Beto Yonso Kezolaka nde Bo Sikisa Beto

YO VANDAKA kilumbu ya mbote sambu na mwana-nkento mosi. Ata yo vandaka kulomba nde bo sungika yandi bantangu yankaka, kansi kilumbu yina, yandi monisaka bikalulu ya mbote mpenza. Kansi, na mpimpa, ntangu bo tulaka mwana-nkento yina na mbeto sambu na kulala, mama na yandi kuwaka yandi kedila. Ntangu mama na yandi kuyulaka yandi kikuma ya yandi kedidila, yandi vutulaka ti kudila nde: “Keti bubu mu vandaka ve mwana ya mbote?”

Ngyufula yina kupesaka mama yina mpasi mingi na ntima. Ntangu yonso yandi kesukininaka ve na kusungika mwana na yandi. Kansi na kilumbu yina, ata yandi monaka mutindu mwana-nkento yina kusalaka ngolo sambu na kumonisa bikalulu ya mbote, mama na yandi kutubilaka yandi ve ata ngogo mosi sambu na kusikisa yandi.

Mwana-nkento yai mpamba ve muntu kezolaka nde bo sikisa yandi mpi bo pesa yandi kikesa. Beto yonso kevandaka na mfunu na yo, kaka mutindu beto kezolaka nde bo longisila beto mpi bo sungika beto.

Inki mutindu beto kekudiwaka kana bo mesikisa beto? Keti yo kesepedisaka beto ve mpi kepesaka beto ve kikesa? Mpidina beto kekudiwaka nde muntu metulaka beto dikebi, yandi kezolaka beto. Yo kendimisaka beto nde kima yina beto salaka kuvandaka na valere mpi yo kepusaka beto na kusala dyaka ngolo na bilumbu kekwisa. Yo yina mpila ya kuyituka kele ve na kumona nde kana muntu kesikisa beto na masonga yonso, beto kewaka mbala mingi mpusa ya kupusana penepene na muntu yina kebaka ntangu ya kutuba kima mosi ya kesyamisa beto.​—Bingana 15:23.

Yezu Kristu kubakisaka mfunu ya kusikisa bantu. Na kingana ya batalanta, Mfumu (yina vandaka kifwani ya Yezu yandi mosi) kusikisaka na kyese yonso bampika ya kwikama yina yonso zole, yandi songaka konso mpika nde: “Mbote; nge kele muntu mosi ya mbote ya mono lunga kutula ntima!” Bangogo yina kepesa kyese na ntima! Ata ngolo na bo kuvandaka mutindu mosi ve mpi konso muntu kusalaka na kiteso ya ngolo na yandi, Yezu kusikisaka bo mutindu mosi.​—Matayo 25:19-23.

Yo yina, bika beto yibuka mama ya mwana-nkento yina. Beto fwete vingila ve nde bantu kudila na ntwala beto sikisa bo. Kansi, beto fwete sala ngolo sambu na kusosa baokazio ya kusikisa. Ya kyeleka, beto kele na bikuma ya mbote ya kusikisa bankaka na baokazio yonso.