‘Beno Longa Bo na Kulanda Mambu Yonso ya Mono Vandaka Kusonga Beno’

“Yo yina, beno kwenda kukumisa bantu . . . balonguki . . . beno longa bo . . . na kulanda mambu yonso ya mono vandaka kusonga beno.”​—MATAYO 28:19, 20.

1. Inki disolo longoki Filipi kusolulaka ti muntu mosi ya Etiopia?

MUNTU ya Etiopia kukwendaka na Yeruzalemi. Kuna, yandi sambaka Yehowa, Nzambi yina yandi vandaka kuzola. Yo kemonana pwelele nde yandi vandaka kuzola mpi Ndinga ya kupemama ya Nzambi. Ntangu muntu yai vandaka kuvutuka na insi na yandi na zulu ya pusupusu na yandi, yandi vandaka kutanga kopi mosi ya masonuku ya profete Yezaya ntangu yandi kutanaka ti Filipi, longoki mosi ya Kristu. Filipi kuyulaka muntu ya Etiopia nde: “Keti nge ke bakisa mambu ya nge ke tanga?” Muntu ya Etiopia kuvutulaka nde: “Nki mutindu mono lenda bakisa yo kana muntu ya kutendula mono yo kele ve?” Filipi yantikaka kusadisa longoki yai ya masonga ya Masonuku na kukuma longoki ya Kristu.​—Bisalu 8:26-39.

2. (a) Na nki mutindu mvutu ya muntu ya Etiopia kupesaka kele mfunu? (b) Inki bangyufula beto tatadila na yina metala ntuma ya Kristu ya kukumisa bantu balongoki?

² Mvutu ya muntu ya Etiopia kele mfunu mingi. Yandi tubaka nde: “Nki mutindu mono lenda bakisa yo kana muntu ya kutendula mono yo kele ve?” Ya kyeleka, yandi vandaka na mfunu ya muntu yina fwete tendudila yandi mambu ya yandi vandaka kutanga, to kusonga yandi nzila. Mvutu yai yo mosi kemonisa mfunu ya mambu ya sikisiki yina Yezu kutubilaka na kisalu ya kukumisa bantu balongoki yina yandi lombaka balongoki na yandi na kusala. Inki mambu? Sambu na kuzwa mvutu, bika beto landa na kutadila bangogo ya Yezu yina kele na Matayo kapu ya 28. Disolo ya kulutaka kubendaka dikebi na bangyufula sambu na inki? mpi inki kisika? Ntangu yai beto tatadila bangyufula zole yankaka ya metadila ntuma ya Kristu ya kukumisa bantu balongoki​—inki mambu? mpi nki ntangu?

‘Beno Longa Bo na Kulanda Mambu Yonso’

3. (a) Inki mutindu muntu kekumaka longoki ya Yezu Kristu? (b) Kukumisa bantu balongoki kelombaka kulonga nki mambu?

³Inki mambu beto fwete longa sambu na kusadisa bankaka na kukuma balongoki ya Kristu? Yezu kupesaka ntuma yai na balongoki na yandi: “Yo yina, beno kwenda kukumisa bantu [ya makanda] yonso balonguki na mono: Beno botika bo na zina ya Tata ti ya Mwana ti ya Mpeve-Santu, beno longa bo mpi na kulanda mambu yonso ya mono vandaka kusonga beno na kusala.” (Matayo 28:19, 20) Yo yina, beto fwete longa mambu yina Kristu kusongaka balongoki na kusala. * Kansi, inki beto fwete sala sambu muntu ya beto kelonga bantuma ya Kristu kusuka kaka ve na kukuma longoki ya Yezu, kansi yandi landa mpi na kuvanda longoki na yandi? Dyambu mosi ya mfunu kemonana na bangogo ya kupona mbote yina Yezu kusadilaka. Simba mbote nde yandi tubaka kaka ve nde: ‘Beno longa bo mambu yonso ya mono vandaka kusonga beno.’ Kansi, yandi tubaka nde: ‘Beno longa bo na kulanda mambu yonso ya mono vandaka kusonga beno na kusala.’ (Matayo 19:17) Dyambu yai ketendula inki?

4. (a) Kulanda ntuma ketendula inki? (b) Pesa mbandu ya kemonisa mutindu beto kelongaka muntu na kulanda bansiku ya Kristu.

⁴ Kulanda ntuma ketendula “kusala mambu yina” nsiku mosi kelomba nge na kusala, disongidila kuzitisa to kulanda yo. Ebuna, inki mutindu  beto lenda longa muntu na kulanda, to kuzitisa, mambu yina Kristu kusongaka balongoki na kusala? Yindula mutindu longi mosi ya kelongaka mutindu ya kutambusa kaminio kelongaka balongoki na yandi na kulanda bansiku ya nzila. Longi lenda longa bo bansiku yango ntangu bo kele na kati ya nzo-nkanda. Kansi, sambu na kulonga balongoki na yandi mutindu ya kuzitisa bansiku ya nzila, yandi fwete songaka bo mutindu ya kuzitisa yo na ntangu bo ketambusa kaminio na nzila mpi bo kenwana na kusadila bansiku ya bo longukaka. Mutindu mosi mpi, ntangu beto kelongukaka Biblia ti bantu, beto kelongaka bo bansiku ya Kristu. Kansi, beto mpi fwete songa balongoki nzila ya kulanda na ntangu bo kesala kikesa na kusadila malongi ya Kristu na luzingu na bo ya konso kilumbu mpi na kisalu ya kusamuna. (Yoane 14:15; 1 Yoane 2:3) Yo yina, kulungisa mbotembote ntuma ya Kristu ya kukumisa bantu balongoki kelombaka nde beto longa mpi beto songa bo mutindu ya kusadila malongi yango. Kana beto kesala mutindu yina, beto talanda mbandu yina Yezu mpi yandi mosi Yehowa kubikilaka beto.​—Nkunga 48:15; Kusonga 7:17.

5. Sambu na nki kulemfuka na ntuma ya Kristu ya kukumisa bantu balongoki lenda vanda mpasi sambu na muntu mosi ya beto kelongukaka ti yandi Biblia?

⁵ Kulonga bankaka na kulanda bantuma ya Yezu kelombaka mpi kusadisa bo na kulanda ntuma ya kukumisa bantu balongoki. Yo lenda vanda mpasi sambu na bantu yankaka yina beto kelongukaka ti bo Biblia. Ata bo vandaka ntete kusala bisalu na dibundu mosi ya Kikristu, yo kele pwelele nde balongi ya dibundu na bo ya ntete kulongaka bo ve ata fyoti na kukwenda kukumisa bantu balongoki. Bantwadisi mingi ya mabundu kendimaka na masonga yonso nde mabundu ya Kikristu menungaka ve ata fyoti na kulonga bantu na bo na kwenda kulonga evanzile. Ntangu John R. W. Stott, muntu mosi ya mayele ya kelongukaka Biblia kutubilaka ntuma ya Yezu ya kukwenda na inza mpi kusadisa bantu ya mitindu yonso na kukuma balongoki, yandi tubaka nde: “Kukonda kulemfuka na mambu yonso ya ntuma yai kelombaka kele dyambu mosi ya kuluta nene ya Bakristu yina kelongaka evanzile bubu yai menungaka ve na kusala ata fyoti.” Yandi yikaka nde: “Beto kemekaka kulonga nsangu na beto na ntama. Beto kemonanaka bantangu yankaka bonso bantu yina metelema na lweka ya nzadi ebuna beto kebinga bantu yankaka yina ke na kudinda na masa na ndinga ya ngolo. Beto kekotaka ve na masa sambu na kwenda kugulusa bo. Beto kewaka boma nde masa tapodisa beto.”

6. (a) Ntangu beto kesadisa longoki mosi ya Biblia, inki mutindu beto lenda landa mbandu ya Filipi? (b) Inki mutindu beto lenda monisa dikebi na beto ntangu longoki ya Biblia kebasika mbala ya ntete na kisalu ya kulonga?

⁶ Kana muntu mosi ya beto kelongukaka ti yandi Biblia kuvandaka ntete na dibundu yina bantu ‘kewaka boma nde masa kupodisa bo,’ yo lenda vandila yandi mpasi na kukatula boma ya kukota na masa ya kifwani, disongidila, na kulemfuka na ntuma ya Kristu ya kukumisa bantu balongoki.  Yandi tavanda na mfunu ya lusadisu. Yo yina, beto fwete kanga ntima na ntangu beto kepesa yandi malongi mpi lutwadisu yina tasadisa yandi na kubakisa mambu na mudindu mpi tapusa yandi na kusadila yo, kaka mutindu malongi ya Filipi kukangulaka muntu ya Etiopia meso mpi kupusaka yandi na kubaka mbotika. (Yoane 16:13; Bisalu 8:35-38) Dyaka, mpusa na beto ya kulonga balongoki ya Biblia na kulanda ntuma ya kukumisa bantu balongoki kepusaka beto na kubasika ti bo sambu na kutwadisa bo na ntangu bo kebasikaka na kisalu ya kulonga Kimfumu na mbala ya ntete.​—Longi 4:9, 10; Luka 6:40.

“Mambu Yonso”

7. Kulonga bankaka na “kulanda mambu yonso” ketendula kulonga bo nki bansiku?

⁷ Beto kesukaka kaka ve na kulonga balongoki ya mpa na kukumisa bantu balongoki. Yezu kulombaka beto na kulonga bankaka na “kulanda mambu yonso” ya yandi songaka balongoki na kusala. Ntembe kele ve nde bansiku zole ya kuluta mfunu, disongidila, kuzola Nzambi mpi kuzola mpangi, kele na kati ya mambu yango. (Matayo 22:37-39) Inki mutindu beto lenda longa longoki mosi ya mpa na kulanda bansiku yai?

8. Pesa mbandu yina kemonisa mutindu beto lenda longa longoki mosi ya mpa nsiku yina metala kumonisa zola.

⁸ Yibuka dyaka mbandu ya longoki yina kelonguka kutambusa kaminio. Ntangu longoki ketambusa kaminio na nzila ti longi na lweka na yandi, yandi kelonguka kaka ve na kuwa mambu ya longi ketuba, kansi yandi ketala mpi mutindu bashofere yankaka ketambusa. Mu mbandu, longi lenda songa yandi shofere mosi ya ntima ya mbote yina kelutisa shofere yankaka na ntwala; to shofere mosi yina kekitisa nsemo ya bamwinda ya kaminio na yandi sambu bashofere yankaka kuwa ve mpasi na meso; to shofere mosi ya kesadisa muntu mosi ya yandi mezaba na kuyidika kaminio na yandi na luzolo yonso. Bambandu ya mutindu yai kepesaka longoki malongi ya mfunu ya yandi lenda sadila na ntangu yandi ketambusa kaminio. Mutindu mosi, longoki ya mpa yina ketambula na nzila ya kenata na luzingu kelongukaka kaka ve mambu yina longi na yandi kelongaka yandi, kansi yandi kelongukaka mpi na nsadisa ya bambandu ya mbote yina yandi kemonaka na dibundu.​—Matayo 7:13, 14.

9. Inki mutindu longoki mosi ya mpa lenda longuka ntendula ya kulanda nsiku ya kumonisa zola?

⁹ Mu mbandu, longoki mosi ya Biblia lenda mona mpangi mosi ya nkento ya kesansaka bana yandi mosi yina kesala mpenza kikesa sambu na kukwisa na Nzo ya Kimfumu ti bana na yandi ya fyoti. Yandi lenda mona mpangi mosi ya nkento yina kenyokwamaka na mabanza kansi ya kekondaka ve na balukutakanu ata yandi kenwana ti mpasi yina, mufwidi mosi ya mununu yina kenataka minunu yankaka na kaminio na yandi na konso lukutakanu ya dibundu, to leke mosi ya kepesa maboko na kukomba Nzo ya Kimfumu. Longoki ya Biblia lenda mona nkuluntu mosi ya kebasikaka ntangu yonso na kisalu ya bilanga, ata yandi kele ti mikumba mingi na kati ya dibundu. Yandi lenda kutana ti Mbangi mosi ya kele ti kifu na nitu mpi ya kebasikaka ve na nzo na yandi, kansi yina kepesaka bantu yonso yina kekwendaka kutala yandi kikesa na kimpeve. Longoki lenda tala bankwelani yina kesalaka kikesa sambu na kusala bansoba na luzingu na bo na mpila nde bo sadisa bibuti na bo ya minunu. Na ntangu yandi ketala Bakristu ya mbote, ya kesadisaka, mpi ya mefwana na kutudila ntima ya mutindu yai, longoki ya mpa talonguka, na nsadisa ya bambandu, ntendula ya kulemfukila nsiku ya Kristu ya kuzola Nzambi ti mpangi, mingimingi bampangi na yandi Bakristu. (Bingana 24:32; Yoane 13:35; Galatia 6:10; 1 Timoteo 5:4, 8; 1 Piere 5:2, 3) Kana beto kesala mutindu yai, konso muntu na kati ya dibundu ya Bukristu lenda, mpi fwete vanda longi mpi ntwadisi.​—Matayo 5:16.

“Tii na Nsuka ya Ntoto”

10. (a) Tii nki ntangu beto talanda na kukumisa bantu balongoki? (b) Inki mbandu Yezu mebikilaka beto na yina metala kulungisa mikumba na beto?

¹⁰ Tii nki ntangu beto fwete landa na kukumisa bantu balongoki? Tii na nsuka ya ntoto to ya ngidika ya bima. (Matayo 28:20) Keti beto takuka kulungisa kisalu yai ya Yezu kupesaka? Dibundu na beto yina kele na inza ya mvimba kele ti lukanu ya kusala mutindu yina. Na bamvula meluta, beto vandaka kupesa ntangu, ngolo, mpi bimvwama na beto na kyese yonso sambu na kusosa bantu yina kele “ya kuyilama sambu na kubaka luzingu ya mvula na mvula.” (Bisalu 13:48, NW) Ntangu yai, konso kilumbu Bambangi ya Yehowa ke na kulutisa kiteso ya bangunga kuluta bamilio tatu na kisalu ya kulonga Kimfumu mpi ya kukumisa  bantu balongoki na inza ya mvimba. Beto kesalaka mpidina sambu beto kelandaka mbandu ya Yezu. Yandi tubaka nde: “Madia na mono kele yo yai: na kulanda luzolo ya muntu yina tindaka mono ti na kumanisa kisalu yina ya yandi me pesaka mono na kusala.” (Yoane 4:34) Yo yina mpi kele mpusa na beto ya masonga. (Yoane 20:21) Beto kezola kusuka kaka ve na kuyantika kisalu yina bo mepesaka beto; kansi beto kezola mpi kumanisa yo.​—Matayo 24:13; Yoane 17:4.

11. Inki mekuminaka bampangi-Bakristu yankaka ya babakala ti ya bankento, mpi nki ngyufula beto fwete kudiyula?

¹¹ Kansi, beto kewaka mawa na kumona nde bampangi-Bakristu yankaka kelembaka na kimpeve mpi, nsukansuka, bo kelembisaka maboko to keyambulaka na kulungisa ntuma ya Kristu kupesaka ya kukumisa bantu balongoki. Keti mpila kele ya kusadisa bo na kuvutukila kuvukana ti dibundu mpi kusala dyaka kisalu ya kukumisa bantu balongoki? (Roma 15:1; Baebreo 12:12) Mutindu Yezu kusadisaka bantumwa na yandi na mwa ntangu ya fyoti yina bo lembaka kemonisa mambu yina beto lenda sala bubu yai.

Beto Monisa Mawa

12. (a) Ntangu fyoti na ntwala ya lufwa ya Yezu, inki mambu balongoki na yandi kusalaka? (b) Inki mutindu Yezu kutadilaka bantumwa na yandi ata bo salaka bifu ya nene?

¹² Na nsuka ya kisalu na yandi na ntoto, ntangu lufwa na yandi kukumaka penepene, bantumwa ‘kubikisaka yandi, bo tinaka.’ Mutindu Yezu kutubaka yo na ntwala, bo ‘panzanaka mosi-mosi, konso muntu na nzo na yandi.’ (Marko 14:50; Yoane 16:32) Inki mutindu Yezu kutadilaka banduku na yandi yina kulembaka na kimpeve? Ntangu fyoti na nima ya lufutumuku na yandi, Yezu kutubilaka balongoki na yandi yankaka nde: “Beno kuwa boma ve. Beno kwenda kuzabisa bampangi na mono nde bo kwenda na Galilea; bo ta mona mono kuna.” (Matayo 28:10) Ata bantumwa kusalaka bifu ya nene, Yezu kubingaka bo kaka “bampangi na mono.” (Matayo 12:49) Yandi katulaka ve ntima yina yandi vandaka kutudila bo. Na mutindu yina, Yezu kumonisaka ntima ya mawa mpi ya kulolula, kaka mutindu Yehowa kewaka mawa mpi kelolulaka. (2 Bantotila 13:23) Inki mutindu beto lenda landa mbandu ya Yezu?

13. Inki mutindu beto fwete tadila bantu yina melembaka na kimpeve?

¹³ Beto fwete monisa mpenza mawa na bantu yina melembaka to kebasikaka dyaka ve na kisalu ya kusamuna. Beto keyibuka dyaka bisalu ya zola yina bampangi yango vandaka kusala ntete, bankaka nkutu kusalaka yo na nsungi ya bamvula mingi. (Baebreo 6:10) Ya kyeleka, kyese yina beto vandaka kuwa na kubasika ti bo ke na kukonda beto ntangu yai. (Luka 15:4-7; 1 Tesalonika 2:17) Kansi, inki mutindu beto lenda monisa bo mawa?

14. Sambu na kulanda mbandu ya Yezu, inki mutindu beto lenda sadisa muntu yina melembaka?

¹⁴ Yezu kutubilaka bantumwa yina kulembaka nde bo fwete kwenda na Galilea mpi bo tamona yandi kuna. Na kutuba ya mbote, Yezu kulombaka bo na kukwenda na lukutakanu mosi ya sipesiali.  (Matayo 28:10) Mutindu mosi mpi bubu yai, beto kesyamisa bantu yina melembaka na kimpeve na kukwenda na balukutakanu ya dibundu ya Bukristu, mpi yo lenda vanda mfunu nde beto landa na kusyamisaka bo mbala na mbala. Kubinga ya Yezu kubingisaka bantumwa kubutaka bambuma, sambu “balonguki yina kumi na mosi kwendaka na ntoto ya Galilea na ngumba yina Yesu songaka bo na kwenda.” (Matayo 28:16) Mutindu mosi mpi, beto kevandaka na kyese kibeni ntangu bantu ya melembaka kendimaka nsyamisa ya beto kepesaka bo na kyese yonso mpi kevutukilaka kukwisa na balukutakanu ya Bukristu!​—Luka 15:6.

15. Inki mutindu beto lenda landa mbandu ya Yezu na yina metala kuyamba bantu yina kulembaka kansi ya kevutukila balukutakanu na beto?

¹⁵ Inki beto tasala kana Mukristu mosi ya melembaka mekwisa na Nzo ya Kimfumu? Inki Yezu kusalaka ntangu yandi monaka bantumwa na yandi, yina lukwikilu na bo kulembaka fyoti, mekwisa na kisika ya yandi songaka bo nde bo kutana? “Yesu kwisaka penepene na bo, ebuna yandi tubilaka bo.” (Matayo 28:18) Yandi tadilaka bo ve na ntama, kansi yandi kwendaka na kisika yina bo vandaka. Yindula kyese yina bantumwa kuwaka ntangu Yezu kubakaka lukanu ya kukwenda na kisita yina bo vandaka! Bika beto mpi kubaka lukanu ya kukwenda kuyamba na kyese yonso bantu yina kulembaka na kimpeve kansi ya kesala kikesa sambu na kuvutukila dibundu ya Bukristu.

16. (a) Inki beto lenda longuka na mambu yina Yezu kusadilaka balongoki na yandi? (b) Inki beto lenda sala sambu na kumonisa dibanza ya Yezu na bantu yina melembaka? (Tala noti na nsi ya lutiti.)

¹⁶ Inki mambu yankaka Yezu kusalaka? Ya ntete, yandi pesaka bo nsangu nde: “Nzambi me pesaka mono kiyeka yonso.” Ya zole, yandi pesaka bo kisalu yai: “Yo yina, beno kwenda kukumisa bantu yonso balonguki.” Ya tatu, yandi pesaka bo lusilu nde: “Mono ta vandaka ti beno bilumbu yonso.” Keti nge memona mambu ya Yezu kusalaka ve? Yandi nganinaka ve balongoki sambu na bifu na bo mpi sambu bo vandaka ti badute. (Matayo 28:17, NW) Keti metode ya yandi sadilaka kubutaka mbuma? Ee. Na nima ya ntangu fyoti, bantumwa yantikaka dyaka ‘kulonga ti kuzabisa Nsangu ya Mbote.’ (Bisalu 5:42) Kana beto kelanda mbandu ya Yezu mutindu yandi vandaka kutadila mpi kubaka bantu ya kulembaka, beto lenda baka mpi bambuma ya kyese ya mutindu mosi na dibundu na beto. *​—Bisalu 20:35.

“Mono Ta Vandaka ti Beno Bilumbu Yonso”

17, 18. Inki bangindu ya kepesa kikesa beto lenda baka na bangogo ya Yezu yina ketuba nde “mono ta vandaka ti beno bilumbu yonso”?

¹⁷ Bangogo ya nsuka ya ntuma ya Yezu, “mono ta vandaka ti beno bilumbu yonso,” kele ti ngindu mosi ya kepesa kikesa na bantu yonso yina kesalaka kikesa sambu na kuzitisa ntuma ya Kristu ya kukumisa bantu balongoki. Ata konso nki kimbeni yina bambeni lenda basisa sambu na kukangisa kisalu na beto ya kulonga Kimfumu mpi kukusila beto konso nki mambu yina, beto kele ve ti kikuma ya kuwa boma. Sambu na nki ve? Yezu, Ntwadisi na beto, yina kele ti ‘kiyeka yonso na zulu ti na ntoto,’ kele ti beto sambu na kusadisa beto!

¹⁸ Lusilu ya Yezu yina ketuba nde “mono ta vandaka ti beno bilumbu yonso” kele mpi nto mosi ya kepesa kikesa mingi. Na ntangu beto kesalaka kikesa na kuzitisa ntuma ya Kristu ya kukumisa bantu balongoki, beto kemonaka kyese mpamba ve, kansi beto kemonaka mpi mpasi. (2 Bansangu 6:29) Bampangi na beto mingi kele na susi sambu na lufwa ya muntu mosi ya bo kezolaka mingi. (Kuyantika 23:2; Yoane 11:33-36) Bankaka kenwana ti kimununu sambu bo kebela-bela mpi ngolo na bo ke na kumana. (Longi 12:1-6) Bankaka dyaka kezinga na nsungi mosi ya mpasi sambu mabanza na bo kenyokwama mpenza. (1 Tesalonika 5:14) Mpi ntalu ya bampangi na beto yina kenwana ti bampasi ya ngolo ya kuzwa mbongo kelanda kaka na  kukuma mingi. Kansi, ata beto kekutana ti bampasi ya mutindu yai, beto kenungaka na kusala kisalu na beto ya kusamuna sambu Yezu kele ti beto “bilumbu yonso,” ata na bilumbu ya kuluta mpasi ya luzingu na beto.​—Matayo 11:28-30.

19. (a) Inki malongi kele na kati ya kisalu yina Yezu kupesaka ya kukumisa bantu balongoki? (b) Inki kesadisaka beto na kulungisa ntuma ya Kristu?

¹⁹ Mutindu beto memona yo na disolo yai mpi yina kulutaka, kisalu yina Yezu kupesaka ya kukumisa bantu balongoki kelomba kulungisa mambu yonso ya yandi tubilaka. Yezu kutubilaka beto sambu na nki mpi nki kisika beto fwete lungisa ntuma na yandi. Yandi tubilaka beto mpi mambu ya beto fwete longa mpi tii nki ntangu beto fwete longo yo. Ya kyeleka, kulungisa kisalu yai ya nene kele mpasi. Kansi, sambu kiyeka ya Kristu kesadisa beto mpi sambu yandi kele ti beto, beto lenda lungisa yo! Mpidina ve?

[Banoti na nsi ya lutiti]

Inki Mvutu Nge Tapesa?

• Inki mutindu beto kelongaka bankaka na kulanda mambu ya Yezu mesongaka balongoki na kusala?

• Inki malongi longoki ya mpa lenda longuka na bambandu ya bantu yankaka na kati ya dibundu?

• Inki beto lenda sala sambu na kusadisa bayina melembaka na kimpeve?

• Inki kikesa beto kebaka na lusilu ya Yezu yina ketuba nde “mono ta vandaka ti beno bilumbu yonso”?

[Bangyufula ya disolo ya kulonguka]

[Bifwanisu ya kele na lutiti 26]

Beto fwete vanda balongi mpi bantwadisi

[Bifwanisu ya kele na lutiti 28]

Longoki ya mpa kelongukaka malongi ya mfunu na bambandu ya bankaka kepesaka