Kuzitisa Mambu Yina Nzambi Kelombaka Kekumisaka Yehowa
Kuzitisa Mambu Yina Nzambi Kelombaka Kekumisaka Yehowa
“Mono ta kumisa nge ntangu mono ta pesaka nge mersi.”—NKUNGA 69:31.
1. (a) Sambu na nki beto fwete kumisa Yehowa? (b) Inki mutindu beto kekumisaka yandi na ntangu beto kepesa yandi mersi?
YEHOWA kele Nzambi nkwa-ngolo yonso, Mfumu ya ntoto ya mvimba, Ngangi na beto. Yo yina, zina na yandi mpi balukanu na yandi mefwana na kubaka lukumu. Kukumisa Yehowa ketendula kukembila mpi kupesa yandi lukumu na kutuba mpi na bisalu na beto. Sambu na kusala yo na ntangu beto ‘kepesa yandi mersi,’ yo kelombaka nde ntangu yonso beto monisa ntonda sambu na mambu yina yandi kesala sambu na beto bubu yai ti yina yandi tasadila beto na bilumbu yina kekwisa. Bangindu ya beto fwete vanda na yo kemonana pwelele na Kusonga 4:11, kisika bigangwa ya kwikama ya kimpeve na zulu ketuba nde: “Nge Mfumu Nzambi na beto, Nge me lunga na kubaka lukumu, luzitu ti ngolo. Sambu nge muntu salaka bima yonso; bima yonso ke zingaka, bo ke na moyo kaka sambu na luzolo na nge.” Inki mutindu beto kekumisaka Yehowa? Beto kesalaka yo na ntangu beto kelongukaka mambu yina metala yandi mpi na nima kuzitisa mambu yina yandi kelomba beto na kusala. Beto fwete wa mutindu muyimbi-bankunga kuwaka ntangu yandi tubaka nde: “Nge kele Nzambi na mono, longa mono na kusala konso kima ya nge zola.”—Nkunga 143:10.
2. Inki mutindu Yehowa kebakaka bantu yina kekumisaka yandi mpi ti bayina kesalaka yo ve?
2 Yehowa kebakaka bantu yina kekumisaka yandi na valere mingi. Yo yina yandi “ke pesaka matabisi na bantu yina ke sosaka yandi.” (Baebreo 11:6) Matabisi yango kele inki? Yezu kutubaka na kisambu yina yandi salaka na Tata na yandi ya zulu nde: “Kana bo zaba nge Nzambi mosi ya kieleka, ti Yesu Kristo yina ya nge tindaka, yo ke songa nde bo ke na moyo ya mvula na mvula.” (Yoane 17:3) Ya kyeleka, ‘bantu yina ke kumisaka [Yehowa] mpi kupesa yandi mersi’ ta “zinga na ngemba na ntoto yina ya Mfumu Nzambi tubaka na kupesa bo; yo ta vanda ya bo tii kuna.” (Nkunga 37:29) Kansi, “muntu ya mbi ta zwa ata kima ve na ntwala.” (Bingana 24:20) Ebuna, na bilumbu yai ya nsuka, mfunu ya kukumisa Yehowa mekuma dyaka mingi mpenza sambu kubika fyoti yandi tafwa bantu ya mbi mpi kutanina bantu ya lunungu. “Nsi-ntoto ti bima yonso kele na yo ya bantu ke zolaka, yo ke mana, kansi muntu yina ke salaka mambu yina ya Nzambi ke zolaka, yandi ke zingaka mvula na mvula.”—1 Yoane 2:17; Bingana 2:21, 22.
3. Sambu na nki beto fwete tula dikebi na mukanda ya Malashi?
3 Beto kelongukaka luzolo ya Yehowa na Biblia, sambu “bo sonikaka Mukanda ya Nzambi yonso na ngolo na yandi.” (2 Timoteo 3:16) Ndinga yai ya Nzambi kele ti masolo mingi ya kemonisa mutindu Yehowa kesakumunaka bantu yina kekumisaka yandi mpi mambu yina kebwilaka bantu yina kesalaka yo ve. Mosi na kati ya masolo yango ketubila mambu yina kusalamaka na Izraele na ntangu ya profete Malashi. Penepene na mvu 443 ya N.T.B., na ntangu Nehemia kuvandaka guvernere ya Yuda, Malashi kusonikaka mukanda yina kele ti zina na yandi. Mukanda yai ya ngolo mpi ya kesimba ntima kele ti bansangu mpi bambikudulu ya “bo sonikaka . . . sambu na kupesa beto atasio. Sambu beto me kuma penepene na nsuka ya ntoto.” (1 Korinto 10:11) Kutula dikebi na mambu yina Malashi ketuba lenda sadisa beto na kuyilama sambu na “kilumbu ya nene mpi ya kepesa boma ya Yehowa,” ntangu Yandi tafwa ngidika yai ya mbi.—Malashi 4:5, NW.
4. Inki mambu sambanu kebenda dikebi na beto na kapu ya 1 ya Malashi?
4 Inki mutindu mukanda ya Malashi, ya bo sonikaka bamvula kuluta 2 400 meluta, kesadisa beto na mvu-nkama yai ya 21 sambu na kuyilama sambu na kilumbu ya nene mpi ya kepesa boma ya Yehowa? Kapu ya ntete kebenda dikebi na beto na mambu sambanu ya mfunu sambu na kukumisa Yehowa mpi kupesa yandi mersi sambu yandi ndima beto mpi kupesa beto luzingu ya mvula na mvula: (1) Yehowa kezolaka bantu na yandi. (2) Beto fwete songa luzitu na bima ya santu. (3) Yehowa kezolaka nde beto pesa yandi bima na beto ya kuluta mfunu. (4) Lusambu ya kyeleka kesalamaka sambu na zola ya kukonda kutala kaka mambote ya muntu yandi mosi, kansi bwimi ve. (5) Kisalu ya Nzambi kendimaka kele ve kisalu yina muntu kesalaka kaka sambu bantu kumona yandi. (6) Konso muntu fwete sala bakonti na Nzambi. Yo yina, na disolo yai ya ntete na kati ya masolo tatu ya ketubila mukanda ya Malashi, bika beto tadila dyambu mosimosi ya mambu yina ntangu beto ketadila Malashi kapu 1.
Yehowa Kezolaka Bantu na Yandi
5, 6. (a) Sambu na nki Yehowa vandaka kuzola Yakobi? (b) Kana beto kelanda mbandu ya kwikama ya Yakobi, beto lenda tula kivuvu na inki?
5 Baverse ya ntete ya Malashi ketendula mbotembote zola ya Yehowa. Mukanda na yandi keyantika na bangogo yai: “Mukanda yai ke songa mambu ya Mfumu Nzambi tubaka na bantu ya Israele.” Na nima, Nzambi ketuba nde: “Mono me zolaka beno.” Sambu na kupesa mbandu mosi, kaka na verse yai, Yehowa ketuba nde: “Mono vandaka kuzola Yakobi mingi.” Yakobi vandaka kutula lukwikilu na Yehowa. Na nima, Yehowa kupesaka Yakobi zina ya Izraele, ebuna yandi kumaka nkaka ya dikanda ya Izraele. Yandi salaka yo sambu Yakobi kuvandaka muntu ya kwikama yina Yehowa kuzolaka. Bantu yina kumonisaka bikalulu bonso ya Yakobi na Yehowa, Yandi zolaka bo mpi.—Malashi 1:1, 2.
6 Kana beto zola Yehowa mpi beto kangama na bantu na yandi na masonga yonso, beto lenda baka kikesa na mambu yina kele na 1 Samuele 12:22 (NW): “Yehowa tabika beno ve bantu na yandi ata fyoti sambu na zina na yandi ya nene.” Yehowa kezolaka bantu na yandi mpi yandi kepesaka bo matabisi, nsukansuka yandi tapesa bo luzingu ya mvula na mvula. Yo yina, beto ketanga nde: “Tula ntima na Mfumu Nzambi, sala mambu ya mbote; mpidina nge ta zinga mbote na [ntoto, mpi salaka mambu na kwikama yonso, NW]. Mona kiese na Mfumu Nzambi, yandi ta pesa nge kima ya nge zola.” (Nkunga 37:3, 4) Kuzola ya beto kezolaka Yehowa kesimba dyambu ya zole ya bo ketubila na Malashi kapu 1 ya kebenda dikebi na beto.
Beto Songa Luzitu na Bima ya Santu
7. Sambu na nki Yehowa vandaka kuzola ve Ezau?
7 Mutindu beto tangaka yo na Malashi 1:2, 3, na nima Yehowa ketuba nde: “Mono vandaka kuzola Yakobi mingi ti bana na yandi, kansi Ezau ti bana na yandi mono mengaka bo.” Sambu na nki mpidina? Sambu Yakobi vandaka kukumisa Yehowa, kansi dipasa na yandi, Ezau, vandaka kusala yo ve. Zina yankaka ya Ezau kuvandaka Edomi. Na Malashi 1:4, ntoto ya Edomi bo kebinga yo nsi ya mbi, mpi Nzambi ketuba mbi na bo na meso ya bantu yonso. Zina Edomi (disongidila “Mbwaki”) bo pesaka yo na Ezau sambu yandi tekaka kimbuta na yandi na Yakobi sambu na ndambu ya supu ya mbwaki. Kuyantika 25:34 ketuba nde: “Mutindu yo yai Ezau buyaka kimbuta na yandi.” Ntumwa Polo kebisaka bampangi na yandi Bakristu nde “ata muntu mosi ve lenda sala pite to kukonda kuzitisa mambu ya Nzambi, bonso Ezau yina tekaka kimbuta na yandi na leki na yandi sambu na kudia madia mbala mosi.”—Baebreo 12:14-16.
8. Inki kima kupusaka Polo na kufwanisa Ezau na muntu ya mesala pite?
8 Sambu na nki Polo kefwanisa mambu yina Ezau vandaka kusala na pite? Sambu kuvanda na bangindu bonso ya Ezau lenda nata muntu na kubwa na mutambu ya kukonda kubaka bima ya santu na valere. Ebuna, kusala mutindu yai lenda nata muntu na kusala masumu ya nene, bonso pite. Yo yina, konso muntu na kati na beto fwete kudiyula nde: ‘Keti mono kemekamaka ntangu yankaka na kuteka kimvwama na mono ya Mukristu, disongidila luzingu ya mvula na mvula, na kima ya fyoti bonso dilonga ya supu ya mbwaki? Mbala yankaka kukonda kuzaba yo, keti mono kemonaka bima ya santu mpamba?’ Ezau kusosaka kulungisa mpusa na yandi ya kinsuni nswalunswalu. Yandi tubaka na Yakobi nde: “Mono ke wa nzala mingi; pesa mono [nswalu] ndambu ya supu yai ya mbwaki, mono dia.” (Kuyantika 25:30) Yo kele mawa mingi na kumona nde, bansadi ya Nzambi yankaka metubaka mpi nde: “Nswalu! Sambu na nki kukinga makwela ya lukumu?” Kusosa kulungisa mpusa ya kuvukisa nitu kukonda kutala mambu ya bo tavidisa kuvandaka bonso dilonga ya supu ya mbwaki.
9. Inki mutindu beto lenda monisa boma mpi luzitu na Yehowa?
9 Bika beto sala ve mambu ya kemonisa nde beto kebaka ve bima ya santu na valere bonso kukonda kuzitisa bansiku, kwikama, mpi kimvwama na beto ya kimpeve. Olie ya kuvanda bonso Ezau, bika beto vanda na kikalulu ya kwikama bonso Yakobi mpi kusonga boma mpi luzitu na Nzambi sambu na kumonisa nde beto kebaka bima ya santu na valere. Inki mutindu beto lenda sala yo? Kana beto kekeba na kuzitisa mambu yina Yehowa kelomba beto. Yo kele pwelele nde ngindu yai kenata beto na dyambu ya tatu ya Malashi kutubilaka na kapu 1. Inki dyambu yango?
Beto Pesa Yehowa Bima na Beto ya Kuluta Kitoko
10. Na nki mutindu banganga-Nzambi vandaka kukonda luzitu na mesa ya Yehowa?
10 Banganga-Nzambi ya Yuda yina vandaka kusala na tempelo na Yeruzalemi na ntangu ya Malashi vandaka kupesa ve Yehowa makabu ya kuluta kitoko. Malashi 1:6-8 ketuba mpidyai: “[Yehowa, mfumu ya bibuka ya basoda, NW], ke tuba na banganga-Nzambi nde: ‘Mwana ke zitisaka tata na yandi, mpika ke zitisaka mfumu na yandi. Mono, mono kele tata na beno, sambu na nki beno ke zitisaka mono ve? Mono kele mfumu na beno, sambu na nki beno ke kumisaka mono ve?’ Beno kefingaka mono.” Banganga-Nzambi kuyulaka nde: “Inki mutindu beto me finga nge?” Yehowa kuvutulaka nde: “Beno ke fingaka mono ntangu beno ke tulaka madia ya mpamba-mpamba na zulu ya mesa-kimenga sambu na kupesa mono makabu.” Banganga-Nzambi kuyulaka nde: “Inki mutindu beto ke zitisaka nge ve?” Ebuna Yehowa kuvutudilaka bo nde: “Beno ke fingaka mono ntangu beno ke saulaka mesa-kimenga na mono.” Banganga-Nzambi yina kumonisaka nde bo kondaka luzitu na mesa ya Yehowa konso ntangu ya bo vandaka kunata bambisi yina vandaka na kifu na nitu sambu na kupesa yandi makabu, kansi bo vandaka kutuba nde: “Kima ya mbi kele ve.”
11. (a) Inki Yehowa kutubaka sambu na makambu ya mbi? (b) Na nki mutindu bantu yonso na kimvuka vandaka kusala mbi?
11 Ebuna, Yehowa yantikaka kuyindula ti bo mutindu yai sambu na makabu na bo yina ya mbi: “Beno peseti mbisi ya mutindu yina na guvernere na beno! Keti yandi ta mona beno kiese to kusala beno mambote?” Ata fyoti ve, guvernere na bo zolaka kumona ve kyese na makabu ya mutindu yai. Ya kyeleka, Mfumu ya Nene mpi ya ntoto ya mvimba lenda ndima ve ata fyoti makabu yai ya mbi! Banganga-Nzambi mpamba ve bantu vandaka kusala mbi. Ya kyeleka, bo vandaka kufinga Yehowa na kupesaka yandi makabu ya bambisi yina vandaka ti bifu na nitu. Kansi, keti bantu yonso na kimvuka vandaka kusala mbi? Ee! Bo bantu vandaka kupona bambisi ya kufwa-meso, ya vandaka kutambula kifu, mpi ya maladi mpi bo vandaka kunata yo na banganga-Nzambi sambu bo pesa yo makabu. Yo vandaka disumu ya nene mpenza!
12. Inki mutindu bo kesadisaka beto sambu na kupesa Yehowa bima na beto ya kuluta kitoko?
12 Kupesa Yehowa bima na beto ya kuluta kitoko kele mutindu ya kumonisa nde beto kezolaka yandi kibeni. (Matayo 22:37, 38) Banganga-Nzambi ya ntangu ya Malashi vandaka ntu-ngolo, kansi organizasio ya Yehowa bubu yai kelongaka malongi ya Biblia yina kesadisaka beto na kukumisa Yehowa, na kupesa yandi mersi na mpila beto kezitisaka mambu yina Nzambi kelombaka beto na kusala. Beto tadila ntangu yai dyambu ya iya ya kewakana ti yai ya beto mekatuka kutubila ya kele na Malashi kapu 1.
Zola Kepusaka Beto na Lusambu ya Kyeleka, Kansi Bwimi Ve
13. Inki mambu banganga-Nzambi vandaka kusala ya kumonisaka nde bo vandaka kusala mambu na bwimi?
13 Banganga-Nzambi ya ntangu ya Malashi kuvandaka na bwimi, bo vandaka na zola ve, mpi bo vandaka na nzala ya mbongo mingi. Inki mutindu beto kezaba yo? Malashi 1:10 ketuba nde: “Mbote kana muntu mosi na beno kukanga bakielo ya Nzo-Nzambi, mpidina beno ta tula diaka ve tiya mpamba-mpamba na mesa-kimenga na mono. Mono ke na beno kiese ve ata fioti! Makabu ya beno ke natila mono, mono lenda ndima yo mpi ve! Mono Mfumu Nzambi [Yehowa munkwa-basoda], muntu me tuba.” Ya kyeleka, banganga-Nzambi yina ya bwimi vandaka kulomba mbongo sambu na konso kakisalu ya fyoti yina bo vandaka kusala na tempelo. Bo vandaka kulomba mbongo ata sambu na kukanga bakyelo mpamba mpi kupedisa tiya na mesa-kimenga! Mpila ya kuyituka kele ve na kumona nde Yehowa kubuyaka makabu ya bo vandaka kunatila yandi!
14. Sambu na nki beto lenda tuba nde kima ya kepusaka Bambangi ya Yehowa na kisalu na bo kele zola?
14 Bwimi ti kikalulu ya kuvanda na nzala ya konso kima yina banganga-Nzambi ya masumu ya bwala ya Yeruzalemi ya ntama vandaka na yo lenda yibusa beto dibanza ya kele na Ndinga ya Nzambi yina ketuba nde bantu ya bwimi takota ve na Kimfumu ya Nzambi. (1 Korinto 6:9, 10) Kana beto yindula mambu yina banganga-Nzambi vandaka kusala na bwimi yonso sambu na mambote na bo mosi, yo kesadisa beto na kubakisa mbote mpi kusepela ti mutindu Bambangi ya Yehowa ke na kusala kisalu ya kusamuna na ntoto ya mvimba. Yo kele kisalu ya beto kesalaka na luzolo ya mbote, mpi beto kelombaka ve bantu mbongo sambu na kisalu na beto. Ve, “beto kele ve bonso bantu mingi yina ke yikaka mambu ya nkaka na mambu ya Nzambi.” (2 Korinto 2:17) Bonso Polo, konso muntu na kati na beto lenda tuba na masonga yonso nde: “Ntangu mono zabisaka beno Nsangu ya mbote ya Nzambi [na kiese yonso, NW], mono lombaka beno mbongo ve.” (2 Korinto 11:7) Beno simba nde Polo “zabisaka Nsangu ya Mbote na kiese yonso.” Ngindu yai kepusa beto na kuyindula dyambu ya tanu yina kebenda dikebi na beto na Malashi kapu 1.
Kisalu ya Nzambi Kele Ve Kilo ya Beto Kenataka Sambu Bantu Kumona Beto
15, 16. (a) Inki bangindu banganga-Nzambi kuvandaka na yo sambu na yina metala kupesa makabu? (b) Inki mutindu Bambangi ya Yehowa kepesaka makabu na bo?
15 Banganga-Nzambi ya kukonda kwikama ya Yeruzalemi ya ntama vandaka kumona kisalu ya kupesa makabu bonso kisalu mosi ya kulembisa ya bo vandaka kusala kaka sambu bantu kumona bo. Yo vandaka kisalu ya mpasi sambu na bo. Mutindu beto kemona yo na Malashi 1:13, Nzambi kusongaka bo nde: “Beno ke tubaka nde: ‘A beto me lemba na mambu yai!’ Mpidina beno ke fingaka mono.” Banganga-Nzambi kufingaka, to kukondaka luzitu na bima ya santu ya Nzambi. Beto fwete sambaka na kikesa yonso sambu beto kuma ve bonso bo. Kansi, beto fwete monisaka ntangu yonso kikalulu yai ya bo ketubila pwelele na 1 Yoane 5:3 nde: “Sambu, kana beto ke zolaka Nzambi, yo ke songa nde beto ke landaka bansiku na yandi. Ebuna bansiku na yandi kele mpasi ve beto na kulanda yo.”
16 Beto fwete vanda na kyese na kupesa makabu ya kimpeve na Nzambi, beto fwete baka yo ve bonso kisalu mosi ya kulembisa. Bika beto tuba bangogo yai bonso profete: “Beno vutuka na Mfumu Nzambi; beno kwisa kutuba na yandi nde: ‘Mfumu Nzambi, wila beto mawa sambu na masumu na beto, ndima bisambu na beto, ebuna [beto tanatila nge bana ya ngombe ya bikobo na beto, NW]. ‘” (Ozea 14:3) Bangogo “bana ya ngombe ya bikobo na beto” ketendula makabu ya kimpeve, mambu ya beto ketubaka sambu na kukumisa Yehowa ti balukanu na yandi. Baebreo 13:15 ketuba nde: “Konso ntangu beto fweti pesa lukumu na Nzambi; lukumu yina kele bonso makabu ya beto ke pesa Nzambi na zina ya Yesu. Disongidila nde beto fweti lemba ve na kukumisa zina ya Nzambi na munoko na beto.” Beto kele na kyese na kumona nde makabu na beto kele ve makabu mosi ya beto kepesaka kaka sambu beto fwete pesa yo, kansi yo kemonisaka zola ya masonga yina beto kevandaka na yo sambu na Nzambi! Dyambu yai kenata beto na dyambu ya sambanu ya beto lenda longuka na Malashi kapu 1.
Konso Muntu Fwete Sala Bakonti na Nzambi
17, 18. (a) Sambu na nki Yehowa vandaka kupesa ndola na “muntu ya mayele ya mbi”? (b) Inki kima bantu yina vandaka kusala mambu ti mayele ya mbi vandaka kutadila ve?
17 Mukumba ya mambu yonso ya bantu yina vandaka kuzinga na bilumbu ya Malashi kusalaka, vandaka na ntu na bo mosi. Yo kele mutindu mosi sambu na beto bubu yai. (Roma 14:12; Galatia 6:5) Yo yina, Malashi 1:14 ketuba nde: “Mono ta pesa ndola na muntu [ya mayele ya mbi, NW] yina ke pesa mono mbisi ya mpamba-mpamba makabu, kana yandi ke zaba nde yandi ke na mbisi ya kitoko ya yandi tubaka na kupesa mono.” Konso muntu yina kuvandaka ti kibuka ya bambisi, yandi vandaka ve ti mbisi mosi kaka, to dimeme mosi, sambu beto tuba nde mpila ya kupona kuvandaka ve. Na ntangu yandi vandaka kupona mbisi ya kupesa makabu, yo lombaka ve nde yandi pona yina ya kufwa-meso, ya kufwa-makutu, to ya maladi. Kana yandi ponaka mbisi yina kele na kifu, yo zolaka kusonga mpenza nde yandi mekonda luzitu na makabu yina Yehowa vandaka kulomba, sambu muntu yina kuvandaka ti kibuka ya bambisi zolaka kukonda ve mbisi ya kukonda bifu ya mutindu yina!
18 Ebuna, Yehowa vandaka ti kikuma ya mbote ya kupesa ndola na muntu ya mayele ya mbi, yina kuvandaka ti mbisi ya mbote kansi yandi kenata, mbala yankaka kebenda, mbisi ya kufwa meso, ya kufwa makutu, to ya maladi na banganga-Nzambi sambu na kupesa makabu. Ata kima mosi ve kesonga nde banganga-Nzambi kutangilaka bantu Nsiku mpi kutendudila bo nde Nzambi vandaka kundima ve bambisi ya kifu ya mutindu yina. (Levi 22:17-20) Bantu ya mayele vandaka kubakisa nde kana bo natila guvernere na bo dikabu ya mbi ya mutindu yina yandi lendaka kundima yo ve. Kansi kana beto tala mbote bantu ya Izraele vandaka kupesa makabu na bo na Mfumu ya ntoto ya mvimba, Yehowa, ya meluta mpenza baguvernere ya bantu. Malashi 1:14 ketubila dikambu yango mutindu yai: “Sambu mono kele Mfumu ya nene, zina na mono fweti pesa bantu ya nsi-ntoto boma. Mono [Yehowa], muntu me tuba.”
19. Inki beto kekinga, mpi nki beto fwete sala?
19 Beto bansadi ya masonga ya Nzambi, beto kekinga kilumbu bantu yonso ya ntoto ya mvimba takumisa Mfumu ya Nene, Yehowa. Na ntangu yina, “ntoto ta fulukaka na mambu yai: kuzaba Mfumu Nzambi, mutindu nzadi-mungwa ke fulukaka na masa.” (Yezaya 11:9) Kansi na ntwala nde dyambu yai kusalama, beto fwete sala ngolo sambu na kuzitisa mambu yina Yehowa kelomba na beto, mutindu muyimbi-bankunga ya vandaka kusala yo, kutubaka: “Mono ta kumisa nge na bankunga, mono ta kumisa nge ntangu mono ta pesaka nge mersi.” (Nkunga 69:31) Sambu na kusala mambu yai yonso, Malashi kepesa beto bandongisila yankaka yina lenda sadisa beto. Yo yina, na masolo zole ya melanda, bika beto tadila dyaka mbotembote bitini yankaka ya mukanda ya Malashi.
Keti Nge Keyibuka?
• Sambu na nki beto fwete kumisa Yehowa?
• Sambu na nki Yehowa vandaka kundima ve makabu yina banganga-Nzambi ya ntangu ya Malashi vandaka kupesa?
• Inki mutindu beto kepesaka makabu ya bikobo na beto?
• Inki kima fwete pusa beto na lusambu ya kyeleka?
[Bangyufula ya disolo ya kulonguka]
[Kifwanisu ya kele na lutiti 18]
Mbikudulu ya Malashi kutubilaka bilumbu na beto
[Kifwanisu ya kele na lutiti 19]
Ezau kubakaka ve bima ya santu na valere
[Kifwanisu ya kele na lutiti 20]
Banganga-Nzambi ti bantu yonso kupesaka makabu ya mbi
[Kifwanisu ya kele na lutiti 21]
Na ntoto ya mvimba, Bambangi ya Yehowa kepesaka makabu ya bikobo na bo kukonda kulomba mbongo