Monisa Bulemfu Sambu Nsuka Mefinama

“[Shilo] muntu ta yalaka bantu yonso.”​—KUYANTIKA 49:10.

1. (a) Na ntangu ya ntama, mbala mingi kulemfuka na Yehowa vandaka kutendula inki? (b) Inki mbikudulu metala bulemfu Yakobo kutubaka?

 MBALA mingi kulemfuka na Yehowa vandaka kutendula kulemfuka na bamonisi na yandi. Bamonisi yango kuvandaka bawanzio, batata ya mabuta, bazuzi, banganga-Nzambi, baprofete, mpi bamfumu. Nkutu kiti ya kimfumu ya bamfumu ya Izraele bo vandaka kubinga yo nde kiti ya kimfumu ya Yehowa. (1 Bansangu 29:23) Kansi, yo kele mawa na kumona nde bamfumu mingi ya Izraele kukondaka bulemfu na Nzambi, yo yina mpasi kubwilaka bo ti bantu yina bo vandaka kuyala. Kansi Yehowa kubikaka ve bantu na yandi ya kwikama kukonda kivuvu; yandi syamisaka bo na mpila yandi silaka na kupesa bo Mfumu ya masonga, yina bantu ya mbote talemfukila na kyese yonso. (Yezaya 9:6, 7) Yakobo, tata ya dibuta yina vandaka kubela maladi ya kunataka yandi na lufwa kutubilaka ntotila yina takwisa na mbikudulu, nde: “Nge Yuda ta simbaka nti ya kimfumu tii kuna, bana na nge mpi ta simbaka kiyeka ya kimfumu ntangu yonso tii kuna [shilo, NW] ta kwisa; yandi muntu ta yalaka bantu yonso.”​—Kuyantika 49:10.

2. “Shilo” ketendula inki, mpi banani yandi tayala?

² “Shilo” kele ngogo ya Kiebreo yina ketendula “Munkwa Na Yo.” Ya kyeleka, Shilo tabaka kibeni  nswa yonso ya kuyala, mutindu bo fwanisaka yo na nti, mpi ngolo ya kuyala, yina ketendula kiyeka ya kimfumu. Dyaka, yandi tayala bana ya Yakobo mpamba ve, kansi “bantu yonso.” Dyambu yai kewakana ti lusilu yina Yehowa kupesaka Abrahami: “[Nkuna, NW] na nge ta bedisaka bambeni na bo. Ebuna bantu yonso ya nsi-ntoto ta lombaka mono na kusakumuna bo.” (Kuyantika 22:17, 18) Yehowa kusongaka “nkuna” yai na mvu 29 T.B. ntangu yandi pakulaka Yezu ya Nazareti mpeve santu na yandi.​—Luka 3:21-23, 34; Galatia 3:16.

Kimfumu ya Ntete ya Yezu

3. Inki kimfumu Yezu kubakaka ntangu yandi kwendaka na zulu?

³ Ntangu Yezu kumataka na zulu yandi yantikaka ve kuyala bantu ya inza na mbala mosi. (Nkunga 110:1) Kansi, yandi bakaka “kimfumu” ti bantu yina kulemfukilaka yandi. Ntumwa Polo kutubilaka kimfumu yango ntangu yandi sonikaka nde: “[Nzambi] me katulaka beto [Bakristu ya kupemama na mpeve] na kimfumu yai ya mpimpa, ebuna yandi me kotisaka beto na kimfumu ya Mwana na yandi ya yandi ke zolaka.” (Kolosai 1:13) Bo yantikaka kukatuka na mpimpa yai na Pantekoti ya mvu 33 T.B. ntangu Nzambi kutyamunaka mpeve santu na yandi na zulu ya balongoki ya kwikama ya Yezu.​—Bisalu 2:1-4; 1 Piere 2:9.

4. Na nki mitindu balongoki ya ntete ya Yezu kumonisaka bulemfu, mpi nki mutindu Yezu kutubilaka bo na kimvuka?

⁴ Mutindu ‘bo ke tubaka na zina ya Kristu,’ balongoki ya kupakulama yantikaka kuvukisa na bulemfu yonso bantu yankaka ya takuma bampangi na bo “basitwaye” ya kimfumu yina ya kimpeve. (2 Korinto 5:20; Efezo 2:19; Bisalu 1:8) Dyaka, bo yonso tavanda ya ‘kuvukana mpenza na mabanza mosi ti na ngindu mosi’ sambu Ntotila na bo Yezu Kristu kundima bo. (1 Korinto 1:10) Na kimvuka, bo salaka “mpika ya kwikama mpi ya mayele,” to kimvuka ya mpika ya mbote yina bo mepesaka kiyeka.​—Matayo 24:45, NW; Luka 12:42.

Bo Mebaka Balusakumunu Sambu Na Bulemfu na Bo na “Mpika”

5. Banda na ntangu ya ntama, inki mutindu Yehowa kulongaka bantu na yandi?

⁵ Banda na ntangu ya ntama Yehowa kepesaka bantu na yandi balongi. Mu mbandu, ntangu bayuda katukaka na Babilone, Esdrasi ti babakala yankaka ya kuyela kusukaka ve kaka na kutanga Ndinga ya Nzambi, kansi bo ‘tendulaka’ nsiku yango, “na mpila nde bantu yonso kuzaba” Ndinga ya Nzambi.​—Nehemia 8:8.

6, 7. Inki mutindu kimvuka ya mpika kepesaka madya ya kimpeve na ntangu ya mbote na nsadisa ya Nto-Kimvuka, mpi sambu na nki yo mefwana nde beto lemfuka na kimvuka ya mpika?

⁶ Na mvu-nkama ya ntete, ntangu dyambu ya luyotisu kubasikaka na mvu 49 N.T.B., nto-kimvuka ya kimvuka yina ya ntete ya mpika kusalaka bisambu sambu  na kulomba lutwadisu ntangu bo vandaka kutadila dikambu yango mpi bo bakaka desizio yina kukatukaka mpi ya kuwakanaka ti Masonuku. Ntangu bo zabisaka desizio na bo na mukanda, mabundu kulemfukaka na lutwadisu yina bo pesaka bo mpi Nzambi kusakumunaka bo mingi. (Bisalu 15:6-15, 22-29; 16:4, 5) Kiteso mosi na ntangu na beto, na nsadisa ya Nto-Kimvuka na yandi, mpika ya kwikama memonisaka pwelele mambu bonso bukatikati ya Bukristu, busantu ya menga, mpi kusadila bima yina kelausaka ti makaya. (Yezaya 2:4; Bisalu 21:25; 2 Korinto 7:1) Yehowa kusakumunaka bantu na yandi sambu na bulemfu na bo na Ndinga na yandi mpi na mpika ya kwikama.

⁷ Bantu ya Nzambi kemonisaka mpi bulemfu na Mfumu na bo, Yezu Kristu, ntangu bo kelemfukilaka kimvuka ya mpika. Bulemfu ya mutindu yina mekumaka kutendula mambu mingi na ntangu na beto sambu Yezu meyalumunaka kiyeka na yandi, kaka mpila Yakobo kutubaka ntangu yandi vandaka kubela maladi ya kunataka yandi tii na lufwa.

Shilo Mekuma Mfumu ya Lunungu ya Ntoto

8. Inki mutindu mpi nki ntangu kiyeka ya Kristu kukumaka mingi?

⁸ Mbikudulu ya Yakobo kutubaka nde Shilo “ta yalaka bantu yonso.” Ya kyeleka, luyalu ya Kristu tasuka kaka ve na Izraele ya kimpeve. Yo tayala na zulu ya inki? Kusonga 11:15 kepesa mvutu nde: “Kiyeka ya kuyala nsi-ntoto yo kele na maboko ya Mfumu na beto Nzambi ti na maboko ya Mesia na yandi, ebuna yandi ta yalaka mvula na mvula!” Biblia ketuba nde Yezu kubakaka kiyeka mingi na nsuka ya “bantangu nsambwadi”​—“ntangu ya kupesamaka na makanda”​— na mvu 1914. a (Daniele 4:16, 17, NW; Luka 21:24, NW) Na mvula yina, “kuvanda” ya kukonda kumonana ya Kristu bonso Ntotila yina kele Mesia kuyantikaka, yo vandaka ntangu ya yandi yantikaka ‘kuyala bambeni na yandi.’​—Matayo 24:3; Nkunga 110:2.

9. Inki Yezu kusalaka ntangu yandi bakaka Kimfumu, mpi nki mambu dyambu yina yandi salaka kunatilaka bantu na nima, mingimingi balongoki na yandi?

⁹ Kima ya ntete ya Yezu kusalaka ntangu yandi bakaka kiyeka ya kimfumu kele kulosa Satana, muntu yina mezabanaka kibeni sambu na kukonda bulemfu na yandi, ti bademo na yandi “na ntoto.” Yantika na ntangu yina, bampeve yai ya mbi kepesaka bantu mpasi mingi kibeni na kiteso yina mesalamaka ntete ve, mpi bo kesalaka mambu yina kesalaka nde kulemfukila Yehowa kukuma dyambu mosi ya mpasi kibeni. (Kusonga 12:7-12; 2 Timoteo 3:1-5) Ya kyeleka, bantu ya ntete ya Satana kenwanisaka kele bapakulami ya Yehowa, “bayina yonso ke landaka bansiku ya Nzambi ti ke [na kisalu ya kuta kimbangi ya, NW] ya Yesu,” mpi bampangi na bo “mameme ya nkaka.”​—Kusonga 12:17; Yoane 10:16.

10. Kulungana ya nki bambikudulu ya Biblia kemonisa nde Satana tanunga ve na kunwanisa Bakristu ya kyeleka?

¹⁰ Kansi, Satana tanunga ve ata fyoti sambu yai kele “kilumbu ya Mfumu,” mpi ata kima mosi ve lenda kanga Yezu nzila na ‘kununga diaka.’ (Kusonga 1:10; 6:2) Mu mbandu, yandi takeba tii kuna ya bo tatula muntu ya nsuka ya bantu 144 000 ya Izraele ya kimpeve kidimbu na ilungi. Yandi tatanina mpi “ndonga mosi ya bantu mingi; ata muntu mosi ve lungaka kutanga bantu yina yonso. Bantu yina vandaka ya makanda yonso ti ya bandinga yonso ti ya bansi yonso.” (Kusonga 7:1-4,  9, 14-16) Kansi, bantu yai kele ya kuswaswana ti bampangi na bo ya kupakulama, sambu bo, bo tazinga na ntoto na nsi ya luyalu ya Yezu. (Daniele 7:13, 14) Mutindu bantu yai kezinga bubu yai na ntoto kele dezia nzikisa ya nene ya kemonisa nde ya kyeleka Shilo kele Mfumu na “kimfumu ya inza.”​—Kusonga 11:15.

Yai Kele Ntangu ya ‘Kulemfukila Nsangu ya Mbote’

11, 12. (a) Kaka nani mpamba taguluka ntangu ngidika ya bima yai tafwa? (b) Bikalulu ya nki mutindu keyelaka na bantu yina kele ti “mpeve ya inza”?

¹¹ Bantu yonso yina kezola kuzinga mvula na mvula fwete longuka bulemfu, sambu Biblia ketuba pwelele nde “bantu yina ke kuzaba Nzambi ve, bayina [kelemfukila, NW] ve Nsangu ya Mbote ya Mfumu na beto Yesu” taguluka ve na kilumbu Nzambi tavutula mbela. (2 Tesalonika 1:8) Kansi, inza yai ya mbi ti mpeve na yo ya kukolama na bansiku ti minsiku ya Biblia kesalaka nde beto vanda na mpasi na kulemfukila nsangu ya mbote.

¹² Biblia kebinga mpeve yai ya kukonda bulemfu na Nzambi nde “mpeve ya [inza, NW].” (1 Korinto 2:12) Ntangu yandi tendulaka mambu yina mpeve yango kenatilaka bantu, ntumwa Polo kusonikilaka Bakristu ya mvu-nkama ya ntete ya Efezo nde: “Na ntangu yina beno vandaka kulanda luzingu ya mbi ya nsi-ntoto yai; beno vandaka kulemfuka na mfumu yina ke yalaka bampeve kele na mupepe, mfumu yina kele mpeve ke yalaka ntangu yai bantu yina ke lemfukaka na Nzambi ve. Beto yonso mpi, beto vandaka kuzinga mpidina. Na luzingu na beto, beto vandaka kulanda nzala na beto ya kimuntu; beto vandaka kusala konso mambu yina ya nitu na beto ti mabanza na beto vandaka kuzola. Sambu na kimuntu na beto, Nzambi vandaka kuwila beto makasi mutindu yandi vandaka kuwila bantu ya nkaka makasi.”​—Efezo 2:2, 3.

13. Inki mutindu Bakristu lenda nunga mbote mpeve ya inza, mpi nki bambuma ya mbote yo kebutaka?

¹³ Kansi yo kele kyese na kumona nde Bakristu ya Efezo kubikalaka ve bampika ya mpeve yina ya kukonda bulemfu. Kansi, bo kumaka bana ya bulemfu ya Nzambi na mpila bo vandaka kulemfukila mpeve na yandi mpi kubakila yo mambote mingi. (Galatia 5:22, 23) Kiteso mosi bubu yai, mpeve ya Nzambi, disongidila, ngolo ya kuluta nene na ntoto, ke na kusadisa bamilio ya bantu na kulemfukila Yehowa na mpila nde “tii na nsuka,” bo vanda kaka na kivuvu na ‘mambu yina ya bo ke tulaka ntima.’​—Baebreo 6:11; Zakaria 4:6.

14. Inki mutindu Yezu kukebisaka Bakristu yonso ya kezinga na bilumbu ya nsuka sambu na kumonisa nde bo takutana na mambu yina tameka bulemfu na bo?

¹⁴ Dyaka, yibuka nde beto kele ti lutaninu ya ngolo ya Shilo, yina kumosi ti Tata na yandi tayambula ve mbeni, yandi vanda demo to muntu, na kumeka bulemfu na beto na kiteso yina meluta ngolo na beto. (1 Korinto 10:13) Yo yina, sambu na kusadisa beto na mvita ya kimpeve ya beto kenwana ti inza, Yezu kutubilaka mwa mambu ya sikisiki yina beto lenda kutana na yo na bilumbu yai ya nsuka. Yandi salaka yo na nsadisa ya mikanda nsambwadi, yina yandi pesaka ntumwa Yoane na mbonameso. (Kusonga 1:10, 11) Ya kyeleka, yo vandaka ti bandongisila ya mfunu sambu na Bakristu ya ntangu yina, kansi kulungana na yo ya nene kele na “kilumbu ya Mfumu,” tuka na mvu 1914. Yo yina, yo mefwana kibeni nde beto tula dikebi na bansangu yai! b

Beto Buya Kukulumusa Zola, Mansoni, Kuzola Bima ya Kinsuni

15. Sambu na nki beto fwete keba na dyambu yina kukuminaka dibundu ya Efezo, mpi nki mutindu beto lenda sala yo? (2 Piere 1:5-8)

¹⁵ Yezu kutindaka mukanda na yandi ya ntete na dibundu ya Efezo. Na nima ya kusikisa bo sambu na kukanga ntima na bo, Yezu kutubaka nde: “Kansi kima ya mono ke monaka nge mbi, yo yai: Nge ke zolaka mono diaka ve mutindu nge vandaka kuzola mono ntete.” (Kusonga 2:1-4) Kiteso mosi mpi bubu yai, Bakristu yankaka yina kuvandaka ntete kikesa mevidisaka zola ya ngolo ya bo vandaka na yo ntete sambu na Nzambi. Kuvidisa zola mutindu yina lenda kulumusa kinduku ya muntu kuvandaka na yo ti Nzambi mpi yo kelomba kutadila dyambu yango nswalu sambu na kusungika yo. Inki mutindu zola ya mutindu yina lenda kuma dyaka ngolo? Yo kelombaka kulonguka Biblia mbala na mbala, kukwenda na balukutakanu, kusamba, mpi kuyindulula. (1 Yoane 5:3) Ya kyeleka, yo kelombaka ‘kusala ngolo,’ kansi  yo kele mfunu kibeni na kusala yo. (2 Piere 1:5-8) Kana na nima ya kuditadila na masonga yonso nge mona nde zola na nge mekuma madidi, sungika mambu nswalu, mpi lemfuka na ndongisila yai ya Yezu: “Yindula fioti nki mutindu nge me balula mabanza na nge yo kele mbote diaka ve; kusala diaka masumu ve, kansi nge fweti sala mutindu nge vandaka kusala ntete.”​—Kusonga 2:5.

16. Inki bupusi ya mbi ya kimpeve kuvandaka na dibundu ya Pergame mpi ya Tiatira, mpi sambu na nki mambu ya Yezu zabisaka bo kele mfunu bubu yai?

¹⁶ Yezu kusikisaka Bakristu ya Pergame ti ya Tiatira sambu na kwikama, kukanga ntima, mpi kikesa na bo. (Kusonga 2:12, 13, 18, 19) Kansi, mupepe ya mbi ya bantu yankaka yina kuvandaka na mpeve ya mbi ya Balami mpi Yezabele, (bantu yai ya kukotisaka bizumba mpi lusambu ya Baale na Izraele ya ntama) kukotilaka bo. (Kutanga 31:16; 1 Bantotila 16:30, 31; Kusonga 2:14, 16, 20-23) Kansi nki beto lenda tuba sambu na ntangu na beto, disongidila na “kilumbu ya Mfumu?” Keti beto kemona bupusi ya mbi ya mutindu yai? Ee, sambu bizumba kele kikuma ya nene ya bo kebasisila bantu mingi na dibundu ya bantu ya Nzambi. Yo yina, yo kele kibeni mfunu nde beto buya kusala kinduku ti bantu yina kele na bupusi ya mbi, yo vanda na nganda to na kati ya dibundu! (1 Korinto 5:9-11; 15:33) Bantu yina kezola kulemfukila Shilo fwete buya bansaka ti mikanda ya mbi mpi pornografi yina bo kesongaka na Internet.​—Amosi 5:15; Matayo 5:28, 29.

17. Inki mutindu beto lenda fwanisa mabanza ya bantu ya Sarde mpi ya Laodisea ti mutindu Yezu vandaka kutadila kimpeve na bo?

¹⁷ Katula kaka bantu fyoti, Yezu kusikisaka ve dibundu ya Sarde ata fyoti. ‘Bantu vandaka kubanza’, to kumona yo bonso nde yo vandaka na moyo, kisi Yezu vandaka kumona yo ya “kufwa” sambu zola na yo ya kimpeve yonso kuvandaka dyaka ve. Bo vandaka kulemfukila nsangu ya mbote kaka na munoko. Yai kuvandaka kuvweza kibeni! (Kusonga 3:1-3) Yo vandaka mpi kiteso mosi sambu na dibundu ya Laodisea. Yo vandaka kudikumisa sambu na kimvwama na yo ya mingi, nde, “Mono kele mvwama,” kisi na meso ya Kristu yo vandaka ‘muntu mosi ya mawa mpenza, nsukami, kinkonga mpi ya kufwa-meso.’​—Kusonga 3:14-17.

18. Inki mutindu muntu lenda sala sambu kimpeve na yandi kukuma tiya ve madidi mpi ve na meso ya Nzambi?

¹⁸ Bubu yai, Bakristu yankaka yina kuvandaka ntete ya kwikama mebwaka mpi na kukonda bulemfu ya mutindu mosi. Yo lenda vanda nde bo mebikilaka mpeve ya inza nzila ya kuvila nde mambu ke na kukwenda nswalunswalu, mpi kimpeve na bo mekumaka tiya ve madidi mpi ve sambu na yina metala kulonguka Biblia, kisambu, balukutakanu ya Bukristu, mpi kisalu ya kusamuna. (2 Piere 3:3, 4, 11, 12) Yo kele mfunu kibeni nde  bantu ya mutindu yina kulemfukila Kristu na kubumbaka kimvwama na bo ya kimpeve sambu na bilumbu kekwisa​—ee, bo “kwisa na [Kristu] sambu na kusumba wolo yina ya bo me yidika na tiya, na mpila nde nge kuvanda mvwama”! (Kusonga 3:18) Kimvwama ya kyeleka ya mutindu yai ketendulaka ‘kusala mambu mingi ya mbote ti kuvanda bantu ya mbote yina kekabaka bima na bo na bantu yankaka.’ Na ntangu beto kebumba kimvwama na beto na mambu ya kimpeve, beto ‘kebumbaka kimvwama ya mbote ti ya ngolo sambu na bilumbu kekwisa na ntwala, sambu beto tabaka moyo ya kieleka.’​—1 Timoteo 6:17-19.

Bo Sikisaka Bo Sambu na Bulemfu na Bo

19. Inki mutindu Yezu kusikisaka Bakristu ya Simirne ti ya Filadelfia mpi nki ndongisila yandi kupesaka bo?

¹⁹ Mabundu ya Simirne ti ya Filadelfia kepesa beto mbandu ya bulemfu ya mbote mpenza, sambu na mukanda ya Yezu kusonikilaka bo, yandi tubilaka ve ata dyambu mosi ya mbi ya yandi monaka na bo. Sambu na bayina vandaka na Simirne, yandi tubaka nde: “Mono zaba mpasi na nge; mono zaba kinsukami na nge, kansi ya kieleka nge kele mvwama!” (Kusonga 2:9) Bo meswaswana kibeni ti bantu ya Laodisea, bayina vandaka kudikumisa sambu na kimvwama ya inza kansi bo vandaka kibeni bansukami! Ya kyeleka, Dyabulu kuvandaka ve na kyese na kumona muntu kekwikama mpi kelemfuka na Kristu. Yo yina Yezu kukebisaka nde: “Kuwa boma ve sambu na mpasi yina ya nge ta mona. Kuwa: Satana ta tula bantu ya nkaka na kati na beno na boloko sambu na kumeka beno; beno ta mona mpasi bilumbu kumi. Simba kaka lukwikilu na nge tii na kilumbu ya nge ta fwa, ebuna mono ta pesa nge moyo yina kele bonso mpu ya lukumu.” (Kusonga 2:10) Kiteso mosi, Yezu kusikisaka Bakristu ya Filadelfia nde: “Nge ke landaka malongi na mono [to, nge kelemfukilaka mono], nge buyaka mono ve. . . . Kubika fioti mono ke kwisa. Kansi nge fweti simba kaka mambu yina ya nge ke na yo, na mpila nde muntu ya nkaka kubotula ve matabisi na nge.”​—Kusonga 3:8, 11.

20. Inki mutindu bamilio ya bantu kezitisaka ndinga ya Yezu bubu yai, mpi ata bo kekutana na mambu ya nki mutindu?

²⁰ Na “kilumbu ya Mfumu,” yina kuyantikaka na 1914, bapakulami ya kwikama yina kubikalaka ti bampangi na bo mameme yankaka, yina mekuma bamilio bubu yai, kuzitisaka mpi ndinga ya Yezu na mpila bo samunaka na kikesa mpi bo kangamaka ngolo na kwikama na bo. Bonso bampangi na bo ya mvu-nkama ya ntete, bamingi memonaka mpasi sambu na bulemfu na bo na Kristu, to nkutu bo mekangaka bo na boloko mpi na bakan ya konsatrasio. Bantu yankaka kezitisaka ndinga ya Yezu na mutindu bo kesalaka nde ‘disu na bo kuvanda ya pete,’ (NW) ata bantu ya bupusi ya mbi ti ya bwimi mezyungaka bo. (Matayo 6:22, 23) Ya kyeleka, na konso kisika mpi na konso mambu ya bo kekutanaka na yo, Bakristu ya kyeleka, na nsadisa ya bulemfu na bo, kelanda na kupesa ntima ya Yehowa kyese.​—Bingana 27:11.

21. (a) Inki mukumba ya kimpeve kimvuka ya mpika talandaka na kulungisa? (b) Inki mutindu beto lenda monisa nde ya kyeleka beto kezolaka kulemfukila Shilo?

²¹ Mutindu beto kepusana na mpasi ya ngolo, “mpika ya kwikama mpi ya mayele” kele kaka na lukanu ya kukonda kukolama na Mfumu na yandi, Kristu. Yo yina yandi keyidikaka madya ya kimpeve na ntangu ya mbote sambu na bantu ya Nzambi. Yo yina, bika beto landa na kumonisa ntonda na organizasio ya nene ya teokrasi ya Yehowa mpi na bima yonso yina yo kepesa beto. Kana beto kesala mutindu yina, beto kemonisa bulemfu na beto na Shilo, yina tasakumuna bantu na yandi yonso ya bulemfu na ntangu yandi tapesa bo luzingu ya mvula na mvula.​—Matayo 24:45-47, NW; 25:40; Yoane 5:22-24.

[Banoti na nsi ya lutiti]

Keti Nge Keyibuka?

• Mutindu Yakobo yina vandaka kubela maladi ya kunataka yandi na lufwa kutubaka yo na mbikudulu, Inki kiyeka Yezu kuvandaka na yo?

• Inki mutindu beto kendimaka nde Yezu kele Shilo, mpi nki mpeve beto fwete buya?

• Inki ndongisila ya mbote ya ketadila bilumbu na beto kele na mikanda yina Yezu kutindilaka mabundu nsambwadi ya Kusonga?

• Na nki mitindu beto lenda landa mbandu ya Bakristu ya mabundu ya Simirne ti Filadelfia?

[Bangyufula ya disolo ya kulonguka]

[Bifwanisu ya kele na lutiti 28]

Yehowa kesakumunaka bantu na yandi sambu bo kelemfukilaka “mpika” ya kwikama

[Kifwanisu ya kele na lutiti 29]

Bupusi ya Satana kesalaka nde kulemfukila Nzambi kukuma kima mosi ya mpasi

[Bifwanisu ya kele na lutiti 31]

Kinduku ya ngolo ti Yehowa kesadisaka beto na kulemfukila yandi