Bansiku ya Nzambi Kele Sambu na Mambote na Beto

“Mono ke zolaka bansiku na nge mingi!”​—NKUNGA 119:97.

1. Inki bangindu bantu kevandaka na yo sambu na yina metala kulemfuka na bansiku ya Nzambi?

 KULEMFUKA na bansiku ya Nzambi bubu yai kevandaka ve sambu na bantu yonso. Sambu na bantu mingi, kulemfuka na mfumu mosi ya nene yina kemonanaka ve kele kukonda mayele. Beto kezinga na nsungi yina muntu na muntu kevandaka na mutindu na yandi ya kutadila bikalulu ya mbote, bandilu ya mambu ya mbote ti ya mbi ya kevandaka mpasi na kubakisa, mpi mambu kevandaka mpasi na kutuba kana yo kele ya mbote to ya mbi. (Bingana 17:15; Yezaya 5:20) Na nima ya kutadila mutindu ya kuyindula ya bimvuka ya bantu yina ketadilaka ve bangindu ya Nzambi na luzingu na bo, anketi mosi ya mekatuka kusalama ntama mingi ve kumonisaka nde “bantu mingi ya Amerika kezolaka kutula bo mosi bansiku ya mambu yina kele mbote, mpi ya mfunu.” Bo kendimaka dibanza ya kutuba nde “bo kezolaka ve kuvanda ti Nzambi yina kekangamaka ngolo na bansiku. Bo kezolaka ve kukangama ngolo na bansiku. Bo kezolaka ve kuvanda na bamfumu ya ngolo yina kekangamaka na malongi ya bikalulu ya mbote to malongi yankaka.” Muntu mosi ya kelongukaka luzingu ya bantu kutubaka nde “bantu kezolaka kupesa bo mosi ntendula ya kutwadisa luzingu mosi ya mbote mpi ya kele na bikalulu ya mbote.” Yandi yikaka dyaka nde: “Baluyalu yonso ya ngolo fwete wakanisa bansiku na yo ti bampusa ya kyeleka ya bantu.”

2. Na nki mutindu kisika ya ntete ya bo ketubila nsiku na Biblia kewakana kibeni ti lusakumunu mpi kundimama na Nzambi?

² Sambu bantu mingi kendimaka ve nde bansiku ya Yehowa kele na valere, beto fwete kumisa lukwikilu na beto ngolo nde bansiku ya Nzambi kele sambu na mambote na beto. Yo kele mfunu nde beto tadila disolo yina ketubila nsiku mbala ya ntete na Biblia. Na Kuyantika 26:5, beto ketanga bangogo yai ya Nzambi: “Abrahami lemfukilaka mono, yandi landaka mpi bansiku na mono.” Yehowa kutubaka bangogo yai bamvu-nkama mingi na ntwala ya kupesa Nsiku ya Moize na bantu ya kikanda ya Abrahami. Inki mutindu Nzambi kusakumunaka Abrahami sambu na bulemfu na yandi, ti bulemfu na bansiku na Yandi? Yehowa Nzambi kupesaka yandi lusilu yai: “Na nzila ya nkuna na nge makanda yonso tabaka mpenza lusakumunu.” (Kuyantika 22:18, NW) Kulemfuka na bansiku ya Nzambi kenataka kibeni lusakumunu mpi yo kesalaka nde Nzambi kundima beto.

3. (a) Inki mawi muyimbi-bankunga mosi kumonisaka sambu na nsiku ya Yehowa? (b) Inki bangyufula beto fwete tudila dikebi?

³ Mosi na kati ya miyimbi bankunga, yo fwete vanda mwana ya ntotila ya Yuda mpi yina zolaka kukuma ntotila na nima, kumonisaka mawi yina kekwendaka ve mbala mingi nzila mosi ti nsiku. Yandi tubaka na Nzambi nde: “Mono ke zolaka bansiku na nge mingi!” (Nkunga 119:97) Yo vandaka ve mawi yina kukwisilaka yandi mbala mosi na kintulumukina. Yo vandaka mutindu ya kumonisa zola sambu na luzolo ya Nzambi mutindu yo kele na nsiku na yandi. Yezu Kristu, Mwana ya kukuka ya Nzambi, kuvandaka mpi ti mawi ya mutindu mosi. Mbikudulu kutubilaka dezia Yezu mutindu yai: “Mono ke zolaka mingi kusala mambu ya nge zola! Malongi na nge kele na ntima na mono.” (Nkunga 40:9; Baebreo 10:9) Inki beto lenda tuba sambu na beto? Keti beto kevandaka na kyese ya kusala luzolo ya Nzambi? Keti beto kendimaka nde bansiku ya Yehowa kele mfunu mpi  kenataka mambote? Inki kisika beto ketulaka bulemfu na bansiku ya Nzambi na lusambu na beto, na luzingu na beto ya konso kilumbu, na badesizio ya beto kebakaka, mpi na bangwisani na beto ti bantu yankaka? Sambu na kuzola nsiku ya Nzambi, beto fwete bakisa sambu na nki Nzambi kele na nswa ya kusala bansiku mpi kulomba bantu na kuzitisa yo.

Yehowa, Muntu ya Kele na Nswa ya Kupesa Nsiku

4. Sambu na nki Yehowa kele kibeni Muntu ya kuluta nene, yina kele na nswa ya kupesa nsiku?

⁴ Sambu yandi kele Ngangi, Yehowa kele kibeni Muntu ya kele na nswa ya kupesa nsiku na inza. (Kusonga 4:11) Profete Yezaya kutubaka nde: “Yehowa kele Muntu ya kepesaka beto bansiku.” (Yezaya 33:22, NW) Yandi metulaka bansiku yina ketambwisaka bigangwa yina kevandaka na luzingu ti yina kevandaka ve na luzingu. (Yobi 38:4-38; 39:1-12; Nkunga 104:5-19) Sambu yandi kele kigangwa ya Nzambi, muntu fwete zitisa bansiku yina Yehowa metulaka sambu na luzingu na ntoto. Ata muntu kevandaka ti kimpwanza ya kupona, mpi mayele ya kuyindula, yandi kevandaka na kyese kaka kana yandi kelemfuka na bansiku ya bikalulu ya mbote mpi ya kimpeve.​—Roma 12:1; 1 Korinto 2:14-16.

5. Inki mutindu munsiku yina kele na Galatia 6:7 kelunganaka na yina metala bansiku ya Nzambi?

⁵ Mutindu beto kezaba, muntu lenda fwa ve bansiku yina Yehowa metulaka sambu na luzingu na ntoto. (Yeremia 33:20, 21) Kana muntu mosi kezitisa ve bansiku yankaka ya luzingu na ntoto yina Nzambi metulaka, bonso nsiku yina kesalaka nde ntoto kubenda bima yonso na zulu na yo, yandi ketula luzingu na yandi na kigonsa. Kiteso mosi mpi, beto lenda katula ve mpi kubuya to kufwa bansiku ya Nzambi ya bikalulu ya mbote kukonda kubaka ndola. Yandi metulaka yo kibeni kiteso mosi ti bansiku ya luzingu yina yandi metulaka awa na ntoto, ata bantu yina kefwaka yo kebakaka ve ndola kaka na mbala mosi. “Bo ke sekaka Nzambi ve. Muntu ke katulaka bambuma yina ya yandi ke kunaka.”​—Galatia 6:7; 1 Timoteo 5:24.

Bunene ya Nsiku ya Yehowa

6. Inki kevandaka bunene ya bansiku ya Nzambi?

⁶ Mutindu mosi ya kuluta nene ya Nzambi kumonisaka nsiku na yandi vandaka Nsiku ya Moize. (Roma 7:12) Na nima Yehowa Nzambi kuyingisaka Nsiku ya Moize na “nsiku ya Kristo.” a (Galatia 6:2; 1 Korinto 9:21) Sambu beto kele Bakristu ya kele na nsi ya ‘nsiku ya mbote mpenza yina ke katulaka bantu na kimpika,’ beto kebakisaka nde Nzambi metulaka ve bansiku na yandi kaka na mwa mambu yankaka ya luzingu na beto, mu mbandu malongi ya beto kekwikilaka to mutindu ya kusala lusambu na beto. Minsiku na yandi ketadilaka mambu yonso ya luzingu, bonso makambu ya ketadila mabuta, mumbungu, mutindu ya kuzinga na kati ya babakala ti bankento, mutindu ya kuzinga ti bampangi na beto Bakristu, mpi kisalu na beto na lusambu ya kyeleka.​—Yakobo 1:25, 27.

7. Pesa bambandu ya bansiku ya mfunu ya Nzambi.

⁷ Mu mbandu, Biblia ketuba nde: “Bantu yina ke salaka pite na bantu yina me kwelaka to na bayina me kwelaka ve, bantu yina ke sambaka banzambi ya biteki, babakala yina ke ladisaka babakala ya nkaka, bamiyibi, bantu yina ke vandaka na nzala ya kuvanda na konso kima yina, bantu yina ke laukaka malafu, bantu yina ke fingaka bantu ya nkaka, bantu yina ke kusaka bantu ya nkaka sambu na kubaka mbongo na bo ata muntu mosi ve na kati ya bantu yina ta vanda muntu ya Kimfumu ya Nzambi.” (1 Korinto 6:9, 10) Ya kyeleka, pite ti bizumba kevandaka ve kaka “mambu ya zola.” Kuvukisa nitu babakala na babakala kele ve kaka “mambu ya bantu kesalaka ata yo kewakanaka ve na bansiku ya luzingu ya bantu yonso mendimaka.” Kansi mambu yai kefwaka mpenza nsiku ya Yehowa. Yo kele kiteso mosi ti mambu bonso kuyiba, kukusa, mpi kutonga. (Nkunga 101:5; Kolosai 3:9; 1 Piere 4:15) Yakobo kebuyisa kikalulu ya lulendo, ebuna Polo kelongisila beto na kubuya masolo ya buzoba mpi bansaka ya nsoni. (Nkunga 101:5; Kolosai 3:9; 1 Piere 4:15) Sambu na Bakristu, bansiku yai yonso ya ketadila bikalulu kele na kati ya nsiku ya kukuka ya Nzambi.​—Nkunga 19:7.

8. (a) Lukanu ya Nsiku ya Yehowa kele inki? (b) Inki kele ntendula ya ntetentete ya ngogo ya Kiebreo yina bo mebaluka nde “nsiku”?

 ⁸ Bansiku ya mfunu ya mutindu yai ya kele na Ndinga ya Yehowa kemonisaka nde nsiku na yandi kele mfunu mingi, kansi yo kele ve kaka lisiti ya bansiku ya bantu mesonikaka. Yo kevandaka kisina ya luzingu mosi ya bukatikati mpi ya mbote, mpi na mitindu yonso ya bikalulu ya mbote. Nsiku ya Nzambi ketungaka, yo kewakanaka ti bansiku ya bikalulu ya mbote, mpi yo kelongaka bantu. (Nkunga 119:72) Ngogo “nsiku” mutindu muyimbi-bankunga kusadilaka yo mekatukaka na ngogo ya Kiebreo toh·rahʹ. Muntu mosi ya mayele ya kelongukaka Biblia kutubaka nde: “Ngogo yai bo mebaka yo na kisongi-dyambu mosi yina ketendula kutwadisa, kutula lukanu, kukwenda na ntwala. Ebuna . . . ntendula na yo lenda vanda mutindu ya kuditambwisa na luzingu.” Sambu na muyimbi-bankunga nsiku vandaka dikabu ya Nzambi mepesaka bantu. Keti beto mpi lenda mona yo ve mutindu mosi, kupesa nzila nde yo twadisa luzingu na beto?

9, 10. (a) Sambu na nki beto kevandaka na mfunu ya lutwadisu ya Nzambi? (b) Na nki nzila mosi kaka beto lenda vanda na luzingu ya kyese mpi ya mbote?

⁹ Bigangwa yonso kevandaka na mfunu ya lutwadisu ya Nzambi. Yo kele mpi kiteso mosi sambu na Yezu ti bawanzyo, yina meluta bantu na ngolo. (Nkunga 8:5; Yoane 5:30; 6:38; Baebreo 2:7; Kusonga 22:8, 9) Kana bigangwa yai ya kukuka lenda vanda na mfunu ya lutwadisu ya Nzambi, yo kesonga nde beto bantu ya kukonda kukuka kele mpenza na mfunu mingi ya lutwadisu ya Nzambi! Disolo ya luzingu ya bantu mpi ya beto mosi kendimisaka kyeleka ya mambu yina profete Yeremia kutubaka: “Mono zaba nde ke na muntu ve lenda sola nzila na yandi mosi, ke na muntu ve lenda songa nzila na makulu na yandi ntangu yandi [ke] tambula.”​—Yeremia 10:23.

¹⁰ Kana beto kezola kuvanda na luzingu ya kyese mpi ya mbote, beto fwete sosa lutwadisu ya Nzambi. Ntotila Salomo kubakisaka kigonsa yina kevandaka kana muntu kezitisa kaka bansiku na yandi mosi, kukonda kulanda lutwadisu ya Nzambi: “Nzila ya nge ke yindula nde yo kele nzila ya mbote, yo lenda vanda nzila ya lufwa.”​—Bingana 14:12.

Bikuma ya Kuzodila Nsiku ya Yehowa

11. Sambu na nki beto fwete vanda na mpusa ya kubakisa nsiku ya Nzambi?

¹¹ Yo kele mbote nde beto kuna mpusa ya ngolo ya kubakisa nsiku ya Yehowa. Muyimbi-bankunga kumonisaka mpusa ya mutindu yai ntangu yandi tubaka nde: “Kangula meso na mono mono mona mambu ya kuyituka yina kele na bansiku na nge.” (Nkunga 119:18) Kana beto keyika kaka nzayilu ya Nzambi ti ya banzila na yandi, beto tabakisa mpi mbotembote kyeleka ya bangogo yai ya Yezaya: “Mono Mfumu Nzambi na nge, mono muntu ke longa nge sambu na mambote na nge, mono muntu ke nata nge na nzila ya nge fweti landa. Kana nge landaka bansiku na mono mbote-mbote.” (Yezaya 48:17, 18) Mpusa ya Yehowa ya ngolo kevandaka nde bantu na yandi kutina mpasi mpi bo vanda na luzingu ya mbote na kutulaka dikebi na bansiku na yandi. Bika beto tadila mwa bikuma ya nene ya kepusa beto na kuzola nsiku ya Nzambi.

12. Inki mutindu kuzaba yina Yehowa mezabaka beto kekumisaka yandi Muntu ya mefwana mpenza na kupesa beto bansiku?

 ¹² Nsiku ya Nzambi mekatukaka na muntu yina kuzaba beto mbotembote. Sambu Yehowa kele Ngangi na beto, yandi mefwana na kuzaba bantu mbotembote. (Nkunga 139:1, 2; Bisalu 17:24-28) Banduku na beto, bampangi na beto ya musuni, ata nkutu bibuti na beto lenda zaba beto ve mbote bonso Yehowa. Yo yina, Nzambi kuzaba beto mbote kibeni kuluta nkutu beto mosi! Ngangi na beto kevandaka ti mutindu na yandi ya kuswaswana ya kutadila bampusa na beto ya kimpeve, ya mawi, mpi ya musuni. Sambu yandi ketudilaka beto dikebi, yandi kemonisaka kibeni nde yandi mezaba mutindu beto salamaka, bampusa na beto, mpi mambu ya beto kezolaka kusala. Yehowa kebakisaka bandilu na beto, kansi yandi mezaba mpi ngolo na beto ya kusala mambu ya mbote. Muyimbi-bankunga ketuba nde: “Yandi zaba na nki yandi salaka beto, yandi zaba mbote nde beto kele kaka putulu.” (Nkunga 103:14) Yo yina, beto lenda vanda na lutaninu ya kimpeve ntangu beto kesosa na kutambula na nsiku na yandi, na kulemfuka na luzolo yonso na lutwadisu ya Nzambi.​—Bingana 3:19-26.

13. Sambu na nki beto lenda tula ntima nde Yehowa kevandaka na susi ya mambote na beto?

¹³ Nsiku ya Nzambi kekatukaka na Muntu yina kezolaka beto. Nzambi kevandaka na susi mingi sambu na mambote na beto ya mvula na mvula. Keti yo vandaka kima ya fyoti mutindu yandi ndimaka na kupesa Mwana na yandi bonso “[nkudulu sambu na, NW] kukatula bantu mingi na kimpika ya masumu”? (Matayo 20:28) Keti Yehowa mesilaka beto ve nde ‘yandi ta bika beto ve nde Satana kumeka beto na kumeka yina me luta ngolo na beto’? (1 Korinto 10:13) Keti Biblia kendimisa beto ve nde yandi ‘ke talaka mambu na beto’? (1 Piere 5:7) Ata muntu mosi ve kevandaka na susi ya kupesa bantu bandongisila na zola yonso ya kesonga bo mutindu bo fwete tambula kuluta Yehowa. Yandi mezaba mambu yina kele mbote sambu na beto mpi yandi mezaba kisika mambu yina kenatilaka beto kyese mesuka mpi kisika mambu yina kenatilaka beto mpasi meyantika. Ata beto kele bantu ya kukonda kukuka mpi ata beto kesalaka bifu, kana beto kelanda lunungu, yandi kemonisaka beto zola na yandi na mitindu yina tanatila beto luzingu mpi balusakumunu.​—Ezekiele 33:11.

14. Na nki mutindu mosi ya mfunu nsiku ya Nzambi keswaswanaka ti bangindu ya bantu?

¹⁴ Bansiku ya Nzambi kebalukaka ve ata fyoti. Na bantangu yai ya mavwanga ya beto kezinga, Yehowa kevandaka bonso ditadi mosi ya ngolo, yandi kezingaka bamvula na bamvula. (Nkunga 90:2) Yandi tubaka nde: “Mono kele Mfumu Nzambi, mono ke bikalaka kaka Mfumu Nzambi.” (Malashi 3:6) Bansiku ya Nzambi, yina kele na Biblia mefwana mpenza nde beto tudila yo ntima, kansi beto lenda tula ve ntima na beto na bangindu ya bantu yina kebalukaka mpambampamba. (Yakobo 1:17) Mu mbandu, bantu yina kelongukaka bangindu ya bantu kusalaka bamvula mingi na kusikisa nde bibuti fwete bika bana na bo na kudisadila mambu bo mosi, kansi na nima bo balulaka bangindu na bo mpi bo ndimaka nde ndongisila na bo kuvandaka ve ya mbote. Minsiku ti bandongisila ya inza na yina ketadila dyambu yai kevandaka bonso kima yina mupepe kenata ndambu na ndambu. Kansi, Ndinga ya Yehowa kele ngolo. Bamvu-nkama mingi meluta, Biblia kepesaka bandongisila na mutindu ya kusansa bana na zola. Ntumwa Polo kusonikaka nde: “Beno batata ti bamama mpi, beno pesa bana na beno makasi ve. Kansi, ntangu beno ke sansa bo, beno longa bo malongi ti mambu ya kikristo.” (Efezo 6:4) Beto kebaka kikesa mingi kibeni na kuzaba nde beto lenda tula ntima na minsiku ya Yehowa; yo tabaluka ve!

Balusakumunu Sambu na Bantu Yina Kelemfukaka na Bansiku ya Nzambi

15, 16. (a) Inki mbuma beto tabuka kana beto kesadila minsiku ya Yehowa? (b) Inki mutindu bansiku ya Nzambi lenda monisa nde yo kele lutwadisu mosi ya mbote na makwela?

¹⁵ Na nzila ya profete na yandi Yezaya, Nzambi kutubaka nde: “Mambu yina ke katukaka na munoko na mono, yo ke vutuka ve mpamba na mono . . . kana yo me lungisa ve bangindu na mono.” (Yezaya 55:10, 11) Kiteso mosi mpi, kana beto kesala ngolo sambu na kulanda minsiku ya Nzambi yina kele na Ndinga na yandi, beto tanunga, beto tasala mambu yina kele ya mbote, mpi beto tavanda na kyese.

 ¹⁶ Beto tala nki mutindu bansiku ya Nzambi kele lutwadisu mosi ya mbote sambu na makwela ya mbote. Polo kusonikaka nde: “Bantu yonso kuzitisa makwela; konso muntu yina me kwela, yandi fweti zinga kaka na muntu yina ya yandi me kwela na yandi, ata nkento ata bakala. Nzambi ta pesa ndola na bantu yina ke salaka pite, ata na bayina me kwelaka ata na bayina me kwelaka ve.” (Baebreo 13:4) Bankwelani fwete kudizitisa mpi kuzolana: “Konso bakala fweti zola nkento na yandi bonso yandi mosi, konso nkento fweti zitisa bakala na yandi.” (Efezo 5:33) Bo ketubila mutindu ya zola ya beto kele na yo mfunu na 1 Korinto 13:4-8: “Muntu yina ke na kuzola yandi ke kangaka ntima, yandi kele muntu ya mbote, yandi ke na kimpala ve, yandi ke kudisongaka ve, yandi ke na lulendo mpi ve. Muntu yina ke na kuzola yandi ke salaka ve mambu ya nsoni, yandi ke sosaka ve mambote na yandi mosi, yandi ke waka makasi ve, yandi mpi ke yindulaka ve mambu ya mbi ya bantu ya nkaka me sala yandi. Muntu yina ke na kuzola yandi ke monaka kiese ve sambu na mambu ya mbi, kansi yandi ke monaka kiese sambu na mambu ya kieleka. Na mambu yonso, muntu yina ke na luzola na ntima yandi ke lembaka ve, yandi ke kwikilaka, yandi ke tulaka ntima, yandi ke kangaka ntima. Kuzola ke manaka ve.” Makwela yina kemonisaka zola ya mutindu yai lenda fwa ve.

17. Inki mambote kusadila minsiku ya Yehowa yina ketubila mutindu ya kunwa malafu kenataka?

¹⁷ Kima yankaka ya kemonisa nde minsiku ya Yehowa kevandaka mfunu, kele mutindu yo kebuyisaka kikalulu ya kulauka malafu. Nkutu, yandi kendimaka ve kikalulu ya ‘kunwa malafu ya kuluta kiteso.’ (1 Timoteo 3:3, 8; Roma 13:13) Bantu mingi yina kezitisaka ve minsiku ya Nzambi na dyambu yai kebelaka bamaladi yina kekatukaka to kekumaka ngolo sambu na kulutisa kunwa malafu. Sambu bo kelandaka ve ndongisila ya kuvanda na bukatikati, bantu yankaka mekumaka ti kikalulu ya kunwa mingi kibeni sambu yo “sadisa bo na kuvanda na kyese.” Kikalulu ya kulutisa malafu mingi kenataka mambu mingi, bonso kudikatula luzitu,  kubebisa kuwakana na kati ya fami to kukabwana na fami, kuvidisa mbongo, mpi kuvidisa kisalu. (Bingana 23:19-21, 29-35) Minsiku ya Yehowa kele mpenza lutaninu na dyambu yai.

18. Keti bansiku ya Nzambi kevandaka ti mfunu na mambu ya metala mbongo? Tendula.

¹⁸ Yo memonikaka mpi nde minsiku ya Nzambi kevandaka mfunu na mambu ya mbongo. Biblia kesyamisaka Bakristu na kuvanda masonga mpi kuvanda ngolo na kisalu. (Luka 16:10; Efezo 4:28; Kolosai 3:23) Sambu bo kelandaka ndongisila yai, Bakristu mingi kebakaka bisika ya nene to mpi bo kebikalaka na kisalu ntangu bo kekatulaka bantu yankaka. Kana muntu mosi kuyambula bikalulu yai ya Masonuku kebuya mpi bima yina kelausaka, bonso bansaka ya mbongo, kunwa makaya, mpi dyamba, yo lenda sadisa yandi na kubumba mbongo na yandi. Ntembe kele ve nde nge lenda yindula bambandu yankaka ya kesonga mutindu minsiku ya Nzambi kesadisaka bantu na kuzaba kusadila mbongo mbote.

19, 20. Sambu na nki yo kele mayele na kundima mpi kuzitisa bansiku ya Nzambi?

¹⁹ Yo kevandaka mpasi ve sambu na bantu ya kukonda kukuka na kufwa bansiku ya Nzambi. Yindula mambu yina bantu ya Izraele kusalaka na Ngumba ya Sinai. Nzambi kusongaka bo nde: “Kana beno wila mono ti kulanda bansiku ya kuwakana ya mono wakanaka na beno, beno ta vanda bantu na mono mosi mpenza.” Bo vutulaka nde: “Beto ta sala mambu yonso mutindu Mfumu Nzambi me tuba.” Kansi, bo salaka mambu ya kuswaswana kibeni ti nzila yina bo ponaka na kulanda! (Kubasika 19:5, 8; Nkunga 106:12-43) Kansi, bika nde beto ndima mpi kuzitisa minsiku ya Nzambi.

²⁰ Kukangama na bansiku yina Yehowa mepesaka ya beto lenda fwanisa ve ti bansiku yankaka sambu na kutwadisa luzingu na beto kele nzila ya mayele mpi yo kenataka mambote mingi. (Nkunga 19:7-11) Sambu na kununga na kusala yo, beto fwete bakisa mpi valere ya minsiku ya Nzambi. Yai kele ntu-dyambu ya disolo yina talanda.

[Noti na nsi ya lutiti]

Keti Nge Keyibuka?

• Sambu na nki beto lenda tula ntima nde bansiku ya Nzambi kele sambu na mambote na beto?

• Sambu na nki bikuma beto fwete zola nsiku ya Yehowa?

• Na nki mitindu bansiku ya Nzambi kenataka mambote?

[Bangyufula ya disolo ya kulonguka]

[Kifwanisu ya kele na lutiti 7]

Abrahami kubakaka balusakumunu mingi sambu yandi lemfukaka na nsiku ya Yehowa

[Bifwanisu ya kele na lutiti 9]

Basusi ya luzingu ya bubu yai ya mefuluka na mambu mingi ya kusala kenataka bantu mingi na kukonda kulemfuka na nsiku ya Nzambi

[Kifwanisu ya kele na lutiti 11]

Bonso nzo mosi ya kele na zulu ya ditadi mosi ya nene ya kepesaka nsemo sambu na kusonga bantu nzila, Nsiku ya Nzambi kele na ngolo mingi mpi yo kebalukaka ve