Mukanda Mosi ya Bo Sonikilaka Noa

“MPANGI ya luzolo Noa, mono metangaka mbala mingi na Biblia mambu yina metala nge mpi mutindu nge tungaka maswa yina kugulusaka nge ti dibuta na nge na Mvula ya Ngolo.”

Yai kele bangogo ya luyantiku ya mukanda ya mwana-nkento mosi ya bamvula 15, na zina ya Minnamaria, kusonikaka ntangu bo salaka nsaka mosi ya kutesana ya kusonika ya bana ya nzo-nkanda ya bamvula banda na 14 tii na 21. Bantu kuyidikaka nsaka yango kuvandaka kimvuka mosi ya babiro ya Finlande yina ketindaka, keyambaka mpi kekabisaka mikanda, kimvuka ya balongi yina kelongaka ndinga ya Finnois na bana-fyoti, mpi kimvuka yina kebasisaka mikanda na ndinga ya finnois. Bo lombaka na bana yina kusalaka nsaka yango na kusonika mukanda mosi yina bangindu na yo fwete katuka na buku mosi buna. Bo lombaka bo na kusonikila nsoniki ya buku yango to muntu mosi ya buku yango ketubila. Balongi kuponaka mikanda kuluta 1 400 na kati ya mikanda yina bana ya kusalaka nsaka kusonikaka mpi bo tindaka yo na bantu yina fwete pesa matonsi. Na nima, bantu yango kuponaka ntete mukanda mosi ya kuluta mbote ya bo tulaka na kisika ya ntete, mikanda kumi ya mbote ya bo tulaka na kisika ya zole mpi mikanda kumi yankaka ya mbote ya bo tulaka na kisika ya tatu. Minnamaria kuvandaka na kyese na kumona nde mukanda na yandi kuvandaka na kati ya mikanda kumi yina kuvandaka na kisika ya tatu.

Sambu na nki Minnamaria, mwana ya nzo-nkanda yai ya leke, kusonikaka mukanda na yandi na Noa, muntu yina kuzingaka bamvula kiteso ya 5 000 meluta? Yandi ketendula nde: “Biblia kuvandaka mukanda ya ntete ya mono yindulaka. Mono mebakisaka luzingu ya bantu mingi yina Biblia ketubilaka. Mono metangaka mambu mingi ya metala bo mpi bo kemonanaka na meso na mono bonso nde bo kele dyaka na luzingu. Mono ponaka Noa sambu luzingu na yandi kesepedisaka mono mingi mpi yo kele ya kuswaswana ti luzingu na mono.”

Mukanda ya Minnamaria kusonikilaka Noa kesuka na bangogo yai: “Tii bubu yai, nge kele mbandu ya muntu mosi yina kumonisaka lukwikilu mpi bulemfu. Luzingu na nge kesyamisaka bantu yonso yina ketangaka Biblia na kumonisa lukwikilu na bo na bisalu.”

Mukanda ya leke yai ya ketangaka Biblia kusonikaka kemonisa nde Biblia kele mpenza “ya moyo mpi ya ngolo” (NW) sambu na bantu yonso, baleke ti bambuta.​—Baebreo 4:12.