Landa Mbandu ya Longi ya Nene

“Yo yina, beno kwenda kukumisa bantu yonso balonguki . . . , beno longa bo mpi na kulanda mambu yonso ya mono vandaka kusonga beno.”​—MATAYO 28:19, 20.

1, 2. (a) Inki mutindu beto lenda tuba nde beto yonso kele balongi? (b) Sambu na yina metala kulonga, inki kisalu ya mfunu Bakristu ya kyeleka kele na yo?

 KETI nge kele longi? Beto lenda tuba nde beto yonso kele balongi. Konso ntangu ya nge kesongaka muntu mosi ya mevila nzila yina yandi fwete landa, ya nge kesongaka muntu mosi ya nge kesalaka na yandi mutindu ya kusala kisalu mosi, to ya nge kesongaka mwana mutindu ya kukangisa bansinga ya basapatu na yandi, nge kelongaka. Kusadisa bantu yankaka mpidyai kepesaka mwa kyese, luvunu?

² Sambu na yina metala kulonga, Bakristu kele na kisalu mosi ya nene. Yezu kulombaka beto na ‘kukumisa bantu yonso balonguki . . . , mpi kulonga bo.’ (Matayo 28:19, 20) Na kati ya dibundu mpi, beto kevandaka na baokazio mingi ya kulonga. Bo keponaka babakala yina mefwana na kusala bonso ‘bangungudi mpi balongi’ sambu na kupesa dibundu ngolo. (Efezo 4:11-13) Na bisalu na bo ya Bukristu ya konso kilumbu, bankento ya kuyela fwete “longa mambu ya mbote” na bankento yina kele baleke. (Tito 2:3-5) Biblia kelongisila beto yonso na kusyamisa bampangi na beto Bakristu mpi beto talemfuka na ndongisila yai kana beto kesadila Biblia sambu na kupesa kikesa na bantu yankaka. (1 Tesalonika 5:11) Yo kele lukumu mpenza na kuvanda longi ya Ndinga ya Nzambi mpi na kulonga mambu ya kimpeve ya mfunu yina lenda natila bantu mambote ya kukonda nsuka!

3. Inki mutindu beto lenda tomisa kisalu na beto ya kilongi?

³ Kansi, inki mutindu beto lenda tomisa kisalu na beto ya kilongi? Ntetentete, na kulandaka mbandu ya Longi ya Nene, Yezu. Bantu mingi lenda kudiyula nde, ‘Kansi nki mutindu beto lenda landa mbandu ya Yezu? Yandi vandaka muntu ya kukuka.’ Ya kyeleka, beto lenda kuma ve balongi ya kukuka. Kansi, ata mayele na beto kele nki kiteso, beto lenda sala ngolo na kulanda mutindu Yezu kulongaka. Bika beto tubila nki mutindu beto lenda sadila bametode iya ya yandi sadilaka: Kulonga na mutindu mosi ya kukonda mpasi, bangyufula ya mbote, bangindu ya kele na ndonga, mpi bingana ya kufwana mpenza.

Longa na Mutindu Mosi ya Kukonda Mpasi

4, 5. (a) Sambu na nki kulonga na mutindu mosi ya kukonda mpasi kele kima ya kuluta mfunu na kyeleka ya Biblia? (b) Sambu na kulonga na mutindu mosi ya kukonda mpasi, sambu na nki yo ke mfunu nde beto zaba mbote bangogo na beto?

⁴ Bakyeleka ya mfunu ya Ndinga ya Nzambi kele kwa yo mpasi ve. Na kisambu, Yezu kutubaka nde: “Tata, . . . mono ke pesa nge mersi, sambu mambu yina ya nge me bumbaka na bantu ya mayele ti na bantu yina me longukaka, nge me kwisa kuzabisa yo na bantu yina me longukaka ve.” (Matayo 11:25) Yehowa mezabisaka balukanu na yandi na bantu yina kele na ntima ya masonga mpi ya kudikulumusa. (1 Korinto 1:26-28) Yo yina, kulonga na mutindu mosi ya  kukonda mpasi kele dyambu mosi ya mfunu sambu na kyeleka ya Biblia.

⁵ Ntangu nge kelonguka ti muntu to nge kevutukila bantu yina kusepilaka na kyeleka, inki mutindu nge lenda longa bo na mutindu mosi ya kukonda mpasi? Inki mambu beto longukaka na Longi ya Nene? Sambu na kusimba ntima ya bawi na yandi, mingi na kati na bo vandaka “me longukaka ve,” Yezu kusadilaka bangogo ya kukonda mpasi yina bo lenda bakisa. (Bisalu 4:13) Yo yina, sambu na kulonga na mutindu mosi ya pete, kima ya ntete ya bo kelomba kele kuzaba mbote bangogo na beto. Sambu Ndinga ya Nzambi kusimba ntima ya bantu yankaka yo kele mfunu ve nde beto sadila bangogo to mutindu ya kutuba ya mpasi. ‘Kutuba ya kudisonga sambu na mambu yina ya beto mezaba’ lenda pesa bankaka boma, mingimingi bayina melongukaka mingi ve to ya kele mayele na kiteso. (1 Korinto 2:1, 2) Mbandu ya Yezu kemonisa nde bangogo ya pete ya beto mepona mbote lenda longa kyeleka mbote mpenza.

6. Inki mutindu beto lenda buya kufulusa bansangu mingi na ntu ya longoki ya Biblia?

⁶ Sambu na kulonga na mutindu mosi ya kukonda mpasi, beto fwete keba mpi na kukonda kufulusa ntu ya longoki ya Biblia na bansangu mingi. Yezu vandaka kutadila kiteso ya mayele ya balongoki na yandi. (Yoane 16:12) Beto mpi, beto fwete tadila kiteso ya mayele ya longoki na beto. Mu mbandu, kana beto kelonguka mukanda Nzayilu ya Kenataka na Luzingu ya Mvula na Mvula, mfunu ya kutendula mambu yonso ya fyoti-fyoti kele ve. a Mfunu mpi ya kukwenda ntinu-ntinu sambu na kulonguka mambu mingi kele ve, bonso nde kima ya meluta mfunu kele kulonguka mambu mingi. Kansi, yo kele mayele na kubika nde bampusa mpi mayele ya longoki kusadisa beto na kuzaba vitesi ya beto talongukilaka. Lukanu na beto kele ya kusadisa muntu ya beto kelonguka na yandi na kukuma longoki ya Kristu mpi muntu ya kesambila Yehowa. Beto kele na mfunu ya kubaka kiteso ya ntangu yina mefwana sambu na kusadisa longoki yina kesepila na kyeleka sambu yandi bakisa mbote mambu yina yandi kelonguka. Kana beto kesala mpidina, kyeleka lenda simba ntima na yandi mpi kupusa yandi na kubaka desizio ya mbote.​—Roma 12:2.

7. Inki bangindu lenda sadisa beto na kulonga na mutindu mosi ya kukonda mpasi kana bo mepesa beto devware na dibundu?

⁷ Na ntangu beto kesala badevware na dibundu, mingimingi kana bantu ya mpa kele muna, inki mutindu beto lenda tuba “bandinga yina ya bantu kuzaba”? (1 Korinto 14:9) Tala bangindu yai tatu ya lenda sadisa nge. Ntete, tendula bangogo yonso ya bantu mezaba mbote ve yina nge tasadila. Mutindu na beto ya kubakisa Ndinga ya Nzambi mepesaka beto bangogo ya beto mosi mpamba kebakisaka. Kana beto kesadila bangogo ya mutindu yina bonso “mpika ya kwikama mpi ya mayele,” “mameme yankaka,” mpi “Babilone ya Nene,” yo talomba nde beto tendula yo na bangogo ya kukonda mpasi kansi ya kepesa ntendula ya pwelele. Ya zole, kusadila ve bangogo mingi. Bangogo mingi-mingi mpi ya mpasi, lenda nata bawi na kukonda kulanda disolo na nge na dikebi. Sambu na kulonga na mutindu mosi ya pwelele yo kelombaka kukatula bangogo yonso yina kele na mfunu ve. Ya tatu, kumeka ve na kulonga mambu mingi. Mikanda ya beto metanga lenda pesa beto bansangu mingi ya mfunu. Kansi yo kele mbote na kuyidika malongi na beto mpi kubaka kaka mwa mambu ya fyoti yina kele mfunu, mpi kusadila kaka bansangu yina ketubila mwa mambu yango mpi ya nge lenda tendula pwelele na minuta ya bo mepesa nge.

Sadila Mbote Bangyufula

8, 9. Inki mutindu beto lenda pona ngyufula yina kewakana ti mpusa ya muntu yina beto kesolula na yandi? Pesa bambandu.

⁸ Yibuka nde Yezu vandaka kusadila bangyufula na mayele yonso sambu na kusadisa balongoki na yandi na kubasisa mambu yina kuvandaka na mabanza na bo mpi kupesa bo kikesa mpi kulonga mayele na bo ya kuyindula. Na bangyufula na yandi, Yezu kusimbaka ntima na bo na malembe yonso. (Matayo 16:13, 15; Yoane 11:26) Inki mutindu, beto lenda sadila mbote bangyufula mutindu Yezu kusalaka?

⁹ Na ntangu beto kelonga nzo na nzo, beto lenda  sadila bangyufula sambu na kutedimisa mpusa, na mpila nde beto yidika nzila sambu na kutubila Kimfumu ya Nzambi. Inki mutindu beto lenda pona ngyufula yina kewakana ti bampusa ya muntu ya beto kesolula na yandi? Vanda muntu ya mezaba kutala. Kana beno mekuma penepene na nzo mosi, beno tala mbote na lupangu yonso. Keti biteki ya kusekinina kele na ntoto, ya kesonga nde nzo yina kele na bana ya fyoti? Kana mpidina, beto lenda yula nde: ‘Keti nge mekudiyulaka dezia mutindu inza tavanda kana bana na nge meyela?’ (Nkunga 37:10, 11) Keti kyelo na bo kele na bansabi mingi, to yo kekangukaka mpi kukangama na kuran? Beto lenda yula nde: ‘Keti nge meyindulaka dezia ntangu yina bantu bonso nge ti mono tazingaka kukonda boma na banzo na beto mpi na balabala?’ (Mishe 4:3, 4) Keti yo kele na nzila yina velo ya bikata lenda lutila? Beto lenda yula nde: ‘Keti tavanda ti ntangu mosi yina bantu yonso yina tavanda na luzingu tavanda na mavimpi ya mbote?’ (Yezaya 33:24) Beto lenda zwa bangindu mingi ya beto lenda sadila na kamukanda Inki Mutindu Nge Lenda Kuyantika mpi Kulanda Masolo ya Biblia. b

10. Inki mutindu beto lenda sadila bangyufula sambu na ‘kubasisa’ bangindu mpi mawi na ntima ya longoki ya Biblia, kansi nki beto fwete vila ve?

¹⁰ Inki mutindu beto lenda sadila mbote bangyufula ntangu beto kelonguka Biblia ti bantu? Yezu kuzabaka mambu yina kuvandaka na ntima ya bantu, kansi beto lenda sala yo ve. Ata mpidina, bangyufula ya mayele mpi ya ketinda muntu na kuyindula lenda sadisa beto na ‘kubasisa’ bangindu mpi mawi yina kele na ntima ya longoki. (Bingana 20:⁠5) Mu mbandu, yindula nde beto kelonguka kapu yai “Sambu na Inki Kuzinga Luzingu ya Vumi Kenataka Mambote,” na mukanda Nzayilu. Yo ketubilaka dibanza ya Nzambi na mambu bonso kukonda masonga, pite, mpi mambu yankaka. Longoki lenda pesa bamvutu ya mbote na bangyufula yina kele na mukanda, kansi keti yandi kendima mambu yina yandi kelonguka? Beto leyula yandi nde: ‘Keti nge keyindula nde dibanza ya Yehowa kele na yo sambu na mambu yai kele ya mbote?’ ‘Inki mutindu nge lenda sadila minsiku yai ya Biblia na luzingu na nge?’ Kansi, kuvila ve nde nge fwete zitisa muwi na nge, kutanina lukumu ya kimuntu na yandi. Beto fwete yula ve bangyufula yina tasala nde longoki ya Biblia kuwa nsoni na kupesa mvutu to yina ya kevweza yandi.​—Bingana 12:18.

11. Na nki mitindu bantu yina kesalaka masolo na ntwala ya bantu yonso lenda sadila mbote bangyufula?

¹¹ Bampangi yina kesalaka masolo na ntwala ya bantu yonso lenda sadila mpi mbote bangyufula. Bangyufula yina kelombaka ve nde bawi kupesa mvutu na ndinga ya ngolo lenda sadisa bo na kuyindula. Mbala mingi Yezu vandaka kuyufula bangyufula ya mutindu yina. (Matayo 11:7-9) Dyaka, na nima ya bangogo ya kukotila na disolo, mutubi lenda yula bangyufula sambu na kubasisa mambu ya mfunu yina yandi tatubila na disolo na yandi. Yandi lenda tuba nde: “Na disolo na beto ya bubu, beto tasosa kubaka bamvutu na bangyufula yai . . . ” Na nima, na nsuka ya disolo, yandi lenda vutukila bangyufula yina sambu na kutubila mambu ya mfunu.

12. Pesa mbandu ya kemonisa nki mutindu bankuluntu lenda sadila bangyufula sambu na kusadisa mpangi mosi na kubaka kikesa na Ndinga ya Nzambi.

¹² Na kisalu na bo ya kutala bampangi, bankuluntu lesadila bangyufula sambu na kusadisa ‘bantu yina ke na basusi na ntima’ na kubaka kikesa na Ndinga ya Nzambi. (1 Tesalonika 5:​14, NW) Mu mbandu, sambu na kusadisa muntu yina kemona nde bantu yankaka kebakaka yandi ve na valere, nkuluntu lenda benda dikebi na yandi na Nkunga 34:19. Yo ketuba nde: “Mfumu Nzambi kele penepene na bantu yina ke na kikesa ve, yandi ke gulusaka bantu yonso yina me katulaka ntima.” Sambu na kuzikisa kana muntu yina melemba nitu kebakisa nki mutindu mambu ya bo ketuba na verse yai ketadila yandi mpenza, nkuluntu lenda yufula yandi nde: ‘Yehowa kele penepene na nani? Keti ntangu yankaka nge “ke vandaka kikesa ve” mpi ‘kekondaka kivuvu’? Mutindu Biblia ketuba, kana Yehowa kele penepene na bantu ya mutindu yina, keti yo ketendula ve nde yandi kele penepene na nge?’ Kupesa dyaka kivuvu ya mutindu yai na muntu yina ke na basusi na ntima lenda sadisa  yandi na kubaka dyaka kikesa na mabanza.​—Yezaya 57:15.

Bangindu Yina Kele na Ndonga

13, 14. (a) Inki mutindu beto lenda yindula na muntu mosi yina mesonga beto nde yandi kekwikilaka ve na Nzambi mosi yina yandi lenda mona ve? (b) Sambu na nki beto fwete tula ve ntima nde bantu yonso tandima bangindu na beto?

¹³ Na kisalu na beto, beto kele na nzala ya kusimba ntima ya bantu na bangindu ya mbote mpi ya kendimisa bo. (Bisalu 19:8; 28:23, 24) Keti yo ketendula nde beto fwete longuka na kusadila bangindu ya mpasi-mpasi sambu na kundimisa bantu yankaka kyeleka ya Ndinga ya Nzambi? Ve. Sambu bangindu kuvanda ya mbote yo kelombaka ve nde yo vanda ya mpasi-mpasi. Mbala mingi bangindu ya muntu metendula na ndonga na mutindu mosi ya kukonda mpasi kesimbaka mpenza ntima. Beto tadila mbandu mosi.

¹⁴ Inki mutindu beto tavutula kana muntu mosi mesonga beto nde yandi kekwikilaka ve na Nzambi mosi ya yandi lenda mona ve? Beto lenda yindula ti yandi na nsadisa ya nsiku ya ketambusaka mambu na inza yina kesalaka nde kima mosi kuvanda na kisina ya kubasisa dyambu yankaka. Kana beto memona mambu yina yo mebasisa, beto kendimaka mpi kisina na yo. Beto lenda tuba nde: ‘Kana nge kele na kisika mosi ya ntama mpi nge memona nzo mosi ya kutunga ya kitoko ya mefuluka na madya (dyambu ya kubasisaka), nge tandima kukonda mpasi nde ke na muntu (kisina) kutungaka nzo yina mpi kufulusaka madya na ba armware na yo. Mutindu mosi mpi, kana beto memona mutindu inza kusalamaka mpi bima mingi yina kele na “armware” ya ntoto (dyambu ya kubasikaka), keti yo kele ve mayele na kundima mpi nde ke ti Muntu mosi (kisina) yina kusalaka yo?’ Biblia kepesaka mvutu yai ya pwelele nde: “Ya kieleka, konso nzo ke na muntu ke tungaka yo, ebuna Nzambi muntu salaka bima yonso ti mambu yonso.” (Baebreo 3:4) Kansi, ata bangindu na beto lenda vanda ya mbote nki mutindu, bantu yonso ve tandima yo. Biblia keyibusa beto nde kaka bayina kele na “mabanza ya mbote” takwikila.​—Bisalu 13:48; 2 Tesalonika 3:2.

15. Bangindu ya nki mutindu beto lenda sadila sambu na kutubila bikalulu ti banzila ya Yehowa, mpi nki bambandu zole kemonisa mutindu beto lenda sadila bangindu ya mutindu yina?

¹⁵ Na kulonga na beto, yo vanda na kisalu ya bilanga to na dibundu, beto lenda sadila bangindu yina kele na ndonga sambu na kutubila bikalulu ya Yehowa mpi banzila na yandi. Mingimingi yo kele mbote na kusadila bangindu yina Yezu kusadilaka bantangu yankaka ntangu yandi vandaka kutuba nde ‘zaba nde’ sambu na kundimisa bawi na yandi. (Luka 11:13; 12:24) Sambu yo kesadilaka luswaswanu yina kele na kati ya mambu mingi, bangindu yai lenda simba mpenza ntima ya muntu yina beto kesolula na yandi. Sambu na kumonisa nde dilongi ya bilungi ya tiya kele ve ya masonga, beto lenda tuba nde: ‘Ata tata mosi ve lenda tula diboko ya mwana na yandi na tiya mpi kusimba yo ntangu yo kepya sambu na kupesa yandi ndola. Beto fwete zaba mpi nde Tata na beto ya zulu ya zola kezolaka nkutu ve ata fyoti dibanza ya bilungi ya tiya! (Yeremia 7:31) Sambu na kulonga nde Yehowa kevandaka na susi ya bansadi na yandi mosimosi, beto lenda tuba nde: ‘Kana Yehowa mezaba bazina ya bamiliare ya bambwetete yonso, beto fwete ndima mpi nde yandi ketulaka dikebi mingi mpenza na bantu yina kezolaka yandi mpi ya yandi sumbaka na menga ya ntalu mingi ya Mwana na yandi!’ (Yezaya 40:26; Bisalu 20:28) Bangindu ya mutindu yai ya kendimisa lenda sadisa beto na kusimba ntima ya bantu yankaka.

Bingana ya Mbote

16. Sambu na nki bingana kele mfunu mingi na kulonga?

¹⁶ Bambandu ya mbote kele bonso mungwa yina lenda kumisa malongi na beto ntomo mingi dyaka na bantu yankaka. Sambu na nki bingana to bambandu kele mfunu mingi na kulonga? Longi mosi kutubaka nde: “Mayele ya kuyindula kukonda kusala bifwanisu na mabanza ya bima yina bo ketubila beto kele mosi na kati ya mambu ya mpasi ya bantu kezolaka ve kusala.” Bingana kepesaka beto bifwanisu yina kenataka ntendula na mabanza na beto, yo kesadisaka beto na kubakisa mbote bangindu ya mpa. Yezu kuzabaka mpenza kusadila bingana. (Marko 4:33, 34) Bika beto tala nki mutindu beto lenda sadila metode yai na kulonga.

17. Tanga mambu iya yina kekumisaka kingana mbote.

¹⁷ Inki kima kekumisaka bingana to bambandu mbote? Ntetentete, yo fwete vanda mpasi ve sambu na bawi, mpi yo fwete tubila mambu yina bawi na beto lenda bakisa kukonda mpasi. Beto keyibuka nde Yezu kubakaka bingana na yandi mingi na mambu yina bawi na yandi vandaka kukutana na yo na luzingu na bo ya konso kilumbu. Ya zole, kingana fwete wakana mbote na dilongi yina yo kelonga. Kana yo kewakana mbote ve na kima yina beto kefwanisa yo, yo tanata bawi na beto na kukonda kulanda beto. Ya tatu, kingana fwete tubila ve mambu mingi ya  fyotifyoti ya kukonda mfunu. Kuvila ve nde Yezu vandaka kupesa bangindu ya mfunu kansi yandi vandaka kukotisa ve bangindu ya kukonda mfunu. Ya iya, ntangu beto kesadila kingana, beto fwete zikisa nde beto takuka kumonisa pwelele kuwakana yina kele na dilongi ya beto kezola kulonga. Kana ve, bantu yankaka lenda bakisa ve nki mutindu kusadila dilongi ya mfunu yina yo kelonga.

18. Inki mutindu beto lenda zwa bambandu ya mbote?

¹⁸ Inki mutindu beto lenda zwa bingana ya mbote? Beto fwete sosa ve bingana ya nda, ya mpasi. Bingana ya nkufi lenda vanda mbote mpenza. Meka kaka kuyindula na bambandu ya dilongi ya nge ketubila. Mu mbandu, sala bonso nde beto ketubila ndolula ya Nzambi, mpi beto kezola kupesa kingana to mbandu ya ketendula dyambu yina ke na Bisalu 3:19, kisika yo ketuba nde Yehowa ‘kekatulaka’ to kefwanzaka, bifu ya beto kesalaka. Ngogo yai kele kifwani ya nene, kansi nki mbandu ya kyeleka beto lenda baka sambu na kulonga dilongi yai: dinuka? eponge? Beto lenda tuba nde: ‘Ntangu Yehowa kelolulaka masumu na beto, yo kele bonso nde yandi kefwanzaka yo bonso na dinuka (to eponge).’ Yo tavanda ve mpasi nde muntu kubakisa dilongi ya nge kezo longa ti mbandu yai ya kukonda mpasi.

19, 20. (a) Na wapi beto lenda zwa bambandu ya mbote? (b) Tanga mwa bambandu ya mbote ya mebasikaka na mikanda na beto. (Tala mpi lupangu.)

¹⁹ Na wapi nge lenda zwa bingana ya mbote, ti bambandu yina ketubila mambu ya kyeleka ya luzingu? Sosaka yo na luzingu na nge mosi to na luzingu mpi na baeksperiansi ya bampangi Bakristu. Beto lenda pona bingana na bima yankaka, mu mbandu, na kati ya bima yina kele na moyo ti yina ke na moyo ve, na bima yina muwi na beto kele na yo, to na dikambu mosi ya mekatuka kuluta ntama mingi ve ya mezabana mbote. Dyambu ya lenda sadisa beto na kuzwa bingana ya mbote kele kuvanda muntu ya mezaba kutala mbote, “kutala mbote” (NW) mambu yina kesalama konso kilumbu na kisika ya beto kezingaka. (Bisalu 17:22, 23) Mukanda mosi ketuba mutindu yai na yina metala kutuba na meso ya bantu yonso: “Mutubi yina ketalaka luzingu ya bantu mpi bisalu ya bo kesalaka, yina kesolulaka ti bantu ya mitindu yonso, yina ketalaka bima mbotembote mpi keyulaka bangyufula tii kuna yandi kubakisa yo, tazwa bingana mingi yina tasadisa yandi na ntangu yandi tavanda na mfunu na yo.”

²⁰ Kisika yankaka ya beto lenda zwa bingana ya mbote kele na Nzozulu ya Nkengi, Réveillez-vous!, mpi na mikanda yankaka yina Bambangi ya Yehowa kebasisaka. Nge lenda longuka mambu mingi na mutindu mikanda yai kesadilaka bambandu. c Beto baka mbandu mosi ya bo mesadila na paragrafe 11 ya kapu 17 na mukanda Nzayilu. Yo kefwanisa kimuntu ya kuswaswana yina bantu kele na yo na kati ya dibundu ti bakaminio ya mutindu na mutindu yina ketambula nzila mosi ti nge. Inki kekumisa yo mbote? Yo ketubila mambu yina kesalamaka na luzingu ya konso kilumbu. Yo kewakana mpenza ti dikambu ya bo ketubila, ti mutindu ya kusadila ngindu na yo ya mfunu yina kele pwelele. Na ntangu beto kelonga, beto lenda sadila bambandu yina mebasikaka na mikanda na beto, ziku yo talombaka kuwakanisa yo ti bampusa ya longoki ya Biblia to kuyidika yo sambu na kusadila yo na diskure.

21. Inki mambote muntu lenda baka kana yandi ke longi ya mbote ya Ndinga ya Nzambi?

²¹ Kuvanda longi ya mbote kenataka mambote mingi. Na ntangu beto kelongaka, beto kekabilaka bantu yankaka; beto kesadilaka mayele na beto sambu na kusadisa bo. Kupesa ya mutindu yai kenataka kyese, sambu Biblia ketuba nde: “Kiese ya kuluta mingi ke vandaka na kupesa, kansi na kubaka kiese ke vandaka fioti.” (Bisalu 20:35) Sambu na balongi ya Ndinga ya Nzambi, kyese yango kele ya kuzaba nde beto kekabula kima mosi ya mfunu mingi mpi ya kele na valere ya kukonda nsuka, kima yango kele kyeleka ya metala Yehowa. Beto lenda baka mpi kyese yina kekatukaka na kuzaba nde beto kelanda mbandu ya Longi ya Nene, Yezu Kristu.

[Banoti na nsi ya lutiti]

Keti Nge Keyibuka?

• Inki mutindu beto lenda longa na mutindu mosi ya kukonda mpasi ntangu beto kelonguka Biblia ti muntu? ntangu beto kesala diskure na dibundu?

• Inki mutindu beto lenda sadila mbote bangyufula ntangu beto kelonga nzo na nzo?

• Inki mutindu beto lenda sadila bangindu yina kele na ndonga sambu na kutubila bikalulu mpi banzila ya Yehowa?

• Wapi beto lenda zwa bingana to bambandu ya mbote?

[Bangyufula ya disolo ya kulonguka]

 [Lupangu/Kifwanisu ya kele na lutiti 31]

Keti Nge Keyibuka Bambandu Yai?

Tala mwa bambandu ya mbote. Keti nge lenda sosa yo na mikanda mpi kutala mutindu konso mbandu kumonisaka pwelele dilongi ya bo ketubila?

• Bonso bantu yina kesalaka nsaka ya kulela na nsinga to bakala ti nkento mosi ya kesala nsaka ya kutambula na kisika mosi ya ke butesi na zulu ya matadi ya neze, bantu yina kesosa kusala makwela ya mbote fwete sosa mpi nkwelani ya mbote.​—Nzozulu ya Nkengi, Yuni 1, 2001, lutiti 12.

• Kupesa ngindu na nge kele bonso kulosa nkweso. Nge lenda losa yo na mawete yonso to nge lenda losa yo ti ngolo sambu yo lwadisa muntu.​—Nzayilu ya Kenataka na Luzingu ya Mvula na Mvula, lutiti 144.

• Kulonguka na kumonisa zola mefwanana ti kulonguka ndinga mosi ya mpa.​—Nzozulu ya Nkengi, Marsi 1, 1999, lutiti 11.

• Mambu yina lusambu ya bampeve ya mbi kesalaka sambu na bademo kele mutindu mosi ti mutindu pambu kesalaka sambu na bantu yina keloba. Yo kebendaka mbisi.​—Nzayilu ya Kenataka na Luzingu ya Mvula na Mvula, lutiti 111.

[Kifwanisu ya kele na lutiti 28]

Bakristu ya kyeleka kele balongi ya Ndinga ya Nzambi

[Kifwanisu ya kele na lutiti 29]

Bankuluntu lenda sadila bangyufula sambu na kusadisa bampangi na bo Bakristu na kubaka kikesa na Ndinga ya Nzambi