Kikesa Yina Nzayilu ya Kyeleka ya Nzambi Kepesaka

MAMBU yina Biblia ketubaka na yina metala zola mpi mawa ya Nzambi kebasisaka bangyufula mingi ya mpasi na bantu mingi. Bo keyufulaka nde: Kana Nzambi kele na luzolo ya kukatula mambi, kana yandi mezaba mutindu ya kusala yo, mpi kana yandi kele na ngolo ya kusala yo, sambu na nki mambi kekuma kaka mingi? Kima ya bo kemonaka mpasi kele kuwakanisa bangindu yai tatu: (1) Nzambi kele nkwa-ngolo yonso; (2) Nzambi kele zola mpi mbote; mpi (3) mambu ya mbi kelanda kaka na kusalama. Bo keyindulaka nde sambu ngindu ya tatu kele ya kyeleka mpenza, disongidila mosi na kati ya bangindu zole yina ya ntete lenda vanda ve ya kyeleka. Sambu na bo, yo lenda vanda nde Nzambi kekuka ve na kusukisa mambi to mambu yango kesalaka yandi ve ata susi fyoti.

Bilumbu mingi na nima ya kufwa ya banzo yina kubwaka na New York (World Trade Center), ntwadisi mosi ya mezabanaka mingi ya dibundu mosi na États-Unis kutubaka nde: “Bambala mingi na luzingu na mono, bantu keyufulaka mono sambu na nki Nzambi kebikaka mambi mpi mpasi. Mono fwete ndima na masonga yonso nde mono kezabaka ve mvutu ya kupesa bo ata fyoti, ata sambu na kudisepedisa.”

Sambu na kupesa mvutu na bangogo yai, profesere mosi ya teolozi kusonikaka nde “teolozi ya mbote” yina mfumu ya dibundu yai kulongaka kuyitukisaka yandi mingi. Yandi ndimaka dyaka dibanza yina muntu mosi ya mayele kusonikaka nde: “Kukonda kubakisa kikuma ya bantu kemoninaka mpasi, kele mosi na kati ya bidimbu ya kesongaka nde bo mezaba ve Nzambi mbote.” Kansi, keti yo kele mpenza mpasi na kubakisa sambu na nki Nzambi kepesaka nzila nde mambi kusalama?

Kisina ya Mambi

Biblia kemonisa ve nde beto lenda bakisa ve sambu na nki Nzambi kepesaka nzila nde mambi kusalama, mutindu bantwadisi ya mabundu lenda tuba. Dyambu ya mfunu ya lenda sadisa beto na kubakisa dyambu ya metala mambi kele ya kundima nde Yehowa kusalaka ve inza mosi ya mbi. Yandi salaka bankwelani ya ntete ya kukuka, ya kukonda disumu. Yehowa kutalaka kisalu ya yandi salaka mpi monaka nde yo vandaka “mbote mpenza.” (Kuyantika 1:26, 31) Lukanu na yandi kuvandaka nde Adami mpi Eva kukumisa Paladisu ya Edeni na ntoto ya mvimba mpi bo fulusa yo ti bantu ya kyese yina zolaka kuvanda na lutaninu ya kimfumu na yandi ya zola.​—Yezaya 45:18.

Mambi yantikaka ti kigangwa ya mpeve mosi yina, ata yandi vandaka ntete ya kwikama na Nzambi, kuyedisaka mpusa ya mbi nde bo sambila yandi. (Yakobo 1:14, 15) Kukolama na yandi kumonanaka na ntoto ntangu yandi pusaka bankwelani ya ntete na kulanda yandi na kukonda kulemfuka na yandi na Nzambi. Na kisika ya kulemfuka na ntuma ya pwelele ya Nzambi ya kudya ve to kusimba ve mbuma ya nti ya kuzaba mambu ya mbote ti ya mbi, Adami ti Eva kubakaka mbuma yango mpi bo dyaka yo. (Kuyantika 3:1-6) Na ntangu bo salaka mpidina, bo kolamaka kaka na Nzambi ve, kansi bo songaka dyaka nde bo vandaka na mpusa ya kimpwanza.

Ntembe Mosi Kubasikaka

Kukolama yina kusalamaka na Edeni kubasisaka ntembe na dyambu ya metala kupona mambu  ya mbote ti ya mbi, ya ketadila inza ya mvimba. Bantu yina kukolamaka kutulaka ntembe nde Yehowa vandaka kusadila mbote kiyeka na yandi sambu na kuyala bigangwa na yandi. Keti Ngangi vandaka na nswa ya kulomba nde bantu kulemfuka na yandi na mambu yonso? Keti bantu lenda vanda na luzingu ya kuluta mbote kana bo kesala mambu kukonda lutwadisu ya Nzambi?

Yehowa kuyidikaka dyambu yai ya kutulaka ntembe na kiyeka na yandi na mutindu mosi yina kusongaka bukatikati ya kukuka ya zola, lunungu, mayele mpi ngolo na yandi. Yandi lendaka sadila ngolo na yandi sambu na kufwa mbala mosi bankolami. Yo zolaka kumonana dyambu mosi ya lunungu, mpamba ve yandi vandaka na nswa ya kusala yo. Kansi, kana yandi salaka mpidina, bangyufula ya metala mutindu yandi kesadilaka kiyeka na yandi yina kubasikaka zolaka kuzwa ve bamvutu. Dyaka, Nzambi lendaka kuvila kaka disumu yango. Kusala mpidina lenda monana sambu na bantu mingi bubu yai bonso mutindu mosi ya kusonga zola. Kansi, kusala mutindu yina zolaka kupesa ve mvutu na mambu yina Satana tubaka nde bantu zolaka kuvanda na luzingu mosi ya kuluta mbote kana bo kudiyala bo mosi. Dyaka, keti kusala mutindu yina zolaka kusyamisa ve bantu yankaka na kukatuka na nzila ya Yehowa? Yo zolaka nata mpasi ya kukonda nsuka.

Na mayele na yandi, Yehowa mebikaka nde bantu kuditambwisa bo mosi sambu na ntangu fyoti. Ata yo ketendulaka nde yandi mepesaka nzila na mambi sambu na mwa ntangu, bantu mezwaka okazio ya kusonga kana bo lenda nunga na kudiyala bo mosi kukonda lusadisu ya Nzambi, kuzitisa bansiku ya bo mosi mesalaka sambu na yina metala mambu ya mbote to ya mbi. Inki mutindu luzingu na bo mekumaka? Istware ya bantu mefulukaka mpenza na bitumba, kukonda lunungu, kunyokula bantu yankaka, mpi mpasi. Kukonda kununga ya nsuka ya kukolama na Yehowa tapesa bamvutu ya kimakulu na bangyufula yina kubasikaka na Edeni.

Na ntwala nde mambu yai kusalama, Nzambi kusongaka zola na yandi na ntangu yandi pesaka Mwana na yandi, Yezu Kristu, yina kupesaka luzingu na yandi bonso kimenga ya nkudulu. Dyambu yai kesadisa bantu ya bulemfu na kukatuka na kimpika ya masumu mpi ya lufwa yina kukonda bulemfu ya Adami kunataka. Nkudulu mekangulaka  nzila ya kenata na luzingu ya mvula na mvula sambu na bantu yonso yina kekwikilaka na Yezu.​—Yoane 3:16.

Mutindu Yehowa kendimisa beto nde bampasi ya bantu kemonaka kele ya ntangu fyoti kepesaka beto kikesa mingi. Muyimbi-bankunga kusonikaka nde: “Kubika fioti kaka bantu ya mbi ta vila, nge lenda sosa bo kansi nge ta mona bo ve; kansi bantu yina ke kudikulumusaka, bo ta zinga mbote na ngemba mpenza na ntoto.”​—Nkunga 37:10, 11.

Luzingu ya Kukonda Kigonsa mpi ya Kyese ya Bilumbu Yina Kekwisa

Kulungana ya bambikudulu ya Biblia kesonga nde kubika fyoti Nzambi kesukisa maladi, mambu yonso ya kepesaka bantu mawa, mpi lufwa. Tala kifwani ya kitoko ya mambu yina tasalama na bilumbu yina kekwisa ya ntumwa Yoane kumonaka na mbonameso. Yandi sonikaka nde: “Mono monaka zulu ya mpa ti ntoto ya mpa. Zulu ya ntete yo vilaka, nzadi-mungwa mpi vandaka diaka ve. . . . Yandi mosi Nzambi ta vandaka ti bo [bantu], . . . Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.” Sambu na kusonga yandi nde balusilu yai vandaka ya masonga, bo tubilaka Yoane nde: “Sonika mambu yai, sambu mambu yai ya mono ke tuba kele ya kieleka, nge lunga tula ntima na yo.”​—Kusonga 21:1-5.

Inki beto lenda tuba sambu na bamilio ya bantu ya masonga yina mefwaka banda kukolama yina kusalamaka na Edeni? Yehowa kupesaka lusilu nde yandi tafutumuna bantu yina kele ya kulala na lufwa ntangu yai. Ntumwa Polo tubaka nde: “Mono ke tulaka ntima na Nzambi . . . nde bantu ya mbote ti bantu ya mbi ta telema na lufwa.” (Bisalu 24:15) Bantu yai tavanda ti kivuvu ya kuzinga na inza mosi kisika “lunungu tazingaka.”​—2 Piere 3:13, NW.

Kaka mutindu tata mosi ya zola tandima nde bo sala mwana na yandi operasio ata yandi kemona mpasi kana yandi mezaba nde yo tanatila yandi mambote ya ntangu ya nda, mutindu mosi mpi Yehowa kupesaka bantu nzila ya kumona mwa mpasi sambu na mwa ntangu na ntoto. Kansi balusakumunu ya kimakulu kekinga bantu yonso yina kesosa kusala luzolo ya Nzambi. Polo kutendulaka nde: “Bima yina ke landaka mambu ya mpamba-mpamba. Yo ke salaka mpidina na luzolo na yo mosi ve, kansi na luzolo ya Nzambi. Kansi beto lenda tula ntima nde kilumbu mosi Nzambi ta katula bima yina yonso na kimpika yina ke nataka lufwa, ebuna yo ta baka dipanda ya lukumu yina ya bana ya Nzambi ta baka.”​—Roma 8:20, 21.

Nsangu yai kele mpenza ya kyeleka, yo kele ve bonso bansangu ya beto ketalaka na televizio to ya beto ketangaka na zulunalu kansi yo kele nsangu ya mbote. Yo kele nsangu ya meluta bansangu yonso ya kitoko ya mekatuka na ‘Nzambi ya kepesaka mpenza kikesa,’ ya kekudibanzaka mpenza sambu na beto.​—2 Korinto 1:3.

[Bifwanisu ya kele na lutiti 6]

Ntangu mesonga nde bantu lenda nunga ve na kudiyala bo mosi kukonda lutwadisu ya Nzambi

[Bangogo ya kemonisa kisina ya bafoto]

Dibuta mosi ya Somalie: UN PHOTO 159849/M. GRANT; bombi atomike: USAF photo; kan ya konsantrasio: U.S. National Archives photo