Lukumu ya Yehowa Kengenga na Kati ya Bantu na Yandi
Lukumu ya Yehowa Kengenga na Kati ya Bantu na Yandi
“Mono [mosi] Mfumu Nzambi ta vanda mwini na nge tii kuna.”—YEZAYA 60:20.
1. Inki mutindu Yehowa kesakumunaka bantu na yandi ya kwikama?
“MFUMU NZAMBI ke monaka kiese sambu na bantu na yandi; bantu ya mawa yandi ke kumisaka bo ti kugulusa bo.” (Nkunga 149:4) Muyimbi bankunga ya ntangu ya ntama muntu kutubaka mambu yai, mpi mambu ya kesalamaka na luzingu ya bantu kendimisaka nde bangogo na yandi kele ya kyeleka. Ntangu bantu na yandi kemonisaka kwikama, Yehowa kesadisaka bo, yandi kesadisaka bo sambu bo buta bambuma mingi, mpi yandi ketaninaka bo. Na ntangu ya ntama, yandi sadisaka bo na kununga bambeni na bo. Bubu yai, yandi kesadisaka bo na kuvanda ngolo na kimpeve mpi yandi kendimisa bo nde yandi tagulusa bo na nzila ya kimenga ya Yezu. (Roma 5:9) Yandi kesalaka mpidina sambu bo kele na lukumu na meso na yandi.
2. Ata bo kekutanaka ti kimbeni, bantu ya Nzambi ketulaka ntima na inki?
2 Ya kyeleka, na kati ya inza yai kele na mpimpa, bantu yina “ke zolaka kulemfuka na Nzambi” fwete kutana ti kimbeni. (2 Timoteo 3:12) Kansi, Yehowa kemonaka bambeni yango, mpi yandi kekebisa bo nde: “Konso bantu yina ta sadila nge ve bo ta fwa bo, bantoto na bo ta beba kimakulu.” (Yezaya 60:12) Na bilumbu na beto, kimbeni kemonanaka na mitindu mingi. Na bansi mingi, bambeni kemekaka kubuyisa to kukanga lusambu yina Bakristu ya masonga kepesaka na Yehowa. Na bansi yankaka, bo kepesaka bantu yina kesambilaka Yehowa mpasi na nitu mpi bo keyokaka bima na bo. Kansi, kuvila ve nde, Yehowa mezengaka dezia mambu yina takumina bambeni yonso yina kesosa kukanga nzila nde luzolo na yandi kulungana. Bambeni tanunga ve. Bantu yonso yina kenwanisa Sioni, yina bo mefwanisa na bana na yandi na ntoto, lenda nunga ve. Keti dyambu yai ya Yehowa, Nzambi na beto ya nene metuba kepesa beto ve kikesa?
Bo Mebakaka Balusakumunu Kuluta Yina Bo Vandaka Kuvingila
3. Inki mutindu bo tubilaka na kifwani lukumu ya bansambidi ya Yehowa mpi bambuma ya bo kebutaka?
3 Dyambu ya kyeleka kele nde, na bilumbu ya nsuka ya ngidika ya bima yai, Yehowa mepesaka balusakumunu mingi na bantu na yandi. Mingimingi yandi mepesaka malembe-malembe lukumu na kisika na yandi ya lusambu mpi na bantu ya ke na kati ya lusambu yango yina kenataka zina na yandi. Mbikudulu ya Yezaya ketuba nde yandi zabisaka Sioni nde: “Banti yai yonso bonso sedre, lukumu ya ngumba ya Libani: sipre ti orme ti bwi, bo ta kwisa kunata yo na nge Yeruzalemi, sambu na kutungila nzo na mono yo vanda ya lukumu, sambu na kupesa lukumu na kisika yai ya mono ke tulaka makulu na mono.” (Yezaya 60:13) Bangumba yina bamfinda ya nene mefika kevandaka kitoko mpenza na kutala. Yo yina banti ya nene yai ya kele na matiti mingi kele bidimbu ya mefwana mpenza ya kemonisa lukumu ya bansambidi ya Yehowa ti bambuma ya bo kebutaka.—Yezaya 41:19; 55:13.
4. “Nzo” ti ‘kisika ya [Yehowa] ke tulaka makulu’ ketendula inki, mpi nki mutindu yo mebakaka lukumu?
4 “Nzo” ti ‘kisika ya [Yehowa] ke tulaka makulu’ yina Yezaya 60:13 ketubila kele inki? Bangogo yai ketadila bibansala ya tempelo ya nene ya kimpeve ya Yehowa, yina ketendula ngidika ya Yehowa mesalaka sambu bantu kusambila yandi na nzila ya Yezu Kristu. (Baebreo 8:1-5; 9:2-10, 23) Yehowa memonisaka lukanu na yandi ya kupesa lukumu na tempelo ya kimpeve yango na mutindu yandi kebendaka bantu ya makanda yonso sambu bo kwisa kusambila na kati ya bibansala yango. (Agai 2:7) Yezaya yandi mosi kumonaka na luyantiku bibuka ya bantu ya makanda yonso kemata na ngumba ya nda ya lusambu ya Yehowa. (Yezaya 2:1-4) Bamvu-nkama mingi na nima, ntumwa Yoane kumonaka na mbonameso “ndonga mosi ya bantu mingi; ata muntu mosi ve lungaka kutanga bantu yina yonso. Bantu yina vandaka ya makanda yonso ti ya bandinga yonso ti ya bansi yonso.” Bantu yai vandaka ya kutelama “na ntwala ya kiti ya kimfumu ya Nzambi, bo ke sadilaka Nzambi mpimpa ti mwini na nzo na yandi.” (Kusonga 7:9, 15) Sambu bambikudulu yai kelungana na ntangu na beto, beto mosi ke na kumona mutindu nzo ya Yehowa mebakaka lukumu.
5. Inki mambu ya nene kusobaka mpi ya kusalaka nde bana ya Sioni kutoma dyaka mingi?
5 Ya kyeleka, mambu yai yonso ya kusobaka kusalaka nde Sioni kutoma dyaka mingi! Yehowa ketuba nde: “Nge vandaka ntete bonso nkento ya bo me bikisa, ya bo me menga, muntu ya kutala nge kele ve; kansi ntangu yai mono ke kumisa nge bonso nkento ya lukumu, bantu ta monaka nge kiese konso ntangu tii kuna.” (Yezaya 60:15) Penepene na nsuka ya mvita ya ntete ya inza ya mvimba, “Israele ya Nzambi” kukondaka mpenza muntu ya kutala yo. (Galatia 6:16) Yo kudiwaka nde bo ‘me bikisa yo’ mpenza, sambu bana na yo yina kuvandaka na ntoto kubakisaka ve mbote luzolo ya Nzambi sambu na bo. Yo yina, na mvu 1919, Yehowa kupesaka dyaka bansadi na yandi ya kupakulama ngolo, ebuna banda na ntangu yina, yandi mesakumunaka bo ti bimvwama ya kitoko ya kimpeve. Dyaka, keti lusilu ya kele na verse yai kepesa beto ve kikesa? Yehowa tamonaka Sioni bonso “nkento ya lukumu.” Ee, bana ya Sioni, ti Yehowa yandi mosi, tamona kyese sambu na Sioni. Sioni ‘ta monaka kiese’ mingi kibeni. Mpi kyese yango tavanda ve kaka sambu na ntangu fyoti. Mutindu bo mefwanisa yo na bana na yandi ya ntoto, kyese ya Sioni tavanda “tii kuna.” Yo tasuka ve.
6. Inki mutindu Bakristu ya kyeleka kesadilaka bimvwama ya kinsuni ya bantu ya nsi-ntoto?
6 Ntangu yai, wa lusilu yankaka ya Nzambi kepesa. Yehowa kezabisa Sioni nde: “Bantu yonso ya nsi-ntoto ta sansa nge bonso mwana na bo, bantotila na bo ta disa nge na kimvwama na bo; ebuna nge ta zaba nde mono Mfumu Nzambi muntu kele Ngulusi na nge, mono [Yehowa], Nzambi ya Yakobi, muntu me katula nge na kimpika.” (Yezaya 60:16) Inki mutindu ‘bantu yonso ya nsi-ntoto ke sansa Sioni bonso mwana na bo’ mpi ‘bantotila na bo ke disa yandi na kimvwama na bo’? Yo kesalamaka na mutindu Bakristu ya kupakulama ti bampangi na bo “mameme ya nkaka” kesadilaka bimvwama ya kinsuni ya bantu ya nsi-ntoto na mpila nde lusambu ya kukonda mvindu kukwenda na ntwala. (Yoane 10:16) Makabu ya luzolo ya mbote yina bo kepesaka kesalaka nde kisalu ya kusamuna mpi ya kulonga kusalama mingi na inza ya mvimba. Kusadila teknolozi ya bilumbu yai na mutindu mosi ya mbote mesadisaka bo na kubasisa ba Biblia ti mikanda yina ketendulaka Biblia na bandinga mingi kibeni. Bubu yai, kyeleka ya Biblia kekuminaka bantu mingi kibeni kuluta bayina kuwaka yo na ntangu ya ntama. Ya kyeleka, Bantu ya kezingaka na bansi mingi, kele na kulonguka nde Yehowa, yina kukatulaka bansadi na yandi ya kupakulama na kimpika ya kimpeve, kele Ngulusi.
Kuyela na Mambu Yina Ketala Organizasio
7. Inki bansoba ya nene bana ya Sioni mesalaka?
7 Yehowa mepesaka bantu na yandi lukumu na mutindu yankaka. Yandi mesakumunaka bo na nzila ya bansoba yina kesalamaka na kati ya organizasio. Na Yezaya 60:17, beto ketanga nde: “Na kutunga nge diaka, mono ke tindila nge bima ya kitoko: na kisika ya bronze mono ta tindila nge wolo, na kisika ya bibende mono ta tindila nge arza, na kisika ya banti mono ta tindila nge bronze, na kisika ya matadi mono ta tindila nge bibende. Bamfumu na nge ta monisa nge diaka mpasi ve, bo ta yala nge na ngemba ti na masonga.” Kuyingisa wolo na kisika ya bronze kele kutomisa, mpi yo kele mutindu mosi sambu na bima yankaka yina bo metubila. Na kuwakana ti mambu ya verse yai ketuba, Izraele ya Nzambi kelandaka kaka na kutomisa organizasio na yandi na bilumbu yai ya nsuka. Tala mwa bambandu yai kelanda.
8-10. Tubila mambu yina organizasio metomisaka tuka na mvu 1919.
8 Penepene na mvu 1919, bantu ya dibundu vandaka kusala voti sambu na kupona bankuluntu ti badiakre yonso yina vandaka kutambwisa mabundu ya bantu ya Nzambi. Banda na mvula yina, “mpika ya kwikama mpi ya mayele,” kuponaka direktere mosi ya kisalu sambu na kutala kisalu ya bilanga yina vandaka kusalama na konso dibundu. (Matayo 24:45-47, NW) Kansi, na mabundu mingi bo vandaka kibeni ve kusadila ngidika yina sambu bankuluntu yankaka yina bo vandaka kupona na voti vandaka ve kudipesa mingi na kisalu ya kusamuna. Yo yina, na mvu 1932, bo pesaka mabundu nsiku nde bo fwete sala dyaka ve voti sambu na kupona bankuluntu ti badiakre. Kansi, nde bo fwete pona komite ya kisalu mosi yina tasalaka kumosi ti direktere ya kisalu. Na ntangu yina, yo vandaka bonso nde bo meyingisa “bronze” na kisika ya “banti.” Yo tomaka mingi kibeni!
9 Na mvu 1938, mabundu ya inza ya mvimba kubakaka lukanu ya kundima ngidika mosi ya mbote, yina vandaka kulanda kibeni mbandu ya Masonuku. Bo pesaka mukumba ya kutwadisa dibundu na maboko ya nsadi ya kibuka, mpi na bansadi yankaka. Mpika ya kwikama mpi ya mayele muntu vandaka kupona bansadi yai yonso. Bo vandaka kusala dyaka ve voti. Ebuna, bansadi yonso na kati ya dibundu, bo vandaka kupona bo na mutindu ya teokrasi. Dyambu yai vandaka bonso nde kuyingisa “bibende” na kisika ya “matadi” to “wolo” na kisika ya “bronze.”
10 Banda na ntangu yina, mambu kelandaka kaka na kukwenda na ntwala. Mu mbandu, na mvu 1972 bo bakisaka nde kukengila dibundu na nsadisa ya kimvuka mosi ya bankuluntu yina bo mepona na nzila ya teokrasi mpi yina kesala na kuwakana, kukonda nkuluntu mosi yina keyala bankaka, vandaka kufwanana mingi mpenza ti mpila bo vandaka kutwadisa mabundu ya Bukristu na mvu-nkama ya ntete. Dyaka, kiteso ya bamvula zole meluta, bo salaka kitambi yankaka.Nsoba mosi kusalamaka sambu na yina metala lutwadisu ya bimvuka yina mezabanaka na nsiku ya leta, na mpila nde Nto-Kimvuka kuzwa ntangu ya kudipesa mingi na mambu yina kele mfunu sambu na kimpeve ya bantu ya Nzambi, na kisika ya kutula dikebi mingi na mambu ya kewakana na nsiku ya leta yina kebasikaka konso kilumbu.
11. Nani ketwadisaka mambu yonso ya kebalukaka na organizasio ya bantu ya Yehowa, mpi nki mbuma bansoba yango mebutaka?
11 Nani ketwadisaka mambu yai yonso ya kebalukaka? Kaka Yehowa Nzambi. Yandi muntu ketuba nde: “Mono ta tindila nge wolo.” Dyaka, kele kaka yandi mosi muntu kelanda na kutuba nde: “[Mono tapona, NW] bamfumu [yina] ta monisa nge diaka mpasi ve, bo ta yala nge na ngemba ti na masonga.” Ya kyeleka, Yehowa yandi mosi muntu kesungiminaka bantu na yandi. Organizasio yai ya Biblia kutubilaka yina kekwendaka kaka na ntwala kele mwaye yankaka ya Yehowa kesadila sambu na kupesa bantu na yandi lukumu mingi. Yo yina mesalaka nde Bambangi ya Yehowa mebakaka balusakumunu ya mitindu mingi. Na Yezaya 60:18, beto ketanga nde: “Na ntoto na nge bo ta wa diaka ve bansangu ya nku, bambeni ta kwisa diaka ve kufwa nsi na nge; na bibaka ya lupangu na nge bo ta sonika nde: ‘Nzambi muntu me gulusa beto!’ Na bakielo nde: ‘Lukumu na Mfumu Nzambi!’” Yai bangogo ya lukumu mpenza! Kansi nki mutindu yo lunganaka?
12. Inki mutindu ngemba mekumaka kima mosi ya mfunu na kati ya Bakristu ya kyeleka?
12 Bakristu ya kyeleka ketulaka kibeni ntima nde Yehowa kulonga mpi kutwadisa bo, ebuna mbuma na yo kele kaka mutindu Yezaya kutubaka yo: “Mono mosi ta longa bana na nge, mono ta pesa bo luzingu ya ngemba ti ya mbote.” (Yezaya 54:13) Dyaka, mpeve ya Yehowa kesalaka na bantu na yandi, mpi ngemba kele mosi na kati ya bambuma yina mpeve yango kebutaka. (Galatia 5:22, 23) Ngemba yina bantu ya Yehowa kele na yo kesalaka nde bo zwa kisika ya kubumbana na kati ya inza yai ya mubulu. Ngemba ya bo kele na yo, yina mesimbamaka na zola yina kevandaka na kati ya Bakristu ya kyeleka, kesadisa bo na kuwa dezia ntomo ya luzingu yina bo tavanda na yo na inza ya mpa. (Yoane 15:17; Kolosai 3:14) Ya kyeleka, beto yonso kele na kyese na kuvanda na ngemba ya mutindu yai mpi na kusala dikabu na beto sambu na kutanina ngemba yango, yina kepesaka lukumu na Nzambi na beto mpi yina kele kima ya kuluta mfunu na paladisu na beto ya kimpeve!—Yezaya 11:9.
Nsemo ya Yehowa Talanda na Kusema
13. Sambu na nki beto lenda tula ntima nde nsemo ya Yehowa tayambula ve na kutemuna bantu na yandi?
13 Keti nsemo ya Yehowa talanda kaka na kutemuna bantu na yandi? Ee! Na Yezaya 60:19, 20, beto ketanga nde: “Mwini na nge ta katuka diaka ve na ntangu to na ngonda; mono mosi Mfumu Nzambi ta vanda mwini na nge tii kuna, mono Nzambi na nge ta vanda lukumu na nge. Mono Mfumu Nzambi ta vanda mwini na nge tii kuna; yo ta vanda bonso nde ntangu ke zola kudinda ve to ngonda ke zola kufwa ve; ebuna bilumbu na nge ya mafwa ta vanda diaka ve.” Ntangu “mafwa” ya bantu yina kuvandaka na kimpika ya kimpeve kusukaka na 1919, nsemo ya Yehowa yantikaka kutemuna bo. Bamvula kuluta 80 na nima, bo kelanda na kubaka mambote ya mawa ya Yehowa sambu nsemo na yandi kelemba ve na kutemuna bo. Mpi, yo talandaka kaka na kutemuna bo. Sambu na bantu yina kesambilaka yandi, Nzambi na beto ta “dinda” ve bonso ntangu to “kufwa” bonso ngonda. Kansi, yandi tatemuna bo mvula na mvula. Dyambu yai kepesa mpenza kikesa na beto bantu ya kezinga na bilumbu ya nsuka na inza yai kele na kati ya mpimpa!
14, 15. (a) Na nki mutindu bantu yonso ya Nzambi kele bantu ya “masonga”? (b) Na kutadila Yezaya 60:21, inki kulungana ya mfunu mameme yankaka kevingila?
14 Ntangu yai, wa lusilu yankaka yina Yehowa kepesa na bantu ya Sioni yina kele na ntoto, Izraele ya Nzambi. Yezaya 60:21 ketuba nde: “Bantu na nge yonso ta vanda bantu ya masonga, ntoto yai ta vanda ya bo tii kuna. Bo kele bonso bima ya mono mosi kunaka na bilanga na mono, bo kele kisalu ya maboko na mono; bo kele lukumu na mono na meso ya bantu yonso.” Na mvu 1919 ntangu Bakristu ya kupakulama kuvutukilaka kisalu na bo, bo vandaka kibuka ya bantu fyoti. Na inza yai ya masumu, ‘Nzambi kundimaka bo’ sambu na lukwikilu na bo ya ngolo na nkudulu ya Kristu Yezu. (Roma 3:24; 5:1) Na nima, mutindu bantu ya Izraele kukatukaka na kimpika ya Babilone, bo bakaka “ntoto” mosi, ntoto ya kimpeve, to insi ya kisalu, kisika bo lenda zinga na paladisu ya kimpeve. (Yezaya 66:8) Lukumu ya paladisu ya kimpeve ya ntoto yina kele na yo tamana ve ata fyoti, sambu kimvuka ya Izraele ya Nzambi takolama ve na Nzambi, mutindu Izraele ya ntama kusalaka. Lukwikilu, kukanga ntima, mpi kikesa na bo tamanaka ve sambu na kupesa lukumu na zina ya Nzambi.
15 Bantu yonso ya dikanda yai ya kimpeve mekotaka na kuwakana ya mpa. Bo yonso kele na nsiku ya Yehowa ya kusonika na ntima na bo, mpi Yehowa melolulaka masumu na bo na nzila ya nkudulu ya kimenga ya Yezu. (Yeremia 31:31-34) Yandi ndimaka bo bonso “bana” ya lunungu mpi yandi zingaka ti bo bonso nde bo vandaka bantu ya kukuka. (Roma 8:15, 16, 29, 30) Nzambi melolulaka mpi masumu ya bampangi na bo mameme yankaka na nzila ya nkudulu ya kimenga ya Yezu, mpi sambu na lukwikilu na bo, yandi mendimaka bo bonso banduku na yandi, mutindu yandi ndimaka Abrahami. “Bo yobisaka bamvwela na bo, bo kumisaka yo mpembe na menga ya Mwana-dimeme.” Nkutu, mameme yankaka yai kevingilaka lusakumunu yankaka ya kuluta nene. Na nima ya kuguluka na “mpasi mingi” to na nima ya kufutumuka, bo tamona kulungana ya kinsuni ya bangogo ya Yezaya 60:21 ntangu ntoto ya mvimba takuma paladisu. (Kusonga 7:14; Roma 4:1-3) Na ntangu yina, “bantu yina ke kudikulumusaka, bo ta zinga mbote na ngemba mpenza na ntoto.”—Nkunga 37:11, 29.
Kuyela Kekwenda Kaka na Ntwala
16. Inki lusilu ya nene Yehowa kupesaka, mpi nki mutindu yo lunganaka?
16 Na verse ya nsuka ya Yezaya kapu 60, beto ketanga lusilu ya nsuka ya Yehowa kupesaka. Yandi kezabisa Sioni nde: “Ata bantu kele mingi ve, mono ta kumisa bo mingi; ata bo kele mfunu mingi ve, mono ta kumisa bo ngolo mingi. Mono Mfumu Nzambi, mono ta sala nswalu mambu yai, mono ta sala yo na ntangu na yo.” (Yezaya 60:22) Na bilumbu na beto, Yehowa melungisaka ndinga na yandi. Ntangu bapakulami kuvutukilaka kisalu na bo na mvu 1919, ntalu na bo kuvandaka fyoti, bantu “fioti” kibeni. Ntalu na bo yantikaka na kumata ntangu bantu ya Izraele ya kimpeve yankaka vandaka kuyikama. Mpi na nima, mameme yankaka yantikaka kuyikama mingi mpenza. Ngemba yina bantu ya Nzambi kevandaka na yo, paladisu ya kimpeve yina kele na “ntoto” na bo, mebendaka dikebi ya bantu mingi ya masonga na mpila nde bantu yina ‘kuvandaka mfunu mingi ve’ mekumaka kibeni “ngolo mingi.” Bubu yai, “bantu” yango, disongidila Izraele ya Nzambi ti bamilio kuluta sambanu ya “banzenza,” yina mekudipesaka na Nzambi, meluta ntama kibeni ntalu ya bantu ya bansi yankaka ya inza yai. (Yezaya 60:10) Bantu yonso ya kezingaka na bansi yango kesemisa nsemo ya Yehowa, yo yina kesala nde bo yonso kukuma na lukumu mingi na meso na yandi.
17. Inki mutindu disolo yai ya Yezaya kapu 60 mesimba ntima na nge?
17 Ya kyeleka, bangindu ya mfunu yina beto metadila na Yezaya kapu 60 mekumisa lukwikilu na beto ngolo. Beto kebaka kikesa mingi na kubakisa nde tuka ntama, Yehowa kuzabaka nde bantu na yandi takwenda na kimpika ya kimpeve ebuna na nima bo tavutuka. Yo kepesa beto kyese na kumona nde tuka ntama Yehowa kumonaka nde ntalu ya bansambidi na yandi takuma mingi kibeni na bilumbu na beto. Dyaka, yo kepesa beto kikesa mingi mpenza na kuyibuka nde Yehowa tabika beto ve! Lusilu yai ya kemonisa nde bakyelo ya “nsi” tavandaka kaka ya kukangula sambu “bantu yina mefwana na kuvanda na moyo ya mvula na mvula” kukota, kele lusilu mosi ya zola mpenza! (Bisalu 13:48, NW) Yehowa talanda kaka na kutemuna bantu na yandi. Sioni talandaka kaka kubaka lukumu mutindu nsemo ya bana na yandi kelanda na kukuma kaka mingi. (Matayo 5:16) Ya kyeleka, beto mebaka mpenza lukanu ya kubikala kaka penepene na Izraele ya Nzambi mpi kuzola dibaku na beto ya kumonisa nsemo ya Yehowa!
Keti Nge Lenda Tendula?
• Ntangu beto kekutanaka ti kimbeni, beto ketulaka ntima na inki?
• Inki mutindu ‘bantu ya nsi-ntoto ta sansa bana ya Sioni bonso bana na bo’?
• Na nki mitindu Yehowa ‘metindaka bronze na kisika ya banti’?
• Inki bikalulu zole bo metubila pwelele na Yezaya 60:17, 21?
• Inki mutindu ‘bantu yina kele mfunu mingi ve’ mekumaka “ngolo mingi”?
[Bangyufula ya disolo ya kulonguka]
[Lupangu/Bifwanisu ya kele na lutiti 28]
LA PROPHÉTIE D’ISAÏE—Lumière pour Tous les Humains
Bo tubilaka malongi ya mfunu ya kele na masolo yai zole na diskure mosi ya Balukutakanu ya Distrike “Balongi ya Ndinga ya Nzambi” yina kusalamaka na bamvu 2001/02. Na nsuka ya diskure, na bisika mingi mutubi kusongaka mukanda mosi ya mpa yina kuvandaka na ntu-dyambu: La prophétie d’Isaïe, lumière pour tous les humains, Volume II. Na mvula yina kuyitaka, La prophétie d’Isaïe, lumière pour tous les humains, Buku ya Ntete kubasikaka. Mutindu mukanda yai ya mpa mebasika, beto mezwa ntangu yai bantendula ya beto kele na yo bilumbu yai ya baverse yonso ya mukanda ya Yezaya. Babuku yai kele bisadilu ya mbote yina tasadisa beto na kubakisa mambu mingi mpi na kumonisa ntonda na beto sambu na mukanda ya kupemama ya Yezaya.
[Bifwanisu ya kele na lutiti 25]
Na kati ya kimbeni ya ngolo, ‘Yehowa kepesaka bantu na yandi lukumu ti luguluku’
[Bifwanisu ya kele na lutiti 26]
Bantu ya Nzambi kesadilaka bimvwama ya bantu ya makanda sambu lusambu ya kyeleka kukwenda na ntwala
[Kifwanisu ya kele na lutiti 27]
Yehowa mesakumunaka bantu na yandi na bansoba yina yandi kesalaka na organizasio mpi na ngemba yina yandi kepesaka bo