Yai Ntangu ya Beto Fwete Kangula Mpenza Meso

“Yo yina, beno [landa na kukangula, NW] meso, sambu beno kuzaba ve nki kilumbu Mfumu na beno ta kwisa.”​—MATAYO 24:42.

1, 2. Inki kemonisa nde beto kezinga na nsuka ya ngidika ya bima ya ntangu yai?

 NSONIKI Bill Emmott kutubaka nde, “na mvu-nkama ya makumi zole bamvita mesalama mingi mpenza kuluta na bamvu-nkama yonso.” Nsoniki yai kendima nde bamvita ti mambu ya nku mesalamaka mingi na konso nsungi yina bantu mezingaka. Kansi yandi keyika nde: “Kima keswaswanisa mvu-nkama ya makumi zole ti bamvu-nkama yankaka kele bamvita ve kansi kiteso ya bamvita yina mesalamaka. Mvita ya inza ya mvimba kusalamaka na mbala ya ntete na mvu-nkama yai . . . Mpi, bonso nde mvu-nkama yai zolaka kundimisa mbotembote dibanza ya bamvita, mvita ya inza ya mvimba kusalamaka mosi mpamba ve na mvu-nkama yango, kansi zole.”

² Yezu Kristu kutubaka na ntwala nde, bamvita yina tapusa ‘bantu ya nsi yankaka na kunwanisa bantu ya nsi yankaka, mpi bantu ya kimfumu yankaka na kunwanisa bantu ya kimfumu yankaka’ tavanda. Na kutuba ya mbote, bamvita kele mosi na kati ya mambu yina zolaka kumonisa ‘kidimbu ya kuvanda ya Kristu ti ya nsuka ya ngidika ya bima.’ Na mbikudulu yai ya nene, Yezu kutubaka mpi nde banzala, bamaladi ya mbi, mpi kunikana ya ntoto tavanda. (Matayo 24:3, 7, 8; Luka 21:6, 7, 10, 11) Na mambu mingi, bampasi ya mutindu yai mekumaka kumonana na bisika mingi mpi na kiteso ya kuluta ngolo. Mambi ya bantu mekuma mingi kibeni, mpi yo kemonisa mutindu bo ketadilaka Nzambi ti bantu. Bikalulu ya mbi mekuma mingi mpi nku ti mubulu mekuma ngolo mpenza. Bantu mekumaka kuzola mbongo kansi Nzambi ve, mpi bo kesosaka kaka byese. Mambu yai yonso kemonisa nde beto kezinga na ntangu ya “mpasi mingi.”​—2 Timoteo 3:1-5.

3. ‘Bidimbu ya bilumbu yai’ fwete pusa beto na kusala inki?

³ Inki mutindu nge ketadilaka kubeba ya bikalulu ya mbote na luzingu ya bantu? Bantu mingi kekangaka meso, to nkutu mekumaka ntima ngolo na ntwala ya bampasi yina bantu kekutanaka ti yo bilumbu yai. Bantu ya lukumu ti ya kulonguka ya inza yai kebakisaka ve ntendula ya ‘bidimbu ya bilumbu yai’; bamfumu ya mabundu mpi kepesaka ve lutwadisu ya mbote na dyambu yai. (Matayo 16:1-3) Kansi Yezu kulongisilaka balongoki na yandi nde: “Beno [landa na kukangula, NW] meso, sambu beno kuzaba ve nki kilumbu Mfumu na beno ta kwisa.” (Matayo 24:42) Na verse yai, Yezu kesyamisa beto na kukangula meso mpamba ve kansi mpi na ‘kulanda na kukangula meso.’ Sambu na kulanda kukangula meso, beto fwete lala mpongi ve mpi kuvanda ntangu yonso meso ya kukangula. Sambu na kusala mpidina, yo kelomba ve kundima kaka nde beto kezinga na bilumbu ya nsuka to nde beto kele na ntangu ya mpasi. Beto fwete kwikila mpenza nde “nsuka ya mambu yonso me kuma penepene.” (1 Piere 4:7) Kaka lukwikilu ya mutindu yina tasonga nde beto kekangula mpenza meso. Yo yina, beto fwete kudiyula nde: ‘Inki tasadisa beto na kukwikila ngolo mpenza nde nsuka mekuma penepene?’

4, 5. (a) Inki tapusa beto na kukwikila dyaka ngolo nde nsuka ya ngidika yai ya mbi mekuma penepene, mpi sambu na inki? (b) Tanga dyambu mosi ya kusalamaka na ntangu ya Noa yina kesalama mpi na ntangu ya kuvanda ya Mwana ya muntu.

⁴ Beto tadila mambu yina kusalamaka na ntwala nde dyambu mosi ya kuluta nene ya mesalamaka ntete ve na luzingu ya bantu kusalama. Dyambu yango kele Mvula ya Ngolo ya ntangu ya Noa. Bantu vandaka kusala mambu ya mbi mpenza yina kutindaka Yehowa na ‘kumona mawa.’ Yandi tubaka nde: “Mono ta fwa bantu yonso ya mono salaka, ata wapi bo kele.” (Kuyantika 6:6, 7) Yandi salaka kaka mutindu yandi tubaka. Ntangu Yezu kufwanisaka mambu ya bilumbu yina ti ya bilumbu na beto, yandi tubaka nde: “Mambu yina bwaka na ntangu ya Noa, yo ta bwa mpi mutindu mosi ntangu Mwana-muntu ta kwisa.”​—Matayo 24:37.

 ⁵ Yo kele mbote na kundima nde Yehowa kewaka mawa sambu na inza yai mutindu yandi waka na ntwala ya kunokisa Mvula ya Ngolo na inza. Ya kyeleka, sambu yandi fwaka inza ya ntangu ya Noa yina vandaka kuzitisa ve bansiku na yandi, yandi tafwa mpi inza ya mbi ya ntangu na beto. Kubakisa mbotembote kuwakana yina kele na kati ya ntangu yina ti bilumbu na beto fwete pusa beto na kukwikila dyaka ngolo nde nsuka ya inza yai mekuma penepene. Ebuna, inki mambu ya kusalamaka na ntangu yina kesalama mpi na ntangu na beto? Mambu yango kele kiteso ya tanu. Dyambu ya ntete kele nde lukebisu ya metala kufwa ya inza kepesama pwelele.

Bo Kebisaka Yandi Sambu na “Mambu Yina Ta Bwa na Ntwala”

6. Yehowa kubakaka lukanu ya kusala nki na ntangu ya Noa?

⁶ Na ntangu ya Noa, Yehowa kutubaka nde: “Ntangu yai mpeve na mono ta vanda diaka ve mvula mingi na bantu, sambu bo kele ka bo bantu, bo fweti fwa. Katuka ntangu yai tii kuna, bo ta zingaka diaka ve kuluta bamvula nkama mosi makumi zole.” (Kuyantika 6:3) Ntangu Nzambi kutubaka mambu yai na mvu 2490 ya N.T.B., yo vandaka kusonga nde nsuka ya inza ya mbi ya ntangu yina kuyantikaka. Yindula ntendula na yo sambu na bantu yina vandaka kuzinga na ntangu yango! Mutindu yo kemonana na mambu yina yandi zabisaka Noa na nima, bamvula 120 mpamba kubikalaka na ntwala nde Yehowa kutinda “mvula ya ngolo na nsi-ntoto sambu na kufwa bima yonso yina ke zingaka.”​—Kuyantika 6:17.

7. (a) Inki Noa kusalaka ntangu Nzambi kukebisaka yandi nde yandi tanokisa Mvula ya Ngolo? (b) Inki beto fwete sala na ntangu beto kewa balukebisu yina metala nsuka ya ngidika yai?

⁷ Bamvula mingi na ntwala, Nzambi kukebisaka Noa nde yandi tafwa inza, yo yina Noa kusadilaka ntangu na mayele sambu na kuyilama na mpila nde yandi guluka. Ntumwa Polo ketuba nde: “Nzambi pesaka [Noa] atasio sambu na mambu yina ta bwa na ntwala, ya yandi me zaba ntete ve. Yandi lemfukaka na Nzambi, ebuna yandi tungaka maswa; yandi ti fami na yandi bo kotaka muna ebuna bo fwaka ve.” (Baebreo 11:7) Ebuna beto? Kiteso ya bamvula 90 meluta dezia banda bilumbu ya nsuka ya ngidika ya bima yai kuyantikaka na mvu 1914. Ya kyeleka, beto kezinga na “ntangu ya nsuka.” (Daniele 12:4) Inki mutindu beto fwete tadilaka balukebisu ya bo mepesaka beto? Biblia ketuba nde: “Muntu yina ke salaka mambu yina ya Nzambi ke zolaka, yandi ke zingaka mvula na mvula.” (1 Yoane 2:17) Yo yina, yai kele ntangu ya kusala luzolo ya Yehowa ti dibanza mpenza ya kukonda kusukinina.

8, 9. Inki balukebisu kepesamaka na ntangu na beto, mpi nki mutindu yo kepesama?

⁸ Na bilumbu na beto, balongoki ya masonga ya Biblia melongukaka na nsadisa ya Masonuku ya kupemama nde kubika fyoti ngidika yai kufwa. Keti beto kekwikilaka mpenza na dyambu yai? Tala mambu yina Yezu Kristu kutubaka pwelele: “Mpasi [ya nene, NW] ta vanda. Yo ta vanda mpasi mosi ya ngolo yina me bwaka ntete ve katuka kuna ya Nzambi salaka bima yonso tii bubu yai. Ata mpasi ya nkaka ya mutindu yina ta vanda diaka ve.” (Matayo 24:21) Yezu kutubaka mpi nde yandi takwisa bonso zuzi yina ya Nzambi meponaka sambu na kukabisa bantu mutindu ngungudi kekabisaka mameme ti bankombo. Bantu yina yandi tandima ve “ta kwenda kubaka ndola ya mvula na mvula; kansi bantu yina salaka mbote bo ta kwenda kubaka moyo ya mvula na mvula!”​—Matayo 25:31-33, 46.

⁹ Yehowa kebendaka dikebi ya bantu na yandi na balukebisu yai na nsadisa ya madya ya kimpeve yina yandi kepesaka na ntangu ya mbote na nzila ya “mpika ya kwikama mpi ya mayele.” (Matayo 24:45-47, NW) Dyaka, Nzambi kelomba bantu ya makanda yonso, ya bikanda yonso, ya bandinga yonso, ti ya bansi yonso na ‘kuwa yandi boma, mpi na kupesa yandi lukumu! Sambu ntangu yina ya yandi ta sambisa bantu yo me lunga.’ (Kusonga 14:6, 7) Dyambu ya nene ya kelongama na nsangu ya Kimfumu yina Bambangi ya Yehowa kesamuna na ntoto ya mvimba ketadila lukebisu ya kemonisa nde kubika fyoti Kimfumu ya Nzambi takatula luyalu ya bantu. (Daniele 2:44) Beto fwete mona ve lukebisu yai bonso kima mosi ya mpamba. Nzambi Nkwa-Ngolo Yonso kelungisaka kaka balusilu na yandi. (Yezaya 55:10, 11) Yandi salaka yo na ntangu ya Noa, mpi yandi tasala yo na bilumbu na beto.​—2 Piere 3:3-7.

Masumu ya Kuvukisa Nitu Mekuma Mingi Mpenza

10. Inki beto lenda tuba sambu na masumu ya kuvukisa nitu ya ntangu ya Noa?

¹⁰ Kele ti dyambu ya zole ya kemonisa nde bilumbu na beto mefwanana ti ntangu ya Noa. Ntangu Yehowa kukwedisaka bakala ti nkento ya ntete,  yandi pesaka bo ntuma nde bo sadila ngolo ya kuvukisa nitu na lukumu yonso na mpila nde bo fulusa bana ‘bisika yonso na nsi-ntoto.’ (Kuyantika 1:28) Na ntangu ya Noa, bawanzyo yina kukolamaka kubebisaka ntoto na mpila bo vandaka kuvukisa nitu na mutindu mosi ya mbi. Bo kwisaka na ntoto, bo lwataka nitu ya kinsuni, mpi bo yantikaka kuzinga ti bankento ya kitoko, bo butaka bana yina kubakaka kimuntu ya bantu ti ya bademo. Bo vandaka kubinga bo Banefilime. (Kuyantika 6:2, 4) Biblia kefwanisa disumu yina ya bawanzyo ya mbi ti masumu yina vandaka kusalama na Sodomi ti Gomore. (Yude 6, 7) Yo yina kusalaka nde masumu ya kuvukisa nitu kupanzana na bilumbu yina.

11. Inki bikalulu ya ntangu na beto kefwanana ti yina ya ntangu ya Noa?

¹¹ Inki beto lenda tuba sambu na bikalulu ya bantu bubu yai? Na bilumbu yai ya nsuka, bantu mingi kesalaka masumu ya kuvukisa nitu. Polo kusonikaka pwelele sambu na bantu ya mutindu yina nde: “Bo ke waka diaka nsoni ve”; bamingi mekudipesaka na kusala “mambu ya nsoni ya mutindu na mutindu bonso bantu ya kilau.” (Efezo 4:19) Bifwanisu ya kesongaka kinkonga, kuvukisa nitu na ntwala ya makwela, kuvukisa nitu ti bana, mpi kuvukisa nitu babakala to bankento bo na bo mekumaka mingi. Bamingi kele na kubaka dezia “ndola na nitu na bo” na ntangu bo kebaka maladi ya kekatukaka na kuvukisa nitu, bo kefwa makwela, mpi bo kebaka bampasi yankaka.​—Roma 1:26, 27.

12. Sambu na nki beto fwete yedisa kikalulu ya kumenga mambi?

¹² Na ntangu ya Noa, Yehowa kunokisaka Mvula ya Ngolo mpi kufwaka inza yina ya bantu vandaka kuvukisa nitu bonso bilau. Beto fwete vila ve ata fyoti nde bilumbu yai kele mpenza bonso ntangu ya Noa. “Mpasi ya nene” yina kekwisa tafwa inza ya ‘bantu yina ke salaka pite na bantu yina me kwelaka to na bayina me kwelaka ve, babakala yina kevukisaka nitu na mutindu yina mefwana ve na bantu, babakala yina keladisaka babakala ya nkaka.’ (Matayo 24:21; 1 Korinto 6:9, 10; Kusonga 21:8) Yo mefwana mpenza nde beto sala nswalu sambu na kuyedisa kikalulu ya kumenga mambi mpi kudikeba na mambu yina lenda nata beto na kusala mansoni!​—Nkunga 97:10; 1 Korinto 6:18.

‘Nku Kupanzanaka’ na Ntoto

13. Na ntangu ya Noa, sambu na nki ‘nku kupanzanaka’ na nsi-ntoto yonso?

¹³ Ntangu Biblia ketubila dyambu yankaka ya kusalamaka na ntangu ya Noa, yo ketuba nde: “Nzambi monaka mbi [ya bantu], mbi ti nku na bo mpi panzanaka na nsi-ntoto yonso.” (Kuyantika 6:11) Na kutuba ya mbote, nku kuvandaka ve kima mosi ya mpa. Kaini, mwana ya Adami, kufwaka mpangi na yandi yina kuvandaka muntu mosi ya mbote. (Kuyantika 4:8) Ntangu yandi monisaka mambu ya nku ya ntangu na yandi, Lameki kusonikaka poeme mosi sambu na kudisikisa na mutindu yandi fwaka mwana bakala mosi ti ngindu ya kuditanina. (Kuyantika 4:23, 24) Kima ya kuswaswana ya kumonanaka na nku ya ntangu ya Noa kuvandaka nde yo vandaka kusalama na kiteso mosi ya kuluta ndilu. Bawanzyo ya kukolamaka na Nzambi kukwelaka bankento na zulu ya ntoto mpi bo butaka bana yina bo vandaka kubinga nde Banefilime. Yo yina kusalaka nde nku kulutana mingi mpenza. Traduction du monde nouveau kemonisa nde ngogo ya kisina ya Kiebreo ya bo mesadila sambu na kubinga bana yina ya nda mingi ketendula “bantu yina vandaka kubwisa bantu yankaka.” (Kuyantika 6:4, noti na nsi ya lutiti) Yo yina, ntoto ‘kufulukaka ti mbi.’ (Kuyantika 6:13) Yindula ntete, Noa kumonaka mpenza mpasi na kusansa dibuta na yandi na inza ya mutindu yina! Kansi, Noa kumonisaka nde yandi vandaka ‘kulemfukila Yehowa na nsi-ntoto ya mvimba.’​—Kuyantika 7:1.

14. Inki mutindu ‘nku mepanzanaka’ bubu yai na inza?

¹⁴ Nku ya bantu meyantikaka ntama kibeni. Kansi, mutindu yo vandaka na ntangu ya Noa, yo kemonana mpi na bilumbu na beto na kiteso mosi ya mesalamaka ntete ve. Beto kewaka mbala mingi mubulu ya kesalamaka na banzo, kiterorizme, bansangu ya kupusa bantu na kufwa bantu mingi na mbala mosi, mpi bansangu ya bantu yina kefwaka bantu mingi na minduki kukonda kikuma. Yika mpi bamvita yina ketyamuna menga mingi. Ntoto mefuluka dyaka ti nku mingi kibeni. Sambu na inki? Inki mesalaka nde nku kukuma mingi? Mvutu na ngyufula yai kemonisa dyaka kima mosi ya kemonana bubu yai yina kuvandaka mpi na ntangu ya Noa.

15. (a) Inki mesala nde nku kukuma mingi na bilumbu ya nsuka? (b) Beto lenda tula ntima nde mambu tasuka nki mutindu?

¹⁵ Ntangu Kimfumu ya Nzambi yina yandi mepesaka na Mesia yantikaka kuyala na zulu na mvu 1914, Yezu Kristu, Ntotila yina kubakaka Kimfumu, kusalaka dyambu mosi ya mfunu mpenza. Yandi  kulaka Satana Dyabulu ti bademo na yandi kuna na zulu mpi yandi losaka bo na ntoto. (Kusonga 12:9-12) Na ntwala nde Mvula ya Ngolo kunoka, bawanzyo ya kukolamaka kuyambulaka kisika na bo na zulu na luzolo yonso; kansi, na ntangu na beto, Yezu melosaka bo na ngolo. Dyaka, bubu yai bo kele ve ti nswa ya kulwata nitu ya kinsuni na zulu ya ntoto sambu na kuvukisa nitu ti bantu. Nsoni, makasi, mpi boma ya ndola yina kevingila bo kepusaka bo na kubenda bantu ti baorganizasio na kufwa bantu yankaka mpi na kusala mambu ya nku kuluta yina ya ntangu ya Noa. Ntangu bawanzyo ya kukolama ti bana na bo kufulusaka mambi na inza yina kuvandaka na ntwala ya Mvula ya Ngolo, Yehowa kufwaka yo. Zaba nde yandi tasala kaka mutindu mosi mpenza na bilumbu na beto! (Nkunga 37:10) Kansi, bayina kelanda na kukangula meso bubu yai kezaba nde luguluku na bo mekuma penepene.

Nsangu Ke na Kulongama

16, 17. Inki dyambu ya iya ya kusalamaka na ntangu ya Noa kesalama mpi na bilumbu na beto?

¹⁶ Dyambu ya iya ya kesalama na bilumbu na beto ya kefwanana ti yina ya kusalamaka na inza na ntwala nde Mvula ya Ngolo kunoka kemonana na kisalu yina Nzambi kupesaka Noa na kusala. Noa kutungaka maswa mosi ya nene. Yandi vandaka mpi “kulonga.” (2 Piere 2:5) Inki nsangu Noa kulongaka? Ntembe kele ve nde Noa vandaka kulonga bantu nde bo balula ntima mpi yandi vandaka kukebisa bo nde kubika fyoti inza ya ntangu yina kufwa. Yezu kutubaka nde bantu ya ntangu ya Noa “[kutulaka ve dikebi, NW] tii kuna masa fulukaka mingi na ntoto yonso; masa yina nataka bo yonso na lufwa.”​—Matayo 24:38, 39.

¹⁷ Mutindu mosi, ntangu Bambangi ya Yehowa kesala kikesa sambu na kulungisa kisalu na bo ya kulonga, nsangu ya Kimfumu ya Nzambi kelongama na inza ya mvimba. Na bansi mingi, bantu lenda wa mpi kutanga nsangu ya Kimfumu na bandinga na bo mosi. Nzozulu ya Nkengi, yina kezabisaka Kimfumu ya Yehowa, kebasikaka na bakopi kuluta 25 000 000 mpi na bandinga kuluta 140. Ya kyeleka, nsangu ya mbote ya Kimfumu ya Nzambi ke na kulongama “na nsi-ntoto ya mvimba, na mpila nde bantu ya makanda yonso kuwa yo.” Ya kyeleka, kana kisalu yango mesalama na kiteso yina ya tasepedisa Nzambi, nsuka takwisa mpenza.​—Matayo 24:14.

18. Inki kufwanana kele na mutindu bantu ketadila kisalu na beto ya kusamuna bubu yai ti mutindu bantu vandaka kutadila yo na ntangu ya Noa?

¹⁸ Kana beto tala bikalulu ya mbi mpi ya kukonda kutula dikebi na mambu ya kimpeve yina bantu ya kuzingaka na ntwala ya Mvula ya Ngolo kuvandaka na yo, yo kele mpasi ve na kubakisa nde bantu ya ntangu ya Noa vandaka kuseka, kufinga mpi kuvweza ngolo mpenza dibuta ya Noa. Kansi, nsuka kukwisaka kaka. Mutindu mosi, ‘baseki ti kuseka na bo’ mekuma mingi na bilumbu ya nsuka. Ata mpidina, Biblia ketuba nde “kilumbu ya [Yehowa, NW] ta kwisa mutindu muyibi ke kwisaka.” (2 Piere 3:3, 4, 10, Luwawanu yampa) Yo takwisa kaka na ntangu yina ya Nzambi metulaka. Yo tasukinina ve. (Habakuki 2:3) Yo kele mayele kibeni nde beto landa na kukangula meso!

Bantu Fyoti Mpamba Kugulukaka

19, 20. Inki mambu ya kufwanana beto lenda monisa yina kusalamaka ntangu Mvula ya Ngolo kunokaka ti yina tasalama ntangu ngidika ya bima yai tafwa?

¹⁹ Kufwanana yina kemonana na kati ya ntangu ya Noa ti bilumbu na beto kesuka kaka ve na mambi yina bantu kesala ti lufwa na bo. Sambu bantu kugulukaka na ntangu Mvula ya Ngolo kunokaka, bantu taguluka mpi ntangu ngidika ya bima ya ntangu yai tafwa. Bantu yina kugulukaka na Mvula ya Ngolo kuvandaka bantu ya kudikulumusa yina vandaka kuzinga ve bonso bantu ya ntangu na bo. Bo tulaka dikebi na lukebisu ya Nzambi mpi bo vandaka kuvukana ve ti bantu ya inza ya mbi ya ntangu yina. Biblia ketuba nde: “Mfumu Nzambi monaka kiese sambu na Noa. . . . [Noa] kaka muntu ya Nzambi ndimaka na ntangu yina.” (Kuyantika 6:8, 9) Na kati ya bantu yonso, dibuta mosi, disongidila “bantu mingi ve kotaka na maswa, kaka bantu nana mpamba, ebuna masa gulusaka bo.” (1 Piere 3:20) Ebuna, Yehowa Nzambi kupesaka bo ntuma yai: “Beno buta bana mingi, mpidina bana na beno ta zingaka bisika yonso ya nsi-ntoto.”​—Kuyantika 9:1.

²⁰ Ndinga ya Nzambi kendimisa beto nde “kibuka ya nene taguluka na mpasi ya nene.” (Kusonga 7:9, 14, NW) Kibuka yango ya nene tavanda ti bantu ikwa? Yezu yandi mosi kutubaka nde: “Kielo ti nzila yina ke nataka bantu na moyo yo kele nkaka mpenza, bantu fioti mpamba ke monaka yo.” (Matayo 7:13, 14) Kana beto fwanisa bantu yina taguluka ti bantu mingi yina kezinga bubu yai na ntoto, beto kemona nde bantu yina taguluka na mpasi ya  nene tavanda fyoti. Kansi bo lenda baka mpi dibaku ya mutindu mosi bonso yina ya Nzambi kupesaka na bantu yina kugulukaka na Mvula ya Ngolo. Na nsungi mosi buna, bantu yina taguluka lenda baka dibaku ya kubuta bana yina tazinga na ntoto ya mpa.​—Yezaya 65:23.

‘Beno Landa na Kukangula Meso’

21, 22. (a) Inki mambote nge mebaka na disolo ya ketubila Mvula ya Ngolo yai beto metadila? (b) Inki kele mukapu ya mvu 2004, mpi sambu na nki beto fwete tula dikebi na ndongisila yina yo kepesa?

²¹ Ata bamvula mingi mpenza meluta banda Mvula ya Ngolo kunokaka, yo kepesa mpenza lukebisu mosi ya pwelele yina beto fwete vila ve. (Roma 15:4) Mambu ya kufwanana yina kusalamaka na ntangu ya Noa ti yina kesalama na bilumbu na beto fwete sadisa beto na kubakisa mbotembote mambu yina kesalama mpi kubenda dikebi na beto na kukwisa ya Yezu bonso muyibi sambu na kufwa bantu ya mbi.

²² Bubu yai, Yezu Kristu ke na kutwadisa kisalu mosi ya mfunu ya ketunga na kimpeve. Sambu na kutanina mpi kugulusa bansambidi ya kyeleka, beto kele ti paladisu mosi ya kimpeve yina kele bonso maswa na beto. (2 Korinto 12:3, 4) Sambu na kuguluka na mpasi ya nene, beto fwete vanda kaka na kati ya paladisu yango. Inza ya Satana kele na nganda ya paladisu yango ya kimpeve, mpi yo kele ya kuyilama na kubenda konso muntu yina kelala mpongi na kimpeve. Yo kele mfunu mpenza nde beto ‘landa na kukangula meso’ mpi kumonisa nde beto kele ya kuyilama sambu na kilumbu ya Yehowa.​—Matayo 24:42, 44.

Keti Nge Keyibuka?

• Inki lukebisu Yezu kupesaka sambu na yina metala kukwisa na yandi?

• Yezu kefwanisa ntangu ya kuvanda na yandi ti inki?

• Inki mambu ya kesalama na bilumbu na beto mefwanana ti yina ya ntangu ya Noa?

• Inki mutindu kuyindula mambu ya ntangu ya Noa yina kefwanana ti mambu ya kesalama na bilumbu na beto fwete pusa beto na kusala mambu kukonda kusukinina?

[Bangyufula ya disolo ya kulonguka]

[Bangogo sambu na kubenda dikebi ya kele na lutiti 14]

Mukapu ya mvu 2004 tavanda: “Beno kangula meso . . . Beno yilama.”​—Matayo 24:42, 44.