Bangyufula ya Batangi
Bangyufula ya Batangi
Keti beto fwete lungisa ntangu yonso balusilu ya beto kesalaka na Nzambi?
Na Biblia, lusilu kele dilaka ya mfunu yina muntu kesalaka na Nzambi sambu na kusala kima mosi, kupesa dikabu, kuyantika kusala kisalu mosi, to kubuya kusala mwa mambu yina nsiku kebuyisaka ve. Biblia kele ti masolo ya ketubila balusilu ya bantu zolaka kulungisa kaka kana Nzambi kusala ntete kima mosi sambu na bo. Mu mbandu, Ana, mama ya profete Samuele, “sambaka Mfumu Nzambi ti kudila nde: ‘Mfumu Nzambi, [Mfumu ya basoda] . . . . Kuvila mono muntu na nge ve, wila mono mawa. [“Kana nge,” NW] pesa mono mwana, mono me sila nde mono ta pesa yandi na maboko na nge na luzingu na yandi yonso tii kuna; nsuki na yandi mpi bo ta zenga yo ve ata fioti.’” (1 Samuele 1:10, 11) Biblia ketubilaka mpi balusilu yina bantu kesalaka na luzolo yonso. Keti beto fwete lungisa balusilu yonso ya beto kesalaka na Nzambi?
Salomo Ntotila ya Izraele ya ntama ketuba nde: “Kana nge me sila nde nge ta pesa kima na Nzambi, na ntangu yo yina sala yo nswalu.” Yandi keyika nde: “Sala mambu ya nge ke sila. Mbote na kukonda kusila mambu nde nge ta lungisa yo, kansi mbote ve na kusila yo kukonda kulungisa yo.” (Longi 5:3, 4) Nsiku yina Nzambi pesaka Izraele na nzila ya Moize ketuba nde: “Kana nge me zenga nde nge ta pesa Mfumu Nzambi, Nzambi na nge, kima, kuvingila ve na kusala yo, sambu Mfumu Nzambi ta yula nge mambu yango; yo mpi, yo kele masumu kana nge sala yo ve.” (Kulonga 23:22) Yo kele pwelele nde, kusila na kupesa Nzambi kima kele dyambu mosi ya kusakana na yo ve. Muntu fwete vanda na kikuma ya mbote ya kusala yo, mpi muntu yina kesala lusilu yango fwete vanda ve na dute na yina metala ngolo na yandi ya kulungisa mambu yonso yina yandi tubaka na lusilu na yandi. Kana ve, yo kele mbote mingi nde yandi kusala ve lusilu. Kansi, kana yandi mesala lusilu, keti yandi fwete lungisa yo kaka?
Inki beto lenda tuba kana lusilu vandaka kulomba nde muntu kusala dyambu ya yandi mekwisa kubakisa na nima nde yo kewakana ve ti luzolo ya Nzambi? Mu mbandu, kana lusilu yina zolaka kunata yandi na kuvukisa mansoni ti lusambu ya kyeleka? (Kulonga 23:18) Yo kele pwelele nde yandi fwete lungisa ve lusilu ya mutindu yina. Dyaka, Nsiku ya Moize vandaka kutuba nde kana nkento mosi mesala lusilu, tata to bakala na yandi lendaka kubuya yo.—Kutanga 30:3-15.
Beto baka mpi mbandu ya muntu yina kusalaka lusilu na Nzambi nde yandi takwela ve kansi ntangu yai yo mekumina yandi mpasi. Sambu na lusilu yina yandi bakaka, yandi lenda yantika kudiwa nde kana yandi lungisa yo, yo lenda nata yandi na kufwa minsiku ya Nzambi na yina metala bikalulu ya mbote. Keti yandi fwete sala kaka yonso na kulungisa lusilu na yandi? Keti yo tavanda mbote ve nde yandi kubuya na kulungisa lusilu na yandi sambu yandi kubwa ve na mutambu ya mansoni, na kisika ya kulomba nde Nzambi kuwila yandi mawa mpi yandi kulolula yandi? Kaka yandi mosi muntu lenda baka desizio na dyambu yai. Ata muntu yankaka ve lenda bakila yandi yo.
Inki beto lenda tuba sambu na muntu yina kusalaka lusilu kansi na nima yandi mebakisa nde yandi salaka yo kukonda kuyindula? Keti yandi fwete sosa kaka mpila ya kulungisa yo? Yo vandaka ve pete sambu na Yefte na kulungisa dyambu yina yandi silaka na Nzambi, kansi yandi lungisaka yo. (Bazuzi 11:30-40) Kukonda kulungisa lusilu yina muntu salaka lenda sala nde Nzambi kuwa “makasi” mpi kufwa kisalu ya muntu yina kusalaka. (Longi 5:5) Kana muntu kebaka ve dyambu ya kulungisa lusilu na yandi na valere, Nzambi lenda buya yandi.
Yezu Kristu kutubaka nde: “Tuba kaka nde: ‘E’ to ‘Ve,’ mambu yina ya nkaka ya nge lenda tuba, yo ke katukaka na Muntu ya Mbi.” (Matayo 5:37) Mukristu fwete vanda ve kaka na susi ya kulungisa balusilu na yandi na Nzambi, kansi Nzambi mpi bantu fwete tudila mambu ya yandi ketubaka ntima. Kansi nki yandi lenda sala kana yandi kemona dyaka ve mpila ya kundima dyambu yina vandaka ntete mbote ya yandi wakanaka ti muntu yankaka, kansi na nima ya kutadila yo mbotembote yo kemonana ya mbi? Yandi fwete mona ve dyambu yango mpamba. Kansi na nima ya kusolula mbote, muntu yina bo wakanaka ti yandi lenda katula yandi na mukumba yina.—Nkunga 15:4; Bingana 6:2, 3.
Na yina metala balusilu mpi mambu yankaka yonso, inki fwete vanda mpusa na beto ya ntete? Beto fwete sosa ntangu yonso na kuvanda na kuwakana ya mbote ti Yehowa Nzambi.
[Bifwanisu ya kele na lutiti 30]
Ana kuvandaka ve na dute ya kulungisa lusilu na yandi
[Bifwanisu ya kele na lutiti 31]
Yefte kulungisaka lusilu na yandi, ata yo vandaka mpasi na kusala yo