Bakristu Kele na Mukumba ya Kusungimina Bantu Yina Menuna

“Mono ta vanda kaka mutindu mosi tii kuna ya beno me nuna, mono ta bakaka kilo na beno tii kuna ya beno me kuma nsuki-mpembe.”​—YEZAYA 46:4.

1, 2. Na nki mutindu dikebi ya Tata na beto ya zulu ketudilaka beto keswaswana ti dikebi yina bibuti ketudilaka bana na bo?

 BIBUTI ya mbote kesansaka bana na bo mbote banda na bumwana, na buleke, mpi na butoko. Ata ntangu bana mekuma bambuta mpi bo mekuma ti mabuta na bo, batata ti bamama na bo kelandaka na kutudila bo dikebi mpi kusadisa bo na zola yonso.

² Ata bantu kekukaka ve kusala mambu yankaka sambu na bana na bo, Tata na beto ya zulu kekukaka ntangu yonso kutudila bansadi na yandi ya kwikama dikebi mpi kusadisa bo na zola yonso. Yehowa kutubaka mutindu yai ntangu yandi tubilaka bantu na yandi ya yandi ponaka na ntangu ya ntama: “Mono ta vanda kaka mutindu mosi tii kuna ya beno me nuna, mono ta bakaka kilo na beno tii kuna ya beno me kuma nsuki-mpembe.” (Yezaya 46:4) Bangogo yai kepesa mpenza Bakristu yina menuna kikesa! Yehowa keyambulaka ve bantu yina kevandaka ntangu yonso ya kwikama na yandi. Kansi, yandi kesila nde yandi tasadisa bo mpi tatwadisa bo na luzingu na bo ya mvimba, ata na kimununu.​—Nkunga 48:15.

3. Inki beto tatadila na disolo yai?

³ Inki mutindu beto lenda landa mbandu ya dikebi ya zola yina Yehowa kemonisaka na bantu yina menuna? (Efezo 5:1, 2) Beto tadila mambu yina bana yina meyela, bankengi ya dibundu, mpi Mukristu mosimosi lenda sala sambu na kusungimina  bampusa ya bampangi ya menuna yina kele na dibuta na beto ya Bukristu ya inza ya mvimba.

Mukumba na Beto Bana

4. Inki mukumba bana yina kele Bakristu kele na yo na ntwala ya bibuti na bo?

⁴ “Zitisa [“pesa lukumu na,” NW] tata na nge ti mama na nge.” (Efezo 6:2; Kubasika 20:12) Na nsadisa ya nsa yai ya nkufi kansi ya mfunu mingi ya mekatuka na Masonuku ya Kiebreo, ntumwa Polo kuyibusaka bana mukumba yina bo kele na yo na ntwala ya bibuti na bo. Kansi, inki mutindu beto lenda sadila bangogo yai sambu na kusungimina bantu yina menuna? Mbandu mosi ya kesimba mpenza ntima yina kusalamaka na ntwala ya ntangu ya Bukristu tasadisa beto na kupesa mvutu na ngyufula yai.

5. (a) Inki kima kesonga nde Yozefi kuvilaka ve mikumba yina yandi vandaka na yo na ntwala ya tata na yandi? (b) Kupesa bibuti na beto lukumu ketendula inki, mpi nki mbandu ya mbote Yozefi kubikilaka beto?

⁵ Na nsungi mosi ya bamvula kuluta 20, Yozefi kukutanaka ve ti tata na yandi, Yakobi, mfumu ya kikanda yina kukumaka dezia mununu. Kansi, ntembe kele ve nde Yozefi kuvidisaka ve zola yina yandi vandaka na yo na tata na yandi Yakobi. Nkutu, ntangu Yozefi kusongaka bampangi na yandi nde yandi vandaka mpenza mpangi na bo, yandi yulaka nde: “Keti tata na mono ke zinga kaka?” (Kuyantika 43:7, 27; 45:3) Na ntangu yina, nzala ya ngolo kukotaka na ntoto ya Kanana. Yo yina, Yozefi kutindilaka tata na yandi ndinga nde: “Kwisa kwaku na mono nswalu. Nge ta zingaka na ntoto ya Gosheni penepene na mono . . . Mono ta mona mpila ya kupesaka nge madia kana nge ke zinga na Gosheni.” (Kuyantika 45:9-11; 47:12) Ya kyeleka, kupesa bibuti yina menuna lukumu ketendulaka mpi kutanina bo mpi kupesa bo bima ya kinsuni na ntangu bo kekuka dyaka ve kulungisa bampusa na bo. (1 Samuele 22:1-4; Yoane 19:25-27) Yozefi kundimaka mukumba yai na kyese yonso.

6. Inki mutindu Yozefi kumonisaka zola na yandi ya masonga na tata na yandi, mpi nki mutindu beto lenda landa mbandu na yandi?

⁶ Na lusakumunu ya Yehowa, Yozefi kukumaka mosi na kati ya bantu yina kuvandaka ti kimvwama mpi kiyeka ya kuluta nene na Ezipte. (Kuyantika 41:40) Kansi yandi vandaka kudimona ve nde yandi mekuma muntu ya kuluta mfunu to nde yandi vandaka ti kisalu mingi yina lendaka kupesa yandi ve nzila ya kupesa lukumu na tata na yandi yina kuvandaka ti bamvula 130. Ntangu yandi waka nde Yakobi (to Izraele) mekuma penepene, “Yozefi . . . kotaka na pusupusu na yandi, ebuna yandi kwendaka kukutana na tata na yandi Yakobi na ntoto ya Gosheni. Ntangu yandi monaka tata na yandi, yandi yambaka yandi. Yozefi dilaka ngolo ntangu yandi simbaka tata na yandi.” (Kuyantika 46:28, 29) Kuyamba yai ya Yozefi kuyambaka tata na yandi kuvandaka ve sambu na kusonga yandi luzitu ya zuluzulu. Yozefi vandaka kuzola ngolo kibeni tata na yandi yina kununaka mpi yandi waka ve nsoni na kumonisa zola na yandi. Kana beto kele ti bibuti yina menuna, keti beto mpi kemonisaka bo zola na beto?

7. Sambu na nki Yakobi kuzolaka nde bo kwenda kuzika yandi na Kanana?

⁷ Yakobi kukangamaka ngolo na Yehowa tii na lufwa na yandi. (Baebreo 11:21) Lukwikilu yina Yakobi vandaka na yo na balusilu ya Nzambi kupusaka yandi na kulomba nde bo kwenda kuzika yandi na Kanana. Yozefi kupesaka tata na yandi lukumu na mpila yandi salaka mambu ya tata na yandi kulombaka yandi, ata yo lombaka mbongo ti kikesa mingi.​—Kuyantika 47:29-31; 50:7-14.

8. (a) Inki kima ya ntetentete fwete pusa beto na kutudila bibuti na beto yina menuna dikebi? (b) Inki nsadi mosi ya ntangu yonso kusalaka sambu na kusungimina bibuti na yandi yina kukumaka minunu? (Tala lupangu yina kele na lutiti 15.)

⁸ Inki kutindaka Yozefi na kutudila tata na yandi dikebi? Ata zola ti dibanza ya kuyindula nde yandi fwete futa mfuka na muntu yina kubutaka mpi kusansaka  yandi kutindaka yandi na kusala yo, ntembe kele ve nde Yozefi kuvandaka mpenza ti mpusa ya ngolo ya kusepedisa Yehowa. Beto mpi fwete vanda na mpusa ya mutindu mosi. Polo kusonikaka nde: “Kansi kana mufwidi mosi ke na bana to na batekolo, ntete bo fweti longuka na kusadisa fami na bo: yina kele kisalu na bo ya kikristo; mpidina bo ta vutula mfuka ya lusadisu yina ya bibuti ti bankaka na bo pesaka bo. Yina kele mambu ya Nzambi ke zolaka.” (1 Timoteo 5:4) Ya kyeleka, zola yina beto kele na yo na Yehowa ti kutita ya masonga yina beto ketitaka yandi tapusa beto na kusungimina bibuti na beto yina menuna, ata yo tavanda mpasi nki mutindu. a

Mutindu Bankuluntu Kemonisaka Dikebi na Bo

9. Yehowa meponaka banani sambu na kutwadisa mameme yonso ti bayina menuna?

⁹ Yakobi kuzingaka mingi, mpi ntangu yandi kumaka penepene na nsuka ya luzingu na yandi, yandi tubaka nde Yehowa kele Nzambi ya kyeleka “yina kebaka mono, yina me kumisa mono tii na kilumbu ya bubu yai.” (Kuyantika 48:15) Bubu yai, Yehowa ketwadisaka bansadi na yandi yina kele na ntoto na nsadisa ya Bakristu yina kele bankengi, to bankuluntu, yina ke na nsi ya lutwadisu ya Mwana na yandi, Yezu Kristu, “Ngungudi ya nene.” (1 Piere 5:2-4) Inki mutindu bankengi lenda landa mbandu ya Yehowa sambu na yina metala kutula dikebi na bampangi ya menuna yina kele na kati ya mameme?

10. Inki mambu bampangi kusalaka sambu na kupesa lusadisu ya kinsuni na Bakristu yina menuna? (Tala lupangu ya lutiti 17.)

¹⁰ Ntangu fyoti na nima ya kubutuka ya dibundu ya Bukristu, bantumwa kuponaka “babakala nsambwadi . . . bantu yina me fuluka na Mpeve ya Nzambi, . . . mpi na mayele mingi” na mpila nde bo twadisa kisalu ya ‘kukabisa madia konso kilumbu’ na Bakristu ya mifwidi yina kuvandaka na mpasi. (Bisalu 6:1-6) Na nima, Polo kulombaka na nkengi Timoteo nde yandi sonika bazina ya mifwidi yina vandaka minunu mpi vandaka kupesa mbandu ya mbote na lisiti ya bantu yina fwete baka lusadisu ya kinsuni. (1 Timoteo 5:3, 9, 10) Yo kele mutindu mosi bubu yai. Bankengi ya mabundu kendimaka kutwadisa kisalu ya kupesa lusadisu na Bakristu yina menuna kana mfunu ya kusala yo memonana. Kansi, yo kelombaka kusala mambu mingi dyaka sambu na bampangi ya kwikama yina menuna.

11. Inki Yezu kutubaka sambu na mufwidi mosi ya nsukami yina kupesaka makabu fyoti?

¹¹ Penepene na nsuka ya kisalu na yandi na ntoto, Yezu kuvandaka na tempelo mpi “yandi vandaka kutala mutindu bantu vandaka kutula mbongo muna.” Na nima muntu mosi kubendaka dikebi na yandi. Disolo ketuba nde: “Nkento mosi ya nsukami, bakala na yandi me fwaka, yandi kwisaka kutula bibende zole ya fioti-fioti na kesi.” Yezu kubingaka balongoki na yandi mpi yandi tubilaka bo nde: “Mono ke tubila beno mambu ya kieleka: Makabu ya mufwidi yai ya nsukami me tula na kesi me luta makabu yina ya bantu yonso me luta muna.  Sambu bo yonso ke na mbongo na bo mingi, yo yina bo me mona mpasi ve ya kupesa makabu, kansi nkento yai, na kinsukami na yandi, yandi me pesa mbongo yonso ya yandi vandaka na yo sambu na kuzinga.” (Marko 12:41-44) Ntalu ya mbongo ya mufwidi yina kutulaka kuvandaka fyoti, kansi Yezu kuzabaka nde Tata na yandi ya zulu kebakaka na valere mpenza makabu ya mutindu yina ya bantu kepesaka yandi na moyo na bo ya mvimba. Ata mufwidi yai kuvandaka mununu, Yezu kumonaka ve makabu na yandi mpamba.

12. Inki mutindu bankuluntu lenda monisa ntonda na bo na mambu yina Bakristu ya menuna ke na kusala?

¹² Bonso Yezu, Bakristu yina kele bankengi kemonaka ve mpamba mambu yina bampangi ya menuna kesalaka sambu lusambu ya kyeleka kukwenda na ntwala. Bankuluntu kele ti bikuma ya mbote ya kusikisila bampangi yina menuna sambu na kisalu na bo ya kusamuna, badevware to bamvutu na bo na balukutakanu, bupusi na bo ya mbote na kati ya dibundu, mpi kukanga ntima na bo. Ngogo mosi ya masonga ya kepesa kikesa lenda sadisa bampangi yina menuna na kuzwa kima ya ‘kudikumisila’ na kisalu na bo ya santu, mpi kubuya kulembisa bo na kufwanisaka mambu yina bo kesala ti yina Bakristu yankaka kesala to ti mambu yina bo mosi vandaka kusala na bamvula meluta.​—Galatia 6:4.

13. Na nki mitindu bankuluntu lenda sadila mayele ti eksiperiansi ya bampangi yina menuna?

¹³ Bankuluntu lenda sadila eksperiansi ti mayele yina Bakristu ya menuna kele na yo sambu na kumonisa nde bo kendimaka lusadisu na bo ya mfunu. Bantangu yankaka, bo lenda sadila bampangi yina menuna mpi ya kepesaka mbandu ya mbote na bansonga mpi na bainterview. Nkuluntu mosi ketuba nde: “Bawi kelandaka mpi kewidikilaka na dikebi yonso ntangu mu kesalaka interview ti mpangi mosi ya bakala to ya nkento yina mekuma mununu mpi meyedisaka bana na yandi na kyeleka.” Bankuluntu ya dibundu yankaka kutubaka nde mpangi-nkento mosi ya mupasudi-nzila yina kele na bamvula 71 menungaka mpenza na kusadisa bansamuni ya Kimfumu na kusala dyaka kisalu ya bilanga konso ngonda. Yandi kepesaka bo mpi kikesa ya kusala “mambu ya kuluta mfunu,” mu mbandu kutanga Biblia ti mukapu ya lumbu konso kilumbu mpi kuyindulula mambu ya bo ketanga.

14. Inki mutindu kimvuka mosi ya bankuluntu kumonisaka nde bo kesepelaka na kisalu ya nkengi mosi yina mekuma mununu?

¹⁴ Bankuluntu kebakaka mpi na valere lusadisu yina bampangi na bo bankuluntu ya menuna kepesaka. José, yina kele ti bamvula kuluta 70 mpi yina mesala bamvula mingi na kisalu ya nkuluntu, bo mekatuka kusala yandi operasio mosi ya nene. Ntangu  yandi monaka nde yandi kebeluka ve nswalu, yandi bakaka lukanu ya kuyambula mukumba ya kinkengi ntwadisi. José ketuba nde: “Mvutu yina bankuluntu yankaka kupesaka kuyitukisaka munu. Na kisika ya kundima dibanza na munu, bo lombaka munu na kusonga bo mambu yina bo lenda sala sambu na kusadisa munu na kulanda na kulungisa mikumba na munu.” Na lusadisu ya leke mosi yina kele nkuluntu, José kulandaka na kusala kisalu na yandi ya kinkengi ntwadisi na kyese yonso, mpi dibundu ya mvimba kubakilaka yo lusakumunu. Nkuluntu yankaka ketuba nde: “Bampangi kesepelaka mingi na kisalu ya kinkuluntu yina José kesalaka. Bo kezolaka yandi mpi bo kezitisaka yandi sambu na eksperiansi na yandi mpi sambu na mbandu ya lukwikilu na yandi. Yandi kele lusakumunu sambu na dibundu na beto.”

Beto Tulana Dikebi

15. Sambu na nki Bakristu yonso fwete tula dikebi na mambote ya bampangi ya menuna yina kele na kati na bo?

¹⁵ Mukumba ya kudibanza sambu na bibuti yina menuna kele ve kaka na ntu ya bana na bo ti ya bankuluntu. Ntangu Polo kufwanisaka dibundu ya Bukristu na nitu ya muntu, yandi sonikaka nde: “Nzambi me yidikaka nitu na beto na mpila nde beto pesa luzitu mingi na bandambu yina me konda luzitu mingi. Ebuna nitu kele ya kukabana ve, kansi bandambu yonso ya nitu fweti yindula bandambu ya nkaka ya nitu kiteso mosi.” (1 Korinto 12:24, 25) Sambu dibundu ya Bukristu kutambula na ndonga, konso muntu fwete kudibanza sambu na mambote ya bampangi na yandi Bakristu, ti bayina menuna.​—Galatia 6:2.

16. Na ntangu beto kele na balukutakanu ya Bukristu, inki mutindu beto lenda monisa nde beto ketulaka dikebi na bampangi yina menuna?

¹⁶ Balukutakanu ya dibundu kepesaka beto dibaku ya kutudila bampangi ya menuna dikebi. (Filipi 2:4; Baebreo 10:24, 25) Keti beto kebakaka ntangu ya kusolula ti bampangi yina menuna na baokazio yai? Ata yo lenda vanda mbote na kuyula bo kana mavimpi na bo kele nki mutindu, keti beto lenda pesa bo mpi “lusadisu yina ke katukaka na Mpeve ya Nzambi,” ziku na kutelaka bo disolo mosi ya kimpeve to na kutangilaka bo verse mosi ya Biblia yina kepesa kikesa? Sambu bampangi yankaka ya menuna ketambulaka na mpasi, yo tavanda mbote nde beto kwenda kukutana na bo na kisika ya bo mefonga olie na kusosa nde bo kwisa na kisika ya beto mevanda. Kana bo kewaka dyaka ve mbote, yo lenda vanda mfunu nde beto tuba malembemalembe mpi kubasisa bangogo pwelele. Ebuna, sambu na ‘kupesana kikesa,’ beto fwete widikila na dikebi yonso mambu ya mpangi yina menuna ketuba.​—Roma 1:11, 12.

17. Inki mutindu beto lenda monisa nde beto ketulaka dikebi na Bakristu ya menuna yina kebasikaka dyaka ve na banzo na bo?

¹⁷ Inki beto tasala kana bampangi yankaka ya menuna kekuka ve kukwisa na balukutakanu ya Bukristu? Yakobo 1:27 kemonisa nde mukumba na beto kele ya “kusadisa bana-ns[y]ona ti bamifwidi ya bankento na bampasi na bo.” Ntendula mosi ya kisongi-dyambu ya Kigreki ya bo mebalula nde  “kusadisa” kele ‘kukwenda kutala.’ (Bisalu 15:36) Ebuna bampangi yina menuna kesepelaka mingi kibeni na ntangu beto kekwendaka kutala bo! Ntangu yandi vandaka na boloko na Roma penepene na mvu 65 ya T.B., Polo, “yina kukumaka mununu” (NW) kuvandaka ve ti muntu ya kusadisa yandi. Yandi vandaka mpenza na mpusa ya kumona Timoteo yina bo vandaka kusala ti yandi kumosi mpi yandi sonikilaka yandi nde: “Tula ngolo na kwisa kuvutuka nswalu awa na mono.” (Filemoni 9; 2 Timoteo 1:3, 4; 4:9) Ata bo kele ve na boloko, bampangi yankaka ya menuna kebasikaka dyaka ve na banzo na bo sambu na maladi. Na kutuba ya mbote, yo lenda vanda bonso bo ketuba nde, ‘Pardo, sala yonso sambu nge kwisa kutala mono nswalu.’ Keti beto kendimaka na kwenda kutala bo?

18. Inki mambote bampangi yina menuna lenda baka kana beto mekwenda kutala bo?

¹⁸ Beto fwete monaka ve mpamba mambote yina mpangi mosi ya nkento to ya bakala yina menuna lenda baka kana beto mekwenda kutala yandi. Ntangu Mukristu mosi na zina ya Onezifore kuvandaka na Roma, yandi salaka kikesa sambu na kusosa Polo, yandi monaka yandi, mpi na nima ‘yandi vandaka kwisa kupesa yandi kikesa.’ (2 Timoteo 1:16, 17) Mpangi-nkento mosi ya menuna ketuba nde: “Mu kezolaka kulutisa ntangu ti baleke. Kima kesepedisaka munu mingi kele nde bo kebakaka munu bonso muntu ya fami na bo. Yo kepesaka munu kikesa mingi.” Mukristu yankaka ya menuna ketuba nde: “Mu kevandaka mpenza na kyese kana muntu metindila munu karte (postale) mosi, mebinga munu mwa minuta fyoti na telefone, to mekwisa kutala munu fyoti. Yo kepesaka munu mpenza kikesa.”

Yehowa Kesakumunaka Bayina Ketudilaka Minunu Dikebi

19. Inki balusakumunu kekatukaka na kutudila bampangi yina menuna dikebi?

¹⁹ Kutula dikebi na bampangi yina menuna kenataka balusakumunu mingi. Kusala kinduku ti bampangi yina menuna mpi kusadila nzayilu na bo ti mayele na bo kele mpenza dibaku mosi ya nene. Bantu yina kesadisaka bampangi yina menuna kebakaka kyese ya kuluta mingi yina kekatukaka na kupesa, mpi bo kewaka kyese na kuzaba nde bo melungisa dyambu mosi ya mfunu, mpi bo kevandaka na ngemba yina kekatukaka na kulungisa mukumba na bo ya Masonuku. (Bisalu 20:35) Dyaka, bayina ketudilaka bampangi ya menuna dikebi fwete vanda ve na boma nde muntu ya kutala bo tamonana ve na ntangu bo takuma minunu. Ndinga ya Nzambi kebwisa beto ntima nde: “Beno vanda na ntima ya mbote, ebuna beno ta mona mambote; beno sadisa bantu ya nkaka, ebuna bo ta sadisa beno mpi.”​—Bingana 11:25.

20, 21. Inki mutindu Yehowa ketadilaka bayina kesungiminaka bampangi yina menuna, mpi nki fwete vanda lukanu na beto?

²⁰ Yehowa kesakumunaka bana yina kebangaka Nzambi, bankengi, ti Bakristu yankaka yina kesungiminaka bampusa ya bampangi yina menuna na mutindu mosi ya kukonda bwimi. Mpeve ya mutindu yina kewakana ti kingana yai ya ketuba nde: “Kana nge kabila bansukami, yo kele bonso nde nge ke defa Mfumu Nzambi kima, sambu Mfumu Nzambi ta vutudila nge yo.” (Bingana 19:17) Kana zola kupusa beto na kusadila bansukami mambote, Nzambi tamona bima ya beto mepesa bansukami yango bonso mfuka yina yandi tafuta beto na ntangu yandi tasakumuna beto. Yandi tafuta beto mpi kana beto ketudila bampangi ya menuna dikebi ya zola, sambu mingi na kati na bo kele ‘bansukami na nsi-ntoto yai kansi bamvwama na mambu ya lukwikilu.’​—Yakobo 2:5.

²¹ Lufutu ya Nzambi kevandaka ya nene mpenza! Mosi na kati na yo kele luzingu ya mvula na mvula. Lufutu yina bansadi mingi ya Yehowa tabaka kele luzingu ya mvula na mvula na ntoto yina takituka paladisu, kisika masumu ya beto mebakaka na bankaka na beto tavanda dyaka ve mpi bampangi ya kwikama yina menuna tavutukila ngolo na bo ya kileki. (Kusonga 21:3-5) Na ntangu ya beto kevingila nsungi yina ya balusakumunu, bika beto landa na kulungisa mukumba na beto ya Bukristu ya kusungimina bampangi yina menuna.

[Noti na nsi ya lutiti]

Inki Mvutu Nge Tapesa?

• Inki mutindu bana lenda pesa bibuti na bo yina menuna lukumu?

• Inki mutindu bankuluntu kemonisaka nde bo kesepelaka na bampangi ya menuna yina kele na kati ya mameme?

• Inki konso Mukristu lenda sala sambu na kumonisa dikebi na yandi ya masonga na bampangi yina menuna?

• Inki balusakumunu kemonanaka na ntangu Bakristu kesungiminaka bampangi na bo yina menuna?

[Bangyufula ya disolo ya kulonguka]

[Lupangu ya kele na lutiti 15]

Ntangu Bibuti na Yandi Vandaka na Mfunu ya Lusadisu

Philippe kuvandaka nsadi ya luzolo ya mbote na kisalu ya kutunga banzo na Liberia na mvu 1999 ntangu yandi waka nde tata na yandi vandaka kubela ngolo. Sambu yandi zabaka mbote nde mama na yandi takuka ve kubaka mukumba yina yandi mosi, Philippe kubakaka lukanu ya kuvutuka na insi na bo sambu na kubaka bangidika na mpila nde bo sansa tata na yandi mbote.

Philippe keyibuka nde “kubaka desizio ya kuvutuka na nzo kuvandaka ve dyambu mosi ya pete. Kansi mu bakisaka nde mukumba na munu ya ntete kuvandaka ya kusungimina bibuti na mono.” Na nsungi ya bamvula tatu yina kulandaka, Philippe kuzwilaka bibuti na yandi nzo mosi ya kuluta mbote mpi, na lusadisu ya bampangi Bakristu, yandi yidikilaka bo nzo yango na mpila nde tata na yandi kuzinga mbote.

Ntangu yai mama ya Philippe kele ti bima yonso ya yandi kele na yo mfunu sambu na kunwana ti maladi ya ngolo ya bakala na yandi. Ntama mingi ve Philippe mekatuka kundima imvitasio yina mebingisa yandi na kwenda kusala kisalu ya luzolo ya mbote na biro ya filiale ya Bambangi ya Yehowa na Masedonia.

[Lupangu ya kele na lutiti 17]

Bo Kelungisaka Bampusa na Yandi

Ntangu Ada, Mukristu mosi ya nkento ya ke na bamvula 85 mpi yina kezingaka na Australie, vandaka kukuka dyaka ve kubasika na nzo na yandi sambu na kimbefo, bankuluntu ya dibundu na bo kusalaka bangidika sambu na kusadisa yandi. Bo bongisaka kibuka mosi ya bampangi yina fwete sadisa yandi. Bampangi yango ya babakala ti ya bankento kuvandaka na kyese na kusadila yandi bisalu bonso kukomba, kuyobisila yandi bima, kulamba, mpi bisalu yankaka.

Bamvula kiteso ya kumi melunga banda bo kepesaka yandi lusadidu yina. Tii bubu yai, Bambangi ya Yehowa kuluta 30 mepesa dezia maboko sambu na kusungimina bampusa ya Ada. Bo kelandaka na kutala yandi, kutangila yandi mikanda yina ketendulaka Biblia, mpi kupesa yandi bansangu ya kimpeve yina metala kuyela ya bampangi yina kele na dibundu na bo, mpi kusamba ti yandi mbala na mbala.

Nkuluntu mosi ya dibundu na bo kutubaka nde: “Bayina kesungiminaka bampusa ya Ada kevandaka mpenza na kyese na kusadisa yandi. Bamingi mebakaka kikesa sambu na kisalu ya kwikama ya mpangi-nkento yai mesalaka tuka bamvula mingi, mpi bo kemonaka ve nki mutindu bo lenda yambula yandi kukonda kulungisa bampusa na yandi.”

[Kifwanisu ya kele na lutiti 14]

Keti beto kemonisaka zola na beto na bibuti yina menuna?

[Bifwanisu ya kele na lutiti 16]

Dibundu ya mvimba lenda monisa zola na bo na bampangi Bakristu yina menuna