Bangyufula ya Batangi

Keti yo kele mbi na kusala nsaka ya mbongo ata yo kelomba kutula kaka mbongo fyoti?

Ndinga ya Nzambi ketubilaka ve bansaka ya mbongo na bunda, kansi yo ketubaka mambu mingi ya kemonisa nde bansaka yonso ya mbongo kewakanaka ve ti minsiku ya Biblia. a Mu mbandu, yo mezabanaka mbote nde bansaka ya mbongo kepusaka bantu na bilula-lula. Yo kele mfunu nde Bakristu kutadila dyambu yai, sambu Biblia ketuba nde “bantu yina ke vandaka na nzala ya kuvanda na konso kima yina” takota ve na Kimfumu ya Nzambi, mpi yo ketulaka bilula-lula ndonga mosi ti lusambu ya biteki.​—1 Korinto 6:9, 10; Kolosai 3:5.

Bansaka ya mbongo kepusaka dyaka bantu na kuvanda ti bwimi mpi ti mpeve ya mbi ya kutesana ti bankaka, to mpusa ya ngolo ya kununga. Ntumwa Polo kukebisaka bantu na mambu ya mutindu yai ntangu yandi sonikaka nde: “Beto lenda vanda na lulendo ve, beto lenda sosa ve mambu ya makasi na kati na beto, beto lenda tula meso na bima ya ngani ve.” (Galatia 5:26) Dyaka, bansaka ya mbongo kepusaka bantu yankaka na kutula ntima na shanse. Bantu ya kesalaka bansaka ya mbongo keyedisaka bibanga-banga ya mitindu yonso, yina bo keyindulaka nde yo lenda natila bo shanse. Mambu ya bo kesalaka keyibusa beto mutindu bantu ya Izraele ya kukonda kwikama vandaka ‘kusamba Gadi, nzambi ya menga ya mbote, ti Meni, nzambi ya menga ya mbi, mpi kunatila bo makabu ya mutindu na mutindu.’​—Yezaya 65:11.

Bantu yankaka lenda yindula nde kutula mbongo ya fyoti mpamba na ntangu bo kebula karte to jeu de six ti banduku to ti bantu ya dibuta kele kwayo mbi ve. Ya kyeleka, muntu yina ketula mbongo fyoti na nsaka lenda yindula nde yandi kele ve na bilula-lula, bwimi, to mpusa ya kutesana ti bankaka, to kusosa shanse. Kansi, inki mbuma yo lenda buta na muntu yina kebula ti yandi bansaka ya mbongo? Bantu mingi ya mekumisaka bansaka ya mbongo kisalu na bo yantikaka kutula ntete kaka mbongo fyoti sambu na ‘kusakana.’ (Luke 16:10) Bantu ya mutindu yina ya vandaka kumona nde bo kesala kaka nsaka kumaka kusala dyambu mosi ya kuluta mbi.

Dyambu yai ketadila mingimingi bana. Bana mingi kuvandaka na kyese ya kubula bansaka ya mbongo fyoti mpi bo kumaka na nzala ya kubula ya mbongo mingi. (1 Timoteo 6:10) Anketi mosi ya Kimvuka ya Bantu Yina Ketalaka Bantu ya Bansaka ya Mbongo kusalaka na Arizona na nsungi mosi ya nda na États-Unis kendimisa nde bantu mingi ya mekumaka kudipesa na bansaka ya mbongo yantikaka kubula yo na bumwana “na ntangu bo vandaka kutula mbongo fyoti na bansaka to na kubula bakarte ti banduku to bantu ya dibuta na bo.” Lapolo yankaka ketuba nde “bana keyantikaka bansaka ya mbongo na nzo, mbala mingi na bansaka ya karte ti dibuta mpi banduku.” Lapolo yango keyika nde “bana makumi tatu kati ya nkama ya kebulaka bansaka ya mbongo kuyantikaka yo na ntwala ya kulungisa bamvula kumi na mosi.” Anketi mosi (Why Do People Gamble Too Much​—Pathological and Problem Gambling) ketuba nde bana mingi kebulaka bansaka ti mbongo yina bo kebotulaka na bantu to ya bo kebakaka na mansoni. Yo kele dyambu mosi ya mawa kibeni na kumona nde kima ya lendaka kumonana na luyantiku nde yo kele mbi ve kekuma kigonsa ya nene na nima!

Sambu beto kezinga na inza mosi ya kele dezia ti mitambu mpi bampukumuna mingi, sambu na nki beto fwete sosa kudiyika dyaka yankaka? (Bingana 27:12) Kusala bansaka ya mbongo​—na kisika bana kele to ve, ya mbongo fyoti to mingi,—​kele kigonsa sambu na kimpeve mpi beto fwete buya yo. Bakristu yina kezolaka jeu de six to karte sambu na kulutisa mwa ntangu lenda sala mbote na kukonda kusonika matonsi na bo to bo lenda sala yo kaka sambu na kudisepedisa kukonda kusosa matonsi. Bakristu ya mayele yina kele na susi ya kimpeve na bo ti ya banduku na bo mpi ya bantu ya dibuta na bo kebuyaka bansaka ya mbongo, ata yo kelomba kutula mbongo fyoti.

[Noti na nsi ya lutiti]