Bangyufula ya Batangi

Kana muntu mekudifwa, keti Mukristu mosi kele na nswa ya kusala diskure ya kuzika mvumbi?

Konso Mukristu fwete baka desizio yandi mosi kana kansansa na yandi ya mbote kepesa yandi nswa ya kusala diskure ya kuzika mvumbi sambu na muntu yina kemonana nde yandi mekudifwa yandi mosi. Na ntangu yandi kebaka desizio ya kusala yo, yandi fwete tadila bangyufula yai: Inki mutindu Yehowa ketadilaka kudifwa? Keti muntu yango yandi mosi mekudifwa na luzolo yonso? Keti maladi ya ntu to ya basusi mepusa yandi na kudifwa? Inki mutindu bantu ketadilaka kudifwa na kisika ya beno ke na kuzinga?

Beto Bakristu, beto kesosaka kuzaba nki mutindu Yehowa ketadilaka kudifwa. Sambu na Yehowa luzingu ya muntu kele na valere mingi mpi yo kele ya santu. (Kuyantika 9:5; Nkunga 36:9) Kudifwa na luzolo yonso kele kudikatula luzingu, mpi yo kele mbi na meso ya Nzambi. (Kubasika 20:13; 1 Yoane 3:15) Keti yo ketendula nde bo lenda sala ve ata fyoti diskure ya kuzika mvumbi sambu na muntu yina mekudifwa?

Beto baka mbandu ya Saule, Ntotila ya Izraele. Ntangu yandi monaka nde yandi tanunga ve bitumba ya nsuka ya yandi vandaka kunwana ti bantu ya Filistia, na kifulu ya kubika nde bambeni na yandi kusakana ti nitu na yandi, “Saule bakaka mbele na yandi mosi, yandi tumikaka yo na ntoto, yandi bwaka na zulu na yo.” Ntangu bantu ya Filistia kumonaka mvumbi na yandi, bo kangisaka yo na kibaka ya bwala Bete-Sheani. Ntangu bo monaka mambu yina bantu ya Filistia kusalaka, bantu ya bwala Yabeshi-Gileadi kukatulaka mvumbi na yandi mpi bo yokaka yo. Na nima bo bakaka mikwa na yandi mpi bo zikaka yo. Nkutu bo buyaka madya bilumbu nsambwadi, mutindu bantu ya Izraele vandaka kudila bamvumbi na bo sambu na kuzitisa nsiku ya bambuta na bo. (1 Samuele 31:4, 8-13; Kuyantika 50:10) Ntangu Davidi, mupakulami ya Yehowa, kuwaka mambu yina bantu ya Yabeshi-Gileadi kusalaka, yandi tubaka nde: “Mfumu Nzambi kusakumuna beno sambu beno me kudisonga bantu ya mbote na kuzika ntotila Saule. Mbote Mfumu Nzambi mpi kutala beno na disu ya mbote ti kuwila beno mawa.” (2 Samuele 2:5, 6) Biblia kemonisa ve nde bo monaka bantu ya bwala Yabeshi-Gileadi mbi sambu bo salaka dyambu ya beto lenda binga kusala mafwa sambu na Ntotila Saule. Fwanisa disolo yai ti bantu yina bo zikaka ve sambu na mambi na bo. (Yeremia 25:32, 33) Mukristu lenda tadila disolo ya Saule sambu na kubaka desizio kana yandi lenda sala diskure ya kuzika mvumbi sambu na muntu yina mekudifwa to ve.

Yo tavanda mbote kana Mukristu yango kutadila mpi lukanu ya diskure ya mafwa. Bambangi ya Yehowa kesalaka ve mutindu bantu yina kekwikilaka nde moyo kefwaka ve kesalaka. Bo kesalaka ve diskure ya kuzika mvumbi ti dibanza ya luvunu ya kutuba nde muntu yina mefwa mekwenda na kisika yankaka. Bo kesalaka ve diskure ya kuzika mvumbi sambu na mambote ya muntu yina mefwa, kansi lukanu na yo ya ntete kevandaka ya kupesa kikesa na bantu yina mpangi na bo mefwa mpi kupesa kimbangi ya metala nkadilu ya bafwa na bantu yina mekwisa na mafwa. (Longi 9:5, 10; 2 Korinto 1:3-5) Kikuma yankaka ya mfunu ya bo kesadilaka diskure ya kuzika mvumbi kele ya kusadisa bantu yonso yina mekwisa na mafwa na kuyindula luzingu ya nkufi ya bantu kevandaka na yo. (Longi 7:2) Keti mutubi talungisa balukanu yai kana yandi sala diskure ya kuzika mvumbi sambu na muntu yina mekudifwa?

Ya kyeleka, bantu mingi lenda yindula nde muntu yango mesukisa luzingu na yandi na luzolo yonso, mpi nde yandi vandaka kuzaba mbote nde yandi ke na kusala disumu na meso ya Yehowa. Ata mpidina, keti mpila ya kusadisa bantu yina kele na ngindu ya mutindu yina kele? Keti yandi salaka yo na makasi? Bantu mingi ya kemekaka na kudifwa kebalulaka mabanza na bo mpi keyambulaka na kusala yo. Na nima ya lufwa, muntu lenda balula ve ntima sambu na mambu yina yandi mesala.

Dyambu yankaka ya mfunu kele nde bantu mingi ya kebelaka maladi ya ntu to ya basusi kekudifwaka. Beto lenda tuba mpenza nde bantu ya mutindu yai mekudifwa sambu na maladi ya bo kebela. Bantalu mingi kemonisaka  nde, bantu 90 na kati ya nkama ya mekudifwaka kusalaka yo sambu bo vandaka kubela maladi ya ntu, basusi, to sambu na kimpika ya bima yina kelausaka ya bo vandaka kusadila. Keti Yehowa talolula bantu yina mekudifwaka sambu na bikuma ya mutindu yai ya kesimba mabanza? Beto kele ve na kiyeka ya kutuba kana muntu yina mekudifwa mesala disumu yina Yehowa lenda lolula ve. Mukristu lenda tadila mbote luzingu ti mavimpi ya mabanza ya muntu yina mekudifwa na ntangu yandi keyindula kana yandi tasala diskure ya mafwa sambu na muntu yina mekudifwa.

Dyambu mosi dyaka ya kutadila yo yai: Inki mutindu bantu ya bwala na beto ketadilaka kudifwa mpi lufwa ya muntu yina mekudifwa? Bankuluntu fwete tadila mpenza dyambu yai mbote, sambu bo bantu kele ti mukumba ya kutanina lukumu ya dibundu ya Bambangi ya Yehowa ya bwala na beno. Kana bo metadila mutindu bantu keyindula sambu na yina metala kudifwa na bwala na beno, mpi mingimingi dikambu ya muntu yina mekudifwa, bankuluntu lenda buya na kusala diskure ya mafwa ya mutindu yina na meso ya bantu to na Nzo ya Kimfumu.

Kansi, kana bo mebinga Mukristu mosi na kutwadisa diskure ya mafwa yina Bakristu yankaka meyidika, yandi tabaka desizio na yandi yandi mosi, kana yandi tasala yo to ve. Kana yandi mebaka desizio ya kusala yo, yandi fwete keba mpenza na kukonda kutuba kana muntu yina mefwa tafutumuka to ve. Luzingu ya bilumbu kekwisa ya muntu yina mefwa metala Yehowa yandi mosi, ata muntu mosi ve kele na kiyeka ya kutuba kana muntu yina mekudifwa tafutumuka to ve. Mukristu yina kesala diskure ya mafwa na kisika ya mutindu yina tasuka kaka na kutendula bakyeleka ya Biblia yina metala lufwa mpi kupesa kikesa na bantu yina mpangi na bo mefwa.