ti luzingu ya kigonsa na bisika yina bitumba ke na kusalama. Bankaka kezingaka ti bamaladi yina kepesaka bo ve nzila ya kusala ata kima mosi. Bampangi mingi lenda sala ve ata mambu ya fyoti yina bantu ya kele na mavimpi ya mbote kesalaka kukonda mpasi. Bamaladi na bo kemekaka mpenza lukwikilu na bo, mingimingi kana bo kekuka dyaka ve kusala bisalu ya Bukristu na kiteso ya bo vandaka kukana kusala yo. Bo kepesa mersi mingi na lusadisu yina bampangi na bo ya babakala ti ya bankento, baleke ti bambuta kepesaka bo!

Kukanga Ntima Kenataka Kyese

19. Inki kusadisaka Polo na kuvanda na kyese ata yandi kutanaka ti mimekamu yina vandaka bonso bansende mpi mambu yankaka ya mpasi?

¹⁹ Polo kuvandaka na kyese na kumona mutindu Nzambi kupesaka yandi kikesa. Yandi tubaka nde: “Mono ke lutaka kumona kiese na kuditula na mambu yina ke monikaka nde mono ke na kikesa ya kusala yo ve. Mpidina ngolo ya Kristo lenda keba mono. Yo yina, kana mono ke na kikesa ve, kana bo vwenza mono, kana mono mona mpasi mingi, kana bo monisa mono mpasi, kana mono mona ntangu mingi sambu na Kristo, mono fweti mona kiese na mambu yina yonso. Sambu, kana mono ke na kikesa ve, na ntangu yo yina mono ke vandaka ngolo.” (2 Korinto 12:9, 10) Sambu yandi kukutanaka ti mambu ya mutindu mosi, Polo kutubaka na kyese yonso nde: “Mono ke tuba mpidina kele ve nde sambu mono ke na mfunu ya kima, sambu mono ke monaka kiese na kuzinga yai ya mono ke na yo, sambu mono me yikanaka ka mono. Mono zaba luzingu ya kinsukami, mono zaba mpi luzingu ya kimvwama. Mono me yikanaka ka mono na kumona kiese na mambu yonso, ata mono ke na madia ata mono ke na yo ve, ata mono ke na bima ya kuluta mingi to ya kufwana ve. Mono me lunga kusala mambu yonso na ngolo yina ya Kristo ke pesaka mono.”​—Filipi 4:11-13.

20, 21. (a) Sambu na nki beto lenda vanda na kyese na kuyindula “bima yina ke monikaka ve na meso”? (b) Inki mwa “bima ya ke monikaka ve na meso” nge ketulaka kivuvu na kumona na Paladisu na ntoto?

²⁰ Yo yina, kana beto kenwana ti mambu yina mebwila beto ya kele bonso bansende na nitu na beto, beto lenda baka kyese ya mingi na ntangu beto kemonisa na bantu yonso nde ngolo ya Yehowa kemonikaka na ntangu beto kele na ngolo ve. Polo kusonikaka nde: “Beto kele kaka na kikesa . . . Kansi mabanza ya ntima na beto ke kuma ya mpa konso kilumbu. Bampasi yai ya beto ke mona ntangu yai yo kele fioti, yo ke zinga mingi ve, kansi yo ta pesa beto lukumu mingi, lukumu ya mvula na mvula. . . . Sambu beto ke talaka . . . bima yina ke monikaka ve na meso. [Sambu] bima yina ke monikaka ve na meso, yo ke zingaka mvula na mvula.”​—2 Korinto 4:16-18.

²¹ Bubu yai bantu ya Yehowa mingi kele ti kivuvu ya kuzinga na Paladisu na ntoto sambu na kubaka balusakumunu yina yandi mesilaka. Beto lenda mona balusakumunu ya mutindu yai bonso bima ya “ke monikaka ve na meso” na beto bubu yai. Kansi, kubika fyoti beto tamona balusakumunu yina ti meso ya kyeleka, mpi beto tasepila na yo mvula na mvula. Mosi na kati ya balusakumunu yango tavanda kukonda kuzinga dyaka ata fyoti ti dikambu mosi ya kele bonso nsende! Mwana ya Nzambi ‘tafwa bisalu yina ya Satana ke salaka’ mpi [yandi] ‘tafwa Satana yina ke na kiyeka ya [kunatila bantu] lufwa.’​—1 Yoane 3:8; Baebreo 2:14.

22. Beto ketula ntima na nki dyambu mpi lukanu na beto fwete vanda inki?

²² Yo yina, ata beto kemona mpasi sambu na nsende ya konso nki mutindu yina ya beto kele na yo na nitu bubu yai, bika beto landa na kunwana ti yo. Bonso Polo, beto tavanda na kikesa ya kusala yo sambu na Yehowa, ya kepesaka beto ngolo na kyese yonso. Na ntangu beto tazinga na Paladisu na ntoto, beto tapesaka Yehowa Nzambi na beto lukumu konso kilumbu sambu na mambu ya nene ya yandi tasala sambu na beto.​—Nkunga 103:2.

[Noti na nsi ya lutiti]

Inki Mutindu Nge Tavutula?

• Sambu na nki mpi nki mutindu Dyabulu kemekaka na kufwa kukangama ya Bakristu ya kyeleka ya Nzambi?

• Inki mutindu ngolo ya Yehowa ‘ke lutaka kumonika na ntangu yina muntu ke na kikesa ve’?

• Inki mutindu bankuluntu ti bampangi yankaka lenda pesa kikesa na bantu yina kemona mpasi?

[Bangyufula ya disolo ya kulonguka]

 [Kifwanisu ya kele na lutiti 13]

Polo kusambaka mbala tatu sambu Nzambi kukatula nsende yina kuvandaka na nitu na yandi