Keti Beto Fwete Yindula na Ntwala ya Kukwikila?

Mfumu ya seminere mosi ya teolozi na États-Unis kusonikaka nde: “Bantu mingi kibeni ya kesambilaka na ‘mabundu’ mingi mekumaka kusambila na mabundu yina ntetentete sambu bo kezolaka ve kusadila mayele na bo sambu na kuyindula.” Yandi keyika nde, “Bo kezolaka kaka kundima mambu yonso ‘na zina ya lukwikilu.’”

YO yina, bantu mingi ya kesambilaka na mabundu mingi kemonaka ve mfunu ya kuyindula sambu na kuzaba kikuma ya kenataka bo na kukwikila na mambu yina bo kekwikilaka to kusosa kuzaba kana bo kele na bikuma ya kufwana ya kepusaka bo na kukwikila. Beto lenda yituka ve na kumona nde bamingi kezolaka dyaka ve kutubila mambu yina ketadila mabundu.

Yo kele mawa mingi, sambu mambu bonso kusadila bifwanisu na ntangu ya kusamba ti kuvutukila bisambu na ntima kepusaka ve bantu na kuyindula. Mambu yai, kumosi ti banzo-nzambi ya nene-nene, ya kele na bafenetre ya matensi ya kulere ya mpila na mpila, yika mpi miziki ya kafukafu ya bo kebulaka, kele mambu ya kelutaka kusalama na mabundu ya bantu mingi. Ata mabundu mingi ketubaka nde malongi na bo kekatukaka na Biblia, mambu ya bo kelongaka nde ‘kwikila na Yezu ebuna nge taguluka’ kepesaka ve bantu kikesa ya kulonguka dyaka Biblia. Bankaka kekudipesaka na kulonga nde Evanzile fwete sadisa bantu na kumanisa bampasi ya bo kekutanaka na yo na luzingu to mavwanga ya politiki yina bo kele na yo. Inki kima mambu yai yonso mebutaka?

Sambu na yina metala dyambu yai na Nordi ya Amerika, nsoniki mosi ya mambu ya mabundu kutubaka nde: “Bukristu . . . kenataka ve bantu na kuyindula mingi, [mpi] bantu yina kesambilaka na mabundu melongukaka ve mingi mambu ya metala lukwikilu.” Muntu mosi ya vandaka kusala anketi mosi kubingaka nkutu États-Unis nde “insi mosi ya bantu mezaba ve Biblia mbote.” Na kuta masonga, mambu yai fwete vanda mpi kyeleka sambu na bansi mingi kisika Bukristu ya zina kevandaka ngolo. Mutindu mosi, mabundu mingi yina kele ve ya Bukristu kesyamisaka ve bantu na kuyindula mingi, kansi bo kesyamisaka bantu na kuyimba, na kuvutukila mambu ya mutindu mosi na bisambu na bo, ti mitindu ya kuswaswana ya kuyindulula yina ketadilaka mambu ya kinsweki, olie ya kuyindula mambu ya kele na ndonga mpi ya kele mfunu na luzingu.

Kansi, na luzingu na bo ya konso kilumbu, kaka bantu yina mosi ya kezolaka ve kuyindula na yina metala kyeleka to masonga ya malongi ya dibundu na bo keyindulaka mbala mingi na dikebi yonso mambu yankaka ya luzingu na bo. Keti nge keyituka ve na kumona nde, muntu yina kesosa-sosaka mambu mingi kaka sambu na kusumba kaminio, yina nsukansuka tafwa mpi ya yandi talosa, ketuba mutindu yai sambu na yina metala dibundu na yandi: ‘Kana bibuti na mono kumonaka yo mbote, yo kele mpi mbote sambu na mono’?

Kana beto kele mpenza na mpusa ya kupesa Nzambi kyese, keti beto fwete tadila ve na dikebi yonso kana mambu yina beto kekwikilaka ya ketadila yandi kele ya kyeleka? Ntumwa Polo kutubaka nde bantu yankaka ya mabundu ya ntangu na yandi vandaka “kudipesa mingi na Nzambi, kansi yo kele ve sambu na [nzayilu ya sikisiki, NW].” (Roma 10:2) Beto lenda fwanisa bantu ya mutindu yina na  muntu mosi ya bo mepesa kisalu ya kutulaka mukubu na banzo. Yandi kesala ngolo na kutula mukubu na nzo mosi kansi yandi kesadila mikubu ya mbi sambu yandi kelanda ve mambu yina munkwa-nzo kusongaka yandi na kulanda. Muntu yina lenda vanda na kyese sambu na kisalu na yandi, kansi keti yo tasepidisa munkwa-nzo?

Inki mambu Nzambi kezolaka yina lusambu ya kyeleka fwete lungisa? Biblia kepesa mvutu: “Yina kele mambu ya mbote yina ke pesaka kiese na Ngulusi na beto Nzambi. Yandi zola nde bantu yonso kuguluka, bo kuzaba mambu ya kieleka.” (1 Timoteo 2:3, 4) Bantu yankaka lenda yindula nde mpila ya kuzwa nzayilu ya mutindu yina kele ve na kati ya mabundu yonso ya bubu yai. Kansi yindula fyoti, kana luzolo ya Nzambi kele nde bantu fwete zwa nzayilu ya sikisiki ya kyeleka, keti yandi tabumba yo kukonda kikuma nde bantu kuzwa yo ve? Biblia ketuba ve mpidina, kansi yo ketuba nde: “Kana nge sosa yandi, yandi [tasadisa nge na kumona yandi, NW].”​—1 Bansangu 28:9.

Inki mutindu Nzambi kesadisaka bantu yina kesosaka yandi na masonga yonso na kuzaba yandi? Disolo ya melanda tapesa mvutu.