Ntangu ya Kutuba Dyambu ya Kinsweki

Kubumba mambu yankaka yina kele kinsweki lenda tendula kuswaswana yina kele kati na ngemba ti mavwanga. Kansi keti kevandaka ti ntangu ya kusonga bantu dyambu mosi ya kele kinsweki? Tala mambu yina profete Amosi ketuba sambu na Nzambi na yandi: “Ya kieleka, Mfumu Nzambi ke salaka kima ve kana yandi me songa ngindu na yandi [“dyambu na yandi ya kinsweki,” NW] ntete ve na bantu na yandi baprofete.” (Amosi 3:7) Bangogo yai lenda sadisa beto na kubaka dilongi mosi na yina metala kubumba mambu yina kele kinsweki. Yehowa lenda bumba mambu yankaka ya kinsweki sambu na mwa ntangu ebuna na nima yandi songa yo na bantu yankaka. Inki mutindu beto lenda landa mbandu ya Yehowa na dyambu yai?

Bantangu yankaka, bangungudi ya dibundu ya Bukristu kemonaka mbote na kubumba dyambu mosi ya kinsweki. (Bisalu 20:28) Mu mbandu, sambu na mambote ya dibundu, bo lenda baka desizio ya kukonda kuzabisa bampangi bangidika to bansoba yina bo mesala na yina metala mikumba na kati ya dibundu tii kuna ntangu ya bo tamona mbote na kuzabisa yo talunga.

Kana bo mebaka desizio ya mutindu yina, yo kele mfunu na kutendula pwelele na bantu yina mezaba dyambu yango, inki ntangu, mpi nki mutindu bo lenda songa yo bantu. Kana bo mezaba ntangu ya kusonga bantu yankaka kinsweki yango, yo tasadisa bo na kukonda kubasisa yo na ntwala.​—Bingana 25:9.