Keti Nge Kendimaka Lutwadisu ya Kristu?

“Muntu lenda binga beno nde ‘Mfumu’ [“ntwadisi,” NW] mpi ve, sambu beno ke kaka na mfumu mosi mpamba, nde Mesia.”​—MATAYO 23:10.

1. Nani mpamba kele Ntwadisi ya Bakristu ya kyeleka?

 YO VANDAKA na Kizole, Nisani 11. Bo tafwa Yezu Kristu na nima ya bilumbu tatu. Yai vandaka mbala ya nsuka ya yandi kwendaka na tempelo. Kilumbu yina, Yezu kupesaka dilongi mosi ya mfunu na bantu yina kuvukanaka kuna mpi na balongoki na yandi. Yandi tubaka nde: “Beno, muntu lenda binga beno ve ‘Longi,’ sambu beno kele bampangi, beno ke kaka na Longi mosi mpamba. Ebuna awa na nsi-ntoto beno lenda binga ata muntu mosi ve nde ‘Tata,’ sambu beno ke kaka na Tata mosi mpamba yina kele na zulu. Muntu lenda binga beno nde ‘Mfumu’ [“ntwadisi,” NW] mpi ve, sambu beno ke kaka na mfumu mosi mpamba, nde Mesia.” (Matayo 23:8-10) Yo kele pwelele nde Yezu Kristu kele Ntwadisi ya Bakristu ya kyeleka.

2, 3. Kuwila Yehowa mpi kundima Ntwadisi yina yandi meponaka kenatilaka beto nki mambote na luzingu?

² Kundima lutwadisu ya Yezu na luzingu na beto tanatila beto mambote mingi! Ntangu yandi zabisaka kukwisa ya Ntwadisi yai, Yehowa Nzambi kutubaka na nzila ya profete Yezaya nde: “Beno yonso bayina ke na nzala ya masa, beno kwisa kunwa masa! Ata beno ke na mbongo ve, beno kwisa! Beno baka ble, beno dia! Beno kwisa, beno nwa vinu ti mabele! Yonso ya mpamba, ya kukonda kufuta mbongo! . . . Beno wila mono, ebuna beno ta dia madia ya kieleka, beno ta mona kiese sambu na madia ya kitoko. . . . Mono tulaka yandi mfumu [mpi ntwadisi, NW] na kuyala bantu yonso ya nsi-ntoto, yandi muntu songisaka bo kimfumu na mono.”​—Yezaya 55:1-4.

³ Yezaya kupesaka mbandu ya bima ya kunwa yina mezabanaka mbote (bonso masa, mabele, ti malafu) sambu na kusonga mambote yina beto kebakaka na luzingu kana beto kewila Yehowa mpi kelanda Ntwadisi mpi Mfumu ya yandi mepesaka beto. Mambote ya beto kebakaka kelembikaka beto ntima. Yo kevandaka bonso nde beto menwa dikopa ya masa ya madidi na kilumbu ya mwini mingi. Yo kemanisaka kiwina yina beto vandaka na yo sambu na kyeleka ti ya lunungu. Mutindu mabele kepesaka bana ya fyoti ngolo mpi kesadisaka bo na kuyela, ‘mabele ya kimpeve’ kepesaka beto ngolo mpi yo kesadisaka beto na kuyela na kimpeve sambu na kuvanda na bangwisana ya mbote ti Nzambi. (1 Piere 2:1-3) Ebuna nani lenda buya nde malafu keyikaka ve kyese na ntangu ya bankinsi? Mutindu mosi mpi, kusambila Nzambi ya kyeleka ti kulanda bitambi ya Ntwadisi yina yandi meponaka kesalaka nde beto “vanda na kiese mpenza” na luzingu. (Kulonga 16:15) Yo yina, yo kele mfunu nde beto yonso (baleke ti bambuta, babakala ti bankento) kumonisa nde beto kendimaka lutwadisu ya Kristu. Kansi, inki mutindu beto lenda songa na luzingu na beto ya konso kilumbu nde Mesia kele Ntwadisi na beto?

Baleke​—Beno Landa na ‘Kukuma Mayele’

4. (a) Inki kusalamaka ntangu Yezu, yina kuvandaka ti bamvula 12, kukwendaka na Yeruzalemi na nsungi ya Paki? (b) Inki kemonisa nde Yezu vandaka kuzaba mambu mingi na ntangu yandi vandaka ti bamvula 12 mpamba?

⁴ Beto tala mbandu yina Ntwadisi na beto kubikilaka baleke. Ata beto mezaba kaka mambu fyoti na yina metala bumwana ya Yezu, beto lenda longuka mambu mingi na dyambu mosi ya kusalamaka na bumwana na yandi. Ntangu Yezu kuvandaka ti bamvula 12, bibuti na yandi kunataka yandi na nzyetelo ya bo vandaka kusala konso mvula na Yeruzalemi sambu na kuta nkinsi ya Paki. Na okazio yai, yandi kudikotisaka na disolo mosi ya Masonuku, ebuna dibuta na yandi kukwendaka, mpi bo zabaka ve nde yandi mebikala. Bilumbu tatu na nima, bibuti na yandi, Yozefi  ti Maria, yina kuvandaka na susi, kukutaka yandi na tempelo, “yandi me vanda na kati ya balongi ya Bayuda. Yandi vandaka kuwa bo, yandi vandaka kupesa bo bangiufula.” Dyaka, “bantu yina yonso vandaka kuwa yandi, bo vandaka kuyituka sambu na mayele na yandi ti sambu na bamvutu yina ya yandi vandaka kupesa.” Yindula fyoti, ti bamvula 12 mpamba, Yezu vandaka kuyula bangyufula ya kepusa na kuyindula kaka ve, to ya ketadila mambu ya kimpeve, kansi yandi vandaka kupesa mpi bamvutu ya mayele! Ntembe kele ve nde, malongi ya bibuti na yandi kusadisaka yandi.​—Luka 2:41-50.

5. Nki mutindu baleke lenda sosa kuzaba mutindu ya bo ketadilaka kulonguka ya Biblia na dibuta?

⁵ Ziku nge kele leke. Kana bibuti na nge kele bansadi ya kudipesa ya Nzambi, beto ketula ntima nde beno kele ti programe ya kulonguka Biblia na dibuta mbala na mbala na nzo na beno. Inki mutindu nge kebakaka kulonguka ya dibuta? Sambu na nki ve kuyindula bangyufula bonso yai: ‘Keti mu kepesaka maboko ti ntima ya mvimba na programe ya kulonguka Biblia na dibuta na beto? Keti mu kezitisaka programe yina, mpi mu kesalaka ve ata kima mosi sambu na kubebisa yo?’ (Filipi 3:16) ‘Keti mu kepesaka bamvutu ntangu yonso na kulonguka? Kana mpila kele, keti mu keyulaka bangyufula ya ketadila malongi ya beto kelonguka mpi mu kemonisaka mutindu ya kusadila yo? Na ntangu mu keyela na kimpeve, keti mu kekuna nzala ya ‘madia ya ngolo, yina bambuta kaka melunga na kudia’?​—Baebreo 5:13, 14.

6, 7. Inki mutindu programe ya kulonguka Biblia konso kilumbu lenda vanda mfunu sambu na baleke?

⁶ Yo kele mpi mfunu na kuvanda ti programe ya kutanga Biblia konso kilumbu. Muyimbi bankunga kuyimbaka nde: “Kiese na muntu yina ke ndimaka ve ngindu ya bantu ya mbi, . . . kansi yandi ke monaka kiese na bansiku ya Mfumu Nzambi, yandi ke [tangaka yo na ndinga ya nsi-nsi, NW] mpimpa ti mwini.” (Nkunga 1:1, 2) Yozue, kilandi ya Moize, ‘tangaka mukanda ya bansiku [na ndinga ya nsi-nsi, NW] mpimpa ti mwini.’ Kikalulu yai kusadisaka yandi na kusala ti mayele mpi na kusala mbote kisalu ya Nzambi kupesaka yandi. (Yozue 1:8) Ntwadisi na beto, Yezu Kristu, kutubaka nde: “Bo sonikaka na Mukanda ya Nzambi nde: ‘Muntu ke zingaka kaka ve sambu na mampa ya yandi ke diaka, kansi yandi ke zingaka mpi sambu na mambu yina yonso ya Nzambi ke tubaka.’” (Matayo 4:4) Kana beto kevandaka ti mfunu ya madya ya kinsuni konso kilumbu, beto fwete vanda ti mfunu ya kuluta mingi ya kudya madya ya kimpeve mbala na mbala!

⁷ Ntangu yandi bakisaka mpusa na yandi ya kimpeve, Nicole, yina kuvandaka ti bamvula 13, yantikaka kutanga Biblia konso kilumbu. a Ntangu yai ya yandi kele ti bamvula 16, yandi metangaka Biblia ya mvimba mbala mosi mpi mekuma dezia na katikati sambu yandi manisa yo mbala ya zole. Metode na yandi kele mpasi ve. Yandi ketuba nde: “Mu kesalaka ngolo na kutanga kapu mosi to kuluta kapu mosi konso kilumbu.” Inki mutindu kutanga  Biblia konso kilumbu mesadisaka yandi? Yandi kevutula nde: “Bupusi ya mbi ke mingi kibeni bubu yai. Mu kekutanaka konso kilumbu ti bampasi na nzo-nkanda mpi na bisika yankaka yina kenwanisaka lukwikilu na mono. Kutanga Biblia konso kilumbu kesadisaka mono na kuyibuka nswalu bansiku ti minsiku ya Biblia yina kepesaka mono kikesa ya kunwana ti bampasi yai. Yo kesalaka nde mu vanda penepene ti Yehowa mpi Yezu.”

8. Inki kikalulu Yezu kuvandaka na yo ntangu yandi vandaka kwenda na sinagoga, mpi nki mutindu baleke lenda landa mbandu na yandi?

⁸ Yezu kuvandaka ti kikalulu ya kuwidikila mpi ya kutanga Masonuku na kati ya sinagoga. (Luka 4:16; Bisalu 15:21) Yo kele mbote kibeni nde baleke kulanda mbandu yina ya kukwenda mbala na mbala na balukutakanu ya Bukristu kisika beto ketangaka mpi kelongukaka Biblia! Richard, yina kele ti bamvula 14, kumonisaka ntonda sambu na balukutakanu ya mutindu yai ntangu yandi tubaka nde: “Balukutakanu kele mfunu mingi sambu na mono. Yo keyibusaka mono ntangu yonso mambu ya mbote ti ya mbi, bikalulu ya mbote ti ya nsoni, bikalulu yina kele bonso ya Kristu ti yina kele ve bonso ya yandi. Yo kelomba ve nde mu sala ntete mambi, mu mona mpasi sambu na yo, na nima mu zaba kubaka dilongi.” Ee, “Bansiku ya Mfumu Nzambi bantu lenda tula yo ntima, yo ke pesaka mayele na bantu yina ke na mayele ve.” (Nkunga 19:8) Nicole mpi kesalaka ngolo na kukwenda na balukutakanu ya dibundu yonso tanu konso mposo. Yandi kelutisaka mpi bangunga zole to tatu sambu na kubongisa yo.​—Efezo 5:15, 16.

9. Inki mutindu baleke lenda ‘kuma mayele’?

⁹ Kileke kele ntangu mosi ya mbote sambu na ‘kuzaba Nzambi mosi ya kieleka, ti Yesu Kristo yina ya yandi tindaka.’ (Yoane 17:3) Ziku nge mezaba baleke yina kelutisaka ntangu mingi na kutanga mikanda yina kesekisaka, kutala televizio, kubula bansaka ya video, to kusosa bansangu na Internet. Sambu na nki kulanda mbandu na bo na kisika ya kulanda mbandu ya kukuka ya Ntwadisi na beto? Ntangu yandi vandaka leke, yandi vandaka na kyese na kulonguka mambu yina metala Yehowa. Inki mbuma yo butaka? Sambu yandi vandaka kuzola mambu ya kimpeve, ‘Yesu vandaka kukuma mayele.’ (Luka 2:52) Nge lenda kuma mpi mayele bonso yandi.

‘Konso Muntu Fweti Lemfuka na Muntu ya Nkaka’

10. Inki lenda sala nde luzingu kuvanda ya ngemba mpi ya kyese na dibuta?

¹⁰ Nzo lenda vanda kisika ya ngemba mpi ya kyese to kisika ya makelele mpi ya mavwanga. (Bingana 21:19; 26:21) Kundima lutwadisu ya Kristu kenataka ngemba ti kyese na dibuta. Ya kyeleka, mabuta fwete landa mbandu ya Yezu na bangwisana na bo ti bantu yankaka ya dibuta. Masonuku ketuba nde: “Beno ke zitisaka Kristo; yo yina, konso muntu na kati na beno fweti lemfuka na muntu ya nkaka. Beno bankento, beno lemfuka na babakala na beno, mutindu beno ke lemfukaka na Mfumu Yesu; sambu bakala kele mfumu ya nkento na yandi, mutindu Kristo kele mfumu ya Dibundu. Yandi mosi Kristo kele Ngulusi ya Dibundu yina kele Nitu na yandi. . . . Beno babakala, beno zola bankento na beno mutindu Kristo zolaka Dibundu ntangu yandi fwaka sambu na yo.” (Efezo 5:21-25) Ntumwa Polo kusonikilaka dibundu ya Kolosai nde: “Beno bana, beno fweti wila batata ti bamama na beno na mambu yonso, sambu yina kele mambu ya Mfumu Yesu ke mon[a]ka kiese.”​—Kolosai 3:18-20.

11. Inki mutindu bakala lenda monisa nde yandi kendimaka lutwadisu ya Kristu?

¹¹ Kulanda ndongisila yai ketendula nde, bakala muntu ketwadisaka dibuta, nkento na yandi kesadisaka yandi na kwikama yonso, ebuna bana fwete lemfukila bibuti na bo. Kansi, kimfumu ya bakala  kebutaka kyese kaka kana yandi kesadila yo na mutindu ya mbote. Bakala ya mayele fwete longuka mutindu ya kulanda mbandu ya Mfumu mpi Ntwadisi na yandi, Kristu Yezu, na ntangu yandi kesadila kimfumu na yandi. (1 Korinto 11:3) Ata na nima Yezu kukumaka “ntu ya Dibundu sambu yandi kuyala bima yonso,” ntangu yandi kwisaka na ntoto, “yandi kwisaka ve sambu bantu kusadila yandi, kansi yandi kwisaka sambu na kusadila bantu.” (Efezo 1:22; Matayo 20:28) Mutindu mosi, Mukristu yina kele bakala kesadilaka ve kimfumu na yandi sambu na mambote na yandi mosi, kansi sambu na mambote ya nkento ti ya bana na yandi. Ee, yandi kesadilaka yo sambu na mambote ya dibuta ya mvimba. (1 Korinto 13:4, 5) Yandi kesosaka kulanda bikalulu ya Nzambi yina mfumu na yandi, Yezu Kristu, kumonisaka. Bonso Yezu, yandi kevandaka muntu ya pima ti ya ntima ya mbote. (Matayo 11:28-30) Yo kele mpasi ve sambu na yandi na kutuba nde, “Lolula mono” to “nge metuba kyeleka,” kana kifu kele ya yandi. Mbandu na yandi ya kuluta mbote kesalaka nde yo vanda mpasi ve sambu nkento kuvanda ‘nsadisi,’ “muntu ya nkaka bonso yandi,” mpi “nduku” ya bakala ya mutindu yai. Nkento yango talongukaka mambu na bakala na yandi mpi tasalaka kumosi ti yandi.​—Kuyantika 2:20; Malashi 2:14.

12. Inki tasadisa nkento na kuzitisa kimfumu?

¹² Na ndambu na yandi, nkento fwete lemfukila bakala na yandi. Kansi, kana mpeve ya inza kukotila yandi, yo lenda yantika kubebisa mutindu na yandi ya kutadila kimfumu, mpi dibanza ya kulemfukila bakala tasepidisaka yandi ve. Masonuku ketuba ve nde babakala fwete moninaka bankento na bo, kansi yo kelomba nde bankento kulemfukila kaka babakala na bo. (Efezo 5:24) Biblia kelombaka mpi bakala to tata na kulungisa mukumba na yandi, sambu kana yandi kesadila bandongisila ya Biblia, yo kenataka ngemba mpi mambu yonso ketambulaka na ndonga na dibuta.​—Filipi 2:5.

13. Inki mbandu ya bulemfu Yezu kupesaka bana?

¹³ Bana fwete lemfukila bibuti na bo. Yezu kupesaka mbandu ya mbote na dyambu yai. Na nima ya dyambu yina kulutaka na tempelo, ntangu Yezu ya kuvandaka ti bamvula 12, kubikalaka bilumbu tatu ya mvimba, “Yesu vutukaka ti [bibuti na yandi] na Nazareti. Yandi vandaka kulemfuka na bo.” (Luka 2:51) Bulemfu ya bana na bibuti na bo kenataka ngemba ti kuwakana na dibuta. Kana konso muntu na dibuta kelemfukila lutwadisu ya Kristu, dibuta kevandaka na kyese.

14, 15. Inki tasadisa beto na kununga kana beto kutana ti dyambu ya mpasi na nzo? Pesa mbandu.

¹⁴ Ata ntangu mambu ya mpasi kebasikaka na nzo, sambu na kununga beto fwete landa mbandu ya Yezu mpi kundima lutwadisu na yandi. Mu mbandu, dikwela ya Jerry, yina kele ti bamvula 35, ti Lana, mama ya toko mosi ya nkento, kubasisaka dyambu mosi ya mpasi yina muntu mosi ve na kati na bo kuyindulaka. Jerry ketendula nde: “Mono zabaka nde sambu na kuvanda mfumu ya mbote, yo vandaka kulomba nde mono sadila bansiku ya Biblia ya mutindu mosi yina kenataka kyese na mabuta yankaka. Kansi mu bakisaka nswalu nde yo lombaka nde mu sadila yo ti mayele mpi luswasukusu mingi.” Mwana ya nkento na yandi kubutaka ti bakala yankaka vandaka kumona nde Jerry kwisaka kukabula yandi ti mama na yandi, mpi yandi vandaka kumenga Jerry ngolo kibeni. Yo vandaka kulomba nde Jerry kuvanda ti luswasukusu sambu na kubakisa nde ngindu yai vandaka kumonana na mambu yina mwana yai vandaka kutuba ti kusala. Inki mutindu yandi yidikaka dyambu yai? Jerry kevutula nde: “Mono wakanaka ti Lana nde na ntangu yina, Lana muntu tapesaka malongi yina bibuti kepesaka bana, kansi mono tasalaka ngolo na kuyidika bangwisana na mono ti mwana ya nkento na mono. Ntangu fyoti na nima, metode yai kubasisaka bambuma ya mbote.”

¹⁵ Ntangu beto kekutana ti mambu ya mpasi na nzo, beto kele ti mfunu ya luswasukusu sambu na kubakisa kikuma ya kepusa bantu ya dibuta na beto na kutuba mpi na kusala mutindu yina. Beto kele mpi ti mfunu ya mayele sambu na kusadila mbote bansiku ya Nzambi. Mu mbandu, Yezu kubakisaka mbote sambu na nki nkento yina vandaka kubasika menga kusimbaka yandi, yo yina yandi tubilaka yandi ti mayele mpi mawa. (Levi 15:25-27; Marko 5:30-34) Mayele ti luswasukusu kele bikalulu ya Ntwadisi na beto. (Bingana 8:12) Beto tavanda na kyese kana beto kesala mutindu yandi zolaka kusala.

‘Beno Landa na Kusosa Ntete Kimfumu’

16. Inki fwete baka kisika ya ntete na luzingu na beto, inki mutindu Yezu kumonisaka yo na mbandu na yandi?

¹⁶ Yezu kumonisaka pwelele mambu yina fwete  vanda na kisika ya ntete na luzingu ya bantu yina kendimaka lutwadisu na yandi. Yandi tubaka nde: “Beno landa kaka na kusosa [ntete, NW] Kimfumu na yandi ti mambu yina ya yandi [Nzambi] ke zolaka.” (Matayo 6:33) Mpi na mbandu na yandi, yandi songaka beto mutindu ya kusala yo. Na nima ya mbotika na yandi, Yezu kulutisaka bilumbu 40 kukonda kudya, yandi vandaka kuyindula ti kusamba. Ebuna na nsuka na yo yandi kutanaka ti mumekamu. Satana Dyabulu kutubaka nde yandi tatula yandi mfumu na zulu ya “bimfumu yonso ya nsi-ntoto.” Yindula fyoti luzingu yina Yezu zolaka kuvanda na yo kana yandi ndimaka dikabu ya Dyabulu! Kansi, Kristu kutulaka mabanza na yandi yonso na kusala luzolo ya Tata na yandi. Yandi bakisaka mpi nde, luzingu ya mutindu yai na inza ya Satana zolaka kuzinga ntangu mingi ve. Yandi buyaka mbala mosi dikabu ya Dyabulu, mpi yandi tubaka nde: “Bo sonikaka na Mukanda ya Nzambi nde: ‘Nge fweti samba Mfumu Nzambi, Nzambi na nge. Kaka yandi mpamba nge fweti samba!’” Ntama mingi ve na nima, Yezu “yantikaka kulonga nde: ‘Beno balula ntima sambu Kimfumu ya Nzambi me kuma penepene!’” (Matayo 4:2, 8-10, 17) Na luzingu na yandi ya mvimba awa na ntoto, Kristu kuvandaka nsamuni ya Kimfumu ya Nzambi ya ntangu yonso.

17. Inki mutindu beto lenda monisa nde mambote ya Kimfumu kele na kisika ya ntete na luzingu na beto?

¹⁷ Beto fwete landa mbandu ya Ntwadisi na beto, mpi beto fwete bika ve nde inza ya Satana kukusa beto na kuvanda kaka ti lukanu ya kusosa kisalu yina kefutaka mbongo mingi na luzingu. (Marko 1:17-21) Yo tavanda buzoba kibeni kana beto kangama na bukondi ya bisalu ya inza, ebuna mambote ya Kimfumu kukuma na kisika ya zole! Yezu kupesaka beto kisalu ya kulonga Kimfumu mpi ya kukumisa bantu balongoki. (Matayo 24:14; 28:19, 20) Ee, beto lenda vanda ti dibuta to mikumba yankaka ya kulungisa, kansi, keti beto kevandaka ve na kyese na kusadila bankokila ti bawikendi sambu na kulungisa mukumba na beto ya Bukristu ya kusamuna ti kulonga? Mpi yo kepesa kibeni kikesa na kumona nde na mvula ya kisalu 2001, bantu kiteso ya 780 000 kusalaka bonso baministre ya ntangu yonso, to bapasudi-nzila!

18. Inki kesadisaka beto na kuzwa kyese na kisalu ya kusamuna?

¹⁸ Masolo ya Baevanzile kemonisaka Yezu bonso muntu ya bisalu mpi ya kuvandaka ti zola mingi. Ntangu yandi monaka mpusa ya kimpeve ya bantu yina vandaka penepene ti yandi, yandi wilaka bo mawa mpi yandi pesaka bo lusadisu kukonda kusukinina. (Marko 6:31-34) Kisalu na beto ya kusamuna kepesaka kyese mingi kana beto kesala yo sambu beto kezolaka bantu yankaka mpi beto kele ti mpusa ya masonga ya kusadisa bo. Kansi, inki mutindu beto lenda baka mpusa ya mutindu yai? Leke mosi ya bakala na zina ya Jayson ketuba nde: “Ntangu mu vandaka toko, mu va sepila mingi ve na kusala kisalu ya kusamuna.” Inki kusadisaka yandi  na kukuna zola sambu na kisalu yai? Jayson kevutula nde: “Na dibuta na beto, beto vandaka kubasika na kisalu ya bilanga konso Sabala na ntwala-midi. Yo vandaka mbote sambu na mono sambu, ntangu mu vandaka kubasika mingi na kisalu ya kusamuna, mu kumaka kumona mpi mambote mingi yina yo kesalaka, ebuna mu kumaka kuzola yo.” Beto mpi fwete basikaka mbala na mbala mpi kusala kisalu ya kusamuna na kikesa yonso.

19. Beto fwete baka lukanu ya kusala nki na yina metala lutwadisu ya Kristu?

¹⁹ Kundima lutwadisu ya Kristu keyikaka kibeni ngolo mpi yo kenatilaka beto mambote. Kana beto kendima yo, kileki kekumaka ntangu ya kuyela na nzayilu ti mayele. Luzingu ya dibuta kenataka ngemba ti kyese, mpi kisalu ya kusamuna kenatilaka beto kyese ti mambote. Ya kyeleka, bika beto baka lukanu ya kumonisa na luzingu na beto ya konso kilumbu mpi na badesizio ya beto kebakaka nde beto kendimaka lutwadisu ya Kristu. (Kolosai 3:23, 24) Kansi, Yezu Kristu ketwadisaka beto na nzila yankaka: dibundu ya Bukristu. Disolo yina kelanda tamonisa nki mutindu ngidika yai lenda natila beto mambote.

[Noti na nsi ya lutiti]

Keti Nge Keyibuka?

• Inki mambote beto kebakaka na kulanda Ntwadisi yina Nzambi meponaka?

• Inki mutindu baleke lenda monisa nde bo kezolaka kulanda lutwadisu ya Yezu?

• Inki kima lutwadisu ya Kristu kesalaka na mabuta ya bantu yina kelemfukilaka yo?

• Inki mutindu kisalu na beto ya kusamuna kemonisaka nde beto kendimaka lutwadisu ya Kristu?

[Bangyufula ya disolo ya kulonguka]

[Bifwanisu ya kele na lutiti 10]

Kileke kele ntangu ya mbote ya kubaka nzayilu ya Nzambi ti ya Ntwadisi yina yandi meponaka

[Kifwanisu ya kele na lutiti 11]

Kulemfuka na lutwadisu ya Kristu kenataka kyese na dibuta

[Bifwanisu ya kele na lutiti 13]

Yezu kusosaka ntete Kimfumu. Ebuna nge?