Bakristu Kevandaka na Mfunu ya Bampangi na Bo Bakristu
Bakristu Kevandaka na Mfunu ya Bampangi na Bo Bakristu
“Beto yonso kele bandambu ya Nitu mosi.”—EFEZO 4:25.
1. Inki ansiklopedi mosi ketuba sambu na nitu ya muntu?
NITU ya muntu kusalamaka na mutindu mosi ya kuyituka kibeni! Ansiklopedi mosi (The World Book Encyclopedia) ketuba nde: “Bantangu yankaka bantu kebingaka nitu ya muntu nde mashini ya bo meyidikaka mbote kibeni. Na kutuba ya mbote, nitu ya muntu kele mashini ve. Kansi beto lenda fwanisa yo na mashini na mitindu mingi. Nitu kele na bitini mingi bonso mashini. Konso kitini ya nitu, kele bonso konso kitini ya mashini, kesalaka bisalu ya mfunu. Kansi bitini yonso kesalaka na bumosi mpi yo kesalaka nde nitu to mashini kusala mbote.”
2. Na nki mitindu nitu ya muntu ti dibundu ya Bukristu kele kiteso mosi?
2 Ya kyeleka, nitu ya muntu kele na bitini mingi, mpi konso kitini kelungisaka kima mosi ya mfunu. Bitini yonso kele mfunu, yo vanda kamusisa ya fyoti, to kitini yankaka ya nitu. Kiteso mosi mpi, konso Mukristu ya dibundu lenda yika kima na mavimpi mpi na kitoko ya kimpeve ya dibundu. (1 Korinto 12:14-26) Ata yo kele nde muntu mosi ve na dibundu lenda kudimona nde yandi meluta bankaka, muntu mosi mpi ve lenda yindula nde yandi kele na mfunu ve.—Roma 12:3.
3. Inki mutindu Efezo 4:25 kemonisa nde Bakristu kevandaka na mfunu ya bampangi na bo Bakristu?
3 Bakristu kevandaka na mfunu ya bampangi na bo mutindu bitini ya nitu kevandaka na mfunu ya bitini yankaka. Ntumwa Polo kuzabisaka bampangi yina vandaka Bakristu ya kupakulama na mpeve nde: “Beno bika luvunu! Konso muntu kutubila mpangi na yandi mambu ya kieleka, sambu beto yonso kele bandambu ya Nitu mosi.” (Efezo 4:25) Sambu bo ‘kele bandambu ya nitu mosi,’ bantu ya Izraele ya kimpeve yina kele ‘Nitu ya Kristo,’ kesolulaka mpi kewakanaka mbote bo na bo. Ya kyeleka, konso muntu na kati na bo kele bonso ndambu ya nitu ya bankaka. (Efezo 4:11-13) Bakristu ya masonga, ya kesala kumosi ti bo mpi yina kele na kivuvu ya kuzinga na ntoto kele na kyese na kuvanda kimvuka mosi ti bo.
4. Na nki mitindu beto lenda sadisa bantu ya mpa?
4 Konso mvula, mafunda ya bantu yina kevandaka na kivuvu ya kuzinga na paladisu ya ntoto kebakaka mbotika. Bantu yankaka ya dibundu kesadisaka bo na kyese yonso na ‘kukwenda na ntwala na kulonguka malongi ya kimbuta.’ (Baebreo 6:1-3) Lusadisu yai lenda vanda kupesa bamvutu ya Masonuku na bangyufula to kusadisa bo na kisalu ya kusamuna. Beto lenda sadisa bantu ya mpa na mbandu na beto ya mbote ya kupesa bakomantere mbala na mbala na balukutakanu ya Bukristu. Na ntangu ya mpasi, beto lenda pesa bo mpi kikesa. (1 Tesalonika 5:14, 15) Beto fwete sosa mitindu ya kusadisa bankaka na ‘kulanda mambu ya kieleka.’ (3 Yoane 4) Ata beto kele toko to mbuta, beto meyantika kulanda kyeleka ntama mingi ve to tuka bamvula mingi, beto lenda sala mambu yina lenda yedisa mambote ya kimpeve ya bampangi na beto Bakristu, mpi bo kele na mfunu na beto.
Bo Pesaka Lusadisu ya Kuvandaka Mfunu
5. Inki mutindu Akilasi ti Prisila kusadisaka Polo?
5 Bankwelani yina kele Bakristu kele mpi na kati ya bayina kevandaka na kyese ya kusadisa bampangi na bo Bakristu. Mu mbandu, Akilasi ti nkento na yandi, Prisila, kusadisaka Polo. Bo yambaka yandi na nzo na bo, bo tungaka batenta ti yandi, mpi bo sadisaka yandi na kutunga dibundu ya mpa na Korinto. (Bisalu 18:1-4) Na mutindu ya kubumbana, bo tulaka nkutu luzingu na bo na kigonsa sambu na Polo. Bo vandaka kuzinga na Roma ntangu Polo songaka Bakristu ya bwala yai nde: “Beno pesa Prisila ti Akilasi mbote; beto ke salaka kisalu ya Yesu Kristo nzila mosi ti bo. Bo zolaka kufwa sambu na mono. Mono ke pesaka bo mersi; mono mpamba ve, kansi ti badibundu yonso ya bantu yina kele Bayuda ve, bo mpi ke pesaka bo mersi.” (Roma 16:3, 4) Bonso Akilasi ti Prisila, Bakristu ya bubu yai ketungaka mabundu mpi kesadisaka bampangi na bo Bakristu na mitindu mingi, nkutu bantangu yankaka bo ketulaka luzingu na bo na kigonsa na ntangu bo kebuyaka kubasisa bansadi yankaka ya Nzambi na maboko ya bambeni yina lenda nyokula bo to kufwa bo.
6. Inki kusadisaka Apolo na kusala kisalu mbote?
6 Prisila ti Akilasi kusadisaka mpi Apolo, Mukristu yina zabaka mpenza kutuba mpi yina vandaka kulonga bantu ya Efezo mambu ya Yezu Kristu. Na ntangu yina, Apolo kuzabaka kaka mambu yina metala mbotika ya Yoane yina vandaka kidimbu ya kubalula ntima na masumu yina bantu kusalaka na kuwakana ya Nsiku. Ntangu Akilasi ti Prisila kubakisaka nde Apolo kuvandaka na mfunu ya lusadisu, bo “songaka yandi nzila ya Nzambi diaka mbote-mbote.” Ziku bo tendudilaka yandi nde mbotika ya Bukristu vandaka kulomba kudindisa muntu na masa mpi mpeve santu vandaka kutyamuka na zulu ya muntu yango. Apolo kusadilaka mambu ya yandi longukaka. Na nima, ntangu yandi kwendaka na Akaya, “yandi sadisaka mingi bantu yina kumaka bakristo sambu na kuzola ya Nzambi ke zolaka bo. Yandi vandaka kusonga Bayuda mbote-mbote na meso ya bantu yonso nde bo ke vilaka, yandi mpi songaka bo na Mukanda ya Nzambi nde ya kieleka Yesu kele Mesia.” (Bisalu 18:24-28) Mbala mingi, bakomantere ya bampangi kesadisaka beto na kubakisa Ndinga ya Nzambi mbote. Na dyambu yai mpi, beto kele na mfunu ya bampangi na beto.
Kupesa Lusadisu ya Kinsuni
7. Inki bantu ya Filipi kusalaka na ntangu bampangi na bo Bakristu kukondaka bima ya kinsuni?
7 Bantu ya dibundu ya Bukristu ya Filipi kuzolaka Polo mingi kibeni mpi bo tindilaka yandi bima yina yandi vandaka na yo mfunu na ntangu yandi vandaka na Tesalonika. (Filipi 4:15, 16) Ntangu bampangi ya Yeruzalemi kuvandaka na mfunu ya lusadisu ya bima ya kinsuni, Bakristu ya Filipi kumonisaka luzolo ya mbote ya kutula makabu na kiteso yina kulutaka nkutu bamwaye na bo. Polo kupesaka mersi mingi sambu na mpeve ya mbote ya bampangi na yandi ya babakala ti ya bankento ya Filipi na mpila nde yo pusaka yandi na kutuba nde bo kele mbandu sambu na bakristu yankaka.—2 Korinto 8:1-6.
8. Inki mpeve Epafrodite kumonisaka?
8 Ntangu Polo kuvandaka na boloko, bampangi ya Filipi kutindilaka yandi bakado ya bima ya kinsuni mpamba ve, kansi mpi kinati-nsangu na bo Epafrodite. Polo kutubaka nde: “[Epafrodite] ndimaka na kufwa sambu na kupesa mono lusadisu yina ya beno mosi monaka mpila ve ya kupesa.” (Filipi 2:25-30; 4:18) Bo kezabisa beto ve kana Epafrodite kuvandaka nkuluntu to nsadi ya kisalu. Kansi, yandi vandaka Mukristu mosi ya vandaka na mpeve ya kuditambika mpi ya kusadisa, mpi Polo kuvandaka mpenza na mfunu na yandi. Keti na dibundu na beno, beno kele na muntu mosi yina kele bonso Epafrodite?
Bo ‘Pesaka Lusadisu ya Kikesa Mingi’
9. Inki mbandu Aristarke kupesaka?
9 Bonso Akilasi ti Prisila, mpi Epafrodite, bampangi ya lutondo ya babakala ti ya bankento kele na mfunu mingi na konso dibundu. Bampangi na beto yankaka ya Bakristu lenda vanda mpenza bonso Mukristu ya mvu-nkama ya ntete na zina ya Aristarke. Yandi ti bampangi yankaka kupesaka “[lusadisu, NW] ya kikesa mingi,” mbala yankaka bo pesaka yandi kikesa ya kukatula basusi to bima ya kinsuni ya mfunu, mambu ya luzingu ya yandi vandaka na yo mfunu. (Kolosai 4:10, 11) Na ntangu Aristarke kusadisaka Polo, yandi monisaka nde yandi kele nduku ya kyeleka na ntangu ya mpasi. Yandi vandaka mutindu ya muntu yina bo ketubila na Bingana 17:17: “Banduku ke zolanaka konso ntangu, bampangi ke sadisanaka na ntangu ya mpasi.” Keti beto yonso fwete sala ve ngolo sambu na kuvanda ‘lusadisu ya kikesa’ sambu na bampangi na beto Bakristu? Mingimingi beto fwete sadisa bayina kele na mpasi.
10. Inki mbandu Piere kupesaka sambu na Bakristu yina kele bankuluntu?
10 Mingimingi bankuluntu fwete vandaka lusadisu ya kepesa kikesa na bampangi na bo ya babakala ti ya bankento. Kristu kuzabisaka ntumwa Piere nde: “Pesa bampangi na nge kikesa.” (Luka 22:32) Piere kukukaka na kusala yo sambu yandi vandaka na bikalulu ya ngolo mpenza mingimingi na nima ya lufutumuku ya Yezu. Bankuluntu, beno sala mpenza ngolo sambu na kusala mutindu mosi na luzolo yonso mpi na zola, sambu bampangi na beno Bakristu kele na mfunu na beno.—Bisalu 20:28-30; 1 Piere 5:2, 3.
11. Inki mutindu beto lenda baka mambote na kulanda mbandu ya mpeve ya Timoteo?
11 Timoteo yina vandaka kutambula ti Polo kuvandaka nkuluntu mosi ya vandaka kudibanza mingi sambu na Bakristu yankaka. Ata mavimpi vandaka kuyangisa yandi, Timoteo kumonisaka lukwikilu ya ngolo mpi ‘yandi salaka ti Polo sambu na Nsangu ya Mbote.’ Yo yina, ntumwa Polo kukaka kutubila bantu ya Filipi nde: “Kaka yandi mpamba muntu ke na ngindu bonso ya mono, kaka yandi muntu ke yindulaka beno na ntima ya kieleka.” (Filipi 2:20, 22; 1 Timoteo 5:23; 2 Timoteo 1:5) Beto lenda vanda lusakumunu sambu na bampangi yina kesambilaka Yehowa kana beto kemonisa mpeve bonso yina ya Timoteo. Ya kyeleka, beto fwete kanga ntima na ntwala ya bifu na beto mosi mpi na ntwala ya bampasi ya mutindu na mutindu, kansi beto mpi lenda mpi fwete monisa lukwikilu ya ngolo ti kuvanda na susi ya kuzola bampangi na beto ya kimpeve ya babakala ti ya bankento. Beto fwete yibuka ntangu yonso nde bo kele na mfunu na beto.
Bankento Yina Kusadisaka Bankaka
12. Inki mambu beto lenda longuka na mbandu ya Dorkasi?
12 Dorkasi kuvandaka mosi na kati ya bankento ya vandaka kudibanza sambu na bankaka. Ntangu yandi fwaka, balongoki kwendaka kubaka Piere ebuna bo nataka yandi na shambre mosi ya zulu. Kuna, “bankento yonso ya bamifwidi kwisaka kutelama penepene na yandi. Bo vandaka kudila, bo vandaka mpi kusonga basimisi ti bakazaka yina ya Dorkasi vandaka kutunga ntangu yandi vandaka na moyo.” Piere kufutumunaka Dorkasi mpi ntembe kele ve nde yandi landaka na ‘kusala mambu ya mbote mpi kusadisa bansukami.’ Bubu yai, na dibundu ya Bukristu, bankento yina kele bonso Dorkasi kesalaka bilele ti mambu yankaka ya kemonisaka zola na bo na bantu yina kele na mpasi. Ntembe kele ve nde, bisalu na bo ya mbote fwete vanda ntetentete ya kutula mambote ya Kimfumu na kisika ya ntete mpi kusala kisalu ya kukumisa bantu balongoki.—Bisalu 9:36-42; Matayo 6:33; 28:19, 20.
13. Inki mutindu Lidia kumonisaka susi na yandi sambu na bampangi Bakristu?
13 Nkento mosi ya vandaka kubanga Nzambi na zina ya Lidia vandaka kusadisa bankaka. Yandi vandaka muntu ya bwala Tiatira, mpi yandi vandaka kuzinga na Filipi ntangu Polo kulongaka kuna penepene na mvu 50 ya T.B. Ziku Lidia kuvandaka prozelite mosi ya Muyuda, kansi mbala yankaka Bayuda kuvandaka mingi ve na Filipi mpi sinagoga kuvandaka ve. Nkento yai ti bankento yankaka vandaka kuvukana penepene na masa sambu na kusambila ntangu ntumwa kulongaka bo nsangu ya mbote. Disolo yango ketuba nde: “Mfumu Nzambi kangulaka mabanza [ya lidia] sambu yandi kuwa mambu ya Paulo vandaka kutuba. Beto botikaka yandi ti bantu ya nzo na yandi mpi, ebuna yandi bondilaka beto nde: ‘Kana beno me mona nde ya kieleka mono me ndima Mfumu Yesu na ntima na mono, beno kwisa kuvanda na nzo na mono.’” (Bisalu 16:12-15) Sambu Lidia vandaka kuzola kusadila bankaka mambu ya mbote, yandi ndimisaka Polo ti banduku na yandi na kuvanda na nzo na yandi. Ya kyeleka beto kevandaka na kyese mingi na ntangu Bakristu ya ntima ya mbote mpi ya kele na zola kemonisaka kikalulu ya kuyamba ya mutindu mosi bubu yai!—Roma 12:13; 1 Piere 4:9.
Baleke: Beto Kele na Mfunu na Beno Mpi
14. Inki mutindu Yezu Kristu vandaka kuzinga ti bana?
14 Dibundu ya Bukristu kuyantikaka ti Mwana ya Nzambi, Yezu Kristu, muntu ya mbote mpi ya lutondo. Bantu kuvandaka na kyese na lweka na yandi sambu yandi vandaka kuzola bo ti kuwila bo mawa. Kilumbu mosi, ntangu bantu yankaka yantikaka kunatila Yezu bana na bo, balongoki na yandi sosaka kubuyisa bo. Kansi Yezu kutubaka nde: “Beno bikisa bana bo kwisa awa na mono. Beno kanga bo nzila ve, sambu Kimfumu ya Nzambi kele ya bantu yina kele bonso bo. Mono ke tubila beno mambu ya kieleka: Konso muntu me ndima Kimfumu ya Nzambi ve mutindu mwana ke ndimaka yo, yandi ta kota na Kimfumu yina ata fioti ve.” (Marko 10:13-15) Sambu na kubaka balusakumunu ya Kimfumu, beto fwete kudikulumusa mpi kundima nde bo longa beto bonso bana ya fyoti. Yezu kumonisaka zola na yandi na bana na ntangu yandi bakaka bo na maboko na yandi sambu na kusakumuna bo. (Marko 10:16) Ebuna nki beto lenda tuba sambu na beno baleke ya bubu yai? Beno zaba nde dibundu kezolaka beno mpi yo kele na mfunu na beno.
15. Inki mambu ya metala luzingu ya Yezu kele na Luka 2:40-52, mpi nki mbandu yandi bikilaka baleke?
15 Ntangu Yezu kuvandaka leke, yandi monisaka zola sambu na Nzambi ti Masonuku. Ntangu yandi vandaka na bamvula 12, yandi ti bibuti na yandi, Yozefi ti Maria, kusalaka nzyetolo katuka na bwala na bo tii na Yeruzalemi sambu na kuta nkinsi ya Paki. Na ntangu bo vutukaka, bibuti ya Yezu kubakisaka nde Yezu kuvandaka ve na kati ya bantu yina bo salaka na bo nzyetolo. Nsukansuka, bo kwendaka kumona yandi ya kuvanda na suku mosi ya tempelo, yandi kewidikila balongi ya Bayuda mpi keyula bo bangyufula. Ntangu yandi yitukaka na kumona nde Yozefi ti Maria kubakisaka ve kisika ya bo fwete mona yandi, Yezu kuyulaka nde: “Beno zabaka ve nde mono fweti vanda na Nzo ya Tata na mono?” Yandi vutukaka na bwala na bo ti bibuti na yandi, yandi landaka na kulemfukila bo, mpi na kuyela na mayele ti na nitu. (Luka 2:40-52) Yezu kubikilaka baleke na beto mbandu mosi ya mbote mpenza! Ya kyeleka, bo fwete lemfukila bibuti na bo mpi kuvanda na nzala ya kulonguka mambu ya kimpeve.—Kulonga 5:16; Efezo 6:1-3.
16. (a) Inki bana-babakala mingi kutubaka na ndinga ya ngolo ntangu Yezu vandaka kulonga na tempelo? (b) Inki dibaku ya mbote Bakristu kele na yo bubu yai?
16 Ntangu yai ya nge kele leke, ziku nge ketaka kimbangi ya Yehowa na nzo-nkanda mpi nzo na nzo ti bibuti na nge. (Yezaya 43:10-12; Bisalu 20:20, 21) Ntangu Yezu vandaka kuta kimbangi mpi kubelula bantu na tempelo ntangu fyoti na ntwala ya lufwa na yandi, bana-babakala yankaka kutubaka na ndinga ya ngolo nde: “Lukumu kuvanda na Mwana ya Davidi!” Sambu mambu yai kupesaka bo makasi, bamfumu ya banganga-Nzambi ti balongi ya bansiku kuyulaka nde: “Nge ke wa mambu ya bo ke tuba?” Yezu kuvutulaka nde: “Mbote-mbote. Keti beno me tangaka ntete ve mambu yai na Mukanda ya Nzambi nde: ‘Nge me longaka bana yina ke nwaka mabele ya bamama na bo, ti bana ya nkaka, sambu bo kupesa nge lukumu’?” (Matayo 21:15-17) Bonso bana yina, beno baleke ya kele na dibundu, beno kele na dibaku ya nene ya kukumisa Nzambi ti Mwana na yandi. Beto kezolaka beno mpi beto kele na mfunu ya kusala ti beno kumosi na kisalu ya kusamuna Kimfumu.
Ntangu Mpasi Mebwa
17, 18. (a) Sambu na nki Polo kubongisaka na mpila nde bampangi kutula makabu sambu na Bakristu ya Yudea? (b) Inki mbuma makabu ya luzolo ya mbote ya Bakristu ya Yudea kutulaka kubutaka na Bakristu ya Bayuda ti ya Makanda?
17 Ata beto kele na luzingu ya nki mutindu, zola kepusaka beto na kusadisa bampangi na beto Bakristu yina kele na mpasi. (Yoane 13:34, 35; Yakobo 2:14-17) Zola ya Polo sambu na bampangi na yandi ya babakala ti ya bankento kupusaka yandi na kutwadisa kisalu ya kukongula bima sambu na mabundu ya Akaya, Galatia, Macedonia, mpi ya distrike ya Azia. Munyokudi, bamvita, ti nzala yina balongoki ya Yeruzalemi kukutanaka na yo lendaka kubasisa mambu yina Polo kubingaka nde “bampasi,” “kumonisa bo mpasi,” mpi “kubotula bima na [bo].” (Baebreo 10:32-34; Bisalu 11:27–12:1) Yo yina, yandi kudipesaka na kisalu ya kukutika mbongo sambu na Bakristu ya Yudea yina kuvandaka bansukami.—1 Korinto 16:1-3; 2 Korinto 8:1-4, 13-15; 9:1, 2, 7.
18 Makabu ya luzolo ya mbote yina bo pesaka sambu na basantu ya Yudea, kumonisaka nde kimpangi ya ngolo vandaka kukangisa bantu ya vandaka kusambila Yehowa bayina kuvandaka Bayuda ti bayina kukatukaka na Makanda. Makabu yina Bakristu ya Makanda kupesaka kuvandaka mpi mutindu ya kumonisa ntonda na bampangi na bo ya Yudea sambu na kimvwama ya kimpeve ya bampangi yina kupesaka bo. Mpidina, bo yonso kupesanaka bima na kinsuni ti na kimpeve. (Roma 15:26, 27) Makabu yina Bakristu kepesaka bubu yai sambu na bampangi na bo Bakristu yina kele na mpasi, bo kesalaka yo na luzolo ya mbote mpi zola kepusaka bo na kusala yo. (Marko 12:28-31) Beto kevandaka dyaka na mfunu ya bampangi na beto na dyambu yai sambu beto yonso kuvanda kiteso mosi na mpila nde ‘muntu yina kele na bima fyoti kuvanda na yo kiteso ya kulunga.’—2 Korinto 8:15.
19, 20. Pesa mbandu mosi ya kemonisa mutindu bantu ya Yehowa kusadisaka bampangi na bo na ntangu ya bisumbula.
19 Sambu beto kezabaka nde Bakristu kele na mfunu ya bampangi na bo, beto kesukininaka ve na kusadisa bampangi na beto ya babakala ti ya bankento yina beto kele na bo lukwikilu mosi. Mu mbandu, yindula mambu yina kusalamaka ntangu ntoto kunikanaka mpi bantoto ti matadi ya ngumba kubwaka na El Salvador na luyantiku ya mvu 2001. Rapore mosi ketuba nde: “Bampangi kunataka bima na bandambu yonso ya El Salvador. Kimvuka ya bampangi ya kukatukaka na Guatemala, na États-Unis, ti na Kanada kwisaka kupesa beto maboko. . . . Na nsungi mosi ya nkufi, bo tungaka banzo 500 mpi Banzo ya Kimfumu tatu. Kisalu ya ngolo yina bampangi yai kusalaka na mpeve ya kuditambika mpi na bumosi, kutaka kimbangi ya nene.”
20 Rapore mosi ya kukatukaka na Afrika ya Sudi ketuba nde: “Potopoto yina kubebisaka kitini ya nene ya Mozambique kukuminaka mpi bampangi na beto mingi ya Bakristu. Filiale ya Mozambique kubongisaka programe ya kupesa bo bima mingi ya bo vandaka na yo mfunu. Kansi bo lombaka nde beto tindila bo bilele ya mbote ya kulwata dezia sambu na bampangi yina kuvandaka na mpasi. Beto kutikaka bilele mingi, na mpila nde beto tindilaka bampangi na beto ya Mozambique kontenere mosi ya bilele ya bametre 12.” Ya kyeleka, na mitindu yai mpi, beto kele na mfunu ya bampangi na beto.
21. Inki beto tatadila na disolo yina kelanda?
21 Mutindu beto monaka yo na luyantiku, bitini yonso ya nitu ya muntu kele mfunu. Ntembe kele ve nde yo kele mutindu mosi na dibundu ya Bukristu. Bantu yonso ya kele na kati na yo kele na mfunu ya bampangi na bo. Bo kele dyaka na mfunu ya kusala na bumosi. Disolo yina kelanda tamonisa mambu yina kesalaka nde bo kuka kusala mutindu yina.
Inki Mutindu Nge Tavutula?
• Inki kuwakana kele na kati ya nitu ya muntu ti dibundu ya Bukristu?
• Inki Bakristu ya ntete kusalaka ntangu bampangi na bo kuvandaka na mfunu ya lusadisu?
• Tanga bambandu ya Masonuku yina kemonisa nde Bakristu kevandaka na mfunu ya bampangi na bo mpi bo kekudisadisaka bo na bo?
[Bangyufula ya disolo ya kulonguka]
[Kifwanisu ya kele na lutiti 10]
Akilasi ti Prisila vandaka kusadisa bantu yankaka
[Bifwanisu ya kele na lutiti 12]
Bantu ya Yehowa kesadisanaka bo na bo mpi bo kesadisaka bantu yankaka na bantangu ya mpasi