Bapasi ya Bantu Kubika Fyoti Yo Mana!

“LUSADISU yina bimvuka kepesaka na bantu yina kemona mpasi kele na valere mingi ve kana mosi na kati ya balukanu na yo kele ve ya kusosa kukatula nto ya mavwanga yina kenata mpasi yango. Mambu yonso ya kelutaka na luzingu ya bantu kemonisaka mbala na mbala nde lusadisu ya bimvuka yina yo mosi mpamba lenda manisa ve mavwanga yina kekatukaka ntetentete na politiki.”​—The State of the World’s Refugees 2000.

Ata bantu ke na kusala mambu mingi sambu na kusadisa bantu yina kele na mpasi, bampasi ya bantu ke na kumona kekuma kaka mingi kibeni. Keti bantu kele na ngolo ya kumanisa mavwanga ya politiki? Na kuta masonga, mingi ve. Kansi na wapi dyaka beto lenda tula ntima? Na kitini mosi ya mfunu na mukanda na yandi na Bakristu ya Efezo, ntumwa Polo ketendula mutindu Nzambi tamanisa bampasi yonso ya bantu kemonaka. Nkutu yandi kesonga kima ya Nzambi tasadila sambu na kusala yo, kima yango takatula nto ya bampasi yonso yina ke na kunyokula bantu bubu yai. Sambu na nki ve kutadila mambu yina Polo ketuba? Mambu yango kele na Efezo 1:3-10.

“Kuvukisa Dyaka Bima Yonso Kumosi na Kristu”

Ntumwa ketuba nde, lukanu ya Nzambi kele na yo kele yina ya yandi kebinga nde ‘administrasio [to kutwadisa mambu yonso] na nsuka kibeni na ntangu ya yandi metulaka.’ Inki yo kezola kutuba? Yo ketendula nde Nzambi metulaka ntangu ya yandi tasala na mpila nde yandi “kuvukisa dyaka bima yonso kumosi na Kristu, bima yina kele na zulu ti bima yina kele na ntoto.” (Efezo 1:10, NW) Ee, Nzambi meyantikaka dezia na kusadila ngidika mosi sambu na kuwakanisa bima yonso na zulu ti na ntoto na nsi ya kiyeka na yandi. Yo kele kyese na kumona nde, sambu na yina metala ngogo ya bo mebalula nde ‘kuvukisa dyaka kumosi,’ muntu mosi ya mayele ya kelongukaka Biblia, J. H. Thayer ketuba nde: “Kuvukisa dyaka sambu na yandi mosi . . . bima mpi bantu yonso (yina disumu mekabulaka tii na ntangu yai) na kimpangi mosi na kimvuka ti Kristu.”

Dyambu yai kesonga nde yo kele mfunu nde Nzambi kusala yo sambu na kukabwana yina kukotaka na kisika ya ntete. Na luyantiku ya disolo ya bantu, bibuti na beto ya ntete, Adami ti Eva, kulandaka  Satana Dyabulu na kukolama na yandi na Nzambi. Bo zolaka kimpwanza sambu bo vanda na nswa ya kupona bo mosi mambu yina kele ya mbote mpi ya mbi. (Kuyantika 3:1-5) Na kuwakana ti lunungu ya Nzambi, Nzambi kukulaka bo na dibuta na yandi, mpi bo vidisaka kinduku na bo ti yandi. Bo kotisaka bantu yonso na kukonda kukuka yina menatilaka beto bampasi ya beto ke na kumona bubu yai.​—Roma 5:12.

Yandi Mepesaka Nswa na Mambi Sambu na Ntangu Fyoti

Bantu yankaka lenda kudiyula nde: ‘Sambu na nki Nzambi kubikaka bo nde bo sala yo?’ ‘Sambu na nki yandi sadilaka ve ngolo na yandi ya meluta bangolo yonso sambu na kupusa bo na kusala luzolo na yandi, yina zolaka kusala nde bampasi yonso ya beto kemona bubu yai kukumina beto ve?’ Yo kele mpasi ve na kuyindula mutindu yai. Kansi, keti kusadila ngolo na yandi ya nene mutindu yina zolaka kusonga mpenza inki? Keti nge kesepilaka to kendimaka muntu yina kebuyaka bantu yonso yina kevandaka ve dibanza mosi ti yandi kaka na mbala ya ntete ya bo mekutana sambu yandi kele na ngolo ya kusala yo? Ata fyoti ve.

Bankolami yina kutulaka mpenza ve ntembe na ngolo ya Nzambi ya meluta bangolo yonso. Kansi bo tulaka ntembe ntetentete na nswa ya yandi kele na yo mpi na mutindu na yandi ya mbote ya kutwadisa. Sambu na kumanisa bangyufula yango ya mfunu yina kubasikaka na luyantiku mbala mosi mpi kimakulu, Yehowa kupesaka nzila na bigangwa na yandi na kutwadisa luzingu na bo mosi kukonda lutwadisu na yandi sambu na mwa ntangu. (Longi 3:1; Luka 21:24) Kana ntangu yina kumana, yandi tabaka mambu na maboko sambu na kutwadisa mambu yonso ya ntoto. Na ntangu yina, yo tamonana pwelele mpenza nde mutindu na yandi ya kutwadisa mpamba lenda nata ngemba, kyese, mpi kimvwama ya kyeleka na bantu yina tazinga na ntoto. Ebuna bantu yonso yina kemonisaka bantu yankaka mpasi na ntoto ya mvimba tafwa kimakulu.​—Nkunga 72:12-14; Daniele 2:44.

‘Ntangu Inza Mesalama Ntete Ve’

Yehowa kubakaka lukanu ya kusala mambu yai yonso banda ntama. Ntumwa Polo ketubila ‘ntangu Nzambi vandaka me sala ntete ve [inza].’ (Efezo 1:4) Yandi ketubila ve ntangu yina Nzambi vandaka mesala ntete ve Adami ti Eva, sambu inza ya ntangu yina kuvandaka kwayo “mbote mpenza,” mpi kukolama vandaka mesalama ntete ve. (Kuyantika 1:31) Ebuna nki ‘inza’ ntumwa Polo vandaka kutubila? Inza ya bana ya Adami ti Eva, disongidila bantu ya masumu mpi ya kukonda kukuka yina kele na kivuvu ya kukatuka na masumu. Na ntwala nde bana kubutuka, Yehowa kuzabaka dezia nki mutindu yandi tayidika dikambu yango sambu na kupesa kima yina zolaka kusadisa yandi na kukatula bana ya Adami na masumu.​—Roma 8:20.

Kansi, yo kezola kutuba ve nde Mfumu ya inza fwete yidika makambu mutindu bantu kesalaka. Sambu bo mezaba nde mambu ya kigonsa ya nswalunswalu lenda bwila bo, bo keyidikaka mitindu ya bo lenda zinga na ntangu bo takutana ti mambu yango. Kansi, Nzambi Nkwa-Ngolo yonso kezabisaka lukanu na yandi kukonda mpasi mpi yandi kelungisaka yo. Nkutu, Polo ketendula nki mutindu Yehowa kubakaka desizio ya kuyidika mambu yango na mpila nde yo katula bantu na mpasi mpi yo tanatila bo mambote ya mvula na mvula. Inki yandi salaka?

Nani Takatula Bampasi Yango?

Polo ketendula nde balongoki ya kupakulama ya Kristu kele ti kisalu mosi ya mfunu ya kusala sambu na kukatula mambi yonso yina disumu ya Adami menataka. Polo ketuba nde Yehowa “solaka beto . . . na lusadisu ya Kristo,” sambu na kuyala ti Yezu na Kimfumu na yandi ya zulu. Ntangu yandi tendulaka mambu yai, Polo kutubaka nde Yehowa “kanaka ntama, nde beto ta kuma bana na yandi, na lusadisu ya Yesu Kristo.” (Efezo 1:4, 5) Ya kyeleka, Yehowa kuponaka bo ve, to kuzabaka dezia bazina na bo. Kansi, yandi ponaka kimvuka ya bantu ya kwikama ya mekudipesaka yina zolaka kusala kumosi ti Kristu na kukatula mambi yina Satana Dyabulu, ti Adami mpi Eva, kunatilaka bantu.​—Luka 12:32; Baebreo 2:14-18.

Yo ke kima mosi ya kuyituka mpenza! Na ntangu yandi tulaka ntembe ya ntete na kimfumu ya Nzambi, Satana, zolaka kutuba nde bantu ya Nzambi kugangaka kusalamaka mbote ve, mpi nde kana bo ke na mpasi, to bo memekama, bo takolama na kiyeka ya Nzambi. (Yobi 1:7-12; 2:2-5) Ntangu yandi vandaka kusonga “ntima na yandi ya  mbote mpenza,” na nima Yehowa Nzambi kumonisaka nde yandi ketulaka ntima na bantu ya yandi gangaka mpi ya yandi tulaka na ntoto. Dyambu yai kemonanaka na mpila yandi mendimaka bana yankaka ya dibuta ya Adami yina kusalaka disumu sambu bo kuma bana na yandi ya kimpeve. Yandi ponaka bantu yina kele na kibuka yai ya fyoti sambu na kusala kuna na zulu. Sambu na nki?​—Efezo 1:3-6; Yoane 14:2, 3; 1 Tesalonika 4:15-17; 1 Piere 1:3, 4.

Ntumwa Polo ketuba nde bana yai ya Nzambi mendimaka mekumaka bantu yina ‘ta baka makabu na bo na kimvuka ti Kristo’ na Kimfumu na yandi ya zulu. (Roma 8:14-17) Sambu bo tavanda bantotila mpi banganga-Nzambi, bo mpi tasala kisalu ya kukatula bantu na mpasi ya bo ke na kumona ntangu yai. (Kusonga 5:10) Ya kyeleka, “tii ntangu yai bima yonso ya Nzambi salaka ke dila ngolo, yo ke mona mpasi.” Kansi, ntama mingi ve, bana ya Nzambi yai ya yandi mosi meponaka tasala kumosi ti Yezu Kristu, ebuna bantu yonso ya bulemfu “Nzambi ta katula [bo] yonso na kimpika yina ke nataka lufwa, ebuna [bo] ta baka [diaka] dipanda ya lukumu yina ya bana ya Nzambi ta baka.”​—Roma 8:18-22.

“Beto Mekatukaka na Kimpika na Nzila ya Nkudulu”

Mambu yai yonso tasalama na nsadisa ya kima mosi yina fwete vanda mutindu mosi ya kuyituka mpi ya kuluta nene ya kesonga mawa ya Nzambi na inza yai ya bantu yina yandi kezolaka kulolula. Kima yango kele kimenga ya nkudulu ya Yezu Kristu. Polo kesonika nde: “[Na nsadisa ya (Yezu Kristu) beto mekatukaka na kimpika na nzila ya nkudulu, NW] sambu na menga ya Kristo beto kele diaka bampika ya masumu ve, Nzambi me lolulaka beto. Mpidina Nzambi me salaka beto mambote mingi mpenza.”​—Efezo 1:7.

Yezu Kristu kele muntu ya ntete na kulungana ya lukanu ya Nzambi. (Baebreo 2:10) Nkudulu ya kimenga na yandi kele fondasio ya kewakana na nsiku yina kesadisaka Yehowa na kundima bana yankaka ya Adami na kukota na dibuta na yandi ya zulu mpi na kukatula bantu na bampasi yina disumu ya Adami menataka, kukonda kulembisa ntima yina yandi ketulaka na bansiku mpi na minsiku na Yandi. (Matayo 20:28; 1 Timoteo 2:6) Yehowa mesalaka mambu na mutindu mosi ya kewakana ti lunungu na yandi mpi ya kelungisa mambu yina lunungu ya kukuka kelombaka.​—Roma 3:22-26.

“Kinsweki ya Santu” ya Nzambi

Bamvula mingi kulutaka, Nzambi kumonisaka ve pwelele mutindu yandi zolaka kulungisa lukanu na yandi sambu na ntoto. Na mvu-nkama ya ntete ya T.B., “Yandi zabisaka [Bakristu] kinsweki ya santu ya luzolo na yandi.” (Efezo 1:9, NW) Polo ti bampangi na yandi Bakristu yina kele bapakulami kubakisaka pwelele kisalu ya nene yina Nzambi kupesaka Yezu Kristu sambu na kulungisa lukanu ya Nzambi. Bo yantikaka mpi kubakisa kisalu ya mfunu ya bo tasala kumosi ti Kristu na Kimfumu ya zulu. (Efezo 3:5, 6, 8-11) Ee, luyalu ya Kimfumu yina Yezu Kristu ti bantu yina tayala na yandi kumosi tatwadisa kele kima ya Nzambi tasadila sambu na kunata ngemba ya mvula na mvula na zulu kaka ve kansi na ntoto mpi. (Matayo 6:9, 10) Na nsadisa na yo, Yehowa tavutula ntoto mutindu yo vandaka ntangu yandi salaka yo.​—Yezaya 45:18; 65:21-23; Bisalu 3:21.

Ntangu yina yandi metulaka sambu na kukatula mambu yonso ya kemonisaka bantu mpasi ti kukonda lunungu kezola kulunga. Kansi, Yehowa kuyantikaka dezia kusala kisalu yango ya kuvutula mambu na ndonga na Pantekoti ya mvu 33 ya T.B. Inki mutindu? Banda na ntangu yina, yandi yantikaka kuvukisa “bima yonso yina kele na zulu,” disongidila bayina tayala kumosi na Kristu na zulu. Bakristu ya Efezo kele na kati ya bantu yango. (Efezo 2:4-7) Ntama mingi ve, na ntangu na  beto, Yehowa kuyantikaka na kuvukisa ‘bima yonso yina kele awa na nsi-ntoto.’ (Efezo 1:10) Na nsadisa ya kisalu ya kulonga ya kesalama na ntoto ya mvimba, yandi ke na kuzabisa na makanda yonso nsangu ya mbote ya metala luyalu ya Kimfumu na yandi yina Yezu Kristu ke na kutwadisa. Bayina kendima nsangu yango ntangu yai ke na kuvukana na kisika mosi ya lutaninu ya kimpeve mpi ya kubeluka ya kimpeve. (Yoane 10:16) Ntama mingi ve, na paladisu ya kukonda mvindu na zulu ya ntoto, bo tamona dyaka ve mpasi ata fyoti sambu na mambu ya mbi ti bampasi yonso ya bo kemona bubu yai.​—2 Piere 3:13; Kusonga 11:18.

“Bantu mesalaka mambu mingi ya kuyituka” na bikesa yina bo kesalaka sambu na kusadisa bantu yina ke na kunyokwama. (The State of the World’s Children 2000) Kansi, dyambu yina tayitukisa bantu kuluta kele yina Kristu Yezu ti bantu yina yandi tayala na bo tasala na luyalu ya Kimfumu ya zulu. Bo takatula kimakulu nto ya mambu yonso yina kenataka mavwanga mpi mambu yankaka yonso ya mbi yina kemonisaka beto mpasi. Bo tamanisa mambu yonso yina kepesaka bantu mpasi.​—Kusonga 21:1-4.

[Bifwanisu ya kele na lutiti 4]

Mambu ya mbote yina bantu kesalaka ya kesadisaka bantu yina kemona mpasi memanisaka ve bampasi ya bantu

[Kifwanisu ya kele na lutiti 6]

Nkudulu ya kimenga ya Kristu takatula bampasi yina disumu ya Adami menataka

[Kifwanisu ya kele na lutiti 7]

Mpila ya kuzwa lutaninu mpi kubeluka ya kimpeve kele bubu yai

[Kifwanisu ya kele na lutiti 7]

Ntama mingi ve, na nsadisa ya Kimfumu ya Mesia, bampasi yonso tamana