Inki Dibundu Nge Fwete Pona?

‘MABUNDU ya kuswaswana kele kaka banzila ya kuswaswana yina kenataka na kisika mosi. Nkutu, Nzambi kele kaka mosi, mpidina ve?’ Yai kevandaka dibanza ya bantu mingi yina kebakisaka mfunu ya kuvanda na dibundu mosi, kansi bo kemonaka nde kupona konso dibundu yina nge fwete landa kele kwa yo mfunu ve.

Kana nge tadila dibanza yai na zuluzulu, yo lenda monana bonso ya mbote, sambu yo ke ya kyeleka nde Nzambi Nkwa-Ngolo Yonso kele kaka mosi. (Yezaya 44:6; Yoane 17:3; 1 Korinto 8:5, 6) Kansi, beto lenda vila ve baluswaswanu ya nene to nkutu kukonda kuwakana ya malongi yina kele na kati ya bimvuka mingi ya lusambu yina ketubaka nde bo kesadilaka Nzambi ya kyeleka. Bo keswaswanaka ngolo mpenza na bisalu na bo, na balukwikilu, na malongi, mpi na bansiku na bo. Baluswaswanu kele mingi mpenza mpi yo kesalaka nde bantu yina ke na dibundu to kimvuka mosi kekukaka ve kubakisa to kundima malongi yina bimvuka yankaka kelongaka to kekwikilaka.

Kansi, Yezu kutubaka nde: “Nzambi kele mpeve, mpi bayina kesambaka yandi fwete kusamba yandi na mpeve mpi na kyeleka.” (Yoane 4:24, NW) Keti kusambila Nzambi na kyeleka kepesaka muntu nswa ya kundima bangindu ya kuswaswana na bangyufula bonso: Nzambi kele nani, balukanu na yandi kele inki, mpi nki mutindu yandi kezolaka nde beto sambila yandi? Keti yo kele mbote na kuyindula nde mutindu beto kesambilaka Nzambi Nkwa-Ngolo Yonso kele mfunu ve na meso na yandi?

Bakristu ya Kyeleka na Mvu-nkama ya Ntete mpi Bubu Yai

Bantangu yankaka Bakristu ya mvu-nkama ya ntete kuvandaka ti mabanza ya kuswaswana na mambu yankaka. Mu mbandu, ntumwa Polo kutubaka mpidyai sambu na Bakristu ya Korinto: “Bantu ya nkento yai Kloe me kwisa kuzabisa mono nde ntembe kele na kati na beno bampangi na mono. Mambu ya mono ke tuba yo yai: Konso muntu na kati na beno ke tubaka mambu ya diswaswanu; yankaka ke tubaka nde: ‘Mono kele muntu ya Paulo,’ yankaka nde: ‘Mono kele muntu ya Apolo,’ yankaka nde: ‘Mono kele muntu ya Piere,’ ebuna ya nkaka nde: ‘Mono kele muntu ya Kristo.’”​—1 Korinto 1:11, 12.

Keti Polo kumonaka baluswaswanu yina yonso mpamba? Keti konso muntu vandaka kusala mambu yina tagulusa yandi? Ata fyoti ve! Polo kulongisilaka nde: “Bampangi na mono, mono ke bondila beno na zina ya Mfumu na beto Yesu Kristo: Beno wakana, beno yonso, na mambu yina ya beno ke tubaka; mpidina kukabana ta vanda ve na kati na beno. Beno vukana mpenza na mabanza mosi ti na ngindu mosi mpi.”​—1 Korinto 1:10.

Ya kyeleka, bantu lenda kuma ve na bumosi na lukwikilu na kingolongolo. Bumosi kemonanaka kaka ntangu bantu ketadilaka mambu na dikebi yonso, kebakisaka mpi kendimaka mambu ya  mutindu mosi yina bo mebakisa. Yo yina, kulonguka Ndinga ya Nzambi nge mosi mpi mpusa na nge ya masonga ya kusadila mambu yina nge kelonguka kele mambu ya mfunu yina kesalaka nde bantu kuvanda na bumosi yina Polo kutubilaka. Keti beto lenda zwa bumosi ya mutindu yai? Mutindu beto monaka yo na disolo ya ntete, Nzambi kesadilaka bantu na yandi na kimvuka banda ntama. Keti mpila kele ya kuzaba kimvuka yango bubu yai?

Mambote ya Kuvukana ti Kimvuka Yina Nzambi Mendimaka

Kilumbu mosi muyimbi-bankunga, Davidi, kuyulaka nde: “Mfumu Nzambi, nani lenda kota na nzo na nge? Nani lenda bikala na ngumba na nge yai Sioni?” Ya kyeleka, yai kele ngyufula mosi ya kepusa na kuyindula. Davidi kupesaka mvutu nde: “Kele kaka muntu yina ke landaka luzolo ya Nzambi na mambu yonso, ke salaka mambu ya mbote ntangu yonso; yandi ke tubaka mambu ya kieleka, ke kusaka ve.” (Nkunga 15:1, 2) Kubakisa mbotembote Biblia tasadisa muntu na kuzaba dibundu yina kelungisaka mambu ya Nzambi kelombaka. Yo yina, kana muntu kevukana ti kimvuka yina, yandi lenda kuma na kinduku ya mbote ti bantu yina kesambilaka Nzambi na bumosi, “na mpeve mpi na kyeleka.”

Bambangi ya Yehowa memonisaka nde bantu lenda vanda na bumosi na lukwikilu mpi na bisalu ata na inza yai ya kukabwana. Na kati na bo kele ti bantu mingi yina mekatukaka na mabundu mpi bandinga ya kuswaswana. Bambangi yankaka kuvandaka ntete bantu yina vandaka kuyindula nde ata kima mosi ve kendimisaka nde Nzambi kele to kebuyaka kundima nde Nzambi kele. Ebuna bankaka dyaka vandaka kutula ve dikebi ata fyoti na mambu ya lusambu. Bubu yai bantu ya ke na bumosi ya lusambu yina beto lenda kuta ve na mabundu yankaka ya inza mekatukaka na mabundu, na mutindu ya kuzinga, mpi na bafilozofi ya mutindu na mutindu.

Kima kesimbaka bumosi yai kele Ndinga ya Nzambi, Biblia. Ya kyeleka, Bambangi ya Yehowa mezaba nde bo lenda pusa ve bantu yankaka na kusala mambu na kingolongolo. Kansi, bo kevandaka na kyese na mutindu bo kele ti dibaku ya mbote ya kusyamisa bantu yankaka na kulonguka Biblia na mpila nde yo vanda fondasio ya ngolo yina kepusa bo na kupona lusambu. Na mutindu yina, bantu mingi lenda baka mambote yina kekatukaka na kusambila Nzambi “na mpeve mpi na kyeleka.”

Bubu yai, kigonsa ya kubwa na bupusi mpi na bampusa ya mbi kele nene. Kupona banduku ya mbote kele mfunu. Biblia ketuba nde “kana nge landa bantu ya mayele, nge ta kuma mpi mayele” mpi nde “banduku ya mbi ke bebisaka bikalulu ya mbote.” (Bingana 13:20; 1 Korinto 15:33) Kuvukana ti bansambidi ya kyeleka ya Nzambi kele lutaninu. Yo yina, Biblia keyibusa beto nde: “Beto talanaka beto na beto sambu na kupusana na zola mpi na bisalu ya mbote, kukonda kuyambula lukutakanu ya beto mosi, bonso bantu yankaka kesalaka yo, kansi na kudisyamisaka bamosi ti bankaka, mpi kuluta dyaka mutindu beno kemona kilumbu kefinama.” (Baebreo 10:24, 25, NW) Yo kevandaka lusakumunu kibeni ntangu banduku ya kyeleka, bampangi ya kimpeve ya babakala ti ya bankento, kesadisanaka na zola yonso sambu na kulungisa mikumba na bo na ntwala ya Nzambi!

Ottmar kendima dibanza yai. Yandi yelaka na dibuta mosi ya Katolika na insi ya Allemagne, kansi yandi vandaka kukwenda dyaka ve na nzo-Nzambi. Yandi ketendula nde: “Ntangu mu vandaka kukwenda na nzo-Nzambi, ntu na munu vandaka kubasika kaka ya mpamba bonso mutindu mu kotaka.” Kansi, yandi vidisaka ve lukwikilu na yandi na Nzambi. Na nima yandi kutanaka ti Bambangi ya Yehowa mpi yandi ndimaka nde bo kele bansadi ya kyeleka ya Nzambi. Yandi monaka mfunu ya kuvukana ti bo. Ntangu yai yandi ketuba nde: “Mono kesala kumosi ti organizasio ya ntoto ya mvimba, mpi mono kele na ngemba na mabanza ti na ntima. Bo kesadisa mono malembemalembe na kubaka nzayilu ya sikisiki ya Biblia. Dyambu yai kele mfunu mingi sambu na mono.”

Emvitasio Mosi na Bantu Yina Kele na Kusosa

Bantu yina kewakanaka mpi kesalaka kumosi na kimvuka lenda sala kisalu mbote mpenza kuluta bantu yina kesalaka ya kukabwana, konso muntu na ndambu na yandi. Mu mbandu, na ntwala nde Yezu kubikisa balongoki na yandi, yandi pesaka bo bantuma yai: “Yo yina, beno kwenda kukumisa bantu yonso balonguki na mono: Beno botika bo na zina ya Tata ti ya Mwana ti ya  Mpeve-Santu, beno longa bo mpi na kulanda mambu yonso ya mono vandaka kusonga beno na kusala.” (Matayo 28:19, 20) Inki mutindu bo zolaka kusala kisalu yai mbote kana lutwadisu to organizasio kuvandaka ve? Inki mutindu muntu lendaka kuzitisa ntuma yai ya Masonuku kana yandi vandaka sosa kusadila Nzambi na mutindu na yandi mosi?

Na mvula meluta, Bambangi ya Yehowa ya ntoto ya mvimba kukabulaka mikanda, tubabuku, ti tumikanda 91 933 280 yina ketendulaka Biblia, mpi bazulunalu kuluta 697 603 247, sambu na kuzabisa nsangu yina kele na Ndinga ya Nzambi na bantu mingi na bansi 235. Dyambu yai kele kidimbu ya pwelele yina kemonisa nde kisalu ya kimvuka mpi ya kubongisa mbote yina kesalama na bumosi kesala mambu mingi mpenza kuluta kisalu yina muntu lenda sala yandi mosi kukonda lusadisu.

Katula kukabula mikanda yina ketendulaka Biblia, Bambangi ya Yehowa kelongukaka Biblia ya ofele ti bantu sambu na kusadisa bo na kubakisa mbotembote mambu yina Nzambi kelombaka. Na mvula meluta, bo longukaka Biblia konso mposo ti muntu yandi mosi to ti bimvuka ya bantu kiteso ya 5 726 509. Malongi ya Biblia ya mutindu yai mesadisaka bantu mingi na kutula fondasio ya ngolo yina kesadisaka bo na kupona lusambu. Beto kelomba nge na kulonguka mambu yina Nzambi kelombaka mutindu yo kele na kati ya Biblia. Na nima nge mosi lenda pona.​—Efezo 4:13; Filipi 1:9; 1 Timoteo 6:20; 2 Piere 3:18.

Kana nge kezola kusepedisa Nzambi, kuvanda na dibundu mosi kele mfunu, kansi kukota ve na konso dibundu to kimvuka yina. Yo yina, yo kele mfunu nde nge pona dibundu na nge na nsadisa ya nzayilu ya sikisiki ya Biblia, kansi na malongi ya luvunu ve to yina muntu yankaka mezabisa nge nde Biblia ketuba yo. (Bingana 16:25) Longuka mambu yina dibundu ya kyeleka kelombaka. Fwanisa yo ti balukwikilu na nge. Na nima pona na nsadisa ya nzayilu yina nge mebaka.​—Kulonga 30:19.

[Bifwanisu ya kele na lutiti 7]

Bambangi ya Yehowa ke na bumosi na inza mosi ya kukabwana