Bangyufula ya Batangi

Kana bantu ya lusambu yankaka metekila beto nzo-Nzambi na bo, ebuna beto kumisa yo Nzo ya Kimfumu, keti yo lenda tendula nde beto mevukisa balukwikilu na beto ti bo?

Mbala mingi, Bambangi ya Yehowa kebuyaka kusumba bima ya mutindu yai na bantu ya lusambu yankaka. Kansi, kusumba nzo ya mutindu yina lenda tendula ve nde beto mevukisa balukwikilu na beto ti bo. Beto lenda mona yo bonso kima ya beto mesumba kaka mbala mosi imene. Sambu Dibundu ya Bambangi ya Yehowa kewakanaka ve ti kimvuka ya lusambu yankaka sambu na kutunga nzo ya lusambu yina bo yonso zole tasadilaka.

Kuvukisa balukwikilu kele kibeni nki na meso ya Yehowa? Beto tadila lutwadisu ya ntumwa Polo: “Beno kwenda kuvukana ve ti bamimpani, sambu mambu ya mutindu yina lenda salama ve. Nki [kinduku kele na kati ya lunungu mpi kufwa nsiku, NW]? Nki mutindu mwini lenda vukana ti mpimpa? Nki mutindu Kristo lenda wakana ti Satana? To nki mutindu mukristo lenda vukana ti mumpani? Nki mutindu Nzo-Nzambi lenda vukana ti biteki ya bamimpani? . . . Yo yina, Mfumu Nzambi ke tuba nde: ‘Beno fweti bikisa bo, beno fweti kabana ti bo. Beno kusimba ve bima yina kele ya kukangama na bansiku, Ebuna mono ta yamba beno.’” (2 Korinto 6:14-17) Inki Polo zolaka kutuba na bangogo “kinduku” mpi ‘kuvukana’?

Kinduku yina Polo ketubila pwelele ketadila lusambu mpi kusala bisalu ya kimpeve ti bansambidi ya biteki mpi bampani. Yandi kebisaka bantu ya Korinto na kukonda “kudia . . . na mesa ya bampeve ya mbi.” (1 Korinto 10:20, 21) Yo yina, kuvukisa balukwikilu kele kuvukisa lusambu to kuvanda ti kinduku ya kimpeve ti balusambu yankaka. (Kubasika 20:5; 23:13; 34:12) Kana beto mesumba nzo yina lusambu yankaka vandaka kusadila ntete, beto kesumbaka yo sambu na kuzwa nzo yina beto takumisa Nzo ya Kimfumu ya beto kele na yo mfunu. Na ntwala ya kusadila yo bonso Nzo ya Kimfumu, beto fwete katula konso kima yina bo tulaka sambu na lusambu ya luvunu. Na nima ya kuyidika yo imene, beto fwete pesa yo na Yehowa sambu na lukanu mosi kaka: kusambila yandi. Pana kuvukana to kinduku kele ve na kati ya lusambu ya kyeleka ti ya luvunu.

Na ntangu beno kewakana ntalu sambu na kusumba kisika ya mutindu yai, beno fweti fyotuna masolo ti bantu yina ketekila beno mpi beno fwete solula kaka mambu ya ketala kusumba nzo na bo. Bantu ya dibundu ya Bukristu fwete vila ve lukebisu ya Polo kupesaka nde beno “kuvukana ve ti bamimpani.” Ata beto kekudimonaka ve nde beto meluta bantu yina kelongaka balukwikilu yankaka, beto kebuyaka kuvukana ti bo to kulanda lusambu na bo. a

Inki kele dibanza ya Masonuku sambu na yina metala dibundu yina kefutila nzo yina kele ya kimvuka ya lusambu mosi? Kufutila nzo na bo talombaka kukutana mbala na mbala ti bo, mpi beto fwete buya dyambu ya mutindu yai. Ata yo kelomba kufutila nzo ya mutindu yina kaka sambu na dyambu mosi yina beto kezola kusala, kimvuka ya bankuluntu fwete tadila mambu yai melanda: Keti biteki ti bifwanisu ya lusambu tavanda na kati to na nganda ya nzo yango? Bantu ya kezingaka na nzyunga yina tamona beto nki mutindu kana beto sadila nzo yina? Keti yo tavanda ve sakuba sambu na bampangi yankaka na dibundu kana beto sadila nzo yina? (Matayo 18:6; 1 Korinto 8:7-13) Bankuluntu fwete tadila mambu yai mpi kubaka lukanu ya mbote. Bo fwete tadila mpi kansansa na bo mosi ti ya dibundu ya mvimba na ntangu bo kebaka lukanu ya kusumba nzo ya mutindu yina sambu na kukumisa yo Nzo ya Kimfumu.

[Noti na nsi ya lutiti]

[Kifwanisu ya kele na lutiti 30]

Nzo yai, ya kuvandaka ntete sinagoga, bo sumbaka yo mpi bo yidikaka yo sambu yo kuma Nzo ya Kimfumu