Keti Nge Fwete Vanda na Dibundu Mosi?

‘SAMBU na kukwikila na Nzambi, yo kelomba ve nde muntu kuvanda na dibundu mosi to kukwenda mbala na mbala na nzo-Nzambi!’ Bantu mingi keyindulaka mutindu yai sambu na yina metala kuvanda na dibundu to na kimvuka ya lusambu mosi. Na kutuba ya mbote, bantu mingi ketubaka nde na ntangu bo ketalaka bima yina kele na lugangu bo kekudiwaka mpenza penepene na Nzambi kuluta ntangu bo kevukanaka na banzo ya lusambu. Bubu yai, bantu mingi keyindulaka nde sambu na kukwikila na Nzambi yo kelombaka ve nde muntu kuvanda na dibundu to na kimvuka ya lusambu mosi.

Kansi, bantu yankaka keyindulaka mutindu yankaka na masonga yonso. Bo kendimaka nde kuvanda na dibundu mosi mpi kuvukana na balukutakanu na yo kele mfunu, nkutu yo kele mfunu mingi kana muntu kezola nde Nzambi kundima yandi. Sambu bantu kele ti bangindu ya kuswaswana na dyambu ya metala kuvanda na dibundu, yo kele mfunu nde konso muntu kutadila dikambu yango. Na kisika ya kubikisa nde bantu yina kesalaka bansosa sambu na kuzaba ntalu ya bantu yina kesambilaka ti mambu yankaka kusala yo. Na kutuba ya mbote, sambu dikambu yango ketadila bangwisana na beto ti Nzambi, keti yo tavanda ve mfunu nde beto sosa kuzaba dibanza ya Nzambi na dyambu yai? Ebuna, inki beto lenda longuka na Ndinga na yandi, Biblia, na yina metala dyambu yai?

Mutindu Nzambi Vandaka Kusala Mambu ti Bantu na Ntangu ya Ntama

Kiteso ya bamvula 4 400 meluta, mvula mosi ya ngolo kufulusaka ntoto ya mvimba. Yo vandaka mpasi na kuvila dyambu ya mutindu yai, mpi bantu ya ndambu yonso ya ntoto ketaka masolo ya luzingu ya bankaka na bo na yina metala mvula yango. Ata mambu yankaka ya fyotifyoti ya kevandaka na kati ya masolo yango keswaswanaka, yo kevandaka ti mambu mingi ya kufwanana, mpi yo kendimaka nde bantu fyoti mpamba ti mwa ndambu ya bambisi kugulukaka na mvula yango.

Keti bantu yina kufwaka ve na Mvula ya Ngolo kugulukaka kaka sambu bo vandaka na shanse mingi? Disolo ya Biblia kemonisa nde yo vandaka ve mutindu yina. Dyambu ya mfunu kele nde,  Nzambi kuzabisaka ve konso muntu nde yandi tanokisa Mvula ya Ngolo. Kansi, yandi songaka Noa, ebuna Noa kwendaka kukebisa bantu ya ntangu na yandi nde kubikala fyoti Mvula ya Ngolo kunoka.​—Kuyantika 6:13-16; 2 Piere 2:5.

Sambu na kuguluka, yo lombaka kusala kumosi ti kimvuka yai mpi kundima na luzolo yonso lutwadisu yina Nzambi kupesaka na Noa. Ata bambisi yina kuvandaka na kati ya maswa kugulukaka na Mvula ya Ngolo kaka sambu yo vandaka kisika mosi ti kimvuka ya bantu yina. Nzambi kupesaka Noa bantuma ya sikisiki na yina metala kutanina luzingu ya bambisi.​—Kuyantika 6:17–7:8.

Bamvu-nkama mingi na nima, bana ya Noa yina kubutukaka na mwana na yandi Semi kukumaka bampika na Ezipte. Kansi, lukanu ya Nzambi kuvandaka ya kukatula bo na kimpika mpi kunata bo na ntoto yina yandi silaka na nkaka na bo Abrahami. Nzambi kuzabisaka mpi ve dyambu yai na konso muntu, kansi yandi zabisaka yo ntete na bantu yina yandi ponaka na kuvanda bantwadisi, disongidila Moize ti mpangi na yandi Aroni. (Kubasika 3:7-10; 4:27-31) Na nima ya kubasisa kimvuka yonso ya bantu yina kuvandaka ntete bampika na Ezipte, Nzambi kupesaka bo Nsiku na yandi na Ngumba ya Sinai mpi yandi kumisaka bo dikanda ya Izraele.​—Kubasika 19:1-6.

Konso muntu yina kuvandaka na dikanda ya Izraele kugulukaka kaka sambu yandi vandaka na kati ya kimvuka yina Nzambi kutulaka mpi yandi landaka lutwadisu ya bantwadisi yina Nzambi kuponinaka kimvuka yango. Nkutu Nzambi kupesaka bantu ya Ezipte nswa ya kukota na kati ya kimvuka ya bantu yai ya yandi ndimaka pwelele. Ntangu bantu ya Izraele kubasikaka na Ezipte, bantu ya Ezipte yango kukwendaka ti bo, mpi bo vandaka ti kivuvu nde Nzambi tasakumuna bo.​—Kubasika 12:37, 38.

Na nima, na mvu-nkama ya ntete, Yezu yantikaka kisalu na yandi ya kusamuna, mpi ya kuvukisa bantu yina vandaka kukuma balongoki na yandi. Yandi vandaka kusala ti bo na kimvuka, ata yandi vandaka kutula mpi dikebi ya zola na bantu yankaka na kutadilaka bampusa na bo. Yezu kutubilaka bantumwa 11 ya kwikama nde: “Na bampasi yonso ya mono vandaka kumona, beno vandaka kutina mono ve. Mono ke pesa beno kiyeka ya kuyala na Kimfumu ya Tata na mono mutindu yandi pesaka mono mpi yo.” (Luka 22:28, 29) Na nima, mpeve santu ya Nzambi kukulumukaka na zulu ya balongoki ntangu bo vandaka kisika mosi na kimvuka.​—Bisalu 2:1-4.

Bambandu yai kemonisa pwelele nde na ntangu ya ntama Nzambi vandaka kusala mambu ti bantu na yandi na kimvuka mosi ya kuyidika. Ndambu ya bantu yina Nzambi kusadilaka mosimosi, mu mbandu, Noa, Moize, Yezu mpi bantu yankaka, yandi sadilaka bo na mpila nde bo nata nsangu na Yandi na kimvuka mosi ya bantu yina kuvandaka mpenza na bumosi. Beto kele ve ata ti kikuma mosi ya kukwikila nde bubu yai Nzambi kesadilaka bansadi na yandi mutindu yankaka. Nkutu ngindu yai kebasisa ngyufula yankaka: Keti kuvanda muntu ya kimvuka ya lusambu mosi mefwana? Beto tatadila ngyufula yai na disolo yina melanda.

[Kifwanisu ya kele na lutiti 4]

Banda ntama Nzambi kesadilaka bantu na yandi na kimvuka mosi ya kuyidika