Baleke Yina Kezolaka Kyeleka

“BAMVULA kuluta 2 400 meluta muyimbi-bankunga yina kuvandaka Muyuda kuyulaka nde: “Nki mutindu mwana-bakala lenda vanda na bifu ya mbote na luzingu na yandi?” (Nkunga 119:9) Ngyufula yai kele kaka mfunu tii bubu yai sambu baleke kenwana ti mambu mingi ya mpasi na inza. Baleke mingi kebakaka SIDA sambu na bizumba, mpi kana beto kabula bantu yina kele na maladi yai ya mpasi na ndambu zole, ndambu mosi kele bayina kele na bamvula na kati ya 15 mpi 24. Bima yina kelausaka mpi ke na kunata mambu mingi ya mpasi, mpi yo ke na kufwa baleke mingi. Miziki ya mbi; bafilme ya kesonga bantu kenwana, kebulana masasi to kefwa bantu mpi ya nsoni, ba emisio ya televizio, mpi bafilme na video; mpi bantu ya kesonga kinkonga na Internet kevandaka na bupusi ya mbi na baleke. Yo yina, ngyufula yina muyimbi-bankunga kuyulaka kele mfunu mingi mpenza sambu na bibuti mpi baleke mingi bubu yai.

Na ngyufula ya yandi yulaka, muyimbi-bankunga kupesaka mvutu yai nde: “Kana yandi ke lemfuka na bansiku na nge Mfumu Nzambi.” Ya kyeleka, Ndinga ya Nzambi, Biblia, kele ti bandongisila ya mbote sambu na baleke, mpi baleke mingi ke na kununga na luzingu sambu bo ke na kulanda yo. (Nkunga 119:105) Bika beto tadila mwa bambandu ya baleke ya kezolaka Nzambi mpi ya kesala ngolo na kubikala kaka ngolo na kimpeve na inza yai ya bantu kesosaka ntetentete byese mpi kuzwa bima mingi ya kinsuni.

TBo Kepesa Mersi Sambu na Lutwadisu ya Bibuti

Jacob Emmanuel kuvandaka mupasudi-nzila bamvula mingi na ntwala ya kukwenda kusala na biro ya filiale ya Bambangi ya Yehowa na Mexique. Yandi keyibuka ti ntonda mutindu zola na yandi sambu na kisalu ya Nzambi kuyelaka: “Ata bampangi mingi ya kuyela na kimpeve ya mono salaka na bo kinduku kusadisaka mono mingi, bibuti na mono bantu kuvandaka na bupusi ya kuluta ngolo na kimuntu na mono. Bo yonso vandaka kupesa mono kikesa na kuzola kisalu ya kusamuna. Na malembe yonso bo vandaka kunata mono na nzila ya mbote; mono vandaka kudiwa ve ata fyoti nde bo vandaka kupusa mono.”

David, yina mesala dezia bamvula mingi na kisalu ya ntangu yonso, keyibuka nde kima kusimbaka ntima na yandi kuvandaka mutindu bibuti na yandi kuyantikaka kusala bonso bapasudi-nzila ya nene ntangu yandi ti mpangi na yandi kuvandaka bana ya fyoti. Na ntangu tata na yandi kufwaka, mama na yandi kulandaka na kusala kisalu ya mupasudi-nzila ya nene. Yandi vandaka kusansa bo mbote mpi kusamuna nsangu ya mbote. David ketuba nde: “Ata kilumbu mosi ve bo pusaka mono na ngolo na kukuma mupasudi-nzila, kansi dibuta na beto ya mvimba vandaka kusepela mingi mpenza na kisalu ya kimupasudi-nzila, na mpila nde banduku mpi bantu ya mono vandaka kuzinga na bo kupesaka mono kikesa ya kusala mutindu mosi.” Sambu na yina metala mfunu ya lutwadisu mpi ya dikebi ya mbote ya bibuti, David ketuba nde: “Konso mpimpa, mama na mono vandaka kutangila beto masolo ya mukanda Du paradis perdu au paradis reconquis. a Mutindu yandi vandaka kutela beto masolo yina kusadisaka beto na kudya madya ya kimpeve.”

Ntonda Sambu na Balukutakanu

Baleke mingi kesepelaka ve na balukutakanu ya Bukristu. Bo kekwendaka kaka sambu bibuti na bo kenataka bo. Kansi, kana bo landa na kukwenda na balukutakanu, yo lenda sala nde bo kuma kuzola balukutakanu. Beto tadila mbandu ya Alfredo, yina kuyantikaka kisalu ya kimupasudi-nzila ntangu yandi vandaka na bamvula 11. Yandi kendima nde ntangu yandi  vandaka na bamvula kiteso ya tanu, yandi vandaka kumeka na kutina balukutakanu sambu yo vandaka kupesa yandi mpongi, kansi bibuti na yandi vandaka kundima ve nde yandi kulala na ntangu ya balukutakanu. Yandi keyibuka nde: “Na ntangu mono kumaka mbuta, mono yantikaka kuzola balukutakanu fyoti-fyoti, mingimingi na nima ya kulonguka kutanga mpi kusonika sambu na ntangu yina mono yantikaka kupesa bakomantere na bangogo na mono mosi.”

Cintia, mwana-nkento mosi ya bamvula 17, yina kele mupasudi-nzila ya ntangu yonso, ketuba mutindu banduku ya mbote kusadisaka yandi mingi na kuyantika kuzola mingi kisalu ya Nzambi. Yandi ketuba nde: “Kinduku ya mbote ti bampangi ya babakala mpi kukwenda mbala na mbala na balukutakanu kusadisaka mono na kukonda kudiwa nde mu ke na kuvidisa banduku na mono ya inza mpi mambu yina baleke kesalaka mingi bonso kukwenda kukina. Kuwa bakomantere mpi baeksperiansi na balukutakanu kusalaka nde mu kuma kuwa nzala ya kupesa Yehowa bima yonso ya mu ke na yo, mpi mono kewa nde kima ya kuluta kitoko ya mono kele na yo kele buleke na mono. Yo yina, mu bakaka lukanu ya kusadila buleke na mono na kisalu na yandi.”

Kansi, yandi kendima nde: “Yo kuvandaka na ntangu mosi, na ntwala nde mono baka mbotika, mono vandaka kumona ve mpasi na kutina balukutakanu, kikuma ya mono vandaka kupesa kele badevware to bisalu yankaka ya nzo-nkanda. Mono vandaka kukonda na balukutakanu mingi, mpi mono kumaka kulemba na kimpeve. Mono yantikaka kusala kinduku ti mwana-bakala mosi yina vandaka kulonguka ve Biblia. Na nima ya bilumbu, Yehowa kusadisaka mono na kutomisa mambu yango.”

Desizio ya Konso Muntu

Pablo, kele leke yankaka ya kesadilaka Yehowa na kisalu ya ntangu yonso. Ntangu bo yulaka yandi nki kima ya kuluta mfunu mpenza ya kesadisaka muntu na kuyantika kuzola kyeleka ya Ndinga ya Nzambi, yandi ketuba nde: “Mono kebanza nde bima kele zole: kulonguka ya beto mosi mbala na mbala mpi kikesa na kisalu ya kusamuna. Mu kepesa matondo na bibuti na mono sambu bo longaka mono kyeleka na yina metala Yehowa, mpi mono keyindula nde yo kele kima ya kuluta mbote ya bo lendaka kupesa mono. Kansi, mono kele na mfunu ya kundimisa ntima na mono sambu na nki mono kezolaka Yehowa. Sambu na kusala yo, yo kelomba kuzaba ‘nene ti mudindu’ ya kyeleka ya Biblia. Yo kele kaka na kusala mutindu yina beto kekukaka kuwa mpusa ya Ndinga ya Yehowa, ya kepelaka ‘bonso tiya’ na ntima na beto mpi ya kepusaka beto na kuzabisa yo na bantu yankaka. Kikesa ya mutindu yai sambu na kisalu ya kusamuna tasala nde ntonda na beto sambu na kyeleka kuvanda kaka ngolo.”​—Efezo 3:18; Yeremia 20:9.

Jacob Emmanuel, ya beto tubilaka ntete, keyibuka dyaka mfunu ya konso muntu ya kusola yandi mosi na kusadila Yehowa. Yandi ketuba nde bibuti na yandi vandaka kupusa yandi ve ata fyoti na kubaka mbotika. “Mono kendima nde yo vandaka mutindu mosi ya kuluta mbote sambu mono kemona bambuma ya mbote ya yo kebuta. Mu mbandu, baleke mingi ya kuvandaka banduku na mono kubakaka desizio ya kubaka mbotika na mbala mosi bo yonso. Ata yo vandaka dyambu ya mbote, mono bakisaka nde mingi kusalaka yo kaka sambu na kyese, sambu na nima ya mwa ntangu, kikesa na bo sambu na bisalu ya Kimfumu kukulumukaka. Kansi sambu na mono, bibuti na mono kupusaka mono ve na kubaka desizio ya kudipesa na Yehowa. Yo vandaka desizio na mono mosi.”

 Kisalu ya Dibundu

Baleke yankaka melongukaka kyeleka ya Ndinga ya Nzambi na ngolo na bo mosi, kukonda lusadisu ya bibuti na bo. Ntembe kele ve nde kulonguka kyeleka mutindu yina na kusala mambu ya mbote mpi kukangama na kusala yo kele dyambu mosi ya mpasi.

Noé keyibuka nki mutindu kyeleka kupesaka yandi mambote mingi. Banda bumwana, yandi vandaka kuwa makasi nswalu mpi kunwana mingi. Ntangu yandi yantikaka kulonguka Biblia na bamvula 14, bikalulu na yandi yantikaka na kutoma, ebuna yo salaka nde bibuti na yandi, ya vandaka kusepela ve na Biblia na ntangu yina, vandaka kupesa mersi sambu na dyambu yina. Mutindu Noé vandaka kuyela na kimpeve, yandi monisaka luzolo na yandi ya kusadila luzingu na yandi na kisalu ya Nzambi ntangu yonso. Bubu yai, yandi kesalaka kisalu ya ntangu yonso.

Mutindu mosi mpi sambu na Alejandro, ata bibuti na yandi vandaka kusepela ve na kyeleka, yandi yantikaka kuzola kyeleka ya Bukristu ntangu yandi vandaka mwana mpenza. Sambu na kumonisa ntonda na yandi sambu na kyeleka, yandi ketuba nde: “Mono yelaka na dibuta mosi yina vandaka kusambila na Katolika. Kansi mono kumaka kuzola mingi malongi ya bantu ya Kominizme yina vandaka kukwikila ve na Nzambi, mpamba ve dibundu kupesaka mono ve bamvutu na bangyufula yina vandaka kutungisa mono banda bumwana. Organizasio ya Yehowa kusadisaka mono na kuzwa nzayilu ya Nzambi. Ya kyeleka nzayilu ya Nzambi kugulusaka luzingu na mono, sambu kana mu longukaka ve Biblia, ntembe kele ve nde nga mekumaka muntu mosi ya kesalaka mansoni, kunwa malafu mingi, to kunwa bima yina kelausaka. Nkutu nga mu zolaka kuvanda na kati ya bimvuka ya bantu yina kebendumukaka na bamfumu ya luyalu, ti mambu ya mbi ya yo kenataka.”

Inki mutindu leke mosi lenda landa na kusosa kyeleka mpi na kukangama na yo kukonda lusadisu ya bibuti na yandi? Yo ke pwelele nde, bankuluntu mpi bantu yankaka na kati ya dibundu kesalaka mingi na dyambu yai. Noé keyibuka nde: “Mono kekudiwaka ve ata fyoti nde mono kele mono mosi, sambu Yehowa kevandaka ntangu yonso penepene na mono. Dyaka, mono kebakaka lusadisu ya bampangi mingi ya zola ya babakala mpi ya bankento ya mekumaka batata, bamama, mpi bampangi na mono ya kimpeve.” Bubu yai yandi kesalaka na Betele mpi yandi kesadilaka ntangu na yandi na kisalu ya Nzambi. Mutindu mosi, Alejandro ketuba nde: “Kima mosi ya mono tapesilaka mersi konso ntangu kele nde mu zwaka lusakumunu ya kuvanda na dibundu mosi yina vandaka ti kimvuka mosi ya bankulutu yina kutudilaka mono dikebi mingi na zola yonso. Mono kepesa bo mersi mingimingi sambu ntangu mono yantikaka kulonguka Biblia, na bamvula 16, bangindu ya bisakasaka vandaka kwisila mono mpi mutindu yo kekwisilaka baleke mingi. Mabuta na dibundu kuyambulaka mono ve ata fyoti. Konso ntangu mpangi mosi vandaka kuyamba mono na nzo na yandi mpi kupesa mono kisika ya kulala mpi madya kaka ve, kansi mpi ntima na yandi.” Bubu yai, Alejandro mesala bamvula kiteso ya 13 na kisalu ya ntangu yonso.

Bantu mingi kebanzaka nde dibundu kele kaka sambu na bantu ya kununa. Kansi, baleke mingi melongukaka kyeleka ya Biblia banda bumwana na bo mpi bo mekumaka kuzola Yehowa mpi kubikala ya kwikama na yandi. Bangogo ya Davidi yai ya kele na Nkunga 110:3 kelungaka na baleke yai: “Kilumbu ya nge ta nwana na bambeni na nge pana na ngumba ya Nzambi, bantu na nge ta kwisa kunwana na luzolo na bo mosi ti kikesa; basoda na nge ta kwisa kukuta nge kuna mutindu malulu ke vandaka na suka-suka.”

Yo kelombaka ngolo mpi lukanu na baleke sambu na kulonguka kyeleka mpi kukangama na yo. Yo kele kyese mpenza na kumona nde baleke mingi ke na kukangama kaka na organizasio ya Yehowa, bo kekwendaka na balukutakanu mbala na mbala, mpi kelongukaka Biblia na kikesa yonso. Kusala mutindu yina mesadisaka bo na kuyedisa zola ya kyeleka na Ndinga ya Nzambi mpi na kisalu na yandi!​—Nkunga 119:15, 16.

[Noti na nsi ya lutiti]