Beto Landa na Kusadila Yehowa na Ntima ya Kikesa
Beto Landa na Kusadila Yehowa na Ntima ya Kikesa
“Nzambi, [ntima na, NW] mono me baka kikesa, [ntima na] mono me baka kikesa mpenza!”—NKUNGA 57:8.
1. Sambu na nki beto lenda vanda na lukwikilu bonso yina ya Davidi?
YEHOWA lenda kumisa beto ngolo na lukwikilu ya Bukristu, na mpila nde beto kangama kaka na Bukristu ya kyeleka sambu beto kele bansadi na yandi ya mekudipesaka. (Roma 14:4) Yo yina, beto lenda vanda ti lukwikilu bonso yina kupusaka muyimbi-bankunga Davidi na kuyimba nde: “Nzambi, [ntima na] mono me baka kikesa.” (Nkunga 108:2) Kana ntima na beto kele kikesa, yo tapusa beto na kulungisa kudipesa na beto na Nzambi. Mpi kana beto kesosa lutwadisu ti ngolo na yandi, beto lenda baka ngolo yina tasadisa beto na kukonda kubwa, beto tavanda na lukanu mpi lukwikilu ya ngolo sambu na kubikala kaka bantu ya kwikama, yina ‘kekudipesaka ntangu yonso na kisalu ya Mfumu Yesu.’—1 Korinto 15:58.
2, 3. Inki mutindu beto kebakisa bangogo ya kikesa ya Polo yina kele na 1 Korinto 16:13?
2 Na bangogo ya kepesa kikesa yina ntumwa Polo kusonikilaka balongoki ya Yezu na Korinto ya ntama, kansi yina kele mpi mfunu sambu na Bakristu ya bubu, yandi tubaka nde: “Beno kangula meso, beno vanda kaka na lukwikilu ya ngolo, beno vanda na kikesa [bonso babakala, NW], beno vanda mpi ngolo.” (1 Korinto 16:13) Na Kigreki konso dyambu na kati ya mambu ya Polo metuba awa, yandi metubila yo bonso yo ke na kusalama, yo kemonisa nde mambu yango talanda kaka na kusalama. Inki kele mfunu ya lukebisu yai?
3 Sambu na kubikala ‘meso ya kukangula’ na kimpeve, beto fwete menga Dyabulu mpi kupusana penepene na Nzambi. (Yakobo 4:7, 8) Kutula ntima na Yehowa kepesaka beto ngolo ya kuvanda kaka na bumosi mpi ‘kuvanda kaka na lukwikilu ya ngolo ya Bukristu.’ Beto yonso—ti bankento mingi yina kele na kati na beto—‘kevandaka kikesa bonso babakala’ na mutindu beto kesadilaka Nzambi na kikesa yonso bonso bansamuni ya Kimfumu. (Nkunga 68:11) Beto ‘kekumaka ngolo’ ntangu beto kelandaka kaka na kusosa ngolo na Tata na beto ya zulu sambu na kusala luzolo na yandi.—Filipi 4:13.
4. Inki mambu kunataka beto na kubaka mbotika sambu na kukuma Bakristu?
4 Beto monisaka nde beto ndimaka kyeleka ntangu beto kudipesaka mvimba na Yehowa mpi beto monisaka kidimbu ya kudipesa na beto na mbotika ya masa. Kansi nki kunataka beto tii na mbotika? Ntetentete beto bakaka nzayilu ya kyeleka ya Ndinga ya Nzambi. (Yoane 17:3) Nzayilu yango kupusaka beto na kukwikila mpi na kubalula ntima, na kuwa mpasi ya kyeleka na ntima sambu na mambi yonso ya beto vandaka kusala ntete. (Bisalu 3:19; Baebreo 11:6) Na nima, beto sobaka bikalulu na beto, beto bikaka bisalu ya mbi sambu na kulanda luzingu yina kewakana ti luzolo ya Nzambi. (Roma 12:2; Efezo 4:23, 24) Na nima beto kudipesaka na ntima ya masonga na Yehowa na kati ya kisambu. (Matayo 16:24; 1 Piere 2:21) Beto lombaka na Nzambi sambu yandi pesa beto kansansa ya mbote mpi beto bakaka mbotika sambu na kumonisa kidimbu ya kudipesa na beto na yandi. (1 Piere 3:21) Kuyindula bitambi yai beto salaka tasadisa beto na kukonda kuvila nde beto fwete landa na kusala ngolo sambu na kuzinga na kuwakana ti kudipesa na beto mpi kulanda na kusadila Yehowa na ntima ya kikesa.
Landa Kaka na Kusosa Nzayilu ya Kyeleka
5. Sambu na nki beto fwete landa na kubaka nzayilu ya Masonuku?
5 Sambu na kuzinga na kuwakana na kudipesa na beto na Nzambi, beto fwete landa na kubaka nzayilu ya Masonuku yina ketungaka lukwikilu. Beto vandaka na kyese mingi na kubaka madya ya kimpeve ntangu beto yantikaka kuyikama ti kyeleka ya Nzambi! (Matayo 24:45-47) “Madia” yango vandaka kitoko mingi, mpi yo vandaka kupesa beto mavimpi ya mbote na kimpeve. Yo kele mfunu bubu yai na kulanda kudya madya ya kimpeve na mpila nde beto vanda kaka na ntima ya kikesa bonso bansadi ya Yehowa ya mekudipesaka.
6. Inki mutindu bo sadisaka nge na kuyedisa ntonda ya masonga na kyeleka ya Biblia?
6 Yo kelombaka kikesa sambu na kukuma na nzayilu mingi ya Masonuku. Yo kevandaka bonso kusosa bima ya ntalu yina mebumbanaka, yina kelombaka kusala ngolo sambu na kuzwa yo. Kansi yo kevandaka kibeni kyese mingi na “kuzaba Nzambi”! (Bingana 2:1-6) Ntangu nsamuni mosi ya Kimfumu yantikaka kulonguka Biblia ti nge, yo lenda vanda nde yandi sadilaka mukanda Nzayilu ya Kenataka na Luzingu ya Mvula na Mvula. Mbala yankaka yo vandaka lomba ntangu mingi sambu na kumanisa konso kapu, mbala yankaka mpi beno vandaka kulonguka kapu mosi na bitini mingi. Nge bakaka mambote ntangu beno vandaka kutanga baverse yina kele na mukanda mpi kutendula yo. Kana dyambu mosi vandaka mpasi na kubakisa, nsamuni vandaka kutendula yo. Muntu yina vandaka kulonguka Biblia ti nge vandaka kudibongisa mbotembote na ntwala, yandi vandaka kusamba sambu na kulomba mpeve ya Nzambi, mpi yandi sadisaka nge na kuyedisa ntonda ya masonga na kyeleka.
7. Inki kekumisaka muntu ya kufwana na kulonga kyeleka ya Nzambi na bantu yankaka?
7 Kikesa yai vandaka mfunu mingi, sambu Polo kusonikaka nde: “Muntu yina ke longuka mambu ya Nzambi, yandi fweti kabila longi na yandi ndambu ya bima, na bima na yandi yonso.” (Galatia 6:6) Ngogo ya Kigreki ya bo mesadila awa kesonga nde malongi ya Ndinga ya Nzambi vandaka kukota mbotembote na mabanza mpi na ntima ya muntu yina “ke longuka.” Kulonguka mutindu yai mekumisaka nge muntu yina mefwana na kulonga bantu yankaka. (Bisalu 18:25) Sambu na kuzitisa kudipesa na nge, nge fwete tanina mavimpi na nge ya kimpeve mpi lukwikilu na nge na ntangu nge kelanda na kulonguka Ndinga ya Nzambi.—1 Timoteo 4:13; Tito 1:13; 2:2.
Yibuka Kubalula Ntima mpi Bansoba Yina Nge Salaka
8. Inki mutindu muntu lenda kuka na kuvanda na bikalulu ya Nzambi kendimaka?
8 Keti nge keyibuka nki mutindu ntima na nge kukitaka ntangu nge longukaka kyeleka, nge balulaka ntima, mpi na nima mutindu nge kudiwaka na kuzaba nde Nzambi melolula nge sambu na lukwikilu yina nge tulaka na nkudulu ya kimenga ya Yezu? (Nkunga 32:1-5; Roma 5:8; 1 Piere 3:18) Yo kele kyeleka nde, nge tazola ve kuvutukila luzingu ya masumu. (2 Piere 2:20-22) Tala mambu yina tasadisa nge na kuvutukila ve luzingu ya masumu: Kusamba Yehowa mbala na mbala sambu na kuvanda na bikalulu yina Nzambi kendimaka, kuzinga na kuwakana ti kudipesa na nge, mpi kulanda na kusadila Yehowa na kwikama.—2 Piere 3:11, 12.
9. Mutindu beto meyambulaka bisalu ya masumu, nzila ya nki mutindu beto fwete landa?
9 Mutindu nge sobaka bikalulu sambu na kubika kusala masumu, landa na kusosa lusadisu ya Nzambi na mpila nde ntima na nge kuvanda kaka ngolo. Ya kyeleka, nge vandaka kulanda ntete nzila mosi ya mbi mpenza, kansi na nima ya kutala karte mosi ya mbote nge monaka nzila ya mbote ya nge ke na kulanda. Kuvidisa ve nzila yango ntangu yai. Landa na kutula kaka ntima na lutwadisu ya Nzambi, mpi baka lukanu ya kubikala na nzila ya luzingu.—Yezaya 30:20, 21; Matayo 7:13, 14.
Kuvila Ve Kudipesa mpi Mbotika na Nge
10. Inki mambu beto fwete vila ve sambu na yina metala kudipesa na beto na Nzambi?
10 Yibuka nde nge kudipesaka na Yehowa na kisambu, ti ngindu ya kusala kisalu ya kwikama na luzingu na nge. (Yude 20, 21) Kudipesa na Nzambi ketendula kudigambula, to kuvanda na kingenga, sambu na kikuma mosi ya santu. (Levi 15:31; 22:2) Nge kudipesaka ve sambu na bilumbu fyoti, yo vandaka mpi ve nde bantu kupusaka nge na kusala yo na kingolongolo. Nge kudipesaka kimakulu na Mfumu ya Bima Yonso, mpi sambu na kuzitisa yo, yo kelombaka kubikala ya kwikama na Nzambi na luzingu ya mvimba. Ee, “ata beto kezinga ata beto kefwa, beto kele kaka bantu ya Yehowa.” (Roma 14:7, 8, NW) Mambote na beto kelandaka kaka mutindu beto kelemfuka na luzolo na yandi mpi mutindu beto kelanda na kusadila yandi ti ntima ya kikesa.
11. Sambu na nki nge fwete yibukaka mbotika na nge mpi ntendula na yo?
11 Yibukaka ntangu yonso mbotika ya nge bakaka yina kele kidimbu ya kumonisaka nde nge mekudipesa na Nzambi na ntima na nge ya mvimba. Yo vandaka ve mbotika ya kingolongolo, sambu nge mosi muntu kubakaka desizio. Keti nge mebaka ntangu yai lukanu ya kusadila luzolo na nge na kuwakana ti luzolo ya Nzambi na luzingu na nge ya mvimba? Nge lombaka kansansa ya mbote na Nzambi mpi nge bakaka mbotika yina kele kidimbu ya kumonisaka nde nge mekudipesa na yandi. Sambu na kutanina kansansa na nge, yo kelomba nde nge lungisa kudipesa na nge, na mpila nde Yehowa kusakumuna nge mingi.—Bingana 10:22.
Luzolo na Nge Mosi Kele Mfunu
12, 13. Inki mutindu luzolo na beto mosi kewakana na kudipesa mpi mbotika?
12 Ya kyeleka, kudipesa mpi mbotika menatilaka bamilio ya bantu mingi balusakumunu na ntoto ya mvimba. Ntangu beto kemonisaka kidimbu ya kudipesa na beto na Nzambi na mbotika ya masa, beto kefwaka na kuwakana ti luzingu na beto ya ntama kansi luzolo na beto kefwaka ve. Sambu bo longaka beto malongi mbotembote, beto monisaka luzolo na beto mosi ntangu beto kudipesaka na Nzambi na kisambu mpi beto bakaka mbotika. Sambu na kudipesa na Nzambi mpi kubaka mbotika yo kelombaka nde beto bakisa luzolo na yandi ebuna na nima beto pona na kusadila yo na luzolo na beto mosi. (Efezo 5:17) Na mutindu yina beto kelandaka mbandu ya Yezu, yina kuyambulaka kisalu ya kisharpantie na luzolo na yandi mosi sambu na kubaka mbotika, mpi kudipesaka yandi ya mvimba na kusala luzolo ya Tata na yandi ya zulu.—Nkunga 40:7, 8; Yoane 6:38-40.
13 Yehowa Nzambi kukanaka nde Mwana na yandi takuma “muntu ya mbote mpenza sambu na bampasi.” Yo yina yo lombaka nde Yezu kumonisa luzolo na yandi mosi ya kukanga ntima na kwikama yonso na ntwala ya bampasi ya mutindu yina. Sambu na kununga kusala yo, “yandi vandaka kusamba Nzambi . . . na ndinga ya ngolo, ti mansanga na meso. Ebuna Nzambi vandaka kuwa bisambu na yandi sambu na ntima na yandi ya kinzambi.” (Baebreo 2:10, 18; 5:7, 8) Kana beto kemonisa boma ti luzitu ya mutindu mosi na Nzambi, beto mpi tatula ntima nde yandi ‘tawa’ bisambu na beto, mpi beto lenda vanda na kivuvu nde Yehowa tapesa beto kikesa sambu beto kele Bambangi na yandi ya kudipesaka.—Yezaya 43:10.
Beto Lenda Vanda Kaka na Ntima ya Kikesa
14. Sambu na nki beto fwete tanga Biblia konso kilumbu?
14 Inki tasadisa nge na kuvanda kaka na ntima ya kikesa mpi kuzinga na mutindu kudipesa na nge na Nzambi kelomba yo? Sambu nge kele na lukanu ya kuyika nzayilu ya Ndinga ya Nzambi, tangaka Biblia konso kilumbu. Yai kele kima yina “mpika ya kwikama mpi ya mayele” kesyamisaka beto ntangu yonso na kusala. Bo kepesaka beto bandongisila ya mutindu yai sambu kuzinga na kuwakana ti kudipesa na beto kelombaka nde beto landa na kutambula na kyeleka ya Nzambi. Kana organizasio ya Yehowa kelongaka malongi ya luvunu na luzolo yonso, bo zolaka kupesa ve ata fyoti Bambangi ya Yehowa ti bantu yina bo kelongaka ndongisila ya kutanga Biblia.
15. (a) Inki beto fwete tadila ntangu beto kebaka badesizio? (b) Sambu na nki beto lenda tuba nde Bakristu ketulaka kisalu ya musuni na kisika ya zole?
15 Ntangu nge kebaka badesizio, nge fwete tadila ntangu yonso nki bupusi yo lenda vanda na yo na kudipesa na nge na Yehowa. Yo lenda vanda desizio ya ketadila kisalu na nge ya musuni. Keti nge kesalaka ngolo na mpila nde kisalu yango kusadisa nge na kuyedisa lusambu ya kyeleka? Ata bamfumu ya kisalu mingi kebakisaka nde Bakristu ya kudipesa kele bantu ya kutudila ntima mpi ya kesalaka kisalu mbote, bo kemonaka mpi nde lulendo kepusaka ve Bambangi ya Yehowa na kusosa bisika ya nene na inza mpi bo kenwaninaka ve bisika ya lukumu na kisalu ti bantu yankaka. Bo kesalaka mutindu yina sambu lukanu ya Bambangi kevandaka ve ya kukuma bamvwama, ya kusosa lukumu, nkembo to kiyeka. Kima ya kuluta mfunu sambu na bantu yina kezingaka na kuwakana ti kudipesa na bo na Nzambi kevandaka kusala luzolo ya Nzambi. Kisalu ya musuni yina kesadisaka bo na kuzwa bima ya mfunu ya kuzingila bo ketulaka yo na kisika ya zole. Bonso ntumwa Polo, kisalu na bo ya ntetentete to ya kuluta mfunu kevandaka kisalu ya Bukristu. (Bisalu 18:3, 4; 2 Tesalonika 3:7, 8; 1 Timoteo 5:8) Keti nge ketulaka mambote ya Kimfumu na kisika ya ntete na luzingu na nge?—Matayo 6:25-33.
16. Inki beto lenda sala kana basusi ya mpamba-mpamba kekanga beto nzila na kuzinga na kuwakana ti kudipesa na beto?
16 Na ntwala ya kulonguka Biblia, bantu yankaka vandaka kuzinga na basusi mingi na luzingu. Kansi bantima na bo kukumaka na kyese mingi, ntonda, mpi zola sambu na Nzambi ntangu bo yambaka kivuvu ya Kimfumu! Kana bo yindula balusakumunu bo mebakaka banda na ntangu yina tii bubu yai, yo lenda sadisa bo na kuzinga na kuwakana ti kudipesa na bo na Yehowa. Kansi, inki bo lenda sala kana basusi ya mpamba-mpamba yina kekatukaka na bampasi ya kebwilaka bantu yonso na luzingu na ngidika yai kesosa kubebisa ‘nsangu ya Nzambi,’ mutindu bansende lenda kangisa bimenina nzila na kuyela mbote? (Luka 8:7, 11, 14; Matayo 13:22; Marko 4:18, 19) Kana nge kemona nde mambu ya mutindu yai meyantika kukumina nge, to dibuta na nge, pesa basusi na nge na Yehowa mpi samba yandi sambu yandi sadisa nge na mpila nde zola mpi ntonda na nge kuyela. Kana nge kelosila yandi kilo na nge, yandi tasadisa mpi tapesa nge ngolo ya kulanda na kusadila yandi na kyese ti ntima ya kikesa.—Nkunga 55:22; Filipi 4:6, 7; Kusonga 2:4.
17. Inki mutindu muntu lenda nunga na kunwana ti bampasi ya ngolo?
17 Sambaka Yehowa Nzambi mbala na mbala, mutindu nge salaka yo ntangu nge kudipesaka na yandi. (Nkunga 65:2) Ntangu mpukumuna ya kusala mambu ya mbi kekwisila nge to ntangu nge kekutana ti dyambu mosi ya mpasi mingi, sosa lutwadisu ya Yehowa ti lusadisu na yandi sambu nge landa yo. Kuvila ve mfunu ya lukwikilu, sambu longoki Yakobo kusonikaka nde: “Kana muntu mosi na kati na beno ke na mayele ve [ya kukanga ntima na ntwala ya dyambu mosi ya mpasi], yandi lomba yo na Nzambi, ebuna Nzambi ta pesa yandi yo; sambu Nzambi ke zolaka kukaba mingi na bantu yonso na ntima ya mbote. Kansi muntu yina ke lomba na Nzambi, yandi fweti tula ntima kaka nde yandi ta baka mambu yina ya yandi me lomba. Sambu muntu yina ke na ntima zole ntangu yandi ke lomba, yandi kele bonso kitembo ya masa yina ya mupepe ke tombulaka na zulu ti ke nataka na ndambu yonso. Muntu ya mutindu yina lenda tula ntima diaka ve nde yandi ta baka konso kima na Mfumu Nzambi, sambu yandi kele muntu mosi ya ntima zole, yandi mpi ke balulaka bikalulu na yandi konso ntangu.” (Yakobo 1:5-8) Kana mpasi mosi kemonana bonso yo meluta ngolo, beto lenda tula ntima na mambu yai: “Konso mpukumunu yina me kwisila beno, yo kele kaka bonso bampukumunu yina ke kwisilaka bantu yonso. Ebuna Nzambi ke salaka kaka mambu yina ya yandi me tubaka, sambu yandi ta bika beno ve nde Satana kumeka beno na kumeka yina me luta ngolo na beno. Kansi, kana mpukumunu me kwisila beno, kaka na ntangu yo yina Nzambi ta pesa beno ngolo; mpidina mpukumunu lenda bwisa beno ve.”—1 Korinto 10:13.
18. Inki beto lenda sala kana disumu mosi ya beto mebumbaka kelembisa lukanu na beto ya kuzinga na kuwakana ti kudipesa na beto na Yehowa?
18 Inki nge lenda sala kana disumu mosi ya ngolo ya nge mebumbaka keyangisa kansansa na nge mpi yo kelembisa lukanu na nge ya kuzinga na kuwakana ti kudipesa na nge? Kana nge balula ntima, nge lenda zwa kikesa na kuzaba nde Yehowa “ke buyaka ve muntu yina ke kudikulumusaka, ke na lulendo ve.” (Nkunga 51:19) Sosa lusadisu ya bankuluntu ya zola, zaba nde sambu bo kelandaka mbandu ya Yehowa, bo tamona ve mpamba mpusa ya nge kele na yo ya kuvutula kuwakana ya mbote ti Tata na nge ya zulu. (Nkunga 103:10-14; Yakobo 5:13-15) Na nima ya kubaka dyaka ngolo na mpeve mpi ti ntima ya kikesa, nge takuka na kuditambwisa mbotembote mpi na kuzinga na kuwakana ti kudipesa na nge na Nzambi.—Baebreo 12:12, 13.
Landa na Kusala ti Ntima ya Kikesa
19, 20. Sambu na nki yo kele mfunu nde beto landa na kuzinga na kuwakana ti kudipesa na beto?
19 Na bilumbu yai ya mpasi, beto fwete nwana sambu na kutambula na kuwakana ti kudipesa na beto mpi kulanda na kusadila Nzambi ti ntima ya kikesa. Yezu kutubaka nde: “Muntu yina ta kanga ntima tii na nsuka, yandi ta guluka.” (Matayo 24:13) Sambu beto kezinga na “bilumbu ya nsuka,” nsuka lenda kwisa konso ntangu yina. (2 Timoteo 3:1) Dyaka, ata muntu mosi ve na kati na beto lenda zaba kana mbasi beto tavanda na luzingu. (Yakobo 4:13, 14) Yo yina yo kele mfunu kibeni nde bubu yai beto landa na kuzinga na kuwakana ti kudipesa na beto!
20 Ntumwa Piere kutubilaka dyambu yai pwelele na mukanda na yandi ya zole. Yandi monisaka nde mutindu bantu yina vandaka ve kuzitisa Nzambi kufwaka na Mvula ya Ngolo, mutindu mosi mpi ntoto ya kifwani, to kimvuka ya bantu ya mbi, tafwa na ‘kilumbu ya Yehowa.’ Na nima Piere kutubaka nde: “Beto fwete vanda bantu ya nki mutindu na bisalu ya bikalulu ya santu ti na bisalu yina kemonisaka nde muntu yai mekangamaka na Nzambi!” (NW) Yandi syamisaka mpi nde: “Bampangi na mono, beno zaba ntete mambu yina. Yo yina beno keba, mbaimbai [balongi ya luvunu mpi bantu ya kezitisaka ve Nzambi] ta kotisa beno na nzila ya mbi, ebuna beno ta tula ngolo diaka ve.” (2 Piere 3:5-17) Yo tavanda mawa mingi kibeni na kumona nde muntu yina mebakaka mbotika kubika nzila ya kyeleka ebuna na nsuka ya luzingu na yandi, yo monana pwelele nde yandi nungaka ve na kuzinga ti ntima ya kikesa!
21, 22. Inki mutindu bangogo ya Nkunga 57:7 melunganaka na Davidi mpi na Bakristu ya kyeleka?
21 Nge lenda kumisa ngolo lukanu na nge ya kuzinga na kuwakana ti kudipesa na nge kana nge keyibuka ntangu yonso kilumbu ya kyese ya mbotika na nge mpi kana nge kesosa lusadisu ya Nzambi na mpila nde nge pesa ntima na yandi kyese na kutuba mpi na bisalu na nge. (Bingana 27:11) Yehowa kepesaka ve bantu na yandi nsoni, yo yina beto fwete vanda ya kwikama na yandi. (Nkunga 94:14) Yandi monisaka mawa mutindu yandi bedisaka bapula ya bambeni mpi yandi gulusaka Davidi. Sambu na kumonisa ntonda na yandi na mambu yai, Davidi kutubilaka zola ya nene mpi ya kebalukaka ve yina yandi vandaka na yo sambu na Ngulusi na yandi. Yandi yimbaka ti kyese yonso nde: “Nzambi, mono me baka kikesa, mono me baka kikesa mpenza! Mono ke yimbila nge bankunga ya lukumu!”—Nkunga 57:8.
22 Bonso Davidi, Bakristu ya kyeleka kebebisaka ve kudipesa na bo na Nzambi. Ti ntima ya kikesa, bo kezabaka nde luguluku mpi lutaninu na bo kekatukaka na Yehowa, yina ya bo keyimbilaka bankunga na kyese yonso. Kana ntima na nge kele kikesa, nge tatulaka yo kaka na Nzambi, mpi ti lusadisu na yandi nge takuka na kulungisa kudipesa na nge. Ee, nge lenda vanda bonso “muntu ya mbote” yina muyimbi bankunga kuyimbilaka nde: “Yandi ke waka boma ve ata yandi baka nsangu ya mbi; yandi me tulaka ntima kaka na Mfumu Nzambi.” (Nkunga 112:6, 7) Kana nge kele na lukwikilu na Nzambi mpi nge ketula ntima yonso na yandi, nge lenda zinga na kuwakana ti kudipesa na nge mpi kulanda na kusadila Yehowa ti ntima ya kikesa.
Keti Nge Keyibuka?
• Sambu na nki beto fwete landa na kubaka nzayilu ya Biblia?
• Sambu na nki beto fwete yibukaka kubalula ntima mpi bansoba yina beto salaka na luzingu?
• Inki mambote beto kebakaka na ntangu beto keyibukaka kudipesa mpi mbotika na beto?
• Inki tasadisa beto na kulanda kusadila Yehowa na ntima ya kikesa?
[Bangyufula ya disolo ya kulonguka]
[Bifwanisu ya kele na lutiti 28]
Kukumisa kisalu na beto ya Bukristu kisalu mosi ya kuluta nene kesadisaka beto na kulanda na kusadila Yehowa ti ntima mosi ya kikesa
[Kifwanisu ya kele na lutiti 28]
Keti nge ketaninaka mbote mavimpi na nge ya kimpeve na kutangaka Ndinga ya Nzambi konso kilumbu?