“Beno Landa Mono Kukonda Nsuka”

“Nzambi solaka beno sambu na mambu ya mutindu yina, sambu Kristo yandi mosi monaka mpasi sambu na beno, ebuna yandi bikilaka beno mbandu sambu beno landa yo.”​—1 PIERE 2:21.

1, 2. Sambu na nki mbandu ya kukuka ya Yezu ya kulonga kele ve dyambu ya kuluta mpasi yina beto lenda landa?

 YEZU KRISTU kuvandaka mpenza Longi ya kuluta nene ya ntangu yonso. Dyaka, yandi vandaka muntu ya kukuka, yandi sumukaka ve luzingu na yandi ya mvimba ntangu yandi zingaka bonso muntu. (1 Piere 2:22) Kansi, keti yo ketendula nde bantu ya kukonda kukuka lenda kuka ve na kulanda mbandu ya kulonga ya Yezu? Ve, yo kele mutindu yina ve.

² Mutindu beto monaka yo na disolo yina meluta, fondasio ya malongi ya Yezu kuvandaka zola. Mpi zola kele kima mosi ya beto yonso lenda yedisa. Mbala mingi Ndinga ya Nzambi kesyamisaka beto na kuyedisa mpi kutomisa zola na beto sambu na bantu yankaka. (Filipi 1:9; Kolosai 3:14) Yehowa kelombaka ve bigangwa na yandi mambu yina bo lenda kuka ve na kusala. Ya kyeleka, sambu “Nzambi kele zola” mpi yandi mesalaka beto na kifwani na yandi, beto lenda tuba nde yandi salaka beto sambu na kumonisa zola. (1 Yoane 4:8, NW; Kuyantika 1:27) Yo yina ntangu beto ketanga bangogo ya ntumwa Piere yina kele na verse ya ntu-dyambu na beto, beto lenda kwikila nde beto takuka na kusala yo. Beto lenda landa bitambi ya Yezu mbotembote. Ya kyeleka, beto lenda lemfuka na ntuma yai ya Yezu: “Beno landa mono kukonda nsuka.” (Luka 9:23, NW) Bika beto tadila nki mutindu beto lenda landa mbandu yina Kristu kubikaka, ntete sambu na kyeleka yina yandi longaka, na nima sambu na bantu yina yandi longaka.

Beto Yedisa Zola Sambu na Bakyeleka ya Beto Kelongaka

3. Sambu na nki bantu mingi kemonaka kulonguka dyambu ya mpasi, kansi nki kikesa Bingana 2:1-5 kepesa beto?

³ Sambu na kuzola bakyeleka yina beto kelonga bankaka, beto fwete zola kulonguka bakyeleka yango beto mosi. Na inza ya bubu, zola yango keyelaka ve ntangu yonso kukonda mpasi. Mambu bonso kukonda balongi ya mbote na banzo-nkanda mpi bikalulu ya mbi ya kulonguka yina beto yelaka na yo kesalaka nde bantu mingi kuvanda dyaka ve na nzala ya kulonguka na kimbuta. Kansi, yo kele mfunu nde Yehowa kulonga beto. Bingana 2:1-5 ketuba nde: “Mwana na mono, wa mambu ya mono ke longa nge ti ya mono ke songa nge na kusala; kuvila yo ve. Wa mambu ya mayele, [tula ntima na luswasukusu, NW]. Sosa na kuzwa mayele,  yula ngangu na kusadisa nge; Tula ngolo na kusosa yo mutindu bo ke sosaka bibende yai ya ntalu arza to bima ya nkaka ya ntalu me bumbanaka. Kana nge sala mpidina, nge ta zaba nki disongidila ya kutina Mfumu Nzambi boma; nge ta zaba mpi kuzaba Nzambi.”

4. ‘Kutula ntima na luswasukusu’ ketendula inki, mpi nki mutindu ya kutadila mambu tasadisa beto sambu na kusala mutindu yina?

⁴ Beto kemona nde banda na verse 1 tii 4, Biblia mevutukila bangogo mingi yina kesyamisa beto kaka na kutula ngolo sambu na ‘kuwa’ mpi ‘kukonda kuvila’ ve kansi mpi na ‘kutula ngolo na kusosa.’ Kansi, inki lenda pusa beto na kusala mambu yai yonso? Tala ntendula ya bangogo yina ketuba nde “tula ntima na luswasukusu.” (NW) Mukanda mosi ya mezabanaka mingi ketuba nde ndongisila ya kele na bangogo yina “kelombaka beto kaka na kutula dikebi ve; kansi yo kelombaka mpi na kusoba mabanza: na kutula dikebi mingi na malongi.” Kansi, inki lenda sadisa beto na kundima mpi na kuvanda na mpusa mingi ya kulonguka mambu yina Yehowa kelonga beto? Kele mutindu na beto ya kutadila mambu. Sambu na beto, “kuzaba Nzambi” fwete vanda bonso “bibende yai ya ntalu arza” mpi bonso “bima ya nkaka ya ntalu me bumbanaka.”

5, 6. (a) Inki lenda salama na nima, mpi nki mutindu beto lenda buya nde yo salama? (b) Sambu na nki beto fwete landa na kuyika bima yankaka ya ntalu na nzayilu yina beto mebakaka na Biblia?

⁵ Yo kevandaka mpasi ve na kuzwa mabanza ya mutindu yai. Mu mbandu, mbala yankaka mambu ya nge melongukaka sambu na “kuzaba Nzambi” ketubilaka kyeleka yina Yehowa kekana nde bantu ya kwikama kuzinga mvula na mvula na Paladisu na ntoto. (Nkunga 37:28, 29) Ntembe kele ve nde ntangu nge longukaka kyeleka yai mbala ya ntete, nge monaka yo kima mosi ya ntalu kibeni, dyambu yai ya nge zabaka kufulusaka mabanza mpi ntima na nge ti kivuvu mpi kyese. Ebuna ntangu yai? Keti mutindu bilumbu ke na kuluta, zola sambu na kima na nge yai ya ntalu ke na kumana? Kana mpidina, meka na kusala mambu zole. Ya ntete, vutukila zola na nge, disongidila, yindulaka mbala na mbala bikuma yina kupusaka nge na kubaka konso kyeleka yina Yehowa melongaka nge na valere, ata yina ya nge melongukaka tuka ntama.

⁶ Ya zole, landa na kuyika bima yankaka na kima na nge ya ntalu. Na kutuba ya mbote, kana nge mezwa ditadi mosi ya ntalu na nima ya kutimuna ntoto, keti nge tatula yo kaka mbala mosi na poshi mpi nge kwenda ka nge na kyese? To nge tatimuna dyaka sambu na kusosa kana yankaka kele? Ndinga ya Nzambi kele ya kufuluka na bakyeleka yina kele bonso arza mpi bima yankaka ya ntalu ya mebumbanaka. Ata nge mezwaka yo dezia mingi nki kiteso, nge lenda zwa dyaka mingi. (Roma 11:33) Ntangu nge melonguka dyambu mosi ya mpa ya kyeleka, nge lenda kudiyula nde: ‘Inki kekumisa yo kima ya ntalu? Keti yo mesadisa mono na kubakisa  dyaka mbotembote kimuntu ya Yehowa to balukanu na yandi? Keti yo kepesa mwa lutwadisu ya mbote yina lenda sadisa mono na kulanda bitambi ya Yezu?’ Kuyindulula na bangyufula yai tasadisa nge na kuyedisa zola sambu na bakyeleka yina Yehowa melongaka nge.

Beto Monisa Zola na Bakyeleka Yina Beto Kelongaka

7, 8. Na nki mitindu beto lenda monisa bantu yankaka nde beto kezolaka bakyeleka yina beto longukaka na Biblia? Pesa mbandu.

⁷ Na ntangu beto kelonga bankaka, inki mutindu beto lenda monisa nde beto kezolaka bakyeleka yina beto longukaka na Ndinga ya Nzambi? Sambu beto kelandaka mbandu ya Yezu, beto kesadilaka kaka Biblia na kisalu na beto ya kusamuna mpi ya kulonga. Na ntangu yai ya beto kezinga, bo kesyamisaka bantu ya Nzambi na inza ya mvimba na kusadila mingi Biblia na kisalu na bo ya kulonga bantu. Ntangu nge kesadila ndongisila yai, sala na mpila nde muntu ya nge kesolula ti yandi kubakisa nde nge mosi kepesaka mpi valere na mambu yina mekatuka na Biblia.​—Matayo 13:52.

⁸ Mu mbandu, na bilumbu yina kulandaka na nima ya mubulu ya bateroriste na New York City, Mukristu mosi ya nkento vandaka kutangila bantu yina yandi vandaka kukutana na bo na kisalu ya kusamuna verse ya Nkunga 46:2, 12. Yandi vandaka kuyula bo ntete kana bo vandaka kudiwa nki mutindu na nima ya mpasi yina kubwaka. Yandi vandaka kuwidikila mvutu na bo na dikebi yonso, ti kubakisa yo, na nima yandi vandaka kutuba nde: “Keti nge tazola mu tangila nge verse mosi ya kupesaka mono kikesa na ntangu yai ya mpasi?” Bantu fyoti vandaka kubuya, kansi yandi solulaka mbote kibeni ti bantu mingi. Sambu na kusolula ti batoko, mbala mingi mpangi yai ya nkento vandaka kutuba nde: “Bamvula 50 melunga ntangu yai banda mu kelongaka Biblia, mu kesonga nge nde mu mekutanaka ntete ve ti dikambu mosi ya mpasi yina mukanda yai mekondaka kupesa lusadisu sambu na kumanisa yo.” Kana beto kesadila masolo ya masonga mpi ya kyese, beto kemonisa bantu nde beto kebakaka Ndinga ya Nzambi na valere mpi beto kezolaka mambu yina beto melongukaka na kati na yo.​—Nkunga 119:97, 105.

9, 10. Sambu na nki yo kele mfunu na kusadila Biblia ntangu nge kepesa mvutu sambu na balukwilu na beto?

⁹ Ntangu bantu keyula beto bangyufula yina  metala balukwikilu na beto, yo kepesaka beto dibaku ya mbote ya kumonisa nde beto kezolaka Ndinga ya Nzambi. Sambu beto kelandaka mbandu ya Yezu, bamvutu na beto kekatukaka ve na bangindu na beto mosi. (Bingana 3:5, 6) Kansi, beto kesadilaka Biblia sambu na kupesa mvutu. Keti nge kewaka boma nde muntu lenda yula nge ngyufula yina nge takuka ve na kupesa mvutu? Beto tadila mambu zole ya nge lenda sala sambu na kununga.

¹⁰ Sala yonso sambu na kudibongisa. Ntumwa Piere kusonikaka nde: “Beno fweti zitisa Kristo na ntima na beno, bonso Mfumu na beno. Konso ntangu beno fweti vanda ya kuyilama na kupesa mvutu na bantu yina ke yulaka beno sambu na kuzaba nki mutindu beno ke tulaka ntima na Nzambi.” (1 Piere 3:15) Keti nge kele ya kuyilama sambu na kunwanina balukwikilu na nge? Mu mbandu, kana muntu kezola kuzaba kikuma ya nge kekotilaka ve mambu ti bisalu yina Masonuku kebuyaka, kusuka ve na kutuba kaka nde, “Dibundu na mono mebuyisaka yo.” Mvutu ya mutindu yai lenda monisa nde nge kebikaka nde bantu yankaka kubakila nge badesizio mpi bo leyindula nde nge fwete vanda na kadibundu mosi buna. Yo tavanda mbote na kutuba nde, “Ndinga ya Nzambi, Biblia kebuyisaka yo” to, “Yo tasepedisa ve Nzambi na mono.” Na nima tendula kikuma ya mvutu na nge.​—Roma 12:1.

11. Inki mukanda ya kusosila bamvutu lenda sadisa beto na kudibongisa sambu na kupesa mvutu na bangyufula ya ketala bakyeleka ya Ndinga ya Nzambi?

¹¹ Kana nge kemona nde nge mekudibongisa mbote ve, sambu na nki kubaka ve mwa ntangu sambu na kulonguka mukanda Comment raisonner à partir des Écritures kana yo kele na ndinga na nge? a Pona mwa masolo yina bantu keyulaka mingi, mpi simba mwa bangindu ya baverse. Tula Comment raisonner ti Bible na nge na kisika ya nge lenda baka yo nswalu. Kuvanda na dute ve na kusadila yo yonso zole, mpi kusonga muntu ya keyula nge nde nge kezola kusadila mukanda mosi sambu na kusosa bamvutu ya Biblia kepesa na bangyufula na yandi.

12. Inki mutindu beto lenda pesa mvutu kana beto kezaba ve mvutu na ngyufula mosi ya Biblia?

¹² Kudiyangisa ve mpambampamba. Ata muntu mosi ve ya kukonda kukuka kuzaba bamvutu yonso. Yo yina, kana bo meyula nge ngyufula ya Biblia yina nge kekuka ve kupesa mvutu, nge lenda vutula ntangu yonso mutindu yai: “Mersi sambu na ngyufula yai ya mbote. Na kuta masonga, mu mezaba ve mvutu, kansi mu kendima nde Biblia ketubilaka dyambu yai. Mu kezolaka kusosa bamvutu na Biblia, yo yina mu kekwenda kusosa ngyufula na nge mpi mu takwisa kupesa nge mvutu.” Kutuba ya masonga mpi ya kudikulumusa ya mutindu yai lenda yidika kibeni nzila sambu na masolo mingi dyaka.​—Bingana 11:2.

Beto Fwete Zola Bantu Yina Beto Kelonga

13. Sambu na nki beto fwete vanda na mabanza ya mbote sambu na bantu yina beto kelongaka?

¹³ Yezu kumonisaka zola na bantu yina yandi vandaka kulonga. Inki mutindu beto lenda landa mbandu na yandi na dyambu yai? Beto lenda kuna ve kikalulu ya kukonda kuwa susi ya bantu yina kezingaka penepene na beto. Ya kyeleka, “bitumba ya kilumbu ya nene ya [Nzambi Nkwa-Ngolo Yonso]”  mekuma penepene, mpi bantu mingi na kati ya bamilio ya bantu tafwa. (Kusonga 16:14; Yeremia 25:33) Kansi, beto kezaba ve nani taguluka mpi nani tafwa. Bitumba yina tasalama na bilumbu kekwisa mpi yo kele na maboko ya Yezu Kristu, muntu yina Yehowa meponaka. Tii kuna kusambisa tasalama, beto kemonaka konso muntu bonso yandi kele ti dibaku ya kukuma nsadi ya Yehowa.​—Matayo 19:24-26; 25:31-33; Bisalu 17:31.

14. (a) Inki mutindu beto lenda kuditala sambu na kuzaba kana beto kewilaka bantu mawa? (b) Na nki mitindu ya mbote beto lenda monisa mawa mpi dikebi na beto na bantu yankaka?

¹⁴ Yo yina, na mbandu ya Yezu, beto kewilaka bantu mawa. Beto lenda kudiyula nde: ‘Keti mu kewaka mawa sambu na bantu yina ya bo kekusaka na mabundu, politike, mpi mambu ya mumbongo ya inza yai? Kana bo kesepila ve na nsangu ya beto kenatila bo, keti beto lenda sosa kubakisa kikuma ya bo kesala mutindu yina? Keti mu kezaba nde mono, to bantu yankaka ya ke na kusadila Yehowa bubu yai na kwikama, vandaka ntete mutindu yina? Keti mu mesoba mutindu na mono ya kulonga sambu na kusadisa bo? To mu kebuyaka kusolula na bantu yai nde bo tasoba dyaka ve?’ (Kusonga 12:9) Kana bantu kemona mawa ya kyeleka ya beto kewila bo, bo kevandaka na kyese mingi ya kuyamba nsangu na beto. (1 Piere 3:8) Mawa lenda pusa beto mpi na kutudila bantu yina beto kekutana na bo na kisalu na beto ya kusamuna dikebi mingi. Beto lenda baka banoti ya bangyufula na bo mpi ya mambu yina keyangisa bo. Ntangu beto kevutukila bo, beto lenda songa bo nde beto vandaka kuyindula mambu ya bo tubaka na mbala ya nsuka ya beto vandaka ti bo. Songa bo mpi nde kana bo kele na mfunu ya kima mosi ya kepesa bo mpasi kaka na ntangu yina, beto lenda pesa bo lusadisu ya kufwana.

15. Sambu na nki beto fwete sosa mambu ya mbote na bantu yankaka, mpi nki mutindu beto lenda sala yo?

¹⁵ Bonso Yezu, beto kesosaka mambu ya mbote na bantu. Mbala yankaka yo lenda vanda nde kibuti mosi ya nkento kesala mpenza kikesa na kusansa bana na yandi. Bakala mosi ke na kusala yonso sambu na kusadisa dibuta na yandi. Mununu mosi ketula dikebi na mambu ya kimpeve. Keti beto kemonaka mambu ya mutindu yai na bantu ya beto kekutanaka na bo mpi beto kesikisaka bo? Kana beto kesala mutindu yina yo tasala nde beto kuma kuwakana mbote ti bo mpi yo lenda pesa beto okazio ya kuta kimbangi ya metala Kimfumu.​—Bisalu 26:2, 3.

Kudikulumusa Kele Mfunu Sambu na Kumonisa Zola

16. Sambu na nki yo kele mfunu kusolula ti bantu ya beto kelonga na malembe mpi na luzitu?

¹⁶ Zola sambu na bantu yina beto kelonga kepusaka beto na kuzitisa lukebisu yai ya mayele ya Biblia: “Mayele [“nzayilu,” NW] . . . ke kumisaka muntu lulendo; kaka kuzola ya ntima ke sadisaka muntu na kukuma muntu ya mbote.” (1 Korinto 8:1) Yezu kuvandaka na nzayilu ya mingi, kansi yandi vandaka ve lulendo ata fyoti. Yo yina ntangu nge kezabisa bantu yankaka balukwikilu na nge, kutubaka ve bonso nge keswana to ti kuditombula. Mukumba na beto kele ya kusimba bantima mpi kubenda bantu na bakyeleka yina beto kezolaka mingi. (Kolosai 4:6) Kuvila ve nde, ntangu Piere kupesaka Bakristu ndongisila ya kuvanda ya kuyilama na kupesa mvutu, yandi yibusaka beto mpi nde beto fwete sala yo “na malembe ti na luzitu.” (1 Piere 3:16) Kana beto ketuba ti bantu na malembe mpi beto kezitisa bo, beto tabenda bamingi na Nzambi ya beto kesambilaka.

17, 18. (a) Inki beto fwete sala na ntangu bantu kesonga beto nde beto mefwana ve na kuvanda baministre? (b) Sambu na nki kuzaba bandinga ya ntama ya Biblia kele mfunu ve sambu na balongoki ya Biblia?

¹⁷ Mfunu kele ve ya kusosa kumonisa bantu nde beto mezabaka mambu mingi to nde beto melongukaka mingi. Kana bantu yankaka na teritware na beno kebuya kusolula ti konso muntu yina kusalaka ve banzo-nkanda ya nene to yina kele ve ti batitre ya nene, kubika ve nde kikalulu na bo yina kulembisa nge. Yezu kulandaka ve ntembe yina bo vandaka kutudila yandi nde yandi kotaka ve banzo-nkanda ya ba rabi yina bantu vandaka kuzola na ntangu yina; yandi bikaka mpi ve nde bangindu na bo ya mbi kupusa yandi na kumonisa bantu nde yandi mezaba mambu mingi kuluta.​—Yoane 7:15.

¹⁸ Kudikulumusa mpi zola kele mfunu mingi sambu na baministre ya Bakristu kuluta malongi ya mingi ya nzo-nkanda ya musuni. Yehowa, Longi ya Nene, kemonaka beto nde beto mefwana na kusala kisalu ya kusamuna. (2 Korinto 3:5, 6) Nkutu ata bamfumu yankaka ya Kikristu kutuba konso nki mambu yina, beto kele ve na mfunu ya kulonguka bandinga ya ntama ya Biblia sambu na kukuma balongi ya Ndinga ya Nzambi. Yehowa  kupesaka mpeve na yandi sambu Biblia kusonama na bangogo ya pwelele mpi ya sikisiki kibeni yina lenda sadisa konso muntu na kubakisa bakyeleka na yo ya kitoko. Bakyeleka yai kesobaka ve ata bo kebalulaka yo na bandinga mingi. Yo yina kuzaba bandinga ya ntama kevanda kibeni mfunu ve, ata bo kesadilaka yo na baokazio yankaka. Dyaka, lulendo yina bantu kevandaka na yo sambu bo mezaba bandinga lenda sala nde muntu kuvidisa kikalulu yina kele mfunu sambu na Bakristu ya kyeleka, disongidila, kundima nde bantu kulonga bo.​—1 Timoteo 6:4.

19. Na nki mutindu kisalu na beto ya Bukristu kele kisalu ya beto kesadila bantu?

¹⁹ Ntembe kele ve nde kisalu na beto ya Bukristu kele kisalu mosi ya kelombaka kudikulumusa. Bantu kemengaka beto, bo ketelaminaka beto nkutu ti kupesa beto mpasi. (Yoane 15:20) Kansi, kana beto kelungisa kisalu na beto na kwikama yonso, beto ke na kusala kisalu mosi ya mfunu. Kana beto kelanda na kusadila bantu yankaka na kudikulumusa yonso na kisalu yai, beto ke na kulanda mbandu ya zola yina Yezu Kristu kusongaka bantu. Beto tadila dyambu yai: Kana yo kelomba nde beto longa bantu funda mosi yina kebuya kuwa nsangu to ya kemenga beto kansi nsukansuka beto zwa kaka muntu mosi yina kele bonso dimeme, keti kikesa yonso ya beto salaka na kulonga bantu yina kele na mfunu? Ee, yo kele na mfunu mpenza! Yo yina, kana beto ketula kaka ngolo na kisalu, kukonda kulemba, yo tamonisa nde beto ke na kusadila na kwikama bantu yina kele bonso mameme ya beto mesengumuna ntete ve. Ntembe kele ve nde Yehowa ti Yezu tasala na mpila nde beto zwa bantu ya mbote ya mutindu yai mpi beto sadisa bo na ntwala nde nsuka kukwisa.​—Agai 2:7.

20. Inki mambu beto kezola kusala sambu na kulonga na mbandu?

²⁰ Kulonga na mbandu kele mutindu yankaka ya kumonisa luzolo na beto ya kusadila bantu yankaka. Mu mbandu, beto kezola kulonga bantu nde kusadila Yehowa, “Nzambi ya . . . kiese,” kele kima mosi ya kuluta mbote, ya kepesaka kyese mingi na luzingu. (1 Timoteo 1:11) Na ntangu bo kemona bikalulu na beto ya mbote mpi mutindu beto kezinga ti bantu yina beto kele na bo penepene, banduku ya nzo-nkanda, mpi banduku ya kisalu, keti bo lenda tuba nde beto kevandaka na kyese mpi na ntima-madidi? Kiteso mosi, beto kelongaka balongoki ya Biblia nde dibundu ya Bukristu kele kisika ya lutaninu ya zola na kati ya inza yai ya kukonda zola mpi ya nku. Keti balongoki na beto lenda bakisa nswalu nde beto kezola bantu yonso na kati ya dibundu mpi beto kesala ngolo na kutanina ngemba na kati na beto?​—1 Piere 4:8.

21, 22. (a) Kuditala sambu na kisalu na beto lenda pesa beto mabaku ya kusala inki? (b) Inki beto talonguka na masolo yina kelanda?

²¹ Bantangu yankaka, luzolo ya beto kevandaka na yo ya kusala kisalu na beto ya kusamuna lenda pusa beto na kuditadila dyaka. Na ntangu bampangi mingi kesalaka ekzame ya mutindu yai sambu na kuditadila, bo kemonaka nde bo mefwana na kuyantika kisalu ya ntangu yonso to na kukwenda kusala bisika yina mpusa kele mingi. Bankaka mebakaka lukanu ya kulonguka ndinga mosi ya banzenza sambu na kusadisa bantu mingi ya mekatukaka na bisika yankaka yina kezingaka na teritware na bo. Kana nge mekutana ti mabaku ya lenda pusa nge na kusala bonso bo, yindula yo mbotembote na kati ya kisambu. Kusadila Nzambi na luzingu kenataka kyese mpi ngemba ya mabanza.​—Longi 5:12.

²² Yo yina, bika beto landa mbandu ya Yezu Kristu na kuyedisaka zola na beto sambu na bakyeleka ya beto kelonga mpi sambu na bantu yina beto kelonga. Kuyedisa mpi kumonisa zola na mambu yai zole tasadisa beto na kusala fondasio ya mbote yina tasadisa beto na kukuma balongi bonso Kristu. Kansi, inki mutindu beto lenda tunga na zulu ya fondasio yina? Masolo yina kelanda tatubila mwa bametode ya sikisiki ya kulonga yina Yezu kusadilaka.

[Noti na nsi ya lutiti]

Inki Mutindu Nge Tavutula?

• Inki kendimisa beto nde beto lenda kuka na kulanda mbandu ya kulonga ya Yezu?

• Inki mutindu beto lenda monisa nde beto kezolaka bakyeleka yina beto melongukaka na Biblia?

• Sambu na nki yo kele mfunu nde beto kudikulumusa na ntangu nzayilu na beto kekuma mingi?

• Inki mitindu beto lenda sadila sambu na kumonisa zola na bantu yina ya beto kesalaka kikesa na kulonga?

[Bangyufula ya disolo ya kulonguka]

[Kifwanisu ya kele na lutiti 12]

Sala yonso ya nge lenda sambu na kudibongisa

[Kifwanisu ya kele na lutiti 13]

Kana nge kebakaka “kuzaba Nzambi” na valere, nge lenda sadila Biblia mbotembote

[Kifwanisu ya kele na lutiti 14]

Beto kemonisaka nde beto kezolaka bantu na mpila beto kekwendaka kuzabisa bo nsangu ya mbote