Pesa Mingi Kuluta Yina Nge Lenda Pesa

“BENO lenda binga mono muntu ya kelombaka mbongo; yo ketungisa mono ve. Mono kelomba mbongo sambu na Yezu.” Bangogo yai ya pastere mosi ya Misioni kemonisa ntembe yina ketadilaka mbongo ya mabundu. Yo kemonana bonso nde mabundu lenda landa na kuzinga kaka kana yo kezwa mbongo mingi. Bo fwete futa ba salere, bo fwete tunga batempelo mpi kukeba yo, bo fwete basisa mbongo sambu na kuyidika bakampagne ya kisalu ya kusamuna. Inki mutindu kuzwa mbongo yina kele mfunu?

Sambu na mabundu mingi, mvutu kele dikumi. a Nsamuni Norman Robertson ketuba nde: “Kupesa dikumi kele mwaye ya Nzambi kendimaka sambu na kusadisa kimfumu na Yandi na ntoto. Yo kele mutindu na Yandi ya kuzwa mbongo yina kesalaka nde bo kusamuna Evanzile.” Yandi waka ve nsoni na kuyibusa balandi na yandi mukumba na bo ya kupesa, yo yina yandi tubaka ti ngolo yonso nde: ‘Dikumi kele ve kima yina nge kepesa sambu nge lenda pesa yo. Yo kele kisalu ya kemonisa bulemfu. Kupesa ve dikumi kele kufwa na mutindu ya pwelele bansiku ya Nzambi. Yo kele kuyiba mbongo ya Nzambi.’​—Tithing—​God’s Financial Plan.

Ziku nge kendimaka nde kupesa fwete vanda kitini mosi ya lusambu ya Bukristu. Kansi, kana bo kelomba beno ntangu yonso na kupesa mbongo, keti yo keyangisaka nge to nkutu kepesaka nge mpasi na ntima? Teolozie mosi ya Brésil, Inácio Strieder, kefunda mabundu nde bo kesadilaka dikumi sambu na “kubongisa makambu ya bimvuka na bo” mpi yandi ketuba nde bisalu yina “kezitisaka ve nsiku, yo kemonisaka bantu mpasi, mpi kewakanaka ve ti nsiku ya teolozi.” Yandi ketuba nde, dyambu yai kesalaka nde “bantu yina mekonda bisalu, mifwidi, bantu yina kezingaka na bisika ya mbote ve, mpi bantu yina keyindulaka mbote ve kebanzaka nde Nzambi melosaka bo, mpi nde bo fwete pesaka mbongo mingi na ‘nsamuni’ ata mabuta na bo kefwa na nzala.”

Nge lenda kudiyula nde: ‘Keti mabundu yina kepusaka bantu na kupesa dikumi kesadilaka mbotembote Masonuku? To keti mabundu kesadilaka boma ya Nzambi sambu na kuyiba mameme? Keti ya kyeleka Nzambi kelomba beto na kupesa mingi kuluta yina beto lenda pesa, mutindu bantu yankaka lenda tuba?

[Noti na nsi ya lutiti]